ثلاث دمعات

بارت 38

دگ موبايل سهاد كلنا گمزنا ايدينها ترجف تريد
ترد ع الخط ما تگدر كوة لزمتة وردت فتحت حاكية
سهاد :- بشرنا بشير
بشير :- مابيدنا شي بس الدعاء حالتها خطرة
ولسه ما منتبه ادعولة.. وأقفلن البيبان ممنوع
تطلعن للحوش والحراس موجودين برا
ومجتبى وياي ما يقبل يعوف ابو..

سدة من سهاد والبجي والعياط يرن بأرجاء
هذا البيت الكئيب اصوات شهگاتنا المتألمة
ووجع گلوبنا ما ينوصف.. گلبي من گد التعب
والقهر تاخ وماعاد يقاوم.. أحس نياط گلبي تتمزق
بعنف ووجع..

مرت الساعات بصعوبة گلبي نار بس اريد خبر
يطمني عليه بس اريد بصيص امل يمدني بالقوة
الدموع مفارگتنا صار الليل ولگمة مخلينا بحلگنا
احنا بيا حال محد جان بحال احد كل واحد ماخدلة
زاوية منفرد بروحة ويدعي ويبجي..

صعدت فوگ غسلت وجهي ورحت تمددت ع الجرباية حضنت مخدتة وابجي واحجي
مهران لا تعوفني مو تگول انتي بنيتي اكو
اب يعوف بنته وهي ماعدها غيرة بابا بنيتك
تعبت ومحد بحالها ومحد يمها گوم أگعد مو الك
هالنومة انت تعرف اني اخاف شون تعوفني
وحدي شون انام هسه وانت مو يمي...

شهگت بعذاب وصرت افرك برگبتي احس
الهوا مديدخل رئتي استنشقت مخدتة بنفس
عميق.. أوف ربي أحلفك برسول الله
( صلى الله عليه وآله وسلم) تگومة وتردة سالم
غانم والله من بعد عينة مالي كل حياة اي والله
كل حياة ماعندي

مهران... الشمعة المنورة حياتي لو طفت
تعتم دنياي وتتعكر بضلام حالك..

تمنيت اشوفة واتوسلة يگعد بلكي يسمعني
هو ما يقبل انقهر اي والله ما يقبل... لو شافني
ضايجة يبقى يضحكني ويشاقيني حتى اضحك..

أصعب ليلة مرت عليه...القلق ما فارقني
ودموعي تشكي حالي احس گلبي يتگطع تگطع
من فرط الوجع روحي المجروحة اهترئت من
كثر العذاب..

مادري شلون غفيت بلا ما أحس..
دخلت بحديقة تخبل كلها ورود بقيت أفتر
بيها وطايرة من الفرح واباوع للأزهار
اختار أي وحدة أقطف جذبت نظري وردة
حمرة شكلها عجيب قطفتها وأستنشقت عبيرها

فجأة غيمت السما ونزل الغيث بغزارة
شمرت الوردة وطلعت من الحديقة اركض
بهلع وياها فزيت من النوم الاهث وعيوني
مو گادرة افتحها

وافرك براسي وعرگي يصب...!! خايفة
وأهمس :- مهران مهران وينك تلمست
الفراش اليمي اجتي ايدي ع مكانة فارغ
للحظة داهمت الأحداث ذاكرتي بكل عنف
وقصفت روحي المجروحة بقذائف العذاب..

فركت عيوني وفتحتهن وجهي يابس
الدمع عليه لكن سرعان ما ترطب بسيل من
الدموع گمت من مكاني بلكي جابو خبر
باوعت للساعة بـ ٣ ونص ليل وماكو صوت
نزلت جوا جنان گاعده ع الدرج وتبجي وعمتي
غافية بمكانها وسهاد كذلك..