شهر واحد سنة 2018
يوم الجمعة الصبح
حوش الحاج محمد
ريحة السفنز تفحفح من الكوجينة
و الحاجة سالمة تكشكش في الشاهي الأحمر والأخضر في عالتها في صالة الحوش اللي يلتموا فيها العيلة كل جمعة مقعمزة ع مندار في الزاوية و مش بعيد عليها الحاج محمد يسبح و متكئ بجرده الأبيض و طاقيته السوداء و لحيته اللي بين الأبيض والاسود بس غالب عليها اللون الأبيض زي بياضة قلبه و نيته
خشت عليهم طيف حفيدتهم بالمبخرة تبخر : صباح الخير ع احلى جدود في الدنيا كلها (حطت المبخرة ع الطاولة و قربت باست ع راس جدها و حناها )
الحاج محمد : الله يصبحك بالخير والهني يا زينة البنات وينك تاخرتي عليا اليوم؟!
طيف بضحكة: سامحني يا جدو راحت عليا نومة!!
الحاجة سالمة حاضنة طيف بايد وحدة: معليشي يا سمحة من حقك ترقدي اليوم عاد راحتك !
طيف باستها: تسلمي يا غالية
الحاجة سالمة : اماله وين خوتك ؟!
طيف : مش عارفة نحسابهم اهني انا!!
شويا و خشوا طارق و طلال
طارق بهدوء و رزانة سلم ع راس جده و بعدها حناه و مشي قعمز جنب جده : صباح الخير
الحاج محمد : صباح النور كيف حالك يا طارق ؟
طارق: الحمدلله
الحاجة سالمة: هذا دكتورنا عاد منو زيه ربي يوفقك يا ولدي
طارق يا دوب ابتسم : شكرًا حناي
طلال : يعني شن المفروض ندير انا توا !! ترحيب و الأخ شادها ابتسامات كانه وزير و خايف ع بريستيجه و دعوات الحاجة سالمة بالتوفيق .. خيرهم جماعة الاقتصاد من شن يشكوا حناي ؟!
الحاجة سالمة حذفاته بالمنشف : تعالى سلم قبل يا مضلول
الحاج محمد: والله صدقت فيك حناك امتى تتعلم كيف تسلم زي البشر
طلال حضن جده و باسه ع راْسه: لكن مش نغيرلكم في جوكم خير من سلام الدكاترة
جده ضربه بالسبحة: خلي خوك في حاله
طلال ضحك: اه يا حاج تعالي انت يا سلومة اعطيني شوية حنان و حب راني محروم كلها طايحة فيا هزايب
سالمة فنصت فيه: تي تحشم يا فرخ
طلال باسها ع راسها: و ربي نحبك باهي يا نوارتنا
الحاجة سالمة تحشمت و قرصاته: قلنا تحشم
طلال ضحك: هههههه
الحاج محمد: كلا في هادي ما كذب يا حاجة انت فعلا نوارتنا ❤️❤️❤️
طلال و طيف بصوت عالي : اوباااااااااا
