لم تكن أمي(لبوة الأسد)

تكملة البارت 12

،، رواية لم تكن،،

تكملة البارت الثاني عشر
بقلمي _Zoza25

***********
هدى _اجت ايام وراحت ايام واني باقية يم امي حياة مرت تقريباً اكثر من شهر مهيمن ماشوفة يعني على كد سؤاله من يخابر أمي حياة انو محتاجه شي، شلونها، خلي ادير بالها على نفسها وبس..

اكثر من مره طلب يحجي وياي طلعت حجه مره نايمة مره بالحمام وهوه مل من حججي وصار ميطلب يحجي وياي..

طبعا هوه ثاني يوم العزيمة التحق للبصره وظل شهر هناك طول هل مره..
بكل فتره وجودي أبيت امي حياة اني مدلله كاضيتها نوم واكل وتلفزيون واصمم..

حته بينت الراحه النفسيه على وجهي سمنت ومعالم جسمي الانوثية ضهرت اكثر على كولت أمي ورد وجهي..

اليوم دخلت بال١٤ سنه جان تاريخ ميلادي وماما سوتلي كيكه فرحتني بيها..
مرات أخوية سليم يجي يمنه يكضي وكت ويانة يجيبه بابا و يرجعه بهذاك البيت ماعدي اي خبر عنهم ولا اني الي سألت..

تذكرت الصدفة الي تجمعني بمهيمن انو عيد ميلادي وميلاده بنفس اليوم جانوا يكولولي هذا توأم روحج وهسه صار زوجي خرب..

هسه صار عمره ٢٦ صراحه تمنيت اعايده مثل كل سنه بس بنفس الوقت ماريد احجي وياه..
اطورت حيل بالتصميم وصرت اطلع من اليوتيوب

واتعلم والاحلى صار عدي فلوسي الخاصة بحيث فلوس مهيمن الي خلاها الي مصرفت ربع منهن الاعتماد على النفس صح متعب بس نتيجته حيل حلوه..

رغم ارتاحيت حيل اهنا وكل شي توفرلي وممحتاجه شي بس جان ناقصني مدرستي الي خسرتها بسببهم وحرموني منها شكد ردت حاولت حتلو الحك على نصف امتحانات والنصف الخ امتحنه دور ثاني هم راضيه..

بس الكل رفض وصار نقاش اله اول وما اله اخير على يابو اصادق بنات مو زينات وراح اتعلم منهن شغلات مو زينه وبهل حاله اجيب الهم العار واخرب سمعتهم الطيبة..

الكل صار ضدي وأمي حياة كلتلي اسكت واعديها هاي السنه لحد ميبرد الموضوع.. مانكر من ايدي هذا الموضوع بس هم كل شي طلع عليه مالي ذنب بي..

بيوم كاعدين نشتغل بالقماش اني وامي اندكت علينه الباب راحت فتحتها أمي طلعت وحده جوارينها جايه تسير يمها..

كعدت بالهول واني رحت قدمت الها مي شفتها تنصي وترفع راسها عني..
عبالك اكو بلسانها حجي مرتاحيت الها كمت وعفتها ويه امي حياة وحدهن..

بعدني قريبه من الباب سمعتها تحجي ويه امي وتسألها..

_اكلج حياة اكو سالفة على بالي اريد اسألج عنها بس متردده خاف تفهميني خطأ..

حياة _شنو حبيبة احجي اسمعج؟

_يعني الصراحه مادري شلون افتح وياج الموضوع هوه مجرد فضول واذا متحبين لتجاوبين

حياة_شسالفة خيه تره خوفتيني صاير شي لا سامح الله

_لا ماكو شي بس باعي تدرين اني أهلي كاعدين بالمنطقه القديمة مالتكم قبل متزوجين فبين فتره وفتره اروح يمهم من اخير مره رحت..

فسمعت حجي مدري شلونه من نسوان المنطقه الجوارين يعني..

حياة _خير ان شاء الله شنو سمعتي

_يعني تعرفين النسوان متظم سالفة وتنقل من السان للسان فالجوارين كايلين لأمي على ساس بتكم جانت على علاقة بولد و احم ماخذها

حياة _شنوو شكاعد تحجين عيوني تره عيب عليج تحجين هل حجي كل شي تسمعوا وتصدكوا قابل ماتعرفون احنه شنوو وتربيتنة شنو؟؟

_على كيفج حياة لا تفهميني خطأ طبعا اني اعرفكم لهذا اجيت اسألج واسكت النسوان وخصوصا هيه مخطوبة وبهذا عمرها يعني شلون ياخذها اله اذا جان يريد يستر عليها هيج فسروها الناس

حياة _لوو سمحتني كافي تحجين على عرضنه وهسه تفضلي والله لوما داخله بيتي و خطار عدي جان عرفت شصرف وياج وخلي اكلج هل كلمتين و وصليها للي طلعت هل اشاعات بتنه اشرف من الشرف واذا تبقون تحجون بعرضنه اوصلها للزلم وتصير مو خوش

_شنو تهدديني انتي هوه اني شلي دخل فوك مجيت حجيتلج الكلام الي ديطلع حته متبقون مثل الأطرش بالزفه..

والله لو تاخذينها لدكتوره تفحصها تتأكد منها بنية لو لا يكون احسن لانو بعد كم يوم زواجها ومن عصبيتج هاي خليتي الشك يزيد عدي..

حياة _امشي طلعلي برره برره نسوان فارغة ماعدها شغل وعمل غير تحجي على هذا وذاك والله اذا رجعت وسمعت منج هيج حجي اخلي زوجي يتفاهم ويه زوجج..

صدك من كالوا الي استحوا ماتوا يله طلعي الله وياج..
طلعتها ورجعت للبيت تنفت من العصبية..بشرر نست التربية والأخلاق صار النه سنين جوارين مفد يوم طلع صوتنه وهسه هاي التافه جايه تنصحني عود..

اويلي ياربي منخلص من القال والقلت احنه ابدد شكو تباعين عليه هيجي..

هدى _انتي مصدكه كلامها وعبالج صدك مو بنية اني؟

حياة _لا اله الا الله..
لج أمي شبيج انتي الخ حتخبلوني تره وليش داصدكها قابل ماعرف شمربية اني حسبي الله ونعم الوكيل بالي جان السبب

هدى _كمت ابجي،،
والله محد طاخني اني ماما جذابين هذوله عفية عالم كل همها تسقط بالناس

حياة _اشش يمعوده هذوله تره ماعدهم لا هم ولا سالفة غير يحجون على الناس شكو تنطيهم اكبر من حجمهم..
كافي هدى تره راسي صار شكبره كايمه اتمدد بلكي راسي يهدء

هدى _هزيت راسي بقهر،،
شسويت بروحي اني شلون هيج صارت سيرتي بلسان النسوان هوه شلون عرفن ياربي جميلة جانت تسوي مصايب ومحد جاب اسمها واني الي ممسويه شي مبقه واحد محجه عليه كلام ميلبس على ثوب

حسيت روحي اني هم راسي صدع همه الله يسلمهم فوك مسويلي غرفة انام بيها حته اخذ راحتي صدك صعدت للغرفة و حطيت راسي على المخده دقايق وغفيت..

مدري شكد مر من الوقت بس حسيت بشي غريب يتحرك على وجهي وبالتحديد شفايفي فتحت عيوني واشوف..

م..مازن!!!

٠٠٠٠٠٠٠٠٠
همام _كاعد بالمحل اشتغل بالحسابات واشوف النواقص حته نطلع نسوك للمحل والعامل الجديد ما شاء الله عليه حرك ويشتغل بضمير كلش ارتاحيت اله واختبرته كم مره طلع أمين الولد..

مرتضى صاحبي فتح محله الخاص بي رحت باركت اله ولو تعودت عليه وياي بس يلا هم لازم الواحد يطور بروحه وأمه تريد تزوجة عن قريب بس هوه ميقبل يريد يستقر بالشغل يلا يخطي خطوه الزواج..

اجت على بالي مريم الي متقبل تطلع من عقلي يابه شكد اتمنى اصير قريب منها واتعرف عليها عن قرب بس اكيد بالحلال لانو شاريها بكل شي عدي..

تذكرت من رفضت تحجي وياي ههه اخ يابه شلون ثكيلة.. وهذا الشي زاد اصراري عليها صار كم يوم ماكدرت اعوف المحل الصبح علمود التصفيه كلت اليوم افضها عاد حته باجر اروح للمعهد اشوف بت كلبي..

عيوني اشتاقت الها والصبر بده ينفذ من عدي مرايد منها غير بس كلمة وحده اطمن كلبي..
ثاني يوم طلعت بال١٠ للمعهد ورحت كعدت قريب مكان كعدتها هذيج المره..

الطلاب رايحه جاية والجو صاير حار تقريباً ساعتين كامله اني مشتول وهيه ماكو لحد ما اجت تتمشه ويه بنيتين وكعدن نفس مكانهم القديم..

والله بس شفتها نسيت الشتلة والتعب والحر وفرحت واني اشوف ضحكتها النازكه انرسمت على شفايفها..
طبعا هم جانت لابسه عباية راس نص ساعه وراحوا صديقاتها وبقت بس هيه كاعده..

مشيت بهدوء تجاها صرت قريب منها هيه انتبهت ورفعت راسها اول شي بانت على ملامحها الصدمه بس بعدين رجعت دنكت راسها..

حجيت اني،، احم تسمحيلي احجي وياج كلمتين
شفتها هزت راسها نافية بعلامة لاا

رديت حجيت،، زين ليش تره مراح ازعجج واسبب احراج الج هنه كلمتين واعوفج على راحتج هذيج المره رحتي بسرعه حته قبل ما انطق حرف واحد وهسه رأسا رفضتي..

باعي مريم اي لتتفاجئين اعرف اسمج مريم واعرف هواي امور عنج اني اعرفج بنت أصول وخليها ابالج تره رايدج حالالي وبس تكولين اي ثاني يوم اني و اهلي يم باب بيتكم

يمكن تستغربين تصرفي بس ثقي بالله اني ماعدي اي غايه سوء وياج لا اريد العب عليج ولا اسوي علاقه ومن هل سوالف صار فتره طويلة عقلي كله عدج..

بس انطيني جوابج او رأيج حته ارتاح لانو بس شفتج هذاك اليوم صار لا ليلي ليل ولا نهاري نهار..
سودنتيني يا خجولة..
دنكت راسي بعدين رجعت رفعته باوعت بعيونها وحجيت..

احبج وغلاة امي عدي مريم كلبي طول عمره معاند يدك لابنية بس من شافج رادج..

فرك وجهه شوفي مادري شكاعد احجي يمكن داخربط بس صدكي من الواحد يحب من كلبه ويجي يحجي لمحبوبتة ابد مو سهله شكد رتبت حجي وكلام تاليها من صرت يمج كله نسيته وطار..

بس اتوقع فهمتي قصدي موو؟
احم زين راح تضلين ساكته احجي اي شي خليني اعرف راسي من رجلي..

مريم _حجت بصوت ناصي،،
انته مو نفسك الي اشترينه منك تكرم الاحذية قبل فتره؟

همام _ اي صح..
مريم اني اعتذر منج جانت نضراتي محلوه بعض الشي بس صدكي اني مو هيج وماباوع بنضره محلوه واول مره صارت وياج لهذا بقيتي بعقلي كل هذيج الفتره..

شفتها لمت غراضها وكامت تروح
حجيت،، مريم احجي شي لا تخليني هيج مضيع دربي أو اكلج اخذي كل وقتج وراحتج بس اني حظل انتضر منج جواب

شفتها باوعت عليه ثواني وراحت ..
يعني هيه مكالت لا اي ولا لع الصراحه الخوف تملك كلبي لا ترفضني لانو احس روحي حيل كاعد اتعلق بيها..

قبل مجنت افكر كلش بالبنات لو ارتبط بوحده ولا حته اسوي علاقة لانو البنات الي شفتهن مع الأسف بعيدات كل البعد عن كلمة أنثى وحته الزواج مو شي اساسي بحياتي كاضيها براحتي لحد مشفت مريم..

جنت حاط أبالي حتلو ازوج بالمستقبل اخلي امي هيه تختارلي على ذوقها وخلص.. بس هسه تغير كل شي.

عفتها يومين مرحت للمعهد كلت ماضغط عليها خليها على راحتها ثالث يوم رحت بال١١ لانو اعرف هيج وكت تكون كاعده وماعدها شي..

رحت بنفس مكاني وصدك لكيتها موجوده جانت تضحك وتسولف بس من انتبهت على وجودي نزلت راسها مثل الي جان ناسي وتذكر شي..

شنو عبالها داجذب عليها هل مره بقيت بمكاني مرحت يمها بس نضراتي الها جانت تشرح لهفتي وشوقي للبقاء قريب منها..
هيه جانت كل شويه ترفع راسها تشوفني موجود لو لا وترجع تنزل راسها..

بهل مره عفتها لحد مطلعت للبيت اكتفيت بالنضر الها عن بعد ثاني يوم انعاد نفس الموقف ونفس النضرات المنتضره عطف الحبيب على المحب..

ظليت على هاي الحالة تقريب الشهر كل يوم جاي للمعهد مكتفي اطمن عليها عن بعد نضراتها اليه حسيتها بدت تلين او مثل الي تنقهر عليه لانتظاري الها وسماع حرف منها..

مامليت ولا تذمرت بالعكس جنت مرتاح بقربي منها..
بعد ما صار اكثر من شهر واني على نفس الوضع بيوم كالعاده كاعد وانتضر اشوفها اجه غيث..

غيث _هاي شنو همام هاي بعدك تنتضر الابنية يمعود عوفها مبين متريد لا تحرج نفسك وتحرجها أكثر قابل تبقه تنتضر من دون نتيجة

همام_ابتسم،،
حتلو انتضرها السنة كلها اني مرتاح بهاي كعدتي

غيث _يمعود لا تبقة متأمل حيل لا بعدين تنضرب بوري معدل

همام _تحسر،،
اسكت ولك لا تفاول عليه اني عدي ثقه جبيره انو كل شي حيصير تمام بس يراد صبر

غيث _والله ياخوي مدري شكلك بس ان شاء الله تنول الي ببالك اني رايح خلص دوامي محتاج شي

همام _سلامتك عضيد..
راح غيث بس بقة كلامه بعقلي شلون اذا صدك انضربت بوري معدل خرب شدعي عليك يا غيث..

خلص الدوام تقريبا وبده المعهد يفرغ اني متعود كل مره وره مترجع للبيت هيه اني ارجع وراها..
بهل أثناء واني افكر بكلام غيث الي فر راسي وخوفني من المستقبل صار فوك راسي خيال..

باوعت وابتسمت بعمق
خجولتي..

يتبع في البارت القادم ❤️..