وعصفت بنا الاقدار... البارت السابع عشر
للكاتبه زهراء ( روزايه)...
لا تحبونه لشكلنه رگزوا بينه ..
عدنه روح أطفال تلعب " تُكي "بـ أطراف المدينه
رگزوا بينه من گلبنه
من نسولف والحمام يحط علينه .
.....
عقيق.. مااحس غير بوسه رقيقه مثل
نسمه الهوه الدافيه انطبعت ع ركبتي
من يم اذاني حسيت كل جسمي
سرت بي كهرباء واهتزيت بشعور لا ارادي...
ابتعد عني واني مااكدر افتح عيني
مغمضه ووضعي موتمام نسيت الم گلبي
بس جسمي مكزبر وبروده بدمي
فتحت عيني ع كيف كاعد بصفي
ويباوع لوجهي واصبعه ع وريدي
يقيس النبض..
حجه وهو مدنگ هااا شلون صرتي ؟!
عقيق.. هزيت راسي زينه..
السبع.. ليش اختنكتي خاف مااخذتي
دواج
عقيق.. اخذته بس احجي ومااكدر اباوعله
السبع.. تكدرين تكومين تغسلين
حته ترتاحين وتعالي يمي صيري
احسن ورجعي نامي..
عقيق.. كمت للحمام غسلت خدودي
حمر تغيرت دكات كلبي من الالم
مااعرف افسر شعوري..
حجيت ويه نفسي اني شلون سمحت
اله وهو موكال اني احميج وكلنه عدنه
اخوات ؟!
هو ابد مابدر منه لانظره ولاشي
شلون هيج يبوسني بجرئه وحته
مااعتذرلي..
طلعت من الحمام كاعد ع فراشه ومدد رجليه
ويگلب بتليفونه كعدت بصفه بعدني
تعبانه بس احسن من قبل..
السبع.. ها شلونج
.. زينه
... باجر احجزلج انراجع شنهي عصت حالتج
ع الاطباء
... من جان بابا شكد راجع بيه وماكو نتيجه
.. الطبيب السابق كال ولادي عندج
وهذا تعب گلبج من الادويه..
انتي عندج مشكله بالنمو عمرج
حسب المستمسكات بعدلج شهر وتفوتين
ب١٨ سنه بس هسه اليقدرج ١٤ سنه
عقيق.. اااي هو قبل الطبيب كال لبابا
راجع بيهه طبيب نمو وتغذيه بس
ماعنده وكال انعالج كلبج وبعدين النمو
السبع.. انتي طولج هاهي مناسب
هوايه بنات قصيرات موشرط طويله
بس ضعيفه حيل ونمو باعضائج ماكو..
عقيق.. انت جاي تدفع فلوس منك شنو ذنبك
اكتبهن عليه ومن ارجع لاهلي ارجعهن الك
السبع.. مااريد اسمع هالحجي انتي هسه
بأسمي وواجبي هذا..
عقيق.. اسالك سؤال؟
.. جواب
.. انت قبل هم عقدت ع ابرار تحميهه
هم هيج سويت وياهه مثل هسه
السبع.. ابرار ماعقدت عليهه مجرد كلام
وگفتهه الي انتي اول وحده اتجرأ اسوي
هيج وياهه لان بالحلال..
اعتبري ماصار شي من ضمن الاسعافات
حته يهدء گلبج..
عقيق.. اذا مالكيت اهلي شلون؟
السبع.. تظلين ع وضعج يمي وانصحج
اتقبلي الموضوع وانسي اهلج ..
لان هواي دورت وموصي هواي وماكو
هو عم واحد عندج وشايل وواحد معتقل
بتهمه ارهاب انتي هنا بامان..
عقيق.. سكتت وصار هدوء بس
سؤال وجواب رفعت راسي والتفتت
علي صارت عيني بعينه لحظات..
دكات كلبي منتظمه حيل وكأنهه
عزف موسيقي لاول مره اسمعهم
هلكد منتظمات..
يباوعلي وحجه والعيون ملتقيه
اول مره اشوف عيون صغار بس حلوات؟!
... ليش يعني بس العيون الكبار حلوه العيون
الصغار مالهم نصيب!؟
... من هاي اللحظه الهم نصيب!!
... انت ليش قليل الكلام؟!
... شنو احجي؟ اني ويه النسوان موصلح!!
.. ليش نسوان القصر كالو عنك ابو النسوان وتعربد
ببغداد.!!
.... لا وروح ابوي مااعرف بحياتي غير هذا السلاح
وثاري هذني يرادلهن كص اللسان .
.. انت صدك مثل اسمك لو بس حجي
... انتي شتشوفين؟!
.. انت غريب مااعرف افسر طبعك؟!
... لاتفسرين لان اتعبين
... انت شكد عمرك؟!
.. ضعف عمرج ؟!
.. انت صدك كلهه تخاف منك شو اني مااخاف؟!
.. منو كال كلهه تخاف منيلج هالحجي؟!
.. عدكم هوايه بنات بالقصر وكلهه تخاف منك ويكولون من يضرب يوجع اله يطلع دم..
.. شلج بهالسوالف قابل وحش بس اسمي يخوف
.. اني مااخاف منك بس لاتشيل اسلاحك دائما..
... ليش حاجبك مطبور هيج؟
... من اني وصغير وكعت وتعورت وخيطوا
وظل الاثر..
.. انت ويامن ثارك؟
.. ماادري
.. ليش عندك ثار؟
.. ابوي وامي واخوتي اثنين واختي انكتلوا
بدارهم ولزوم اخذ بثاري
... اني احس الشيخ جبار ظالم وكلهه
مظلومه بالقصر وتخاف تحجي
... شلون حسيتي؟
... مبين من يجي بس يصيح ومرات يضرب
النسوان واسمع صوتهن
... عوفج منه سيرته تگدر الخاطر
كليلي عدكم وراثه بالنمش!!
... اااي ماما جان بيهه نمش هم جوه
عيونهه واني طلعت عليهه
انت موكلت ضعف عمرج اني عمري راح يصير
١٨ انت تصير ٣٦ ؟!
... ااي راح اصير ٣٦
.. جبير ومامتزوج
.. اااي
.. وجراح شكد عمره
... راح يصير ٢٤ اصغرنه هو
.. وضرغام شكد عمره؟!
...ضرغام هسه. عمره ٣٢
بس شكله يبين اكبر من الهم..
.. شبي؟!
... توفت مرته وعائلته وجان متزوجهه عن حب
٣ سنوات هو يتوسل بأهلهه يله اخذهه
وعاشت وياه يمكن ٤ سنوات وماتوا
... خطيه مبين علي مهموم
ليش ماتزوج؟!
... مايقبل ...
... اني نعست!!
... كومي نامي واذا حسيتي بالم تعالي...
عقيق.. كمت لفراشي نمت الالم راح وكدرت انام
طبيعي ثاني يوم كعدت ب٩ هو طالع تريكت وظليت
كاعده انتظره..
صادف يوم جمعه ب١٠ اجه كال يله انروح
لطبيب ومن ١٠ ل٣ يله رجعنه فحوصات كامله
واخذني لطبيب نمو وانطوني علاج..
التزمت بالعلاج اخذه بانتظام يوميه
اروح اقيس طولي لو اقيس خصري
اشوف سمنت لان متبعه جدول تغذيه...
بيوم منهن وحدي وهو بالشغل صارلنه
شهر كامل احنه ببغداد ماصار شي
بيناتنه من هذيج الليله حته كلام ماكو..
حسيت بالم فضيع ببطني لاول مره احس
هيج الم داخل المثانه لازمتهه وابجي
اريد اكوم مااكدر احس ظهري تخيط...
احس برطوبه وبلل كمت للحمام
واشوف نفسي كبرت !!
ااااي اني عمري ١٨ صار ولحد الان ماعندي بلوغ
اعرف عن الشهريه لان جانت مرت عمي
تسألني وتعلمني وبابا جان كلما ياخذني
لطبيب يسأله جان الموضوع شاغله..
وحدي وماعندي احتياط وظليت كاعده
بالحمام دموعي تنزل مثل الجمر..
ليش هيج اليتيم مذلول ليش ماعندي
احد لا خاله ولاعمه!! شلون راح اكول
للسبع حته يجيبلي ...
بدلت وطلعت ادور ع مسكن ماكو
لان منعوني منه عيني صارت ع باب
الشقه شوكت يجي واكله يجيبلي مسكن
للعصر يله سمعت الباب انفتح
واني مكرفصه نفسي ع الجربايه..
كل مره اطلع اتلكا هالمره ماكدرت اتحرك
وخجلانه حيل احسه راح يعرف
وشلون اباوعله بعد..
شويه واسمعه يصيح عقيق !!!
اني فوك الالم صخنت وراسي
راح ينفجر صداع قوي لزمني..
دك باب الغرفه واني حابسه
نفسي رغم الالم بس الخجل
حيل مسيطر عليه..
اسمع خطواته بالغرفه وكعد ع جربايه
واني منطيه ظهري ومتغطيه..
حجه بهدوء عقيق شعجب نايمه!!
بس كال هيج شهكت بعد مااكدر
اكتم البجيه مالتي..
ايده انمدت جوه راسي بسرعه
وهي شيله هي ضمه لصدره
وكال لااا لااا ليش هاي الشهكه؟!!!
اريد احجي اريد اكله بطني توجعني
مااكدر شهكه وره شهكه وعبالك صار
سنه ماباجيه..
السبع... ليش يابويه عليمن هالدموع
وتشهكين!!
عقيق... بطني توجعني
السبع.. بطنج توجعج وهيج تبجين
يابه چاااا شكد ترفه ؟!
شو خلي اشوف طلعي راسج
ليش ضامته!!
عقيق.. جنت ضامه راسي بحضنه
وهو مخلي ايده ع ظهري..
رفعت راسي شافني شلون وجهي شاحب
واصفر وباجيه هواي كال كومي بدلي
اخذج للطبيب..
عقيق.. اريد مسكن مااروح
السبع.. موبكيفج راح ابدل واجي
الكاج مبدله يله خلي انشوف بطنج
شبيهه...
عقيق.. طلع واني ضميت راسي بالمخده
شلون اروح وياه اكيد الطبيب يحجيله
هم الاطباء مايستحون ويسالون كلشي...
بدل واجه واني ماتحركت من مكاني
حته استحي امشي كدامه شافني بعدني
جان يكول هاي لساعج كومي لاتعاندين!!
عقيق.. مااروح جيبلي مسكن
السبع.. عقيق!!! كتلج كومي كالولج اني طبيب
وانطيج بكيفي وانتي مريضه قلب
عقيق.. كمت بدلت واني امسح
بدموعي وطلعت لكيته كاعد بالصاله
طلعنه للسياره واني ساكته..
هو هم ساكت لحدما وصلنه للمستشفى
اجتني ممرضه وكالهه مريضه قلب وصاحو
دكتوره تسأل بيه وهو واكف بعيد
كتبت وصفه وكالتله جيبهه وتعالو
لغرفتي افهمكم...
جاب العلاج ورحنه جنت اريد كون الكاع
تبلعني من تحجي الطبيبه..
... عقيق اسمج حلو ماما هاي مسكنات
الم كتبتهن الهه لان اول مره وطبيعي
البلوغ بالبدايه راح يأذيهه لتخاف..
اباوع ع السبع ساكت وحجه وياهه
وتجاهل وجودي سألهه يعني الحاله
طبيعيه بهذا عمرهه يله بلغت!!
الطبيبه.. جدا طبيعيه اكو تفاوت بالاعمار
اكو قسم بعمر ٩ السنوات واكو ب١٥ واكو مثل
حالتهه تعبر مرحلة المراهقه..
لاتخاف عليهه هاي مسكن مايأثر
ع قلبهه وان شاء الله عدهه العافيه..
عقيق.. طلعنه نمشي واتعثر احس
الكل عرف شبيه وهو ساكت
صعدنه بالسياره واني مدنگه
نزل يم مطعم اشتره عشه
وعصير طبيعي وصعد ماحرجني
ولا كال شي بس اني كلساع اريد
اكله مر ع محل اشتريلي حاجات واسكت...
قبل لانوصل وكف كدام اسواق جبيره
كال انزلي نشتري نزلت وياه كالي روحي
اشتري اليعجبج ...
اخذت سله واشتريت شامبوا وغسول
وحاجات نسائيه وحبشكلات اجباس
ونساتل وانطيته السله تحاسب ويه
الرجال وطلعنه..
يوم عن يوم يكبر بعيني هيج انسان
قليل الوصف بحقه حسيته مثل بابا
خوفه وحرصه واهتمامه ....
لبابه... مرتاحين بهذا البيت حيل
لانسمع قال وقيل ولا طلقه ولاهوسه
حته خالو مرتاح...
يطلع الصبح يتسوك ويرجع
ومرات يطلع يكعد بالكهوه هناك
جان محبوس..
اما جبار حجالي جراح كال عامر
نام بالسجن بسبب تجاوزه ع ضرغام
وضرغام ماتنازل عنه
وجبار بعده بالسجن ومحكمه ويوميه
اوراقه تصعد للقاضي وعنده واسطات
واحزاب وراه وماخايف...
اليوم المشؤؤم الي اجينه بي للبصره
ومات بابا اليوم ذكرى وفاته السنه
الاولى...
الحجيه بركات سوت ثواب اله جبير وعزمت
هواي ناس واحنه من ضمنهم
بالاول ماردنه انروح بس خابر السبع
ع خالو وعزمه....
ثاني يوم ورا الظهر رحنه جانت اعداد
موطبيعيه بس كلهه حزينه ع جبار
ويكولون مكيده من الشيخ ياسين..
احنه كعدنه ماتحركنه ابد بس
محد حجه ويانه عقيق بعدهه ببغداد
والسبع هم ماجاي بس خابرنه عزمنه..
اول مره اشوف اهل عمه زينب
اخوهه العايشه يمهم ابرار جاي هو
ومرته وبناته وحده بكد ابرار واثنين
صغار بالابتدائيه..
البنيه بنت خالهم اسمهه حوراء
مرتبه وحلوه شكلهه مقبول
بس ابد ماتقبلتني ...
عرفتهه علينه عمه زينب فرت وجههه
وراحت حته فجر انتبهت عليهه
وكلما تجي عيني عليهه تخزرني
وتحسسني مسويه شي...
قبل مايصبون عشه اجو ناس
خطار وماكو مكان بالصاله وسوينه
مجال الهم كمنه وكفنه بالممر
رانيا شايله ابنهه واني خليت طابوگه
وكعدت ونور تگلي دجاج بالممر
صواني كبار متروسات...
اجت هي هاي حوراء وكفت يمنه
وتحجي بس بالكليه وراح يبدي الدوام
واريد اروح لبغداد اشتري ملابس
واني كل ملابسي من بغداد ...
مااعرف شبيهه تصرفاتهه موحلوه
وكل كلامهه موجه الي وتحجي وتخزر بيه..
جراح صار هوايه مشايفته من يوم الشلنه
تقريبا شهر ونص شفته واكف بالطرمه ويحجي
ويه عاصم...
اني جنت اباوعله بتصرف غير ارادي
صدفه التفتت عليهه خزرتني ودفعتني حيل
وكالت سويلي مجال...
طلعت بدون ماتستحي وراحت وكفت يمه
هو منطي ظهره ماشافني وهي وكفت
ادك سوالف وياه...
التفت شافني ظل صافن عليه
واني صافنه عليهم حسيت بغيره
موطبيعيه وبنفس الوقت استهضمت
ليش منطيهه مجال...
عافهه واجه للممر كال السلام عليكم
واشرلي براسه وعبرنه مشيت
وراه لجهه الثانيه ..
جراح... شلونج
لبابه.. بخير
جراح... ترى انذار ونزلت قبل ٣ ايام
والتهيت بامي مريضه
لبابه.. براحتك
... شبيج
... مابيه شي روح احجي ويه بنت خالك
وتشاقه وياهه ومن تجي يمي ماعندك
غير السؤال والجواب..
من حجيت هيج حسيت بس كذبت
احساسي فرك وجهه مرتين جان عاجز
عن الكلام مايعرف شيكول..
اني بالنسبه اله بنت عمه وواجبه حمايتهه
ويمكن جابر نفسه يحبني ويهتم بيه
جراح.. حقج عليه اني مقصر وياج
بس والله تعبان ومحد يعرف الي امر
بي..
لبابه.. مازعلانه اني
جراح.. تعالي خلي نكعد شويه بالبستان
لبابه.. مااريد
جراح.. لبابه امشي شويه صار هواي ماشايفج
لبابه.. مشيت وياه طلعنه من الباب الخلفي
للقصر جانت الشمس هستوهه تغرب..
كعدنه بالثيل العالي وزارعين اشجار
ياسمين ع حافه النهر وعطرهه مالي
الجو هيج راحه نفسيه عطرهه..
جراح.. زعلانه عليه..
... لااااااا
.... والله دوامي متعب وليل نهار ادور
واسطه حته انقل وامي وضعهه الصحي
يتراجع وابرار تشكي دكول ممرتاحه يم بيت
خالي واني عاجز بيناتكم...
لبابه.. اني شعليه؟
.. شلون شعليج انتي وياهن اني تعبت صار اسنين
اختي بجهه وامي تبجي عليهه وهذيج دكول
ممرتاحه لان خالي ساكنه وياه اخته وامه...
وانتي اروح واجي افكر بيج لبابه
احس بطريق مظلم دخلت بطريق
مااعرف شلون اطلع من عنده..
مااريد اذيج ابد ومااريد بيوم تنزل دمعه
من عندج بسببي ...
لبابه.. ليش تحجي هيج انت مامسوي
شي حتلو ازعل عليك لان ماتجي بس اني
هسه مازعلانه منك
جراح.. لزم ايدي حضنهه ورفعهه باسهه
وكال انتي عزيزه عليه حيل ومستعد
اضحي بكلشي علمودج
لبابه.. شبيك جراح انت ماجنت هيج
وهسه كمت اخاف منك اكو شي ومادكوله
احسك مهموم
جراح... لاماكو شي بس الانسان كلمايكبر
تكبر مخاوفه ووضعنه وتسلط جبار واذا طلع
ماراح يسكت النه ابد لذلك اريد استعجل
بزواجنه .
لبابه.. ودراستي
جراح.. تكملين انه ع وعدي بس
اريد ابدي ابني البيت وجبار ماانطاني
كاع ولاقبل حته يبيعلي...
لبابه.. تريد تبني بالقريه لا الله عليك
خلي نطلع منهه
جراح.. البيت السكنتو بي بيت ضرغام
بس لادكولين لان ماراد يحسس خالج
وهو كال اخذه الك البيت وع كيفك قسط
الفلوس وانت ابني بي طابق ثاني حته لبابه
واامهه بحمايتك ..
لبابه.. وخالو
جراح.. يبقه خالج منا لمن يستقر الوضع
وهو مساحه البيت جبيره ابني بي طابق ثاني النه
لبابه.. راح تبدي المدرسه
جراح.. ادري اني اسويلج خط
لبابه.. جاي تتعب وياي..
جراح.. تعبج راحه ومد ايده ع خدي
تلمسه دنگت راسي انفاسه قريبه..
حجه بهدوء وكال كومي وياي
كمت بدون مااكول لااا مشينه خطوات
قليله هو لازم ايدي ونعبر الحفره
والشوك..
اشجار عاليه ومداخله وحده بالثانيه
والجواهن صاير ظل والدنيا ظلمت
كتله وين رايحين؟!
وكف وحاوطني من خصري
وخلاني استند ع جذع الشجره
ورفع راسي بأيده كتله جراااح!!
اول مره يتجرأ ويطبع بوسه
رقيقه ع شفايفي وبعدهه تعمق
اكثر !!
صارت عندي ردة فعل لا اراديه
دفعته حيل وركضت اتعثر
بنفس الطريق..
لزمني من ايدي وسحبني
علي طخيت بصدره وهو يكلي اوكفي
شجاج !!
لبابه.. جراح انت ماتحبني لاتسوي
بيه هيج وكمت ابجي
اني حسيت حسيت انت ماتحبني
ضم راسي لصدره وهو يكلي ااششش
شلون مااحبج والله العظيم احبج
وماافرط بيج يوم واحد ..
شو صايره مشاعرج متزعزعه
وكلساع تجيني بشغله لازم وجهي باثنين
اديه ويمسح بدموعي باطراف اصابعيه..
ورجع ضمني لصدره دكات كلبه سريعه
بس رغم هذا بعدني احس مثل الواجب علي
وجاي ينفذه...
خلاني جوه جنحه ورجعنه نتمشه
قبل لانوصل كال باجر انروح للنجف
لبابه.. صدددك؟
.. والله الحجيه كالت ناخذ سياره
وانروح واني اخذ امي بلكي تزور وترتاح
... واحنه هم انروح؟ اريد اروح لشهد
... اي طبعا هي سياره جبيره لان هم
يلله تكفي وكلكم ترحون حاجيت خالج
كتله علمود البنات روح ووافق..
لبابه.. تروح بسيارتك؟
... لااا جاي اقنع بضرغام بلكي يروح
... مايروح لمرته؟!
... يروح دائما بس لان نسوان يكول
مااحب الجرجره مالتهن...
لبابه... رجعنه نتمشه ونسولف
دخلت للممر جانو يشيلون
بالاكل طبيت للصاله كعدت بصف
رانيا...
حوراء ضربت اختهه الصغيره
ومتنرفزه وكامت تبجي لان
اختهه وكعت التشريب عليهه...
كمل العشه وصار غسل المواعين
بس هالمره ماكمنه ولا وحده كالت
كومن ...
كالو باجر ب٤ الفجر نطلع للنجف
ولازم انبات يمهم لان بليل الطريق
موامان...
بتنه بغرفه الحجيه وب٤ صعدنه
بهاي السياره الريم الجبيره
متروسه بس نسوان..
جراح وعاصم وخالو وخال جراح
بسياره ضرغام لاول مره اروح للنجف
بس تحركت السياره بجينه رايحين
انشوف الماتو غدر...
سياره ضرغام تعدنه وكالو تلكونه كدامكم
واحنه صعد ويانه عباس ابن جبار الجبير...
وصلنه للمقبره ماما شمرت نفسهه ع
قبر شهد كامت تشيل تراب وتخلي
ع راسهه مكتوب ع قبرهه الشابه المغدوره
ساعه نبجي يم قبر بابا المات من خوفه
وساعه نرجع لشهد ونتذكر نظرتهه ودموعهه
النزلت باخر لحظه
هاي المقبره خاصه ببيت جريان
وكفنه يم قبور عائله السبع
ابو وامه واخوته واخته وكلهم مكتوب عليهم
المرحوم المغدور...
رجعنه للسيارات حالنه صاير تراب
ضرغام واكف يم السياره يدخن
من وصلنه كال لجراح روح انت اخذ السياره
واني اجي وراكم للامام
عرفناه راح لعائلته شلون مأساة كل
واحد بيهم دافن عزيز ...
رحنه للامام زرنه واكو اماكن نكعد
بيهه كعدنه وضرغام بعد ماجاي..
شويه وانشوف السبع وتمشي
بصفه عقيق لابسه جادر مال صلاة
وشكلهه متغير وعبالك كبرانه
حته صايره عدهه خدود...
الحجيه.. هله هله بطوايف اهلي
السبع.. باسهه من راسهه وكالهه شلونج
الحجيه.. من شفتك ردت روحي طولت الغيبه
يالسبع
... البارحه يله كملت الشغل وخابرني
جراح وهاي اجيت وراكم..
الحجيه.. شلونج يمه
عقيق.. زينه حجيه
الحجيه.. لاا كبرانه هالمره وراده رويحتج
السبع.. تكبر تكبر خليهه هيج حليوه!!
چااا ضرغام وين؟!
الحجيه.. راح لمرته واولاده لسه مااجه
السبع.. كوم جراح شويه ونجي..
رانيا.. تعبت حيل من الطريق واطفالي
بهذلوني كلساع اكتل واحد صاروا متوحشين
حته يعضون ويتعاركون ...
صبوا غده مااشتهيت اكل ضرغام ماجاي
بعده ليش هلكد افكر بهذا الانسان
وهو كلامه سهام ويشمرهه عليه..
كالو كومن اذا تريدن تفترن الكم ساعتين
وترجعون لهذا المكان كمت اني ولبابه
وعقيق وفجر يمشن كدامي...
اني شايله جنطتي برا العبابه
واول مره البس عبايه بهذلتني
اجيبهه منا توكع منا...
السوك هوسه وسيوف يبجي ع لعبه
وكفت اشتريله ومااحس غير واحد
اخذ جنطتي وركض. ..
صحت وكمت اكمز بنص الشارع
وهو مثل الطلقه ركض وبعدهه اختفه
والناس كلشي ماسوت كالوا هذا دائما يسوي هيج...
رجعت الدمعه بعيني كتلت سيوف
لان من وراه يالعبه يشوفهه وكال اريدهه..
رجعت لنفس المكان وعفت البنات ويه
خديجه مالي خلك كلشي وبابا مدري
وين راح ...
لكيت ضرغام وجراح كاعدين سلمت
وكعدت شويه وكام جراح وسيوفي
ع فد بجيه .
التفت علينه وكال شبي يبجي؟!
رانيا.. كتلته
... ليش!؟
... كل لعبه يشوفهه يريدهه ووكفت اشتريله
وااحد باگ جنطتي وشرد
... عفيه سباعيه ماتعيشين بدون
مغامره!!
... قابل شمدريني شايلتهه فوك العبايه
حته يم الامام واكو هيج نماذج
... وشبيهه جنطتج؟
... مابيهه شي بس فلوس
... ومستمسكات؟
.. لااا ماكو شي
... انتي شكد عمرج؟
.. ليش؟
... اريد اطلعلج جنسيه
... مستفز
... شعلتي ابو ابوي بهاي الحجايه
هسه شكد عمرج ؟!
... ٢٧
... هابعدج بريعان الشباب
... شكرا
جان ضارب عكس وكال لسيوف تعال
كمز بسرعه وراحله انطاه فلوس وكاله
اشتري جانوا يبيعون العاب يتفترون بيهه..
رانيا.. لاتنطي هاي ثالث لعبه
ضرغام.. شعجب ابوهم مايجي عليهم
... الحضانه الي وهو راح اتزوج
ضرغام.. شيشتغل؟
... ضابط
ضرغام.. هااا خيريات الله
رانيا.. اكره الضباط كلهم الخيانه بدمهم
ضرغام.. مااشوف تكرهيهم
رانيا.. شنو قصدك؟
... ليش هو خانج؟!
رانيا.. اي
ضرغام.. الله يعوضج
رانيا.. تسلم..
سحب جكاره وصوت الطكه مال الجداحه
وهو يشعلهه واني ماادري بنفسه
شلون اباوعله
فززني صوته وهو يكول تره انتي تكرهين
الضباط والكدامج ضابط؟!
بالاول مافهمت قصده بعدين استوعبت
كلامه ماتفوته فايته ولازم يفشل
المقابل...
سكتت وسويت نفسي ماسمعت
جانت عائله كاعده كدامنه وبيهم شباب
واكو واحد صافن بوجهي كلما ارفع عيني
الكاه يباوع...
سويت نفسي العب بالعلاكه مال
الالعاب اجاني صوته وهو يكول
عدلي كعدتج ؟!
رانيا... شلون؟
ضرغام ... انطي ظهرج لهاي العائله
رانيا.. انطيك وجهي؟!
ضرغام.. هسه وجهج قحط دديري
يمعوده !!
رانيا.. درت وجهي وغيرت مكاني صرت كدامه
كلما ارفع راسي الكاه ضارب عكس والجكاره
بحلكه وصافن عليه ...
حجيت اكو شي صافن بوجهي
ضرغام... ارسمج ابالي لايام العوز
رانيا.. انت هيج اسلوبك ويه الكل
وخاصه احنه النساء
ضرغام.. صدقه للنساء !! شبي اسلوبي
اني مااعرف اجامل شسوي
رانيا.. الصراحه انت مبين واحد
ملعب ومن تحجي وياي هيج عبالك
اني مثل الي قابلتهن
ضرغام.. يابويه!! انتي ترفعين الضغط
بهذا العقل المجيم العندج
سابقا كتلج انتي النوع المفضل عندي
وازيدج معلومه انتي نسخه بالشكل من
زوجتي الله يرحمهه حته اسمج يصيبني
بتوتر..
رانيا.. معقوله اشبهه بالشكل والاسم؟!
ضرغام.. نسخه نفس الملامح بس هي مطيعه
انتي متمرده !!
رانيا.. الله يرحمهه شلون صدفه
ضرغام.. اااي صدفه
رانيا.. اليوم انت اسلوبك حباب
ضرغام.. اني حباب لو اسلوبي
ستنه الفاضله حته جمله ماتعرفين ترتبين
بس كليلي بيمن فالحه!!
رانيا.. لاخاني التعبير اقصد اسلوبك
مومستفز اليوم
ضرغام.. تكومي ابنج لايضيع تيهتي
وفكيتي حلكج !!
رانيا.. التفتت اشوف سيوفي بين الزوار
ركضت جبته هو منتبه واني صدك فاكه
حلكي ...
لبابه... رجعنه من السوك ويه خديجه
تلكتنه حوراء وامهه وابرار يمشن
ابرار كالت تعالي اشتري ساعه هديه مني
وكفت اختاريت وحده طلعت فلوس
من جنطتهه وانطتني كتلهه عندي والله
جراح انطاني وهسه جان وياي واشترالي...
جانت حوراء ويانه مشينه انريد نرجع
لمكانه هوسه وازدحام تيهنه حوراء
وصلنه للمكان بين ماتجمعنه
وطلعنه للسياره...
شفت حوراء وجراح اجو يتمشون
من بعيد بدون تفكير ضيعت نفسي
من ماما وكمت افوت بين الزوار وصرت وراهم
مجرد مايلتفت يشوفني ..
اجت الكلمه بوسط اذني وهي دكله جراح
هاي موحاله جاي اموت واني اشوف
اهتمامك بيهه اني حبك الاول موهي
انت كلت احميهه ماكلت احبهه!!!!!!!!!!
.
.
.
يتببببببببع............. متابعه ممتعه