لم تكن أمي(لبوة الأسد)

...48...

،،لم تكن أمي(لبوة الأسد)،،

_البارت الثامن والأربعون _
#بقلمي _Zoza25

~~~~~~~~~
- يڪَلها :
زاعليـني .. ومـن أصيحچ لا تجين
شويـه راويني ڪَـفاچ
حيـل احبچ مـن ؏ـلي تدللين

~~~~~~~~~~

هدى _من أجمل نعم الله علينه هيه الصحة وسلامة البدن فعلا هذني النعمتين منحس بأهميتهن اذا منخسرهن هواي بينه يحجي على وضعه لو يتبطر على حياتة وميرضى بالي الله ناطيه اله بس بلحظات مرات نتمرض نحس بقيمة الصحة والنفس شحال اذا كان مرض مزمن هنا راح تشوف الدنيا شكد تافهه و صغيره..

خصوصا من تكون على بعد شعره من الموت شي كلش يرهب بحيث من صدك تشوف الدنيا من غير زاوية رب العالمين اليوم كتبلي عمر ثاني غركني بكرمة هوه وأهل البيت (عليهم السلام) هذا الموقف والشي الي صارلي اليوم مستحيل يجي شي أعظم منه بحياتي..

التفتت على جهتي اليمنة مهيمن ايدي لحد هسه متمسك بيها ولازمها قوي حته من طبوا اهله ولا عافها ظل لازمني احسه يخاف يعوفني لا اروح منه لمعة عيونة ولهفتة الي مكاعد يكدر يضمها وفاضحته كدام اهله اكتشفت بيومها انو مهيمن احلى شي انجبرت عليه بحياتي مستحيل احد يحبني بكده..

وعلى جهتي اليسره كاعده أمي حياة لازمة دفتر ادعية وماعرف شنو تقره بي ههه..
فضل اجه صغير وناعم لهذا بقوا بالحاضنه مشفته لهسه..

ثاني يوم اني طلعوني من المستشفى بس فضل بقى بالمستشفى اسبوع يلا طلعوا وبهاي الفترة ظليت بس ابجي عليه أريده يمي لحد مطمنوا على صحتة وجابوا للبيت اني روحي رايحة عليه شفته بس من بعيد وحته مبسته لو شميته لهسه..

ويوم الي اجه جان يوم عيد عدي بس هم خفت ماعرف اشيله وشلون اهتم بي أمي رادت تاخذني عدها بالبيت بس مهيمن مقبل يكلها اني اداريها ابقى يمها بس متروح يم احد لهذا اجت امي هل مره يمي بقت بالبداية..

واجهت صعوبة بكل شي تقريباً ماعرفله وحته من اشيله اخاف لانو كلش ترف وصغيرون بس شنو من اباع عليه ماخذ بس ملامح مهيمن شبهه قوي بيناتهم والله..

وره كم يوم صار ب فضل ابو صفار كلش انقهرت وخفت عليه سوده عليه أمي جانت تكلي هذا الشي عادي يصير ويه كل الأطفال بس شيقنعني وهم فتره من التعب والسهر يلا راح منه من اريد ارضعة لازم اخلي جواه مخده حته ارفعة لصدري وهذا الشي تعبني مرات ماسيطر عليه احس يعني بأختصار هواي تعبت يلا بديت اتعود واتعلم على الطفل..

أمي ظلت عدي اسبوعين وراها صارت ترجع لبيتها بس تجيني كل يوم معافتني ابد واي شي احتاجة اطلبه منها واقل شي يصير اركض اسألها عمتي جنان موجوده بالبيت وياي بس مجنت اروحلها بكد أمي حياة استحي منها..

للأسف هل سنة مكدرت امتحن وراحت عليه السنة بسبب حملي و وضعي الصحي بس اكيد ارجع اقدم بالوكت المناسب مرت الاشهر وفضل مالي عليه حياتي هواي اصفن عليه واكول سبحان الخالق..

طبعا البيت طغت عليه طابع الفرحة والحركة بوجود غدير الصغيره وفضل صار عدكم ثنين أحفاد صغار وكلش فرحانين بيهم خصوصا من بدوا يكبرون ويسون حركات تخبل خو مهيمن من يروح الدوام واول ميرجع اول واحد يركضله هوه فضل يبوسة ويلعب وياه وهذاك الخ ممقصر عبالك يفتهم ويظل يسوي حركات عود من يكملون لعبهم يلا يذكرني ويستلمني بدال ابنه..

فضل حاطين السرير مالته الخاص على جهه بصف الكنتور بس ينام اودي بفراشة حته يتعود ينام بمكانة وميضعضع من مكان لمكان..

فاليوم جان نازل مهيمن من الواجب وكاعد ويه اهله يسولف وفضل جان بحضنه مطفي وكت نومتة أخذته من مهيمن وصعدته فوك والله أقل النص ساعة سنح ونام حطيته بفراشة...

علكت الاناره الليلية وبدلت لبست دشادشة قصيره مال نوم ودلعة و رطبت جسمي كالعاده وكمت اسرح بشعري..
شوية واجه مهيمن..

مهيمن _كأنوا مرتي حليانة وصاير عليها عين..

هدى _شلك بهل حجي عيني..

مهيمن _والله هذا الي داشوفة واذا تردين نتأكد تعالي  نجيكج..

هدى _هههه لا شكرا خليها الك..

مهيمن _نسوان تدفر النعمة بأيدها والله..

هدى _ شفتة راح للزاوية ذب ملابسة وعلكهن احلى شي بي انو هوه مرتب ميشمر بملابسة شوية واجت بالي شغله بس ترددت احجي بالاول بس بعدين حس عليه مهيمن من نضراتي..

مهيمن _عدج حجي ضامته احجي..

هدى _هوه يعني اكو شغلة..

مهيمن _اي شنو هيه..

هدى _رحت كعدت قريب منه وحطيت ايدي على ركبته..
مهيمن حبيبي..

مهيمن _حياتي دخلي بالمفيد بله هاي السوالف..

هدى _اي شبيك غير داحضر للموضوع..

مهيمن _مو راح اكلج بعد شوية لو تلحكين تحجين لو متلحكين..

هدى _عوذه منك اني وين وانته وين..
احم المهم مهيمن شوكت تجيبلي تلفون يعني ضجت واني من أريد احاجيك اطلب من هذاك وذاك هوه ادري غلطت هذيج المره بس..

مهيمن _هدى سدي الموضوع..

هدى _اي شبيك خلي نحجي الله عليك..
سكت ثواني صافن مثل الي ديفكر بعدين حجة..

مهيمن _هدى سالفة التلفون تضوجني يعني طلبي مني اي شي الا هاي عوفيها لانو متعقد منها..

هدى _يعني صح ضوجتك قبل بس مو معناها اعيدها مره لخ واظل هيج طول العمر..

مهيمن _هسه شجاب هذا الموضوع على بالج اني من انزل مو تلفوني بأيدج ٢٤ ساعه وبعدين اني مداكلج بعد مراح اجيبلج بس هسه ماريد ولا اريد اصلا..

هدى _زعلت مني يعني..

مهيمن _مزعلان بس مالها داعي نسوي مسافات بينة لو مواقف على مواضيع مو ضرورية اني من ماريد اجيبلج تره مو معناها ما اثق بيج اتوقع احنه عبرنه هاي المرحلة بس شي ما ارتاح اله والله يعني كارهه ماعرف..

هدى _هاهية براحتك..
لزمني من ايدي سبحني عليه وباس ركبتي..

مهيمن _زين شنو رأيج نسولف بشي اهم من سالفة التلفون التعبانة الي تسد النفس..

هدى _هههه انسى يمعود ماريد مو شي..
دنك عاض خدي...
اخ على كيفك

مهيمن _طيبة خدودج شعلية اني ..

هدى _دنك وباس المنطقة بين الكتف والركبة خلاني اسنح..

مهيمن _وهاي طيبة اكثر وشامتج الي محليتها..

هدى _خله ايده وره راسي قربني عليه واخذ شفتي ببوسة عميقة..

مهيمن _وهذا الكرز هم طيبة..

هدى _هوه يحجي واني خانسة جواه الحمد لله والشكر صرت ام ومن نوصل لهيج مرحلة اخنس..
سحبني لحضنه يلعب بكيفة بعده ستوه كايل بسم الله جان نسمع صوت فضل يبجي..

حطيت ايدي على صدره دفعته بخفه حته اكوم اباوع على مهيمن صفن عاكد حاجبة مثل الواحد الي جان بغير عالم وفجأه كعدوا شكله يخرب ضحك..

مهيمن _قابل شنو السالفة هوه كلمن مزوج وعده طفل هيج يصير بي..

هدى _ههه دوخر خلي اشوفة الولد..
كمت بسرعة بس وصلت يم سريره رجع سكت من وحده..

مهيمن _هاي شنو بعد ادري ابن الكلب ليش تسوي هيج كاطع عليك ليلة عرسك ومادري..
بله انته رجعت نمت أمك شيرجعها هسه ابوية لو فارس العار..

هدى _هنا مكدرت اتحمل منضره شلون يحجي من كل عقلة يتعارك ويه ابنه طكيتها بضحكة وحاطة ايدي على حلكي حته ميطلع صوت ويرجع يكعد..

مهيمن _رفع حاجبة..
شنو ست هدى عاجبج سوالف ابنج الظاهر قاطع الأرزاق..شو تعاي..

هدى _راد يجي عليه بسرعة طفرت وطلعت للحمام اسمع مهيمن يصيح وراية سبحت على السريع ورجعت للغرفة وكفت انشف بشعري كملت ورجعت نمت بصفة جان شبهه غافي حط ايده على خصري ورجله على رجلي..

مهيمن _ادري شو انتي سبحتي وهيه سبحة وحده بربج هذا هم حجي..

هدى _انداريت عليه بست خشمة..
حبيبي نعست اريد انام وبعد خرب واهسي يلا نام انته هم راجع من الدوام مو زين عليك الجهد..

مهيمن _والله مو صوجكم صوج المطيكم مجال انتي وابنج لج  حاط روحة وياي وانتي خو لكيتيها فرصة وشردتي..

هدى _هسه شتريد حته ترضى..؟!

مهيمن _اريد تعويض..

هدى _ضحكت..
ماشي تدلل..

مهيمن _ومو تعويض واحد تعويضات..

هدى _يابه جنك على تعويض وهسه نام قبل مايكعد منقذ أمه..

مهيمن _لا والله خاف متقبلين اني اكول اخذ تعويضاتي بنفسي ومن هسه هم..

هدى _ياا مهيمن..
توه يريد يبوسني وجان فضل يرجع يتنحس يعني والله موقف يخرب ضحك..

مهيمن _يابه بطلنه بطلنه هاي راح ننطمر بس اسكت والله جهال اخر وكت وانتي كافي تضحكين تره اطلعها من عينج بعدين..

هدى _هههه تصبح على خير حياتي..

مهيمن _وانتي بخير كليبي..

هدى _ثاني يوم كعدت متأخره شوية من وره فضل لانو بالليل كل شوية يفز واسهر وياه واخير شي من يطلع الصبح يلا ينام واني هم انام وراه طبعا مهيمن لو شكد ميبجي فضل ويتنحس يظل على نومتة ولا يكعد اصلا يكلي اني هناك بالواجب على أصوات الضرب وابقى نايم مو أنوب صوت بجي طفل تردي يكعدني ههه..

غسلت وبدلت ملابسي بشي مستور وقبل ما انزل بقيت باب غرفتنة مفتوح حته خاف يبجي اسمعة جانت عمة دتحضر بالغده وفاطمة يمها طبعا اني بالبيت عليه وجبة العشة لهذا ميحجون اذا اتأخر الصبح بالكعده مشتهيت اكل لانو مظل هواي للغده صبيتلي كلاص جاي وبس..

مهيمن جان كاعد بالاستقبال ويه عمو  ويمهم غدير الصغيره بحضن عمو كاعده فبهل أثناء صاحني..

مهيمن _هدى يمكن كعد فضل شوفي..

هدى _اي هسه..
صعدتله بسرعة جان توه كاعد غيرتله واني ابوس بي طبعا شكد حلو من طفلج من هوه وصغير يعرف هاي امه ويفرح من يشوفها ويسكت بس يمها ويبتسم بوجها نزلته وياي وكعدنه يمهم بالاستقبال..

ابو محمد _وهاي كعدوا احفادي الحلوين..

مهيمن _يا حلوين يابه دشوفه شلون حاط ايده بحلكة ولك بابا عيب انته رجال شنو تمص بأصبعك..

هدى _هسه قابل هوه يفتهم شنو تكله..

مهيمن _هذا ميفتهم لا والله صدك حجي عدي سؤال اني من جنت صغير هم ابجي من تروح انته يم امي..

ابو محمد _هوو اصلا جنت تموتني ماكو هيج شالع كلبي بحيث جنت اكول الا ما يزوج وابنه يطلعها بي..

مهيمن _سبحان الله تحقق مبتغاك ممقصر المحروس..

هدى _ مهيمن علاقتة ويه عمو اكثر من أب وابنة مرات يصير عمو الهم صديق بحيث يحجي وياه هيج عادي بس شلون فشله خلاني بيها بحيث كمت استحي ارفع راسي واباوع على عمو..

همست.. انته صاير كلش ملاحظ روحك..

مهيمن _شسوي اذا مرتي صارت ويه ابني ضدي واني هم اصير ويه ابوية عليكم..

هدى _دهاك شيله داساعدهم بالصب بعدين نحجي..
بهل أثناء طبوا غدير وهمام من بره غدير راجعه من الدوام وهمام من الشغل يرحون سوه ويجون سوه.. تغدينة سوية وكلمن راح لغرفتة.

٠٠
غدير _رجعت من الدوام تعبانة طبيت سبحت ونومت بنتي ونمت وياها اما همام يرجع يتغده وراها يطلع مره ثانيه للمحل روتينة اليومي هذا والف الحمد لله حياتنه مستقره بسيطة نحاول بينه مبينه واحد يساعد الخ بكل شي..

هاي أخير سنة الي بالجامعة واتخرج طبعا الدراسة ويه مسؤلية بيت وطفل شوية صعبة لانو وكتج يادوب يكفي بس حاولت أنظم وكتي ومن أبدى ادرس لو انيم بنتي لو اويها يم اجدادها وهيج مكضية فاليوم رجع همام من وكت بسرعة حطيتها عده ونزلت بغرفة محمد القديمة ادرس بيها..

ساعتين وقريت الي عدي رجعت صعدت فوك يمهم فتحت الباب على كيفي اخاف نايمة لو تفز فطبيت شفتها نايمة على صدر ابوها وهمام متمدد وهيه مسنحه عليه مدري شنو تحجي وادردم وهوه لازم تلفونة يصفح بي ويجاوبها كأنوا يفهم عليها منظرهم يخبل رحت يمهم على الجرباية مديت ايدي الها..

تعالي يمي ماما..  شألت رأسها باوعت عليه ثواني ورجعت نامت..
يااا لج تعالي شنو هاي

همام _ضحك..
خليها هسه مو زين ساكتة عود من تبجي اخذيها..

غدير _لا والله اشو اريد رجلي ماريدها شنو هذا الاحتلال وين جان قبل حضنك بس اليه وهسه هاي لازكة بي..

همام _هههه  بنتك طالعة عليج تحب الحضن..

غدير _هوه انته صوجك علمتها على هيج نومة..

همام _هيه من البداية متسكت الا هيج واصلا صوجج هلكد مجنتي تتوحمين على ريحتي وحضني طلعت بالطفلة ههه..

غدير _باوعتلة بغيض..
يلا رايحة اني عود خلي بنتك تفيدك واليوم انام عد فاطمة وانته نيم واسهر ويه غدير..
داكول لزمني من ايدي وأيده الخ لازم بيها غدوره

همام _كبري عقلج بابا هيه مال زعل..

غدير _حطيت اصبعي على صدره..
تره هذا الحضن مالتي ويظل بس اليه واني لحد هسه وبعد مجبت بعدني اتوحم عليك..

همام _ابتسم..
هسه شنو حبيبي..

غدير _اريد رجلي مفهمت..
صفنت بعدين حجيت بسرعة.. لا لا مو قصدي هيج بس قصدي لاتبقه معلمها على الحضن تره تتنحس بعدين وانته ينشلع كلبك..

همام _اي ادري ادري انتضري هسه اجي..

غدير _شنوو همام وين رايح.. اخذ غدوره وطلع هوه وياها ظليت صافنة وراهم شوية ورجع وحده قافل الباب وراه..

همام _تعاي شرحيلي قصدج حياتي شلون تردين رجلج..

غدير _شنو شتحجي انته وين غدوره همام شسويت..

همام _حطيتها عد أمي اليوم تبات يم اجدادها لانو ابوها وامها عدهم شغل..

غدير _عززه العزاك همام فشلتنه هاي سالفه بله..

همام _خلي اراويج شلون تصير كلمة عزه العزاك..

غدير _منطاني مجال اجاوبه لانو اخذني لحضنه ولعالم حبنة نتسابق حته نخوض معركة من الحب والشوق معركة من الأفعال والبوح..
همساته لمساته تتغير بكل مره بس بشرط ازيد متقل..

احبني حباً جعلني اكون بين احضانة كالاميرات
المشآعر ليست كلآم الفعل هوه اصل الغرآم
بهآ اعلم ماذا يكسوا قلبك....

٠٠٠٠
فاطمة _من تخسر كل شي الك بسبب ضروف ممكن تكدر تقتنع وتستوعب انو عادي تصير ويه الكل بس من تكون هاي الخسارة جاية من شخص مكانتة من القريبين لكلبك ويكسرك ويروح هنا صعب وكلش صعب تتجاوزه هل شي الي شفته والي عشته ما اتمنى لعدويني..

جنت كدام الكل وخصوصا كدام اهلي أبين الهم انو كملت حياتي وعادي ونسيت بس اول مجنت اطب لغرفتي ترجع تنفتح عليه الدفاتر القديمة وكل الذكريات الحلوه والمو حلوه تجيني ابد مو سهل نسيان الخيانة بس كدام اهلي جان لازم اكمل بحياتي عادي..

رجعت قدمت على السادس ومن العطلة رحت دورات تقوية ومشت الايام والاشهر وفترة كلش طويلة لا شفته ولا هوه رجع شافني سلمت كلمن اذاني إلى رب العباد..

اكو خسارات صح جانت مؤلمة بس بعدين طلعت بيها صالح اليه ومنها بنتي الي خسرتها لو جانت موجوده جان من الصعب انفصل عن فارس وتنقطع العلاقة بينة بشكل نهائي كل شي من رب العالمين بي فد اراده احنه بالبداية نجهلها بس بعدين نعرف شنو الغاية منها..

كملت امتحانات نص السنة وداومت وراها بس شهر وكعدت بالبيت فتره المراجعة وقراية للستار حددولنه المدرسة ايام للامتحانات التمهيدية تصير اختيارية فأني كلت اروح حته اشوف نفسي مسيطره لاا فالصبح ذبوني همام وغدير بطريقتهم للمدرسة والرجعة اذا اخلص من وكت ارجع وحدي..

على عموم خلصت من وكت فتمشيت راجعة للبيت باوعت على هذا الطريق نفسة الي جنت اتمشى بي من جنت على علاقة بفارس صارت عيني على المكتبة الي بيها وشاهده على كومة ذكريات توجع الكلب رجعت بذاكرتي لهذيج الايام وين جنت وين صرت هسه لو واحد يجي يكلي هيج راح يصير وياكم مستحيل اصدك..

بلعت الغصة بكلبي وكملت بطريقي لانو مايصير اظل واكفة يم هاي النقطة مشيت ورفعت راسي شفت هذاك الشخص الي توه حضر ذاكرتي..

جان ديمشي على السايد الثاني هوه ورغد شايلة ابنهم بين ايديها كلبي دك بسرعة الواضح اني الي جنت واكفة عائق كدام حياتهم بحيث بس طلعت صارت طبيعة علاقتهم اعتيادية اب وام وطفل صغير اسره متكاملة وحلوه

من شفتهم بهل هيئة أيقنت انو الدنيا متوكف على احد لا على حبيب ولا صديق ولا زوج كلها كملت حياتها وهذاك الي جان يكلي ماكدر اعوفج وابتعد عنج صعب عليه هل شي هذا اليوم واكف كبالي مكمل حياته بشكل طبيعي واكثر مني هم ابتسمت رغم المِ مشيت وعبالك شي بداخلي فرغ وصار عادي

مرتاح شفتك گلت مو مشكلة
بعيونه يمكن غير واحد حله
بالعافية وذاك التعب والسهر
جنت ادري راح يضيع من اوله
اني اعله كد المصلحة وانترك
عود امهات وبايت بمكحلة

كملت طريقي وكأني مشفتهم هاي اني هيج رغم المنظر و وجعة بس هاهيه هوه ميخصني يخصها لهذيج وصلت لراس الشارع مال بيتنة قبل ما اوصل شفت ولد لابس ملابس عسكرية ونضارات شمسية واكف اباب بيتنة ومبين علينه جاي دنكت يمكن صديق احد من الولد..

من مشيت قريب الباب هوه ادنه والباب جانت مردوده بسرعة طبيت وسديتها وراية مشيت من جهه المطبخ صار كبالي مهيمن حجه وياي هوه وماشي..

مهيمن _طبي جوه بساع دافتح باب الصالة..

فاطمة _ليش عدك خطار..؟

مهيمن _اي صاحبي يلا فوتي وبعد لاحد تطلع منكم..

فاطمة _ماشي..
طبيت جوه صارت كدامي هدى..

هدى _شبيج..!!

فاطمة _شنو شبية..؟

هدى _وجهج اصفر حيل اكيد مماكلة شي من الصبح مو..

فاطمة _لا ولج ماكلة بس تعبت حروح انام شوية ارتاح حته اكعد أقره..

هدى _براحتج..

٠٠٠٠٠
غدير_اليوم اتفقنه اني وهمام من نطلع من الدوام نروح مناك للمول نشتري ملابس النه ولغدوره هم لانو صار فتره كلش طويله مطالعين سوك بسبب الالتزامات والدوام عاد عفت بتي بالبيت يم عمة والبنات حته ما انثول بيها هناك دخلنه للمول همام راح للقسم الرجالي واني النسائي..

كملنه من احتياجاتنه وراها صعدنه على قسم الأطفال نشتري لغدوره بس صار علاكات هواية مالاتي ومالاته وهسه نريد نشتري بعد فأخذهم ونزل للكراج يخليهم بالسياره واني اشتري..

فداكلب بالاوفرات مال أطفال صارت بصفي بنيه حلوه وناعمة لازمة مجموعة من الملابس بيدها وايدها الخ شايله سله التسوق الي قبل ميدفعون يخلون بيها ملابس من يشترون فجانت خطية محتاجة مساعده حسيتها فأخذت من ايدها السله وهيه حطت الملابس كملت وتشكرت مني بأبتسامة امتنان واني هم رديت الها الابتسامة..

بعدها واكفة يمي مراحت اجه همام توه حجة وسكت...!!!

همام _هاا غدير شخذ..

غدير _باوعت عليه صفن على الابنية هذا شبي عبالك يعرفها درت وجهي عليها هيه هم تباع عليه مثل المتفاجئة والي مامتوقعة تشوفة هاي شديصير هنا حسيت روحي غريبة و واكفة يمهم الموقف كله يمكن متعده الدقيقة بس اني حسيته شطوله عاد الابنيه بسرعة دنكت ومشت من يمنه وهذا بقه يباع وراها ردت اتخبل صدك يحجي..

همام _مريم..

غدير _كل الاحتمالات اجت على بالي الا شغله وحده من همس بصوت ناصي بأسمها وانو تكون هاي مريم..!!
وشلون يباع الها بنضرات مو عادية هذا شديسوي على الاقل خلي يحسبلي حساب واكفة بصفة اني عفت كل شي من ايدي وطلعت من المحل خلي صافن احسن بس شافها نساني الظاهر بعده يحبها واني الثولة اتفرج عليهم..

٠٠٠٠٠
هدى _مهيمن اجه يمه صديقة يبارك اله على فضل الي عرفته نازل من الدوام توه ومر علينه لبابل وبعدين يطلع لبيتهم بالأنبار حضرتلة الضيافة كلها وصعدت فوك اكوي ملابس مهيمن اجه مهيمن اخذ فضل يمهم بالصالة فستغليت الوكت اعزل الغرفة على السريع فبهل أثناء طبت عليه أمي حياة توها جاية..

هيه اصلا كل يوم تجي بس حسب فرغاتها يوم الصبح يوم العصر سلمت عليها ونزلت جبتلها عصير ورجعت صعدت شفتها جان بيدها قميص لونه رايح

هدى _ماما تفضلي...

حياة _عاشت ايدج..
هذا جان بالجنطة الصغيره محطوط بس شعجب قميص مهيمن حاطته بهاي الجنطة وهيه جنها جنطة بيها شغلات قديمة المن ضامته هنا..

هدى _شو اشوفة..
هاا هذا مو مال مهيمن هذا قديم صارله كم سنة شجابة هنا ما اذكره اصلا ..

حياة _اذا مو مال مهيمن مال منو؟

هدى _مال همام..

حياة _مدافتهم شيسوي قميص همام عدج لج هدى خاف..

هدى _لااا ماما شنو القضية اكيد مو هيج اني قبل ثلاث سنوات اذا تذكرين من ردت اسوي حادث وانتي وهمام بوكتها ساعدتوني فهمام لبسني قميصة لانو جانت ملابسي حالتها حاله ومن هذاك الوكت بقى يمكن بين اغراضي مرجعته لانو انعدم من صار عليه دم وهيج يعني اصلا ناسيته حته مذكرته اله لمن شفته الأثر عليه..

حياة _هاا ذبي لعد احسن..

هدى _اي هوه هم هيج جيبي اذبة..

حياة _هدى..

هدى _يااا ماما ليش تباوعين عليه هيج..

حياة _كلبي يكلي ضامة شي من نضرات عيونج..

هدى _ يابه راح احجي واخلص اني جنت جاهلة بوكتها وماعرف شلون هيج جنت افكر المهم جنت اضن عدي مشاعر تجاه همام..

حياة _هدى احم..!!

هدى _اي ماما موداكلج جنت متوهمه وطفله بس..
فجأه وجان اسمع صوت فضل بجة بسرعة درت وجهي على الباب شفت مهيمن واكف بالباب شايل فضل بيده تقدم خلاه بحضني..

مهيمن _سكتي يمكن جوعان..

هدى _حجة هل كلمتين وطلع بسرعة طلعت وره قبل مينزل الدرج لزمته من ايده..
لحضة اوكف مهيمن بس خل افهمك لاتاخذ فكره غلط عني..

مهيمن _بعدين نحجي عدي خطار هسه..

هدى _يحجي وميباع بوجهي..حباب بس دقيقه افهمك والله مو..
خزرني وجاوب

مهيمن _كتلج بعدين لا تلحين..

هدى _وخر ايدي من ايده ونزل..
خرب بحظي المصخم مين طلع هذا القميص ومين اجه وشكو انفتح هذا الموضوع الي ماله اساس استغفر الله شيقنعة هسه لمهيمن...

٠٠٠
فاطمة _نمت نومة عميقة بحيث من كعدت راسي صاير شكبره ماعرف حته الدنيا هسه ليل لو صبح لميت شعري شلون ماجان حسيت روحي جوعانه لانو متغذيت نزلت جوه بعدني على الدرج سمعت صوت مرية غريب بالبيت مديت راسي اشوف منو جان ماما تلمحني..

جنان _تعاي فطومة ماما سلمي..

فاطمة _طننن شلون فشلة اني وكفشتي وعطوبي عدلت روحي شلون مجان ونزلت جانت هاي ام صديقة لهمام سلمت عليها وشردت للمطبخ ادري شنو اليوم العالمي للخطار اليوم صبيتلي غده وكعدت أكل سمعتهم يسولفون لانو جان صوتهم عالي..

ام غيث _طبعا ادري متأخر بالزيارة حته اباركلكم على سلامة فضل وأم فضل بس جنت مريضة الله يسلمج هذيج الايام..

جنان _لا عيوني قابل بيناتة..

ام غيث _فدوه لعينج بس جيتي اليوم هم مو خالية..

جنان _شنو خير..؟

ام غيث _كل الخير جيت....

يتبع في البارت الاخيرر....

_لاتنسون ال ⭐ ⭐ ⭐ والتعليق على الفقرات

_شلونة البارت اليوم حبيت اخليلكم قفلات حلوه قبل الختام بس مو تحجون عليه تره احبكم اني والله 🙂💔

_طبعا كل حبي وتقديري الكم على مدحكم القوي واشادتكم اليه بالبارت السابق سواء بالفيس او الواتباد كلامكم حيل سعدني واصلا مجنت متوقعه هاي الردود القوية منكم..

_البارت الاخير مساء يوم السبت حته انطي البارت كامل حقة واحتوي كل التفاصيل المتبقية للختام..

_بنات تابعوا حسابي الشخصي _Zoza25 حته كل شي يخص القصة وبقية القصص يوصلكم اول بأول