لم تكن أمي(لبوة الأسد)

...31...

،،لم تكن أمي(لبوة الأسد)،،

_البارت الواحد والثلاثون _
#بقلمي _Zoza25

~~~~~~~~~
ومن قال ...
أننا في صمتنا لا نشتاق .. !؟
نشتاق و بشدة ...
و لكن ... يخرسنا الكبريااء..

~~~~~~~~~~

هدى _اخذتني بملابسي الي علية و طلعنة من بيت عمتي جنان دموعي جانت تشرح سوء حالتي وحياتي الي انكلبت بيوم وليلة المن احجي المن اشرح المن اشتكي بيمن احتمي من الوحوش الي تنتضرني..؟

مابين حسرات الندم وصلنة للبيت واني امشي رجل ليوره ورجل كدام ماريد اصلا اطب لهذا البيت خوف مو طبيعي بس دخلنة دفعتني بالكاع..

احلام _لج شنووو انتي والله بيج بله طلعتي گ...  ومادري بيج  بس سودتي وجهنة كدام العشيرة شكد عينج قوية بحيث مزوجة وتصادقين خوش بت ابوج بعد..

هدى _تخبلت من جابت اسم بابا على لسانها بسرعة كمت وكفت على رجلي..
لاااا تحجين على ابووية خووش احسن مننج هوه بالف مرره اصلا شلون تحجين هيج عليه كدام بنتة شوو كلش صايره..

احلام_ خاف ضجتي ام الأخلاق والتربية ال××× وهذا ابوج الي دتحجين عليه دخلي بس يرجع من بغداد ويسمع بسواياتج اذا ما يصير كتلج على ايده اني ما تسمى بأسمي..

هدى _حطيت ايدي على راسي..
عوفيني بس عوفيني لج انتي اخير وحده المفروض تحجي بالأخلاق والتربية زززين.. داحجي بعدني وجان تكفخني على وجهي

احلام _هسه اراويج أخلاقي شلونها دصبريلي..

هدى _حجت كلامها وهجمت عليه دك ضرب على راسي وضهري مثل المخابيل عبالك حيوان جواها حسيت حته خشمي وحلكي صار يطلع منهن دم من حلاه روحي صرت ارفس جواها ماعرف شلون صارلي مجال وخرت منها واحجي..

وخررري وخررري مو من حقج تضربيني لو تحاسبيني بعد الشخص الوحيد الي يحقلة يحاسبني هوه زوجي وبسسس فاهمة لججج شنو من بشرر انتي هااا مهيمن مضربني مثل ما ضربتيني انتي كاافي ارحميني ولو بس مره وحده ارحميني تره والله اني بنتج من لحمج ودمج..

احلام _دولي ولي عود صرتي تعرفين تحجين فرحانة بنفسج   تدرين لو عمتج صبيحة هنا جان سوتلج الف وصله بس ربج رحم بحالج رايحة للزيارة هيه ..

هدى _ضحكت..
كتيلي زيارة موو لكم والله تضحكون على روحكم لو على الله انتوا اصلا الائمة متبرين منكم يا ظالمين..

احلام_شوو سكتي يحتاج ارجع اربيج من جديد..

هدى _باوعت عليه جرتني من ايدي اخذتني سحل لوره البيت اكو منور نخلي بي قناني النفط والغاز فتحت الباب وذبتني بي..

احلام _من اليوم ورايح مكانج هناا يا ساقطة خووش هذا المكان تعيشين وتموتين بي بعد والي يسألني وينج اكلهم شردت بلكي تموتين ونخلص من شرج قبل ما يرجع مهيمن..

هدى _ركضت اريد اطلع دفعتني جوه وقفلت الباب عليه صرت اعيط وادك بالباب قووي...
طلعيني طلعييني شكاعد تسوووين اااانتي بيه  مكفاج اذيتي من صغرري وهسه كملتييها كااافي كااافي..

عيطت صيحت لطمت بس لا حياه لمن تنادي محد اجه ولا احد سمع حطيت ايدي على صدري بديت اختنك من ريحة النفط والبانزين باوعت جوه الكاع حيل وصخة لعبت نفسي من المكان كرفصت روحي وبجيت الكل تخلي عني وعافني والله اعرف غلطت بس لا تعاقبوني بهل طريقة البشعة..

لليل واني على نفس الكعده بديت اتعب وماعرف هسه شديصير بره ساعة بيش وابوية رجع لو لا مهيمن عرف بيه اني هنا لو اصلا ميهمه أمري بعد لزمت بطني واني احس بالجوع والعطش غلبني التعب تمددت بالكاع واني اشتم ريحة النفط صارت دموعي تنزل على الكاع..

الجو جان بداية شتة وبالليل يصير بارد شبكت نفسي بثنين ادية احاول ادفي بروحي بس وين غفيت محاسة بروحي وره فتره فزيت على شي يتحرك على رجلي باوعت تلمسته وعطتتت بكل صووتي جان صرصر تخبلت ومنا المكان ظلمة واني اخاف منها واسمع أشكال الأصوات..

سديت اذاني وصرت اردد ويه نفسي..
ماكو شي ماكو شي لا تخافين هدى هاي من خوفج صرتي تتخيلين أصوات والأشياء ممجوده اي ماكو شي..احجي وابجي وأطلب من ربي يساعدني

شوية وسمعت من وره الباب صوت بجي وهمس حاولت اركز بي عرفت هذا صوت هاجر..

هاجر _هدى انتي بخير..

هدى _ضحكت.. سؤالج هذا مقتنعة بي؟

هاجر _هدى اني اني اسفة كل شي صار بيج من وراية..

هدى _صفنت على حجيها..
شعجب عود تكولين هيجي مو جان هذا مازن أمير احلامج وكلنة غلط وهوه صح..

هاجر _طلع يلعب عليه وبس صارت المشكلة عافني هدى..

هدى _بالعافية عليج.. وهسه شنو المطلوب مني

هاجر _مادري مقهوره عليج سامحيني فدوه..

هدى _سكتت مجاوبتها ظلت تحجي شوية وبعدين راحت محد خسر بهل لعبة غيري..
مغمضتلي عين بهل ليلة تعبت أضعاف تعبي اريد بس اطلع كمت احس روحي كل شوية افقد وارجع اكعد حته ما اتخربط..

فترات طويلة مرت عليه صرت حته ما فرق هذا صبح لو ليل لانو المكان اشبهه بالظلمة انفتحت الباب عبالي اجاني الفرج وراح اطلع واخيرا من السجن هذا بس للاسف طلعت هاي احلام..

احلام _امشي طلعي روحي للحمام ٥ دقايق وترجعين يلا بساع..

هدى _جنت تعبانة لدرجة مالي قوه حته اجاوبها رحت على الصامت للحمام باوعت على شكلي بالمراية مو اني التعب واضح هذاك وياه عليه و وجهي حيل شاحب..

استاهل كله من ايدي خسرت كل شي حلو بحياتي بغبائي ويمكن هسه لو اموت محد يهتم لانو اصلا محد يحبني مهيمن الوحيد الي حبني بس هوه هم تخلى عني عبالة اني انسانة سيئة..

احلام _لجج يللا طلعي عااد وصختي الحمام تره اطب اسحلج يللا

هدى _فتحت الباب وطلعت دفعتني كدامها..

احلام_امشي يلا رجعي لمكانج..

هدى _ماريد فدوه عوفيني حموت..

احلام _داكلج امشي كدامي شنوو متفهمين بالحجي تردين ارجع اضرب..

هدى _وخرت من يمها بس راسي حيل افتر بسرعة لزمت بالحايط غمضت عيني ورجعت فتحتها أريد اتوازن ماكو حسيت بيها تحجي فوك راسي وتفشر بس اني فصلت عن الدنيا مكاعد اكدر اركز بشي..

كمت اسمع صوت عياط وكسر أغراض منوو شكوو ماعرف مجرد اسمع كلام ممفهوم وهم مو كل شي حسيت الأصوات قلت وبعدين انرفعت عن الكاع وصرت بحضن اخر شخص اتوقعة يجي وينقذني شميت عطره هذا نفسة معقولة حاولت افتح عيوني بس مكدرت وغلبني التعب..

بعد فتره رجعلي وعيي شوية شوية اتضحت عدي الرؤية هاي غرفة مستشفى رفعت ايدي شفت بيها كانونة وحاطيلي جهاز تنفس باوعت من الجهتين ماكو احد شنو معقولة وحدي هنا زين منو جابني..؟

دخلت ممرضة باوعت عليه شفتها حطت علاج ويه بطل المغذي ردت اوخر جهاز التنفس حته اسألها منو جابني وينهم ليش وحدي مكدرت حته الحركة جانت كلش صعبه عليه ويمكن خالتلي منوم بالمغذي لانو رجعت نمت وره وين كعدت على حركة ايده على وجهي..

فتحت شفت هاي امي حياة وبصفها غدير وجانوا شايلين الجهاز من وجهي هم..

حياة _شلونج هدى شتحسين هسه..؟

هدى _زينة ليش شبية..

حياة _مختنكة وجسمج تعبان كلش نسبة دمج صايره اقل وفقره الدم كذلك يعني بأختصار حالتج صايره اسوء..

هدى _منو جابني هناا مهيمن موو..

حياة_شدكولين انتي اكو شخص غيره ينقذج منهم اكو شخص يصونج غيره اكو بشر حماج منهم غيره بس فهميني شلون تسوين بي هيج لج كلهم الا هوه موكفت بعينج تعبة وصبره عنج وعن خبالاتج..

غدير _فدوه عمة خطية شوفيها شحالها مو وكتة لهذا الحجي..

حياة _لاا وكتة خلي تعرف زين شسوت بنفسها ضيعت روحها وكسرت ثقتنة بيها..

هدى _ليش من حجيت صدكتوني انتي بالذات كتيلي يمه متوهمة غلطانة ماكو هيج شي ابوية ضربني وكلي عقلج بي خلل شتردين مني اكلكم بعد هاا دائما هدى الغلطانة وانتوا الصح دائما هدى السيئة وانتوا الملائكة اصلا اني عاله عليكم محد يحبني محد يريدني يمكن لو اموت محد يهتم كلش عادي اصلا شنو الجديده

حياة _يعني هسه طلعنة احنه الغلط وانتي الصح موو..

هدى _مكلت هيج اعرف بنفسي غلطت وغلطي جبير بس كافي الله يخليكم كافي تعبت..

حياة _ لج من حركة كلبي عليج عبالج فرحانة اني من داحجي عليج والله ميتة قهر..

هدى _الله كريم..

غدير _يلا عمة جهزي هدى خلي نطلع من المستشفى عمو دينتضرنه..

هدى _كل ظني مهيمن بره لو هوه الي حيرجعنة بس من كالت غدير عمو عرفت زوج امي السيد الي بره.. ساعدوني اكوم تلكاني عمو السيد تحمدلي بالسلامة هوه ومبتسم بوجهي يمكن هوه الوحيد الي مكلب وجهه عليه..

عبالي راح ياخذوني لبيت عمو السيد بس شو راحوا بغير طريق باوعت على غدير وسألتها..
"وين رايحين احنه..؟؟"

غدير _للبيت حياتي هذاك مكانج ويبقه مكانج محد اله الحق يطلعج منه..

هدى _بس محد يريدني هناك..

غدير _معليج بهذا الحجي عليج بصحتج هسه..

هدى _تنهدت... مشوار الطريق و وصلنة نزلنة رأسا صعدتني أمي لغرفتي ارتاح محد حجة وياي لو كال ليش رجعت يمهم شفت الكل بس هوه دورت عليه بعيوني ملكيتة..

طبيت لغرفتي مثل ما عفتها ماكو بيها شي متغير معناها هوه مراجع للبيت لو راجع بس مطاب للغرفة والله ماعرف تمددت نطتني غدير علاجي ومسحت على راسي بابتسامة..

غدير _شلونج احسن ان شاء الله..

هدى _ماعرف يمكن اي ويمكن لاا أمي وينها لعد..

غدير _راحت سلمت على عمة وطلعت  السيد ينتضرها..

هدى _همم.. غدير عليج الله مهيمن وينة متأكده اني هوه الي اخذني من بيت اهلي و وداني للمستشفى بس مشفتة خاف بي شي..

غدير _لا أمني كل شي مبي وحته اكلج هوه بالبيت بغرفة الولد وبكل شي يدري بجيتج هناا بس الصراحة وجهة حيل ثكيل وية الكل مو بس وياج وصاير نار..

هدى _ليش انتوا شمسوين قابل..

غدير_لج هوه غير كلب الدنيا من دره بعمة دازتج لبيت اهلج وراجع للبيت ساعة ٢ الصبح كلب البيت على راسنة يكلها مو من حقج تصرفين من عدج ومن عمة كايلتلة على شغلتج وشمسوية تدرين حماج..

هدى_شلون يعني؟

غدير _والله انتي نايمة ورجلج بالشمس اليوم قبل منجي عليج الضهرية خابر اعمامج اجو عدنة وكلهم اني الي مسوي حساب الفيس لهدى وادري بيها من راسلها مازن وكل الكلام الي حجاه عليها جذب لانو لو مرتي بيها عيب جان اني بنفسي تصرفت وياها ومن زمان مو وره سنة يطلع هيج حجي يعني بين قوسين مهيمن لم السالفة كلها وشنو يحجون يسكتهم بس بقت شغله وحده مكدر يسكتهم عنها محادثتكم انتي ومازن موجوده عده لهذاك بس هم مقبل احد يدخل بعد وبعدين عافهم واجه حته يرجعج وصار الي صار..

هدى _شكد جنت مستحقره روحي بعد كلامها كرهت نفسي وكل شي بية شلون اني اذيته وشلون هوه حافظ عليه اني اغلط وهوه يصلح وراية مهيمن ميستاهل الي داسوي بيه..

غدير _لا تضوجين اكثر كلبي ان شاء الله محلولة اني ماريد الومج واحجي عليج لانو البيج مكفيج بس اني نبهتج وكتلج تره تجي مشاكل من الفيس بس الله يسلمج مسمعتي مني..

خلي اكلج شغلة احنة بمجتمع شرقي لو شسوين يظل الحق ويه الرجال والابنية اقل غلطة تروح حياتها غلطتي من فكرتي تاخذين حقج بهيج طريقة لانو هذاك خبيث رأسا عرف هاي انتي وكلب الحجي عليج..

هدى _ماعرف شكول بس اتمنى شغلة وحده مهيمن يسامحني ويرجع يحجي وياي لانو والله ما اتحمل بعده أني شكد جنت غبية من اصده واكذب مشاعري تجاهه هوه اني اصلا حظي فكر من البداية شتوقع..

غدير _تصلح وداعتج كل شي يصلح بس انطي صبر دخلي اكلج خبر يمكن يفرحج محمد كمل بيتة وبهل ايام راح يشيل بي هوه ولبنى وهيج نفتك منها..

هدى _اي على الخير اكلج ابوية دره مو شكال..

غدير _اي دره حاجاة مهيمن وهم كله نفس الحجي وانو انتي مقاصدة مازن ديكذب وهيج ماعرف بعد اذا صدكوا او لاا..

هدى _حتلو يصدكون بس تظل وشمة عار هاي مرافقتني طول العمر..

غدير _كافي هسه تمددي نامي كل شي يجي بوكتة اني هم خلي اروح أشوف عمة صارلي هواي عدج..

هدى _روحي حبي مقصرتي وياي..

غدير _طفيت الضوه سديت الباب وراية ونزلت شفت المطبخ هوسة متعشين ومبقين المواعين والوصخ وراهم استغفرالله ادري لبنى شلون تتحمل اشوف هيج وصخ ومتهتم نظفت وغسلت المواعين كملت..

صعدت لغرفتي اليوم مشفت همام ولو هوه اني حتلو موجود ويانة حالة حال الماكو لا يحجي ولا يسولف منعزل عن اهلة وخصوصاً أمة دخلت شفته كاعد على السرير ولازم راسة يفرك بي كأنوا متوجع رحت يمه وسألتة بخوف..

"شبيك همام جنك مريض شتحس كلي..؟؟"

همام _مابية شي بس راسي يوجعني..

غدير _شو خلي اشوف حرارتك.. داخلي ايدي على كصتة دفعها..

همام _داكوولج مابيه شي ليش تلحين بعدد تره مالي خلكج كلش..

غدير _عوف هذا الحجي ولو شوية لانو انته مريض احتمال مو بس وجع راس بلكي طلعت فلاونزه..

همام _شكد تحجي يا إلهي روحي جيبيلي بندول خلي اخذه واولي..

غدير _شنوو وين تريد تروح عوود هاا..

همام _ااانام ااانام وين اروح يعني اتمنى مره وحده تسوين الشغلة بله اسألتج هاي..

غدير _صارت الدمعة بطرف عيني عفتة وطلعت بس لو اعرف شبيك وياي ليش هيج تتعامل شمسويتلك هسه اني وبسرعة تضوج مني لو  اعرف جان ارتاحيت مسحت دموعي الي نزلت غصب عني..

رحت جبتلة العلاج وكلاص مي صعدت فوك فتت لكيتة متمدد ومغمض عيونة صحتة بهدوء منطاني جواب عرفتة غفة رحت يمه حاولت ارفعة شوية حطيتلة الحباية بحلكة ونطيتة مي أخذه بدون ميحجي تلمست كصتة حار نار خررب هذا مصخن..

ركضت جبتلة منشفلة بللتها وحطيتها على كصته ومسحت بيها جسمها نزعتة بلوزتة وصرت احط المنشفة على أجزاء جسمة احاول انزلة الحرارة وابرد جسمة شفتة دفع ايدي

همام _اششه وخري بارده..

غدير _مهتميت اله عسى ما يضربني ماعوفة وهوه هيج تعبان هذا روحي شلون اعوفه متأذي ماكدر والله اتخبل اذا يصيبة شي..

تدنيت يمه ورجعت اسويلة كمادات اكثر من ساعة يلا بدت تنزل حرارتة وشكلة شوية ارتاح غطيتة زين حته يعرك احسن اله..

بقيت صافنة عليه شكد ما يرفضني ويرفض مساعدتي اله ماكدر ازعل منه لو اخذ بخاطري عليه بكل مره الكة نفسي رجعت اله وافكر بي..

حطيت ايدي على وجهه وصرت امشي اصابعي على عيونة، رموشة، وخشمة، لحيتة وصلت لشفايفة نزلت بستها بهدوء..

وكعت دمعتي اكو بداخلي حسره شكبرها بس الله وحده الي يعرف بيها ياريت اعرف شنو علتك ياريت اصير دواك ياريت تفتحلي كلبك اتمنى واتمنى بس ماعرف شوكت يصير التمني حقيقة و واقع تقربت منه حيل و شميتة ترست كلبي بعطره داوخر منه جان هوه يرجعني لحضنه ويخلي راسة على صدري مقيد خصري..

ماعرف اذا جان واعي او لا بس مردت ابتعد حبيت قربة حبيت الشعور الي اول مره احس بي بادلتة الحظن وبست راسة وصرت العب بشعره وره شوية حسيت بجسمة عرك وملابسة صارت رطبة خفت لا يضربة هوى ويرجع يتمرض..

سحبت روحي من حضنه رحت جبتلة غير تراك وغلست المنشفة رجعت يمه مع انو اني شكد خجولة واستحي بس بهل لحضة كل الخجل راح مني بدلتلة ملابسة ومسحت جسمة بالمنشفة طبعا ضهري صار يوجعني لانو ثكيل هوه وبالكوه احركة..

طلع الفجر واني محاسة على روحي اطمنت عليه الحمد لله صار تمام جنت مطفية البنكة علموده جسمي احتر كمت سبحت على السريع ولبست أول شي صار كبالي جانت دشداشة قصيرة اردانها تعاليك خفيفة مشطت شعري ورجعت تمددت يمه..

جانت شكلة مرتاح تقربت لزمت ايده بستها احس روحي اقدس هذا الإنسان ماعرف ليش هلكد متعلقة بي بالرغم هوه ثكيل وبارد حيل وياي وره شوية غفيت من التعب والسهر.. فزيت على بوسات رطبة وانفاس حاركة بركبتي فتحت عيوني بنعاس شفت همام يباوع عليه ومبتسم ابتسمت على ابتسامتة..

همام _شكرا تعبتج وياي البارحة..

غدير _واجبي هذا ولو اكدر جان سويت الاكث... بعدني مكملت جملتي تقرب باسني من شفايفي بهدوء وأيده تتحرك على ايديناتي تقرب مني بس هل مره تختلف جان متلهف حسيت بي وحسيت انو راغب هوه لهل شي مو بس تأدية واجب وخلاص..

كمل وابتعد عني وسحبني خلاني على صدره وكام يورث جكارة ويجر حسرات وانفسانة متسارعة حجة..

همام _اخاف تنعدين مني واني بعدني بيه المرضة..

غدير _رفعت راسي اله وحجيت.. فدوه الك
مجاوبني وخرني من حظنة اخذ ملابسة وطلع يسبح حسيته جنه متندم استغفر الله شبيك هسه ليش بكل ثانية الك شخصية شكل..

همام_مرت ايام زواجي ويه غدير الانسانة الي اختارتها أمي وقررت كل شي من يمها.. بالبداية حيل جنت مستصعب الموضوع من اساسة بس بعد مصارت غدير بأسمي وأخذتها اهناا خلاص لازم اتحمل مسؤوليتها..

هية مالها ذنب حالها من حالي ثنينة صرنة ضحكية تخطيط أمي هواي اشوفها تحاول تتقرب مني تحاول تحجي وياي تهتم بية كلش ودائما أشيائي حاضره وحته قبل ما اطلبها منها ادور رضاية..

شكد مرات ماسيطر على اعصابي وانفرها لو ارفضها بطريقة كلش مو حلوه بس بكل مره جانت ترجعلي والابتسامة مرسومة على وجهه وهذا الشي يزيد القهر بكلبي..

مريم راحت بقسمتها واني من يومها حركت كلبي وراها وصرت انسان بداخلي ماكو شي اسمة كلب عشت تجربة حب وحده وفشلت لهنا اكتفيت خلص..

صح اكو أبالي فكره الزواج بالمستقبل حته استقر واكون عائلة بس بعيده عن الحب وسوالف العشاق لانو من وكتها عرفت هاي الشغلات ما مكتوبة الي ولا من نصيبي فليش ادوخ نفسي بيها..؟؟

البارحة جنت حيل تعبان وعرفت بروحي تمرضت اجت هيه رادت تقترب مني دفعتها مردتها تجي يمي واني روحي واصلة لخشمي بس هيه عندت واصرت تساعدني نمت من التعب ومحسيت بعد بشي لحد ثاني يوم فريت حسيت نفسي صرت احس باوعت بصفي نايمة غدير عرفت بيها من شكلها جانت سهرانة عليه..

ريحتها طخت بخشمي ولبسها الخفيف خلاني احس روحي اريدها.. كملت وعفتها مادري شبية مرات احس لعنة حبي لمريم لاحكتني لهسه بحيث كل ما اجي يمها تصير صوره مريم كبالي استغفر الله شلون وضعية هاي..

غسلت وبدلت بسرعة من دون ماحجي وياها شي ادري حتسألني شبيه وليش هيج اصرف ومادام ماعدي جواب الها اسكت احسلي جانت فترة ضهرية هسه ساعة بال١٢ اني كل مره اطلع من الصبح لهذا مجانت أمي تدري بيه بالبيت وصلت للمطبخ شفتها واكفه يم الباب وتحجي ويه مره يمكن خطار مهتميت كلش كلت اسلم وأطلع بس وقفني من سمعت اسم مريم انذكر من بين حديثهم..

ام مرتضى_الحمد الله هيه هسه حامل وشايلتنة بالصلوات صدك من كتيلي عليهم خوش ناس والله حسها ما سمعة وفقيره..

جنان _لا عيوني مسويت اني غير الواجب يعز عليه اشوفج محتاره وما انصحج واني كتلج من البداية مادام فقره وعلى كد حالهم راح يقبلون بسرعة وهم الابنية حبابة تستاهل كل الخير..

ام مرتضى _اي والله ما انسى فضلج هذا هسه خلي اترخص صارلي هواي يمكم تأخرت على البيت..

جنان _بعد وكت حبيبة خليج كاعده شعدج قابل..

ام مرتضى _ميخالف بس هم مرت مرتضى كتلج حامل وماتكدر وحدها..

جنان _الله يكومها بالسلامة الله وياج عيوني مو تكطعين بينة..

همام _احنه من الصغر اني وغيث ومرتضى أصدقاء طفولة واهلنة هم واحد يعرف الخ يعني عشره عمر من سمعت حجي ام مرتضى عرفت الشغله شنو وربطتها.. بس رجعت للبيت صرت كبالها ابتسمت وصرت اصفك الها..

واوو ست جنان الام الحنونة الي ادور مصلحة الناس وتنصحهم صراحة فاجأتيني كلش معقولة انتي تتمنين الخير لغيرج لدرجة قدمتي الخير لصديقتج وعفتي ابنج مثل الطير المذبوح...

جنان _لا يمة انته فاهم الموضوع غلط..

همام _شنووو هوووه الي فاااهمة غلطط هااا شنوو سمعتت كل شيي بأذني ياا الله شنوو انتي شنوو من قابلية عددج مع انو تعرفين الابنية جانت خوش آدمية وما عليها قسور بس قدمتيها لصاحبي ياابة الشيطان ميفكر ويخطط مثلج..

جنان _اني جنت رايده مصلحتك وانته رافض بس والله هيه صارت بالصدفة وداعتك عددي هيه سألتني من كيفها واني كتلها عليهم والله مجنت اعرف راح ترهم اصلا تفاجأت من كلتلي خطبناها وتم كل شي..

همام _كمت استنكف اصيحج يمه هيج بكل عين قوية فرحانة بنفسج تدرين شتمنى ياريت لو انتي مو أمي جان منقهرت هيج اتقبلها من الكل الا من آلام..

جنان _حتخبلني انته شغلة صارلها سنة والبنية راحت وهسه حبلة شكوو ضايج علمودها لعد غدير المن اسمها مرتك مدكلي..

همام _ضحكت.. قصدج غدير الي لفلفتيها إلية وخليتيني اخذها غصب عني موو والله الحجي وياج ضايع بس صدكي يجي يوم وتتندمين..

غدير _احس مثل الواحد الي ذب مي حار علية جنت واكفة على الدرج وسمعت كل كلامهم لانو صوت همام عالي ويحجي بحركة كمل حجية ويه أمة وصعد فوك صرت كبالها شافني مهتم كمل طريقة..

تصرفاتة والكلام الي سمعتة موتتني لحكتة بسرعة اليوم لو اني لو هوه لازم اعرف شنوو الموضوع حتخبل طبيت وره وسألته..
شكاعد يصير اريد افهم شنو معنى كلامك ويه عمة..؟؟

همام _ميخصج خووش

غدير _لااا يخصني ونص شنو موقعي بحياتك اني بس كلي شنوو حاطني خدامة البي طلباتك لو عبده لتتفريخ شهواتك وخلاص بس فهمني شنوو انته مرايدني متحبني شنووو قصتك هااا..

همام _ااي اااي ماا حبج و مجنت رايدج اصلا كل شي صار عمتج تصرفت بي من روحها وماعرف شكايلة الج عني بس الي اعرفة خلتنة تحت الأمر الواقع..

غدير _ي.. يعني انته متحبني ومجنت اصلا رايدني؟؟

‏تـركـتـهُ لـكـم ، حـبـوه....
لـكن لا تـكـسـروا قـلبـه مـثـل مـا كسـر قـلـبـي💔

يتبع في البارت القادم...

لاتنسون التصويت ⭐ ⭐ ⭐