The Only Girl

Kabanata 26

Dismayadong tiningnan ko sila isa-isa. Kararating lang namin dito kina Daryl at ang mga lintik, nakaharap na agad sa pagkain!

May nagsabi rin kasi na marami raw ihahanda si Tita dahil nga dadating kami kaya ang mga loko, unang tapak pa lamang ng mga paa nila sa bahay ay tumakbo na agad sila sa kusina!

"Magsasayaw pa kayo..." paalala ko. "H'wag muna kayong kumain ng marami, please lang."

May tumango sa akin pero ang iba ay hindi pinansin ang sinabi ko! Umirap ako at naupo na lamang sa tabi ni Daryl. Bahala sila kung gusto nilang magsayaw nang busog!

"Jade, sa dati mo bang school... sumasali ka rin sa mga ganito?" putol-putol na tanong ni Austin dahil puno ng pagkain ang bibig.

Bumuntonghininga ako bago sumagot, "Sila ang nagsasali sa akin." Mukhang wala talaga silang balak na magpaawat sa pagkain!

"Napipilitan ka lang?" natatawang tanong ni Alexis. Iling na lang naman ang isinagot ko.

Pinapanood ko lang silang magbiruan at mag-asaran tungkol sa mga babae habang kumakain. Si Daryl naman ay tahimik lang sa tabi ko. Hindi ko siya malingon dahil pakiramdam ko ay sa akin siya nakatingin.

Nang mapansing patapos na sila ay saka lamang ako tumayo. Dumiretso na ako sa labas dahil doon kami magpa-practice.

Kung tutuusin nga ay dapat wala na ako rito, e! Sila lang naman ay may kailangan ng practice dahil mahirap ang sasayawin nila. Kami naman ni Daryl ay kakanta lang.

Bakit nga ba ako pumunta rito? Dahil ba alam kong mahihirapan sila at kailangan nila ang tulong ko? Pero bakit ko naman iniisip ang kalagayan nila e' ako rin naman ay kailangan maghanda para sa ipe-perform namin?

Ewan ko sa 'yo, Emerald Jade. Gulo mo.

"May nasaulo ba kayong sayaw kahit kaunti?" tanong ko at tumayo sa harap nilang lahat.

Nasa labas kami dahil hindi naman ganoon kainit ngayon. Malawak din kasi ang labas ng bahay nina Daryl at may bermuda grass naman kaya komportable silang nakaupo roon.

Tiningnan ko sina Shawn. Sila ang inaalala ko dahil baka mamaya ay hindi nila seryosohin 'to! Alam kong galit sila sa akin pero hindi naman siguro muna nila iisipin 'yon ngayon, 'no? Para rin kaya sa section namin 'to!

"Ako, meron na! Magdamag ko yata 'tong p-in-ractice!" mayabang na sabi ni Alexis at nag-push up pa bago tumayo at tumabi sa akin.

Ako ang nag-play ng video at agad namang sumayaw si Alexis. Malaki ang ngiti niya at halatang proud na proud sa sarili!

Umirap ako nang malamang hanggang gitna lang ang alam niya. Ang yabang tapos hindi naman pala saulo lahat!

Pero bagay kay Alexis 'yung sayaw. Paminsan-minsan ko rin siyang naririnig na kinakanta ang ibang verse nung kanta at maganda rin ang boses niya!

Talented naman pala ang mga 'to. Kaya pala mayayabang.

"Ang hina mo naman," asar ni Ivan at tumayo na rin. "Saulo ko na 'yan lahat!" mayabang niyang sabi.

Matutuwa na sana ako pero napansin ko ang lalim ng eye bag niya. Natatawang tiningnan ko siya.

"Natulog ka pa ba?" tanong ko, natatawa pa rin. Napakamot naman siya sa batok.

"Three hours din naman siguro ang tulog ko," nakangiwing sagot niya, mukhang nahihiya.

Makaka-survive ba siya ng isang buong araw nang tatlong oras lang ang tulog niya? What the fuck? Hindi ko kaya 'yon! Baka ngayon ay wala na akong energy!