*بسم الله*
.
.
.
.
.
.
.
.
.
.
*جاسر*
قبل يوم:
كنت مريح فلبيرو حتى دخل عندي مراد حطلي وحد لورق شويا زاد دخل عمي صهيب
ريحو وشفت فيهم باستغراب
صهيب: منيش راح نصبر كثر من هكاا نريحو نسناو يجيبزلنا دليل؟
جاسر: وانا راسي حرقتو متخمام
مراد: عندي فكرة
جاسر: لي هي
تناقشنا مليح .. ودرنا نقاط على لحروف كي كملنا خرجو .. تكيت ظهري على لكورسي وغمضت عينيا تمتمت بين شفافي
" نهايتنا مرام"
نضت لبست لافاست .. رفدت تليفون وخرجت للتحت ركبت وحكمت طريق لسبيطار وين تقرا
بعتلها ميساج الا كملت .. سنيت شويا حتى هبطت جات تجري وتتبسم
مرام: مكنتش علبالي جي
جاسر: وجيت
ركبت وبدات تهدر على نهار ليوم .. حتى انا كل دقيقة نرمي عيني ليها
مرام: وشبيک ليوم تمشي بلعقل
جاسر: عيان برک
وصلنا لدار هبطت وانا موراها .. دخلت لقيناهم فالصالون هي طلعت وانا روحت عندهم رميت روحي على لفوتاي
سهام: نجيبلک قهوة
جاسر: مرة وكاشي تع راس
سهام: هدى نوضي ديري قهوة لخوک
هدى: ياخي قلتي نتي ديريلو
لؤي: نوضي يالفنيانة نوضي
هدى: بلع جهامة
ناضت ديرلي شويا دخلت مرام .. ريحت جنبي وعندها زهر دارت خيمارها
جات هدى حطتلي قهوة .. ولكاشي وكاس ما شربت لكاشي وزدت لقهوة
مرام: علاش مقتليش نديلک قهوة وزيد وشبيک تضرب فليكاشي هكا بزاف
جاسر: متوريليش
مرام: لالا انا لساني كلاني وخفت عليک
دورت وجها وقعدت تهدر معاهم .. نضت وخزرت في لؤي تع نوض جا تبعني للفوق
لؤي: خير
جاسر: سمانة مراحش نكون فدار .. بلاک عليهم
لؤي: علاه وين راک رايح
جاسر: خدمة .. المهم كيما وصيتک بلاک ومدابيک لهدرة مع مرتي مكاش
لؤي: راهي كي ختي وشبيک
جاسر: هدررت هدرتيي
كملت دخلت لبيتي بدلت حوايجي وريحت هكا شويا رقدت
نضت على لمغرب صليت وهبطت سمعت لعياط فالكوزينة روحت لقيت يما و هدى دايرين على مرام لي كانت تبكي
روحت نجري وبعدتهم
جاسر: وشبيهااا
هدى: ساح على يدها ما سخون
حكمتلها يدها وعيطت
جاسر: مشوفيش قداامک
سهام: جاسر متكملش عليها
مدتلي هدى la glace ..نوضتها معايا وطلعتها للفوق .. قعدتها على لبونک .. وحطيتلها la glace على يدها وريحت تبكي
جاسر: خلاص
مرام: راهي تحرق
جاسر: علاش مشفتيش قدامک .. شوفي يدک كيفاه ولات
مرام: مكانش علبالي
نضت جبت واحد لابوماد وليت ريحت جنبها رفدتلها يدها وبديت نديرلها ربطتهالها كي كملت .. وشفت فيها
لقيتها حمرة خدودها نيفها .. بناقص تبدا تبكي متسكتش
جاسر: ششش سكتي
حطيت يدي على خدها مسحتلها دمعتها ودنيتها ليا حطيتها راسها على صدري وخليتها حتى تهدا
جاسر: هاذ سمانة ني رايح
ناضت وخزر فيا مستغربة
مرام: وين
جاسر: خدمة .. راح يريح هنا لؤي ايذا سحقيتي حاجة قليها ليما و هدى يقلولو وياربي تهدري معاه
مرام: كيفاه خدمة سمانة مجيش لدار
جاسر: رااني هدرت ووصيتک
نضت قبل متزيد تسقسيني علبالي كون نقوللها راح تتأثر كثر جيت خارج تمتم جرات وحكمتني من يدي
دنات لعندي حتى حطت راسها على صدري وعنقتني بيد وحدة
مرام: جاسر..متروحش
كانت تهدر بالعقل كالي مخبية حاجة في قلبها حطيت يديا عليها ولزيتها ليا كثر
هبطت راسي لعندها وهمستلها
جاسر: لازم نروح .. لخدمة هكا اتهلاي في روحک .. حياتي دايمن فريسک
طلعت راسها لعندي وبعدتني وهي ولات للور خزرت فيا بلوم
مرام: والديا هما
غمضت عينيا وزيرت على يدي .. صوت شهقاتها قتلوني .. دنيت ليها ولات للور وحبستني بيدها
مرام: روح لخدمتک مالغري والديا وكلش مي جامي خممت نوقف معاهم ولا انا ظلم منحبوش
ملقيت واش ندير مقدرتش نزيد نشوف عينيها روحت ليها وجبتها بالقاوي عند صدري دخلت وجهي في رقبتها نشم في ريحتها وشغول نهار لخر لي راح نزيد نشوفها
جاسر: بلاكي على روحک
بعدت عليها وخرجت بلا مندور ليها رفدت مفاتحي وتليفون وخرجت سمعت يما تعيطلي مي كملت
ركبت وحكمت طريق لدار مراد .. طبطبت فتحلي دخلت وهو غلق لباب وجا مورايا .
رميت روحي على لكنابي وهو جنبي حط يدو على كتفي
مراد: وشبيک خو
جاسر: عييت يازح كون متنجحش غدوة خلااص
مراد: متخممش كلش يتحل
جاسر: ان شاء الله
مراد: بصح واش جابک عندي علاه مريحتش فدار
جاسر: نروح
مراد: ياااو منيش نحاوز قصدي خليت مرتک وحدها
جاسر: منقدرش نريح معاها كثر
مراد: كي يدوها علييک لثم تندم
جاسر: بلع فمک علبالک حياتي منيش ضامنها ليوم هنا غدوة عند ربي كي نربطها معايا راح تعيش غير فالخوف
مراد: واش نقولک دير لي يريحک مي طفلة راح تخسر والديها وبزااف واعرة. ونتا تتخلى عليها
نضت ملثم وهو ثاني حكم كتفي وقال
مراد: روح ليها لوما ريح معاها ليوم صعيبة عليها
جاسر: منيش حاب نضعف قدامها
نضت سبقتو لبيت .. سمعت آذان تع لعيشا صليت ورميت روحي نسيي نرقد غدوة نهار طوييل
مالغري عيان مي نوم مجانيش ريحت هكاک حتى اذن لفجر نضت صليت ووجدت روحي خرجت لقيت مراد واجد هبطنا وحكمنا طريق للمركز
بعتنا لي يركبو كاميرات لبلاصة لي تفاهمنا فيها لازم تصويرة ولهدرة يبانو
اما حنا روحنا حوسنا بلايص نراقبو منهم .. جنيرال تكلف بلاپال و لبرية وحنا سبقنا لثم شفنا ساعة كانت وصلت 12 شتا بدات تقطر علينا وحتى لحال مغموم
حكمنا پلايصنا وجنيرال راح لپلاصتو سنينا نص ساعة حتى حبست طونوبيل ديالو تبسمت على جنب وبدينا نراقبو
.......
رشيد: صھ..يب
صهيب: هيه صهيب بن سالم
تقابلو مع بعضاهم .. ضحک صهيب وقالو
صهيب: ايه حسابتلک مت ! هه لالا منموتش حتى نخلص فيک كلش
رشيد: وااش راک تهدر
صهيب: واقيل نفكرک كيما هذا لوقت شعلت عليا ناار وخليتني نتحرق
تبسم ليه اما رشيد مسح عرق جبينو وزادت وتيرة تنفس ديالو
رشيد: آم تحب نعاودوها مالا
ضحک وتنحا توتر .. قعد يخزر من ومن منبعد على غفلة جبد سلاح وصوبو على صهيب
صهيب: ضحكتني علبالک
رشيد: هاذ لخطرة منعاودش غلطة تع 20 سنة .. كان لازم نتأكد قبل منروح حتى نشوفک وليت رماد .. مي دوماااج كانت عندي خدمة لي كنت تجري باش تكشفني
صهيب: نسيت فكرني
رشيد: بنتک كنت راح نديرها معاهم ونبيع اعضائها مي منعرف كيفاه مبانتش
صهيب: واش استافدت من هذا كامل
رشيد: كانت تحسابتلي اكبر عقبة في طريقي راح نحيها مي منحيتهاش وليوم نحيييها
صوب عليه تقاس في كتفو .. طاح فالرض دايخ .. كي شافو هكاک خرجو كامل مصاوبين عليه
طلع راسو تشوكا واش شاف حس راح تكون نهايتو .. ولحاجة لي شوكاتو كثر كي شاف جاسر حط سلاح على راسو
رشيد: نتااا يا غداار امنتک على بنتي
جاسر: متزيييدش تجبدها على لسانک لموسخ
دار جاسر بعينيه لمراد وجا دارلو ليمينوت ناض يعيط بهيستيريا حتى دخلوه لطونوبيل
راح جاسر ركع لعند صهيب وحاول ينوضو تقعد وسقساه
جاسر: رااک مليح
صهيب: متخممش اونتيبال خدم خدمتو
نوضو وراحو مكملين للمركز يحققو معاه.. صهيب حس هم ونزاح مي مزال منتاقمش لمرتو وهذيک جاي دورها
************
**ميار**
دوشت وخرجت نشف في شعري لقيت جواد عند لبالكون يهدر فتيليفون ومن وجهو باينة راه منيرفي
هبط يدو على لباروداج ورما تيليفون .. حطيت سربيتة وروحت ليه
ميار: جواد وشبيک
جواد: والو متقلقيش روحک
جا رايح حكمتو من يدو ووقفت مقابلاتو
ميار: نوغمالمو انا مرتک ولا بلآسم برک
تنهد ومسح على وجهو .. طلع شعرو حسيتو راح يقلعو وحكى
جواد: جاسر ولجماعة حكمو لي يتسمى شييخک
حطيت يدي على فمي .. لي جا في بالي ديراکت مرام مسكينة
ميار: وبابا كيفاه راه
جواد: هدرت تمتم مع جاسر وقال بلي متتقلقوش
ميار: ربي يستر
جواد: آمين
ميار: تسما هكا لازم نولو
حط يدو على خدي وقرصني
جواد: لالا نريحو حتى يخلاص لفاكونص
تبسمتلو باسني من جبهتي ودخل لادوش
هبطت لتحت ودخلت لكوزينة درتلو قهوة وانا درت قهوة حليب ..قعدت نعيطلو ونوجد فطابلة
ميار: ياا جوادي يا لپوطو
سمعتو يحمحم مورايا درت لقيتو خرج وشعرو مشمخ لابس سيرفات وحاط يديه في جيوبو متكي على لباب
جواد: پوطو ايهيه زيدي
ضحکت بتبهليل وروحت حكمتو من يدو وجبدتو لعند طابلة قعد جيت نروح نريح جنبو جبدني من يدي وقعدني في حجرو
ميار: انا ترجعولي جواد لحجرة الله يسهل
ضحک منبعد سكت .. مالغري عداوتو مع باباه مي بانلي راه مقلق على هاذ لموضوع
حطيت راسي على صدرو وقتلو
ميار: ماتتقلقش
جواد: منيش مقلق مي كنت نسنا يكون بابا انسان صالح مي راكي شوفي
ميار: المهم راجلي صالح واش دخلنا فالناس
طلعت راسي ليه ودرت روحي تشنفت
ميار: ديجاااا جينا لفواياج دو نونس مشي باش نرجعوه مكتأب
جواد: آممم
مديتلو كاسو تع لقهوة وانا ريحت في حجرو نشرب
ميار: جواد حبيت نفتح معاک سوجي
جواد: ني نسمع
ميار: صراحة كنت معولة غير نطلع لفرنسا نعاود عامي لي بلوكيتو مي مدام دوک خلاص لازم نولي نقرا
جواد: وكي تقراي واش راح ديري
ميار: حابة نجيب ديپلومي وايدا كاين خدمة نخدم
جواد: علاه شوفي فيا منوفرلكش كلش باش تخدمي
ميار: مشي هكا مي حابة نكمل قرايتي ونخدم
شفتو تقلق .. نضت من حجرو وهو ناض جا رايح حكمتو
ميار: راني نهدر
جواد: وانا قلت مكااش خدمة
ميار: نخدم علاه منخدمش
جواد: هدرت لي عندي
ميار: تسما اسراء نورمال انا نووو
جواد: متعيطييش وتاني حاجة عندهااا راحلها مندخلش روحي ورااني هدرت خدمة مكااش
ميار: تسماا لحاجة لي طلبتک فيها محبيتش
حكيتها بغصة ودرت رفدت لماعن .. سمعت لباب تع برا تخبط
غسلت لماعن وطلعت لفوق .. هذا زواج ولا حبس
لالا وزييد خرج هو وانا هاهم لحيوط شهر لخرا مشي لعسل
خملت شامبرا وهبطت طيبت لي جا في طريقي وكبيت عليه وليت للبيت وخرجت للبالكون ريحت
جازو سوايع وقريب لمغرب ولميسيو مجاش كيفااه مخليني وخدي فدار
حتى ظلمة طاحت باسكو رانا فالشتا .. تحجرو دموعي في عينيا
ميار: جحش حمار راح وخلاني
هبطت لتحت سخنت ماكلة تع صباح وكليت لميت كلش وقعدت نسنا فصالون
منعرف كيفاه حتى داتني عيني .. نضت كي حسيت روحي تحركت فتحت عينيا لقيتو رافدني دورت يديا على رقبتو وهمستلو
ميار: وين روحت وخليتني وحدي
وصلني للبيت بلا نيحكي حطني على لبونک ودخل لادوش
تقعدت وقعدت ناكل في ضفارتيا حتى خرج شافني ودور وجهو نضت ليه ووقفت قدامو
كمل مسح وجهو ونحا سربيتة لقاني مقابلاتو
ميار: مصبااح خارج متقول راني وحدي متقول والوو
جواد: منا وجاي اوزني كلامک
ميار: علاه سبيتک يخي قتلک نكمل قراية ونخدم
رما سربيتة فلرض وخبط يدو على لحييط
جواد: بلعيي وبعدي مناا
بعدت من جيهتو وروحت ريحت فوق لبونک كارهة جد يمات حياتي
سمعت تيليفون دورت راسي لقيتو رفدو وهدر شويا كمل وخزر فيا
جواد: وجدي روحک نولو للعاصيمة
قالها وراح .. مفهمتش اصلا واش صرا صباح قال منولوش وضوگ نولو مي باينة حكاية تع صباح زادت كبرت
نضت عدلت لحوايج بزرب لبست تريكو تع صوف مع jupe تع لجلد زدت فاسا كوير وباسكات .. شويا خرج لابس .. زاد لافاست وخرجنا وواحد منطق بكلمة
موصلناش حتى ل 2 تع ليل .. دخلنا لقيناهم مزالهم فايقين حتى اكرم ولتما
سلمت عليهم وهو عاود خرج معاه اكرم
***************
**مرام**
جاز نهار على واش صرا آخر مرة .. كنت مريحة في بيتي حتى طبطب لباب بالقوة درت خيماري ونضت فتحت لقيت هدى تلهث
هدى: اجري تسمعي واش صرا
قلبي دخلو بخوف قلت جاسر كاشما صرالو ولا معرفتش كيفاه هبطت هذوک دروج
دخلت لصالون لقيت يما حاطة يدها على خدها غير شافتني جات عنقتني
مرام: واش كاين.
بعدت مني وهبطت راسها خزرت في لؤي نحب نفهم منو
لؤي: باباک حكموه ليوم ويماک ثاني
مقدرتش نستوعب انا كنت علبالي راح يجي هاذ نهار .. ريحت ملفشلة اولا حشمت وين نحط وجهي بيناتهم وتاني يما وبابا راهم فالحبس
دمعة مطاحتش من عيني اصلا علاش حتى نبكي هه ميستاهلوش حتى كلمة بابا ويما
صونات لباب راحت فتحت هدى خزرت لقيتو ريان روحت جريت بيه وعنقتو يمكن هاذ لوقت رانا مجروحين و في نفس لوقت نبينو رانا قويين ومنوقفوش جيهة ظلم
ريان: سمحولي جيتكم ضوگ
سهام: معليش وليدي ريح
ريان: جيت ندي مرام برک
سهام: معندک وين تديها تريح في دار راجلها
ريان: خالتي تعيشي حتى راجلها علبالو
لؤي: ريان خلي تهدا دنيا ويجي جاسر وتفاهمو
ريان: ندي ختي حتى ختي نتحرم منها تاني
مرام: ريان تعييش اتكالما
روحت عند يما وعنقتها
مرام: يما ريان محتاجني لازم نروح
حسيت يدها على ضهري ووحدة على راسي شغول قبلت
سهام: بلاكي على روحک
هزيتلها راسي وطلعت لفوق لبست جلابة برک رميت لحوايج لي نسحقهم فلافاليز وهبطت شفت فيهم لخطرة لخرة وانا حاسة مراحش نوبي كامل لهنا استغفرت وتيعت ريان
وصلني لدار جواد خزرت فيه بلا منسقسيه جاوبني
ريان: ريحي هنا
مرام: وين رايح
ريان: لازم نروح للمركز نشوف كيفاه
مرام: ؤؤک
هبطت نكركر في فاليزتي فتحتلي اسراء غير شافتني عنقتني كانو عينيها حمورة مالغري واش دار فيها ونكرها مي قلبها حنين
دخلوني زدت سلمت على خالتو رحمة ريحت حداهم ونخزر لفراغ
كي تفكرت بلي هنا تحبس علاقتي مع جاسر منعرف كيفاه تفلقت بالبكا دارو عليا كامل يواسو فيا
طلعتني اسراء لبيتها وتسكت فيا هي لوحيدة لي علبالها واش راني نقاسي
بكيت على كلش لبرود لي كنت نبينو كامل تلاشى قعدتني نحاتلي حوايجي وجبدتلي بيجامة لبستها نوضتني غسلتلي وجهي كانت تمشي فيا جسد بلا روح
مرام: اسراء علاش هكاا ياريت معلقتش قلبي معاه و والدياا كيفاه
اسراء: مراااام ختک خااوتک كاامل معااک متخمي في واالوو ربي ما فييه غيير لخير
قعدنا سوايع وحنا هكاک ساكتين .. دخلت عدنا ميار كي شفناها تشوكينا باسكو واش راح يجيبهم وهما في وهران اصلا باينة هذا وين وصلت .. جات دارت بلاصة في وسطنا وقغدت عنقتنا لزوج
وحنا شغول كنا نسناو حضن كاش واحد يواسينا تمتم نضنا لزوج نبكو
ميار: خلاص لبنات متريحووش هكاا كل واحد راح يتعاقب ونتوما عندكم حياتكم
اسراء: واش مرجعکم
ميار: كان لازم نجوو ..
اسراء: كاش جديد لتحت
ميار: جواد واكرم راحو للمركز عند جاسر
مرام: معلبالكش كاش حاجة على جاسر
ميار: معيطلكش
هزيتلها راسي بلالا وسكت
ميار: راهو مليح عيطلنا صباح وقبل ساعات من نجو
اسراء: ربي يستر خلااص كرهنا مالمشاكل
مرام: خلاص كلش راح يتحل كللش
خزرو فيا مستغربين وقالت ميار
ميار: وشبيكي هكا مكييش مليحة
مرام: موور متخلاص هاذي كامل انا وجاسر راح نطلقو
********
- إنتهاء البارت
- رايكم؟؟؟
- توحشتوني علبالي علبالي ها راكم علبالكم علاه .. صراحة مرسي لكل وحدة بعتتلي كلمة حلوة طلعتلي لمورال ميساجاتكم ليكومونتار ديالكم مرسي بزاااف والله متتصوروش شحال نفرح بيهم .. ان شاء الله كامل نجيبوه وندعيو تاني لصحاب لبيام
- كنت معولة سمانة هاذي منكتبش كامل ونريح مي شفتكم متصبروش ههههههه
- طريق جاسر و مرام مسدودة ملخر مي تعرفوني بمفجآتي
- جاني نكد قلت نكد على ميار و جواد باش علاقتهم متكونش مملة
- محبيتش نحط ونحكي كلش ليوم نخلي للبارت لجاي يتكشف سر سعاد ..
- نتمنى يعجبكم لبارت والله كتبتو تع زرب محبيتش نخليكم تسناو كثر .. متنساوش فوط وكومنت وتوقعاتكم للخلقات لجايين
- إلى الملتقى
- أحبكم