#الساحره 🔥 في الحلقه 6 لحظه حاسمه✌🔥
انا مش بقصدي ان يفجعها الحصان 🏇 وطاحت في القبر ولما شفتهم يبو يقتلوها ضربت طلقه فوق 🔥
وأعيوني ما تبشرش بخير نزلت من الحصان وقربت
منهم مديت يدي للجهة يلي فيها سحر وامي مدتلي يدها توقعت اني نمسك يدها وانطلعها من القبر بس انا ما بحتش فيها ويدي لمست بيها يد سحر تحت التراب قدرت نمسكها وشكلها فاقده الوعي قعدت نكر فيها بس امي منعتني اني نطلعها وقالت : بدل ما اطلع امك وخالتك تبي اطلع السحاره وانا بحتت فيها زين : اطلقيها ساد يلي درتيه فيها وهي خافت وسكتت وقدرت انطلع سحر كانت معبيه تراب وحالتها حاله قعدت نحاول انوض فيها فطنت للميه يلي قعده في شيشه خديتها ورشيت علي سحر اميه واستمريت حتى فتحت اعيونهاااا وناضت
انا فتحت اعيوني شفت سليمان يبحت فيا اذكرت شنو صارلي بحتت في جهت القبر لقيتهم زي ما هما حسيت براحه قعدت ناخد في نفس 😣 جاني صوت
سليمان من خلفي وقال : كملي آنتقامك آنا سمعت وشفت الفيديو يا سحر وبحت في امه : مصدوم فيك مش قادر نستوعب انك انتي هك وتوا اتبتي كل شي لما حاولتي تقتلي سحر وهي في القبر شفتك 😡 وامي بحتت فيا وبلعت ريقها : هي كذابه تكذب عليك
انا ضحكت : مافيش اكذب منك وخبط علي صدره انتي عذبتيني حرمتيني من زوجتي وفرحتي بولدي ما تمت قتلتيه ليش هضا كله علي شان نقعد نهتم بيك انتي وبس ما تبيني نعيش ونكون عيله ما تبي احفاد كل يلي تبيه هو مصلحتك انتي انانيه ودم كل حد قتلتيه مش حايمشي هباء انا مش حانمنع سحر شنو ادير فيكم انا ماتت امي انتي وحده تانيه مش امي يلي شايفها طيبه ونزلو دموعه هي ماتت وألتفت وبحت فيا ومد يده وصباني وبحت فيا : توا كملي يلي بديتي فيه اقتليهم وعطاني مسدس بس انا رديته له : انتقامي مش بأسلحه بعذاب وبس وخليته وبديت نكب في باقي التراب عليهم وهما يكحو وانا نرعش ومزلت نكب عبيت قبر كله تراب حتى وجهم ماعش بان زدت نكب وغرقت القبر تراب وبكيت 😭
قعدت انزيد ونبكي ونرعش كنت حانموت توا قبل ما اندير هك قعدت حداه القبر ونبحت فيه ونبكي : هما حرموني من ماما حبيبتي هما سببولي حاله نفسيه بسببهم هما انط مفجوعه كل ليله زمان ونبكي بسببهم قعدت نفسيتي سيئه دمرو حياتي وما تريحتش الا توا قعدين يتعذبو تحت القبر 😞 ويحاولو يطلعو بس ما قدروش يستاهلو شفت التراب ماعش تحرك شكلهم ماتو قعدت نبكي مش عليهم لا لان هذي اول مره اندير هك اول مره نقتل لدرجة قعدت نبكي انا نفرق عليهم هما قتلو وفرحو بس انا قتلتهم وبكيت بحتت في روح ماما يلي اشرتلي بيديها واختفت نزلو دموعي حسيت بيد سليمان صبتني وبحت في جهة القبر : كل شي قلتيه عندك الحق فيه وكل شي صار امعاك اثر فياا وهما خدوه جزاتهم لو مهما كانو هماا مجرمين قتلو وهذي نهايتهم وبحت فيا : وانتي من هاللحظه نوعدك ان حانسيك كل شي مر في حياتك
وانا انصدمت بس في نفسي السحر بح كيف مزال يبي يكمل حياته معاياا وهو فهم يلي انفكر فيه وقال : انا عارف شنو تفكري وعارف انك سحرتيني انتي قلتيها في الفيديو ومسح دموعي وعارف اني زوجك توااا ومسك يدي وعدا بيا شور الحصان ركب ومدلي يده وركبني قدامه وانا مصدومه وبحتت في جهة القبر قعدنا لوقت وما حرك سليمان الحصان عارف اني نبحت في القبر ونتأكد من موتهم طولنا وما تحركو يستاهلو عديناا وانا من التعب ومن كل شي صار امعايا غمضت اعيوني وغفيت وراسي علي كتفه عدا بيا للحوش بعد وصلنا فتحت اعيوني ومسكت فيه مانبيش ننزل بحتت فيه : نبي نمشي للحوش يلي عشت فيه مانبيش نعيش في الحوش يلي ماتت فيه ماما 😞 لو سمحت ادير فيا خير وصلني للحوش
سليمان بحت فياا ونزل من الحصان ونزلني : شنو تبي تمشيلهم وانتي بهالحاله وتفجعيهم علي الاقل دوشي وغيري ملابسك وحانشيلك وخشا بيا جواا وانا سكتت رقاني فوق في الغرفه وطلب مني نخش ندوش عشان ملابسي كلهم تراب جيت نبي نخش كنت تاعبه مش راقده بكل من 3 ليالي حسيت بدوخه وقبل ما نطيح مسكني وشالني بين ايديه وانا حاسه بضعف خش بيا للدوش و ولع الميه وانا نرتعد نبي نطلع بس ما خلاني حط يده علي ملابسي وناوي يسلحهم خديت نفس وبحتت فيه : لا بس ما عطاني مجال وقال : لو طلعت حا ادوخي في الحمام عارف انك تعبانه ولمس خدي ولمس اعيوني واضح انك باطله و واصله حدك فخليني ندوشك وتطلعي ترقدي وتتريحي وبعد تتحسني تمشي لهم سكتت وهو سلح ملابسي بس اعيونه في اعيوني تراب واجد نزل مني حطيت يدي علي وجهي تراب نزل من شعري وخش في اعيوني رفع راسي وخلاني نبحت فيه وانا نفتح ونغمض في أعيوني قعدن حمر من التراب نفخهم ليا وانا حاسه بتعب بكل حول سليمان التراب كله من شعري وانا اعيوني عليه ونعسانه بكل نبي نرقد 😣
بعد وقت طلعني من الدوش وانا نرعش من السقع خش بيا للدار ولفني بالمنشف وجفف شعري كان حنون بكل معايا ويهتم بيا بس انا بكل تعبانه مره نحس بيه ومره لا لبسني جلبيه بس متعه هو ولف شعري بالمنشف وشالني ورقدني عالسرير وعطاني اميه نشرب مجرد ما نشربها طحت رقدت وماعش نندري علي شي قعدت نحلم بالقبر بعد حطوني وانا عايشه وانا صغيره وبعد حاولو يقتلوني اخرا وقعدت ندوي وانا راقده بس حاسه بوجوده ماسك يدي وشاد عليها ويهدي فياا حاسه بلمساته علي خدي وحول منشف من شعري حسيت اني في حضنه توا وماسك فيا زين ويقرا عليا في معودات كنت خايفه بكل انا تعبانه بكل حلمت بماما تبتسم ليا اه يا ماما نبيك انا نبي وجودك يا ماما سليمان يهتم بيا زيك وكأن انتي هو حنون معايا وعكس امه الشريره انا تعبانه وماما ابتسمت واختفت وانا قعدت انادي فيها بس اختفت وتبتسم اه يارب فتحت اعيوني وبحتت جنبي سليمان راقد وماسك فياا قعدت نبحت فيه لوقت وحسيت روحي غفيت اخرا من التعب وكل شي صار امعايااااا حاسه بتعب غير عادي و وجع 💔🔥
بعد يومين طلعت من الحمام وانا لابسه ملابسي وكنت نشيطه بعد تريحت خديت الشنطه امتعي وطلعت من الغرفه وهو يرجا فيا تحت علي شان يوصلني وهالمره مولع سياره حسيته ما يحبش السيارات وديما في حصان يمشي بيه فتحلي باب السياره قعدت وهو لف وقعد وبحت فيا وهو ساكت وساق السياره سألني عن العنوان عطيته له و وصلني لقيت سمر برا تسقي في الورد وحزينه ومشغول بالها عليا فطنت للسياره بحتت وبعد شافتني نزلت من السياره قعدت تبكي وفتحت يديها عديتلها وحضنتهاا وانا نبكي : رايفتلك واجد واجد ودموعي شلال
سمر : يا عمري انتي وقعدت تبحت فيا ومسكت وجي بين ايديهاا وباست خدي : الحمدلله اني شفتك
انا : وعدتك ان بعد ننتقم منهم انجيك وكنت تعبانه وتحسنت فجيتك علي طول وحضنتها زين
سمر جات عينها علي سليمان همستلي : هضا ولدها
انا بحتت فيه : اهاا وبحتت فيها واشرتلها علي صوابع يدي وفهمتها ان زوجي ونزلت راسي
سمر مسحت دمعه نزلت منها : كنت نتمنى نحضر عرسك وتزوجتي بس بهدف الانتقام وتوا شنو تبي تكملي حياتك معاه او تطلقي منه وخلتني نبحت فيها
بس سليمان قاطع ماما وقال : !!!!!
#يتبع
تحياتي : سلطانه كوكي كاتبة روايات متنوعه 🔥
