#ولدتني_عاهرة
الجزء 7
روحت و في قلبي خنقه ما يعلم بيها الا الله .. دموعي ما بطلوش بكل .. وصلت للحوش و خشيت .. استاذنت من حناي قتلها تعبانه و بنخش نرقد ..
خشيت للدار نحاول نرقد .. و انا كامدة عيطتي بأيدي ... ذاكرتي تشتغل تفكرت كل شي من لما انا صغيرة ... قعدت في فراشي للعشيه .. جاني اتصال رقم ما نعرفاش .. رديت .. قالي السلام عليكم أنا سيف ..
قتله من سيف !! و كان صوتي قاعد تعبان و واضح اني قاعده نبكي ..
قالي قصدك قاعده تبكي 😳 !!!
قتله منو انت ؟؟ قالي سيف متع البحت الجنائي .. قتله أهااا أسفه ما نعرفش رقمك ..
قالي خديته من المحامي سعدالدين .. قتله أها به تمام ..
قالي حبيت نطمن عليك بس .. نستاذنك أنا .. قتله تمام
و صكر الخط 😳🤦🏻♀️🤦🏻♀️ .. حذفت التليفون و نضت من الفراش .. نسمع في صوت عمتي برا .. ايييه توا بتلاحظ عليا و بتسألني خيرني 🤦🏻♀️
طلعت و خشيت الحمام طول غسلت وجهي و درت وضوئي و طلعت صليت ...
مشيت سلمت على عمتي و قعمزت جنبهم .. و طبعاً سألتني شن في .. قتلها لا عادي ما فيش شي خاطري ضايق و بس .. درت قهوة و قعمزت معاهم .. هما يحكوا و انا في عالم آخر منفصل عليهم .... روحت عمتي و بعدها بنص ساعه ممكن جى إياد .. فتحتله الباب .. سلم و قالي خليني هنا في الجنان ما نبيش نركب ..
قتله في شي !!
قالي نبي نهدرز عليك شويه .. قتله احكي ان شاءالله خير ..
قعمزنا في الجنان .. قالي ليش وجهك هكي ! شن في ؟
قتله لا ما في شي .. متضايقه شويه بس .. قالي احكيلي شن مضايقك ..
قتله احكي انت شن في .. قالي اذا الوقت مش مناسب نجيك مرة تانيه .. قتله لا عادي احكي ... قالي انا بنحكي معاك مش بصفتي ولد عمتك .. بنحكي معاك شاب لي بنت ..
قتله اوك تفضل .. قالي ماريا أنا من لما جيتي حوش حناي و انا حاطك في بالي بحكم اني ما كنتش نعرفك قبلها ... و قلت صغيرة و مش ح نبين شي او نكلمها في شي لين تتخرج ع الاقل ...
فا أنتي توا تخرجتي و بديتي تخدمي و أعتقد ح تقدري تاخدي قرار صح ..
ماريا أنا راغبك و نبيك .. يعني لو ما فيش حد في حياتك انا نتمنى ندير خطوة و نتقدملك رسمي .........
أنا تفاجأت 😳 ما كنتش نتوقع الموضوع بكل .. سكتت نزلت راسي ما عرفتش شن نرد .. الموضوع أعطاني شوية راحة بس مش عارفه ليش ما قدرتش نفرح ...
قالي تبي تفكري فكري براحتك مش ح نستعجل في شي ...
قتله بصراحة تفاجأت ... قالي و بصراحة أنا كنت متحشم نفتح معاك الموضوع بس خفت حد يتقدم او يصير شي ...
قتله به تمام ح نفكر انا و نرد عليك ...
قالي به ما تبيش تقوليلي شن الي مزعلك ؟؟ قتله و شن في حياتي الي يفرح ؟؟
شد أيدي و قالي أنا ...
تحشمت و نحيت أيدي .. أرتبك أياد و قالي على راحتك بس لو احتجتيني ح تلقيني على طول .. و قالي جبتلك شكلاطه في السيارة تعالي معاي نعطيهالك ..
طلعت معاه و اعطاني الشكلاطه و روح و خشيت و انا نقول لنفسي الدنيا ممكن تاخد منك حاجات و تعطيك حاجات ..
خشيت فراشي و أنا نفكر في كلامه .. إياد أول أعجاب ليا .. أول مرة حد يفاتحني في موضوع زواج ..
به ليش انا مش فرحانه !!! مش مفروض توا انا نحضن دبدوب و انقز فوق السرير و نتصل بي صاحباتي نقوللهم و نطير من الفرحة و نغني قدام المرايا !!!
ليش هو أنا عندي دبدوب !!!!! 🤔🤔
هو أنا عندي صاحبات !!!! 🤔🤔🤔
_______________
مرت الليله بين أمل و يأس ... بين فرح و حزن ... أملي إني نرتبط بي رجل زي إياد تتمناه كل بنت .. و يأسي من حزني و آلامي .....
تاني يوم نضت مشيت خدمتي ما كنتش مركزة في شي و لا بالي في شي .. حالة من اللامبالاة تنتابني ...
روحت لقيت عمتي عندنا سلمت و قالتلي جاكم إياد مبارح ؟ قتلها ايه .. قتلي تعالي احكيلي شن صار .. حكيتلها و قتلي به انتي شن رايك ؟ قتلها انا مش ح نلقى خير منه .. بس ما اعتقدش اني نقدر نسعده ..
قتلي عمتي كيف ما فهمتش !!!
قتلها عمتي أنا في داخلي كتلة أوجاع .. ما نعرفش كيف و امته تنتهي .. انا بعد ما يطلع بابا من السجن ممكن بس وقتها ناخد وقتي و نفكر في الزواج ...
قتلي هذا اليوم نتمنوه كلنا .. بس مبذئياً لو عاجبك و موافقه انديروا خطبه رسميه و الزواج لما يطلع بوك ..
قتلها مش عارفه 😔
قتلي أنا مازال ما كلمتش عمك مصطفى ( راجل عمتي ) الليله ان شاءالله نكلمه و يكون كل شي على بينه و نجوكم رسمي ..
ناضت حضنتني و قتلي أنا نتمناك لي إياد من زمان و مش ح نلقى حد خير منك ابداً يا حبيبة عمتك انتي ...
ابتسمت و قلتلها و لا أنا ح نلقى خير منكم ... قتلي هيا انوضوا نديروا قهوتنا لاني انا بنروح بي ايمان من حوش صاحبتها ..
طبعاً أنا الأحساس هذا ما عمري عشته .. إني نمشي لي صاحبتي و يروح بيا حد .. كانت صديقتي الوحدة ... أفكار و هدرزة البنات في أيام الثانوي و الجامعه ما تتناسبش مع ظروفي .. مع أوجاعي .. مع نفسيتي ..
يعني إذا كنتي إنتي أقصى ما تتمنيه لبسه ماركة او مشوار عشيه او زرده بحر .. او او او ... أنا كان أقصى ما نتمناه نشم ريحة أبي و نحضنه ...
نضنا درنا قهوتنا و شربناها و روحت عمتي .. قتلي حناي اتصليلي بي أختك منار استاحشتها .. قتلها و الله حتى أنا أستاحشتها .. اتصلت بي منار و كلمناها و قالت ان امي عندها من 3 أيام فاتوا ... هدرزنا عليها شويه و صكرنا الخط ...
أمي عند منار من 3 أيام 😏😏 ياريت عندي قلب يسامح .. ياريت عندي قلب ينسى .. ياريت عندي إرادة نتخطى هالأزمة و نعيش زي الناس .. نتزوج و نجيب صغار و نربيهم أحسن تربيه ...
ياريت .............
تاني يوم مشيت الخدمة و جاني الافندي سيف .. و جابلي ملف قضية بابا ... عاودني نفس الشعور 😢💔 بس المرة هادي كان الألم أخف .. بس مازال ما عنديش القدرة نقرا كلمات استجواب بابا ...
و قالي انه عنده موضوع مع الاستاذ سعدالدين ما بين ما كمله نكون انا قريت الملف ..
كمل الافندي سيف موضوعه مع المحامي .. و لما طلع خش لي مكتبي .. و لقاني مقعمزة و نشوف للملف ..
قالي ما قريتيشي ؟؟ هزيت بي راسي يمين يسار لا ....
قعمز ع الكرسي و قالي نختصر عليك انا الوقت .. القضيه مخدرات .. جى اتصال من مجهول بوجود كمية من مخدر الهيروين في سيارة المعني بالقضيه .. و تم القبض عليه على هذا الأساس و تمت اذانته و الحكم عليه بس 🤷🏻♂️🤷🏻♂️ ...
كان هو يحكي و انا مصدومة ..
قتله كيف بس !! قضيه زي هادي تاخد حكم 17 سنه ؟؟؟
قالي و من قالك انه نحكم 17 سنه ؟؟ هو نحكم عليه بي 10 سنوات بس ..
قتله ليش كم كانت الكميه ؟؟ قالي ما ركزتش بس اهو الملف قدامك اقري ..
قتله به ليش لي توا ما طلعش ؟؟؟
تفاجأ سيف الاسلام .. قالي كيف ما طلعش !!
قتله ايه لي توا هو قاعد ما طلعش ... قالي معناها عنده قضايا تانيه غير القضيه هادي ..
قتله مستحيل يكون عنده قضايا تانيه .. قالي تو نزيد نتأكد من إدارة السجن ..
ناض وقف و قالي مازال تبيه ملف القضيه ؟؟ قتله لا ..
خداه و جى طالع قتله أفندي سيف .. تلفت قالي نعم !!
مشيت وقفت قدامه و قتله نقدر نمشي معاك لي السجن و نشوف لو عنده قضيه تانيه ؟
قالي امممممممم عادي اوك اول ما نفضى نكلمك .. و طلع ...
قعدت نفكر .. من وين جى الهيروين لي بابا !! و اذا الحكم 10 سنوات ليش ما طلعش !!!
عمي و راجل عمتي و محمد خوي ليش ساكتين !!! اكيد عندهم علم بكل شي ...
قعدت في دوامة و نستنى امته نمشي و نفهم كل شي ...
قعدت كل يوم نستنى امته نمشي للسجن .. و سيف الاسلام ناسيني تماماً .. و في يوم اتصلت بيه و قتله شن صار في المشيه ؟؟ قالي اووو نسيتك لكن خلاص بكرة نمشوا ..
قتله تمام ..
نضت بنضم المطبخ .. و أنا في عز حوستي نسمع في الباب .. زعمه شكون جى !! أكيد عمي عبدالرؤوف لانه بكري قالت حناي بيجي .. ركبت فوق السلوم نبي انحي ستار المطبخ بنغسله .. و فجأه نسمع في احم احم ..
تلفتت لقيته إياد 😳😳 قتله انت شن جابك توا 😰 ..
قالي يعني شنو نروح و لا كيف 😅
قتله اسفه اسفه بس نحسابك عمي ..
جى جنبي و مدلي أيده قالي انزلي .. قتله لا بنكمل انحيه نبي نغسله .. قالي تو نركب انحيه انا .. نزلت درجه ... درجتين .... ثلاثه ...... و لما قربت منه قامني و نزلني ع الارض .. أنا وقتها 😳😳😳 تفاجأت .. تفاجأت ... تفاجأت .... و هو مبتسم و جوه جميل ..
و انا خلاص واقفه زي عمود الكهرباء لا تحركت يمين و لا يسار 😳😳😳😳😳
نزل و نحي الستار .. و قرب مني و قالي تبي نركبك تاني بالك ترجعي زي ما كنتي ! 😉
طلعت و مشيت للدار و صكرت على روحي ... حي عليا كيف قامني 😰 أنا خيرني !!
قلبي بيطلع ...
بعتلي إياد رساله .. ( فراشتي أنا جاي ع خاطرك )
........
أنا بمجرد ما قريت الرساله 😰😰 لا أرجوك خديت حصتي انا اليوم .. سادني هكي .. أنا فراشه !!! 😳 و معاها تاء الملكيه .. تاء ملكية شنو انا ضعيفه في النحو 🤦🏻♀️ ... فراشتي معناها انا فراشته هو 😳 ...... اخخخخخخخخخخخخخ شن هذا كله ... عاود بعتلي رساله ( فراشتي ) ....
فتحت الباب و طلعت و انا راسي مش قادرة نقيمه من الخجل ... جبدني من إيدي و قالي ما نبيكش تركبي ع السلوم نخاف عليك تطيحي ..
قتله إياد خليني نطيح الطيحه ارحم و الله ارحم .... حط ايده ع خدي و قالي بعيد السوء .. نظراته كانت كلها حب و حنين ... نحيتله إيده و قتله نبي نكمل المطبخ انا ... قالي أمي قتلي شن حكيتوا .. امته ما تبي يجوك بخطبوك .. قتله ان شاءالله خير .. و حس بيا قداش انا متوتره و متحشمه .. قالي خلاص نخليك انا .. مش ح نزيد نوترك اكثر من هكي .. قتله تمام .. قالي ما تبي شي ؟ قتله لا شكرا ..
كملت حوستي و تاني يوم نضت جهزت نفسي و مشيت للسجن و قعدت نستنى في سيف الاسلام قدام بوابة السجن باش نخشوا مع بعض .. و انا واقفه نشبح في سيارة تويوتا عاليه جت اتجاهي .. أها هذا سيف ..
درس سيارته و نزل .. و خشينا .. و من اول البوابه الكل يرحب .. أهلاً يا أفندي أهلاً يا أفندي ... خشينا لمكتب المدير و رحب بينا ...
أهااا واضح ان المحامي سعدالدين عرف لمن يبعتني .....
قعمزنا و قال سيف الاسلام لمدير السجن نبي نسأل على قضايا نزيل هنا عندكم .. قاله المدير تمام اعطينا اسمه بالكامل خلي يبحثوا عليه هنا في شؤون النزلاء ... ربع ساعه و كان ملف بابا في الشؤون النزلاء عندنا .. طلع و خلانا مدير السجن انا و سيف ..
فتحه سيف و قعد يقرا فيه ... و انا عيوني في سيف نستنى فيه يقول كلمة .. يدير حركة .. أي شي ... سيف يقلب في الوراقي .. مركز في كل كلمة .. يا سيف ارحمني و قول اي شي .. سألته قتله شن في ؟؟ ما باش يرد عليا ..
بعد اكثر من نص ساعه استنفدت فيها صبري .. تلفتلي سيف و قالي الشخص هذا شكون ؟؟
قتله كيف شكون ؟
قالي واضح سؤالي شكون المتهم هذا ؟ قتله شخص يهمني و خلاص ... ليش تسأل ؟
قالي انتي مترافعه عليه ؟ قتله لا .. قالي انا ح ناخد ملفه و نعاود التحقيق في القضيه من جديد ... خفت و قتله ليش شن في ؟؟؟؟
قالي في شي مش مزبوط في القضيه ... في حد عنده سلطه يحرك فيها ...
زاد خوفي .. قتله كيف !!
قالي كيف هادي تو نفهمهالك لما نفهم القضيه كويس ..
نادى سيف ع الشخص المسؤول على شؤون النزلاء و قاله جيبلي السجين هذا ..
عيطت و قتله لا لا .. فقت لي روحي و قتله لا سيف ..
شاور سيف للراجل انه يطلع ..
سألني خيرك شن في ؟ قتله ما نبيش نشوفه .. قالي تمام تو نقعمزله انا الملف هذا و بعدها نفهمك كل شي ...
شديت إيده و قتله نحلفك بي أغلى شي عندك ادير جهدك معاي ... استغرب سيف و لمست فيه انسانيته و شهامته و رجوليته اتجاه بنت ضعيفه محتاجاته .. قالي حاضر ..
نحيت إيدي و قتله معناها نروح انا توا .. قالي لا تو نروح بيك أنا .. قتله لا ما نقدرش نركب معاك .. ابتسم و قالي به براحتك لكن استني اطلعي معاي باش ما يضايقك حد ..
____________________________
No name ♥️🌺
