#قرارات_خاطئة 🌻
🔥الحلقة السادسة عشر 16🔥
(القصة من وخي الخيال ولا تبث للواقع بي اي صلة )
👑H e m o t k 👑
_____________
خش مصطفى وصكر الباب
لقي اسلام واقفة تبكي
مصطفى :خيرك يا بنتي شن في
اسلام: خراسي طاح مني ياابابا دوره معاي 🥺
مصطفى: طاار معاه السو يابنتي غدوا نشريلك واحد جديد باهي
اسلام:لا لا اني نبيه هواا نحبه ياا بابا خراسي نحبه
مصطفى :استغفر الله وطبس يدور معاها شن طلعك ف القايلة انتي ااه
اسلام :طاح مني توا واني طالعة
سمع صوت الباب يطقطق ناض وقف
مصطفى:مني؟؟
الراجل :خدمة توصيل
مصطفى فتح الباب:تفضل يا خودي
الراجل :اني مندوب واصلني العنوان هدا طالبين من محل ملابس نسائية
مصطفى:دقيقة نسأل العيلة بس
خش مصطفى للحوش : سميرة !!سمييرة
سميرة:ايواا
مصطفى:شوفي البنات مني اللي طالبة خدمة توصيل
جت ابرار تجري :انييي انيي
مصطفى:شن طالبة
ابرار:حاجات بنات بالله خود منه وخلصه
مصطفى:الصبر يااربي الصبر وطلع تاني خدي الحاجات من المندوب وخلصه
مصطفى:اخر مرة ادييريها الحركة هادي معش تطلبي شي لين تكلميني
ابرار:باهي شن صار ف الدنيا خيرك ومشت تجري ركبت
سميرة:شن صار فيك ياراجل معش دوويت
مصطفى :في شني
سميرة:تي موضوع ولدك وامتى بتقول للبنات
مصطفى:مانيش عارف وبلقاسم قاعد ماروحش نخس في روحي مخنووق والدنيا كلها علي قلبي
سميرة:الله غالب غير معش تسحن روحك بس تو كل شي ينحل
مصطفى تلفت :خشيي ياابنت شمس براا تو اندوروه بعدين الخرااص
__________
فهد يسوق ف سيارته وامه من قدام وعهد التالي
فهد:والله كدب عليك بلادك بلادك تحس بشعور غير طبيعي لما تخشلها بعد غيبة طويلة
عهد:بدات غيبة زي غيبتي وتمرميط
فهد:ااهو كسبنا شوفتك وتعرفنا عليك فجرايره
عائشة ساكتة وسرحانة تفكر ف شن بيصير بعد دقايق واخيرا بعد السنين هدي كلها مصطفى بيشبح ولده وفي نفس الوقت خايفة من ردت فعل فهد
درس فهد قدام حوش مقدام ونزل
مقدام :الحمد الله علي السلاامة ياا مييكا
فهد:الله يسلمك
مقدام شبح لي عهد وطبس علي الروشن سلم عليها وسلم علي عائشة:هي انزلو
عهد:مرة تانية لاكن توا كان نلقى صاروخ يحطني في حوشا
مقدام شبح لي فهد :والله كنت بنوصلكم لاكن عندي ماندير توا ركان يراجي فيا ف المصحة وبدي ينعت فيه
فهد:اي اي زبطه مية مية نعته سااهلة
مقدام:اي ومش بعيد من هني لونه ابيض من برا الحوش وفيه زوز بيبان لونهم سود ويمكن رابع ولا خامس حوش علي ايدك اليمين يجيك
فهد:تم تو نوصل الشارع انزيد انكلمك
مقدام :مية مية هي تووكل البنت بتهبل
عائشة دموعها يقطرو وقلبها بيطلع ومتلفتة لي الروشن ماتبيش فهد يشوفها
فهد:هي تشااو
مقدام:دورني العشية
فهد:تم يا راس
طلع فهد بسيارة ويتبع ف الطريق زي ماقاله مقدام
فهد:امي خيرك ساكتة الطريق كلها ماقلتيش ولا حرف
عائشة :لا شي غير حسني تاعبة من الطريق
فهد:تو انحطو عهد ونطلعو للحوش طول
عهد:لا والله مانبي مخلياتك تمشي لين تتعرفي علي ماما قبل وتخشي تهدرزي
عائشة:الجايات اكتر انشاء الله
فهد شبح لي امه وحسها مش علي بعضها لاكن ماباش يتكلم
فهد: هدا الشيل وين الفتحة اللي قال عليها قبله
عهد:يمكن هادي اللي قدامها شجرة
فهد:اي مدخل حوش هدا
عهد:لا لا غير قدم
فهد قدم بسيارة وخش للفتحة :ايواا هادي هياا مقطرنة
عهد:قلبي بيطلع من مكانه فهد وطي السرعة
فهد ضحك:معش تبي ؟انولي بيك ؟
عهد:لا نبي لاكن خايفة
فهد:اني معاك متخافي من شي
درس فهد قدام الحوش وفتح الباب ونزل
عهد فتحت الباب وهي شعورها مخلط بين خوف وفرح ورهبة وفي نفس الوقت خايفة علي امها تصيرلها حاجة
عائشة تتكلم في بالها :انزلي ياا عائشة انزلي وخلي اللي بيصير يصير انتي اللي انظلمتي وجي عليك الزمان مش هما
وقف فهد قدام الباب وطقطق
عهد وقفت وراه :فهد قلبي بيطلع
فهد شدلها ايدها وخلاها وراه: متخافيش خليك وراي بس
عائشة قعدة ف السيارة تراجي لين ينفتح الباب
فهد طقطق تاني
مصطفى فتح باب الحوش :تي شن القايلة هادي هيااا
قدم مصطفى وحط ايده علي الباب وفتحه
(تخايلوها بطيئة😂)
فهد :السلام عليكم
مصطفى:وعليكم السلام تفضل
فهد:مصطفى يعقوب ###
مصطفى:انشاء الله تفضل
عائشة مقعمزة ف السيارة واول مانفتح الباب وشافت مصطفى ولا بيها الزمان التالي وتخايلت كل شي صار
مصطفى يشبح لي فهد وانتبه ان في وحدة وراه
عهد طلعت من ورا فهد:خالي 🥺
مصطفى انصدم:عههد !؟!؟ 🤨
شن اديري هني وين راجلك ومن جابك
عهد بدو دموعها ينزلو
فهد:اكيد مش حتحكيلك فم الباب
مصطفى:تي مني انت
جت اسلام طلعت برا شافت عهد
اسلام:حيييي عهد جتت وفتحت باب الحوش علي وسعه يااا ماما ياا عمتيي عهد جتت تعاالو بسرعة
امال ناضت تجري طلعت ووراها سميرة
ايات من الدروج :شن اتقول هادي
وعد: كأنها قالت عهد جت ونزلو يجرو طلعو كلهم
امال طلعت فم الباب شافت فهد وعهد مدرقها مصطفى
اسلام:اني شفت عهد يا عمتي وخق ربي اهيااا ومشت تجري اسلام فتحت الباب
اسلام:عهدد 😍
عهد طبست حضنتها وهي تبكي
فهد:خشي دااخل عهد
عهد قامت اسلام وخشت
مصطفى:تي فهمونا شن فيي خيرها البنت وراجلها وين
امال اول ماخشت عهد وشافتها بدت تبكي طوول
امال:بنتي 😭
عهد :مااما ومشتلها تجري حضنتها ويبكو هما الزوز
وعد واقفة مصدومة ماقالت شي
امال:خيرك ماقلتيش جاية ووين يزن
فهد تلفت شبح لي امه يبيها تخش
ابرار :انهار احرف مني الغزال اللي جاايب عهد
ايات: غزال وسكتي
عهد وخرت من علي امها وحضنت وعد
وعد حست ان عهد تبكي في بكية غريبة مش متع انها مستاحشتهم بس
امال:عهد يا بنتي خلاص ااهو شفاينا علاش البكي هدا كله
فهد يشبحلها ويبي يخش يسكتها مش قادر
مصطفى:يلااا يااسر من غير بكي واحكي شن في
امال:جاية البنت زيارة يعني لازم يكون في شي
مصطفى:مني هداا اللي جاايبها ووين راجلها
فهد قدم دااخل ووقف قدام مصطفى:اني فهد محمد بلقاسم ال### واني اللي جبت عهد من المانيا وامي معاي ف السيارة
مصطفى لما سمع اسم فهد ولقبه جمد ف مكاانه حس روحه بيطيح من طوله
امال شبحت لي عهد:علاش جابك الولد هدا وين يزن
عهد :اني اطلقت من يزن 🥺
امال شهقت وحطت ايدها علي قلبها :حيي علياا علااش
خشت عائشة :السلام عليكم
مصطفى وخر وهوا يشبح لي فهد وعائشة جااياته صدمة متوقعش في ولا مرة ان يطقطق الباب ويلقاها عائشة عيونه غرغزو وسااكت حتى حرف ماقالاش
امال تلفتت وشبحتلها:عيييييشة 😧
عائشة عيونها دموع :اماال 😢
فهد بدت بدت علامات التعجب تطلع علي وجهه
عهد نسحت دموعها وتشبحلهم بي استغراب وشبحت لي فهد
والباقي كلهم مش فاهيمن شي
امال حضنت عائشة وبدو يبكو هما الزوز
سميرة عرفتها عائشة مرت مصطفى الاولى وشبحت لي فهد وكان يشبه لي اسلام بشكل مش طبيعي واضح انهم خوت او في بينهم صلة قرابة وقي حاجة في داخلها اتقزل ان هدا ولد مصطفى
مصطفى يشبح لي فهد وقلبه حسه ان هدا ولده لما شاف عائشة
قعدو الكل في حالة دهوول دقاايق
فهد:امي ممكن نفهم شن صاير
امال: وين ديااارك يا عيشة معقولة تنقطعي قطعة وحدة وتنسي العشرة اللي بينا كلها
عائشة:والله ديمة في بالي وبدات انتي يا امال وتعرفي معزتك في قلبي كيف وانصدمت صدمة عمري لما تلاقيت مع بنتك وعرفت شن صاير معاها وندرت بيني وبين نفسي ان منخليهاش لين توصل لا بين ايديك
امال :خيرها عهد شن صار معاها قولولي راهو قلبي بيطلع
عهد :كيف يعني كنتي تعرفي ماما هدا علاش خليتوني عندكم
فهد :امي شن الي صاير منين تعرفي ام عهد
عائشة شبحت لي فهد وعيونها دموع :فهد ياولدي في هلبا حاجات انت ماتعرفهاش لاكن صدقني مش اني السبب في ولا حاجة
مصطفى قدم : انتي كيف تضحكي علياا انتي والحيوااان اللي اسمه بلقااسم كيف كيف ادسو عليا موضوع كبير زي هدا معقولة بعد سبعة وعشرين سنة تتصل بيا سليمة وهي علي فراش المووت اتقولي عائشة ما رمتش هداكاا اليوم وانت عندك ولد منهااا كيف ادييرو هكي كييف وقعد يخبط علي راااسه وولدي وين وبي اسم مني مسجليينه وكيف زو رتو الورق
فهد جبد مصطفى وخره من علي امه ووقف قدامه :لا عند اليوم واني بطول هدا مافيش حد اتجرأ يتكلم مع امي بطريقة هادي الزم حدودك احسن
عهد جت تجري شدت فهد :فهد اهدااا بشوية
فهد غمض عيونه وتنفس بلقوة :امي اطعلي هياا
عهد :فهد علي خاطري 🥺
فهد وخر التالي ويشبح لي امه :امي اطلعي وخليني اني نتفاهم معاه وبعدين انردك اتشوفي عهد
مصطفى يشبح لي عائشة:ولدي ويين تكلمي وييين دااستيه علياا ماتسحابيش الدنيا صغيرة
ايات :يااربي بيغمى علياا شن يقول بابا قصدك حني عندنا خوو 😟
ابرار:قصدك بابا كان متزوج زمان 😳
وعد:حد يفهمني شن صاير في هلقايلة السودة
عائشة تبكي :انت السبب ف اللي صار كله انت السبب سمعت كلام داية كدابة وبنت عمك اللفعة خلوك اطلقني واني علي فراش المووت كان مش من خالي راهو اني ملوحة ف الشارع بي ولدي
فهد مسح علي وجهه وضحك :امي متخليينيش نفصل وانتي تعرفيني كيف نفصل وعلا صوته شن اللي اتقوولي فييييه 😡
مصطفى:خشوو دااخل كلكم توااا
سميرة: ماحدش حيخش وكل شي بينعرف توا ياسر مصطفى وخلي حتى البنات يعرفو
امال تبكي :تعالي ياا عائشة قعمزي هني تعالي
ومشت عائشة قعمزت علي الكرسي وبدت تحكي
كان ديل منهم واقف ف الظل وديل ف الشمس وماحدش حااس حاجة كلهم يبو يفهمو شن اللي صاير بس
فهد مش مستوعب يبي ياخد امه ويطلع بس
عائشة تشبح لوطة وبدت تحكي
عائشة:كنت حامل ليا اسبوعين بس طحت من علي السلوم وجاني نزيف طلع مصطفى بيجيب سيارة باش يرفعني للمستشفى حت بنت عمه وقالتله جيب الداية جارتكم مشي مصطفى جابها وجي ولما خشت الداية عطوني حاجة رقدت بيهاا شوية ونضت نسمع فيهم يقولو العيل مات ويعقوب بو مصطفى كان صوته عالي ويعيط هوا وخالي يتعاركو لان العيل اللي يسخابوه طاح كانو في تلاتة قبله طايحين والسيد يعقوب سماني خلفت موت المهم شوية وجي مصطفى وطلقني بثلاثة تنفيد لي اوامر بوه وصدق اني رميت جي بعدها خالي وطلعني من الحوش للمستشفى طول وغادي عرفتا ان العيل قاعد وماماتش ووقتها خالي حلف بي اليمين الطلاق واقسم ان مستحيل يخلي مصطفى يشوف ولده مع ان الطلقة مامشتش فيا لاني حامل زور خالي ورق طلاقي ان ليهم تلاتة شهور وناسنا ماكانوش ساكنين جنبنا مايعرفو علينا شي مشي قااللهم ان اني اطلقت من تلاتة شهور وتوا بيزوجني لي محمد ولده وطبعا محمد ماقال شي ويبي رضي بوه بس وخوه التاني محسن كان صغير مايفهم في شي انكتب كتابي علي محمد ولد خالي بعد اسبوعين من طلاقي بورق كله مزور من خالي لان كان ماسك السجل المدني وعنده هلبا واسطات اتزوحت محمد ع الورق وعشت معاه سنتين وخمسة شهور وتوفى بي حادث وقعدت انربي في ولدي بروحي سميته فهد باش يكون زي الفهد ويحميني من كل شي ويكون راجل وقد كلانه وفعلا طلع هكي وزي مانبي واحسن
فهد جي طبس علي امه وقعمز قدامها وباسلها ايدها :قولي انك تكدبي قولي ان اللي تحكي فيه مصاارش قوليلي انت مش ولدي واني متبنيااتك لاكن الكلام اللي اتقولي فيه كبير ومايتصدقكش
عائشة تبكي وتنهف :الكلام اللي حكيته صار وعشته اني يا ولدي من اول ماجتنا عهد للحوش واني اتراجي شن بنقولك ف اليوم هدا واني ما اصريتش علي قعاادها الا لاني نبي يجي اليوم هدا وتعرف فيه انت كل شي
فهد ناض عيط بصوت عالي :لاااا لااا مش مصدقك لني ولد محمد بلقاااسم تسمعي فياااا والكلام اللي قلتيه كله كددب كييف هكي كيف يعني تبي تفهميني ان بوي مش بوي واني مسجل علي اسم راجل تاني مثلاا وضحك بهزوة ويطلع خال عهد بوي اني وانتي داسة عليا انتي وجدي
عائشة هزت رااسها: اي يا ولدي اي 😭
فهد مسح علي رااسه وقعد يدوور ف الجنان :انتي عاارفة ان لو الكلام هداا صح شن بييصيير عاارفة ان الناس تعرفيني فهد محمد كيف انقوللهم هدا مش اسمي كيييييف كيييف ولا انجيبك انتي تحكيلهم القصة هااادي 😡
مصطفى قعمز لوطة وشاد رااسه
ايات :اني اني رااسي يوجع فياا مش فااهمة شي بابا شن اتقوللل هادي كيف انت كنت متزووج فهمني
ابرار:شن الفيلم الهندي هداا تسحاب اللي يجي يقول كلمتين انصدقووه اشرحوولنا شن فيي تواا يجي حد يدوي
عهد تشبح لي فهد ومصدوومة صدمة عمرها في ثوااني الدنيا خشت بعضها في ثواني تكتشف ان الولد اللي عاشت معاه وحباته يطلع ولد خالها
عهد جت لي عائشة: كيف كنتي عارفة هدا كله وسااكتة كييف 😢 كيف يهون عليك ولدك!!؟ ولدك فهد اللي مايرضاش فيك حتى نفخة الهوا
عائشة تبكي:مش بي ايدي مش اني مانقدرش نعصي كلام خالي
فهد مشي جيهت الباب وركب ف سيارته
عهد طلعت طوول وراه :فهد !!؟ فهدد وجت بتفتح باب السيارة فهد ولع وطلع
عهد حطت ايدها علي رااسها :يااربي 😭
عائشة ناضت تجري :اللحق ولدك ياا مصطفى كان تبي اترده ليك بعد هل سنين الحقققه تربح 😭
مصطفى كأنه كان غارق في بير ومش فاهم شي طلع يجري ومشي ورا فهد
وعد :عهد مني هداا ومنين عرفتييه وكيف هكي وين يزن احكييلنا ماتقعدييش سااكتة بالله عليك
عهد حضنت وعد وهي تبكي
وعد صكرت الباب متع الشارع وخرت بيها :تعالي قعمزي هني تعالي وقعمزتها علي درجات فم الباب
امال:بنتي بالله عليك احكيلي شن صاير معاك ماتحرقيش قلبي عليك 😢
عهد تتكلم وتبكي بحرقة :اني اتزوجت وااحد حيوان ياا ماما ماكانش بني ادم 😭
وعد:تكلمي ما تنشفيش دمناا 🥺
عهد: طلع واحد مثلي ومش مسلم يحبس فيا ف الدار ويجيب في جماعته ف الحوووش واني انموت كل يوم الف مووتة كنت شبه مخطووفة عنده انكلم فيكم وانشد في عبرتي وبكيتي بسيف وحتى لما قتلكم معش نقدر انكلمك لان بنطلعو من الحوش كنت نكدب هوا بعدها كسرلي تليفوني باش مانحكيلكم شي 😭😭
امال تخبط علي فخادها :وووه علياا لووحت بنتي ف الناار بي ايدي ياا حليلي عليي بنييتي مااشافت
وعد:مااما خلاص اهيا هي جنبك توا مش حينفع اللي اديري فيه خلااص تو تمرضي
عهد حضنت امها وتبكي هي ويااهاا
عائشة :نووضي بلبنت يا امال نوضي
عهد ناضت :خالتي عيشة فهد طلع خايفة اتصيرله حاجة الكلام اللي قلتيه كبيير هلبااا محدش يقدر يتقبله اتصرفي كلمييله حدد وين جده
عائشة:كلميله مقدام هوا بس اللي يسمع منه كلميه 😭
عهد تلفتت لي اياات:هاتي تليفونك بسرعة
ايات:مقدام متاعي اني قصدك😳
عهد:بسرعة اياات تربحي
ايات فتحت تليفونها وعطتهولها وهي مصدموومة قلبها بيوقق
ايات:شن اللي صاير نبي نفهم اتقول يوم القيامة 😟
عهد اتصلت بي مقدام نادا شوية ورد
مقدام:ايواا
عهد تبكي :: مقدام اني عههد
مقدام كان يسووق درس :عهددد!! خيرك شن فيي
عهد:فهد طلع وهوا متعفلق صاااروو هلباا حاجات مانقدرش نحكيلك ف التليفوون براا دووره مقدام بالله عليك متخليشي خايفة تصيرله حاجة 😭
مقدام استاكة :شن شن صاار باهي ووين طلع
عهد:طلع بسيارة يجري هلبا انت تعرفه وين يمشي ديمة دووره مقداام ومتخلليشي بروحه حتى كان هواا قالك 😭
مقدام:تماام تماام صكري
صكر الخط وطلع يجري بسيارة ويفكر وين ممكن يلقاه
_______
سميرة :خشو تواا دااخل وبيتحكو كل شي بتفصيلل بناتي من حقهم يعرفو شن اللي كان يقول فيه بوهم وخلو عهد تحكي شن صار معاها
عهد شدت عائشة :خشي عاالي
خشو كلهم واسلام شادة في امها وخايفة
قعمزت عائشة علي الكريسي ووعد مشت جابتلها امية
سميرة :وتواا احكي كل شي بتفصيل
عائشة شبحت لوطة وبدت تحكي من اول ماتعرفت علي مصطفى وقداش صارت عركة ومشكلة باش خداها بسبب الخلافات اللي كانت بين يعقوب وبلقاسم وعائشة كانت متربية عند خالها لان اماليها متوفين وهي صغيرة واستمرت تحكي لين وصلت في الي سمعوه منها قدام الباب
ابرار:قصدك بابا مسمي عائشة اختي علي هادي
سميرة فنصت فيها:ابرررررارر
ابرار سكتت
عائشة:عهد بنتي شوفي شن صار في مقدام ولا انتو كلمو مصطفى تربحو ولدي ماعنديش غيره
ايات:اني مش مصدقة ان عندي خوو لا واللي خطبني صاحبه هلباا تي هادي حتى فلمسلسلات ماصارتش
عهد خدت تليفون ايات تاني وكلمت مقدام ماردش عليها عاودت تاني برضو ماردش
عهد:ميردش انشاء الله خير
وعد:تواا بتحكي انتي شن صاار
عهد تنهدت:زي ماقتلكم طلع شااذ الحقير يجيب في رجالة للحوش زيه خامرين واني نقعد ف الدار ناكل في روحي لين جي يوم وهربت منه قعدت اندور ف الشارع زي الكلبة ليلة كاملة وبعدها تعرفت علي بنت من سوريا وهي اللي وصلتني في شخص ليبي تعرفه اسمه علي وعلي هدا صاحب فهد ولد خالني عيشة رفعني انهدرز عليهم وخالتي غيشة حلفت ان مانطلعش من عندها لين نلقى امي وطبعا الطامة ان وراقيا وكل شي عند يزن الحقير وجواز سفري كان طاايح يعني قعد متشردة لين علي روح هني ودبرلي في واحد عنده واسطات دارولي اجراءات ان جواز السفر نتاعي ضايع وطلعولي واحد جديد
وعد:تي توا من فترة انكلم فيك وصوته هوا جنبك كيف هكي
ايات:ومش قتيلي مقدام صاحب يزن
عهد هزت راسها:كنت نكدب باش ماتسحنوش روحكم عليا وكنت خايفة علي ماما ومابيتش نحكيلكم لين انطلع جواز سفر وفهد ومقدام وخالتي عيشة ماخلونيش بكل كانو عارفين قصتي كلها كانو اكتر من عيلتي وفهد ومقدام وحتى علي مانقصو عليا شي ومصروفي كل اسبوع في ايدي باش ما نطلبش منهم وفهد يجيبلي في كل شي منغير مانطلب منه جديات كانو ناس مستحيل تكرر في حياتي
امال تبكي :والله ماني ساكتة عليه المووضع وراضية وخدوجة امه والله ماني سااكتتلهم وغدوا بنكوون عندهم
عهد:مش نااقصين مشااكل علي ما اعتقد فوتيهم
امال والله وراسك انتي واختك ماني ساكتة
___________
فهد كان يشوق بسرعة جنوونية وكلام امه يتعااود في رااسه مش قادر يسكته بدي يعيط ويخبط علي الدوماان مش اميييي اللي تكدب امي مااعمرهاا كدبت عليااا مسحيلل يصير فياا هكي مستحيللللل
مصطفى يغيرله ف الضي فهد زاد ف السرعة لين وصل قدام الورشة ودرس لقها مصكرة مشي للمكان المعتااد وطلع مقتاح الاحتياط وفتح الباب وخش
درس مصطفى وراه ونزل
فهد:متخشش رد باللك تحااول تدوي معاااااي 😡
مصطفى:انت تواا مفرووض تحط ايدك في ايدي وتووقف معااي ضد اللي اسمه بلقااسم اللي لعب ف حيااتنا وكأنه ماليناش الحق نقررو علي نفسنا لعب بيك انت وكأنك لعبة في ايده سجلك بي اسم ولده وخلاك تعييش اللي صار تواا
قولي تواا كيف بنردك علي اسمي كيف بنتصرفو كيف بنقول للناس عندي ولد انت كيف بتتزوج واتجيب صغار وبتسجلهم بي اسم ناس تانية ترضى يصير معاك اللي صار معاي ااه ؟؟
فهد:اسسسكتت اسسسكت جدي اشرف منك مستخيل يدير اللي تحكي فيه انت امي ماكانش عارفة شن اتقول تي لعب فروخ هدا 😡
مصطفى:تماام الكلام كله كدب ومافيش شي صح من اللي قالاته وحتى اني نبي نتأكد نمشو توا للمستشفى وانديرو تحليل DNA وبعدين انت قرر
فهد:لااااا لاا اني ولد محمد بلقاااسم تسمع فياا مستحيل امي تلعب بياا مستحيللل
مصطفى:لعبت بيييك بياااا للاسف لعبوو بينااا الزوز عي وخاالها وفرقوووك عليا خلوني عااايش علي ان اني ماعنديش ولد خلوك بعيد علي خووتك وكله من بلقاااسم هوا السبب هوااا ومش حنساامحه وحيجي يوم وانحااسبه علي اللي دااره
فهد:اني توااا طاالع ومااشي لي حوش جدي وحنسأله وهوا الوحيد اللي مش حيكدب علياا وقتها يصير كلام تاني وحتشوف بعينك الحسااب الصح
مصطفى :جدك في بلادهم
فهد سكت وطلع
درس مقدام قدام الورشة ونزل
فهد بيركب في سيارته
مقدام:فههد استنى شن في يااراجل كلمتني عهد تبكي قتلي الحقه
فهد ركب ف السيارة وماردش عليه وطلع بسرعة جنونية
مصطفى لما شاف مقدام استغرب لاكن توقع انه صاحبه :براا ورااه اني مايبينيش
مقدام: منيني يعرفك باش مايبيكش شن صاير
مصطفى :حتفهم كل شي بعدين برا وراه توا ماشي لي جده في ****
مقدام ركب ف سيارته ولحقه
_________
عهد ادوور في وسط الحوش وطلهم مقعمزين وسااكتين
عائشة :شن صار زعمة قلبي علي نار
عهد:مفرووض حكيتيله كل شي مفروض من زمان فهد يعرف مش اليوم لما خشينا وطلعتي فجأءة تعرفي خالي الموقف صعب عليه
عائشة :عطيني تليفوني من شنطتي يا عهد لازم انكلم خالي
خش مصطفى مشتله عهد تجري :شن صار يا خالي فهد وين
مصطفى:مش مصدق اللي سمعه ومايبسش يسمع مني شي
عائشة وين مشي
مصطفى:مشي لي جده
عهد:خلي انقول لي مقدام يلحقه كلميه يا ايات
ايات تحشمت من بوها وعطت التليفون لي عهد
مصطفى:مشي وراه مقدام
عائشة غمضت عيونها وتدعي لي ربي ان ولدها ميصيرله شي
مصطفى:اي من بيشرحلي كيف عهد تلاقت مع عائشة
عهد تنهدت :خلي مرت خالي هي اللي تشرحلك خير
سميرة:بعدين خلي توا ينحل موضوعك اللي مزال ماحدش مستوعبه
مصطفى تلفت لي عائشة ويشبح لي ملامحها كيف غيرهم الوقت
مصطفى: كيف زروهم الورق كيف صدقة الناس اللي مانو يشبحو فينا ساكنين مع بعض ان ليك شهور مطلقة
عائشة: بعد مانكتب كتابي علي محمد سافرنا لي تونس وقعدت غادي لين ولدي ولا عمره سنة بعدين جينا هني وسكنت في حوش اماليا الاول
مصطفى :ما أنبكش ضميرك ماقلتيش ولدي لازم يعرف ماقلتيش لازم انكلم مصطفى
عائشة:انت عارف البير وغطاه وعارف ماعنديش غير خالي وقالي كان يسمع مصطفى اني برئ منك وهوا بمثابت بوي مانقدرش نعصيه زي ما انت ماقدرتش تعصي بوك وطلقتني
مصطفى :تواا فهمييني شن بنقول للناس كيف بنقوللهم طلع عندي ولد فجأءة كيف بنرد ولدي علي اسمي كيف بنتصرف
عائشة:كلامك مع خالي مش معاي اني عبد مأمور نبي ولدي يكون جنبي بس
مصطفى مشي طلع من الحوش
والكل ملامحهم كانت ماتتفسرش وعهد شادة التليفون وتتصل بي مقدام معش رد عليها وبعدين عطاها خارج التغطية
ايات عهد تعالي اركبي حطي حوايجك فوق ف الدار وغيري حوايجك
عهد:لا لا خلووني مش حنرتاح لين نتطمن علي فهد
ابرار نخصت وعد :شني لين تطمن علي فهد خاطبها ولا شنو
وعد:ارحميينا بسكوتك ابرار اسس 😠
________
فاتت ساعة ونص درس فهد قدام حوش جده
مقدام نزل يجري وشده :قصدي فجرتك لا هني والمشكلة سيارت خوي طوبو قريب قلبتها فجرتك قوولي شن في
فهد:حوول مقدام مش وقتك
مقدام:والله ماني مسيبك لين نعرف خيرك
فهد غمض عيونه وتنهد :بااااهي خش معااي واسكت
مقدام :وين بنخش معاك جدك عنده مراا
فهد نشي وقف قدام الباب وطقطق شوية وفتحت مرت جده
خديجة:اهلين فهد الحمد الله علي السلامة امتى جيتو
فهد :معاي صاحبي كلمي جدي ايجيني ف المربوعة
خديجة :حاضر مشت خشت داخل وفهد ومقدام خشو للمربوعة
خش بلقاسم :السلاااام عليكم اهلا اهلا اهلا بحفييدي تي امتى جيتو خيرا مانندريش وجي حضنه
فهد سلم عليه وخلا روحه عادي وقعمز :هادي وصلتنا جيتك طول
سلم بلقاسم علي مقدام وقعمز مقابلهم :وصلتو اليوم وجيت طوول منغير امك اووه وينها
فهد:جاي علي خاطر موضوع كبير هلباا واني مش مصدقة ونبي نسمع الكلام المزبوط منك انت
بلقاسم عرف طول :ااامم وشن هوا المووضع
فهد: طبعا في المانيا كانت معانا بنت اسمها عهد وو
بلقاسم:امك حكتلي كل شي
فهد:شنيي؟؟ حكتلك علي عهد
بلقاسم:وصلتوها اليوم واكيد مصطفى تواجه هوا وامك ولا ؟؟
فهد ناض وقف ويتكلم وعروقه بارزات:يعني الموضوع صااااح
بلقاسم:قعمز وتكلم بشوية تو نحكيلك كل شي
فهد::مااااانييش تحكيلي شي ياااسر اللي سمعته من اميييي قولي اني حفييدك ولا لااا 😡
بلقاسم حط راسه لوطة وسكت
فهد مسح علي رااسه :جدي تكلم متتتهبلننيش تكلم
مقدام حال فمه وخلاص
بلقاسم :مش حفيدي
فهد الكلمة بدت تتعاود في راسه زي السارينة
مقدام وقف
بلقاسم :قعمز يا ولدي نحكيلك متخافش حقك محفوض اني مداير حسااب اليوم هدا ولما كلمتني امك قدمت الورقة ف
فهد :اسسسكت اسسسكت انت وامي لعبوو بيااا ضحكتوو علياا ربييتوني علي كدبة والناس كلها مصدقتها كيف اني انعيش عمري كله علي اني فهد محمد وصحاابي وناااسي هكي يعرفوني انجييهم في يوم وليلة انقوللهم لاا اني بوي اسمه مصطفى مش محمد ولا كييف تي تي انتووو دمررتووووني دمررتووووني
بلقاسم :اهدا فهد وخلليني نعرف نتكمل مش همي ياراجل
فهد ضحك بهزو:تي انتو خليتو فياا اهداا تي انتوو شن خلييتو فيها اصلاا تعرف شني اننسوو ان اني موجود وريحو روحكم لا نبي انكون ولد محمد ولا ولد مصطفى تمام هكي ومشي طلع
بلقاسم ::فهد فهدد يا وليد تعالي
فهد طلع وركب ف السيارة
مقدام :خليك اني معااه ومشي طلع يجري ورااه
طبعا فهد يسوق بسرعة جنوونية ومتهستر مش عارف يبكي ولا يعيط ولا يقلب السيارة ويرتااح قعد يجري وخلاص ومقدام ورااه
________
سميرة تعالي بنتي اركبي حطي حواايجك ف الدار خودي سرير اسلام وارقدي انتي وياها زي قبل هي تعالي دوشي وغيري حوايجك وارتاحي
عهد هزت راسها :وين شنطي
وعد:اركبي تو انجيبها
عائشة:عهد
عهد تلفتت :نعم
عائشة :نحس في روحي بنموت حتى ايديا ينمولو عطيني حبتي مخديتش شي اليوم
عهد:ايي ساامحيني نسيتك
امال:نوضي يا عيشة خشي لي دااري نوضي
عائشة:لا لا خليني هني اصلا بنطلع ناخد تاكسي يحطني ف الحوش
عهد :شن الكلام هداا والله نحرج منك اني لولاك انتي راهو متت ف الشارع اني مش حنرضي انك تطلعي من هني لين يجي فهد وياخدك
عائشة تبكي
امال: نوضي سلم وخيتي نووضي
نوضتها امال دخلتها لي دارها وعطتها عهد دوااها وطلعت عهد مشت ركبت للدار فتحت شنطتها وغيرت حوايجها
ومعاها وعد وايات وابرار
ابرار قعمزت ع السرير:عهد قداش ليك معاهم هادو
عهد:قعدت مع يزن شهر واسبوع بس وبعدين هربت منه تعر
فت علي بنت اسمها جنات من سوريا قعدت عندها اسبوعين بعدين تعرفت علي علي وهوا اللي رفعني لي خالتي عيشة وفهد
ابرار ورتها التليفون :والصورة هادي
عهد:مش يزن اللي معاي 😒 واضحة يعني
ابرار:مني امالا
عهد:فهد
وعد: كلمتك مرا وخدي منك واحد كلمني من هوا فهد حتى هوا؟
عهد:مرا مقدام ومرا فهد كنت نكدب عليكم واني مغصوصة بنبكي لولة فهد ومقدام راهواني توا قاعدة علي دمت الواطي هداكا
ايات:كيف شن دلرو احكيلنا
عهد قعمزت علي السرير: رفعوني معاهم ومشو لي حوش يزن واني قعدت برا قالولي مستخيل انخليك تخشي وو...حكتلهم شن صار
وعد:قصدك كان فهد ملقاش الورقة متع عقد الزواج راهو انحبسو علي خاطرك
عهد:اي تي اللي داروه معاي هما ماداراش حد علي خاطري مقدام كان يعامل فيا كأني وحدة من خواته وديمة يدافع عليا لاكن علاقتي بي فهد كانت غير مقدام كنت نحس فيه خوي هوا وعلي لاكن فهد عمري ماحسيته زي خوي ديمة في شعور غريب في قلبي تجاهه جديات راجل بمعنى الكلمة خاف عليا من روحه قبل اي حد
ايات:زعمة حق يطلع خونا ولا في غلط فلموضوع 🙄
ابرار:خوو عينه بالك عابي بيجي يخش فياا
عهد:وشن خلا ربي معطااك كان فهد خووك ردي بالك تغلطي في كلمة حتلقيني قدامك ابرار
ابرار شقلبت عيونها وطلعت
ايات:نتمنى اني نتمنى ان يكون عندي خووه حلم حياتي
وعد:بصراحة اللي صار عقلي مش مستوعبه
عهد:شن اتقولي عليا امالا لا اخر لحظة ف السيارة قبل ماننزل كنا نضحكو ف السيارة وجونا حلو لاكن فجأة انقلبت الدنيا
وعد يتصل بيها ركان ناضت وردت
وعد :ايوا
ركان:ديداا شن الجو
وعد :تمام شن جوك انت
ركان:تعرفي عيوني وحدة تقلي وحدة اتصب ف الزيت
وعد ضحكت:علاش اللطف
ركان :قدامي ورق لا يوم الورق كلهم يبو فرز وتوقيع وبوي تعارك معاي قالي والله ماك طالع لين اديرهم
وعد :ربي يعاونك
ركان:شن اديري
وعد :عايشة في فيلم اكشن
ركان :خيرك شن في
وعد:عهد روحت
ركان:اااه يعني خلاص عرفتو شن صاير معاها واخيرا
وعد:لحظة بس منين تعرف انت
ركان:مقدام حاكيلي
وعد:وخيرك ماقلتليش
ركان:شن اللي يجي انعاوده موضوع بيني وبين ولد عمي واختك ماتبيش من يعرف تبي لين توصل فيكم وهي تحكي
وعد:اممم هكي صار
ركان:اي هكي امالا شني
وعد:سلمه يوخيتي يدس فالاسرار
ركان :تتسهوكي
وعد:انبصر خيرك
ركان :توا يا حمارة تشبحيني قدام الباب اتقوليلي شن جاي تبي
وعد:خفت خالي يشوفك
ركان:وكان شافني يعني
وعد:والله مصحك شن بيقول كان شافك واقف تكلم فيا اصدقاء مثلا ماهو بيفكر غلط
ركان:باهي ماهو اني نبيه يفكر غلط
وعد:ااممم وانت تمشي تروح واني ناكلها ولا
ركان:تو انتي اتقولي هكي معقولة انخليك اني تي عيب راه
وعد:باهي اني بنمشي توا عهد تبيني
ركان :باهي بري لي اختك تو بعدين انكلمك
وعد:باي
________
فهد يجري بسيارة وسرحان وخش في طريق ترفع وتجييب جت قدامه سياارة تمشي بشوية اجتازها وطلع بسرعة في الطريق اللي تجيب جت قداامه سيارة معش عرف يتصرف فقد تواازنه وخش علي طريق الجنبية كانت تراااب
وكانت عنده سرعة زايدة فا انقلبت بيه السيارة قلبتين 💔
مقدام يسوق وراه وشاف كل شي قدامه
مقدام:لاااا لاااااا فهههد وطلق الدومان وحط ايديه علي راسه
بدي يغير ف الضي للسياارات بطؤ السرعة كلهم درس مقدام ونزل يجري ومعاه رجاالة
مقدام يجري زي المهبوول :دفووو بسرررعة دفووو السيااارة اقلبووها
بدو اللي يشوف الحادث يدرس وينزل
وقعدو يعاافرو ف السيارة بين قلبووها
مقدام :فههد فهد 😥 وقعد يدف ف الباب بكل قوته لين فتحه
راجل:لا لا رد بالك متمسااش مرات تسببله في اعااقة واضح انه مضرر
فهد كان وجه كله مغطي بدم ميبانش مته شي ورجليه نازلة عليهم الفودرة وحاصلات
مقدام ايديه يرعشو وخر وحط ايده علي رااسه :ياربي لاا مش فهد لاااا😣
واحد من الرجالة اللي واقفين اتصل بلأسعاف :اهوو كلمت الاسعاف
مقدام قرب من فهد بشوية وحط ايده تحت رقبته يشوف فيه حي ولا لا لقي فيه نبض لاكن ضعييف هلبا
طبس قداامه والقوة اللي كانت فيه كلها اختفت
مقدام:رد بالك يااا صاحبي متخليينيش متخلليش خوك برووحه عاارفك قوي وقدها وتصكر في راسك سكر راسك تواا واقعد وحل مشااكلك كلها 😞
_____________
عائشة مقعمزة علي السرير ومتكية فجأءة ناضت وقفت :ياا حليلي قلبي خلااص بيووقف ولدي اكيد طرتله عملاا يااربي استر يااربي وفتحت الباب وطلعت :ياا عهههد ياا عههد
عهد: نزلت تجري نعم خيرك فيك حاجة
عائشة:اتصلي بي مقدام ياا بنتي قلبي ناار مش متطمنة فهد اكيد فيه حااجة
عهد:بعيد السو مع اتقولي هكي مقدام خارج التغطية ميردش بنصبرو لين يخش مكان فيه تغطية
عائشة:اتصلي بي بلقااسم جيبي مباايلي اكيد وصل فيه وفهم كل شي لاني حااكيتله عليك وعارفك بنت امال
عهد خش لي دار امها طلعت تليفون عائشة من شنطتها وركبتلها شفرتها وعطتهولها
عائشة طلعت رقم بلقاسم واتصلت بيه
بلقاسم:ايوا
عائشة:ها يا خالي وصل فيك فهد
بلقاسم: وصل وطلع زس الهبول يعيط ماباش يسمع مني شيي لحقه صااحبه ولد المصراتي هدا
عائشة:اي مقدام اي
بلقاسم: حاولي تخليه يفهم منك اني مجهز كل شي متخافيش مافي شي متعرقل
عائشة:انشاء الله خير يا خالي ربي يستر
صكرت عائشة الخط وهي تزربز :وين مرت خالك يا عهد كلميهالي
عهد:خيرها شن تبيها
عائشة :غير كلميها بس
عهد :قعدت ادور ف الديار وهي مش زابطة الحوش لين لقت دار سميرة
عهد:مرت خالي تبيك خالتي عيشة
سميرة:خيرها
عهد:ماقالتليش
سميرة طلعت ومشت لي عائشة
عائشة:بالله عليك الله يربحك كلمي مصطفى يشووفلي ولدي وين قلبي ناار عليه بننموتت
سميرة سخفتها عائشة:باهي باهي خير اهدي بس وقعمزي
عائشة:لا خلووني اني نبي نشبح ولدي بس نبي يسامحني 😢
سميرة فتحت باب الحوش ملقت حد اتصلت بي مصطفى رد :ايواا
سميرة:وين انت
مصطفى :شن تبي
سميرة:عائشة تبيك اتشوق ولدك وين مشي المرا مسكينة تبكي ف حاالة
مصطفى:باهي باهي صكري
سميرة صكرت الباب وخشت :اهو كلمته وقالي باهي ماشي بنشوفه
عائشة:تبكي :يااربي احفظلي ولدي يااربي مااعنديش غيره يااربي😭
عهد وجعتها عائشة وجت حضنتها
_________
فات الوقت وجت الساعة 5:30
جو حوش باسط ويسألو ويقصقصو علي كل شي
عهد ماتبيش تقعد جنبهم سلمت ومشت قعمزت تراجس في خبر علي فهد
شرين تليفون عائشة:خداته عهد تجري وردت
عهد:الو
مقدام خاالتي عيشة
عهد:اني عهد مقدام تلكم راهو دمنا نشف ادوي تربح
مقدام :فهد داار حادث يا عهد وحالته خطيرة مش حنكدب عليك شدي روحك وجيبي خالتي عيشة
عهد حست الدنيا لعبت بيهاا :دا دار حادث وين وكيف وشن وضعه توا ادووي بنموت اني عرووقي جفوو
مقدام:انتو تعالو تواا بس بعدين ساهل بعتلكم ركاان اهونا جاايكم
عهد: باهي باهي ومشت تجري ركبت للبنات خدت منهم عباية ودمووعها زي النهر
ماجفووش بكل
وعد وراها :خيرك شن في
عهد:فهد داار حادق كلمني مقدام تواا حاايني ولد عمه اسمع راكان قالي بيرفعكم
وعد حطت ايدها علي فمها وسكتت
عهد :هيا خالتي عيشة جاي ركان ولد عم مقدام بيرفعنا
عائشى :وين بنمشو
عهد:مقدام قالي بعتلكم ركان برو معاه وخلاص ماقالش وين
عائشة: اني قلبي مش متطمن انحش ان ولدي فيه حاجبة
عهد تبكي :لا لا ماافيشي شي متخاافيش تعالي معاي بس
امال جتها :وينن انتي خيرك لا بسة عبااية
عهد :معش تسألوني معش تسألووني 😭😭
عائشة مرت عمها وبنات عمها كلهم مصدومين وساكتين
امال:خيرك يا بنت اللطف قولي شن فيي
عهد :مافي شي فهد يبي يكلمنا اني وخالتي عيشة وجاي ركان ولد عم مقدام بيرفهنا
امال:كيف بتركبي مع راجل ماتع فيشي قعمزي توخالك يعارك وبعدين انتي مش اطلقتي مفروض ف عدة
عهد:لااا عدة لا سووو ماما مافيش حد واني ماشية لي فهد تواا بنركب حتى مع جن المهم بنمشي محدش دخله فياا
عائشة:قوليلي يا عهد شن قالك مقدام ماا ادسييش عليات قولي فهد صارتله حاجة
عهد تبكي : اطلعي هوا اللي قال جيبوهم تعالي بس
شرين تليفون عائشة في ايد عهد:ايواا
مقدام:اطلعو ولد عمي قدام الباب
عهد طلعت هي وعائشة مع ركام رفعهم للمستشفى
عائشة الطريق كلها تسأل وعهد منهارة بلبكي مش قادرة اتقول شي ركان يهدي في عائشة ويطمن فيها وبس
شوية ووصلو للعيادة متع امالي مقدام وركان
لقو مقدام قدام غرفة العمليات
عهد جت تجري :قولي شن فيه يا مقدام ماتكدبش عليا
مقدام جي طول حظن عائشة وشاد دموعه بسيف
عائشة:ولديي ولدييي 😭 اني السبب اني 😭 يااربي خود اللي باقي من عمري واعطيه لي ولدي ياربي
جي مصطفى:مقدامم كيف صار الحاادث قولي
مقدام:خش ف طريق المعاكس انقلبت بيه السيارة مرتين
عائشة قعمزت علي الكرسي وشادة قلبها
عهد طبست عليهاا :خاللتي عيشة شدي رووحك وتحملي علي خااطر فهد خاالتي عييشة تسمعي فيااا
ركان نادا علي الممرضة جت رفعت عائشة لي غرفة تانية
مصطفى واقف قدام الباب وخاط ايده علي رااسه
عهد قعمزت علي الكرسي وتبكي
دوورة طلع ممرض يجري من غرفة العملياات دوورو علي دم AB بسرعة لازمه دم بسرعة
ركان :ماافيش ف العياادة ولا شني
الممرض :الفاصيلة هادي ناادرة هلباا
مصطفى:ااني اني خوودوو مني اني
الممرض :ممنوع كبار السن ياا حاج لاكن هش دير تحليلاات
مصطفى:ايات بنتي زيني براا جيبها انت واشر علي مقدام
مقدام من دون ميفكر طلع يجري
وركان مشي يدور حت هوا ويتصل بي جماعته
خش مصطفى يدير في تحليلات
وركان طلع بسيارة واتصل بي ايات طول
ايات: ايواا
مقدام :ايات وتي روحك شوية وانكون عندم اطلعي طول
ايات:شن اطلعي وين بنمشي خيرك
مقدام:فصيلت دمك AB ولااا؟؟
ايات: اي علاش
مقدام:بووك بعتني قالي برا جيبها فهد يبي دم مافيش الا انتي بسرعة بالله عليك
ايات قعدت سااكتة ومقدام صكر الخطر وممكن حوالي عشرة دقايق كان قدام حوش مصطفى
وعد: خلي تليفونك في ايدك ونتصل بيك ردي
ابرار:خزي الدقن هادي ماشية طوول تعطي في الدم ماصدقت قالو خوها
سميرة:ابرار ضمييي فممك بري بنتي بسرعة بريي كله بأجره
اسلام :حتى اني بنعطي دم الولد حلوو
وعد: انتي تعالي هني مش وقتتك
طلعت ايات وركبت مع مقدام وهوا بدون ولا كلمة طلع طول
ايات:حالته خطيرة قصدك
مقدام:لوشفتي سيارته كيف شكلها ماتقوليش طلع منها حد
ايات: ربي يشبح فيه
مقدام:طبعا تبي تصدقي ولا لا وحتى اني مش مستووعب لااكن فهد خووك اعطيه دمك وانتي راضية علي الشي هدا متحسييش روحك مجبوورة
ايات :اكيد لا حتى لو كان مش خوي كنت حنعطيه
مقدام:: كوويس انشااء الله نلحقووبس
_____
فااتت ربع ساعة جت الممرضة شادة التحليلات
الممرضة:مصطفى يعقوب
مصطفى :نعم
الممرضة :للاسف سكرك مرتفع ماتقدرش تتبرع
مصطفى : وايات
الممرضة :ايات يعقووب تفضلي معاي تحليلاتك نضيفة
ركان :عمي تعالا معاي ينزلوولك سكرك
مصطفى:لا لا مش توا
ركان لا والله مااصايرة وقعد يجبد فيه
خشت ايات ومقدام معاها
وعهد واقفة قدام باب العمليات وتبكي
___ ____
قعمزت ايات علي الكرسي وجت الممرضة حطتلها اليبرة في ورديها وعلقتلها شكارة الدم
ايات غمضت عيونها بخوف
جي مقدام قعمز جنبها وشدلها ايدهاا
ايات شبحتله
مقدام:متخافيش شوية وتكمل
ايات هزت راسها وقنطتله علي ايده
خدو منها كييستين وطلعوها وطبعا لازم من الدوخة وهكي ف قعدة ف الاسعافات شوية ومقدام ما سيبهاش بكل
__________
فاتت ساعة تامة
طلعت عائشة من حجرتها وجتهم وهي حالتها حالة وتبكي وعهد احرف منها وايات تهدي فيهم الزوز
مصطفى حس روحه في نفس اليوم اللي لقي فيه ولده بيفقده تاني يزربز ماقعمزش بكل ماشي جاي
مقدام واقف قدام باب العمليات وسرحان
شوية وانفتح الباب وطلع الدكتور
جو كلهم
الدكتور:اول شي الحمد الله علي سلامته ربي كتبله عمر جديد مش عارف كيف نجحت العملية مع ان نسبة نجااحها ضعيف الحادث خطير هلباا
مقدام:باهي تواا شن وضعه طمناا
الدكتور:عنده كسر في ايده جبسناه عادي ورجله تبي عملية تانية لازمها بلاتين وعنده كسر في الاضلع بس الحمد الله مش مخيف يعني بسيط
عائشة:يعني ولدي حي تواا نقدر انشوفه ويسمعني
الدكتور :مزال يا حاجة لما انحولوه علي غرفته تقدري اتشوفيه
__________
فات الوقت وجت الساعة سبعة
عهد :بالله عليك انشوفه شوية ونطلع
الممرضة :ممنوع يا اختي بالله عليك
جي مقدام:شني خشيتي
عهد:قتلي ممنوع 🥺
مقدام:تي شن هوا اللي ممنوع اعطيها لبسة التعقيم ودخليها
الممرضة :تمام حاضر 🙄
خشت عهد داخل ومشت قعمزت جنبه وباستله راسه ودموعها يقطرو عليه
عهد:بعيد السو عليك ياريت فيا ولا فيك 😢 وين فهد اللي حطني وراه وقالي متخافيش وينه اللي اليوم الصبح يفطر معاي ويبوسلي في ايديا وايقولي بلكتير اسبوعين وبنردك معااي وين 😭 نوض اني نبيك ماعنديش حد غيرك بيسندني تعوودت نلقى فيك جنبي واني نبيك وينك تواا نوض قولي اسكتي اني معاك متخافي من شي وماحدش يقدر يمسك وانتي جنبي نووض فهد نووض 😭😭
قعدة عهد متكية علي فهد وتبكي لين فجأة سمعت صوت دوشة براا ومرا تعيط ناضت وقفت حولت اللي لابساته متع التعقيم وطلعت
وكانت هني الصدمة لي عهد
عائشة حاضة فدوى وتبكي هي وياها
عهد:مقدام مني هاادي؟
مقدام :اااه ااء ه هادي فدوى 😐
عهد:😳
#يتبع💔
هيمو tk