❤ السيرة النبوية الجزء الثاني❤ من الحلقة 200

#الحلقة_مائتين_وواحد

#قصص_الأنبياء(٢)

#السيرة_النبوية

#الحلقة_مائتين_وواحد

#أحداث_السنة_التاسعة_من_الهجرة

#كعب_بن_مالك_الجزء_الثالث

وقفنا المرة إللي فاتت عند رسول الله ﷺ لما أرسل رجل لكعب بن مالك بعد أربعين يوم من مقاطعة المسلمين له عشان يخبره بخبر جديد،

الخبر الجديد للأسف مكنش خبر الفرج والخروج من الأزمة ولكنه كان خبر لزيادة الابتلاء،

قال الرجل لكعب بن مالك إن رسول الله ﷺ بيأمره إنه يعتزل امرأته،

فكعب سأله: أُطَلِّقُهَا أَمْ مَاذَا أَفْعَلُ؟

لأن كلمة اعتزال كان من معانيها عندهم الطلاق، فهو كان عايز يتأكد إذا كان يطلقها أو لأ،

فَقالَ: لَا، بَلِ اعْتَزِلْهَا فَلَا تَقْرَبَنَّهَا.

سبحان الله، كعب كان عنده استعداد يطلق زوجته لو كان جاء الأمر إنه يطلقها بدون أي تردد😮

يعني هو معترضش نهائي على أمر رسول الله ﷺ، لكنه سأل عن معنى الاعتزال، هل المطلوب منه يطلقها ولّا يعمل إيه، وهينفذ على طول👌

هو إيه أصلا إللي يخليه يستحمل الضغط ده كله😑

في ناس لما تتعرض لبعض البلاء متستحملش وتلاقيها اعترضت على ربنا ويسيبوا طريق ربنا خالص،

لكن كعب عارف قيمة الدين إللي بينتمي له ده، وعارف إنه أخطأ فبيواجه خطأه ده👌

فالصحابي قال له لا تطلقها ولكن متقربش منها،

فقال كعب لزوجته:

" الْحَقِي بِأهْلِكِ فَكُونِي عِنْدَهُمْ حَتَّى يَقْضِيَ اللهُ في هَذَا الْأَمْرِ"

يعني قالها تروح تقعد عند أهلها لحد ما الموضوع ده ينتهي،

والأمر ده جاء للثلاثة الذين خُلفوا يعني مش لكعب بس،

فزوجة هلال بن أمية راحت لرسول الله ﷺ وقالت له:

يَا رَسُولَ اللهِ، إِنَّ هِلَالَ بْنَ أُمَيَّةَ شَيْخٌ ضَائِعٌ لَيْسَ لَهُ خَادِمٌ، فَهَلْ تَكْرَهُ أَنْ أَخْدُمَهُ؟

يعني هلال بن أمية كبير في السن ومفيش حد يخدمه، وهي عايزة تقعد معاه تخدمه فبتستأذن رسول الله ﷺ إنها تقعد معاه تخدمه وبتسأل إذا رسول الله ﷺ بيكره كده أو لأ،

فقَالَ لها رسول الله ﷺ:لَا، وَلَكِنْ لَا يَقْرَبَنَّكِ👌

يعني رسول الله ﷺ وافق إنها تقعد معاه تخدمه ولكن ميقربش منها،

فَقَالَتْ:

"إِنَّهُ وَاللهِ مَا بِهِ مِنْ حَرَكَةٍ إِلَى شَيْءٍ، وَوَاللهِ مَا زَالَ يَبْكِي مُنْذُ كَانَ مِنْ أمْرِهِ مَا كَانَ إِلَى يَومِهِ هَذَا"