بارت 44
رواية...جولييت واسرها...غياهب الإنتقام
بقلمي...نور سمو العراق
💔💔💔💔💔💔💔💔💔
أفضل كتاب قرأته هو أمى، أفضل حكمة تعلمتها كانت من أمى، لا توجد في العالم وسادة أنعم من حضن الأم، ولا وردة أجمل من ثغرها.
....................................
اكو شعور بداخلي لا ينحجي ولا ينبجي ولا ينكتب هو بس يوجعني
جاسر جنت اريده هوه يداوي جروحي اذا نزفت جبل شامخ يداعب خطواتي ويحضني اذا تعبت..
نهر ابيض يغسل ذنوبي اذا غلطت
ردته مثل البحر الي اشرب منه اذا عطشت من بعد مسيرة من الالم...
ردت اعيش علئ كوكب الارض مو كوكب القساة
شفت اخويه مربوط علئ الكرسي وحالته يرثئ الها ركضت عليه بلهفه وعمي عكاب اخذ مجتبئ مني وهو لازم مميته ويرضع بيها ويباوعلي بذهول ..
حازم باوعلي بصدمه وتعب همس بصووت موجوع ...جوليييت
ركضت عليه وحضنته وهو مربووط صرخت بنحيب واني اشم بيه...يمه ريحة امي بيييك حازم شسويتوا بيه ليش ظلمتوني ...
شهكت برجفه وهو يبجي ويهمس بصوت متعوب...جولييت دمرناج جولييت جولييت احنه مو اخوه احنه اعداء...
تجاهلت كلامه واني اشهك من البجي وثنيت رجليه كعدت علئ ركبي وفتحت اديه مربوطات بحبل قوووي من الخوف والرعب والقلق ما عرفت حتئ شلون افتحهن....
اول ما حررت اديه هو وكف بلهفه واحتضني بكل قووووه بحيث حسيت اضلاعي تكسرت بين اديه
ويبجي بصوت عالي ويكطع الكلب ويشم بيه ويبوسني واني حاله اردئ من حاله والدموع مطر من حزن...
ابتعد شويه واحتضن وجهي بين كفوفه واني اشهك بغصه تخترق نياط گلبي ...
باسني بوجهي وجبيني وخدي وييجي حييل بعدها رفع اديه وباسهن
همس بعذاب وعبره...جولييت احنه الدمرنه حياتج من نعومة اضافرج وهسه انتي جايه تنقذيني من الموت ومضحيه بروحج
سحبت اديه ورجعت حضنته...حازم تعذبت والله كل يوم ما انام اذا ما اذكركم حازم صدك ابويه مااات امي شلونها
مسح الدمعه الحزينه من عيني وعيونه غركانه بالدموع...اي جوولييت مات وهو يسأل عنج واخر كلمه نطقها قبل لا يموت هو اسمج
جان يهمس بسمج ويكول ..بويه حازم انت احن من عاصم اخيتك ذمه بركبتك
لحد الان اذكره من رفع اصبعه وهو يحتضر والموت محاصره كال...جيبولي جولييت اريد احضنها اريد اودعها
صرخت بصوت عالي وانهيار ...ليييش حازم لييش اني اختكم مو عدوتكم والله مو عدوتكم والله احبكم رغم كووولشي سويتوا بيه
ابويه يموت وما اعرف دمرتوني والله ذبحتوني وسودتوا عيشتي
وكل هذا وما اريد الكم الاذيه ولا هو اريده تتلطخ ايده بدمكم
اني الاضحي بروحي الخاطركم والخاطره وما محصله منكم بس الاهانه والتكفخ
ليش حازم شلون تنام عيونكم واختكم تنام مهضومه تدرون شنو العشته وشنو الصار بيه
لزمته من ايده والدمعه تنزل وتتلاها عشرين دمعه ...روح حازم انقذ نفسك سافروا هاجروا وين ما ترحون روحوا بس المهم لا تضلون هنا
احتضني بالم وهو يتعذر...صدك يا جولي عذبناج ودمرناج وسودنه عيشتج خوييه الكلام هووواي وهاله لعبت علئ الحبلين
صحكت باستهزاء...وانتم دوم مصدكيها ابد ما عندكم ثقه بيه واني اختكم من مكم ولحكم شحجت عني ها سافله هاي...
جر نفس وتنهد...جابت تصوير العرس وقار وانتي حاضرته وابوي ما صار كم اسبوع من مااات
ابتسمت بالم...اني ما عندي حظ ويه الكل شفت حظي حتئ وياكم انتو لخواني حظي معدوم اني الي انعاكم بكل صبح ومسيه
تتهموني هيج باطل وتصدكون هاله الزباله لك حااازم هذا ابويه الي احن عليه من نفسي شلون هييج اسوي بس اني مجنت اعرف وهي الكلبه ما كلتلي
وحتئ حزن علئ ابويه ما خلتني احزن شفت هييج حقاره بس والله ما اعتب عليها اعتب عليكم انتم اهلي صدكتوها مره لا تصدكوها مرتين
وهي الي علستك وانطتك ضحية الجاسر ديروا بالكم مره ثانيه ولا تتواصلون ويه عمي لان هاي مشتغله جاسوسه عليكم
تنهد بعصبية وقبض ايده بغضب...بسيطه اله اخلي عمي يعيد تربيتها هل ساقطه هاااي تاخذ كلام وتنقل كلام
ابتسمت بانذباح...دكول امج تبرت منج صدك هذا الحجي ولو اعرف مستحيل ماما تتبره مني
جاوبني بقمة غضبه...خلي توووولي طايحة الحظ هاي امي تتمنه تنام علئ تراب رجليج ومتعذبه عليج والله بس عاصم كاطع عليها كل شئ يخصج
جريت نفس...الله كريم ان شاء الله تنحل الامور
رجع احتضني وباسني همس عند اذني...جولييت قررت اسلم نفسي للشرطه واخذ مكان عاصم واكولهم اني الي قتلت اهل جاسر حتئ انتي ترتاحين
حطيت ايدي علئ شفايفه امنع كلامه والصدمه الجمت كل حواسي...ارتااااح ...ارتاااح حازم؟ شنو هل كلام انت مظلوم ومسجون واني ارتاح؟
انت ما الك ذنب بالصار خلي عاصم هو يسلم نفسه وياريت لو يسلم نفسه
رد حازم بقهر...هو ميقبل يسلم نفسه ويكول احاول اصلح الصار
جاوبته باستنكار...شنو الي يصلحه عاصم؟ لك حازم هذا برگبته دم لتلاثه تعرف شنو تلاثه وجاسر ما ينام علئ حقه ومو كل مره تسلم الجره
احتمال يقتله خلي يسلم نفسه ويخلصنه من هل مهزله
تنهد بضيق...ان شاء الله اخلي يسلم نفسه وغصبا عليه واذا ما قبل اني اشتكي عليه
ضحكت...هم مشكله لان جاسر حيبري من التهمه هو يريد يقتله بيده ...
وترئ الصار بجاسر مو قليل يهد جبال والله قتل تلاثه من اهله وبنته الي اعز من روووحه والله القتل بحق عاصم قليل
بس اني كلبه وحيوانه اكو شئ بداخلي يرفض جاسر يقتله لو الدوله تعدمه ولا جاسر
رد عليه بضحكه...ليش تحبينه؟
نزلت راسي بحزن...يضل احسن منكم بهوايه علئ الاقل مستعز بيه مو مثلكم رخصوتي
بس اني ما رخصتكم ولا فرقت بينكم يالله روح لا يرجع ويذبحني ويذبح
انطيته ورقه باوعتله والدمعه تلالي بعيني ..حازم هاي الرساله تنطيها الامي هاي الرساله تخص امي
كلللها خلي تبريني الذمه هوايه عاتبتها وما اجتني وكلها جووولي تحبج تموت عليج
مسح علئ راسي وباوع للشيخ خاف منه بس الشيخ جان كووولش منصف رد عليه...بويه لا تخاف انه اذا اريد اخذ القصاص التجئ للمحاكم ...
وان شاء الله غريمنه مو انت غريمنه عاصم الله ينتقم منه دهور العائلتين ودمركم ...
هو رديه عليه بقهر...الله يوفقك شيخنه ويكثر من امثالك ويحفظ عائلتك فضلك ما انساه ...
باوع المجتبئ وابتسم اخذه من ايد الشيخ وباسه بس مجتبئ ما قبل بي وضل يبجي ويدفع بي،وحتئ وكعت الممه مالته منه
اخذته منه واني اسكت بي ...ههه فديتك ماما لا تخاف ما ياخذك اني يمك هذا خالو شبيك
عقد النونه ببراءه ودموعه لاصقه باهدابه واني ابوس بي هو سحب ايده وباسها
رد بضحكه...يشبهج حيييل
ضحكت..اي كووولش مرتضئ هماتين يشبهني بس مجتبئ اكثر فديته
جر نفس حزين ورجع باسني...الله يحفظهم اخيتي وان شاء الله ما تشوفين سوء بيهم
رجعت حضنت ابني بارتياح وهمست...اميين
ودعته وجان اكو علاكه هو اخذها كال هاي فلوووس مالتي جاسر ما اخذهن مني...
وحتئ مفتاح السياره خلاه بالفلوس كال حازم واخذهن وطلع ...
بعد ما وصاني علئ نفسي وطلع حسيت بارتياح من طلع وراح الحمد لله بس كون ارجع للبيت بخير وسلامه
باوعت للشيخ تقربت منه وبست ايده هو سحبها بسرعه وسحب راسي وباسني كال...لا بويه لااا انت بنيتي وبمثابة ريهام تعاي بويه خلينه نروح لا يجي رجلج وتصير دول الدولاة
طلعنه بسرعه وركبنه السياره ورجعنه جنت طووول الطريق كاعده علئ ناااار وخايفه اخاف ارجع والكاه يموتني والله بس اكوله جنت بالدكتور والشيخ يشهد ويايه...
وصلنه للبيت تشكرت من عمي الشيخ دخلت علئ اطراف اصابعي بخلسه وخووف...
ما سمعت بس،صوووت عالي...وييين جنتي
باوعت باستغراب شفتها شهد عقدت حواجبي...وانتي شدخلج حبيبتي زوجي وتحاسبيني
هزت ايدها...اهووو شبيج اكلتيني بكشوري وبعدين انتي بيج حاله نفسيه شو بس نايمه وتشوعطين
انصدمت من كلامها...اكلي تبن لج رحت اخذت ابني للدكتور شنو اشوعط وبعدين اني اكبر منج مو عيب هيج تحجين ويايه
جاوبت باستنكار...يااا والله فرحانه بروحج اكبر مني ؟ كم من كبير عقله فارغ وكم من صغير عقله فارغ
يجوز اني افهم منج وحابه اعلمج علئ الصح والخطا ما يصير تخلصيها بغرفتج لو تخلصيها تفترين شلون بعد العيال يحبوج
وترئ العيال عيال بس يردون الزله علئ الجنه اكسبي عمتج ورجلج وحموينج والبقيه طز بيهم المهم ذوول حبيبتي
ابتسمت واني انزع بصايتي لا يجي جاسر ويشوفني غير يذبحني
خليتها علئ المحجر...والله ونعم منج شهوده راح اخذ بنصايحج
جاوبت بثقه..شتحتاحين اني موجوده اذا تردين تحفين اعرف حفافتي تخبل واسوي شيره تجنن واعرف اضفر ضفيرة فرنسيه اذا حابه اضفرلج
ضحكت...وااااو كووولش حلووو ان شاء الله اخليج تضفريلي
جاوبت...بدون فلوس الاولئ للتجربيه والمره الثانيه اخذ الف حتئ الحفافه بالف واذا ماعندج عادي
دخل جعفر سالها عن شنووو تحجي كلتله هي عود حفافه وتصبغ ومدري شتسوي وتشتغل بالف دينار
باوعلها بلووم وعض شفته...لا شهد غاليه حييل شدعوه هو كله البكره بربع دينار وتضل شهرين شدعوه عليج تضربين بالعالي ...قابل جاي تطلعيلها وجهه جديد
رفعت حاجب...لعد بيش تردون يمه بربع
ضحك...اي بربع حتئ من واحد يعاملج كولي نهايتها ببلاش ...
هزت ايدها...فوت عيني فوت محضره حمامك اسبح وخلي اصبلك غده...
هو غمزلها...معدله اووولي يابه النداره مبينه من سطح بيتنه
رفعت ياخة ثوبها بفخر...وبعد وبعد ما شفت شئ وداعتك
هو عافها وراح باوعتلي كالت...شفتي شلون كسبته وخليته محبس بيدي احركه يمين وشمال ليش لان نادره ومهتمه بي وملابسه نضيفه وحاضره
عاد هو عاط بيها بصوت غاضب...شهههههد
هي باوعتله بتفاجئ...هااااا
رد عليها بغضب...وطماااا ولج ليش ولج حاركه قميصي لكيت الاوتي لازك عليه
ضربت خدها يااااا نسيت اطفي الاوتي من طفت الكهرباء وراحت تركض اله وهو يرزل بيها...
ضحكت وخليت ودخلت الغرفتي لكيت ماما رضيه نايمه بيها ومرتضئ نايم بحضنها ابتسمت بمرح عليها
ودنكت بستها بخدها وبست رضاوي جان مجتبئ نايم خليته بفراشه شربته خافض حراره لان احس بي مسخن...
رحت سبحت وبدلت طلعت دا امشط شفت اصابع جاسر مطبوعه بخدي احس ملامحي الاثيره تشوهت
اتذكر حازم من مسح علئ خدي وسالني بعذاب ..هو ضربج واني جاوبته ...لاااا مو هو تعاركت اني وزوجة حماية لا تخاف
ما حبيت اشغل بالهم عليه واعذبهم ...
حسيت بي دخل ركضت فتحت البرده شفته دخل الغرفته ...
كعدت ماما رضيه سالتها اذا هو جاي من اني مو هنا لو لا
كالت...لا يمع ما اجه هو حتئ خابرني كال جولييت ويين كتله نايمه بغرفتها
تعصب وضل بغلط كال...هاي راح تموتني تعبت منها بس احاجيها وحبست روحها وكطعت الاكل والله من ارجع عليها اله اسحلها سحل واخليها تاكل غصبا عنها
كتله...لا يمه انطيتها اكل و وكلتها
ضحكت...لا ليش ماما لو مخليته بعد يتحرمس حتئ يجيبلي كباب من المطعم
باوعتلي بصدمه...تردين كباب..مو تتدللين عساج علئ كباب هسه اروح اجيب المطعم كله ...
حضنتها بمرح...لا ماما والله حتئ مو هلكد احبه اليوم فتنه من المطعم سديت خشمي لعبت نفسي من ريحة الشوي...
حذيت ايد علئ ايد بحيره...شلون هسه تموتين جووع روحي سويلج لكمه واكليها...
هزيت راسي بقبول وبستها ورحت...
فتحت المجمده لكيت بي جيس مال همبركبر اخذت وحده وكليتها فتحت الثلاجه لكيت صمون فرنسي خليت الهمبركر بي وطماطه وكعدت علئ الكرسي ومديت رجليه علئ الكرسي الثاني
واني صافنه وضميري مرتاح واحس بشعور حلووو لاول مره واكل باستمتاع ...
دخل هو بجبروته المعتاد وخشمه اليابس باوعت عليه ورجعت اكل ...
هو ضل يفتر بالمطبخ وفتح ابواب الكاونتر كلهن وبس الصوت طاك وطيك
باوعلي بغضب...ما كولين خل اشوف زوجي شنو يريد شيدور لو مغلسه فرحانه مدام
جاوبته ببرود...شكوو شتدور
حك لحيته بتفكير...هااا اي شئ
عقدت حواجبي...شنو اي شئ
فرك وجهه بتوتر...اوووف شتاكليين
جاوبته بهدوء...همبركر
دفع رجليه وكعد كال...سويلي لفه
وكفت دا اسويله لفه كليت وكملت انطيته اله كال...اكعدي
كعدت مقابيله وضليت اكل بس تلعثمت ما عرفت شلون اكل وهو كل شويه وطال النظر بوجهي
كال...جولييت انتي متخبله هاي الايام شبييج
ضحكت بحزن...لا سلامتك ما بيه شئ مثل ما تحب ومثل متشوف ...
جر نفس...انتي تجاوزتي وياي وخليتني اضربج شنو نذل مو عيبب
رفعت اكتافي...عاد انت مو دكول بربوك اشو ما ازعل منك ولا اثور عليك هسه من كلت نذل حصلت راشديين ...
ركز بعيوني ...افااا اني من اكلج هل كلمه جانت شقه بس انتي حجيتيها بتجاوز عبالك ضامه شئ
ابتسمت...ضامه هوووايه جاااسر انت وهاله متفق ضدي وهي دكول يراسلني ونخلص اليل كله نسولف انتي زوجي لو مهما تكون حالتنه ومهما تكون حياتنه الخيانه مو حلوه
وهاله حية تبن تستغلك ضدي وانت تستغلها هماتين ضدي عبالك اني طوبه وكل شويه واحد رافسني بمكان
بشرفك بداعة بنتك لو اني اتراسل ويه غيرك ترضاها
عاد هو ثار عليه ولزمني من فكي هز جان واكف واني كاعده كال...شحدج غير ادفنج بمكانج
ابتسمت...يعني اذا تواصلت ويه غيرك اعتبر نذله موو؟
رد من بين اسنانه ...وستيين نذله
رفعت اكتافي...عجيييب من ناحيتك غفور رحيم ومن ناحيتي شديد العقاب بابا اني من كلت نذل بس دا اقصد علئ تواصلك ويه هاله
رد بتكذيب...ممتواصل وياهه اصلا هي نعاليش واتواصل وياها لو تضل اخر وحده ما تغريني ولا اهتم الها عندي شغله وياها وخلصت وهذا هو راحت بطريقها...
جريت نفس...لو تتواصل ويه العالم كله ما اهتم بس هاله لاااا لان هاله عدوتي ودماري كله من وراها هذا الصار بيه هي السبب بي اتهمتني باطل ولحد الان تتهمني ...
والله والله اذا اجت لهذا البيت بعد اكتلها حلال وعود انت افصل بمكاني
رفع حاجب وهو يخفي ابتسامه...المايعه صايره قووويه ما تنجرعين
رديت بثقه...تربيتك ابو رضاوي تربيتك
كرص خدي حيييل وجاوبني...خووووش اربي والله سويتج لبوه بعد ما جنتي بزون عميه ..
ضحكت...ونعم منك ومن تربيتك كاسر قلبي
بلع ريكه ورجع كعد مقابيلي كال ...جولييت اني محد حاس بيه اني مجاي اتحمل الدنيا ضايگه بعيني مرات افكر كون اموت واخلص
انتفض كل جسمي من كلامه...ليش تموت انت ليش اناني وتفكر بس بنفسك يعني لهلدرجه مجتبئ ومرتضئ ما الهم خاطر عندك ...
مو جنت دكول احب الحياة لان غزل موجوده بيها ليش شنو فرق غزل عن مرتضئ ومجتبئ ...
لو غزل امها شام تحبها انت بس ولدك امهم جولييت وانت تكره جوليييت...
ليش جاااسر ليش لان اخويه مجرم وانتهك حرمة بيتكم حقك ما الومك ان شاء الله عاصم تاخذه الحكومه وتسجنه وان شاء الله تطلكني واولادنا بينه
وتزوج والإحسن مني اذا تكرهني مو مبرر تكره اطفالك وكارهه الدنيا واهلها...
يعني مجتبئ ما يعز بعينك ما تفرح من تشوفه يضل يصفك وفرحان من يشوفك ومن تروح وتعوفه ينط من البجي يريدك...
رد باستنكار...لا بالعكس أطفالي رحمة اجتني من رب العالمين وتعويض عن الراح بس مو بيدي نفسيتي تعبانه وغليلي ما شفه جرح بنص گلبي لحد الان ينزف
ابتسم بحزن...راح افتح جزء من گلبي وشوفي شنو بداخلي
ألم علئ فراگ شام وألم علئ رجعتها...
الصار وياي صعب محد يتحمله اول حب واول زوجه فاركتها والنوم جافه عيوني وين هي اي عذاب تعذبت شنو الي قاسته شنو القسوه الي تعرضت الها..
واك. احساس بداخلي يكول رجوع شام قريب وهل شنو مخربط احوالي شلون اذا سالتني عن غزل شنو جوابي ما حفظت امانتها الوحيده تخيلي بس لو كلتلي جاسر وين بنتي
ام هاااي ام شلون تتحمل اذا كلتلها ماتت انتي ردت اخذهم منج تخبلتي وانهرتي،وزعلتي وصار عندج انهيار وصرع...
شلون اكلها بنتج دفنتها بيدي،وتركتها برملة النجف...
دمعت عيوني وصرت گوه الوك بالكمه حتئ،ما تنبلع غلبني الحنين الغصه وكعت ببلعومي...
خليت اللفه علئ الميز وسكتت واني استمع اله
اردف بقهر...وثار ابوي واخوي الي ما اعرف من وين طلعلي عساس اني ناقص مشاكل وعاصم حقييير احقر خلق الله ولازم اقتص منه ...
وانتي يا جولييت انتي بريئه والمح الحزن بعيونج وضلمتج هوواي وتجبرت عليج
حرمتج من هووواي امور حرمتج من امج واهلح بس صدكيني هذي بس ببداية ثاري بس بعدها من شفت الحزن غطا كامل عيونج
كلت لااا لا تحرمها من اهلها وحبيت ارجعج الهم بس للاسف الصار ما اكدر احجي ولا اكدر اكسر خاطرج ..
انتي،بدوني تضيعيين طفله وانضلمتي وياي اجيتي بوقت جاسر مو جاسر لا كااااسر
اني فعلا تعبان بس محد حاااس بيه والتفكير احس تعبني احس شريان راح يطك براسي ...
مسحت دموعي...والله يا جاسر اني مجنت ناويه ااذيك ولو بكلمه بس انت استغليت هوايه امور الصالحك
اني من خوفي منك جنت ما احجيلك اي شئ اخاف تضربني اني مثلك والله
عايشه برعب خايفه تاخذ اطفالي مني وتشمرني وصير مثل لبوه فاقده ضناها ومحد مئازرها...
اخاف بيوم من الايام تضربني وتشلني بضربتك لان انت تفقد من تريد تضرب ...
انت مترحم ولا تتفاهم ويايه خليتني اخاف وما اثق بيك ...
ودائما كلامي عندك لا شئ رغم توسلتي اني هماتين تعبت مو بس انت ...
ليش صرت افقد وانهار وانصرع لان المشاكل ما خلت عقل براسي جاسر ملييت والصبر فاقت حدوده عندي ارحمني ولا ترعبني ريحني ولو بكلمه وكول القادم ان شاء الله احلئ ...
جر نفس...ان شاء الله أحلئ...
وكف بسرعه كال بهمس عطشت والله ..
وكفت..دا اروح اجيبلك مي
سحبني واحتضن خصري...والله يا ام مجتبئ نشفتي حلكي وعطشتيني خلي اروي نفسي علئ طريقتي
التهم شفايفي بكل رقه ونعوومه ودفووا...
غمضت عيوني والله صعبه حياة بين مد وجزر يوم يضربني والثاني يبوسني...
ابتعد شويه عنه ومسحت شفايفي،بكم ثوبي ..
عاد هو ثار عليه ورجع باسني بقوه وعنف رجع باوعلي بغضب...امسحي شفايفج وشوفي بربوك ما عاجبهه
ضحكت ودا اريد امسح وبعدها نزلت ايدي...لا مو هيج بس اني هيج طبعي حتئ اذا شربت مي امسح شفايفي...
غمزلي...اي بس بوستي لا تمسحيها...
نزلت عيوني باحراج وهو طلع بره المطبخ بشموخ اي حقه يضرب بكيفه ويبوس بكيفه ههه
بس ميخالف المهم حازم طلع من هل مشكله الحمد لله...
رحت سمعت الاطفال يبجون دا اسوي الهم مميات دورت علئ ممة مجتبئ ماكو نكتت البيت نكت ماكو
لطمت خدي بخوف...عز العزاني ضلت بالخرابه مال جاسر ياربي لااا سترك يارب ...
انوب جاسر هو الي جاب الهم الممات...
......................
وقار...
عمتي ام جابر راحت للسوك وعمو خابروا وراح واني ضليت الوحدي...وريهام اجاها صلاح وراحت
جابر بدوامه ...
خابرته فتح خط كتله بدلع...الو
رد بحب. الو يحلووو
ضحكت...الحمد لله تمام وانت شنو حاب اسويلك غدا حتئ احضر من هسه
جاوبني بلهفه...كلشي من ايدج حلووو مشتاقلج ولج ملعووونه وهااا ترئ اريد بنيه كون مثلج هادئه وبنفس الوقت مكطوع خيط براسها
ضحكت بصوت عالي...ادري دتمدح دتذم
رد عليه بضحكه...منا ومنا صايره تخبلين ومرحه وصابر اشتاق الج بحيث هسه اريد اخذ اجازه واجي
جاوبته بتوسل...اي عفيه حباب تعااال
ضحك ...هههه والله بس اخلص شغل اجي،بسرعه
ضليت شويه احجي وياه وبعدها قفلت الخط ضليت انضف وعدنا دجاجه تبلتها بصاص وكجب ودبس الرمان وليمون دا اسويها شوي...
فرحانه حيييل ومرتاحه اكثر من اهلي وماما كل شويه تخابرني وهي بالنجف كالت شتردين اجيب الج مناك
اني احب طرشي النجف المدبس كلتلها جيبيلي طرشي كالت...ادللي جم وقوره عندي...
امي تصرفاتها مو مثل قبل قبل جانت احسها متحبني وتستعار مني ولو ماكو ام تكره ضناها بس هي تصرفاتها تعكس
يمكن لان ايدي مفقوده هيج تتصرف بس من تزوجت جابر وصديقات ماما كلهن تعجبن علئ جابر ماما مكيفه عبالك جابر متزوجها ههههه
اندك الباب رحت فتحته شويه كلت منووو
هي جاوبت...اني اني ودفعت الباب ودخلت باوعتلها مستغربه يبووو هاي ام داوود شجابها...
وما اشوف اله وراها واحد يمشي علئ عكازه ويعرج
ومتغيير حييل...عزا العزاني داوود
رجعت بصدمه وهلع هو باوعلي وضحك بسخريه...ام ايد المكطومه صارت مره وتتعارك عليها الزلم
عقدت حواجبي ورديت عليه بغضب...اشرف منك ومن امثالك علئ الاقل اني فقدت ايدي واني بريئه وانت اخويه كسرك وخلاك تعرج لان عاار
عاد هو تخبل هجم عليه بعكازته راد يضربني وامه وكفت بوجهه كلتله...عوفها هاي حسابها بعدين احنه جايين نعتذر من شيخ عكاب
ضحك باستهزاء...تمام تمام نشوف بعدها شنسوي
دا اطردهم واجه عمي اول مره ما استقبلهم بس بعدها كلكم تفضلوا...
هو فات مني وكال...حليانه اخت الكلب...
جاوبته بحده...ما غيرك كلب
عفته ودخلت جوه واني افور هذا نيته مو صافيه يجي جابر واكوله عليه...
..............................
ريهام...
صلاح راح يجيب التحليل واني منتظره علئ نار وخايفه ومرتبكه دخلت جولييت كالت...كولي يالله رهومه ان شاء الله مابي شئ
ابتسمت بقلق...والله يا جولييت ما متطمنه بس اكول ان شاء خير...
لزمت ايدها اطمنها...ان شاء الله والله انتي ما تستاهلين حبابه وكلبج نظيف بس المؤمن مبتلئ خلي املج بربج كبير
جريت نفس...ونعم بالله
اجه صلاح ركضت عليه ملهووفه كتله...هااا بشر صلاح
ضحك كال...لكيته معزل الدكتور ان شاء الله باجر اجيبه
همست ...ان شاء الله
خليت وطلعت اني وجولي رغم ماكو التحليل بس ارتاحيت الحمد لله خايفه منه حييل ياريت صلاح ما يجيبه...
كعدنه بالحديقه والعروس الجديده ماخذه البيت حاصل فاصل بس وحده تجي من السوك هي تجي تركض تنزع جواريب رضيه وام فلاح وتغسلهن وتغسل العبي مالتهن...
وهنه مكيفات رضيه تموت عليها وكل شويه وعاركت جعفر لان جعفر يصنف عليها ويقصف بيها...
اتصل موبايل عمتي ام فلاح كالت باستغراب...هاي نوال...
ردت شهد بغضب...اهووو هم وجهه الطاوه ما نرتاح منها...
عمتي ضلت تحجي وياها وبعدها ضربت صدرها بفجيعه...عزا الغزاج ولج شلون حامل ومن شوكت اصلا جعفر شوكت نام وياج
اني باوعت الجولييت وجولي باوعت الشهد الي احتقن وجهها وفارت اعصابها...
اردفت ام فلاح...من جان سكران بعرس وقار هو دخل عليج عزا بعينج كووون...
قفلت الخط وباوعت الرضيه بخذلان ورضيه هزت راسها باسئ
دخل جعفر وهو يفر بسويج السياره هجمت عليه شهد ورضيه وام فلاح كلوله نوال حامل ...
رد بصدمه...شهل كلاوات هو اني شايف وجهه انوب انام وياها وحامل تاكل نعل جذابه
رضيه...دكول من جنت سكران بعرس وقار
جاوبها باستنكار...جذابه يمعوده والله جذابه ختلي،هاي انوب حامل انتحر احسن الي
خاف الجني حبلها مو هي دكول يغازل بيه ويفتر عليه بشورته
امه ردت بغضب...جعفر لا تخبلني احجي الصدك انت متقرب منها لو لا
رد بصدمه...هو اني من اشوفها ابتعد مترتين مو انوب اتقرب منها ...
بس الله اعلم يجوز واني سكران اعتدت عليه جذابه والله لو صدك حامل انتحر....
ويييع انوب وجهه الطاوه حامل بكد حبوبتي وحامل اصلا هي بعد متخلف
ضربته رضيه علئ كتفه...ولك لا تكعد تقلد احجي الصدك وبعدين هي منيلها جبيره صغيره البنيه كل عمرها 35
جعفر بغضب...دخلي تولي ام الشفط والنفخ والمعط دخلي اعترف بيها انوب اعترف بابنها...
شهد جانت تنفخ وبعدها خلت وراحت متعصبه الغرفتها...
بس والله انقهرنه عليها بعدها عروس وتنصدم بحمل نوال ...
...........................
جابر...
خابرني جاسر كال بكل عصبية وغضب...تعاااال للبيت القديم
قلقلت واستغربت ما لحكت اسال شكوو لان قفل الخط
ركبت سيارتي ورحت للبيت القديم وكل شويه واتصل وهو ينطي مشغول
شكوو باربي شصاير معقوله كتل حاااازم...
وصلت للبيت فتحته ودخلت بس اثار انتباهي القفل مكسور انهبطت وارتعشت اصابعي...
شفته كاعد علئ القنفه وحاط راسه بين كفوفه ...
وصلاح واكف علئ الشباك الطويل الموجود بالغرفه
اول ما رفع راسه اليه رمقني بنظرات حاده باوعتله بتساؤل...خير شكووو اشو وضعكم ما يطمن ...
وكف بكل جبروت وتقرب مني...انت هربت حازم
باوعتله بذهوول وبعدها هزيت راسي بنفي....
ضحك بسخريه...تخوني جابر
رديت بقسوه...الخيانه مو ثوبي ولا اني اهل الها كافي جاسر تماديت هووواي واني دائما محط شكوكك
بس والله مو اني ولا مهربه
غمض عيونه بقهر وبعدها ثار بحده ورفس الكرسي برجله...منووو بس لو اعرف منووووو والله اخنكه بيدي
مستحيل مستحيييل حازم يطلع من كيفه القفل مكسور والحبل مفتووح ...
حطيت ايدي علئ كتفه...كول يالله واكيد نعرفه بس انت اهدئ احتمال تكون هاله يعني مو معقوله تضحي بابن عمها
هز راسه بنفي....لا ما اعتقد اصلا هاله ما تندل هذا البيت شلون تكدر تخبر عنه
جريت نفس...اي هم صح بس يجوز هو حرر نفسه...
ضحك بقهر...جابر رجاءا اسكت شنو حرر نفسه منو هو سوبرمان
ضل يمشي ومتوتر ويفتر بالغرفه عثر بشئ باوع للارض ورفعها ممه بيها حليب ربع تقريبا وكزاز بيها حافظه مطاطيه لونها سمائي فاتح...
رفعها وباوع الها بذهوووول ضل مركز عليها كال...جابر اكثر شئ يذل شنووو؟
جاوبته بثقه...القهر
همس بوعيد ...بسيطه جولييت بسييطه
نهاية البارت...يتبع
كونوا انتم كونوا بخير...احبكم 💔
نور سمو العراق 😘
بنات باجر اعتذر منكم ما انشر لان عندي امتحان وتقريرين وحتئ الخميس عندي امتحان بس ان شاء الله الخميس انشر....😍
المهم يا حلاوات تابعوا حساب وئام الشيخلي وكتابها الجديد الخاص بقصة جولييت واسرها snwn2231
ولا دكولون بارت قصير ترئ والله طووويل كل البارتات طوال بس انتم مدري شبيكم 😂
اذكركم شبية جوكلييت 😍😂💔
سوالف طلحه😂
لا تنسوا التصويت والمشاركه بكم نكتمل 🌹