وعصفت بنا الاقدار... البارت السابع والخمسون
للكاتبه زهراء ( روزايه)...
( اعتذر عن التأخير لان بنت خالتي توفت اليوم ورجعت متأخره والبارت على النص اعذروني )
....
ام جراح... شيريد جبار ليش يستغل وگت ماموجودين
ازلامنه كله يجي بليل من يجي السبع وجراح
عاصم.. شنهي السالفه ام جراح هو غريب لو عمهه
الشيخ عنده شچم احجايه يريد يحجيهن وابوج
الله يرحمه
ام جراح.. والله ياابو حسن الوكت مايتأمن العم يغدر
والاخو يغدر وانت تعرف كلش زين عليمن احجي
ليش طالبهه وحدهه چاا منو غريب انه واختهه
ليش مايحجي كدامنه ...
جبار.. سمع صوت ام جراح تحجي وهو جان بالاستقبال
اجه وصاح هيج كلمة الشيخ صارت مامسموعه
يزينب من يمته وجاي توكفين بوجه ولدي لو ترهيتي
بزود ابنج
ام جراح.. اضن يا شيخنه مالك حگ بكد الشعره تدخل
بيتي وترفع صوتك صح حماي وعلى عيني وراسي
والبنات هسه بأماناتي وگبلهه شفت بعيني شلون اذيت
اخيتهه شلون تريد امن بيك
جبار... تجربعتي ولازم ينعاد احسابج هسه انتي
مو شغلتي دزي على بنت اريدن احاجيهه
لو اطبلهه ارفس ببطنهه
فجر.. عفوا عفوا تغفس ببطن منو؟؟ اني موبنتك
ولا انت ولي امغي اساسا اني ماعندي عمام
بعيني هاي الياكلهه الدود شفتك شلون ذبحت اختي
وهسه جاي تزامط من جديد
جبار.. تقرب راد يضربني بس عاصم وام جراح منعو
كام يصيح ويغلط اجي ادوس على راسج كلبه
ذاك اليوم صرتي اله اتجيبيلنه عار وتلطخين اسمنه
حته احزج من الوريد
فجر..اذا جاي اطبق الماكدغت اطبقهن على بناتك
غوح شوفلك غيغ وحده هسه انت واكف كدامي
واعغف بيمن تفكغ خليهه ابالك اذا ماما ضغبتك
سجينه ومامتت اني اسوي الماسوته الزلم
اني موشهد ولا لبابه ولاحته ساهغه ولا وحده
من بنات القصر ادمغ بيهن وتزوج بكيفك
والله اخلي اسمك على كل اللسان وخلي يكولون
بنت علي ذبت عگال عمهه الشيخ
جنت احجي بكل ثقه وهو انگلب وحش يريد
يكمز يسحلني وعاصم يكله بويه شيخلصنه
من السبع كام يغلط ويسب بأهلي حته ماما
الله يرحمهه غلط عليهه
يصيح بعلو صوته زلم ماوكفت بوجهي توكف
بوجهي وحده بطول زري ولكم انه الشيخ جبار
التهابني زغار واكبار هاي المامربايه تحاجيني
هيج ؟؟
تعمدت استفزه حته تطلع كل خياساته جانت ابتسامه
مرسومه على وجهه وكتله منو المامربايه بسلا احنه
بنات علي عفنه التربيه لبناتك وخاصه الشيخه
المغفور ذنبهه وسن...
هنا دست بطنه دفع عاصم واجه عليه بس صوت
السبع وكفه وهو يكله خير ان شاء الله ابيتي
وتمد ايدك على امانتي ؟!!
من اول مادخل جبار وهو يحاجي بام جراح
جان جبار بالصاله والسبع دخل للمطبخ من سمع
جبار يعيط على ام جراح ظل واكف بس باب الغرفه مباشر
على المطبخ من حجيت اول جمله هز راسه السبع
برضه بمعناتهه كملي...
من جنت احجي بثقه لان اعرف اكو رجال واكف يحميني
لو وحدي مااعتقد اجازف وهيج انرفزه بس من
جان واكف السبع وقابل بكلامه صار جبار هو الغلطان
لان اتهجم علينه ...
جبار.. بويه السبع ماشفتهه السانهه شطوله چاا
هي هيج الاصول مااحترمت شيبة عمهه
اخيتهه فقيره وامهه خوش ربتهن
السبع.. ياابو عامر مدام ماكو زلمه بالبيت تلكاهه زلمه
هي وشكو حرمه بالبيت هاي وصيتي الهن
وانت مااجيت باسلوب العم الحنين جاي تشمر حجيك
عليهه وبغيابي چان خابرتني وكتلي مشكلتك
ليش تستفرد بيهن
جبار.. هسه العم من يزور بنيات اخو يصير غلط
واريدن اذيهن ؟؟ لا بويه موهيج العشم يالسبع
ترى كثرت عداوتنه
السبع... انت دكول العم بس انت موعم بالنسبه الهن
انت الكتلت اختهن ونكرت وحلفت زور
وانت الحاربتهن بدراستهن ولوما جراح حمه اختهه
جان مصيرهه مثل مصير الظلمتهن ..
عقيق.. الحديث اشتد وحامي وجبار عيونه بگصته وعاصم يهدي بالسبع حجت عمتي ام جراح تريد
تهدي السالفه كالت عقيق سوي جاي لعمج الشيخ
يمه السبع اكعدوا واحجوا انتو اهل شوف عمك شعنده
وانت طول بالك شيخ ...
كلهم كعدوا واني رحت اسوي الجاي اخاف من ينجمعون
السبع وجبار احس تصير مصيبه وواحد يريد ياكل
الثاني الكره والحقد مرسوم بوجه جبار...
خليت القوري على النار ووكفت بالباب اسمع وفجر
كاعده يمهم عاصم اللوگي يحاول يضحك الطرفين
حته يهدي الوضع بس صاح بي جبار وسكته
السبع.. احجي ابو عامر هاي فجر كدامك
جبار.. فجر بنيتنه وانت 2شءتعرف احنه حريصين ع بنياتنه
ماعدنه وحده درست وجنطتهه بظهرهه وطابه وطالعه
غير بنات علي كسرن المعهود ولبابه تكفلهه جراح
وفجر تدرس ويه مريتك
بس مامقبوله يالسبع بنت تروح لشمال بدون ولي امر
صح اواب وليدنه بس انت معروف عنك ماتامن باخوك
ليش مارحت وياهه ؟؟
السبع.. هااااا محشوم ابو عامر عندك العرض غالي
بس ويه السبع العرض رخيص اذكرك بسوايتك
انت وبنتك وسن وهسه جاي تحجيلي بالعرض !!
اواب ابن شيخ ينحلف باسمه ولو ماامن بي
ماادز عرضي وياه بالعكس لو رايح انت لو واحد
من ولدك جان ماامنت وماعفتهه لوحدهه
انه جنت بادي بمشروع ومااكدر اعوفه وجراح
ماانطوا اجازه كلنه. عدنه التزامات وحته لو رايح
انه او جراح هم ناخذ اواب ويانه لان هو يعرف الطبيب
جيتك على هاي هسه كتلك ماله داعي تصيح
وخابص البيت ووينهه وتريد تضربهه
جان وفرت على نفسك وخابرتني افهمك
جبار.. چااا مدام الحجي هيج انه اعتبر وليهه
انت ابن عمهه بس انه بمثابه ابوهه وهسه
كل واحد بيكم عنده مره وانه اريدهه لابن عباس
استحقت زواج وهاهي امهه ماتت ومالهه عذر
الرجال يسترهه ...
السبع.. موانت تحدد شوكت تزوج عندي اخت وحده
انذبحت ياجبار ولسه نارهه ادك بكلبي واجت فجر
بمكانهه تعرف شني اختي تعرف احرك سلف كامل
اذا واحد شمرهه بريشه
جبار وحق هو علي انت وغيرك لو شيخ الشط
مايوكف بوجهي اذا انمست شعرهه منهه
تدرس.. واطب وتطلع بالمكان اليعجبهه انه مسوؤل
عنهه حجايه منك من غيرك محد يلوم غير نفسه
جبار.. لاتهدد موبكيفك اجمع شيوخنه وعمامنه
واحجي عن اسلوبك وهالعنطزه العندك
البت عمهه ولي امرهه موابن عمهه
السبع.. اي والله تختصر عليه الوكت بجمعتهم
هم بالحالتين جامعهم واريد اشوف ياشيخ
يگلي انت على غلط اله احط اعگاله جوه رجلي
بعد مااتحمل بطشك كتلك اشوف اختي بفجر
وانت بسوالفك هاي خليت ثاره يشب من جديد
وتعرفني اشري كتال ابوي واختي بروحي..
عاصم اخذ ابوك قبل ماارتكب بيكم جريمه
وانعل ابو اليكول السبع على غلط
وهاي المره عديتهه المره الثانيه اذا شفتكم
صوب فجر اذا وكعت وحدهه ابليكم
واخلي نهايتكم نهايه اخوك السطه على بيتي
عاصم... كوم بويه موهيج الحجي خلي يهدء
السبع ونحجي وانت يا اخوي على كيفك
اعصابك موزين عليهه
جبار.. النه احساب يالسبع ياابن فاضل
ابوك هم جان هيج ماعنده احترام للاكبر
منه وزرع بيك. هالاخلاق ولاجن رباك الشيخ
عقيق... طلع جبار شايل عباته جنه باتمان
وام جراح طلعت وراهن اني اجيت اركض
وكفت يمه كتله شو ماشربوا جاي مالحگ يخدر
السبع.. اليطلع زعلان مايشربون جاي ابو البيت
تعلمي خاف تصيرين مرت الشيخ
عقيق.. لا مااصير اكوم احجي عبن شنهي
ولزوم الشيخ يدري واطلع لابسه مثل هيام
واكول مدن السماط خطار الشيخ مستعجل
السبع... يابويه شمسوي من خير والله انطاني
هالجماره هاي شوف الحلك الينكط عسل
عقيق.. عيب جمره لاتسمعنه فجر
بعدني بس كملت الجمله اسمع كحتهه بالغرفه
وعبالك انطتتي ايعاز اني سمعتكم
اجت ام جراح والتهه يسولف وياهه
واني رحت للغرفه لكيت فجر لازمه شريط
القياس وتقيس وتسجل ودكول من باجر اسوي رجيم
والعب رياضه رغم ماصدكتهه بس كتلهه ااي
فجر.. عود اني ليش مااتخيل السبع يسوي
مكسغات
عقيق.. شلون؟ منيله مكسرات
فجر.. لعد قبل شوي شكالج منو ينكط عسل
عقيق... ولي فجر لتحجين وياي هيج والله استحي
فجر.. واني شحاجيه غيغ سمعته
عقيق.. غير مرته
فجر.. تعاي عقيق عندي خطه تشاركيني بيهه
عقيق... شنو ؟
فجر.. انغضي جغاح ولبابه
عقيق.. شلون
فجر.. امشي وغاي ومالج علاقه بس المطلوب منج
تغوحين للسبع دكليله ياخذنه للبستان العصر
عقيق.. جنت حابه يرجعون جراح ولبابه. وشدكلي
فجر اسوي بدون تفكير رحت للسبع كتله ضايجه
واريد تاخذنه للبستان كال ميخالف والشيخ ياسين
عازمنه على عشه افترن وللمغرب تجن يم الشيخ
كوه قنعنه لبابه تطلع من العزله مالتهه
بدلنه واخذنه السبع عمه ام جراح راحت بوجهه
لام ياسين واحنه نفتر بالبستان ماكو احد وقريب
على البيت وبي اشجار حلوه وبدت الشمس تغيب..
عدهم حضيره حيوانات بعيده عن البيت ابدايه البستان
ومسوؤل عنهه حراس بوقت المغرب يجيبون
الحلال يدخلو للحضيره من خرفان ومن ابقار والجواميس كومه معزوله ومسؤلين عنهه نسوان وزلم
كومه يبيعون گيمر وحليب...
من نتمشه جانت الحضيره فارغه بيهه عجول صغار
هستوهن جايبتهن امهن طبينه يمهن جان عدنه موبايل
اسمه N8 ناخذ بي صور لان ابد ماطالعين محبوسين
بالبيت..
لبابه تمشي بدون شعور احنه مالنه قصد بيهه ولاندري
راح ايجيبون الحلال خطيه جانت بالحضيره تباوع
شلون الام معتنيه بصغارهه وهي تحجيلنه كلساع
وكالت سبحان الله الحيوان متمسك بصغاره وبني ادم
يقتل بدم بارد
احنه طلعنه وعفناهه رحنه. للحضيره الثانيه مال الخرفان
وماانشوف غير الابقار هجمت منو الاسرع وتدخل اول
وحده للحضيره ولبابه جوه واحنه منا اجت الخرفان
حصرتنه كل وحده حارت بروحهه
طلعوا الزلم يهدوهن وهن يندلن مكانهن ويجن يركضن
صوت لبابه وهي تعيط وصوت بجي. واني اريد اطلع
اجاني ابو گرون حصرني بالزاويه
الله ستر جان اكو تايرات جوه والسياج ناصي حيل صعدت عليهن وطفرت وفجر تركض من حضيره الابقار
وتصيح اكلن لبابه وترجع. عليه تصيح خوما نطحج الخروف
همزين واحد من الزلم شافنه وكمنه نبجي على لبابه
وكناله اختنه جوه وطب طلعهه لازمهه من جوه اديهه
ورجليهه تخط وراهه مهبوطه ولا ايد ولارجل
رجليه ترجف اريد اشيلهه ويه فجر مااكدر
كعدت بالكاع ونبجي والرجال جاب مكينه
وصعدنه بالبدي ولبابه منتهيه مافتحت عينهه
وصلنه لبيت الشيخ ياسين جان الكل واكف
اواب وابو وجراح والسبع وبعد زلم جماعه الشيخ
من شافونه انصدموا نزلنه السبع من البدي وجراح
شال لبابه دخلهه ليجوه..
التمت كلهه على لبابه وجراح يم راسهه صاحت ام ياسين ميلن عن البنت وجيبن المي وكامت تفرك باكتافهه
واديهه يله انتبهت شويه بس فتحت عينهه
كامت تبجي بصوت وجهه اصفر وتأشر علينه
اني وفجر وتحاجي جراح دكله هذني حبسني
بالحضيره والانظار كلهه توجهت علينه باوعت للسبع
خزرني بسرعه دنكت
احنه صح دخلنه سوه بس موبنيتنه نعوفهه هو حته
اني همزين مانطحني الخروف شويه لبابه هدئت
واني وفجر داكين دكه كرفصنه بالزاويه وسكتنه
لبابه حته ماتعشت ايدهه ترجف وام جراح خبصت
الدنيا حته الينسه السالفه تذكره دخل الشيخ ياسين
وره العشه هو واواب وكعدت ام جراح تحجيله
هذني الزعاطيط حبسنهه وهمزين مارفسنهه الهوايش..
ولا باوعت للسبع لان ادري بي ماقابل علينه
بس الشي الحلو رجعت لبابه تحجي ويه جراح
من يسالهه اتجاوبه جانت نهائي ماتشوفه..
رجعنه للبيت بالطريق ساكتين بس وصلنه صاح
بينه السبع عقيق فجر تعال وراي دخل للاستقبال
واحنه وراه اول مابده بينه رزاله غسل ولبس
وكال انتن متعمدات؟؟؟
اني كتيت الاول والتالي كتله فجر كالت نسوي خطه
بس عبالي هي هاي نحبسهه عود ويجي جراح
ينقذهه غمتني فجر وهو استلمنه
جرنه من اذاناتنه اثنينه وكال اذا عدتنهه اركع
راس براس كلما تتتحدن تسولنه مصيبه
يرزل واحنه ساكتين ..
عافنه وطلع كامت فجر جرتني من شعري
شلون احجي الاتفاق واصلا هو الاتفاق خرب
واني ماعرفت اضم السر..
رحت لبيتنه بدلت ومددت بالفراش وره نص
ساعه اجه اباوعله شمر ساعته بانزعاج
وطفه الضوه ونام بصفي اني عود زعلانه
انطيته ظهري ...
تلمس اذني بهدوء اتذكرت فجر من كالت
احب اذان اواب بسرعه طكيتهه ضحكه
فتح الضوه واني خربانه ضحك وهو صافن عليه
السبع.. شبيج بويه؟ گرگرتج لو تلمست اذنج
عقيق.. حاصره ضحكتي مااكدر احجي قابل اكله
فجر تحب اذان اواب خلتني بس اشوف الولد
اباوع على اذاناتنه
مااعرف ازعل على السبع حضنته بسرعه
وهو يرضي بيه ويبوس بوجهي
لحدماغفيت بحضنه..
لبابه.. اكلت هبطه تسوه عمري من هذني الصعاليك
من رجعنه للبيت اني انام بغرفه ماما وماادري شي
عنه غير اجت ابرار جابتلي النتيجه مالتي
كالت جابهه جراح ناجحه رحتي مرحله ثانيه
بليلتهه من رجعنه من الشيخ ياسين جنت نايمه
وفزيت على شي يمي واشوفه بصفي مخلي
ايده جوه راسه وغافي نص جسمه بالكاع
وراسه على مخدتي
اخذت نفس عالي وباوعتله جوه عيونه اسود
تعبان حيل وجهه شاحب ملاحظته صاير ماياكل
غير وجبه وحده بس بالعشه وهم اكله قليل
صار كل وقته تدخين
صح السويته غلط بس انفجرت كمت مااتحمل
هوايه تراكمات صارت زواجي ووضع جراح وفاه ماما
وخساره طفلي ونوال احسهه لعنه وتركض وراي
وعينهه علينه
غير مرات احس روحي ضايعه اريده ومااريده
اكرهه واشتاقله صرت مثل الماعدهه راي
والماتعرف شتريد احتاجه واريده يمي ومن يتقرب
اضوج اريده يبتعد...
ظليت مركزه علي انت هم تعبت وعانيت
وجرحتك بكلامي بس محتاجه امي حيل
محتاجه حضنهه واشكيلهه موقصدي اعيرك
ولا اقلل من احترامك لو موجوده ماما حته ماتقبل
على السويته ...
دنيت نفسي وبسته من خده بسرعه فز انتبه على نومتي
عايف الغرفه وجاي فرك ركبته وطكهه وكال
هااا ماادري اسف بسرعه غفيت
سكتت اني الظاهر ماانتبه على البوسه
باوعلي وكال ارجعي نامي كعدتج
لبابه.. نفسك عالي ودكات كلبك سريعه بيك شي
جراح... اي بيه
لبابه.. شبيك؟؟
جراح.. بيه انتي!!!
انتي المااعرف شلون احافظ عليهه واسعدهه
لبابه اذا احجيلج تفهميني مااعرف روحي شريد
ليش هيج اعصب وياج وانتي اخر وحده يمكن
افكر اذيهه
اذيتج هنا موو ودنك على خدي باسه
وهنا اشر على ركبتي لان خنكني
وهنا على كتفي كل مكان ضربني علي باسه
وهو يعتذر...
لبابه.. جرحتك بالحجي بس اني موهيج طلع
الحجي مني بدون وعي
جراح... غمض عيونه بعصبيه حسيته جاي يرضيني بس
بعده داخله مجروح مني مو من گلبه بس شاف
وضعي تعبان وبادر هوو..
جىاح.. امشي وياي نصعد لغرفتنه
لبابه.. ردت اكوم وياه بس اتذكرت كلام السبع كال
اذا رضاج لاتصعدين اله يجي يرجعج ويحاجيني حته
يتعهدلي مايضربج بعد
كتله لاعوفني نايمه هنا سكت بس كال براحتج
وكام اثنينه مانعرف شنريد بس ندري اثنينه
نحب بعض ويمكن حبنه راح يسببلنه متاعب هواي...
رانيا.. ضرغام اريد اروح للصالون
ضرغام.. روحي
رانيا.. انت اخذني ماما ماتحب تروح
ضرغام.. اخذج العصر وباجر انروح للبصره
رانيا.. شنسوي
ضرغام.. عطله ماعدنه شي مشتاگ للبصره
من وراج سويتيني بغدادي من بصراوي اسمر
لبغدادي انيق
رانيا... هههههه اصلا اني اول ماشفتك ماعبالي اقربائهم
لان مامبين عليك بصراوي
ضرغام.. لا اابا عن حد بصراوي بس البيئه الهه دور
عشت فتره الشباب ببغداد ودوامي يوميه بمكان
صرت مشكل
رانيا.. ضرغام اني ليش هلكد احبك
ضرغام.. لان اني احبج
رانيا.. شكد تحبني
ضرغام.. عاد بده التمسلت زهكتيني شكم مره
تسأليني شكد احبج ولج حته من انام السؤال يجي كبالي
رانيا.. كول شكد لاتغير الموضوع
ضرغام.. بكد حبج الي
رانيا..اناني
ضرغام.. سخيفه
رانيا.. السانك ينكط عسل ماتعرف دكول حبيبتي
ضرغام.. من اكلج حبيبتي معناتهه بارد من اغلط
معناتهه اموت عليج
رانيا.. عكس الناس انت حضره الضابط
ضرغام.. اكول يحلوه اجتني قدم 6 اشهر
واني على ابواب ترقيه اذا اجتني بعد قدم
مولازم تفرحين بيه وتكافئيني
رانيا.. لاعيوني لااا مااكافئك هسه لو يسووك
لواء عوفني اريد اروح للصالون تاخذني
بحجيك وتروح عليه الروحه
ضرغام... كومي اقفلي الباب خليني منتعش
حته اوديج للصالون وانتظرج واني الممنون
رانيا.. ضرغاااااام والله مااكوم اسبح بعد
ضرغام... ميخالف اني اسبحج
رانيا.. انت ماتمل شعندك طاقه مو كتلك اني مريضه
ضرغام.. الله عليج هاي ربع طاقتي غير مراعي
حالتج المرضيه يله رنوو منو حبيبي؟؟
رانيا.. مااا
ضرغام.. لج من اتوسل اتنرفز
رانيا.. توسل بعد حسسني اني انثى
ضرغام.. صدك؟؟؟ لعد شجنت احسسج بسلا
جبار وماادري
رانيا.. لاهيج اتوسلي ودلعني
ضرغام.. تكومين لا ابتلي بيج للج رانياااااا
بهاي حركاتج شعلتي عمام ابوي
رانيا... ضحكت بصوت عالي وهو يبوس برگبتي
وكالعاده المنتصر ضرغام وراحت عليه روحة الصالون
لان تاخر الوقت وهو سبح وطلع واني يهيج عليه
الالم اخذلي ساعتين بالفراش مدده...
ثاني يوم رحنه للبصره مشتاقه للبنات هواي
بيتنه هنا لكينه البنات مرتباته كعدنه بي
فجر ولبابه وعقيق مااشبع من سوالفهن بيومهه
كلت لضرغام اليوم تنام وحدك لان اتفقنه نفرش سوه
وانام بغرفه خاله..
كالي احنه هم اني وجراح والسبع والشيخ ياسين
انبات على الشط نعيد الايام الفاتت
رانيا.. ومنو يظل يمنه
ضرغام.. زلم ياسين يجون يحرسون لان هاي الكعده
وراهه تكتيك وتخطيط
رانيا.. من جان يحجي اني مامنتبهه شيقصد
بس طلع هذولي ال4 وراهم بلاوي كلنه
ماندري كل وحده بينه ماتدري رجلهه شيخطط...
ثاني يوم الصبح صادفت جمعه وجراح ماعنده
دوام اجتمعنه على سفره وحده نتريك ومن خلصنه
الريوك كال جراح السبع انه اريد لبابه ماترضه
ترجع لغرفتهه
السبع.. يخوك بالاستكان ويحجي وانت شوكت
مايعجبك تريدهه
جراح.. كلنه نعصب وتدرون بيه مااهون اذيهه
بس هي الله يسلمهه حجت حجي مالايق بينه
السبع.. توعدني كدام الكل ماتمد ايدك عليهه
حاسبهه اذا غلطت بس لاتضربهه لان تتمرد
عليك موعبالك راح تخاف منك
لبابه.. اسمع حديثهم واني مدنكه سألني السبع
تقبلين اعتذاره؟؟ رفعت راسي شفته يباوعلي
جراح ياوجع كلبي احب عيونه حيل احب نبره
صوته وهو يكول لبابه واحب هدوئه الطاغي على عصبيته..
كتله اني هم اعتذرله خلي يسامحتني حجيت
حجي موحلو بس بلحظه عصبيه
السبع.. هاهي اتصافيتوا واثنينكم انتبهوا
على نفسكم واتحكموا باعصابكم ترى
الاعتذار المتكرر مايطيب الجروح بالعكس يلچمهن
رانيا.. باوعت لضرغام رفعلي حاجبه واشرلي براسه
بمعناتهه كومي للبيت فتحت عيني بصدمه وهزيت
راسي برفض ..
كام وكف وكال رانيا تعالي حضري ملابسي
عندي طلعه انحرجت كدام الكل كمت وراه
طبيت للبيت كتله وتاليهه وياك حته هنا انطينه
مجال موسمطت عشيرتي
ضرغام.. شبيج شكو هاي الهوسه على ملابس
ارجعي اني احضرهن
رانيا.. يعني تقنعني ماعندك غير نيه
ضرغام..وخايف منج مثلا بس والله علمود ملابسي
وصدك عندي طلعه ولان بالجنطه مامكويات
بس مدام هيج تفكيرج منحرف اني اخاف
الله لازم البي كل تفكيرج الظاهر والباطن
عوفي الملابس وخلينه نفتتح يوم الجمعه
بما احله الله
عقيق.. جنت واكفه بالمطبخ واسولف ويه فجر
واجت ام جراح تركض كالت وين السبع
اركضي لبابه صيحي جراح
ركضنه وراهه وهي تلبس بشالهه شكو عمه
شصاير احجي؟؟
ام جراح.. ولجن تخزينه وتعزينه وحدنه
من بنات القصر معتدين عليهه
عقيق.. كلهه التمت جراح من جهه والسبع من جهه
ضرغام واكف وصافن عليهم ويأشر للسبع يكله
لادكولهه من عرضنه؟؟؟
راحوا كلهم وحته ام جراح راحت واحنه انلوب
شكو ومنو ماكو بنات بس ايناس وبنت عاصم اخت
نور عمرهه 16 سنه وبنات عامر صغار
اتذكرنه نور ركضت لبابه خابرت عليهه ماردت
وام جراح ماعدهه تليفون ظلينه اندك على نور
هواي يله جاوبت هوسه وصوتهه تبجي
لبابه.. نور شصاير طمنينه؟؟
نور.. لبابه راح يكتلون اخيتي ولجن اخيتي راح
تروح من عدنه راح يذبحوهه مثل شهد
لبابه.. على كيفج نور فهمينه شكو اجوكم السبع وضرغام
وجراح بس اهدي
نور.. وينه السبع جدي الشيخ اخذهه للشط يغسل عارهه
مدري منو ضحك عليهه والله اختي فقيره
ولاحظتهه مريضه وماتاكل والله مظلومه كلي لجراح
يلحكهه هو موضابط...
لبابه.. بعدهه تحجي وخلص الرصيد يارب الطف
بحالهم اتذكرت شهد مظلومه واحتمال اخت نور هم
بريئه بنات عاصم حيل حبابات ماتطلع منهن هيج شغلات...
عقيق... دك تليفوني ركضت شلته السبع
بس فتحت خط كال عقيق حضري الغرفه الثانيه
اني جاي بالطريق وسده
من سديته كتلهن هيج كال السبع جان دكول
ام رانيا خاف اخذهه السبع ستر عليهه
لازم يسترون عليهه لوتنذبح واذا مااخذهه السبع
ياخذهه جراح وهسه تشوفن ؟!!!!!!!!
.
.
.
يتببببببببع......... متابعه ممتعه