زنيبة وخواتها

((زنيبه وخواتها)) الحلقة الثانية

زنيبة/ شننننني شلون خاب يمه صكد يو تجذبين عليه

نورية/ خايبه وروح ابوج النايم بالنجف دكو عليه وجايين عليج خطابة واخيرا يمه اجه اليوم الي اشوفج بي عروس ورايحة لبيت رجلج يوم المنى هذا

زنيبة/ يمه فدوه انه كلبي راح يوكف العباس عليج الله صكد راح اعرس
انه راح اعرس والبس بدله هيج واقهر بصويحباتي ويصيرون عندي فروخ ويصيحولي ام فلان اعييي كزبر جلدي

نورية/ خايبه زنيبه شوفي اكلج هذا الزلمه اذا شرد منج العب بيج فلك انه ادري بيج خوثه وكلشي ما تفتهمين بس لزوم هالزواج يتم حتى افتك منج ومن شرج

حاجتني امي وطلعت من حجرتي وضليت انه مصدومه تمددت على فراشي وانه افكر شنو شعور الوحده من تنخطب ؟ معقوله هيج مثل ما كاعد احس !

انه ادري بيهن يفرحن جا شمالني كاضه كلبي خاف تخرب ليش هيج مستنكره الفرحه على روحي مو انه زلغت روحي على العرس والرجل جا شمالني مو هو هذا الزواج الي راح يخلصني من حجي العالم واخلص من لقب زنيبه المعنسه اوووف الله يستر بس

كوه نمت ليلتها من التفكير ها شني ها شلون

ثاني يوم الصبح كعدت حتى افهم السالفه فزيت على صوت هلاهل خواتي

سويرة/ كلللوووووووووووووش يوم الالي واذبح طلي يوم الالي هههههههه

نورية/ خايبه يمه حسج شهريتنه بسج

سويرة / خاب يمه فرحانه فرحانه بالعباس احس انه المخطوبه مو اخيتي واخيرا وحده منه راح تمشي قسمتها وبلكي الله وتجرنه وراها

حميدة/ يمه انتي ياهو الخابرج شلون عرفتي جايين ناس على زينبه ؟

نورية/ والله يا يمه انه جنت متمدده بفريشي ولنهه ام حسّين دكت علي الوو خيه جايين ناس على البت منين شلون ما عرفت كالتلي ان شاء الله انه الصبح امرنلج واسولفلج

سعيدة / يمه جا وينها كلوبنه راحت بله هسه هيه هاي سوايه تسويها مخليتنه هيج نتحركن تحركن شكول عليج ام حسّين ما اكدر احجي خاف هيه الجايبه الزلمه لزنيبه وادور تبطل وما تجيبلنه

نوريه / فلك صابج يا اسعيده عود احجي هيج جدام المره واشهرينه والعباس الي تحجي وتفچ حلكها من تجي المره اكضنها اكضي بيها التوبه خوش يو لا

سويره / خاب يمه اجت المره اجت

ام حسّين / السلام عليكم شلونكم عيني

نورية / هلا بيج خيه شلونج شلونج زينه

ام حسّين / الحمدلله على الله ماشيه انتو شلونكم البنات شلونهن

نورية / والله برحمه الله كواكات شني خيه انتي امس ذبيتي الحجايه وشردتي شني ياهو الجاي على زنيبه صكد عود جايين عليها خطابه

ام حسّين / ههههههه اي والله احبيبه البارحة اجتني ام جواد
المره تصير كرايب اهل خطيب اسراء لمن اجت بخطبه بنتي  شايفتها ومسولفله لابنها عليها
وخابرتني تسئل عليكم وهيه زينب بحسبه بنتي سرور كلتلها الابنيه معلمه ومتعيينه وشاغوله واهلها خوش ناس

نورية / بعد كلبي يا خيه ينطيج العافية

ام حسّين / حبيبتي ام زينب عزيزه وغاليه الله شاهد المهم داده ام جواد كالتلي شوفيهم ورديلنه خبر حتى اذا اكو موافقه نتوكل على الله ويجون يخطبون

نورية/ ان شاء الله خير خيه بس ما عرفنه الولد شيشتغل شني ما شني شمخلص شعنده ما عنده

ام حسين/ داده الولد مهندس ودا يشتغل بشركه وعنده بيت ب اسمه وسياره وبنتج ان شاء الله ما راح تنزل على عيال وهوسه راح تكعد ابيت عزال وحدها

نورية/ يا رايه الله بيضه انهجم بيتج يزنيبه صبرتي ونلتي

ام حسّين/ هههههههه الله يوفقها ويسعدها ان شاء الله ويقدم الي بي الخير

نورية/ بعد كلبي يستر عليج ان شاء الله ويخليلج راعي بيتج بجاه الزهره ام الحسن

ام حسّين/ فدوه لعمرج عيوني يله اني اترخص هم يله ورايه اعزل البيت وغده ضلت يمكم العافية وان شاء الله نسمع اخباركم الحلوه

نورية/ هلا بيج خيه كل الهلا سلمينه على بنيتج

ام حسّين / يوصل ان شاء الله يله عيني مع السلامه

نوريه / الله وياج خيه الله وياج
.............................................................................
زنيبه / ها يمه شني العلوم شكالتلج ام حسّين

نورية/ ولج زنيبه الله ما قصر المره جايبتلج زلمه للحلك وكامل مكمل

سويره / شني يمه سولفيلنه شلعتي كلوبنه

نورية /مهندس وعنده سياره وبيت وحده

سعيدة/ موااااااااااافقة اذا زنيبه ما تريده انه موافقة

زنيبة/ يمه جا انه ما اريدن هيج عرس شني انه اريد قصه حب شلون الافلام واعرس

نورية / شلون تريدني اكوم اكرمعها بالنعال خايبه انتي محصلة وترفضين انتي ما تجوزين صكد يو كالوا (( جابولها رجل وكالت اعور ))

حميده/ خاب خيه هيه ياهي العشكت وتزوجت هسه كله الزواج هيج هسه دخلي يخطبونج والدور اعشكي  وره الخطوبه لا تتعافين على رزقج يخيه

زنيبة/خاب شمالجن صدكتن هسه انه يو ما اكولن عيب وفشل جان طلعت بالشارع اركص انتن مسودنات بس غير اتدلع عليجن شويه

سعيدة / وانه كيفت كلت اخيتي ما تريد عرس بلكي ياخذني انه الك بيها اراده ربييييييييي

سويره/ الله يسعدج خيه وعلي فرحانه ازود منج جن انه المخطوبه

زنيبه / بعد كلبي يا خيه اصبريلي اعرس وافرن على كرايبه كلهم منا لحد ما الكاج وحيد ويزفونج اله باليله ضلمه

سويره/ هههههه خوش خيه خوش

نوريه/ جا خوش مادام انتي قابله العصر ادكن على ام حسّين واخليهم يجونه الخميس

زنيبة/ توكلي على الله يمه وهاي الرداها وهاي التمناها ...

يتبع.........