*بسم الله*
.
.
.
.
.
.
.
.
.
.
.
.
.
بعد عامين ميار تحكي::
بديت نحس بسطر ولما ساح بين رجليا عيطت لربي لي خلقني .. خالتو واسراء قعدو يصبرو فيا غير قتلهم على لما جواد رفدني لكلينيک
كنت حاسة نفس يتقطع عليا ونتنفس بالجهد اسراء تقولي واش ندير وجواد حرق طريق
وصلنا لكلينيک بعد جهد مني بيان سوغ .. رفدني ودخلني قعد يصبر فيا وانا حاكمة فيه
قعدني على شريطة باس جبهتي وقال
جواد: حبيبتي راح تدخلي وحدک وكي تخرجي جيبيلنا ولدنا هايا كورااج
هزيتلو راسي طاحو دموعي جات طبيبة دخلتني
بعد ساعتين :
سمعت صوت بكا تبسمت بين شهقاتي تع لبكا جابتو وحطتهولي فوق صدري دخلولي جواد غير شافنا تبسم
حكم يدي وباسني
جواد: حمدلله على سلامتک
تبسمت معاه اصلا مقدرتش نحكي .. باس طفل ونحاوهولنا هما خرجوه وانا غسلولي وخيطوني بعد نص ساعة داوني لبيت نورمال
قعدت نسنا حتى دخلو .. شويا زاد دخلت يمات اكرم ومرام يضحكو سلمو عليا
كامل: عسلامتک
ميار: يسلمكم
ضحكو كامل وقعدت نشوف فالباب شفت سلسبيل فهمتني
سلسبيل: راهو مع طفل يغسلولو وكذا ويجيبهولک
هزيتلها راسي بايه .. ريحنا نحكو باش يفوت لوقت وصراحة نحاولي على خاطري باسكو كنت نتصطر
نحكيلكم واش صرا في هاذ لعامين .. بعد مناوشات كبيييرة صرات جواد خلاني نقرى وموضوع نأجل منجيبش دراري حتى مور منكمل زااد تعقدت مي ريحت وفهمتو بالعقل وحمدلله قبل
كملت عامي بالفرح والسرور وجواد كان ليه دور كبير وفقلي بين قرايتي ومسؤولياتي فالدار كان يعاوني ولميموار براسک هو خدمهالي اما الخدمة قالي مور منولد يمدلي بوست في شريكة ديالو وهكا نخدم معاه مي قررت نربي قبل
سوتنيت وحمدلله موراها بشهور عرفت روحي بالجوف فرحت جواد هذااک نهار جامي شفتها وحمدلله لي كنت سبب فرحة ديالو
اما اسراء بقالها ميمپا شهر على عرسها واخيرااااا مسكين اكرم هبلاتو وكانت حابة لعام لجاي مي دارو عليها كامل حتى قبلت ..اصلا صبر بزااف
اما مرام ويا مرام مسكينة صح بدات تولي كيما كانت مي دايمن تتفكر شحال من خطرة نلقاها تبكي .. صح متبينش قدامنا مي انا نفيقلها دايمن باسكو حاسة بيها
جاسر مبانش خبرو ديفوا نسمع جواد يحكي معاه مي على حساب واش قالي ولا لعنابة وخدمتو وكذا المهم هو عاش حياتو وخلاص مي هدى بقا معانا كونتاكت
نروحو لريان ويا ريان .. قاتلي مرام كان يحب سيرين مي خرج بخرجة عنجد واو نفهمكم موراها ماصرا كلش جازو شهور حتى جا لعندنا وقال حاب يخطب يعني تشوكينا شكون هاذي مي عرفنا بلي تقرا معاه فالمعهد وزيد يماها كانت تخدم عندهم وللصدفة عرفت بلي هي لي تبرعتلي بالدم فاليامات تع سبيطار اكييد عرفتوها ولي هي رؤياااا
سلسبيل ولات لفرنسا مي قنعت يماها وباباها وولات .. وعلى حساب واش عرفت راهي اونكوبل مع مراد باسكو منهار دات نميرو وهو ولا يعيطلها حتى تكوبلاو ورباتو ياخاه تشوكيت فيها ونوغمالمو قريب يولي من عنابة يخطبها وقالت لدارهم وراهم هابطين
آسينات ولت وجابت تواام بنات ياعمري يسخفو وضوک عندهم عامين واييه قاسم رجع خدمتو كامل لهنا وتشاركو هو وجواد ووسعو الخدمة حمدلله ياربي
سيرين تزوجت لعام ليفات بسلفي كيما تقولو هي وصراحة دارلها رايها ودار عرس مطرطق سمعو بيه كامل اصلا هي تستاهل وربي يهنيها
دخل ملباب هازو في يديه دخل بابا .. قاسم واكرم ريحو برا .. حطهولي في حجري بستو وشفت فيه منيش مآمنة بلي هاذا حاجة مني ومن جواد
احساس الامومة هايل وان شاء الله كل وحدة دوقو وتحس بيه خرجو كامل وخلاونا وحدنا
جواد: ربي يخليكم ليا
ميار: آمين
جواد: ايهيه واش نسموه
ميار: منعرف شوف نتا
جواد: أمير
ميار: ؤؤک بابات أمير
************
**مرام**
بعد واش صرا حسيت قلبي قساح وتبدلت بزااف .. مرام تع بكري تبدلت
نهار لمسود هذاک لي جامي ننساه ريحت طول ليل نسنى ومفقدتش الامل نقول ضوک يولي وميفرطش فيا .. مي كنت غالطة نهار يجيب نهار حتى وين وصلنا لضوک
الصراحة هدى مزالني نحكي معاها .. ني شافيا قبل شهر كنت نحكي معاها .. حتى سمعتو يعيطلها .. منعرف علاه حسيت نفس شعور لي كان قبل وليت لنقطة صفر كل منقول نسيتو تبان حاجة وتفكرني فيه
مي تجاوزت مرحلة تع مرام مدمرة لعكس طحت على لقراية مطلقتهاش
خرجنا من عند ميار وهبطنا اكرم وصلنا لدار وآسينات ولوخرين راحو لدارهم .. على حساب ميار تريح نهار فسبيطار باش ميكون عليها حتى مضاعفات
وصلنا لدار دخلت انا وخالتو رحمة واسراء خليناها مع اكرم
نحيت خيماري وطلعت لبيتي بدلت تمتم وهبطت نعاون خالتو .. طيبنا بيون لميار باش كي يجي جواد يديلها
وحنا طيبنا شربة وبوراک باسكو خالتو كانت صايمة زدت غراتان وخلاص
كملنا حتى جا جواد وجدولو مكلتها وداها يعني يبات معاها فلكلينيک
صبااح نضنا انا واسراء بكري سيقنا ونحينا لغبينة لدار .. بعت عمو فاتح شرالنا نبولات زروقة و كتيبة بدوغي مكتوبة welcom back
ديكورينا دنيا كامل رجعناها تشعل .. شرينا تارت .. مع ظهر جاو .. ستقبلناهم وميار فرحت
صح جاست صغير مي المهم يكون فرحها بعد واش جاز عليها
جوزنا لعشية هذيک ضحک وفرحانين بالبيبي خرج يشبه في عينيه لجواد وليفوسات ليماه المهم يهبل ماشاء الله
جازو سمانتين وبداو الاجواء تع لعرس .. اسراء قشها كامل داوه وبداو يجو لغاشي
ليلة تع حنتها .. مع لعشية صونا لباب نضت انا فتحت غير فتحت جاني شوک ثلاثي الابعاد
هدى: متستقبليناش
ضحكت معاها وعنقتها زادت دخلت يما سلمت عليها تاني .. دخلتهم حتى بديت نرجف ايذا راهم هنا تسما جاسر راهو هنا
قعدت نتنفس كي لحنش ونفضت هاذ الافكار .. دخلتهم لصالون .. يعني عامين كفات باش رجعت هدى مراة يعني كبرت
روحت ريحت قدامها وميلت راسها عند وذني
هدى: نحي علينا لحمورية مجاش معانا لهنا
مرام: شكون قالک ني نحوس عليه
هدى: آممم
سكت مريبونديتش .. جوزو جوغني عدنا حتى درنالها لحنة لاسراء
مع ليل راحو جا لؤي داهم تسما صح مجاش اوووف ونتي واش دخلک مرام؟
تفاهمنا هذيک ليلة نعدلو حوايجنا تع تصديرة انا محبيتش نلبس بزاف غير كراكو و كابيل وقفطان فشک .. وجدت فاليزتي
وحطيتها آپاغ .. اما لحوايج تع لعشا فديسيديت نلبس روپ فالنواغ عند ركبة بليمونش بصح يديها طرونسپارو وفيها نجوم

مع صباح نضنا .. دوشت ونحيت دود حتى وليت نشعل
جبدت شعري لي زاد طوال .. مجيت نكملو قلبي قريب حبس
لميت خصلات ملقدام ورجعتهم للور حكمتو بمساک تع نجمة على حساب لاغوب ووحد شعورات طايحين على وجهي مكييت شويا درت ريحة لبست طالون وريحت نسنا فيهم
كملو ومسكينة ميار عياها أمير مريح غير يبكي حتى حكمو باباه وداه معاه باش سكت
بداو لغاشي يجو وحنا لتحت نقابلوهم انا وسيرين ونورولهم طريق وين يقعدو .. انا رجليا وجعوني ملوقيف شفت قدامي سيرين صفارت وحكمتني في يدي
مرام: وشبيكي
سيرين: منعرف حاسة دنيا دور بيا
مرام: ارواحي تريحي هنا
قعدتها على لكورسي وروحت لكوزينة خلطتلها لما وسكر وجريت ليها شربتلها شفتلها ضغط ديالها لقيتها نوغمال سورمكلاتش برک
مرام: صافا دوک
سيرين: وي
مرام: خلاص روحي تريحي عيتي
جات تهدر حتى ناضت تجري لاصال دوبان روحت موراها لقيتها تتقيا .. غسلتلها وجها
شافتنا ماني جات لينا
ماني: وشبيها هكا
سيرين: سور كاشما كليت
ماني: نهار كامل تعلفي ارحمي كرشک
مرام: ماني خلاص
ماني: لاتكوني بالكرش
خزرنا في بعضانا اومبعد ضحكت .. ضربتها لكتفها
مرام: درتيهاااا
ماني: باعمري حفيدتي كبرت
سيرين: حشمتوني .. ديجا مزال واش عرفكم
ماني: باذن الله
خليتها تريح وانا وليت لپلاصتي شويا هک لقيت يما مع هدى داخلين سلمت عليهم
سهام: ماشاء الله على بنيتي تهبلي خلاه
مرام: ربي يخليک يما .. ادخلو
دخلو وزادو جاو ناس .. وصل وقت لعشا انا ريحت باسكو تهلكت
مع كملو كامل وبداو يروحو طلعت ناكل مع لبنات تعشينا
شويا جات وحدة قاتلي راهم يعيطولک فلجاردان باش نجيب أمير .. خليت ميار تريح شويا ونضت انا هبكت بسيف وخرجت مور دار عيطت بآسم جواد مكاش حتى ظلمة شويا بسيف نمشي وطالون زادلي ندمت لي لبستو
جيت موليا قلت سور سنا وراح حتى حسيت يد جبدتني بالقاوي جيت نعيط تحطت يد على فمي .. دخلت ريحة نعرفها لنيفي حسيت نفس سخون عند وذني
" خارجة هكا بلا خمار وفوسط شعب "
*************
** جاسر**
كنت نخدم مع قضية تع كوكايين مهربينها فالبحر حتى سمعت تيليفون يصوني رفدت لقيتو جواد
جاسر: تفكرتني
جواد: جيت نعرضک لعرس الاخت
زيرت على فكي .. ونطقت بلا منبين
جاسر: عرس شكون
جواد: مقالكش اكرم .. عرسو هو واسراء لازم جيب لعايلة وجي ومكاش اعذار
جاسر: وقتاه
جواد: سمانة لجاية ان شاء الله
جاسر: ان شاء الله
.كوبيت عليه وحطيت تيليفون .. منعرف علاه تقلقت .. نخمم برک تكون لوحدوخر منغيري نحس ناري شاعلة
تنهدت وكتبت دموند باش ندي كونجي حطيتو ومزية قبلوه .. لقيت مراد سبقني اصلا راه معول يخطب
روحت لدار لقيت يما مريحة مع لؤي وقلتلهم يوجدو روحهم .. جيت طالع لبيتي حتى سمعت هدى تهدر فتيليفون
هدى: منيتک مرام .. آواه مشكيتش .. تعمن لعرس .. آآآآ مبروک عليها قوليلها قاتلک هدى مبروک عليک .... هههه لعقوبة ليک .. بنعمي اتصدري مليح .. هههه ؤؤک مالا نروح ناكل آيا غدوة ... اتهلاي
غير كوبات روحت داخل لبيتي .. مليييح لالة رايحة تتصدر خبطت يدي على لاكوافيز ودخلت ندوش مدة خرجت لقيت هدى جاية تجري ليا
هدى: صحح موليين للعاصيمة
جاسر: هيه
هدى: ييي توحشتها والله
خرجت فرحانة .. قلت في قلبي
"حتى انا توحشتها"
حطيت راسي على لمخدة وحكمت روبتها في يدي .. من هذاگ نهار وانا نرقدها معايا
مفقتش حتى داتني عيني
نضت صباح بكري خرجت لقيتهم كامل فالصالون مستفين فاليزتهم
جاسر: مع صباح ربي
هدى: منيش قادرة نصبر
لؤي: اول مرة تقولي حاجة تسقي هكا
هدى: ياخي بغل
سهام: بلعوو عليا .. ايه وقتاه نقلعو
جاسر: مزال ما لميت حوايجي اصلا
هدى: ضووک نلمهم
طلعت تجري وانا دخلت لكوزينة فرغت قهوة وريحت
مور ساعتين حكمنا طريق للعاصيمة .. منعرف علاه فرحان هكا
وصلنا بعد تعب طوييل .. دخلنا لدار لقيناها كيما راهي .. تبسمت كي ولاولي ذكراياتنا هنا
كل واحد حكم بيتو وانا حطيت راسي رقدت ديراكت
جاز نهار تاني عادي .. تلاقيت بجواد وليكيب واكرم ميت من لفرحة حتى ريان وخطب
باركت لجواد على لمزيود وجيت مولي .. حبست عند لمول نشري ليما واش تسحق باسكو دنيا مصفرة
شريت واش يلزم وجيت خارج طاحت عيني عليها قلبي خبط بالقاوي
كانت هي وبنت عمها منعرف واش رافدين تبدلت بزااف .. حسيتها سمانت شوي على قبل كانت لابسة روپة آفلوغ ودايرة خيمارها
قعدت نخزر ملبعيد حتى دخلو لطونوبيل وراحو .. تنهدت وروحت لدار
نهار لعشا ... كان لؤي راح يوصلهم كيما لبارح مي ديسيديت انا نديهم مقدرتش نصبر كامل ليوم نحطو نقاط على لحروف
وصلتهم وانا روحت وين رجال .. كي جاز لوقت وشفت ناس بدات تروح
لقيت طفلة داخلة قتلها تعيطلها علجال وليد جواد باش واحد مايفيق
درت للجيهة ملور وين مكان حتى واحد لمحتها جاية تكيت على لحيط كي شفتها رايحة حكمتها من يدها وجبدتها عندي غميتلها فمها
وحكيت في وذنها ونرص على سناني
جاسر: خارجة هكا بلا خمار فوسط شعب
مسمعتش صوتها خزرت فيها طاحو عينيها في عيني .. بدات تبعدني من صدري وتسيي نطلقها زدت حكمت فيها مليح ودخلت راسي في شعرها
جاسر: اركحيي
مرام: اطلقني ياا زمر
جاسر: غلطت كي نحيت يدي على فمک واقيل
مرام: بععععد
دزتني من صدري بعدت عليها .. شفتها مليح ملفوق لتحت ..
مرام: وااش تحسب روحک
جاسر: لي نحب
مرام: هه ضحكتني
جات رايحة عاودت حكمتها وجبدتها لعندي
جاسر: علبالي زعفانة من واش صرا مي افهميني يا لوكان نهار
مرام: انا منفهمكش كل واحد خير حياتو ضوگ علاش جاي تبررلي؟
جاسر: مجيتش نبرر..
حبستني بيدها وبعدت للور .. شفت دموعها بداو يطيحو
مرام: ماالف نتا تهدر وانا نسكت مناقشكش يااک؟ .. نهااار كنت مرمية عند خويا جيييت حوست لالا .. عيطتلي تسقسي على حالتي لالااا .. تفكرتني يالوكان بميساج وتاني لالاااا ومع لخر باعتلي ورااق طلاق ووجهک مطلس
جاسر: كون مجيتش خاايف عليک منديرش هكا
مرام: ميهمنييش ضوک
مسحت دموعها وطلعت تجري .. مسحت على وجهي وخبطت يدي على لحيط هذا وين عرفت بلي غلطت فيها
خرجت كاره حياتي عيطت لهدى هبطت مع يما ديتهم لدار وطريق كومبلي هدى تشرلي على مرام .. وصلتهم ودورت طريق عيطت لجواد باش نتلاقاه
لقيتو يسنى فيا قدام لباب شافني جا وركب خزر فيا باستغراب
جواد: ياک غير لخير
جاسر: لالا خير .. احم حبيت نقول حاب نعاود نخطب مرام
***********
**ميار**
ياربي ياربي عمري 23 سنة برک وراني نربي مي علجال الحب والقلب جوادي كلش يهون
كنت نرضع في أمير حتى تفتحت لباب دخلت مرام تمروح بيدها في وجها
قعدت نخزر فيها وفي حمورية وجها .. عرفت كاشما كاين
نحات طالون وجات قعدت جنبي
ميار: خييير
مرام: شفتو شفتو
ميار: واش شفتي جن
مرام: كون غير جا جن .. شفت جاسر
ميار: وانا نشوف
قلتها نورمال حتى عاودت استوعبت لكلمة نضت نشوف فيها
ميار: سيريو وين.. كيفاه حتى شفتيه
مرام: شكون جابلک وليدگ؟
ميار: كان عند باباه اومبعد جبتو رقدتو هنا وانا طلعت نتعشى .. علاه
مرام: بعتوني باش نجيبو وانا لاخبر كي هبطت لقيت جاسر لثم وضاربنا
ميار: همممممممم
مرام: ما هممم ما والووو
ميار: متحشيليش مالا علاه راكي حمرة هكا
مرام: والو .. مشفتوش مليح باسكو كانت ظلمة شويا مي والله زاد حلى وزاد على قبل كان يدير بيا 4 ضوک 8 فات راجلک
ميار: آي وسمک قادري روحک جواد واحد ميوصلو
عوجت فمها وضربتني ليدي
مرام: كون مراكيش نافسة نوريلک ..
ميار: ضوگ سيريو .. احكيلي واش حابة
مرام: معلباليش ميار والله مراني حابة نضعف ليه كامل
ميار: وكون يولي ليک كيفاه
مرام: آمپوحال
ميار: نتخاطرو .. وكون نقولک ولا على جالک مابيه لاعرس لا جد ماليهم
مرام: مريضة نتي
ميار: وي .. وشوفي ايذا معاودتيش عرسک
مرام: وانا منقبلش
خزرت فيها مبهمة منيتها هاذي
ميار: سيريو وامن هبلتي في عقلک ولا .. هذاک نديب كامل عليه وتقوليلي منقبلش
مرام: باسكو قلبي برد منجيهتي
ميار: ياااو طبطب احشيها لبيبيط مشي ليا كون مجيتيش حمرة كي حبة طوماطيش لهنا
مرام: ايذا معذبتوش منتسماش مرام
************
- إنتهاء البارت
- رايكم؟؟؟
- علبالي طولت بساعتين مي كي عاودت قريتو لقيت نقائص وزدت وعدلت هذيک هي
- بوسوني بالوحدة يالله رجعتلكم حبوب قلبكم لبعض
- توقعاتكم للحلقات لجاية .. مبقاش بزاف راح نتوحشكم
- متنساوش فوط وكومنت ..
- إلى الملتقى ...
- أحبكم