صباح ثاني يوم
رويدة وهي ع سريرها و تتكسل تتكلم في التيليفون: تعرفيني يا مودة ما نقدرش طه محرم عليا الحفلات هادو و الطلوع من اصله و حتى لو بنطلع بنقاب بالله خليني في الحوش ارحملي راحت خلاص ايام الهياجة و الحرية
مودة بخبث : و علاش شن بيعرفه السيد طه؟! ع اساس كل يوم في مطعم هو هالمتعقد مش عارفة علاش مكرشة فيه هالتكريشة وهو حارمك من كل شي
رويدة تنهدت: نحبه يا دعوه نموت فيه ما نتخيلش حياتي من غيره تي انا لو ما خطبني راني هبلت !! و بعدين انا نخاف نطلع يشوفني حد مش شرط هوا والله توصل فيه ما ضال الا مسيبني
مودة : ع راحتك بس بنقولك ان حتى شهد قالتها انك مش حتجي و ما خلت ما لقحت عليك و ع خطيبك
رويدة عصبت: خيرها الحيوانة هادي شادتها في جرتي
مودة ضحكت : ههههه ع اساس انت مدايرة فيها شوية يا دعوة
رويدة قلبت عيونها : باهي خلاص اخطمي عليا و ع قولتك طه شن بيجيبه غادي
مودة صيحت: ووه و اخيرا استاحشت الطلوع معاك يا فرخة ماتقول بنات خالات و كنّا ديما طلوعنا مع بعض
رويدة تقلبت ع السرير : الله غالب لو عليا عارفة ماعندي روح مع التنسريف
مودة: بتقوليلي؟! خلاص يا حلوة مع الساعة 12 نلقاك واتية
رويدة تتاوب : تمام
سكرت الخط و تفكر لو تصدف و يشوفها حد وتوصل في طه بعدين شجعت روحها و فاتت الموضوع و ناضت دوشت و طلعت من الحمام دارت كريماتها و برفانها و جففت شعرها و لبست توتة شتوية حلوة لونها احمر و مشت لامها في المطبخ: صباح الخير دودو
مفيدة شافتلها ع جنب: رآك تقولي امي زي الناس و بعدين وين النوم لتوا تحسابي طه بيرضاهولك بعدين
رويدة تصب في القهوة من الماكينة : تي الساعة عشرة مازال و بعدين طه وقت نوصل فيه نتفاهم معاه ما تخمميش
مفيدة فنصت : تحشمي يا بنت
رويدة بملل تشرب في القهوة : ماما منمشي مع مودة الظهر لحوشهم جايينها البنات
مفيدة مش عاجبها: انا هالخلطة مع مودة مش عاجبتني و ما صدقت نقصتي منها بعد الخطوبة شن جد عليك توا؟
رويدة بارتباك: شي بس مهما كان تقعد بنت خالتي و ما نبيش نخسرها شدت فيا هلبة و انا اصلا ليا فترة ما طلعتش خلوقي مطبقات
مفيدة : يا ستي باهي لكن تمشي في ملايتك و خمارك زي ما قايلك طه
رويدة نفخت: اوففف عارفة يا ماما
احمد من وراها ضربها ع راسها: معش تنفخي ، صباح الخير امي
رويدة تتحسس في ظهرها: اي ضربة
