وعصفت بنا الاقدار... البارت الواحد الثلاثون
للكاتبه زهراء ( روزايه)...
( البارت هديه للبنوتات الحلوات __MeMo__
shams299 شكرا ع تفاعلكم وتعليقاتكم الحلوه)
-DUYUR-
هنــيالهم عدهــم گلــب مايلتفــت لاحبابهم
مــو مثلي اغصــن بالــنفــس
لــو طــاري واحــد جابهـــم
....
لبابه... الحب ماينقاس بالعمر
بالعكس اذا كان الحب ابدايه العمر وبسن مراهقه
راح يكون اصعب من انسان ناضج لان حالتي
ماتنوصف مااميز الصح من الخطأ ومااعرف افسر
مشاعرب واتخذ موقف...
ليش كال احبج؟! وليش عافلي فلوسه وتعب
عمره ؟! ليش يضحك عليه منو جابره ع حب
اثنين بنفس الوقت؟!
ماحبيت انهزم حبيت اواجه
وماحبيت انزل واظل كاتمه بكلبي
ردت بنفس اللحظه اشوف ردة فعله..
تقربت ع الباب دكيته بسرعه فز ونزلهه
من حضنه وهي لازمته يحاول يبعدهه
بس تباوعلي بطرف عينهه وتخلي راسهه
ع صدره..
بعدهه بحركه سريعه واجه عليه وهو
مذهول مد ايده راد يلزم ايدي قبل
لايلزمهه سحبتهه حيل وعيني بعينه..
نوال فاتت من يمنه ونزلت تمشي
وتلتفت وهو حاير شلون يبرى وشيحجي
كل اليكدر علي كال لاتفهمين غلط!!
هنا طلعت المعاناه العشتهه من ظلم
وقهر صحت بوجهه شنو الغلط هااااااا
ياغلط ياابن عمي حضنتني بليل
وهسه تحضن بنت خالك عندك گلب لوشنو؟!
جراح.. تعالي فوتي ولاتصيحين نوال بنت خالي
وجان حب بيناتنه وهم سنه ونص وهي عايشه
معاناه اجت سلمت وماكدرت اردهه..
لبابه.. انت ابن شيوخ انت ابن عم السبع
وضرغام؟! شوفهم هذولاك روح اسألهم
يحضنون اي وحده وحتلو بالحرام لو اكو
عقد بيناتكم ياجراح..
جراح.. مابيناتنه عقد اجت سلمت
ماردت اكسر خاطرهه بهيج موقف لا اكثر
لبابه.. بادلتهه الحضن ورافعهه ليفوك ومشدد
حضنتك الهه وماردت تكسر خاطرهه وماردت
تكسر خاطري؟!!
شنو من قابليه عندك حرام عليك تتلاعب بمشاعرنه
اثنينه هي خطيه مالهه ذنب واني هم مثلهه
اصفه ع راي واتخذ قرار بشجاعه
محد جابرك تحبني اتذكر عندك اخت
لاتلعب بگلوبنه وتقشمرنه بالحب
لاتخليني اتندم حته ع الدموع البجيتهه عليك
ولاتخليني ادعي عساك لارجعت..
جراح.. مايعرف شيحجي افتر بالغرفه
وهو يفرك برگبته اباوعله واحس كلبي
يريد ينفجر حته مالحكت افرح برجعته
حجيت واني اخذ النفس جراح احجي
الحقيقه انت عاقد ع نوال؟!
جراح.. لاااا مابيناتنه عقد بس كلام
انطيني مجال شكم يوم واخلصج من هاي
السالفه
لبابه.. ليش حضنتهه اذا ناوي تعوفهه
ليش تلعب بمشاعرهه ترى موسهله كسره
الگلب وخيبة الامل الراح تتعرضلهه
جراح.. كتلهه والله وروح ابوي كتلهه
قبل لاتسلم كتلهه مايجمعنه شي بس
بادرت هي ماردت اكسر بخاطرهه..
لبابه.. نوال تحبك وهي اوله مني لان
هي قبلي واني اجيت اخذتك منهه
لاتعوفهه اني اطلع من حياتك
جراح.. كافي لبابه مو وگته الحجي
شايف ايام بس الله يعلم بيهه نكعد
ونتفاهم الشي اليريحج اسوي لاتتوقعين
اذيج..
لبابه.. نفس الكلام ينعاد عفته ونزلت وهو يصيح
وراي اشدد ع نفسي واصبرهه
واكول لاتهتمين لبابه بعده العمر كدامج..
اريد الهي نفسي بأي شي اشتغل ويه النسوان
الكبار بس حته ماافكر كلساع ماما تبعدني
واني ارجع اشتغل حته لا اشوف واسمع...
هواي ناس عزمو والسبع دخلنه انذار
مايريد تقصير ابد وكلساع جايبين شغله
وكالو سووهه ...
نطبخ بالممر والطرمه خلينه برده
عن الباب حته لحد يشوفنه ام اواب
ماخلت وحده تتقرب هي ورانيا وماما
واني ونور علينه شغلات خفيفه...
رانيا وام اواب جانن يسون بالتمن
ودخل السبع وضرغام يحجون ويه ام
اواب خاف محتاجه شي...
ام اواب.. لا ماعدنه شي هاي البغداديه
تريدهه ترفه تلكاهه تريدهه طباخه ونادره
ترهم ع كلشي..
رانيا.. ابتسمت خجلت من كلامهه مااكدر ارفع
راسي ظليت مدنگه واسمع صوته يحجي
وياهم ...
سأل ام اواب هم عدكم نسوان هواي
يكفي الاكل لو نجيب بعد؟!
جاوبته خير من الله نسوان موغربه
اهلنه بس خلصونه من الزلم ...
جنت اخوط بالتمن بگدر جبير حيل
احس اديه تملخت فات من يمي
بصوت خافت كال انتي مومريضه
ليش تشتغلين؟!
ماجاوبته سويت نفسي ماسمعته
لان ماعندي جواب وكلبي يطبل
بصدري !!
حجه حجايه وفات جان يكول
صايره تغلسين نصحتج وطبقتيهن
عليه!!!
حجاهه ومشه واني مبتسمه بيني وبين
نفسي فززني صوت فجر وهي دكول
غانيا لا يحتغك التمن ؟!!!
خزرتهه مدت السانهه عليه ادري
بيهه خبيثه ومتعمده تحجي ومدري منين
طلعت جنهه جني..
صار دنيا المغرب وكملنه كلشي كالو
دخلن جوه احنه نصب وانشيل ومن تخلص
الزلم اندز عليجن ...
كعدنه بالمطبخ وهوسه الزلم بره النسوان
صبولهه وكامت تتعشه واحنه اهل البيت
كاعدين بالمطبخ...
صوت اواب من الممر يصيح يمه!!!
صاحته فوت وليدي ماكو احد
احنه كلنه لابسين حجاب ..
دخل اواب لابس بنطرون وقميص
سمائي معبي بالبنطرون مرتب حيل
وعبالك جان بموعد كال بس صبن الجاي
حته اخذه...
امه تصب وتحجي وياه ليش هيج
لابس وين جنت چااا ماساعدتهم!!
اواب.. هسه اجيت جانت عندي شغله
اخذ الصينيه وطلع اجت عيني ع فجر..
جانت كاعده بصف الكاونتر ومبتسمه
صفح وعبالك ابتسامه استهزاء
كعدت بصفهه كتلهه اواب خوش اواب!!
فجر.. وضغغام خوش ضغغام
رانيا.. حقيره اني اعلمج تروحين وترجعين
عليه بس شنو سر هاي الابتسامه!!
فجر.. مااشاغكج افكاغي
رانيا.. خبيثه موبيدج وين عقيق؟!
فجر..تصلي بغغفة ماما هاي ايناس شافتهه
تصلي الباغحه وطلعت تسولف دكلهم هيج تصلي
رانيا.. طاحظهه لهدرجه مدققه بيهه موهاي ماما
تصلي هيج شو ماحجن ويعرفن وشافنهه بس
موهاي عقيق السبع
فجر.. يغاغن منهه
رانيا.. كومي صيحيهه خلي تجي هنا
تلگيهه تستحي .. كامت صاحتهه واجت..
سويتلهه مكان بصفي عقيق اسم ع مسمى
مربيه نفسهه بنفسهه لابسه دشداشه ردن طويله
وحجابهه مضبوط رغم هي اول ماجتي بدون حجاب
ماتشارك وتناقش ع كد السؤال...
اندك باب المطبخ كالو اطلعن خلصوا ظلت
الزلم بره واحنه طلعنه للمواعين انفجار
بالطرمه كلهه اتشاركت بالتعزيل والغسل
حته ايناس وابرار...
ساهره.. عقيق بنيتي لاتشتغلين البنات هوايه
عقيق.. خليني خاله ممسويه شي بس ارتب بالمواعين
ساهره.. خاف اتعبين
عقيق.. اذا تعبت اكوم...
جنت اخذ من فجر وامسح المواعين واصفطهم
ايناس بنت جبار اكثر من مره شفتهه تخزرني
ونظرتهه موحلو ...
شويه واجه السبع وجراح واكفين مسافه
عمه يسولفون واني ع وضعي
امسح بيهم مااحس غير دستت مواعين
تكسرت قريبه عليه فززتني وايناس دكلي
شبيج ماتشوفين لومعورتني!!
ماعرفت شجاوبهه انصدمت هي وكعتهن وهي
شمرتهن براسي كتلهه مواني اصلا هم بيدج؟!
ايناس.. شنهي موانتي مومديتي ايدج اخذتيهم
ماتلزميهم زين لو مافالحه بالشغل..
ساهره.. ايناس ماصار شي فدوه طار الشر
ايناس.. شنهي ماصار شي لو واكعات عليه
فدوه الهه
عقيق.. اني مامديت ايدي اني امسح بالكدامي
هن وكعن من ايدج
ايناس.. اسمعي ولج من احجي دكولين حاضر
موعليه المزعطه بطول زري تعلي حسهه عليه
فجر.. شبيج ايناس انغجغتي عليهه
ضمي زغج لايجي السبع وتضيع
اعلومج!!
ايناس.. انتي انجبي تحترمن غصبا عليجن
خاف نسيتن انه بت منو انه بنت الشيخ جبار..
ساهره.. عيب هالحجي ايناس شنو هالغلط
المواعين مالتي فدوه روحي لاتشتغلين مالنه
خلك مشاكل..
ايناس.. لا والله مااسكت هاي العگربه
الصفره وتأشر ع عقيق رادت تعورني
وصار ساعه تتحجج عليه...
السبع.. ايناااااااااس طلايبج وراج مثل
ابوج ماتفوتين مكان اذا ماتشعلينه
صارلج ساعه تگرگين ع مواعين مشتريتهن
بفلوس ابوج!!
ايناس.. السبع شوف رادت تعورني
السبع.. دخلي جوه ولو تكعدين يم امج
وتكرمينه بسكوتج احسن وايااااااااج
وشدد ع الكلمه اسمع حرف واحد ع عقيق
وفجر...
عقيق.. دخلت جوه وهي زعلانه واني مدنگه
شلون تبلت عليه شنو من نفسيه وبارعه
بالتمثيل تقرب عليه كرفص بصفي ..
السبع..ليش ماترديهه ليش ساكته
وينوكل حگج
عقيق.. خفت منهه مدري شلون تحجي
وخاف دكول لجبار عليه!!
السبع.. ااااافه عقيقتي تخاف غير
اشعلهه هي وجبار ومصيرهه مثل وسن
عقيق.. لاتحجي هيج كدامهم فشله لايسمعون
السبع.. چاااا شحاجي انه متغزل بيج
كليلي تعشيتي؟!
عقيق.. لاااا مااكل اللحم موتدري
السبع.. هسه يروح الخطار وتعشي وياي
عقيق.. كام وكف وطلع ضرغام من الاستقبال
كال راح اروح بشغله شويه واجي
لاتخلون جراح ينام عندي تحقيق ويااااا
السبع.. عاد تحقيقك مايخلص عوفه
اليوم سماح
ضرغام.. لا بويه اليوم يعني اليوم الشغله
ماتتحمل تأجيل ...
لبابه... اشتغل بدون واهس مااريد اشوفه
حته من يفوت ادير وجهي طلعوا اهل نوال
سلموا وراحوا واني مدنگه ...
كملنه شغل وام اواب راحت وظلينه وحدنه
عمه زينب وابرار صعدن فوك واني دخلت
سبحت وطلعت...
بس احس كلبي نار ومشتعل جنت ملتهيه
بالشغل هسه من كعدت كامت الافكار
تتضارب عليه وكلما اتذكر الحضنه مالته
روحي تطلع...
جانت الساعه ب١ كلهه نامت من التعب
عيوني تريد تغفه بس كلبي ماجاي يهدء
شكد استغفرت وظليت بفراشي وعيني
ع السكف...
عقيق... هسه ارتاحيت رجع جراح جان شاغل بالك
السبع.. الحمدلله
عقيق.. شلون لگيته؟!
السبع.. هو مخابر ع صديقه حافظ رقمي
ورقم صديقه ماعنده لاكروه ولاهويه وماكدر
يجي خاف يوكفوا بالطريق ..
عقيق.. شيكول وين جان هاي السنه ونص
السبع.. ماتعمق بالحجي بس مخطوب بيد
تنظيم القاعده الظاهر عفت ضرغام لازمه يحقق
وياه ...
عقيق.. ضرغام شغلته تحقيق
السبع.. مواساس وضيفه ضرغام ضابط تحقيق
شايفه من عنده تحقيق لذوله المجرمين وواحد
يخابره يبتلي ع عمره كله تحقيقه من ١٢ وفوك...
عقيق... بس جراح متغير حيل
السبع.. متعرض لتعذيب الطريق كله ماحجه
وبس يصفن ومن بدل هسه ظهره خريطه
متعرض لتعذيب هواي ومأثر ع حالته النفسيه
عقيق.. خطيه لبابه
السبع.. راح تعاني من حالته النفسيه
لان هسه قبل العشه اقل شي وصاح صاير
مايتحمل...
عوفيني من جراح رجع والحمدلله تعالي
هنااا ع كلبي!!!
عقيق.. جنت نايمه ع ايده دنه راسي
ع صدره رفع راسي واحد يباوع لثاني
مشه اصبعه ع حواجبي وع خشمي
وع خدودي...
جان الضوه مفتوح رفع جسمه ومد ايده
طفا ورجع لنفس الوضع حسيت كلبي نبض
سريع ايده ع زندي تلامس بشرتي
وجسمي مكزبر...
سحب ايده من راسي وخلاني ع المخده ولزم اديه
وكال اهدي ليش كلبج مامستقر
ماكدرت اجاوبه غمضت عيوني
اعيش بكامل جوارحي ويه السبع
افصل عن كلشي انسه منو اني
وشنو مصيري وتفكيري يتلاشه
اللحظه الي ياخذني بحضنه اعتبرهه
يوم ميلاد جديد صرت يوميه اعيش
ميلاد سعيد واني انعم بحنانه...
خله ايده ع فكي ورفع راسي ليفوك
وغمر راسه برگبتي وباسني بكل
هدوء!!!
ذبذبات كهربائيه سرت بكل جسمي
تملكني شعور حلو حيل واني اميل
براسي وادفع بي مااتحمل هلكد...
رفع راسه وضمني حييييل جسمي
مكزبر واثار لحيته انغرست ابشرتي
الناعمه...
اتنهد بنفس عالي وكال اووووف يانسمتي
حجه بيت شعر منحرف ضميت راسي
وضربته خفيف ع صدره
ﻫﻴﻪ ﻣﻮ ﻛﻞ ﻋﻀﻪ ﻋﻀﻪ ﺍﻓﺘﻬﻢ ﻗﺼﺪ ﺍﻟﻤﺜﻞ
ﻋﻀﻪ ﺍﻻﺻﺒﻊ ﻧﺪﺍﻣﻪ ﻭﻋﻀﻪ ﺍﻟﺮگبه ﻏﺰﻝ!!
يوميه اكتشف صفه جديده بالسبع
حنيته يوم عن يوم تزداد حبه احس
بي بدون مايكول كلمه احبج...
صرت اتمنى يجي الليل حته اغفه
بحضنه وانسه كلشي مر بحياتي
من ايام سوده والم وعذاب...
لبابه... ع وضعي نايمه وصافنه انفتح باب الغرفه
بهدوء صوت ابرار وهي تصيحني لبابه لبابه!!!!
كمت من مكاني كالت جراح يريدج
رفضت اصعد لزمت ايدي بتوسل
وكالت فدوه اسمعي جراح متعرض لتعذيب
وماحجالنه وماما تخربطت ونامت...
نغزني كلبي من كالت تعذيب
صعدت وياهه لكيته كاعد بالصاله
وعمه نايمه بغرفتهه وابرار عافتنه وراحت نامت...
كعدت قريب علي ومدنگه وهو كاعد
وحاني جسمه ومرتجي ع رجليه
ورجله تهتز وترتني...
جراح.. تسمعيني!!
لبابه.. اااي اسمعك عوف سالفه نوال احجيلي
وين جنت وشلون عشت؟!
جراح... بيوم الخابرتج جان عندي احساس
موحلو الوضع يمنه خطر كاموا ينقلونه يوميه
بمكان انه ماحجيت لامي خاف تقلق بس نقلونه
للفلوجه وهذا المكان مقر تنظيم القاعده
اجتنه اوامر نروح لسيطره ع الطريق
وجنت اني ضابط السيطره قبل لانوصل
صار انفجار وماادري شصار بس فتحت
عيني اني وياي ٢ جنود ابمكان مانعرفه
داوو جروحنه وحبسونه لان ضباط
رادو من عدنه معلومات وماحجينه
كتلو واحد من الجنود كدامي واني وبعد
واحد عذبونه...
لهنا لبابه مااذكر الباقي شفت ايام ماكو
ديانه تقبلهه وصار سنه ونص احنه محجوزين
ماادري شيريدون وتالي صارت مداهمه
من الامريكان وانهزمنه...
لبابه.. يحجي وهو مدنك ورجله تهتز
خليت ايدي ع رجله وكفت!!!
كتله هاي البركبتك تعذيب؟!
هز راسه ااااي والتفت عليه يباوع
بعيوني كال اذيتج موووو؟!
لبابه.. اذا اكو اذيه من عندك بعد
عوفني جراح لاتصير اناني اتركني
واختار حبك اني موحبك الاول
جراح... انتي حبي الجان موحب لاتحمليني
المسؤؤليه اني قبل لا اخطبج تركتهه وفوك ال٨
اشهر احنه ماتجمعنه كلمه كل واحد بطريق
وهي اجوهه ناس وقررت تزوج...
بس حبار دمرني من راح خطبهه وخالي
الجان يبيع مثاليات براسي قبل وانطاهه
واني كله ماادري شريد اسوي ويه جبار
لاتفيد العركه وياه ولا الحجي...
لبابه.. والحل اني مااقبل اكون بالمنتصف
لو اني لو نوال واحلفك بروح ابوك اذا عندك
ذرة مشاعر لنوال لاتكسر بختهه عوفني
وشوف حياتك...
جراح... انطيني مجال فتره وانهي الموضوع
لبابه.. هاي الفتره خليك بعيد عني لاتحاول
تعلقني بيك انهي الموضوع باقل الخسائر...
عفته ونزلت مابرد كلبي لازم اخلي حد
وين ماتوصل خلي توصل كمت اتجنبه
نهائيا يجي يصعد ليفوك حته مااباوع من الشباك
من اسمع صوته بداخل البيت اركض للغرفه
مااريد اعيش هاي الايام واني اتأمله ويكبر
حبه بكلبي ...
رغم شكد متأذيه بداخلي وشكد جنت اتمنى اشوفه
واحجيله عن الصار بغيابه بس الشوفه
الشفتهه خلتني بحاله صدمه...
رانيا... اليوم جمعه كاعده من الفجر
خايفه حيل من جية وسام ضرغام ملتحق
وماما تهدي بيه والسبع بالشغل بس اجه
الشيخ ياسين يستقبله...
ب١١ وصل وسام صار اسنين ماشايفته
اسمع صوته ويه الشيخ واخذوا الجهال
واني اريد اسيطر ع دموعي مااكدر
اتوسل بخاله تكله ماياخذهم يتخيلي
يسحبهم وينهزم بيهم ولو هو كلبه
حجر ربيتهم وحدي وهو مايسال عليهم
اجت خاله كالت كومي البسي يريد يحجي
وياج رفضت وتخبلت مااكدر اشوفه اشمئز
منه مجرد مااتخيل ذاك المكان وبغرفتي
ويخوني نار وتشتعل بصدري..
جبرتني خاله اكوم كالت عنده حجي
لاتفشلين ياسين هو دز عليج كمت لبست عبايه
ماما مال الراس ودخلت سلمت وكعدت مدنگه
متوتره حيل احس الاستقبال قفص
وضاغط ع اضلاعي حجه الشيخ
بويه ام سيف ابو سيف جاي يريد
يردج وهو يعتذرلج ومستعد يلبي كل
طلباتج...
رفعت راسي بعصبيه من كل عقله
جاي بعد هاي السنين من شبع
ونسه وصخام بعينه هسه جاي يريد
مره وجهال...
قويت حالي وتمالكت اعصابي وكتله
شيرجع اني طلبت الطلاق ولواخر
يوم بعمري ماارجع...
وسام.. رانيا كل انسان معرض للخطأ ماجنت
مقدر النعمه العندي واني هسه اطفالي كبروا
وبحاجتهم انتي ارجعي وافتحلج بيت ابغداد
واسجله باسمج والتريدي اني حاضر
رانيا.. من اجيت خطبتني نفس هاي الطريقه
كلت اسجل الشقه باسمج واني حاضر
واني البي كل طلباتج وماخيب ضنج
بس السويته شنو ؟! كل عقلك ارجعلك
لو يصبوك ذهب ما ارجع ساعه وحده وياك
لاعبالك تلوي ذراعي باطفالي
وروح بابا مستعده اكتل روحي ولا اعيش
يوم واحد يمك وبدون اطفالي..
ياسين.. اهدي بويه لاتعصبين هو حاس
بغلطه وجاي يعتذرلج يكول ابوي وامي
يريدون الجهال ومن حقهم يشوفوهم
موبعد محافظه عنهم
رانيا.. شيخنه وين جانو من اليوم الي اطلگت بي
لهذا اليوم امه وابو واخوته مارفعوا تليفون عليه
وكالو شلونهم الجهال اني ربيت وحدي
تمرضوا وتبهذلوا يوميه بمكان
ومحد كلف نفسه وسأل عليهم
وهو ابوهم اسأله وين جان هاي السنين
خلي يجاوبني وين تفقتنه هو مو اب
ماينكسر كلبه عليهم؟!
وسام.. جنت مأمن عليهم يم ابوج
شمدريني هيج يصير وعايشه بقريه
كلهه ثارات
رانيا.. هسه شتريد اني عايشه بامان هسه
وبحمايه الشيخ ياسين تريد ترفع دعوه
تاخذ الاطفال لو شنو بالضبط؟!
وسام.. تدرين بيه مااذيج هيج ولو اريد
اخذهم من اول يوم اني جايج بالحسنى
وردت ترجعين حته اطفالنه ماتصير الضحيه
رانيا... اني الماقبلت بالخيانه هسه
تريد ارجع ع ضره؟!!!!!
وسام... ماكو ضره اني طلگتهه رانيا
ارجعي معززه مكرمه وكدام المشيه اتعهدلج
ماتشوفين غلط مني
رانيا.. هااا جربت غيري وهسه جاي
لو هم خنتهه وانهزمت منك رجعه ماارجعلك
لو اموت لو ع كص ركبتي
ياسين.. ع كيفج بويه چااا هو جاي يتعارك
الرجال جاي يتفاهم
وسام... خليهه ام اواب معذوره هسه
اني اريد اخذ الاطفال وياي اسبوع
وارجعهم بيدي
رانيا.. هو كال هيج لو تخبلت كمزت اعلى منهم
وكتله مستحيل صرت مخبله حته عباتي وكعت
من راسي. اجر بيهم واضمهم بحضني ودموعي
مااسيطر عليهه...
تقرب وسام عليه واني ابجي واتوسل
لاتاخذهم الله عليك عوفهم اذيتني
هواي ...
وسام.. والله العظيم ارجعهم هاي كدام
الشيخ اوعدج امي وابوي مرضى اثنينهم
ويريدون يشوفوهم مااذيج بيهم ...
رانيا.. فرفحت روحي امي لازمتني
وهو لازمهم ويباوعولي ويبجون رضاوي
يضرب بي برجله ويكله هسه يجيك السبع
يموتك ...
ياسين مارده وانطاه اطفالي ويقنعون
بيه اسبوع ويجيبهم ولايوم نامو بعيد عني
ولج ماما اريدهم اروح وياهم ...
ساهره.. ولج انتي مريضه راح تموتين
ابوهم هو قابل ياكلهم يشوفوهم ويرجعوهم
عمه هدي حالج
رانيا.. شفتي جاي يرجعنه اكو سالفه ابراسه
اخذ اطفالي حته يجبرني بيهم انتن ماتعرفنه
بفلوسه ورتبته كلشي يسوي ...
يهدون بيه بس ملخت نفسي
شلون رضاوي يبجي ويصيح اريد ماما
تجي ويانه وشلون ابوهم رافع خشمه ومطلع
سلاحه مبين عود يخوفنه يدري بيه ضعيفه حال..
متت بيومهه لا اكل ولاشرب ماما تبجي
وياي واني بلعومي اتجرح من كدما
صرخت اني متاكده ماراح يرجعهم...
اجتني لبابه العصر كالت ضرغام
يريد يحاجيج متصل ع تليفون
عمه لان تليفوني شامرته مادري بي...
بس خليته ع اذني شهكت بصوت عالي
وكتله اخذوهم شيخ ياسين انطاهم
لوسام...
ضرغام... منو مبجيج ؟! اطفالج يرجعون
والبجاج ونزل دموعج اني اله!!
رانيا.. عنده فلوس ورتبه ويهددنه
كل مره من جنه بغداد حته دوريه جاب
لبيتنه واخذوا بابا للمركز ...
ضرغام.. رانياااااااا كافي يابه
لاتبجين خليني اسمع صوتج بوضوح
كتلج اني ارجعهم بيدي..
رانيا.. هسه تتصادم وياه ويكلك
منو انت وباي حق تحجي؟!
ضرغام.. انتي مكبره الموضوع هو ابوهم
ومن حقه ياخذهم ويشوفهم حته لو الحضانه
الج
رانيا.. مايرجعهم هو جاي يعرض عليه
ارجعله ومن سمع رفضي كال اريدهم اسبوع
لو صدك جاي عليهم جان كال من الاول
ضرغام.. شيرجع ؟!
رانيا.. ارجعله لبغداد
ضرغام... ااااااهااااااااااااا
يله لاتبجين ننتظره اسبوع لاتخافين
مايخلف بكلمته كدام الشيخ ؟!
اكلج هو شنو رتبته؟!
رانيا.. هسه صاير نقيب!!
صرغام.. دزيلي اسمه بالكامل ووين
داخليه لودفاع...
رانيا.. انطيته الاسم الكامل سالته ليش
ضرغام لاتسوي شي مالي حيل مشاكل
ضرغام... شسوووي !!؟؟!
يله روحي واهتمي بنفسج وجهالج يم
ابوهم ماعليهم شي لاتخافين
سده واني مخليه ايدي ع وجهي وابجي...
اسبوع لو سنه اخابرهم من ماما
يكلولي ماما انريد نرجع هناا مانعرفهم
ويسولفون مشتريلهم العاب هوايه ويوميه
ياخذهم لمكان...
ضرغام مانزل ابد صار اكثر من اسبوع
وماخابرني بعد خلص الاسبوع وبيومهه
افتر من التوتر والساعات خلصت واولادي
ماكو..
صار المغرب لو كمت الطم ع وجهي
عرفته وسام سواهه اخذهم كتلكم لاتنطوا
خابره ياسين ويكله والله اريد احرك الدعوه
من جديد وشيحكم القاضي بهيج وضع اخذهم...
تعارك وياه وكاله ماعندك كلمه
وعدتني اسبوع جيبهم وحرك الدعوه
ماقبل وكاله اولادي ماانطيهم تريد
خلي تجي هي ماتريد خلي تظل بالبصره...
مثل ايام وفاة بابا واكثر
احس الالم البكلبي ماينطاق اخذهم
فرك خشم وياريت اكول يستاهل
٥ سنوات ماسأل عليهم وهسه صار
يمثل دور الاب...
ثاني يوم اجه ضرغام قبلهه حاجاني السبع
وكال مانعوفج واحنه وياج وصدكي لو موقانون
ناخذهم غصب عنه هيج انسان ماعنده
كلمه كدام شيخ لاتترجين منه خير...
سمعت صوت ضرغام بالاستقبال
طلعت اركض فتحت الباب جان يخابر
اشرلي بيده اسكت شويه وسده..
بجيت بسرعه وينهم موكلتو نجيبهم
اخذهم ؟! وعمه هسه يساعده وهاهي راحو
واني اصفه كلشي ماكو..
ضرغام.. اذا تظلين تبجين مااساعدج
رانيا.. لابطلت ومسحت دموعي..
ضرغام.. تعاي اكعدي وشويه فتحيلي
عقلج!! اسمعيني زين هذا يرادله جرة اذن
لو فعلا اب ومحروك كلبه ع اطفاله نكول من حقه
بس امج حجتلي ٥ سنوات هو ماصارف
عليهم درهم ولاجايهم ليش هسه جاي
يداعي بيهم؟!
رانيا.. يريدني ارجع؟!
ضرغام.. وليش هسه وين جان؟!
رانيا.. يكول طلگت مرتي ماصاير عنده
اطفال
ضرغام.. ممممم هز راسه وكال جذاب
هذا اكو واحد ناقص من يمنه وصله
حجي ؟!
رانيا.. شوصله؟
ضرغام.. مادري المهم اريدج تسمعيني
هسه عليج تسكتين لاتخابرين بعد ولاتتوسلين
الهم هو يجي يتوسل غصبا ع راسه!!
رانيا.. مايتوسل انت ماتعرف وسام
مغرور وشايف نفسه برتبته ولاهمه
جهال ولامره اصلا متزوج فوك ال١٠ مرات
يتزوج شهر شهرين ويطلك
ضرغام.. عود نكسرله خشمه اذا مغرور
مروتج شغلي دماغج بيش فالحه كليلي
بس تبجين ؟!
رانيا... جهالي هذوله ضيعت عمري علمودهم
ضرغام.. وجهالج بحرب يم ابوهم بالهدوء تنحل
العصبيه ماتجيب حل احنه راح انروحله باجر
ونلتقي باهله وانشوف بلكي يتفاهم واذا
شفنه الحجي موخوش عود احنه هم نصير
وياه موخووش !!
كومي مسحي دموعج كافي يمعوده
فوك الضيم والقهر انوب تبجين ناويه
تموتيني وبعز شبابي !!
رانيا.. افتهمت قصده بسرعه تشكرت منه
وطلعت مسحت دموعي شويه طمئنيت
مدام السبع وضرغام وياسين لازم يحلوهه
لكيت فجر كاعده ع الدرج كتلهه ماتشوفيلي
يرجعون ؟!
فجر.. منو كالج اني كشافه
رانيا.. فجر شوفيلي؟!
فجر.. مااكدغ اشوف لو شايفه جان
كتلج تغى موبكيفي هي تجيني حاله
واحساس...
رانيا.. خليت ايدي ع خدي وحايره شسوي
ثاني يوم راحوا من الصبح وكلبي نار للعصر
يله اجو ركضت تلكيتهم بالباب...
احاجي بياسين وادور عليهم ماكو يعني
ماقبل ينطيهم باسف حجاهه كال اولادج
مايردون عنده ضلع قوي وحته القاضي
منطي رشوه...
سحبتني ماما ليجوه واني مصدومه
هاهي بعد مااشوفهم التعب التعبته
عليهم راح واخذهم ع الحاظر لاربه ولاسهر
ع مرضهم...
محد كدرت تسكتني من كدما بجيت
حته ام جراح نزلت ع صوتي
ومحد اكو من الزلم كلهم طلعوا وينك
بابا تعال شوف حالي ؟!!
ظليت لليل اني ع فد بجيه والاكل مايفوت
ابحلكي يمكن ب١٠ تقريبا دك تليفوني وسام
ركضت شلته اريد افرغ عصبيتي وقهري بي
جان يكلي هااا ولج رنيوه ماينگدرلج عرفتي
تلعبيهه صح حته تكسبين الحضانه
كليلي منو المقدم العندج والساندج ونقل
دوامي باخر الدنيا وبأخطر منطقه!!!
.
.
.
يتبببببببع.... متابعه شيقه