صدوا وانا من عزة النفس صديت

4

البارت الرابـــع..
مدخـــل ..
اعذريني .. فليس قلبي عندي
لم أخنْ حُبّنا ولكنَّ قلبي
فرَّ مني .. في لحظةٍ هوجاءِ
إعذريني .. فالنار تشتاقها الأضلعُ
إن كابدت صقيع الشتاءِ..

المرحوم ..غازي القصيبي

رعد بوعد\هذا إعتبريه هدية ملكتنا..ماقدرت اجيب المهر الى هنا المسافة بعيدة..بس بكرة لما تصيرين عندي بيكون المهر لك..
اسمه ( معدي )..
بوقتها حست انها ماتفقه اي لغة تعبر فيها عن شعورها من مفاجئته الغير متوقعة ابدا..
هي تعشق الخيل ولا بحياتها ملكت واحد او ركبت عليه..
تستغرب كيف عرف عن حبها للخيل..كيف كان يعرف اشياء كثير عنها..
بس مايهمها ماتبي إلا تتمسك بسعادتها معه..هذا الانسان دخل حياتها مثل العاصفة وهي راضيــة يعصف فيها وياخذها لاي ارض المهم تكون معه..
ولأول مرة بحياتها..كانت اول قبلة من رعــد على شفايفها..يسرق منها دهشتها وشكرها ووعد من قلبها إنها تبقى له لوحــده..
شفايفها بعذريتها أستنفرت ورفضت هجومه المباغت عليها..
شهقتها أنخمدت بتقبيله لها..المشاعر المتضاربة بداخلها من رهبة وخوف وفضول التجربة..وزاد عليها يدينه المحتضنة لخصرها..
وممانعته تركها تبتعد عنه..

بلحظات هو أبعدها عنه وسمح لها تتنفس وهي تسمع صوت جدتها..تعلي صوتها وهي تناديها وكأن العذوب تعرف وش ممكن تشوف اذا وصلت لهم..
بقفزة صارت حنين بعيدة عن رعــد ثلاث خطوات وتحاول ترتب شعرها وشكلها..من بعد القبلة المسروقة من حبيبها رعــد..إيه هي صارت تعتبره حبيبها..هو زوجها والي يحاول يثبت حبه واحترامه لها بكل مايقدر..هي مابعمرها حبت او فكرت بشخص كبطل لمراهقتها..وحتى الاعجاب يمكن انعجبت باعلامي او فنان..
لكن هذي المشاعر اللي انولدت بداخلها على يدين رعد..حابة تكبرها بداخلها..بتسقيها باهتمامها فيه وبتحاول تجاريه بحبه لها..
مشـــاعر جميلة وتحس الدنيا كلها ملك لها..
وفعلاً مع الايام ومع زيارات رعد وهداياه المميزة قدر يتملك قلبها وروحها..حاضرها ومستقبلها..والاهم قدر يتملك حنين وسديم..

&&&&&&&&&&&&&&&&&&&&&&&&

مــرت أيام كدت ألفظ فيها قلبي من مرارتها..
وكنت أشعر أنها لن تمر..
لكنها مـــرت..
وهذه الأيام ايضاً ستمر..

تنهدت سديم بتعب..وهي تعقد روب الحمام حوالينها وتنام تحت مفرش السرير الناعم..توها تصحى من نوم كان اغلبه انين تعب بسبب مفاصلها وعظامها المتوجعة..بغرفة أنيقة تشبه صاحبتها المتفهمة لخوفها او بالاصح رعبها..تشكر الله إنها قدرت تتحمل الوجع الجسدي بعد المسكنات الي اعطتها ايرم..
الرجفة لازالت بعظامها والضعف تسربل بكل خلية بجسمها..
بس ماقدرت تنام بدون ما تتحمم وتبدل ملابسها..الانسانة الطيبة الي حضنتها وساعدتها ترقى الدرج وجلستها بالغرفة وقالت هذي غرفتي بتبقين معي لحتى ترتاحين وتستوعبين وضعك..
طلبت مني استوعب وضعي وكانها الوحيدة الي حست اني كنت بدوامة..عاملتني وكانها تعرفني..وكانها مرت باللي مريت فيه..ما سالتني انتي مين؟ وش قصتك؟ هلي وش فيهم عليك؟
كانت اسئلتها غير..إنتي بخير؟ تحسين بوجع؟ إنتي بردانة؟ إنتي جوعانة؟..
أسئلة خلت العبرة تخنقــني..لأني من زمان ما احد سالني بهالحنية إلا حنيـــن..وكان لازم اكذب على حنين واقول انا اكلت رغم اني جوعانة..أنا دافية مع اني بردانة..انا مبسوطة لكن الحقيقة كنت حزينة..
وهالانسانة الجميلة الحزينة مهتمة فيني..إيه هي حزينة..الفاقدين أحباب بعيونهم لمعة غريبة..إنطفاء مضــيء..
ساعدتني اتخلص من عبايتي وبعض ملابسي..جهزت لي الحمام وملابس دافية ظلت قريبة مني..ورجعتني للغرفة حاولت تساعدني البس بجامة بس خجلي ماسمح لي..وفضلت انام بروب الاستحمام..
عضلات جسمي كلها تعورني..عساك المرض يارعــد وعمك المجنون الاهبل..الى هالدرجة يارعد تكرهني وتكره حنين..
تزوجني بمجنون..مو انا اللي قلت لي بيوم انك أخوي.. وانك بتاخذني معك انت وحنين..
ظلمتنا معك وحطمتنا..كنت محتارة ابيكم وابي امي عذوب.. وانت تقول كل اسبوع بنزور عذوب.. بس امي كانت تقول وش دخلني اروح معكم وابوي وهلي موجودين..
ماكانت امي العذوب واثقة فيك..ماتسمح لانفرادك بحنين اكثر من دقايق واكون معكم رقيبة لكم..خليتنا نحبك وننتظر زياراتك..
انا حبيتك حب الاخ الي ماملكته ولا عرفته.. وبعد غدرك قدرت اكرهك واحقد عليك..
بس حنين حبتك حـــب الأنثى العاشقــة .. إنت كنت مهووس فيها ..بس قتلتها بغدرك حطمتها.. دخلت حياتنا وشتتنا..

جلست بخوف ومسحت دموعها لما سمعت صوت عند باب الغرفة.. وكان فيه احد يبي يدخل وفيه شخص يمنعه..خافت أرتعبت ماتبي تواجه احد لانها تعبانة وجسمها بادنى حركة يعورها.. مابتقدر على حرب ثانية ..
شهقت بخوف لما دخل يوسف وهو شايل ايرم مثل الدمية بيد وحدة تحت ابطه وكانها كيس طحين..
وتسمع ايرم تهاوشه وتهدده بجدها ورعد ومساعد.. وهو بغير اهتمام يمشي بالغرفة ورماها على الكنبة وتوجه للسرير وبثواني صار وجهه لاصق بوجهها ويبوسها على خدها..
يوسف بفرحة\صباح الخير لعبتي..صرنا عصر وانتي نايمة وهذي لعبتي القديمة غيرانة منك عشان اشتريت وحدة جديدة..
سديم اللي تخشبت بمكانها مصدوومة بالبوسة اللي اخذها منها يوسف..كيف يلمسها بالشكل هذا كيف يسمح لنفسه يقرب منها ويبوسها..هذا المجنون وش بيسوي فيها..
كان لازم تتصرف وتخليه يخاف منها ولا يعيد الي سواه..
بلحظة شالت الكاس الي على الكمندينو بجنب السرير وضربته فيه على مقدمة راسه.. أنكسر الكاس وخيط من الدم نزل من اعلى راس يوسف..اللي شهق بالم ورفع يده يتلمس جرحه ولما نزل اصابعه وشاف الدم ضحك بقوة وبعدها أنهار وصار يصارخ ويقول لايرم انه بيموت..وان لعبته قتلته ..
ايرم المفجوعة من تصرف سديم قربت ليوسف وضمته تهديه وتقوله جرح بسيط مايموت..بس يوسف استمر بهيجانه وخوفه..
وصراخه يعلى لحتى سمعوا صوت رعد ينادي ايرم من ورى الباب..وقفت سديم بالم وهي تجبر جسمها التعبان يطيعها وتسللت للحمام وقفلت الباب عليها..
ناظرت يدينها الي ترتجف بخوف وقطعة زجاج صغيرة بطرف اصبعها..شالتها ورمتها بالسلة..ناظرت المراية وغسلت دموعها قبل تنزل..ورددت على نفسها كلمات تقوية..
سديم\مو ذنبي ان مات او زاد جنونه..هذا ذنب جديد ينضم لذنوب رعد.. انا قلت له اذا قرب مني باقتله.. هذا درس للمجنون وان قرب مني مرة ثانية طعنته بقلبه..ماباكون ضحية جديدة لك يارعد ولا لعمك..

سمعت صوت رعد يكلمها من ورى الباب..وايرم كانت معه تهديها وتقول لها ان يوسف بخير..
سديم بجمود\مايهمني إن كان بخير..خلي الاهبل يطلع من الغرفة وهذا المجرم الي اسمع صوته خليه ينقلع..
رعـد\ بديتي بجنونك يا سديم؟؟
سديم\لا واللي خلقك باقي ماشفت من جنون سديم شي..بيصير مجنونكم عاقل عندي..
رعــد\وش سوا لك يوسف؟؟ هاجمك ؟؟
سديم\تخسي انت وهو..انا قلت لك باقتله ان قرب مني..
رعد\سديم إنتي مو قد يوسف..بلحظة ممكن يقضي عليك..
سديم\مو هذا هو هدفك..بس يمكن ماتبيه يقتلني الحين مو قبل لا تلقى حنين..
رعـد يبتسم\تتوقعين ابيه يقتلك.؟
سديم بغصة\أكيد تبيه يقتلني..تبينا نموت أنا وحنين..هذا الشيء الي فشلت فيه قبل سنين رجعت الحين تنفذه..
رعد بصدمة\لا..غلطانة ياسديم..موتك انتي وحنين رعــب لي مو أمنية..مستحيل كنت اتمنى هالشي لكم..تسمعيني..

ماردت عليه سديم وظلت تناظر الباب وكانها تشوفه واقف وراه يقول ما يبي موتنا..وجرايم الماضي يارعد وش تسميها..
لو ماخنتنا لو ماغدرت فينا ماتلوثت يدين حنين بدمك.. ولا كنا تيتمنا من بعدك..وفر كلامك واعذارك..

جـــايب عذرك بعد طول الغيـــاب..
وش يفيد الــورد في ليلة عـــزاء ؟..

&&&&&&&&&&&&&&&&&&&&&&

نزلت ايرم بخطوات سريعة على الدرج تحاول توقف رعــد إللي يسحب يوسف من رقبته وينزله معه..وهو يهاوشه ليش يخرج من بيته ويجي لبيت جده..
وصلت لهم باخر الدرج وسحبت يوسف من يدين رعد وخلته وراها..ووقفت بوجه رعــد..إللي تفاجاء بموقفها..
ايرم بعصبية\خير تسحبه وراك مثل الذبيحة..كل هذا غلطك انت مو غلط يوسف..إنت الي اخذته معك وزوجته وانت تعرف حالته العقلية..وجبت هالمسكينة وانت مرعبها مع يوسف والمستبد مساعد معك..يوسف ما الومه ولا باشره عليه..اللوم عليكم اثنينكم..
رعــد\دورك الحين يا ايرم..؟
ايرم\ايه دوري..إنت اخذت يوسف ولا عطيتني خبر..كنت مثل المجنونة وانا ادوره حتى ماقلت لجدي انه مختفي..وسعود هو الي قالي انه معك..
رعــد متقصد\كنت بازوجها لمساعد لما طلب مني يتزوجها..بس شفت يوسف يناسبها اكثر..اثنينهم مجانين شفتي كيف بطت راسه..
ايرم ببرود\لو يبيها مساعد اخذها من فوق خشمك..
رعد بضحكة\زيــن إنك تعرفينه وان كان يبي شي بياخذه..
ايرم\مايهمني امره..ألحين اتكلم معك عن سديم المسكينة..
هذا عمك انت مسئول عن تصرفاته..والله شالني وقطني من طريقه..ودخل عندها من غير حسيب..من بيقدر يعقله؟؟
رعـد يهدد يوسف\يوسف باعلقك من رجلينك وبالمقلوب إن شفتك بهالبيت..بتبقى هناك عندي في بيتي..حن هناك رجال.. وهنا ببس بنات..بتبقى معنا صح؟
يوسف بعناد\أحب البنات ما ابيكم..

رعد بسئم سحبه من رقبته مرة ثانية..ومشى وهو يقول لايرم\روحي لها واحذري من لسانها المنشار..
ايرم بقهر\لا تمسكه كذا والله باعلم جدي..
رعد\خلي جدي يرتاح اليوم..يكفيه مساعد امس ضايقه بسببك انتي..
ايرم بصدمة\وش دخلني انا..؟
رعد\أصلحي إللي هدمتيه يا ايرم..المساعدين ماعاد فيهم صبر..

مشى وهو تاركها وراه ويوسف معه يحاول يسحب نفسه منه..
كان جاي يتطمنن على جده بعد ضيقته من مساعد..وسمع صراخ ايرم ويوسف..بقى تحت لانه مايقدر يطلع فوق الدور كله مخصص لايرم..ظل ينادي من تحت عليهم بس ماسمعوه من الصوت العالي.. كان مصدوم كيف خرج يوسف من جناح فهد المقفول عليه..بس هو عسكري واكيد النزول من بلكونة مو صعب عليه..
اضطر يطلع لفوق وهو يرفع صوته وينادي على ايرم..
ولما نادته وسمحت له يدخل الغرفة الي سمع منها صوت يوسف المهتاج..دخل وشاف حالة يوسف والدم على وجهه..
وايرم ملتفة بجلالها..ويدينها تحضن راس يوسف تبيه يهدا..
وصل لهم بخطوات سريعة ومسك راس يوسف يناظر بجرحه..
خاف لا يكون الجرح بوجهه..لا يكون سديم ناوية تعيد جريمة حنين لما جرحت وجهه بكل حقد..
رعد يسال بعصبية\ليــش ضربتك؟
يوسف ببراءة\بس بستها حتى ماقلت لها انتي حلوة..
رعـد بعصبية\مو قلت لك لا تجي هنا؟؟وش جايبك؟
يوسف\بيتنا..وين اجي يعني
ايرم\ايه بيته وين تبيه يروح..البنت مرعوبة منه..
رعد\راسك مافيه شي جرح سطحي..بس اذا جيت هنا مرة ثانية بتضربك بشي ثاني يفجر راسك..
ويمكن سلاحك الي مدري وينك مخبيه..
ايرم بخوف\مو سلاحه مع سعود؟؟اذكر قال انه معه..
يوسف بمرح\لا مسدسي معي..
ايرم بشهقة\رعــد يرحم امك تصرف معه..كنت احسبه مع سعود طلع يكذب علي..
رعـد بوعيد\باخذه منه معليك انتي..وانت اخرج بالصالة لحتى اجيك باشوف البنت المجنونة مثلك..
يوسف بعناد\انت روح اجلس برا انا باشوف البنت المجنونة مثلك..
رعد بحركة سريعة كتف يدين يوسف وخرجه من الغرفة وقفل الباب..وناظر ايرم يسالها وين سديم..
ايرم\تخبت بالحمام..اكيد خايفة من يوسف.

يعرف انها خايفة من يوسف..واكيد خايفة منه ومن المكان الجديد..يسمعها تقول لايرم انه مايهمها اذا مات يوسف..
ابتسم لانه يعرف انها تتصنع القوة..وهذا الشي عاجبه..مايبيها تكون ضعيفة لان امامها مشوار طويل معه ومع يوسف..
والاكيــد له هو مشوار طويل معها ومع حنين ..
صدمته بكلامها انه يبي موتها هي وحنين.. ماكانت هذي رغبته او خطته..موتهم ماكان القضية..بس حنيــن لما انتقمت منه قررت تقتله..

&&&&&&&&&&&&&&&&&&&&&&&

جالسة جنبه ماسكة يده الجميلة رغم علامات ظهور علامات السنين 75 الي هي عمره..تبوس كف يده الحنون وهو كردة فعل ابدية مستمرة معه من طفولتها رفع كفها وقبلهها..
ابتسمت لحبه الكبير لها وقربت منه تحضنه..كانت حاسة ان فيه شي مضايقه وقاهر قلبه.. لما صلت الفجر معه انتبهت على رجفة يدينه وعلى الضيقة اللي حاول يدفنها بالاستغفار..
فكرت يمكن بسبب زواج يوسف..او لانه زعل من حال البنت الي شكله يعرف من يكون ابوها..او يمكن لانه شاف مساعد وتواجه معه وجه لوجه بدون مايصد عنه..
بس رعــد اليوم قال لها ان مساعد السبب بحال جدها .. وهو زعل جدها بسببها هي..وش يبي هالمساعد وليش يزعل جدي.. مو قلت خلاص ارجعوا لبعضكم مالكم شغل فيني..وهو الي مسكتبر ومكبر راسه على جدي وعلي..
على اساس كبريائه مايسمح له يرجع لبيت انطرد منه.. بس عشان رعد عادي يرجع البيت باي وقت ولو بنصف الليل ..
ايرم بمحبة\وش رايك نروح المزرعة وناخذ سديم معنا.. يوسف بيتعبنا معه ناشب لها يقول لعبة جديدة وانا القديمة..
الجد يبتسم بحسرة\هالولد يالله ماسكينه عاد تزوج الحين وش يفك بنت العرب منه..
ايرم بمحايلة\عشان كذا اقولك نروح لمزرعتنا..نغير جو ونبعد سديم عنه وهو يبقى هنا مع عيال عمي..
الجد مساعد\مالي حيل للمزرعة خليها الاسبوع الجاي..
ايرم برجاء\لا والله الا نروح اليوم..وبعدين انا مشتاقة لفرسي وانت اكيد مشتاق لابلك وحلالك..
الجد\وشغلك يا أمي ..؟
ايرم\عادي مشوار ساعة وانا فيه ومشوار ساعة وانا عندك..
الجد بتعب\لا خليها بعدين نروح..
اسرم بمحبة\خلاص نأجلها كم يوم عشان خاطرك..

هز راسه الجد مساعد وبدأ يشل بصوته شيلة كثير سمعتها منه ايرم..ولا يتغنى الا باسم مساعد..

يقولون يامساعد لا ضاقت عليك فغن
ترانا نغني يامساعد الي منا
لحقنا من الضيقات مايلحقك لكن
مساعد معه وجهة نظر خافيه عنا
وانا البارحه من يوم ضاقت وصدري حن
بديت الغنا منا وبان الحزن منا

ايرم غصت بعبرتها لما شافت كيف جدها يشل بشوق عن مساعد.. كيف زعلك وش قالك وضيق قلبك..مستحيل مساعد يهون عليه يكدر خاطرك..
سامحني يبه..كان لي حق احكم..كان لي حق اعتب وازعل واحاول افرق الصفوف..ما الوم نفسي ولا اقول اخطيت يوم اني حكمت..كان الحق معي..
بس محبتي لك خلتني اسحب حكمي من عليك..
وانا بحكمي ماربحت إلا خسرت..
خسرتك انت وخسرت مساعد..

يمكن مساعد ينتظرني اعتذر له عن حكمي.. يجرحك من جرحي له..باعتذر له يبه وبيقبل العذر مني..
بس أنا لي بقلبي عليه عتاب ولا باقبل اعذاره..
بأروح له وإن شاء الله بيطيح اللي براسه ويرجع لك..

&&&&&&&&&&&&&&&&&&&&&&&&&&

كمحارب يحمل قدمه بدل ان تحمله..
كان يظن أن بإمكان خيط وإبرة اعادة كل شيء لطبيعته..

فتحت سراب الباب وأنصدمت بالحالة المؤلمة الي كانت عليها قصايد..مدت يدينها واخذت الشنطة السفرية الصغيرة من يدين قصايد ونزلتها بالارض ورى الباب المفتوح..
ورجعت تمد يدها لقصايد تحاول تسندها..خطواتها وكانها خارجة من معركة وهي الخسرانة فيها ..الارهاق الي بوجهها يثبت عدم راحتها ولا نومها..وش صاير معك ياقصايد..
من سبب هالحالة الغريبة الي انتي فيها..وكأنك فاقدة روحك..وكأنك تعزين شي غالي..

سراب بخوف\قصايد وش فيك؟؟من يومين انتظر منك خبر او شي يطمني.؟وش صار لك؟؟
قصايد بندم\تــأخرت عليها..ضـــاعت مني خلاص..
سراب\مين؟؟قصايد وش صار؟؟خوفتيني..
قصايد بتعب\ويــن عيالي..؟
سراب\نايمين من وقت..

ابتعدت قصايد عن سراب ومشت بخطوات بطيئة لجهة الغرفة الي اشرت عليها سراب..دخلت وهي محتاجة تنهار..
محتاجة تبكي وتندب ضياع سديم منها..
توجهت للسرير المزدوج الي نايمين عليه عيالها..بامان براحة بطمئنينة..خلعت عبايتها وجزمتها..ودخلت بالنص بينهم..
ضمت يدينهم الصغيرة لها وباستهم..تبي تصيح وتبكي..
تبي تنهار وتصارخ مثل الاطفال لحتى يرجعون لها سديم..
بس دموعها متحجرة من سنين..
قصايد بحزن\تأخرت على سديم..أوهمتها بالخلاص وتركتها لهم..
هــزيم ماتغير..باقي حاقد وقاسي..رجع يخون ويطعن..سلبني سديم..مثل ماسلبني حياتي واختي من سنين..مابيسلبكم مني..
والله لاخذ روحه المجرمة..وأعيد جريمتي الف مرة لحتى انهي حياته..لو فيه خير فيكم ماخسركم..سامحوني على الي باسويه سامحوني..

سراب ماقدرت تتحمل كل القلق الي مرت فيه..ماقدرت تتحمل كثرة التفكير والخوف الي حست فيه بغياب قصايد لمدة يومين ولا سمعت عنها خبر..
قربت من السرير وسحبت قصايد من يدها انتزعتها من بين الطفلين الي مو حاسين بشي من كثر ما اشغلتهم سراب بالحديقة وبالالعاب الجسدية من ركض وهواش عشان ينامون نومة عميقة بعد التعب..
قصايد حاولت تسحب نفسها من سراب وتبقى بين عيالها..
بس كلامها وجريمة وسلب وكل هالامور خرجت سراب من احترامها لخصوصية وتباعد قصايد وقررت تسحب الحقيقة منها..

سراب بهدؤ\قومي على حيلك تحممي والحقيني المطبخ باسوي لك عشاء خفيف..
قصايد\مابي شي سراب خليني براحتي..
سراب بعصبية\قلت لك قومي استرجعي نفسك..والحقيني المطبخ قبل اعصب عليك ومايصير خير..

خرجت قصايد معها من الغرفة وقفلتها على النايمين..وجهت قصايد لدورة المياه وعطتها روب الاستحمام..
سراب\لك عشر دقايق..قصايد تعرفيني ان بغيت اي شي باجيبه ولو هو بفم الذيب..اعقلي وتعالي فهميني وش المصيبة الي انتي فيها..
ما أهتمت قصايد لتهديد سراب..وقررت تتحمم وبعدها تحاول تلقى طريقة تخرج فيها سديم من حياة يوسف..

خرجت من الغرفة بورب استحمامها وشافت سراب جالسة تنتظرها على الكنبة وباين عليها التصميم لتفهم المتاهة الي عايشتها قصايد..
جلست قصايد وهي تحرك شعرها بيدينها تخفف من قطرات الماء

سراب بهدؤ\كلــي توست خفيف..على الاقل يسندك شوي..
قصايد مدت يدها واخذت كوب القهوة المُرة..وشربت مها بدون ماتفكر تاكل..
سراب\قصايد..من سديم؟؟وليش اخذها رعد؟
قصايد\طفــلة..يحاول رعد يسلبها حياتها مثل ماسلب غيرها حياتهم..
سراب\وش قرابتك لها..؟؟
قصايد بغصة\ أخــــتي ..
سراب بصدمة\عندك إخت .؟؟وين كانت طول هالسنين الي عرفتك فيها..؟؟
قصايد\كانت بمكان أنا مسيطرة عليه وعلى اللي فيه.. بس الحين صارت بمكان مالي فيه اي قوة او سيطرة..
سراب\كيف أخذها رعد..؟؟إنتي وش علاقتك برعد؟؟
قصايد بجمود\علاقة قديمة أنتهت قبل تبتدي..رعــد صحى من غيبوبته ويبي يكمل من المكان الي وقف فيه..
وكانها مامرت سبع سنين..أخذ سديم وزوجها لعمه المجنون..
سراب بشهقة\يــوسف عم إيرم ..؟؟
قصايد بقهر\إيـــــه زوجها ليوسف المجنون..أختي انا محرومة منها..عشان احميها واحمي عيالي .. ويجي رعد ويزوجها لمجنون..
سراب\خيـــــــر باي حق يزوجها لمجنون..؟؟ وايش علاقة رعد باختك عشان يتولى امرها ويقرر من تتزوج..
قصايد\ماله علاقة ولا ولاية عليها..بس الي كانت عندهم زوجوها بغير حق..
سراب\كيــف بناخذها منهم ..؟؟

رفعت قصايد عيونها لسراب..بسبب كلمة نــاخذها منهم..لما جمعت نفسها مع قصايد وقررت تسترجع سديم معها..
قصايد\قلتي ناخذها .؟؟
سراب بتصميم\إيـــه ناخذها اجل مصدقة اني باخلي اختنا معهم سلامات عاد ليته عاقل الا مزوجها مجنون..
قصايد بابتسامة\اختنا..؟؟
سراب\اجل تحسبينها اختك لحالك..قصايد انتي اختي ورفيقة عمر من خمس سنين اعرفك انتي وعيالك..وعايشين بنفس البيت بالنسبة لي انتي اختي..ومايهمني وش تعتبريني..
قصايد\انتي ياسراب مالك اسم..علاقتي فيك مالها اسم.. أحيان اخت احيان نشبة احيان مخربة عيالي..واحيان الامان الي واثقة ان عيالي بيكونون بخير معك..لو ماتعنين لي ماكنت بامنك على عيالي..
سراب\توئمي المختلف فديتهم..وفديت امهم المتكبرة الي مانلقى منها كلمة ترضي الغرور..اممم وبعد نقدر نتطمن على اختك من ايرم..
قصايد\لا..ولا تسالين ايرم ولا تلفتين نظرها لها الشيء.. هي بتشك من وين عرفنا عن زواج عمها المجنون..ايرم خليها علي انا..
سراب\تمام ما باسالها عن شي..
قصايد\ وش صار على موضوع فهد.؟؟
سراب بابتسامة\ابد ياطويلة العمر انتظر اشارتك انا وفريقي جاهزين للنصب..
قصايد\ بكـــرة..ابدي معه بشغل يلهيه ويبعده عن طريقي..
ولا يعرف ان لك علاقة بايرم او خوالها..
سراب\وانتي محسبة اني جايته باسمي..لا ياقلبي حن النصابين ما نستخدم اسمائنا الحقيقية بعمليات النصب..
قصايد\كــفو..أحب النصابين..
سراب\وهم يحبونك يامتكبرة يامغرورة..يالي طالعة حلوة وانتي توك سابحة وشعرك يهووس..وارجولك ياويلي وش هالبياض والنعومة..

&&&&&&&&&&&&&&&&&&&&&&

بعــد سنوات عجـــاف من الإنتظار..
ياله من لقــاء مريــع يتسم بالخطيئة ..!

متـــرددة و خايفة من مســـاعد لأول مرة بحياتها تخاف منه..من رفضه او طرده لها..تحفر راحة يدها باظافرها وتناظر باب المصعد اللي وصلها للدور الي فيه مكتب مساعد..
كان هذا المكان الوحيد الي ممكن تقابله فيه..مستحيل كانت بتروح لبيته وبين هله..
سعود هو اللي وصلها وحاول يمنعها عن الحضور للمكتب بس هي كانت مصممة على رايها..كان بينزل معها ويدخل معها عند مساعد..بس هذي بتكون نقطة ضدها بيعتقد مساعد انها متحامية بسعود عنه..او يمكن يعتبرها استفزاز له..
دخلت مكاتب الادارة وسالت احد الموظفين عن مكتب مساعد..
دلها على المكتب..بس المكتب الي دخلته ماكان لمساعد كان فيه ثلاث مكاتب..وفيه ثنين جالسين على مكاتبهم ..
سلمت وسالت عن الاستاذ مساعد..
ثامر\معــك موعد..؟؟
ايرم\ لا..
ثامر\اعتذر ماتقدرين تقابلينه بدون موعد..
ايرم\ لو سمحت قوله ايــرم تبي تقابلك وهو يقرر..
ثامر باستهزاء\ ولو كنتي ملكة..الاستاذ مساعد مايقابل احد بدون موعد..وعنده اجتماع حاليا..بامكانك تتوكلين..
ايـرم\بانتظر اجتماعه يخلص..أنا ماجيت عشان اتوكل..
ثامر بعدم اهتمام\أجل تفضلي اجلسي على المقاعد الي برا..

ايرم بثقة جلست على مقعد بنفس المكتب..وتجاهلت مطالبته لها بالجلوس خارج المكتب..فتحت جوالها وبدت تلتهي فيه..
بس بعد لحظات بدأ ثامر يتكلم مع زميله بالمكتب وفهمت انه يتقصد يسيء لها..يمكن فكر ينتقم لانها تجاهلت طلبه وجلست بنفس المكتب..استسخفته كشخص..
ثامر\وهذي وحدة ثانية تصف بطابور السيد مساعد..
حميد\لو تشوف الكيكات الي معه بالاجتماع تعرف ان مالها فرصة وهي بنقابها..
ثامر بلعانة\ياشيخ يمكن تحسب انه يبي الملتزمة..
حميد\فديت الملتزمة..المحصنة أنا..تراني احبها ملتزمة..
ثامر\الا اقول حميد باركت للمدير على الحرمة الجديدة..اهب ياوجهه في سنتين متزوج ثنتين..وانا في ثلاثين سنة مامعي وحدة..

صمــــت إذنها عن كل الكلام الي انقال بعد كلمة مساعد تزوج مرتين في سنتين..مـــرتين يا مساعد..يعني كبرت الخيانة وكبرت..
أنا مـــــت بعد ماهو خطب قبل سنتين بيومها شمتــوا الشامتين..وضحكوا الكارهين..مساعدي أنا صار له حرمة زوجة.. وانا الي كنت انتظر متى بينهي حكمه..
مســـاعد إللي قاطعني بدون اسباب..حاكمني بحكمي..عشان يثبت لي انتي ماتحكمين علي..
وبدل الوحدة صاروا ثنتين يامساعد..لو ما الله ثم يوسف بيومها وش كنت باكون الحين.. انت عايش وانا على أطلالك.. أخاف أتخذ قرار بحياتي وانت مو معي..حتى قرار طب الاسنان كان بشورك ولو مو مباشر..
رفعت عيونها الدامعة المقهورة لما انفتح باب المكتب وخرج مساعد ومعه رجل ثاني وبعده خرجوا ثلاث حريم وكل وحدة مثل ماقال الموظف تقول الزين عندي..
تعرف الاعمال مختلطة..وان السوق صار نصه نســائي ..وهي من النساء العاملات الباحثات عن مكانتها بالمجتمع وبالسباق الاقتصادي .. ولكن بلحظتها كرهت كل شي يرتبط بالاعمال والاجتماعات..هذا اجتماعك يامساعد.. تبتسم لهم.. تتكلم معهم
طيب وأنا دلوعتك..الطفلة الي تخليت عنها بايام عزاء أمها..
اللي هجرتها وانت تعرف انك الوحيد الي بحياتها..انت ابوها وانت امها انت الصديقة والاخ..
عشان قالت ابعد عن جدك..عاقبتني وتركتني..طيب كنت حزيــنة يامساعد ليش ماعطيتني العذر وانت الي تعذر عدوك..ما اسرع ما عني تخليت..
وأنا الغبية جاية اليوم واثقة بتقابلني وبتسمعني.. توقعت رفض منك توقعت تعاتبني بحنيتك.. بس والله ماتوقعت استوجع منك هالكثر..

وقفت برجفة وتوجهت لباب المكتب ناوية تخرج من الادارة كاملة..سمعت ضحك الموظفين الي ضحكوا عليها واهانوها من اول لحظة جلست بالمكتب..وكأنهم يقولون شافت البنات وتحسرت على فرصتها الضايعة مع الاستاذ مساعد..وقررت تنسحب..سخرت من نفسها ..معهم حق يضحكون علي..أنا الي ظنيت نفسي مميزة..وعطيت نفسي مكان مو لي..
بس انا ماسويت للموظفين الي جلست عندهم اي مشكلة ولا اهنتهم ولا أذيتهم..ليش كل هذي الاهانة والحقارة..كيف يتطاولون علي وانا ايرم المساعدين ..

رجعت بخطواتها لمكتب الموظف الي تفنن باهانتها..وقفت امام المكتب وشالت المعرف الي على مكتبه باسمه ثامر وتوجهت لمكتب الموظف الثاني وشالت المعرف الي باسمه حميد..
وتوجهت لسلة المهملات ورمتهم بالسلة..امام نظرات مساعد وكل الي بالمكتب..
وبعدها قررت تخرج من المكتب بدون ماتقدم اي تبرير لتصرفها لا لمساعد ولا للموظفين الي اثارت حركتها كبريائهم ورجولتهم..
بان وحدة غير معروفة ترمي اسمائهم بسلة القمامة..
مساعد ماكان رجل متسرع باحكامه او يسمح للحمية والكبرياء تتحكم بتصرفاته..ومن حكمته عرف ان تصرف البنت
مستحيل يكون بدون سبب..مابتجي وحدة غريبة لمكتبه وترمي اسماء الموظفين بالسلة بدون سبب..ومن تكون هالبنت الي غطت عيونها بعد ماشافته يتحرك من مكانه لجهتها.. هو يعرفها يبي يحلف انه يعرف هالبنت الي تصرفها كان استرداد لكبرياء..الاهانة الي قدمتها للموظفين وتعمدت تكون قدام مديرهم ومجموعة نسائية لحتى تنتقم لشي هو مايعرفه..بثواني هي طلعت..وتركته مابين انه يمشي وراها ويفهم تصرفها وبين التحقيق مع الموظفين..بس مو مساعد الي بيمشي ورى حرمة في مؤسسته ويضايقها..
اشر لسكرتيره يرافق ضيفاته لخارج المكتب وتوجه للموظفين الي لولا تواجد مساعد ممكن كان بيكون لهم تصرف عنيف مع الغريبة الي طلعت..
مساعد بحدة\مين البنت الي طلعت؟؟
ثامر بقهر\هذي وحدة جاية بدون موعد..وطلبت تقابلك قلنا عندك اجتماع..وغلطت بالكلام..
حميد\استاذ مساعد والله لولا وجودك كان لنا تصرف اخر معها..
مساعد بعصبية\البنت شكلها محترمة ولا بتتصرف بهذا الشكل الا كرد اهانة تعرضت لها..
ثامر بكذب\هي من اول دخولها المكتب وهي تغلط بالكلام والتصرفات..بس حن احترمنا المكتب وصاحبه..
حميد\حاولت بطريقة غير اخلاقية تخلينا نوافق ندخلها مكتبك..
مساعد بعدم تصديق\مافيه وحدة عاقلة بتجي الى مكتبي..عشان تغلط عليك وعليه بالكلام..وان هي طلبت مقابلتي انا..فاعتقد مقابلتي لها امر خاص راجع لي مو لكم لحتى تقررون..
واكيد هالضيفة لها اسم ..
قبل يتكلم ثامر انتبه مساعد على الاتصال الوارد لجواله من رقم سعود..اشر بيده لثامر ينتظر لحتى يكلم..
مساعد بهدؤ\حياك الله سعود ..
سعود بعصبية\الله لا يبقي فيك عظم سالم قل امين..
مساعد مصدوم\خيــر وش عنده المقدم معصب علينا..؟
سعود\الشرهه ماهي والله بعليك علي انا الي مامنعتها تجيك ولا انت مانت كفو حد يتعنا لك..
مساعد بترقب\من تقصد؟؟من الي تعنا لي؟
سعود\اقول انقلع تبي تسوقها علي..عيال الكلب الي بمكتبك حسابهم معي ..كنت بانزل لهم بس هي اولى ولاني بتاركها وهي بهالحال..
قفل سعود الجوال بدون مايرد على مساعد الي يساله من يقصد بكلامه..
سعود متحامي ويدافع عنها..عن الي جات تقابله ومايدري وش صار معها بمكتبه..ولا يعرف الا وحدة بس من طرف سعود..او بالاحرى هي منهم كلهم..لا يارب ماتكون هي.. التفت على الموظفين وعيونه تصرخ بالغضب..
مساعد\من الي طلبت تقابلني؟؟اكيد عطتكم اسم..
ثامر\ايرم..

الغضب والصدمة والقهر الي تضاربت بدواخل مساعد من غيرة ليش شخص غريب ينطق اسمها..والافترائات الي قالوها له.. تضغط عليهم بطرق غير اخلاقيه..وضحكهم عليها قبل تطلع خلاها ترجع وتشيل اسمائهم وترميها قدامه بالقمامة..وكانها تقول هذا حكمي عليهم وبتطردهم يامساعد..
ما في يوم استخدمت ايرم السلطة والمكانة الي عندها ضد احد ولا هي باللي بتتفاخر بمكانتها او قرابتها من فلان وفلان..
تصرف ايــرم رد اهانة تعرضت لها عنده هو وبمكتبه..
وهو مايكون مساعد اللي تحمل قطاعت امه سنة ونص عشان ماتنجرح ايرم..مابيكون مساعد ان تركهم بدون حساب..
العنف الي تسربل بدمه يحثه يخنق الاثنين الي قدامه بيدينه قبل مايعرف وش صار لايرم بمكتبه بمكانه..
هذي الزيارة الي ظل ينتظرها سنين..أما اتصال..أو رسالة..او طلب..أي شي كان بيتقبله من ايرم
هذا غصن الزيتون الي كان يقول بتمده له ايرم بيوم من الايام..
وايرم خالفت كل توقعاته وجات الى بابه الى مكانه..

قرب من ثامر وسحبه من جيب ثوبه وهو يصرخ عليه بصوت عالي..
مساعد بعصبية\وش قايلين لها؟؟وش صار لها بمكتبي؟؟من انت عشان تمنعها عني من تكــــــــــون ؟؟
وش مسوين فيها..ليه شكتكم لسعود ماهو لي انا ؟؟!
مابقى الا انتوا تاكلون من روح ايرم وتقهرونها..
بلحظات صارت لكمات مساعد واهاناته تنزل على ثامر وحميد بكل جنون يحاول ينتقم لايرم قبل يعرف وش صار لها..
وكردة فعل ودفاع عن النفس ثامر وحميد..ردوا عليه بنفس العنف..
تدخل السكرتير وذراع مساعد الاول مع بعض الموظفين يحاولون يفكون الاشتباك الي صاير بين مديرهم وموظفين مكتبه..
وصل خبر الهوشة والصراخ الى مكتب فهد..اللي كانت ردة فعله اعنف من مساعد رغم انه مايعرف وش المشكلة اللي خرجت مساعد من هدوئه وسيطرته وخلته يحول المكتب لساحة حرب..
فدخل فهد بالهوشة فزعة لمساعد يضرب معه ويسب وهو مو عارف ليش يتضاربون..
وصلت الشرطة ولازالت المضاربة مستمرة لان مساعد لما ابتعد عنهم رجع لباله كلام سعود انها محتاجته يهتم بحالها او كان بينزل لهم ويسوي مصيبة..فرجع مرة ثانية يتضارب معهم يحاول يعرف وش انقال لها ليش ايرم موجوعة من وصف سعود..
ماقدر يستوعب الحالة الي ممكن تكون فيها ايرم..كان يتضارب معهم وهو يشيع فرصته الي سلبوها منه..
فرصة شوفها واقفة قدامه..وسماع صوتها..ويمكن ان حنت او حنت يشوف عيونها..
ايرم تجيه وتنخذل..هذي ايـــرم يا عديمين الفهم..هذي طفلتي المستبدة.. هذي العهد اللي ماوفيته ..

&&&&&&&&&&&&&&&&&&&&&&&

قفلت جوالها بعد ما فهمت من سراب إنها ماقدرت تدخل المؤسسة اليوم وتقابل فهد لأن الشرطة كانت موجودة وصاير شي غريب عندهم..
سراب\أقولك أكيد طلعوا نصابين او مسوي مصيبة..
شفت الشرطة عندهم اكيد بيسحبونهم المركز..عاد أنا حطيت رجلي وشردت أنا وشرطة مانجتمع ..
تجاهلت قصايد مشكلتهم والي صار بمؤسستهم بس متاكدة ان هالشي بيكون بصفها وبتقدر تستخدم اي شي ضدهم..
تنهدت ورفعت الجوال مرة ثانية تحسب سراب المتصلة..
بس كان قرناس يتصل للمرة العرشين..ويسالها متى بتجيهم او متى يرجعون البيت..قدرت تلهيه بالكلام وتقنعه يبقى مع سراب لحتى تنهي اشغالها..وبعدها اتصل هيثم وصار دوره لحتى تلهيه وتطيب خاطره..
قفلت منهم وهي تبتسم على محاولتهم جذب انتباها لهم واهتمامها..
وكانهم مايدرون انهم محور حياتها..بس لازم تسترجع سديم وبعدها تاخذهم وتهرب فيهم..

كانت متوجهة لجناحها لما سمعت صوت بغرفة ام ايرم..
هذي الغرفة مايدخلها الا ايرم فقط..
قربت من الباب واستئذنت تدخل..
ماسمعت الرد والاذن..بس فتحت الباب ودخلت كانت الغرفة مظلمة ماعدا ابجورة صغيرة بجنب السرير..
شافت ايرم نايمة على السرير..ومحتضنة نفسها ولاحظت اهتزازا جسمها الناعم..قربت منها وهي تناديها باسمها..
ايرم بتعب\قصايد بليز خليني لحالي..
كانت بتطلع قصايد من الغرفة وتترك ايرم بحالها..هي صارت تفهم هالبنت لما تكون ضايقة وتبي نافذة هروب تلتجىء لهذي الغرفة..وتبقى فيها بالساعات..ماتعرف ليش تراجعت وقررت تبقى مع ايرم..يمكن لانها خافت عليها لا تتعرض لازمة ربو..
او لانها شافت فيها حال سديم..
قصايد بهدؤ\ما باخليك لحالك..اعذريني هالمرة ماباطيعك..
ايرم\وين جوارحك..مالهم حس طول اليوم..
قصايد بمحبة\فديتهم ارسلتهم لابوهم كم يوم..
ايرم\تمنيت اشوفهم..
قصايد\بتشوفينهم ان شاء الله عاد هيثم خاق عليك..
ايرم تبتسم\ياحبني له..
قصايد\قلتي طول اليوم..يعني انتي هنا من بدري..
ايرم بغصة\من قبل الظهر تقريبا..
قصايد بحنان\ومن الظهر وانتي هنا..يعني اكيد السيارتين الي برا تنتظرك..
ايرم\خليهم ينتظرون ماني طالعة لهم..
قصايد\حلــو اجل خليهم ينتظرون وتعالي ناكل جوعانة انا..
ايرم\مابي..بس بانام..

بتردد مدت قصايد يدها ولمست شعر ايرم..لطالما حسيت اتجاهك بحنية غريبة..ازعل ان شفتك داخلة عندنا البيت لاني اعرف انك بتجين لغرفة امك وبتبكين لحتى تهلكين عيونك..
وافرح لما تحضنين عيالي ويخرجونك من جوك الكئيب.. انتي يا ايرم بريئة وضايعة..بتضيع حياتك اكثر ان استمريتي بمحاولة ارضائك للجميع الا نفسك..

بالنسبة لايرم الي لاول مرة تلمس قصايد حزنها وشعرها..
وكانها تنتظر هذي الحركة البسيطة لتسترجع كل طعنة وجع حست فيها من اول مادخلت مكتب مساعد..
من بعد صدمتها بحضور النساء حول مساعد..ومن زواج مساعد مرتين ..
قهرها بان مساعد فعلا اكمل حياته عادي.. وكانه مافقد شي غالي..
وكانه مافقدها..
ادراكها بانها بنت لنفسها مكانة كبيرة عند مساعد بينما مالها اي قيمة..هالشيء قهرها نسف قلبها..
وهـــم عاشته..كذبة كذبتها وصدقتها..
ماتلوم الا نفسها بس .. ماتلومه رجال عايش حياته مو ناقصه شي..
تلوم افكارها واحلامها الي اوهمتها بكذبة من صنعها هي..

والي كمل على قلبها المجروح لما خرجت من المكتب ونزلت بالمصعد..كانوا نساء مساعد موجودين معها..
أنعجبت بجمالهم الصارخ باناقتهم..برائحة عطوراتهم..
سمعت كلماتهم المعجبة بمساعد وبشخصيته..
تراهنوا مين الي بتخليه يميل لها اول..
كانت بتصرخ وتقول هذا مساعدي انا.. مالكم فيه شغل..
ما انتظرته سبع سنين عجاف عشان القاكم تحاولون تسرقونه..
انا ما اتنازل عن حقي فيه..
بــس هي مالها حـق..مالها حق فيه..
طلعت من المصعد وهي تكتم شهقاتها وصوت بكاها..
طلعت من باب المؤسسة الرئيسي وتوجهت لسيارة سعود إلي كان ينتظرها بسيارته الخاصة وبلبسه العسكري كمقدم..
فتحت الباب الخلفي وفتحت شنطته بحركة سريعة..خرجت بخاخ الربو وهي ترتجف وتحالو تسيطر على رجفتها..
سعود التفت عليها مصدوم من حالها الي ابدا ماتوقعه..
مستحيل ايرم تتعب من مساعد..او يضايقها لدرجة يضيق نفسها..
ماقدر يصبر لحتى تهدأ..
سعود بعصبية\وش قالك؟؟علميني انزل اخربط له وجهه..
ايرم بقهر\لا تنزل له مايسوى..خذني لخوالي..
سعود\ابو رعد..والله ان تقولين وش مسوي لك..؟؟
ايرم\تكفى ياسعود خذني لخوالي او الحين بانزل واخذ ليموزين..
سعود\ابشــري باخذك اي مكان تبينه..بس انتي هدي نفسك..نظمي انفاسك..وسعيدان انا اوريه شغله..

حرك السيارة وهو يتصل على مساعد..سمعته يهاوشه ويتوعده ولو قدر كان بينزل له..
ما اهتمت لردة فعل مساعد او وش ممكن يقول..
كل الي كانت تبيه انها توصل لغرفة امها وتتخبى فيها..

قصايد\ايــرم جدك يتصل..
ايرم\مو قادرة اكلمه والله..
قصايد\اجلسي ناظريني..

جلست ايرم بمواجهة قصايد..ويدينها تحاول ترتب شعرها..
قصايد تمسح دموع ايرم وتبتسم لها..
قصايد\يوووه لو تشوفك سراب..بتحسدك على عيونك المنفوخة من البكي..
ايرم\الحين لو يشوفني جدي كذا مابيخليني لحتى اتكلم بشي مالي وجه اقوله..
قصايد\انتي وجهك الحلو..مايجي منه الا الزين..والحين اسوي لك كمادات دافية على عيونك الحلوة..
ايرم بابتسامة\انتي الحلوة..

أتصلت قصايد على الخادمة وطلبت منها تجيب كمادات الشاي الدافية..وبعدها توجهت لدورة المياه وبللت منشفة صغيرة بماء بارد ورجعت لايرم مسحت وجهها ورقبتها وهي تبتسم لها..
بداخلها تعتذر من ايرم لانها ماحاولت بيوم تسالها وش مزعلك وش مبكيك..ما ضمتها وهي تشوف ضياع ايرم وزياراتها الدائمة لغرفة امها لانها بحاجة احد يحتويها ويضمها..
بس ما اقدر ادخل حياتك يا ايرم واخليك تثقين فيني وبعدها اخذلك..لأني مو ثابته بهذي الحياة وبهذا البيت..أنا ضيفة وبيجي يوم واترك المكان..

قصايد\وش رايك تكلمين جدك وتقولين له انك بتنامين هنا..
على الاقل يسحب الي ينتظرونك برا..
ايرم\مابيرضى اعرفه..
قصايد\بتزعلين لو سالتك ليش ضايقة ومنهارة هنا.؟
ايرم بغصة\أنا هاربة من نفسي..هاربة من كذبة كذبتها على نفسي وصدقتها..مؤلم الخذلان من شخص انتي تعتبرينه العالم..
انا أوهمت نفسي اني مهمة واني ما اهون..واني ولو طال الصد مصير الحي يتلاقى..وكذبتي اليوم صفعتني بوجهي..

قصايد نزلت راس ايرم بحضنها وحطت كمادات الشاي الدافي على عيونها..
قصايد\هذا الاحساس بيوجعك مو يوم او يومين..الخذلان مؤلم مثل ماقلتي..بس بيقويك..بكرة بتتعلمين ما ترفعين احد لفوق منزلته.. ماتعطيــن مشاعرك لأي فاني..كونـــي بخيــــلة بالمشاعر..
خبيها بجواتك بداخلك..موتي ولا تظهرينها..
لأنك بوقتها بتخسرين كل شي تملكينه معنويا..قلبك قوتك ثقتك احترامك لذاتك..ضعفك اليوم بيكون سلاح ضدك بكرة..
ايرم تبكي\مو قادرة اتقبل خسارتي له..أنا خسرته من سبع سنين..بس كنت اوهم نفسي اني ماخسرته وباسترجعه..
هو ما اوهمني أنا أوهمت نفسي..
قصايد\اجـــل لا تلومين الا نفســك.. ولوم النفــس ان استمر يا ايرم بيحولك لحجر..اغفري لنفسك مع الوقت..دامك تقدرين..

وقبل تتكلم ايرم اتصل جدها للمرة الي ضيعت عدها.. واشرت لها قصايد بتشجيع ترد عليه..
ايرم\هلا يبه..
الجد مساعد\ويــنك ليه ماتردين علي..وش صاير وش مسوين فيك الكلاب..والله يا امي ان اسجنهم وابهذلهم..
ايرم باستغراب\من يبه؟؟
الجد\اللي ضايقوك .. سعود علمني ..
ايرم\يبه محد ضايقني انا عند خوالي والتهيت مع البنات..
وحابة انام عندهم الليلة..
الجد\لا والله مانمتي عندهم قبل اتطمن عليك واشوفك..
ايرم\يبه الله يحفظك خلني الليلة بكرة الصباح تلقاني عندك..
الجد\يهون عليك ترجعيني من عند الباب..؟
ايرم بشهقة\يبه انت برا..؟
الجد\ايــه انتظرك من ساعة..نبي نرجع للمسكينة حرمة يوسف لحالها..
ايرم وتوها تذكرت سديم..ولا تعرف وش مسوي فيها يوسف..
ايرم \يبه لا يكون خليتها مع يوسف..
الجد\ايه ماقدرت اخذه معي..
ايرم\لااا يبه يوسف ماينترك لحاله..عاد وسديم موجودة كيف تتركه..؟
الجد بخبث\اجل استعجلي خلينا نلحق عليهم قبل يتقاتلون..

قفلت ايرم من جدها وهي تعاتب نفسها كيف نست من سديم المسكينة..اكيد يوسف مجننها بما انها من الصبح هنا مو عندهم..
ولا انتبهت على حال قصايد الي تغير بثواني لما نطقت اسم سديم..
قصايد\يوسف عمك يدورك؟؟
ايرم بضيق\لا مو داري عني ملتهي بزوجته..
قصايد وبدت ترجف يدها\عمك تزوج؟؟مو هو الي متعلق فيك وتعبان..؟
ايرم\ايه هو عمي يوسف..سالفة طويلة مافيه وقت احكي لك عنها..
بس بالمختصر..رعد ولد عمي فجأة زوج عمي يوسف لوحدة سُكـرة مثل القمر..والى الان مو فاهمة انا قصتهم..
قصايد بشوق\وكيفها البنت؟؟هي راضية تتزوج عمك؟؟
ايرم بزعل\والله حالتها حالة..واي شي يجي بيدها تضرب فيه يوسف..بس انا ورعد حامينها منه..
قصايد بكره\كيف يزوجها لواحد تعبان وبعدها يلعب دور الحامي.؟

ايرم ما علقت على نبرة قصايد العالية ولامستهجنة لتصرف رعد لأنها بنفسها هذا موقفها منه..
ايرم\قررت اروح مع جدي المزرعة وباخذها معنا.. ابي ابعدها عن عيون يوسف..هو مبسوط فيها ويقول لعبته..
قصايد بتهور\الله بجد المزرعة ياما حكيتي لجوارحي عنها..عاد بخاطري اشوفها على كثر مايتمنون يشوفونها..
ايرم بمحبة\فدييتهم..خلاص باكلمك ونتفق على يوم تجين فيه انتي وسراب والجوارح..عاد قرناس متشوق يشوف الفرس حقتي..
قصايد\اكيد مو تنسين..حابين نزورك ونبعد عن ضيق المدن..

خرجت ايرم بعد ما باست قصايد على خدها..ونزلت بخطوات سريعة عشان ماتتاخر زيادة على جدها..

وتركت قصايد اللي من قهرها وخوفها على سديم..
عضت باسنانها على كف يدها..تعبير عن ندمها لتاخرها عليها..

&&&&&&&&&&&&&&&&&&&&&&&

جلست ايرم تحاول تقنع جدها يتركون البيت..
إللي ضاقت نفسها منه ومن تواجد رعد ويوسف حوالين سديم..
ومن سعود الي حاول يسحب منها الكلام ويفهم وش صار بمكتب مساعد..
من امس فهد ومساعد بالتوقيف..ومعهم ثامر وحميد..
مساعد رفع فيهم قضية تحرش باحد المراجعات عنده بمكتبه..ولكن ماذكر اسمها..على قول سعود بيدبر وحدة تمثل هذا الدور بالقسم..لانه مستحيل يذكر اسم ايرم..

مارفعت امالها ايرم ولا قالت مساعد يهتم فيني..
عذرته بانه يحمي اسم العائلة لا يدخل بناته للقسم وقضايا تحرش..
مثل ماقالت قصايد..
لا تعلقين حياتك وآمالك بشي فاني..

ايرم بصراحة\والله يبه حن لازم نبعد سديم عن يوسف..هذاك اليوم بوجودي دخل غرفة البنت وهجم عليها يبوسها..وهي كسرت الكاس براسه..
الجد بفزع\أبو صالح..عسى ماسوى لها شي؟؟
ايرم\لا جاء رعد واخذه معه لبيته .. بس يوسف تعرفه ولو تحبسه في مخزن بيطلع قبل تقفل الباب..
الجد بمحبة\الله يحفظه مع انه فقد عقله بس مافقد مهارته...
ايرم\وش قلت اخليهم يجهزون امورنا نمشي المزرعة.؟
الجد\ايه يا امي كلامك زين الكلام..خلينا نبعد المسكينة عن المجنون..ورعد بيجي يوم امسكه من رقبته ثم امصعها له..
ايرم بضحكة مصدومة\اما عاد رعد هذاك من يمسك رقبته ؟
الجد بشوق\مساعد..إيه مساعد كان الوحيد اللي يطرحه قدامي بس رعد يقوم ويطرح مساعد..ياهي كسور وجبور صارت بينهم..

وللمرة الثانية تجاهلت اسم مساعد..وتجاهلت التفكير فيه..
ماقتلني الا الوهم بسك اوهام يا ايرم..
قبل ما تتكلم سمعت صراخ سديم ويوسف..
وقفت وطلعت الدرج تركض تبي تشوف المصيبة الي صايرة..
قابلت يوسف خارج من غرفة سديم بإصابة جديدة وأنفه ينزف بعد ماضربته سديم بريموت المكيف على خشمه بقوة..
سديم بقهر\والله باقتله..انتي ماتعرفيني..بلحظات جنوني يمكن اقتل عشرة..لا والاهبل لابس خوذة يقول ما اقدر اضرب راسه كسرت خشمه الطويل..
ايرم بابتسامة\تصدقين انك خليط عجيب..بلحظات تبكين بخوف..وبلحظات تصيرين لاعبة كراتيه..امس مو مصدقة انك تلكمين يوسف وترفسينه..واخر شي اليوم تضربينه على خشمه..
سديم\وانتي شفتيه تاثر بالضرب الي ضربته..لو خاف من ضربي او استوجع ماكان بيرجع مرة ثانية لغرفتي..
ايرم\ماخفتي منه وانتي بنص طوله..؟
سديم بمسخرة\خفي علينا يالطويلة..بس والله مرعوبة منه..ولازم ما ابين له خوفي..
ايرم\انتي تجهزي..بعد ساعتين بنروح المزرعة..هناك ترتاحين من يوسف..
سديم\المهم هذا الاهبل لا يروح معي..
ايرم بعصبية\لاتقولين اهبل..هو تعبان شوي..
سديم\اهبل ومجنون وابتليت فيه..لا تغيرين الاسم مابيتغير المعنى..
انا تزوجت رجل مجنون واهبل..
ايرم عاذرتها\طيب اهدي..هناك بترتاحين صدقيني..جدي مابيترك موضوعك كذا..هو مو راضي بزواجك من يوسف..ويمكن يطلقك منه..
سديم بقهر\خيــــر يطلقني منه..لا انا الي باخلعه..
ايرم تجاريها\تمام..تفاهمي مع ابوي.
سديم\ابوك ماله شغل .. خليني اغث رعد والعن شكله..الشايب ماله ذنب..
ايرم\إنتي بتروحين مع ابوي للمزرعة..وأنا بامر السوق واشتري لك كم لبس ومستلزمات ضرورية..وبس ترتاحين بانزل انا وانتي..وناخذ الي بخاطرك..
سديم بقهر\ما ابـــي..مابي ملابس..هذي مو حياتي ولا بارتاح..
حياتي مع اختي مو معكم..

وصلها صوت رعد الي اتصل عليه جده يجي ياخذ يوسف بعد ماسمع هواشهم فوق..
رعد من ورى الباب\وحياة ولدي المفروض معي مو مع اختك..
سديم بصراخ\انت ماتستاهل تكون اب اصلا..وش بتعلمه وش بتربيه عليه على الغدر على الخيانة على السرقة..
رعد\سديم ان دخلت صفعتك على فمك..
سديم\ليش لاني اقول الصدق..ولدك احسن حال من دونك..
عايش مبسوط مرتاح..وصار معه اخوان..لان حنين بعد ماخلعتك عاشت وارتاحت منك ومن قرفك..وانت بقيت جثة مرمية بالمستشفى..صحيت وراجع انسان ماقبل التاريخ.. تعتقد ان اختي وقفت حياتها عندك وعلى اطلالك..موهوم يا رعــد موهوم..

مثل المجنون دخل رعد الغرفة بخطوات سريعة وتوجه لسديم
الي اعماها الحقد والكره عن التفكير في ردة فعله وهو الي حذرها لا تكمل كلامها بهذا الموضوع..
ايرم دفعت سديم بقوة تبعدها عن يدين رعد الي كانت ممدودة لها وهي تشوف الشر بعيونه..
دفع ايرم عن طريقه وهي تترجاه لا يلمس سديم..
بس هو كان مغيب عن وعيه بكلامها ان حنين صارت لها عائلة وفعلا خلعته وتزوجت وصار عندها عيال..وولده معها عايش ومبسوط ويمكن ناسبته لغيره..
مسك سديم وهزها بقوة وهو يصرخ عليها بقهر..
رعد بصراخ\حنيـــن لي أنا ..زوجتي ..ولو خانتني والله لا اذبحها بيديني..باذبحــــــها..

أنهى رعد كلامه بشهقة وهو يحس بآلة حادة تنغرس بجسمه بقوة..
بسبب سديم الي طعنته بالة حادة مو عارف وش تكون
وشاف الدم الي بدا يطلع من جرحه..
سديم بكره\أقتلك يا رعد ولا أسمح لك تلمس حنين..
وضغطت على يدها باقوى..لحتى حست بالدم يبلل يدها..

إلى الملتقى باذن الله ..
كونوا بخير..
صدووود..

..