دارت الدنيا لتدق طبول قلبي

البارت التاسع عشر

تقربت منه خفت عليه اريد اهونها بس اعرف ماتهون من لاجارة حجيت..

نغم : الصار بعد مايرجع والمكتوب نشوفه وانت لازم تؤمن بهذا الشي لان حرام ...

رفع عينه باوعلي وملامحه تمطر حزن..

هجان : والصارلي ؟ مو حرام ؟ انتِ شايفة من تحبين بعمق وبقوة وترجفين خوف لا بيوم من الأيام يجي الموت وهو حق علينا وياخذ منج هذا العزيز ، بعدها هذا الانسان الكلبج وعقلج مدمن عليه وعلى سوالفه وحافظ شكلة بحيث خازنه هنا..

يحجي ويضرب على عقله.

_ يعوفج بدون مبرر ، اختار ينهي الحرب ويعيش بسلام ،

بس تخيلي ويايه الجنت خايف عليها لا تنكسر كسرتني ، تعرفين حجم مصيبتي شكبرها ، اعز ثنين على كلبي انجمعوا سوة بيت واحد بحضن واحد وفرشة وحدة..

حبيبتي وصديق عمري واخوية سويه ، شايفة حجم مصيبتي شكبرها ...

نغم : والله اعرف واكثر وحدة اني حاسة بيك وعايشة ألمك بس راح تموت كافي حرام عليك نفسك تحاسبك ياهجان اصحى كافي عاد..

هجان : لا الألم مايأذي بس صاحبه يمكن صدك تنقهرين عليه وتتألمين وتتمنين تهونين عليه بس انتِ ما عايشة بداخلي وشامه ريحة العطاب الحاس بيها ، لج داخلي كله محترك تصدكين النفس من يطلع يحرك حنجرتي تخيلي حتى الجكاير عفتها لان نار بصدري اريد شي يبردها ماكو..

نغم : احنا مو حجينا بهذا الموضوع قبل كم يوم وكلتلي صرت زين وخليتني اصدك تجاوزنا هاي المرحلة شو رجعت انتكست..

التفت باوعلي بقهر وكال..

هجان : كاعدين نحجي عن ملاك مو قطعة اثاث واجيت غيرتها لو سيارة وبدلتها..

نغم : مو كلت راح اتجاوز الموقف واشوف حياتي والله هذا حجيك اني شعليه...

تنهد اخذ نفس عميق دنك راسه خلاه بين ايديه وحجه كلمة كلمة..

هجان : مستحيل نكدر نتجاوز الماضي ، عشر سنوات بصيفها وشتاها حرها وبردها ، فرحها وقهرها ، عشنا احداث وتفاصيل هووواي يانغم هوواي شنو انسى ملامحها من تباوعلي خايفة ؟ لو من تنتظر جيتي بلهفة وبس تشوفني ضحكتها ترسم وجهه رسم ..

ضحك هز راسه والتفت على الجهة البعيدة عني يتهرب بنظراته حتى لا اشوف ضعفه ولا اشوفه عمق الحزن التارس عيونه..

هجان : شكد تمنيت ما متعلق بيها ، تدرين بيه شكد كلبي جلد ،،، بس شلون تعلقت هيج شلون ،

اختنك اخذ نفس واسترسل ..

_ يعني انه عشت ويامن طفولتي ومراهقتي وبداية شبابي ويه فهد وضيغم وادهم ،و شبابي عشته ويه ملاك ،

وكلهم اولاد عمامي نفس الدم يمشي بعروكنه ، شويه شويه انسحب مني فهد وخسرته وهاي اول كسرة ظهر اليه ، بعدها خسرت اعز ثنين على كلبي بنفس الوقت وبنفس الصدمة ضيغم وملاك ، وشلون خسارة شلون خسارة يا الله..