#الساحره 🔥 الحلقه 7 لقد ترددت في الرد ✌🔥
اسمعيني يا سحر انتي زواجك مني عشان انتقامك من عيلتي وانتقمتي منهم وخديتي حقك وحقي وتوا
تبي تكملي حياتك معايا او تبي تطلقي بس تأكدي ان
اذا وافقتي تكملي حياتك معايا كل شي عشتيه 😞 وشفتيه من عيلتي حانسيه لك حاندير المستحيل عشان نداوي جروحك انا بروحي مقهور امي قتلت زوجتي و ولدي مش بس امك وخوك وعذابك بين ايديهم انا لاعند توا مصدوم مش قادر نستوعب ان امي سيئه هك حطيت يدي علي راسي وخبطته كل هالسنوات وانا عايش مع سفاحه مش ام مع وحده انانيه قاطعتني سحر وقالت : ومريضه وقلبها اسود
ونزلت راسها لوقت وقعدت نرجا في ردها ان تكمل معايا او لا واعيوني عليها كانت متردده وتلعب علي صوابع يدها بحتت في الحاجه يلي ربتها وتبيها تساعدهااا دغري قلت : القرار قرارك أنتي مش حد اخر ما نبي تكوني مغصوبه علي شي توا نخليك تفكري اكويس ونجي بكرا ناخد الرد وطبعا نبي قرارك وبس
وألتفتت وركبت في سيارتي وعديت وخليتها ....
انا مش عارفه شنو انقول حسيت بالعجز وماما وصتني ان نكمل حياتي مع سليمان بس مش عارفه شنو نقول و هو طلب قراري انا شخصيا مش قرار حد اخر وكأن حاسس ان حانلبي قرار عيلتي تنهدت وخشيت جوا رايفت عالحوش واجد شفت الشخص يلي رباني هو مقعد علي كرسي متحرك من فتره صار معاه حادث وماقعدش يمشي قربت وبست راسه : كيف حالك يالغالي رايفتلك واجد
بعد شافني فرح ولمس خدي : بنتي كيف حالك واخيرا جيتي خلاص تخلصتي منهم
انا ابتسمت : زي ما تخلصو من ماما وخويا وزوجة سليمان بالاخفاء وماحدش حس عليهم غيري درتلهم نفس الشي وماحدش يندري عالجريمه المخفيه هذي غيري انا وسليمان وارواح يلي قتلوهم وتوا انتو ونزلت راسي رغم ان حلمي تحقق بس في بالي تردد كبير واختيار صعب هل نكمل حياتي مع الشخص يلي امه قتلت ماما وعذبتني وهو ما ذنبه شي عاملني كأني اميره وطيب بكل هل نتجاهل كل شي ونكمل حياتي معاه او ننفصل وكل حد يمشي لطريق مش عارفه حاسه ان في شي يشدني له طلعت وقعدت نتمشى برا في الحديقه شميت الورد ولامست شوكه تعرفو انا كالورد يلي يقرب مني يتحمل شوكه يدي طلع منها دم من شوك الورد تنهدت وبحتت في السماء والعصافير يلي يطيرو عبيت سطل اميه وزي العاده حطيت السطل جنب الورد و وخرت وابتسمت بعد كانو مترددات علي شان يقربن ويشربن اميه العصافير حسيت نفسي زيهم متردده والخوف مسيطر عليا انوافق او نرفض كان عقلي مشتت زيهم بس هما ما خافوش واذكروني وقربو وشربو اميه هل انا اندير زيهم ونشيل الخوف مني ونقرر نكمل حياتي معاه مش عارفه ومزلت متردده عديت نمشي في الحديقه اذكرت كيف يعامل فيا وكيف ما حاولش يقرب مني بعد السحر يلي درته له انحرق ورد زي ما كان قعدت عالعشب وتمددت اه اكره شي عندي هو الاختيار بين شيئين قبل ما نفكرش وهدفي ننتقم وبس وانتقمت بس توا القرار حاسم ومصيري شنو غمضت اعيوني تخايلت نفسي اني وافقت نكمل حياتي معاه وهو فرح ونساني كل شي شفته وعشته زي ما قال تخايلت ان ما طلقش يدي ابدا وقعد جنبي وما خلاني وانا حاسه اني سعيده امعاه صبيت وشلت هالتخيلات من راسي وقررت نفكر اكتر واكتر لاعند ما يجي بكرا واي قرار يطلع مني هو يلي حايصير رديت للحوش وساعدت سمر في التطبيخ وكانت فرحانه اني جيت وطاير عقلها ابتسمت لهاا وحضنتهاا هالانسانه طيبه اهتمت بيا وتحبني واجد بعد جهز الغذاء قعدنا وتغذينا مع بعضنا وهي حكتلي ان لولا الخياطه راه من زمان ميتين وقالت قعدو يجوني في زبائن ونخيطلهم والحمدلله علي النعمه ابتسمت كان الحاج هو يلي يشتغل وتوا سمر بدل عنه حسيته زعلان عشان قعد مقعد ومش قادر يصبي بس سمر مسكت يده وبحتت فيه : ما تزعلش انا عارفه انك ماتحبش نشتغل بس الله غالب علي شان نعيشو وانا نعرف نخيط قعدت نبيع في يلي نخيط فيه وانا في الحوش وقدامك ابتسم لهاا هالشخصين يحبو بعضهم واجد زمان لما طلعوني من القبر وعدو للحوش هضا يلي استأجره وبعد حصل رزق شراه واستقر فيه كان واضح الحب بينهم ومتفاهمين اشخاص يستاهلو كل خير وربي جمعني بيهم هما وفرحو بيا ما خلفو بس داروني بنتهم وحبوني واجد وانا حبيتهم زي ما حبوني صبيت وخشيت للغرفه يلي كنت نقعد فيها رايفتلها حاسه ان كل وجع وقهر كنت حاسه بيه سابقا توا انزاح بعد خديت الحق 🔥 بس الشي الاخير هو سليمان اه يارب شنو اندير قعدت وزاد تفكيري وجاه
اليوم التاني وانا ما رقدت من كتر تفكيري في القرار عالساعه 10 في الصبح الجرس رن وفتحت سمر ورحبت بسليمان سمعت صوته تنهدت وقعدت لوقت في الغرفه وبعدها طلعت قابلني كان لابس اسود وطالع حلو عليه هاللون هو لوني المفضل كنت نقول ما يليق فيا الا هاللون بحت فيا وابتسم وانا ابتسمت له وقعدت مقابلته اعيونه يحكو السؤال يلي سأله ليا امس ويبي الرد بفارغ الصبر كان خايف اشويه من ردي ماعرفتش ليش يهمه اذا وافقت او رفضت حاسه ان اذا رفضت حايزعل واجد نزلت راسي وقعدت ساكته لوقت وهو ما قال شي يرجا فيا نحكي وسمر والحاج يراقبو بصمت وما يبو يدخلو بينا
بعد وقت رفعت راسي وبحتت فيه اعيونه فيهم امل للحياه بسلام وبدون خوف بسمته رغم ان يراجي في الرد بس بسمته تدل ان مهما كان الشي يلي نرجا فيه الابتسامه رغم القرار اذا حلو او لا مش حاتفارقه بس لامست شي حاسه ان يبحت فيا زي باته حسين زوج ماما لما يبحت في ماما كان يبحت فيها هك يتأمل فيها وكأنها رسمه فنيه تعز عليه وثمينه جداا وكأن هالرسمه اتخصه هو انصدمت قعدت نبحت فيه لوقت ولا اردايا طلعت مني الموافقه ان حانكمل حياتي معاه 🔥 صبا وهو يبحت فيا وفرحته واضحه وفاضحته كان خايف اني نرفض بس توا اطمن حط يده علي قلبه وقرب بخطواته مني وحط يده يلي لمس بيها قلبه علي قلبي وبحت في اعيوني وانا دقات قلبي سريعه مسك يديا وصباني قعد يبحت فيا ويبتسم وفي الاخير حضني حضن طويل جدا وانا قلبي يدق بسرعه حاسه اني فرحانه تعرفو وهو بحت فيا وابتسم وقال : نوعدك ان حانخلي حياتك سعيده ❤
ابتسمت وماما كانت واثقه فيه لان طالع لباته حبيبها وزوجها ابتسمت وشديت علي يده وهو بحت في سمر والحاج وقال : جهزو ارواحكم حاتمشو معانا وهالشي خلاني نفرح بزياده وقال : انا بعت الحوش علي شان في ذكريات مؤلمه جدا شريت حوش جديد وامبدري كيف شريته قبل ما نجيكم ومأتت ناقص وجودكم هيا نمشو وبحت في عيلتي وبدون اي اعتراض منكم
وسمر نزلو دموعها وقربت سلمت عليه وهو باس راسهااا وراس الحاج وابتسم لهم جهزنا كل شي وشالنا للحوش كان قريب بكل من هنا وصلنا عالسريع وفي حديقه في الحوش تعرفو الحوش هضا وانا صغيره كنت نبحت فيه زمان وخاطري نعيش فيه وهو حقق حلمي رغم ان ما قلت شي ولا قتله بيع الحوش بروحه باع وشراه هضاا الله يجنن بحتت في الحديقه يلي تجنن كبيره بكل قربت شميت الورد وهو اعيونه عليا وخشا كرسي الحاج جوا وراه الحوش ونحنا لحقناه من جوا يهبل بزياده وغرفة الحاج تحت فتحها له وقال : علي شان دروج فأخترت الغرفه هذي ابتسم الحاج : شكرا يا وليدي ربي يحفظك ❤
سليمان : ولو يا حاج ما تشكرني وباس راسه وطلع وجات عينه في عيني ابتسم الابتسامه يلي تجنن فيه
#يتبع
🔥 سلطانه كوكي كاتبة روايات متنوعه 🔥
