#قرارات_خاطئة 🤍
🔥الحلقة الواحدة والعشرين 21 🔥
👑H e m o t k 👑
__________________
عهد:اسمع بنركب ناخد قهوة تبي
سليمان:عادي منقولش لا
عهد طلعت من مكانها واتجهت للباب لقت فهد قدامها قارن حواجبه
عهد :😒😒
فهد:انشاء الله منكونش قصيت عليك
عهد طلعت وماردتش عليه
فهد جبدها من مرفقها وطلع بيها برا
عهد وقفت :فهد حول ايدك والله انعيط رااه
فهد شبحلها وفنص :كانك مرا عيطي تي وربي راسك انقصه
عهد غمضت عيونها بخوف :باهي حول باش منعيطش
فهد:تحركي امشي قدامي
عهد تجبد في روحها التالي :الاااا مانبيكش مانبيش انكلمك ولا نبي نشبحك
طلع سليمان لان حس في حركة مش طبيعية بينهم فم الباب وشافه يجبد فيها
سليمان:هي هي هي انت خلي البنت وحول
فهد بكل اعصااب ومصكر سنونه :حول من قدامي باش منطلعش اعصابي عليك
سليمان :تي شن تسحابني خايف منك حول البنت امانة معاي ف الصيدلية جاي تتقاوا عليها
فهد طلق عهد وجي شده من حوايجه وكيف بيبدو في بعض
عهد دفت فهد :حول حول اطلع من حياتي معش نبي نشبحك بكل خليني في حالي ومتديرليش المشاكل الناس يشبحولنا
فهد خلاص معش يجمع بيقلب عليها الدنيا جبدها من ايدها ومشي بيها
عهد تلفتت لي سليمان ودارتله بي ايدها معناها خليك
فهد وقف هوا ويايها جنب الباب الخلفي مستخطي ومافي حد
عهد:تفضل هي بعد مادرت العار قدام الناس شن تبي مني
فهد يفنص فيها ويهدد فيها بي صبعه :تعرفي مزال تكلميني بطريقة هادي قدام حد يا عهد روحك بنطلعها بي ايدددي تسمعي فياا 😠
عهد عيونها دمعو:بعد من علياا نكرهك نكرهك ومعش تطلع قدامي باش معش انكلمك بطريقة اللي ماعجباتكش
فهد قعد يشبحلها ومش عارف كيف يتفاهم معاها :انتي شن سامعة بزبط شن اتقولي لي مقدام امس
عهد:ههه صاحبك عاد مادس عليك شي
فهد غمض عيونه :استغفر الله العظيم اسمعي عهد ماعنديش جهد نقعد كلمة بكلمة اني وياك قوليلي شن سااامعة
عهد:تضحك عليااا تسحاابني عيلااا واني اللي واقفة علي رجل وحدة وحتى عيني ماغمضتهاش لين انت فقت من العملية ندعي لي ربي ياخد من عمري وصحتي ويعطيك وانت هكي تجازي فيااا شن حصلت منك اااه قولي شن حصلت منك غير الهم والبكي
فهد:عهد قدري شوية ان الموضوع اللي مريت بيه صاعب علياا تخاايلي ايجيك حد بعد سبعة وعشرين سنة يقولك امك معيشاتك في وهم وانت مش ولد العيلة هادي وبوك عايش مش ميت وعندك خوات وجدك مش جدك صااعب الموضوع صاعب مش عارف كيف متقبله اصلا
عهد تمسح في دموعها :اني هدا مش موضوعي قدرت وسكتت وماجيتش كلمتك ولا قتلك علاش سيبتني اكتفيت بأني نسكت بس لاكن تمشي انت و ال .. سكتت وطبست راسها لوطة خلاص مانبيش ندوي خليني
فهد:لا مش مخليك توا تدوي كل شي اني ومني تكلمي
عهد غمضت عيونها وتنفست : كنت تقدر اتقولي نبي انرد مرتي فهد كنت تقدر اتقولها عادي اني سيبتك لان نبي انرد مرتي بعدين هي قاعدة علي دمتك واللي درته مش غلط مش منحقي انحااسبك
ف
فهد ضحك:غير دقيقة مني اللي بيرد مرته وشن حلالي خيرك تي طلقت امها امس وبثلاثة فوقها
عهد:باهي انشاءالله اتجيك بنت حلال خير منها وربي يسعدك ومشت من جنبه
فهد قعد واقف يشبحلها معش عرف يدوي :تي خيرها هادي وقعد يفكر شوية تي وربي تطلع فدوي مدايرة حاجة ماشادني عليها واحد
ومشي ركب ف سيارته
___________
في نفس الوقت اللي كانو عهد وفهد يتناقشو
كانو مقدام وايات ف السيارة وبردو يتناقشو
مقدام:باهي علااش محكيتيليش من الاول علاش الكدبة اللي درتيها هادي نبي نفهم
ايات تبكي :خفت تحكي لي بابا ولا الموضوع يوصله لاني مانبيش نخسره تاني
مقدام:ااه يعني خديتي علي الكدب بدي عندك حاجة اساسية كدبتي علي بوك وقلتي خلي حتى هوا نكدب عليه ولاا
ايات: كنت نقدر نقعد داسة عليك الموضوع عادي لاكن اني خترت ان انجي نحكيلك ومافيش حد فينا ماغلطش مانيش ملاك اني ومش لازم تهيني ولا تعيط زيادة اني حنكلم بابا انقوله صاير سوء تفاهم بينا ومافيش نصيب عارفة روحي اني اللي غالطة ومنحقك انك تسيبني وجت بتنزل
مقدام صكر البطم :ماافيش نزوول لين نتفااهمو
ايات:مافيش شي نتفاهمو فيه خليني ننزل وكل واحد يمشي في حاله
مقدام: اني الموضوع مش خاش راسي يعني كنتي من البداية تقدري ماتحكيليش الموضوع من اساسه واني استغربت فيك كيف حكيتيلي من اول تقعميزة مع بعض وتبي الحق فرحت وقلت البنت ماعندهاش في جو الخبث وواضحة وصريحة وحكتلي كل شي لاكن تطلعي كدابة هادي ماعجبتنيش بكل
ايات تبكي وساكتة
مقدام:تعرفي لو حكيتيلي من الاول انك كنتي تحبي واحد وصارت بينكم مشاكل وسيبتو بعض راهو حتى كان جوني صورك وقالي كنت انكلم فيها راني قتلته قتل لاكن كدبك عليا ماعجبنيش بكل
ايات: خلاص مقدام خلاص خليني نمشي الله يربحك
مقدام كيف بيتكلم شرين تليفونه لقاه ركان
____________
خلي نمشو توا لي وعد بعد ماغمها الراجل وركبها ف السيارة
وعد تعافر فيه وهوا غاملها فمها :اطلع فيييسع فييسع
طلعو بيها من الجامعة وهي تبكي وتعافر ف الراجل
طلع طرف من جيبه وغملها بيه فمها باش تفقد وعيها وهي فيسع مادارت روحها اغمى عليها باش يحول الطرف خلت عيونها مغمضاات وهي قلبها يدق بسرعة بيطلع من مكانه ودموعها ينزلو حاولت تخلي جيب الجاكة اللي فيه التليفون تحتها وحطت ايدها عليه لان عارفة ركان بيتصل لما يوصل
ركان وصل للجامعة وجاي للمكان للي متعود يتلاقو فيه ملقاهاش قعد يدور بعيونه :تي وين مشت هدي علي شوي اني اللي معطل وطلع تليفونه يتصل بيها
ف السيارة اول ماشرين تليفون وعد الراجل بدي يشبح لي جيوبها يبي يعرف في اما جيب محطوط وعد بحركة سريعة فتحت الخط وبدت تعيد :سااااااعدوووني ركاااااان 😭😭
الراجل غملها فمها: اسكتيييييي
اللي يسووق :خود التليفون سكره بسرعة بسرعة
الراجل اللي شاد وعد زاد غمها لين تاكد انها اغمى عليها فعلا وخدي تليفونها صكره وداره صامت
ركان اول ماقال الو سمع عيطت وعد سخن مع بعضه
:الوووووو الووو وعدددد الووووو 😠 ولما سمع صوت رجالة يتكلمو طلع يجري لي اتجاه سيارته ومايشوف في شي قداامه ركب وطلع يجري والدخان وراه ويعاود يتصل بي وعد ماتردش لوح التليفون علي الفودرة وبدي يخبط علي الدوناان :بنقتللللله بنقتللللله وبنشرب من دمه الحقيييير ال 🤬
وخدي تليفونه تاني يتصل بي مقدام
______________
مقدام لما شرين تليفونه لقاه ركان ف الاول ماباش يرد وبعدين غير رايه :ايوااا
ركان يعيط:وييين انت
مقدام:ف الجامعة خييرك شن في
مقدام:وعدد تقريبااا بوها خطفهاا وانشاء الله يكون هوااا
مقدام شبح لي ايات :وعهد عهد وين
ركان:عهد ف العيادة بالك يمشولها حتى هياا كلم فهد بسرعة يمشي يروح بيها
مقدام:تي امتى لحق هوا توا كانت مع ايات بعدين مش انت جايها
ركان:توااا خدها تواا اتصلت بيها انفتح الخط سمعتها تعيط
مقدام بتوتر :تمااام تماام خلي انكلم فهد صكر
ايات :شن في دمي نشف خيرهم عهد ووعد 🥺
مقدام :وعد بوها خطفها
ايات :شنييي 😱 حي علياا حي كيف وامتى افتح الباب بسرعة بننزل افتحح😭
مقدام:وين بتنزلي قعمزي في مكاانك وحط التليفون علي ودنه : ايواااا
فهد: هاا يامقدام
مقدام:وين انت ؟
فهد:ف الطريق كيف طالع من العيادة
مقدام :ولي بسرعة خود عهد روح بيها بوهم خطف وعد من الجامعة
فهد شد فرينو ودرس ع الجنب وقريب مشي في حادث تاني :تي شن اتقووول انت وايات وين
مقدام :اهياا معااي انت توا روح بي عهد بسرعة مرات يمشولها حتى هياا
فهد صكر التليفون وطلع يجري بسيارة مولي للعيادة
دقايق ووصل درس ونزل يجري
عهد مقعمزة علي الكرسي ف الصيدلية ومتنكدة وسليمان واقف يبيع
بعدين تلفتلها:خلاص عاد هيا فوتي الموضوع ونوضي غيري جوك
عهد:انت حتى مسألتنيش مني هدا
سليمان :واضح من كلامك من هوا
عهد سكتت وهي تشبح لي تليفونها
خش فهد للصيدلية وهوا داهش :عهد
سليمان شبحله وماباش يدخل خش للمخزن
عهد نفخت وناضت طلعتله :فهد الله يربحك بالله عليك
فهد:مش وقت الكلام توا بسرعة جيبي شنطتك بنروح بيك فييسع
عهد قعدت تشبحله:شن بتروح بيا علاش
فهد:بسرعة عهد مش وقت كلام
عهد حست ان في حاجة:شن في ماما فيها حاجة 🙁
فهد خش خدي شنطتها وعهد وراه :فهد متخوفنيش قولي شن في
سليمان طلع :شن صاير هني يا خوي عيب هكي حلو مشاكلكم في مكان خاص هني مكان عمل
طبعا فهد يشبحله في ضربة بيجيبله سنونه في حجره كيف قرن حواجبه وبيزودله
عهد شدت فهد :خلاص سليمان ولد خالي هدا واني مطرة نطلع عندي ظرف
سليمان :تمام ووخر
فهد جبد عهد وطلع هوا وياها
عهد فتحت الباب وركبت معاه
فهد ركب وطلع يجري
عهد:فهد شن في اقسم بالله قلبي بيوقف
فهد:بوك خدي وعد من الجامعة
عهد :ش شن شن خداها خطفها يعني وخبطت بي ايدها علي قلبها حييي عليااا ماما كان تسمع تمشي فيهاا يااربي استررر انشاء الله غير يلحقوها قبل مايزوجها يااربي استررر 😭😭
فهد:خلاص اسكتييي انروح بيك كان لقيتهم يندرو بااهي وكان هدا تسكتي تسمعي فيااا خلي بوي يقوللهم وزيادة الحوش زحمة
عهد تبكي : وعد خوافة هلباا انشاء الله غير ميصيرلها شي خاايفة عليها حتى كان بابا بيحن عليها شوية عماتي وعمي يكرهونا لان ماما متحبهمش وكانو ديمة عراكات مع بعض
فهد:متخافيش خلاص اسكتي اهو بنكلم مقدام
واتصل بيه
فهد:ها مقدام وين انت
مقدام:ركان وصل لي بوك توا وقالي بنطلعو نمشو لي حوش عبد العزيز هدا ولا مني
فهد :وانت وين
مقدام :قاعد ف الجامعة كلمت صالح بيجي يكرو سيارت وعد مانقدرش انخليها هني
فهد:باهي اني انحط عهد ف الحوش وانجي ناخد ايات
مقدام:باهي تمام
صكر فهد الخط وشبح لي عهد :وعد تكلم في ركان
عهد :شن دخل الموضوع هدا تواا
فهد :واضح اصلا اول واحد سمع هوا وكيف وصل لي بوي تو اشبح شن بيحطله من كدبه خلي انلحق عليهم
عهد متلفتة جيهت الروشن وتبكي
فهد شبحلها :متخافيش عليها بأدن الله تبات ف الحوش الليلة وشدلها ايدها خلاص امسحي دموعك
عهد جبدت ايدها بلقوة ومسحت دموعها
فهد:ح نعرف خيرك وشن اللي مغير تفكيرك وبعدين نعرف كيف نتفاهم معاك
عهد:سووق بسرعة مش وقته الكلام هدا
____________
ركان واقف يكلم في بوه بتليفون
ومصطفى واقف يتكلم بتليفون حتى هوا
صكر ركان وجي وقف جنب مصطفى
مصطفى :كلمه ياا جمعة ولد عمك بيجيب وجع الراس ليا وليه اني توا متحرك بنمشيلهم تعالا حتى انت معقولة هكي يخطف البنت من الجامعة حتى وكان بوها ميحقلاش يدير هكي بكل تسمع فياا هي اهو اني طالع توا بسلامة
ركان: شن صار
مصطفى:هي زود ااهو ولاد عمه جااين اركب هي
ركان: كان ماباش يطلعها بطيب انطلعها بلقوة تسمع فيا عمي مصطفى ماحدش يقولي عشرة وجو راه لان كلام بوي توا معجبنيش انقوله نبيها يقولي مش وقتها الدوا هادي
مصطفى :تي والله انتو جيل توا ماتتحشمو تي اني زي بوها راه واقف اتقولي نبيها عيني عينك برا يا ولدي برا اركب
ركان:ماهو جاايك طوول واضح وصريح تبيني نكدب نكدب عادي
درس فهد ونزل هوا وعهد
فهد:شن صار معاكم
ركان:اهو مااشين تواا لي حوشهم
مصطفى :شبح لي عهد:متقولي شي داخل تمسعي فياا راجي علي الاقل قتلي امك بيتغدو وبيروحو كلهم خلي الحوش يفضى قبل
عهد تبكي:متروحش الا بيها يا خالي بالله عليك ماعندناش غيرك متخليهاش تبات غادي
ركان:هيا يا عمي مصطفى الوقت يضيع ع الفاضي
مصطفى:هيا هي حاضر يابنتي مستحيل انخليها بري خشي هي فهد وين ماشي انت
فهد:ايات قاعدة ف الجامعة بعتت مقدام مشالها توا وبيكرو سيارت وعد واني ماشي بنروح بيها
مصطفى:باهي برا متخليش اختك اكتر من هكي بروحها
ركان يرحي :هيااااا يا عمي
مصطفى ركب معاه وعهد خشت للحوش وفهد ركب ف سيارته ومشي
خشت عهد للحوش جتها امال طول
امال:عهد خيرك بكري جيتي مش قلتي بتروحي التنين
عهد:لا مافيش خدمة هلبا ركان قالي روحي
امال:من جابك اختك
عهد:اااه االا جابني فهد
امال:ولاش تكلمي فيه هوا استنيتي اختك 😒
عهد:اتصلت بي خالي بعتهولي هوا ماكلمتش حد اني
امال:تعالي جاي خيرا عيونك هكي بااكيا ولا شني
عهد:ااء ااي بكيت ماهو خشت حالا توا اماليه يبكو هلبا سخفوني بكيت معاهم
امال ضحكت:اما انتي باهي بري غيري حوايجك وتعالي عااونينا ف الكوجينة
عهد ركبت تجري للدار وصكرت الباب وانفجرت بلبكي
__________
ايات مقعمزة في سيارت مقدام وتبكي بلعبرة تحس في ايديها مربوطات وكان تلقى تنزل ادور عليها ف الشارع
مقدام واقف هوا والولاد اللي مع صالح ربطو السيارة وطالعين بيها
مقدام يوخر بيركب ف السيارة :تماام صلووح توصل كلمني
صالح:تم امشاء الله
فتح مقدام السيارة وركب عطي لي ايات امية وطلع تليفونه يتصل بي فهد
فهد:ايوا
مقدام:ها شن صار فيك وصلتها
فهد:اي اهو جاايكم
مقدام:لقيت ركان غادي
فهد:اي لقيته خليتهم طلعو هوا وبوي واني جاي
مقدام :باهي تمام اهو بنطلع ع الرئيسي اني تلقاني برا
فهد:ماشي هي تشاو
فهد حس روحه بيدهش طلع الدوا وسحب منه الهوا : امتى بنرتاح بس الصبر شوية واتصلت بيه امه
فهد:ايواا
عائشة:ها فهودي وينك
فهد: ماشي بنروح بي ايات من الجامعة
عائشة:مش جاي ع الغدي
فهد:لا لا تغدي انتي صحتين
عائشة:بتتغدى ف حوش بوك ولا شني ماتقعدش ادور بلا ماكلة
فهد: من الاخير وعد اخت عهد بوها خطفها خطف من الجامعة علي خاطر مايبوشي يشبحهم
عائشة:لا لا !! يااناري علي بنات امال متلقيات قالو لي امها البنية ولا لا
فهد:لا لا زحمة حوشهم قاعد مايبوش يقولولهم لاكن عهد تندري
عائشة:باهي صكر خلي انكلم البنية انواسيها
فهد :ماشي تشاو
شوية ووصل فهد لقي مقدام مدرس لف من الطريق ودرس وراه
مقدام:انزلي هي فهد جي وفتح الباب ونزل
ايات نازلة تبكي :فهدد 😭😭
فهد شدها وقعد يطبطبلها علي ضهرها :خلاص متخافيش معش تبكي اهو بوي مشي بيجيبها خلاص اركبي انتي ف السيارة هي
ايات مسحت دموعها وفتحت السيارة وركبت
فهد:تو نبي نعرف ركان منين عرف ان وعد انخطفت
مقدام:قصدي تبيني نكدب عليك يعني واضحة يكلم فيها وكان جايها اليوم اتصل بيها بدي يسمع في عياطها اتصل بيا طول
فهد:علي اساس انت كنت ف حوشكم ماهو حتى انت جاي لي المحروسة
مقدام:وانت ماهو كنت عند عهد ولا بنجدبوها علي بعض برا توكل عزيزي برا
فهد:باهي يا امسخ برا درق وجهك
مقدام : بندرقه ماشي لي ركان عارفه حمار بيخششها بعضها تلقاه قال حتى لي بوك يبي وعد
فهد:اني انحط ايات فالحوش ونلحقكم هي تشاو
مقدام ركب ف سيارته وطلع وفهد وراه
________________
وعد كانت راقدة علي مندار وكيف بادية تصحصح تسمع في دوشة ودوا فتحت عيونها لقت بنات وانساوين واقفين فوقها ناضت طول قعمزت ووخرت علي المندار :منيي انتو شن تبوو منيييي 🥺
نجيبة: غير من غير دلع زاايد عمااتك حني ولا تبي تطلعي زي امك كارهتينا
وعد بدت تبكي:منعرفكمش اني نبي مااامااا روووحوووبيااا مني اللي جابني هني منيي 😭😭😭😭😭
رجاء :بووك اللي جابك ولا تسحابيه بيسكت لي خالك اللي حارمه منكم يبيكم ديمة تقعدو يتاامة
نوال:حرام عليكم البنت خاايفة بشوية ماما خلوها تستاقض قبل
رجاء:وشن درنالها حني نضربو فيها عماتها حني راه مش عدوان
نوال :خلاص يا بنات اطلعو وطلعو الصغار برا عيب البنت والله قريب يجيها الصفير
والبنات طبعا كل وحدة تلقح في كلمة وفي اللي طلعو وفي اللي لا
نجيبة:اطلعي يا اروى نادي علي خالك عبد العزيز قوليله فاقت
طلعت بنت نجيبة نادت علي عبد العزيز وجت هي وياه
عبد العزيز خش :بنتي فقتي وجي جنبها
وعد وخرت وهي تبكي:بعد علياا متمسنييش😭
عبد العزيز :بوك اني ياا بنتي متخافيش مني اني بوك
وعد:كانك بوي وتحبني راك مخطفتنيش من المكان اللي نقرا فيه كان بوي وتحبني راك خفت علياا
عبد العزيز :ماهو كله من اللي اسمه مصطفى وامك حرموني منكم هما اللي جبروني اندير هكي هماااا
وعد:ردني لي ماما روووح بياا مانبيكمش اني روح بياا😭😭😭😭
عبد العزيز:اسكتي خلااص انسيها امك انتي توا بتتزوجي ولد عمك وبتعيشي معانا
وعد ناضت وقفت :لاا لاا مانبيش نتزوج مش بسييف خلووني في حالي زي ماعشت حياتي كلها بلاااك اطلع من حياتي وخليني انكملها بلااك ردني لي حووشنا بالله عليك😭😭
عبد العزيز ناض وقف :اييااه علينا ياسر من غير دلع عااد هياا ياا رجااء طلعيهم كلهم وصكري عليها الباب متخليهاش تتحرك حمدي مشي بيجيب الشيخ وجاي
وعد:شيخ شنيي مانبييش نتزوج اني مااانبيييييش 😭😭
عبد العزيز:ديري زي ماقتلك
طلع عبد العزيز من الدار وجت رجاء طلعت البنات كلهم وعد تعافر فيها تبي تطلع دفتها وصكرت الباب
رجاء:كيف بدير توا لا عندك وراقها لا شي فاتحة مني اللي بتنقرا هادي
عبد العزيز :تسحابي مصطفى بيسكت تو يجي يشحط عروقه شوية ولما يسمع اللي بنقولهوله بيطر يجيب وراقيها
رجاء:مش كان سمعت كلامي ومشينا لي حوش عمي ف بلادنا راهو ماقدر حد يوصل فيها
عبد العزيز: تي مصطفى موراه حد هلولد اللي طلعله توا من المرا الاولة ومايقدروش يديرو شي
نجيبة :يافرقت ماوراه حد امالا مني اللي شدكم الاسبوع اللي فات
عبد العزيز سكت :ت تي هادوكة صحاب ولده
رجاء:مرات يجيبهم معاه صحاب ولده توا ياريتك رفعتها وفكيتنا من وجع الراس هني
عبد العزيز :خلاص اسكتوو ومشي طلع
وعد اتخبط علي الباب وتبكي :افتحوووولي الباااب افتحوووووو ياا كلاب ياا مجاارم اني مش بنتكم افتحوولي الباب افتحو افتتحوو😭😭😭
نجيبة:اياااه علينا بتقعد تعيط هكي هادي الواحد صدااع من ربي
رجاء:متعدليش تو تعيا تسكت
كترت وعد بكي وتخبيط فتحت نجيبة الباب وخشت :اسمعي يافرخة الدلع هدا فوتيه راسي يوجع فيااا اتزيدي كلمة تانية لساانك نقصه تسمعي
وعد:نبي مااماا 😭😭😭 طلعوني مانبيكمش اني ماانبيييكمش نكرهكممممم
نجيبة عطتها كف وشدها من وشااحها :ارتزعي هني وحدفتها علي المندار تتحركي اقسم بالله حليب امك انسيهولك
وعد خشت في بعضها وبدت تبكي حاطة ايدها علي فمها تغم في صوت بكاها ونجيبة طلعت وصكرت الباب
________
درس فهد قدام الحوش وايات كيف بتنزل
فهد :ماحدش في الحوش يعرف غير عهد ردي باللك اتقولي قدامهم
ايات:كيف منقولش مشيت اني وياها ومروحة بروحي عمتي طول بتسألني وينها 🥺
فهد :تعرفي شني انزلي تو اني انكلم عمتي انتي ماتدويش واضح عليك باكية هلبا
نزلو هما الزوز خشو للجنان
ايات تبكي
فهد:تي اسكتي بتفضحينا انتي اسكتي
ايات:مانقدرش مانقدرش 😭
فهد:طقطقي علي الباب بسرعة
ايات طقطقت وهي تمسح في دموعها
عهد سمعت الباب مشت تجري فتحت شبحت ايات قدامها :شن صاار جبتوها
ايات :لاااا 😭
فهد :اسسكتي خيركم هكي 😒
عهد حضنتها :خلاص معش تبكي مانبوش حد يعرف اسكتي
فهد:لا واضح ماتبوش حد يعرف
جت امال:سمالله خيركم تبكو
فهد:ااء اهلين عمتي كيف حالك
امال:اهلين كيف حالك شن حال امك
فهد:باهي الحمد الله
امال:تي خيركم
عهد وايات ساكتين ويشبحولها
فهد:اني اني مكشخ عليها ف السيارة مدايرة عملة بري امشي خشي فيسع
ايات خشت تجري وعهد وراها
امال:وين وعد امالا
فهد:في محاضرات اضافية ف الجامعة زي الكورس هما قالت تبي تقعد تحضرهم وايات كلمتني روحت بيها
امال:خلوك زي السراق ماشي جاي روحت بي عهد ومشيت لي ايات سامحنا علي تعبك
فهد:شن الحاجة الكبيرة اني راجل الحوش توا شن بندير
امال ضحكت:ربي يخفظك ونفرحو بيك يارب
فهد:سلمك انشاء الله هي بسلامة
امال:بسلامة وخشت وصكرت الباب
فهد:بديت كداب بي احتراف ف جرتهم
وركب ف السيارة اتصل بي مقدام
مقدام:هااا وصوت دوشة جنبه
فهد:خشت بعضها
مقدام:شن متوقع يعني
فهد:باهي انعتني بسررعة جااي
_____________
مصطفى:اللي درته مايصحش يا عبد العزيز البنت لا تعرفك ولا تعرف امااليك كيف تبيها طول اتجيك واتقول بوي
عبد العزيز:ماهو كله منك انت واختك كرهتووهم فياا بنتي هدا مكاانها ومش حتطلع الا علي جتي
ركان:اسمععع حركات علي جتي هادي ديرها في مسلسل هندي البنت تطلع توا باش اني مانطرحش جتك قدام الباب وانخش
مقدام يدف في ركان:تحشم يا حيواان خالها وبوها وبوك واقفين شن اتقول
الصادق:تبي تحشمني مع الناس عقااب عمري انت ولا شني اسكت وخلي اماليها يتكلمو
ركان يهز في راسه :لا لا مافيش حاجة اسمها اماليها اني توا مش مرووح من هني الا وهي معاي
الصادق وخر:سامحني يا مصطفى عارفهم انت شباب توا مافيهم كان الدوا
طبعا الدنيا كاننت خاشة بعضها خو عبد العزيز عنده خمسة ولاد من غير ولاد خواته وكلهم واقفين مع عمهم ويعيطو ويلعلعو
وركان مش شاد غير عبد العزيز يخضخض فيه
جي حمدي بيدرس ومعاه الشيخ شاف الزحمة خاف
الشيخ:شن في يا ولدي الباين ان هدا مش عرس
حمدي يشبح وساكت
عبد العزيز: اهوو جي الشيخ والبنت داخل والله ماهي طالعة لين تمشو اتجيبو وراقها وتنقرا فاتحتها علي ولد عمها
مقدام يشبح لي ركان وخايفه يضرب عبد العزيز لان هما فروخهم هلبا وهوا وركان ومعاهم رجالة كبار
ركان حط راسه من تالي ووخر
مقدام :انشاء الله خير
الصادق :ركان وين ماشي
ركان مشي وقف قدام سيارته
قعد ولد عم عبد العزيز اللي كلمه مصطفى واقف يتناقش هوا وعبد العزيز وخوه والشيخ دخلوه داخل
درس فهد ونزل
مقدام :ركان شن بدير فهمني
مصطفى:وين ماشين انتو شن في
فهد:شن صار فيكم
الصادق:ركان ياولدي تربح ماتحشمنيش مع الناس وهلي الرجالة الكبار يحلوها
ركان شاد تليفونه وبعدين حطه علي ودنه :ايواا ها يا تشم شن الجوو باهي مااشية اسمع نبيك في موضوع ضروري توا اي اي اهو بنبعتلك عنوان توا تمشي ادبرلي شيخ تواا تي شييخ اي نبيه يقراا فاتحة انت غير جيبه وحلوانك عندي ماشي هي متعطلش وصكر التليفون وبعت العنوان لي صاحبه
مقدام:فهمنييييي توا شن ادير بتهبل انتت
الصادق شيخ شني يا ولدي انت حتى حوش ماعندكش
ركان:قتلكم بنتزوج غدوا اني ولا تبوو بوها يقرالها فاتحتها
فهد:كلام ركان صح احسن حاجة تنقرا فاتحتها علي ركان مدامه وراقها وكل شي مش عند بوها مايقدر يدير شي وريحوله راسه باش لا عاد يقول بنتي لا غيره
الصادق:تي ولدي هدا اني مأمنه علي المستشفى وخايف تبوني نأمنه علي بنت الناس وبعدين ماعنداش حوش
ركان:بوي كان تحب ربي اسكت اني مش جايبها البنت نقرا الفااتحة باش بوها يضم فمه ماتشبحش فيه جايب شيخ ولا تبني اندير رقبة
الصادق :لا اله الا الله رايك ديمة منقوب وداير راسك وراسي تبي تحشمني مع الناس تكلم يا مصطفى
مصطفى:تو انت من امتى تبيها البنت باش تقرا الفاتحة موضوع كبير هدا ومسؤلية افرض ماتتفاهموش كيف يصير
ركان:متفااهمين حني والشيخ شوية وجاي لي حوشكم بعتلهم العنوان وبعدين الفاتحة بنقروها باش اني نرتاح وانريح بوها هدا اللي الجريدة اغلض منه
فهد:خلاص ياابوي اعطي وفكنا من وجع الراس
مصطفى:ربي يعيين اللي عنده البنات ربي يكون في عوونه مصاااريف اني امس مطلع وحدة واليوم بنطلع التانية شن هدا
ركان: تي خيركم حسستوني بنديروو عرس حني فاتحة هي انت وبوي وتمت
فهد :تاام الموضوع اركبو سيارتكم هي
ركب ركان سيارته وطلع يجري ووراه فهد ومعاه مصطفى والصادق وطلع وراه مقدام
عبد العزيز شبح لي خوه: زعمة شن قررو يجبو ورق البنت اووه
خوه:يجيبوه امالا شني ماعندهمش حل تاني
____________
حطت سميرة الغدي هي والبنات وهما زي الاصنام يتحركو وعيونهم منفخات من البكي وعهد خلاص بتتفجر وبتقول لي امها
تغدو خوات سميرة وبما ان كانت فترة قراية اللي هادي تغدت وناضو يوتو ف حوايجهم بيروحو
ايات تساير فيهم بسيف ويسألو فيها خيرك اتقوللهم صاحبتي مدايرة عملية ومريضة هلبا
خشو يغسلو ف الماعين طقطق الباب
ايات وعهد طول شبحو لي بعض
ايات:خلييكم اني نفتح ومشت تجري فتحت لقاته بوها
ايات: بابا شن صاار 🥺
مصطفى:ضبحي علي عهد وتعالي
عهد جت :من جي
ايات:اهيا جت
مصطفى :ردو الباب وتعالو للمربوعة
ايات وعهد خافو وخشو يجرو وراه
عهد:شن في خالي قلبي بيوقف😥
مصطفى:خشي جيبي وراق اختك وعد بسرعة منغير ما امك تحس عليك
ايات:علاش شن صار بابا بالله عليك قولي ماتكدبش علينا
مصطفى:مش وقت الدواا توا بسرعة جيبي وراق اختك وجيبي معاهم الورقة اللي دارتها امك زمان اللي ادل علي ان بوك مفقود
خشت عهد تجري لي دار امها صكرتها وطلعت شنطت الورق وبدت اتطلع في اي ورقة عليها اسم وعد وردت الشنطة وطلعت تجري
سميرة:عهد شن هدا اللي في ايدك وين ماشية
عهد:تو انجي انقولك غير خلي نطلع توا بس ومشت فتحت الباب وطلعت
عهد:خالي اهما الورق لي وعد كلهم شوف شن تبي منهم
مصطفى خدي الورق قعد يوازي فيهم
خش فهد:هيا بوي الشيخ قال مايقدرش يطلع من الجامع بنمشوله حني وقت
ايات:تي شيخ شني شن بديروو
مصطفى عطي الورق لي عهد: دخليهم امشي
عهد شدت خالها :رد بالك تخيلهم يزوجوها لي ولد عمي والله وعد تموت ارفعني اني اني مستعدة نمشيلهم واندير اللي يبوه المهم وعد تولي 😢
فهد :تي ضمي فمك وخشي بري شن تبي تتزوجي ولد عمك امالا 😠
عهد:اي عادي المهم يخلو وعد فحالها😢
فهد :هيا بوي اطلع
مصطفى طلع وعهد وراه هي وايات
فهد :خشي امشيي في رجالة براا خشوو 😠 شن الأناتي هادو وطلع وقربع الباب
عهد :شن في ياربي علاش الورق خداهم وعلاش الشيخ
سميرة:وعد ياا اياات وينكم
عهد مسحت دموعها : وعد ماجتش قاعدة ف الجامعة
سميرة:اي امك قالت عندها كورس تلخبطت باهي شن في صوت فهد توا يكشخ
ايات:حني بنطلعو روا بابا وفي رجالة برا وحني مانندروش
سميرة:وشن الورق الي خداهم بوك
عهد:مانعرفش قالي جيبي ورقك انتي واختك ومشي ماقاليش علاش
سميرة:باهي خشو داخل هي عيب البنات بروحهم
خشو ايات وعهد قعمزو معاهم داخل وشوية وناضو بيروحو بدو يطلعو ف شناطيهم فم الباب سلمو عليهم وطلعو ومعاهم سميرة وامال للجنان
وعهد وايات خشو للدار
عهد:خلاص مش قادرة نسكت الكلام بيطلع من عيوني بنقول لي ماما
ايات:حتى اني بنبكي عيت من الكدب
عهد:اختي شبه مخطوفة عند بوها واني مقعمزة هني وماما ماتندريش
اسلام :وعد مخطووفة زي ف المسلسل قصدك
ايات تلفتت :هيييييي 😱
اسلام مشت تجري :يا عمييمة اماال يا عمتي تعالي بسرعة
عهد:تعالي جاي اسكتي
امال خاشة هي وسميرة:ها خيرك يا ام لسانات
اسلام:وعد انخطفت زي ف المسلسل سمعتهم يتكلمو
امال تحولو ملامحها لي صدمة وشبحت لي عهد وبدت تلعلع :واني انقوللل خيركم تنووحو من الصبح حيي عليااا حييي بنتي وين تكلموو
عهد :بابا خطفها من الجامعة 😭
امال خبطت علي وجهها :وووه علياا بنتي ف الايام السود واني مقعمزة نهدرز ونضحك
سميرة : خيركم ماتتكلموش الا توا معقولة هكي
ايات:بابا قال متقولوش لين يفضى الحوش
امال خشت تجري لي دارها طلعت عبايتها
عهد :وين ماشية يا ماما خالي وفهد مشو من بكري اكيد شوية ويجيبوها
امال:حوولي بنمشي انجيب بنتي برووحي حوولي والله مانخليها تقعد اكتر من هكي
ولبست عباايتها وجت بتطله
عهد:باهي ماتمشيش بروحك استنيني ومشت تجري ركبت
امال :خليك هني
سميرة:استهدي بالله من بيرفعك
امال:ناخد تاكسي ميجيني شي وطلعت
عهد تلبس ف عبايتها ف الجنان وحطت وشاحها حطان وطلعت مع امها
امال:بري ولي نمشي برووحي
عهد :والله ماني مخلياتك تمشي بروحك
سميرة :ياا حليلي طلعو بروحهم كلمي بووك بسرعة
ايات تتصل بي بوها مايردش عليها
سميرة:انتي يا فرخة والله لما انقرضك مرة تانية معش اللي تسمعيه تعاوديه
اسلام:ماقلت شي اني 😠
شرين تليفون سميرة لقتها عائشة
عائشة: ها ماما كيف حالك
سميرة: اا باهي الحمد الله شن حالك انتي مشيتي لي اختك اووه
عائشة:اي مشيت وكنت بنجي باش انردو الفيلو مقدرتش انحس في ضهري بينقسم بعته مع حسين مشي بروحه
سميرة : ردي بالك معش اتقيمي الرزين ونقصي حركة شن حال اختك
______________
مشو عهد وامال لين طلعو ع الشارع شوية ووقفلهم تاكسي
ركبو ونعتاته امال ع المكان وتحرك
حوالي ربع ساعة ووصلو
خلصت امال الراجل ونزلت
عهد:وينه الحوش
امال :امشي وانتي ساكتة
عهد شادة في امها وخايفة
وصلت امال فم الباب وبدت تخبط علي الباب
امال:افتحو الباااااااب افتحوووووو
_____________
وعد كانت مقعمزة في خاشية الدار ولامة رجليها في بعض وتبكي
انفتح الباب وخشت بنت عمتها رجاء
نوال خشت شادة صفرة :هاك كولي اكيد جعانة
وعد زادت خشت في بعضها :لا مان نبيش ارفيه 😭
نوال :متخافيش اكيد بيردوك لي امك يقرو الفاتحة بس باش بوك يضمنك
وعد زادت تبكي اكتر :فاااتحة شني اللي بيقرووها اني ماانبيكمش نكرهكم عمري ماشفتكم ولا نبي انشوفكم 😭😭😭
نوال:خلاص اسكتي تو تسمعك ماما مانبيهمش يجوك
وعد ناضت وقفت : خلي يجووو شن بيصير اكتر من اللي صاار هي حتى الضرب ضربتني
نوال كيف بتتكلم سمعت التخبيط طلعت تجري وصكرت الباب
وعد فتحت الروشن :ماما صوت ماما هدا🥺 وبدت تعيط ماااامااا يا ماامااا
طلعو الرجالة فتحولها الباب
عبد العزيز:تفضلي شن تبي
امال:بنتي وين حوول من قداامي حوول
عبد العزيز :ماعندك شي عندي
امال:شني ترد فيها قصدك خش طلع بنتي خش
عبد العزيز شبح لي عهد وابتسم:هادي عهد ماتغيرتش بكل تعالي يا بنتي تعالي
عهد وخرت ولبدت ورا امها :شن متوقع منها بعد ماخطفت اختها شني
عهد :انت تعرف ان لما شدووك وعد هي اللي اتصلت وخلتهم يطلعووك وجعتها وبكت عليك وانت هكي تجاازي فيها
عبد العزيز:اني نحبكم يا بنتي ونبيكم تكملو ربايتكم عندي نبي نرجع نلتم بيكم لاكن امك الله يهديها تخلي فيا نستعمل في اساليب المجارم
امال تسمع في وعد تعيط :بنتيي خش جييبها توااا خش جت بتخش وادف فيه
دفها عبد العزيز وجبد عهد
عهد:حوول ايدك ماتمسنيش خلي الصورة الحلوا اللي راسمتها عليك تقعد زي ماهياا
عبد العزيز :خشي مع اختك حتى انتي خشي
امال :نزل ايدك علي بنتي حوول
طلعت نجيبة:بااهي اللي جبنا بنتك باش ريناك يا هانم
دخلوها دخلوها
دفت امال عبد العزيز وخشت: وين بنتي وين
وعد تعيط:ماااماا اني هني يا ماما 😭
امال:متخافيش بنيتي والله ماانروح وانخليك اني جاايياتك
رجاء:غير ياسر ياسر حسستيني ان حني عدوينها مانا اماليها
درست سيارة ركان وراه مقدام وفهد
نزل مصطفى يجري :تي من جاابها هادي
فهد خش وراه طول
مصطفى:اماال شن اديري هني 😠
امال:ماتبوش اتقولولي جيت بروحي بناخد بنتي
مصطفى :اطلعي اركبي ف السيارة اطلعي
فهد جبد عهد :اطلعي قداامي
عهد طلعت وراه وهي خايفة بتموت
فهد فتح السيارة وركبها التالي :من اللي جاابكم اااه 😠
عهد خايفة :جينا بروحنا 😔
فهد:كيييف برووحكم تكلمييي
عهد :ركبنا ف تااكسي
فهد ناض وقف وخبط علي السيارة من فوق حساابك بعدين
عهد :جيت مع ماما شن تبيني انخليها اتجي بروحها
مقدام:فهد خلاص خليها البنت مش ناقصة برا خش لي بوك وعمتك
فهد :متنزليش تسمعي فياا
عهد تبكي وماتبيش ترد عليه
مقدام ركب من القدام وتلفت عطاها امية :اشربي واهدي مش مخليك بروحك فروخهم هلبا
عهد شربت المية وتنهدت
مقدام:عارف مش وقته لاكن بتهدي توا وبتحكيلي شن في وشن اللي قلتيهولي ف التليفون لاني مفهمت شي منك
عهد:😔😔
____________
عبد العزيز:من غير كتر كلام جبت ورق البنت
مصطفى:اي جبتهم وطلع ورقة من جيبه مدهاله
عبد العزيز ضحك وفتح الورقة وبدي يقرا: شني هداا تتسهوك عليا انت 😠
امال:شني هادي شن في ؟ وخدت الورقة من عبد العزيز تقرا فيها
امال :مني اللي قري فيها الفااتحة غبااارتي
مصطفى:ركان ولد الصادق هي البنت توا ولت مرت راجل برا جيبها
عبد العزيز:انت كيف تزوج بنتي من دون علمي كيييف
اني قاعد حي مامتش
ركان:بوي اني ساكت بسيف راه شورا وليت محترم بعد الفاتحة يا تطلع البنت توا يا انخش ناخدها بروحي
الصادق:اسكت وارتزع هني انفكر شن بنقول لي امك بدير العاار
ركان:والله اني اللي اتزوجت مش انتو 😒
الصادق :اسكت صووتك مانبيش نسمعه
كبر النقاش بين مصطفى وعبد العزيز وامال في النص
فهد دف عبد العزيز :احترم نفسك وتكلم معاه باهي خير مايصير كلام تاني
جي ولد خو عبد العزيز :هي هي احترم نفسك حتى انت وتكلم باهي
فهد :والله يعني غالطين وتبو حتى نحترموكم
مصطفى خش في الوسط :خلااص فهد خلااص
عبد العزيز : مانيش مطلعها بنتي بتقعد عندي
ركان :بوي طفح الكيل اني خاش
الصادق :تعاالا هني
ركان:حول اديك والله لما انخش
مقدام شافه خاش نزل يجري مشاله
ركان:شني انحل الموضوع ولا انخش ناخدها برووحي
عبد العزيز:بنتي مش حتطلع من هني
وعد شبحاته من الروشن :ركااااان 😭 يا ماما طلعووني من هني
ركان لما شافها دمه بدي يغلي غلي وجي بيخش للحوش
جي خو عبد العزيز:هيي في نساوين داخل وين خاش
ركان :توااااا اطلعووووهااا خير ما انخش اني توااااا 😠
مقدام:ركاننن اعقل ياراجل مش هكي خير وجي يدف فيه يبي يطلعه
ركان:حوول يا رااجل ماتمسنيش مش متحرك من هني لين تطلع توااا البنت ولت مرتي ومن حقي انطلعها قدام اللي يبي واللي مايبيش
خو عبد العزيز:رجاااء يا رجااء طلعي البنت
عبد العزيز: شن اتقول بنتي مش حتطلع مني هني 😠
خوه :هدا راجلها واني ف الحالة هادي معش بنتدخل
مقدام جبد ركان وخره من علي الباب
مشت نوال فتحت الباب :هااك خودي تليفونك واطلعي بسرعة وعد طلعت تجري
نجيبة:اتقول غير مخطوفة حق هي 😒
وعد :ماما 😭😭 ومشت حضنتها
امال :بنتي 😭😭 ووه عليا بنيتي ماقالوليش خدوك مقعمزة نهدرز ونضحك وانتي مع الهمج هادو
رجاء :احترمي نفسك انتي 😠
دفهم ولد رجاء وصكر الباب
ركان يبي يضبط وعد مش عارف كيف ووعد مش عارفة لا توا ان قري الفاتحة 😂
فهد:هياا خلاص عمتي للسيارة فيسع وقعد يجبد فيها هي و وعد رفعهم للسيارة
عهد طول حضنت اختها وبدو يبكو
ركب مصطفى مع مقدام وفهد روح بي امال والبنات
وركان طلع روح هوا وبوه
______________
الساعة 6:30
ف حوش مصطفى
وعد مقعمزة في وسط الحوش وحاضنة امها
ومصطفى وفهد مقعمزين جنبهم
امال:ياريتك قلتيلي وحني غادي كان هدا والله لما انردهولها الكف
فهد:لا باهي اللي ماقالتلكش كان هدا زادت خشت بعدها اكتر شكلهم يالطيف هما
امال:مشرانيات من يومهم ماتشبحش فيا لا انكلم فيهم لا انحبهم
فهد ضحك وتلفت شاف اسلام مقعمزة في تركينة وقارنة حواجبها
فهد:اسلام وين
مصطفى:اهيااا
فهد:حي ماشفتهاش خيرك ماجيتيش قلتيلي شن الجو ولا بستيني ااه تعالي
اسلام:الااء 😒
فهد:لا ليا اني معقولة
اسلام:معش نحبكم كلهكم
مصطفى:علاش خيرك
اسلام:هكي
جت سميرة من الكوجينة هي وعهد :اني ضربتها امبكري
مصطفى :علاش خيرها
سميرة:هي اللي قالت لي امال علي وعد ولما كشخت عليها قتلي مادرت شي فوتتها واني انكلم في عائشة قتلي عطيهالي تمشي اتقوللها والبنت مريضة مانبيش انرعشها عطيتها طريحة
اسلام:هي قتلي شن الجوو قتلها شن تبيني نكدب
فهد:صح شن تبيها تكدب تعالي تعالي وجبدها من رجلها
اسلام تضحك :لاا مانبيكش
فهد :سمنتي يا بنت كنتي ضعيفة وجابها في حجره
مصطفى:صبي قهوة يا بنت صبي
ايات جت صبت القهوة وعطتهم
فهد:لا اني ماتعطينيش بنروح
مصطفى:خليك تعشى معانا
فهد:لا امي بروحها من الصبح اليوم مروحتش
اسلام:باهي جيبها هني واقعدو معانا
فهد:باهي علاش متروحيش معاي انتي
اسلام:لا ماهو توا نقرا يوم الجمعة نمشي معاك
فهد باسها وناض وقف :هي تعالي وصليني فم الباب
جي مصطفى بينوض قاله فهد خليك
عهد واقف قدام الكوجينة وتشبحله وتتفكر ف كلام مقدام
فهد شبحلها وطلع كان متعفلق منها
اسلام وقفت فم الباب :باااي فهودي
فهد ابتسم:بنعطيك سر دسيه عندك ولما تركب عهد للدار اعطيهولها باهي
اسلام:بااه شن هوا
فهد :...
ايات :وعد نوضي معاي فوق ارتاحي
وعد مدت ايدها :نوضيني
ايات نوضتها وركبو مع بعضهم
فتحو الدار وخشو وجت عهد وراهم
قعمزت وعد علي السرير وجت ايات جنبها :قريب هبلت اليوم كان ماروحوش بيك راهو مشيتلك علي رجليا
وعد حضنتها :ابشع ساعات مرو عليا ف حياتي ابشع يووم كان لقيت ما نضتش من جنب ماما بكل
ايات:لاكن ماتنسيش صارت حاجة حلواا ان انقرت فاتحتك علي ركان
وعد:فاتحة شني انتي التانية كدبو علي اللي اسمه بوي هدا باش خلاهم ياخدوني
عهد:مصح وجهك قروها جي خالي امبكري خدي وراقك امالا ماكلمكش ركان
وعد مسحت دموعها :لا ماكلمنيش اصلا مستغربة اني غير جديات قروها
ايات ضحكت وحق ربي قروها
وعد فتحت الباب ونزلت :ماما شن قالولي ايات وعهد حقا قرو الفاتحة
امال سكتت
مصطفى:الولد رايدك يا بنتي وجي يجري اول ماسمع بيك بوك خداك وقالي اني نبيها علي سنة الله وراسوله وهوا ولد ماينعابش بعدين مافيش حل تاني باش بوك طلقك اليوم الا هكي
وعد
تحشمت من خالها ومشت ركبت للدار :تليفوني وين بسرعة
ايات تضحك:بابا يسخابك كاتبيش ضحكني
وعد اتصلت بي ركان طول
_________
ركان :بااهي الزفت من الصبح وانتي تعيطي شني مش عاجباتك البنت
حواء:تي شن اتقول انت كان سألوني الناس شن انقول كيف تقرا فاتحة لا عماامك لا خوالك موجودين شن انقوللهم اني بعدين
ركان شبح لي اخته :ديريلي ماناكل
حواء:اني انكلم فيه وهوا يبي ياكل
ركان: نمشي لي مرتي اتوكلني ولا كيف
الصادق اني تو انكلمهم وغدوا انديرو عزومة كبيرة هكي باهي
حواء:حي عليا كيف مروقين عادي
شرين تليفون ركان طلع من الحوش
ركان:هكي مسيبة راجلك في عند امه لا ناكلة لا شراب امتى بتروحي
وعد تضحك وتبكي :ركان اني توا كيف قالولي كيف صاار كيف وخيرك ماكلمتنيش 😭😭
ركان:قلت اكيد مضايقة ومقعمزة جنب امك
وعد:ركان قصدك انت راجلي توا 🥺
ركان:راجلك يا عمري ياروحي انتي خديتك وادبست احلى تدبيسة
وعد:احكيلي كيف صار اني مانندري علي شي
ركان بدي يحكيلها شن صار وكيف مشو قرو الفاتحة في ثواني وجو لي بوها
ووعد تبكي
ركان:خيرك تبكي ماتبينيش
وعد:اول مرة انحس ان عندي حد خايف عليا هكي ويحبني ويدير اي حاجة علي خاطري انت ربي بعتك ليا من السمي 🥺
خشت نجمة للجنان هي وبناتها وركان وراهم
نجمة:لولوولولولولوولولوي وياااا مبرووك علي غالينا هدا وين تسمت ليناا
ركان يضحك:تسمعي فيها هدي مرت عمي فرحانة
وعد:باهي برا بعدين انكلمك
ركان:باي باي
نجمة تضبط فيه :مبرووك وليدي مبرووك
ركان: يبارك فيك
نجمة:هادي ام الشوارب اللي تبيها
ركان:اسكتي سر هدا بيني وبينك
نجمة ضحكت
____________
متكية عهد علي سريرها وتتخايل
مقدام :وحق ربي لا كداابة اقسم بالله فهد مطلع من عندي بعض ماطلع من المستشفى وماكانتش عنده سيارة اني نرفع فيه وانجيب والله وراس امي وبوي مامشي للحوش باش يتلاقة هوا وياها
عهد: حتى كان تلاقو هي مرته ومن حقه عادي
مقدام:تي شن اتقولي نحلفلك بالله اني تو معقولة نرضاها فيك اني لقطة زي هادي وبعدين يوم اللي طلقها مشي بيروح بي امه من خوش جده لقاها غادي وقالي معرفتهاش شن تبي اكيد خدو رقمك من خالتي عيشة واضحة هادي
عهد سكتت حست روحها صدقت مقدام
مقدام:تو انتي قعدتي معانا اربعة شهور معقولة تصدقي ان فهد يدير حركة زي هادي
عهد :مش عارفة لما قالتلي هكي ولعت فيا النار وصدقت لان الحركات اللي ايدير فيها فهد اخر فترة كأني مانعرفاش بكل
ومافاقتش عهد الا علي صوت اسلام تكلم فيها
عهد:نعم يا ماما
اسلام :بنعطيك حاجة سر
عهد :شن هوا من عطاهولك السر
اسلام ابتسمت:افتحي ايدك
عهد مدت ايدها
اسلام: غمضي عيونك
عهد:اسلاام
اسلام: هياا
عهد غمضت عيونها وفتحت ايدها
اسلام :افتحي هي 😁
عهد شبحت لي ايدها لقت الدبلة اللي ردتها لي فهد تفكرت لما كانت هي وياه في اللعبة وعرض عليها الزاج عيونها دمعو
اسلام ضربتها علي وجها بشوية :وحتى هادي مع الخاتم
عهد ضحكت وحضنت اسلام :انحبك انتي والحمار خوك 🥺
اسلام:فهودي مش حمار
عهد:اسكتي خليني ندوي
_____________
فاتو تلاتة ايات
طبعا وعد معش مشت للجامعة وايات تمشي يرفع فيها بوها وهي ومقدام معش تكلمو مع بعض بكل
وركان قاعد متلاقاش مع وعد كل ما يبي يجي امه اتقوله اصبر لا التلبيسة مقضيها مكالامات 24 ساعة هوا وياها وخلاص
وعهد :مقررة انها تبي تتكلم مع فهد لاكن معش تلاقو وهوا معش جي وهي ماتبيش تتنازل وتكلمه
رابع يوم الصبح الساعة 10
نزلت عهد من الدروج :علاش من العشرة عارفينها عطلتي اليوم حرام عليكم
امال:هياا افطري وتعالي باش انكملو بسرعة
سميرة:باهي اليوم وعد مشت للجامعة
امال:اي والله طلقتها بسيف خايفة عليها
عهد:استودعيها لله
امال :استودعتها وساوي شعرك رايحا مشفشفة
عهد :ماخاطريش 😒
طقطق الباب
سميرة:بري افتحي الباب لي خالك خودي منه البضاعة
مشت عهد فتحت الباب وقعدت واقفة تشبح لقاته فهد
فهد شبحلها :صباح الخير
عهد:ص صباح النور 😐 وقعدت تساوي ف شعرها
فهد:شفتك
عهد:مشكلتك
فهد :هاك دخلي الشكاير وقولي لي عمتي سميرة جاين معاهم اربعة رجالة وستة نساوين وقوليلها ترد علي تليفونها عائشة تتصل بيها ومشي
عهد:ااء ف فهد
فهد شبحلها:ايوا
عهد:نبي انكلمك ف موضوع
فهد فرح لاكن مايبيش يوضح : موضوع شني
عهد:موضوع ضروري يبي تقعميز
فهد:اني توا مش فاضي بعدين انكلمك اطلعيلي برا
عهد: خششت البضاعة وصكرت الباب وفهد طلع
خشت عهد فطرت وبدو مع بعضهم يوتو في الغدي
__________
وعد:شني كان قتلك امك اقعد لا التلبيسة تقعد وين تندري عليك بتجي
ركان:عارفك مستاحشتيني وحتى اني مستاحشك لاكن فكيني خليني نسمع ف الكلام
وعد:مبردك باهي صكر هي
ركان:امتى مروحين انتو
وعد:مرات شوية وايجينا فهد علي خاطر ابرار جاية اليوم
ركان جي من وراها :زعمة انلحق عليك ولا تروحي
وعد انخلعت :خزي عليك مفروض معش انصدقك
ايات ضحكت :عرفته كداب لان من بكري نشبح في سيارتك غادي
ركان:شن الجو
ايات :مليح هي انخليكم اني
ركان :لا خليك بنقعمزو ف السيارة اني ومرتي
ايات:اووه تفضلو نسيت انكم عرسان 😁
ركان:زاد فضلك والله وخداها من ايدها
فتحلها باب السيارة وركبها ومشي ركب
ركان شدلها ايدها ويبوس فيهم :استااحشتك لاللوح
وعد ضحكت وضرباته :كيف تعفلقت نسحابك مش جاي
ركان :هوا اني نقدر انخلي مرتي حبيبتي تحرج مني
وعد غمضت عيونها:مش مصدقة معش اتقول مرتي نتحشم 🙈
ركان:يا عمري اللي تتحشم اني ناكلك
وعد:شن قتلي امس عندي خبر حلو
ركان : خبر يهبل
وعد :شني
ركان:امي طبعا مدايرة العار كيف تقرا فاتحة وانت حتى خراص دهب ماعندكش وماعندكش حوش المهم امس مشيت اندور في قطعة بنشريها لقيت وحدة قريبة علي حوشكم توا مش بعيدة هلبا فيها حوش مش كامل بيبيعو الحوش والارض ف اني دفعت فيها عربون والاسبوع الجاي انكمل المبلغ
وعد:يعني بدي عندنا حوش
ركان :عندنا يا قلبي وحوش كبير ويهبل
وعد :ركان
ركان:عيون ركان
وعد: نحبك وشن فيها الكيسة الي تحتي
ركان ضحك: تي اني انموت فيك وخوديها الكيسة ليك
وعد طبست قامتها وفتحتها لقت فيها كريب :صحيت حبيبي جت ف وقتها
ركان:قلبي حس انك جعانة مرتي عاد كيف منحسش بيك 😌
وعد ضحكت : خلي نتصل بي ايات حتى هي جعانة
ركان :حسبتها ف وحدة
وعد فمها معبي :سلمك جياب
ركان اتكى علي الجنب ويتفرج عليها كيف تاكل
وعد وكلاته:خيرك تشبحلي
ركان:فرحان بيك وعلي فكرة في عصير ف الكرسي التالي
وعد تلفتت خداته شربت منه وعطاته لي ركان واتصلت بي ايات جتها تجري
ايات:هاتوو مالديكم جعانة بنموت
وعد:نقدر ناكل وانخليك اني يا حبي
ايات:عارفاتك قدر
وعد عطتها عصير وكريب خدتهم ايات ومشت
ركان :نشبح فيك كومة حلال قريب نهرب بيك
وعد بلعت اللقمة اللي في فمها :😐😐 بننزل
ركان ضحك:انبصر خيرك
وعد:لا بننزل خفت منك 😐
ركان صكر البطم :انولع السيارة رااه
وعد :ركاان خيرك
ركان:راجلك اني شن خايفة منك هادي
وعد:باهي معش تتكلم هكي منحبكش وانت سخيف نحبك وانت رااجل وواقف في ظهري
ركان:ماهو اللي متعرفيشي ان هادي وحدة من صفات الراجل
وعد حطتله طرف في فمه :كول حبيبي كول واسكت
ركان يضحك
_____________
الساعة 1:30
عهد كانت ف الجنان تنشر ف الحوايج :هادي وضيفتي ف الحياة اصلاا انشاء الله عند ربي خير بس
سمعت امها تلعلع خشت تجري شن في
سميرة:فوتيها صكري الخط معش تحرقي دمك معاها
امال :ولدك ايي مش رااجل وجاية حتى تخطبيله في بنات الناس طييح سعده مش بنتي بس اللي قالت الكلام هدا بري امشي شوفيه شن يدير ووين قاعد عابية عليه رااجل طيح سعدك وسعده
عهد خدت منها التليفون وصكرت الخط :علاش تكلمي فيها فوتيها خليهم وكلت فيهم ربي معش تفتحووه الموضوع لوسمحتو
امال:منين بنلقهاها اني ياربي منهم ولا من عبد العزيز ارزيني فيهم فليلة وحدة
عهد طلعت تكمل ف النشير وتسحن في روحها
خش فهد مدخل اسلام
فهد: شديها باهي بتهرب منك
اسلام طلقتها والقطوسة هربت
فهد :شفتي كيف هربت قتلك هي خايفة اصلا
اسلام:اجري وراها باهي
فهد مشي وراها
عهد واقفة تنشر جت جنبها القطوسة :يوووخييتي محلاااهاا وكيف بتقدملها شافت فهد وقفت
فهد طبس قامها :شن اديري
عهد:ننشر ف الحوايج
فهد :خليك هني جايك
عهد قلبها بدي يدق بسرعة
مشي فهد عطي القطوسة لي اسلام وخششها داخل ورجع لي عهد تاني
فهد: كملني
عهد :شوية بس وقعدت تكمل ف الحوايج وحطت السلة ف الباب ورداته
فهد: تعالي قعمزي هني
عهد جت جنبه قعمزو تحت المظلة علي الكراسي
فهد :نسمع فيك
عهد :ااا من يومين اسلام عطتني الخاتم اللي عطيتهولها وو
فهد يشبحلها
عهد :فهد من الاخير اني مجروحة منك وجرح كبير هلباا وواخدة علي خاطري لدرجة كل منجي انخش لي فراشي نقعد انقول علاش اني بس يصير معاي هكي علاش اني بدات ميحقليش نفرح ونحب علاش اني بس اللي يختار ينحيني من حياته امك بوك جدك هما اللي ممكن تحاسبهم لاكن اني شن دنبي ف اللي صار كله شن درت باش تكافيني هكي فهد 🥺
فهد قعد ساكت
عهد :تكلم فهد نبي نسمع منك جواب علاش درت هكي
فهد تنهد وشبح لوطة :دماغي كان مشوش نحس في روحي لو رجعت كلمتك حنرجع انكون فهد محمد بلقاسم نحس في روحي لما نشبحلك الزمن يولي التاني واني حنولي حفيد بلقاسم اني تعرفت عليك وحبيتك واني فهد محمد مش فهد مصطفى هدا كله كان في راسي ونحس ان لو تزوجت وجبت صغار حيصير فيهم زي مصار فيا
عهد:لاكن اني مالياش دنب بلي صار وانت ماعاقبتش حد الا اني
فهد :عارف روحي غالط لاكن حتى انتي كيف تصدقي اي حاجة تنقالك ااه
عهد حطت راسها لوطة : هي جاابت الدور كأن صح بعدين اني الفترة هديكة اتقول مانعرفكش انحس في روحي غريبة عليك لما وصلتني الرسالة كأن حد ولع النار فيا لاول مرة في هديكة اللحظة نحس في روحي نكرهك
فهد :اي وماتبيش اتصدقي قاعدة
عهد:لا صدقت لما حلفلي مقدام وعرفت اني غالطة في حقك اسفة وبعدين ناضت وقفت تأسفت منك توا اني صح
فهد ضحك
عهد:مش اسفة وتستاهل لانك انت الغالط مش اني
فهد ناض وقف: باهي قعمزي قاعدين ندوو حني
امال فتحت الروشن :انتي هني تعالي بسرعة مش ملحقين علي شي
عهد: باهي جااية وجت بتخش
فهد :مزال ماكملتش كلامي انكلمك بعدين اطلعي
عهد خشت وصكرت الباب
فهد ضحك وطلع
____________
مقدام مقعمز ف السيارة قدام العيادة يستنى في ركان
شوية وجت سيارة درست جنبه نزل منها علي وركب مع مقدام
مقدام: تي وينك عطلت لا انت لا ركان
علي :هات البشارة والنجارة
مقدام :شن صار معاك
علي :يؤبر البي اسمه فادي فادي###
مقدام انصدم وقعد يشبح لي علي:فادي
علي :اي متخرج من التمريض وبوه يخدم مقاول
مقدام:ومتخرج من التمريض تي هوااا معنااهاا
علي :مني ؟
طبس ركان علي مقدام من الروشن :اكيد تستنو فيا عارفكم تحبوني
علي:العريس جي اللي هرب من زردة الفاتحة
ركان:دليتني ياراجل والله مهربت ولما تاخدوها رزدة مقومة
مقدام فتح الباب ونزل :يخدم عندكم واحد اسمه فادي###
ركان:مش عارف مار عليا الاسم لاكن شن في ؟
مقدام:توا نبي نتأكد خش بسرعة
علي صكر السيارة ونزل : منين تعرفه مقدام
ركان:اي من هوا
مقدام:خش فيسع ركان
خشو مع بعضهم للعيادة وفادي كيف طالع تخااطو هما وياه
فادي :الشيييت تو كيف بنعرف كان انفصلو ولا لا كيييف ومشي طلع
ركان: تعالا للاستعلامات طول ياراجل خيرك
علي شبح للبنت : بونسوار 😏
مقدام: حول مش وقت برادة معليشي وخيتي وسعيلي شوية
البنت ناضت من علي الكمبيوتر :تفضل
مقدام وقف قدامه وكتب اسم فادي طلعله
مقدام خبط ايده علي الطاولة :هواا هوااا ضحك علياا الكلب استغللني
ركان :اهدا يا برادر مش هني اركب معاي تعالا
ركبو الولاد لي مكتب ركان وصكرو الباب
مقدام حط ايديه علي وجه ونزلهم بي اعصاب :ضحك علياا يسحاابني عيييل الفااسد
علي :الولد هدا ديمة عاقل وهادي لاكن كان ولع اهربو تي منين يعرفك هوا تكلم
ركان:تي من هواا هدا اصلا
مقدام:طلع رقمه من الارشيف تواا قوله يجي توااا ركانن
علي:تواا ركان فكنا منا الولد سخن
فتح ركان اللابتوب وطلع رقم فادي واتصل بيه
________________
ايات واقفة قدام وعد وترسملها في عينها:تراا توا كيف
وعد :اي هكي عجبتني حلواا
ايات:باهي تقدري اديريلي زيها ولا تلعبي فيا
وعد:مصح وجهك قعمزي قدامي قعمزي
قعمزت ايات وبدت وعد ترسملها في عينها
فتحت ابرار الباب وخشت :كيف متجووش تستقبلوني فم الباب يا حيوانات
ايات ووعد :ابرااااار😃
ابرار:توااا معش نبيها
ناضو الزوز يسلمو عليها ويحضنووفيها
ابرار: شن في قتلي عهد اركبي البنات عندهم قنبلة بي قولو هالك
وعد ضحكت:اااء انقول ولا نسكت زعمة
ابرار قعمزت علي السرير :شن في يا حيوانات
ايات:وعد انقرت فاتحتها 😂
ابرار عيييطت :ووووه علليااا شدووك ف طريق الشط معااه ولا الردع ولاا مني ادوي
وعد:امك يا حيوانة 😂😂
انفتح الباب وخشت عائشة :شن في خيركم تعيطو
ابرار:قالو وعد انقرت فاتحتهاا
عائشة ضحكت:قتلي ماما امس
ابرار:خزي واني هكي تعاملو فيا
وعد :بدت حكي لي ابرار وايات تضحك
عائشة واقفة وتحس في روحها فيها لية
ايات لاحظتها تلفتتلها :خيرك عيوش
عائشة غمضت عيونها :مغص
ايات :خيرك مغص شني وانتي ف الثاني غبارة
عائشة قعمزت علي السرير تلفتولها البنات :خيرهاا
عائشة :..
#يتبع ♥️
قرارات خاطئة ♥️
هيمو tk