زمهرير ألأوجاع (الليالي من عذابك)

الجزء الحادي عشر

زمهرير الاوجاع ...
حفصه ..ال هاشم

سهند..

هكذا هيَ الحياة ...
لقاءٌ بلا موعد .....وفراقٌ بلا سبب

ــــــــــــــــــ

صفنت على الورقه ..اخابره عززاا العزاني هذا شكد جريئ..
هاي وعود الصبح طردني ..

هوه صحيح مكالها مباشر بس هاي تعتبر طرده وهسه يريدني اخابره...!!
لويمووت ..

فتحت البرده شفته بعده واكف اول ما فتحتها انتبه عليه ورفع راسه
باوعت عليهِ بعصبيه ولزمت الورقه كدام عيونه وشككتها

اباوع عليهِ اشو هذا كام يضحك سديت البرده بقوه وطلعت من الاستقبال كوله ..

اخابره والله يالله مو هيته علمود اخابرك ...

كعدت افكر بيني وبين نفسي .. اذا تجرأ ودزلي الرقم لبيتي اكيد يتجرأ ويسوي الاكبر ..
لا لا سهند ابتعدي عنه وانجبي مناقصه بلاوي خليني ساتره على نفسي واكمل دراستي على خير ..
هوه ابويه بس يريدله زله علمود يكعدني بالبيت ...انوب اخابر ولد غربه ..يذبحني على القبله ..

بقيت طول الليل اتكَلب بفراشي .. ومرات اكول احسن لان ما اخذت الرقم

ومرات الندم ياكلني ..ماعرف تفكيري متخربط ..

...........

كعدت الصبح متأخره على صلاة الفجر ..

لبست عباتي بسرعه وطلعت ..
عقلي يكولي بعد لاتروحين للجامع وقلبي يكولي انجبي وامشي ..

وصلت للجامع فتت لكيت الحجيه دتسبح وتدعي ماقاطعتها ..

صليت وكعدت شويه استغفر ذنوبي هاي الايام كثرانه من ورا ابو الافلام سويفان..

الحجيه // تقبل الله حبيبه

// منا ومنكم خاله شكرا على الكيك البارحه دزيتي ..

// حبيبه ماله داعي الشكر .. سويفان وليدي تعرفي لكاله وضيفه الحمدالله عبن وضيفته وزعنه للمنطقه كلها ..

// هاا على الخير .. يعني عنده شهاده..؟

الحجيه// اي يمه عنده بس هوه عاف التدريس من جم سنه وكابل ابيه بالجامع يعلم قرأن الكريم للويلاد ويه ابيه .. عادينه لحينه عليهِ اني والحجي يرجع يدرس على الاقل يحصله راتب باجر عكبه ازوجه بنت الحلال منوين يصرف والحمدالله لكه وضيفه ..

// اي الحمدالله ..

سلمت عليها وطلعت قبل ماهوه يطلع حتى الوقت حفظته من يطلع من الجامع ويضل يمشي ورايه ..
هاللمره طلعت قبل طلعته بشويه .. طلعت مثل الحراميه اتلفت منا ومنا ..

وصلت يم الفرع واني ابتسم بنصر اي خلي هيج خلي اختفي منانه لكم يوم .احسن الي ابتعد عنه