جدي ابتسم: ربي يعاونك باهي والمركز اللي قلتي عليه لخليفة ؟!
انا : هذا وصيت عليه عمي ناصر يشوفلي مبنى قريب للاجار واول ما نحصله نجهزوه باللازم و بعدين نبدوا بعون الله
حناي فرحانة: الله يعاونك يا بنتي و يفتحها عليك
انا : تسلمي يا رب
جميلة : فكرتك حلوة يا دوجة انك تديري زي الشركة خاصة بمنتوجات المزرعة من خضرة و زيت زيتون و تمور و رب
انا بطموح و عيون تلمع : مازال عندي أفكار و نبي نكبره المشروع بس حاليا حنكتفي بهكي لين نشوف الوضع
ياسمين بعفوية : و شن بتسميها الشركة
انا ع طول و بدون تفكير : الزهر والحنة
الكل تفاجأ
انا بابتسامة: هادي رغبة بابا الله يرحمه كان وين ما يجيب سيرة ليبيا يقول ارض الزهر والحنة و كان متمني يسمي المطعم متاعه هكي لكن قالي لما شريته معش قدرت نغير اسمه بسبب الإجراءات و شهرة المطعم
الكل : الله يرحمه
انا تنهدت : هيا انا منمشي نجهز روحي يا جدي
جدي وقف : هيا يا بنتي حتى انا ناخذ كبوطي و تلقيني برا
انا : تمام
خشيت لداري خذيت بالطو لونه رصاصي داكن و شاربة لونها وردي فاتح و فيها من نهايتها حروف انجليزية بالرصاصي و خذيت شنطتي لونها وردي و طلعت لبست سبيدرو (حذاء رياضي) لونه اسود بالرصاصي لبسته : هيا السلام عليكم يا عيلة
حناي و ياسمين وجميلة: وعليكم السلام / في حفظ الله
طلعت لجدي القيته مقعمز ع الكراسي اللي برا و سرحان
انا بصوت هادي: هيا جدي نمشوا
جدي شافلي هلبة : هيا يا بنتي
مشينا للمزرعة عن طريق الباب اللي طلبت من عمي يفتحه بين المزرعتين
فتحناه و خشينا كان الباب من جهة الحوش الكبير مش الملحق اللي ساكنة فيه العنود و عيلتها
اول ما قربت من الحوش تفاجات باللي شفته
سيارة نوع كيا فورتي باللون الأبيض مدرسة قدام الحوش : جدي شكلة في حد اهني زعما حد جاي لعيلة عمي خليفة؟
جدي ابتسم و حط ايده في جيبه و مدلي المفتاح: ما في حد براني مبارك يا بنتي
انا حطيت ايدي ع فمي من المفاجاة : ليا انا جدي ؟
جدي ابتسم و مازال ماد ايده: ليك يا بنتي شني ما عجباتكش
انا حضنته بفرحة كبيرة مش ع شان السيارة في حد ذاتها لا ع شان تفكيره فيا و ان ما نسانيش: اي شي منك يفرحني يا جدي انت في حسبة بوي ربي يطول في عمرك ع طاعته
Part 30
Start from the beginning