ပုလဲတို့ဖြင့်ဖွဲ့သီသော ( Completed)

Part 25 ( Unicode )

ထို့နောက် မျက်ရည်တို့ကို လက်ခုံဖြင့် သုတ်သည်။ သနပ်ခါးထူထူပေါ်တွင် မျက်ရည်စီးကြောင်းတို့က ဟိုတစ်ကွက် သည်တစ်ကွက်။ မျက်တောင်ရှည်ရှည်တို့သည် မျက်ရည်များဖြင့်စိုစွတ်နေကာ မျက်လုံးတို့မှာလည်း နီရဲနေလေသည်။ အုန်းဆီနံ့သင်းနေသော ဆံပင်တို့မှာ ချွေးကြောင့်ပင် အနည်းငယ် စိုနေသည်။

အငိုဝ သွားဟန်တူသော အထွန်းသည် မျက်တောင်ကို ပုတ်ကာ ပုတ်ကာဖြင့် မျက်ရည်စများကို ဖယ်ထုတ်သည်။

ကျော်မိုးကတော့ အထွန်းလုပ်သမျှကို ကြည့်ကာ သက်ပြင်းတချချ။

"အထွန်း ဘာဖြစ်လာလို့လဲ"

အထွန်းက ခေါင်းခါသည်။

"ဘာမှ မဖြစ်ဘဲ ဘာလို့ဒီလောက်ငိုရတာလဲ အထွန်းရဲ့ ၊ ဘာကိစ္စပဲ ရှိရှိ အကို့ကို ပြောပြလို့ရတယ်လေ"

စိတ်ပူသော အသံဖြင့်မေးမိသောအခါတွင်တော့ အထွန်းက သက်ပြင်းချရင်း။

"အထွန်း လည်းမသိပါဘူး ၊ ဒီအတိုင်း ကိုမိုးကို တွေ့တော့ ငိုချင်လာတာ "

"ဟောဗျာ"

ထိုအခါမှ စိတ်အေးသွားဟန်တူသော ကျော်မိုးသည် အင်္ကျီအိတ်ကပ်ထဲမှ ပစ္စည်းတစ်ခုကို ထုတ်သည်။

"ရော့ အထွန်း အတွက် ဝယ်လာခဲ့တာ"

ရွှေရောင်များဖြင့် အနားကွပ်ထား‌သော အဖြူရောင် ဒိုင်ခွက်သည် အညိုရောင်သားရေ ကြိုးဖြင့်လိုက်ဖက်နေသည်။ ဒိုင်ခွက်အတွင်းရှိ ဂဏန်းများကို အဖြူရောင် ကျောက်လေးများဖြင့် အလှဆင်ထားသောကြောင့် အလင်းရောင်အောက်တွင် တဖျပ်ဖျပ်ပင်လက်နေတော့သည်။

ကျော်မိုးက အထွန်းလက်ကို ကိုင်ကာ နာရီကို ပတ်ပေးသည်။ ထိုအခိုက်အတန့်တွင် အထွန်းသည် မမြင်ရ မတွေ့ရသည်မှာ ကြာလှပြီဖြစ်သောသူကို တစိမ့်စိမ့် ကြည့်သည်။

အထွန်းလွမ်းနေရသော ကိုမိုးသည် ဆံပင်အနည်းငယ် ရှည်လာသော်လည်း ကြည့်ကောင်းနေဆဲပင်။ ရှပ်အင်္ကျီအပြာနှင့် ပုဆိုး နက်ပြာကို တွဲဖက်ဝတ်ဆင်ထားသော ကိုမိုးသည် လူငယ်ဆန်ဆန် ခန့်ညားနေသည်။ ကတ္တီပါဖိနပ် အညိုရောင်သည် ဖြေဖမိုး ဖြူဖြူလေးများနှင့် လိုက်ဖက်နေပြန်သည် ။ အနီရောင် ပတ္တမြား လက်စွပ်တစ်ကွင်း က ဖြူသွယ်နေသော လက်ချောင်းပေါ်တွင် ပေါ်ပေါ်ထင်ထင်ရှိနေပြန်သည်။