ست الحسن

الفصل الاخير

( الجزء الاول )

- احنا الصعايده يااحنا .. احنا نعمر فرحنا .. احنا الصعايده وكالين الضانى .. البت حلوه والولد شرانى .

اصوات الغنا والدلع والضحك خلتها تقوم من نومتها عافيه .. اتعدلت بنص نومه مسنوده عالمخده وراها .. حواجبها معقوده وشعرها متبعتر على وشها وهى بتنفخ من الغيظ ومكتفه دراعتها ...وهما شافوا كده وزودوا اكتر فى الضحك والهزار .. وهما مستمتعين بمنظرها .. وهى مستنيه الوصله تخلص .
اتقدمت عليها وهى لسه بتضحك وتدلع : ايه يادكتوره مش ناويه تصحى ؟ .. دى النهارده دخلتلك يابت .
ردت بقهر وهى لسه بتحارب النوم اللى على جفونها
- عايزه ايه يا "بطه "؟.
قربت التانيه منها : ايه هو اللى عايزه ايه ؟. بتجولك النهارده دخلتك .. يامرة اخويا ياجمر انتى .
- حاضر
قالتها وهى بتهز بدماغها تراضيهم وعنيها مغمضه .. هما شافوا كده وكملوا غنا وهما بيصقفوا بكفوفهم
- اخر ليله فى بيت ابوكى .. اخر ليله فى بيت ابوكى

رفعت عينها تبصلهم و بلهجه اقرب للبكا : حرام عليكم .. والنعمه حرام .. الساعه لسه سبعه يامؤمنين .. يعنى انا مكملتش ساعتين نوم .. هو انتوا ايه مبتتعبوش ؟
شهقت" بطه " فاتحه بقها : ايه ياحبيبتى انتى هتبكى عشان تنامى .
وبغمزه وضحكه من زهره : سيبيها يا" بطه " .. اصلها لسه عالبر هههه .
صرخت بصوت عالى : وغلاوة النبى .. سيبونى انام .. ابوس ايدكم سيبونى انام
- خلاص خلاص .. ادينا جايمين اها .. كملى نوم براحتك .. ياللا بينا " زهرتى " .
قالتها" بطه "وهى بتقوم وبتسحب " زهره " وقبل ما يخرجوا .. سمعوها صوتهم تانى وهما بيصقفوا ويهزوا بكتافهم
- احنا الصعايده الفتوه .. ناخد العين اللى من جوه
احنا الصعايده يااحنا .. احنا نعمر فرحنا
نفخت بصوت عالى بعد ماخرجوا وهى بتسحب نفسها تانى تحت الغطا .
ويدوبك عينها هاتروح فى النوم وحست باللى بتدخل معاها تحت الغطا .. وقبل ماتسأل لقيتها بتسبق هى بالكلام
- والنبى ماتتحركى .. خليكى نايمه عشان انا كمان عايزه انام .. انا ماصدجت خلصت من الثنائى المرح .
- نامى يا " بدور " نامى .
قالتها " نهال " بيأس قبل ماتروح هى كمان فى النوم .
................. ...................

- خدوا هنا رايحين فين تعالو
قالتها " سميحه " بصوت واطى جدا وهى بتشيل البنت الصغيره وبتسحب الولد من ايدوا .. قبل مايفتحوا اؤضة عمهم .. بعدت عن الاؤضه ووصلت عند " بلال " ومراته اللى قاعدين مع " سالم " فى صالة البيت
وصوتها ظهر
- كده برضوا يا" مرفت " انا مش منبهه عليكى يابتى .
وبصوتها الناعم : فى ايه بس ياماما ؟.. هما عملوا حاجه ؟.
سميحه وهى بتحط البنت فى حجرها
- يابتى المره التانيه اسحبهم جبل يفتحوا اؤضة عمهم " عاصم " .. دا انا ماصدجت عينه غفلت
بلال وهو بيضحك : ويعنى انتى يامٌا مفكره .. انه هايصحى منيهم .. دول لو طبلوا جمبيه مش هيحس .. بعد العمايل اللى عملها امبارح عالحصان .
سالم وهو كمان بيضحك : فرحان ياولدى .. هو كان يتوقع ان الفرح يتم فى ميعاده .. بعد ما " راجح " دج راسه انه يكمل البيت الاول وبعدين يجوزهم
بلال : بس الحمد لله يابوى .. دا البيت رجع احسن من الاول .
سميحه : وهو " عاصم " سابوا لوحده .. دا كان واجف معاه يد بيد .
بلال وهو بيضحك : ماهو لولا وجفته دى .. ماكانش الفرح تم فى ميعاده ..
سالم بضحكه : ياللا بجى ربنا يتم فرحته على خير ..
مرفت : بس بصراحه ليلة الحنه امبارح كانت جميله جدا .. البنات العرايس كانوا قمامير و" عاصم " والدكتور ابن عمه .. الرقص اللى رقصوه بالاحصنه كانت حاجه خرافه .
سميحه : دا اول فرح تحضريه معانا من ساعة ما اتجوزتى " بلال " .. تلاجيكى اول مره تشوفى ليله كده .. طبل وزمر .
مرفت : بصراحه انا شوفت كتير عندنا فى القاهره .. بس اول مره اشوف واحد بيرقص عالحصان .. عملها ازاى " عاصم " دى .. دا ماشاء الله متمكن .
بلال : يعنى عجبك " عاصم " بس ماشوفتيش جوزك
- لا ازاى دا انت الكل فى الكل ياباشا ..
- ايوه كده اللحجى نفسك
............................