ثلاث دمعات

بارت 30

رفعت راسي وجاوبتها :- بشنو مأذيتج اني وبشنو
تتأذيين اذا مستقرين اني واخوج بدال ما تفرحينا تجين تهجمين بيتنا يعني؟
وشوفي ترا مهران يحبني واني أحبة ف ان شاء الله ميفرقنا شي بهالدنيا...

جنت فرحانة بروحي لان كدرت أرد عليها
لان اكتشفت وللأسف الفقير ميعيش
شگد ما اني هشه احاول أصلب روحي
والله أعلم شنو الجايني ما أگدر اقاوم بهذا ضعفي..

سهاد :- والله وصايرلج لسان وگايمة تعرفين تحجين وتراددين ولج جبناج فلس ما تسوين وتمسكنتي لحد متمكنتي وشوفي هسه حالج .. جنتي تحلمين بهيج بيت لو بهيج اكل وبهيج مال ولبس ودلال ولج حتى بحلمج ما جنتي تحلمين هيج

طفوف :- الحمد لله على كل حال الفقر مو عيب وكلمن ع گد حالة مثلما اكو فقير اكو غني
وبالنهاية كلنة بشر والخلقنا واحد ومحد يفرق
عن احد لا بلون ولا شكل ولا غنة وفقر
ما أخجل من حالي بالعكس اني الله عوضني بعد مرار وفقر بنعمة فضيلة جزاء صبري وايماني

أحس الكلام يتدفق بفمي وانطقة وجنت متعجبة
من روحي بحيث والله احس احد يكلي الكلام واني ارددة....

سهاد :- مگيولة اليجي من تالي ربة عالي
وبعدين خاف هالمرة عمامي وعائلة بينا وگدرنا نحلها ترا مرة الثانية مهران ما يگدر يسوي شي
طفوف :- صح ومو كل مرة تسلم الجرة خاف هالمزة نفذتو من مهران مرة ثانية الله يعلم شنو حيكون عقابكم .!!
سهاد :- وليش يمة تخبلنا ونرجع نخطبلة بكيفنا صارت مرة ومرهمت مندري بيج حية ام راسين
فارة راسي اخوي فرر

.. وها أزيدج من الشعر بيت ترا لا تضنين مهران يحبج كولي يشفق عليج هيج لان اخوي واعرفة
حنين وگلبة طيب بس لا تضنين يضل عليج وهم انتي لسه ما شلتي لو صبر يصبر شهر سنة سنتين مو أكثر هو هم كبر ويريد يكثر نسلة ولو اتزوج حق الله ينگال ترا من حقة وهاي انتي صارلج سنة وكلشي ماكو...

كلامها الأخير وعاني من شي جنت غافلة عنة
الحمل... ما ردت يزيد النقاش وهم حسيت
مالي طاقة بعد عفتها ورحت لغرفتي واسمعها تحجي
وراسة تريدني انزل اشتغل... جنان ابد متدخلت
هي مرات تسممني ومرات ما تدخل ابد..

استغربت عود اني ليش لحد الان ما حبلت
بالرغم صارلنا هواية متزوجين مشكلتي
أصدگ واقلق من كلشي وع فطرتي دب الخوف
باعماق كلبي وخفت صدگ اتأخز بالانجاب
ويخلي ويتزوج علية...

كل شوية سالفة طالعتلي ما لحگت افرح
بسرعة نكسرت فرحتي...
ضليت للظهر بغرفتي إذن صليت ورحت گعدت
طلعت كيكة من الكنتور اكلتها وسكتت مالي نفس
انزل جوا... تمنيت تنحل هالسالفة وما تصير مشكلة لان مو هينة...

شوية وسمعت صوت سيارة عرفت اجوي
لفيت شالي ونزلت گال بشير مهران طلع مناك لشغلة
وخلة وصعد احسه ضايج مو بشير اليضحك ويسولف..