الكثيـــر منا لا يبتعد كرهـاً بل المـــاً ..
والكثيـــر لا يتغير عبثـــاً بل قهــــراً ...
___________________________________🦋
وقفت وهي بتعاين للمزرعة بصدمة كانت كبيييييييييييرة بكل ما تحمل الكلمة من معنى...البوابة الحديدية الكبيرة كان واقفين قدامها زي اربعة حرس كدا...ومن تدخل تلقى نافورة في النص بين ممرين من الحصحاص وبعدها في جلسات مصنوعة من خشب الصندل...وفيها مراجيح...على يدك اليمين كان في المسبح بتاع البنات كان مقفل بالزجاج الملون الجوة بشوف البرا والعكس غير صحيح 😀 كان ظاهر عليهو كبير...وعلى يدك الشمال وبعيد شوية من الفلة كان في الإسطبل وكان قدامو بحيرة طوييلة فيها بجع كتير...وبعيد منها شوية كدا كان في أشجار كتييرة زي الغابة...وورا الفلة كان في مسبح الاولاد...وتعال شوفو الفلة من جوة خراااافية...
تارا بدون شعور لقت نفسها بتسأل آسر:انت جدك دا شغال شنو؟!
آسر:هههه كان سفير في امريكا.
تارا بصدمة:نعععم 😳😳.
آسر عاين ليها باستغراب وبعدها قال:اصدميني وقولي لي ما كنتي عارفة؟!
تارا:والله ما كنت عارفة.
آسر:انت ليك معاي قريب خمسة شهور وما عارفة الحاصل شنو 😂😂💔.
تارا هزت راسها وقالت ليهو:تقول شنو بس مشاكل.
ضحك ودخل الفلة وكانوا كلهم قاعدين حتى ناس نور...سلمت عليهم كلهم وقعدت مع البنات ولاحظت لروان مادة بوزها شبرين...سألتها:مالك يا بت؟!
يسرى وهي بتضحك:تقولي شنو بس...زعلانة عشان مودي قال ليها ما بنقدر نجي ههههه.
تارا عقدت حواجبها باستغراب وقالت:مودي منـ....... ، وبعدها قالت ليها:اهاا مودي محمد قصدك.
مرام:اي ياهو.
تارا:ههههه خلاص ما تزعلي يا قلبوشتي انا ما كفاية.
فاطمة:عااد انتي مودي 😉...اااااي.
عاينت لروان الضربتها بالمخدة وكانت بتعاين ليها بغيظ...اثناء ما هم بضحكوا سمعوا الصوت الما بغباهم...فاطمة عضت على شفتها بقهر وغيظ لمن سمعت صوتها المايع الماسخ البتصنع الدلع:هاااي بنات.
تارا عاينت ليها ولا اراديا كشرت ملامحها...فَي همست بقرف:اعوووذ بالله يا لييل ما اطولك.
تارا همست ليهم بقرف واشمئزاز:دي الجابها هنا شنو؟!
ميرال:والله انا زاتي ما عارفة...يووه شوفي امها جات معاها يعني قهر وإعاقة على اصولها.
نور:هيييه عيب دي عمتك يعني مفروض تحترميها.
روان:نحترمها؟!شوفيها اسي ح تعمل شنو.
سلمت على كل الموجودين وعاينت لتارا بقرف واستعلاء وما سلمت عليها...دي الام اما رفاء ما سلمت اصلاً 🙄💔...
_________________________________🦋
كانوا بتونسوا بفرحة وبعدها طلعوا برا وقرروا يتجولوا في المزرعة ويوروها لتارا ونور بما انو دي اول زيارة ليهم...آخر وجهة ليهم كانت الإسطبل...تارا لفت نظرها حصان لونو بني غاامق وظاهر عليهو عنيف بس مميز مشت عليهو بس وقفت بصوت جنى:ولا تحاولي.
لفت عليها باستغراب:ليه؟!
جنى:دا حصان آسر قربي منو ورفسة واحدة وصدقيني تاني ما ح تقومي.
تارا عاينت ليهو وقالت ليها:اسمو منو؟!
جنى:سامرين.
تارا همست:مميز وغريب.
روان:بنااات ارح المسبح...نفسي اسبح.
- ارح...قدااام...طوالي...حتى انا...الخ..
تارا كانت ماشة وراهم وهي سرحانة فجأة حست بيد بتسحبها وبتجرها في البداية اتخلعت لكن لمن لقتو آسر اتنفست الصعداء...
آسر:تعالي داير اوريك حاجة.
مسكها من يدها وساقها معاهو...مشت معاهو لمن رجلينها وجعتها كانوا ماشين على جانب البحيرة الطويلة لمن زهجت وقفت وقالت ليهو:انا تعبت ياخ رجليني وجعتني.
قرب منها وقال ليها:اشيلك 😉.
مشت قدامو وهي بتقول ليهو:بطل قلة ادب وخلينا نختصر الزمن.
بعد خمسة دقايق...
شافت ليها اشجار كتييرة زي الغابة كدا دخلت ورا آسر وهي ماسكة يدو خلال ثواني كانت فاتحة خشمها بصدمة...
آسر:وصلنا..
انتو شوفو واحكمو اذا تارا عندها حق تنصدم ولا لأ...

عاين لملامحها المنصدمة وابتسم قرب منها وحضنها من ورا وقال ليها:انتي اول انثى تشوفي المكان دا...اصلاً انا وبكري وجدو بس العارفين المكان دا..يعني باقي العائلة عارفين بي انو آسر عندو مكان خاص بس عامل كيف ووين مافي زول عارف.
تارا بصدمة:دا شنو دا لكن؟!
بعد منها ومسكها من يدها ومشى بيها وقال ليها:مرحب بيك في كوخي المتواضع...كل ما اكون مضايق عندي مكانين بمشي ليهم...يا اما الكوخ دا او شارع النيل المكان الوريتك ليهو داك...والاتنين مافي زول عارفهم ❤️.
اما تارا كانت بتتجول في المكان وبتعاين باعجاب حست نفسها برا السودان الجو والبحيرة والغابة...غايتو مشاااكل 💔💔...قاطع اندماجها صوت التلفون...ردت وكانت مرام..
- وين انتي يا بت خوفتينا عليك.
تارا بابتسامة:ما تخافوا انا مع آسر.
- اها طيب اوكي اذا خلصتي نحنا في المسبح.
- طيب.
قفلت منها وقبلت على آسر وهو قال ليها:تعالي شوفيهو من جوة.
دخلوا جوة وكان ساااحر بمعنى الكلمة اي شئ من الخشب كان ظااابط...
آسر بغمزة:ممكن نعمل هوني مون هنا 😉.
عاينت ليهو باحراج وقالت ليهو:قليل ادب 💔.
آسر ضحك وهي قالت ليهو:طيب نرجع عشان البنات.
آسر:خلينا قاعدين ياخي واسحبي عليهم.
تارا بتفكير:اممممم لالا رفاء قاعدة ماشة اطين عيشتها شوية كدا الكلبة دي.
ضحك بصدمة وقال ليها: اعوذ بالله منكم يا البنات...وتقوليها في وشي كدا طوالي مع انها بت خالتي.
رفعت حاجب وقالت ليهو:لا يا روحي ما تكون اتضايقت عشان نبذتها ليك.
قرب منها وهمس ليها:لا ابداً يا قلبي وانا بقدر اتضايق منك ❤️.
تارا نزلت راسها بخجل وبعدها رفعتو وقالت ليهو:يلا نلحق على البنات.
طلعوا من الغابة ومشت المسبح لقتهم مافي ضربت ليهم وقالوا ليها انهم دخلوا الفلة...
_____________________________________🦋
مر اليوم عادي...
اليوم التاني زي العصر كدا...
كانوا كلهم مجتمعين مع بعض...
ام رفاء عاينت لآسر وقالت ليهو بلوم:انا زعلانة منك يا آسر.
آسر بهدوء:ليه يا خالة انا عملت شنو؟!
ردت وهي بتعاين لتارا باستحقار:يعني تخلي بت خالتك وتمشي تعرس الغريبة.
آسر فهمها وقال ليها بهدوء وببرود:النصيب.
- لالا والله زعلتني جد جد.
يسرى:ماهو خلاص عرس يعمل شنو تاني.
- امممم عادي يدبل اصلو الشرع حلل اربعة.
آسر كان بعاين ليها ببرود وتارا بإستحقار واستنكار... ورفاء رسمت كل ملامح الخجل الممكنة في وشها...
آسر:شكراً بس انا ما نفسي ادبل...ومرتي مالية عيني.
تارا ابتسمت بغرور وشماتة...وام رفاء قالت بغيظ:اصلاً العرس ليك شنو ما ما قلة ادب منك وانت جامعة ما خلصتها.
آسر:ما قدرت اصبر لمن اتخرج.
رفاء وشها قلب وردي من الإحراج والغيظ والغضب...وامها قالت ليهو:يعني انت اسي مرتاح معاها...دي مريحاك اسي 😡.
رد ببرود:ما اظن ليك الحق تدخلي في خصوصياتي.
وقف على حيلو وقال ليها:تارا تعالي معاي...عن اذنكم.
طلع برا الفلة وتارا طلعت وراهو يعد ما عاينت لرفاء وامها بشماااتة...طلعت لقتو واقف ومديها ظهرو وقفت قدامو وقالت ليهو باستغراب:في شنو؟!
آسر ابتسم وقال ليها:ولا شئ تعالي دايرة اوريك حاجة.
قلبت عيونها..وبعدها قالت بتعب:اها شنو تاني.
ضحك وقال ليها:ما تخافي ما بعيد 😂😂😂.
مشو الإسطبل...آسر مشى على الحصان حقو وقال:سامرين اعرفك بتارا...تارا اعرفك بسامرين.
تارا ابتسمت ومشت وقفت جمب آسر وقالت:اتشرفنا يا سامرين...اتلفتت لآسر وقالت:انت بتحب الفروسية؟!
آسر:اكتر من اي شي تاني.
تارا:اها طـ......................
قاطعها صوت نشااز بتكرهو اكتر من اي حاجة تانية...
- آسوري ممكن تعلمني الفروسية.
آسر اتلفت وعاين ليها ببرود وبعدها قال ببرود اكتر:آسر...اسمي آسر.
ضحكت وقالت:ههه عادي انا بحب ادلعك ولا ما بحق لي؟!
آسر ببرود:ما بحق ليك ولا ح يحق ليك في يوم.
اتحرجت بس ما بينت وقالت ليهو:الله دا سامرين زمن منو...ممكن تعلمني الفروسية.
آسر دخل الإسطبل وجا طالع وهو سايق ليهو حصان تاني وقفو قدامها وقال ليها:اركبي.
رفاء بدلع يلووووع الكبد:انا عاوزة اركب في سامرين.
آسر قلب عيونو بملل وقال ليها بحدة:شوفي دا الحصان عايزة تركبي اركبي ما عايزة اتخارجي.
رفاء:لييه لكن انا عايزة اركب في سامرين.
آسر بحدة:مافي زول بركب في سامرين غيري فهمتي.
رفاء:اوكي.
مشت عليهو وآسر كان واقف جنبو مسكت في كتف آسر وقالت ليهو:ما بقدر اركب...ركبني.
تارا فتحت عيونها باستنكار وقالت ليها:اسمعي يا زفت الطين عايزة تركبي اركبي بسكات ما عايزة اتخارجي من هنا 😡.
رفاء عقدت حواجبها وقالت بدلع:آسوري شوفها بتتكلم معاي كيف.
آسر فك اللجام بتاع الحصان وقال ليها:شكلك ما عايزة...اها يا روحي كنا بنقول في شنو.
رفاء:قلت ليك شوفها بتتكلم معاي كيف.
آسر عاين ليها وقال:انتي الاتكلم معاك منو انا بتكلم مع مرتـــــي تارا.
شد على كلمة "مرتي" دي لمن رفاء وشها قلب...وقالت ليهو:تيب ح اركب في التاني وانت امسكو لي تيب.
آسر مسك الحصان وهي ركبت واول ما ركبت اترحك من جنبها...وساق تارا وسامرين..وقال لتارا:تعالي اركبي.
تارا بخوف:لالا يمكن يوقعني.
آسر ضحك:ما تخافي ما ح تحصل ليك حاجة.
تارا:ما عايزة.
آسر:انا معاك يا قلبي والله ما ح تحصل ليك حاجة ان شاء الله وبضمانتي.
قالت ليهو بتهديد:عليك انت اذا حصلت لي حاجة.
آسر ضحك وقال:اوكي يلا تعالي.
تارا:ما بعرف اركب.
آسر:طوالي اشيلك الفي شنو وما في شنو.
مسكها من خصرها ورفعها في الحصان وقال بمزح:لالا انتي لازم تخسي يا تارا.
تارا بصدمة:انا سمييينة...وتابعت بغرور:هه اصلاً البنات بطعنوا الحقن وببلعوا الحبوب عشان يلقوا زي جسمي دا..عشان كدا ما تتوهمن ساي 😒.
ضحك وركب وراها وهي قالت ليهو:على وين يا اخوي؟!
آسر:اخليك براك يعني...ما عندي مانع.
تارا مسكتو وقالت:خلاص اترزع دا شنو دا 😤.
مد يدو ومسك اللجام واول ما الحصان اتحرك صرخت بحماس وهو بضحك معاها...
____________________________________🦋
عاينت ليهم بحقد كيف هو بضحك معاها وركبها حصانو الما برضى انو زول يركب فيهو وكيف شالها عيونها اتملت بالدموع وقالت:والله ما تتهني بيهو آسر دا لي انا وبس يا خطافة الرجال يا شلابة يا عفنة ح تشوفي ايام سوداء يا تارا صدقيني ح تندمي 😡😡💔.
___________________________________🦋
باليل...
البنات كانوا قاعدين في جناحهم...
تارا:يلا بنات انا ماشة.
يسرى:وين بدري.
تارا:بدري من عمرك يا حبي بس نعست.
فاطمة:بنااااات عندي فكرة جهنمية.
تارا طوالي قعدت وقالت ليها بحماس:فكرة شنو؟!
يسرى:مش اسي قلتي نعسانة؟!
تارا:النعاس طار...اها شنو؟
فاطمة:احم في مزرعة جنبنا بجاي بس مهجورة وفاضية يعني ما فيها زول عرفتي عشان كدا قررت نمشي هناك ونعمل مغامرة رايكم شنو؟!
البنات كلهم عيونهم التمعت بحماس ووافقوا ليها وهي قالت:طيب يلا البسوا اسود في اسود طيب وامممم جيبوا كشافات عشان ح تكون ظلام عرفتو.
البنات بحماس:طييب.
مشو يلبسوا وهم غافلين عن الزول السمعهم...
___________________________________🦋
تارا مشت جناحها هي وآسر وكان آسر مافي استغلت الفرصة ولبست بنطلون اسود وبلوفر حق آسر زاتو لونو اسود وشالت كاب اسود برضو حق آسر وشنطة ظهر صغيرة. سوداء ختت فيها سكينة ومقص ومشرط وبخاخ فلفل لزوم الدفاع وكدا...وشالت كشاف صغير وطلعت..مشت للبنات في جناحهم وكانوا عاملين نفس الشي لابسين اسود في اسود...
طلعوا من الجناح ومن الفلة كلها بالباب الخلفي..ومشو على البوابة بس الحرس كانوا واقفين فاضطروا انهم يتلبوا بالحيطة الحمد الله طلعوا منها سليمة من غير اصابات...
___________________________________🦋
عند الشباب...
رامز اخو روان جا جاري لشباب وهو بلهث من الجري وقال ليهم:شباب اتخيلوا سمعت شنو.
الشباب:شنو؟!
رامز:جدو قال ليكم تعالوا عشان ح نجتمع كلنا سوا.
الشباب هزو رؤوسهم ومشوا على الصالة اللي كان قاعد فيها الجد والجدة وامهاتهم وابهاتهم...
نعمل refresh لاسماء الشباب...
محمد اخو ناس فاطمة وفي عمرو 24 سنة..
رامز اخو روان عمرو 22 سنة..
اياد اخو ناس مرام وميرال عمرو 24 سنة..
عمر اخو يسرى عمرو 23 سنة..
بالاضافة لبكري وآسر...
____________________________________🦋
مشو للصالة ولقوا في شابين اللي هم محمد اخو تارا وسامي الولد العاقد على جنى...سلموا عليهم وآسر قال لمحمد:وين الحاج والحجة؟!
محمد:والله قالوا بجو يوم الخطوبة مرة واحدة...اما انا جيت عشان روان والله حسيت بيها زعلت.
رامز:معليش على البلوة الاديناك ليها دي...بس اختي من يومها هبلة ولايوقة 😪.
محمد:ولا والله بالعكس.
آسر:من اسي بندافع 😉.
ضحكوا وقعدوا يتونسوا ويلعبوا...
منى:والله القهدة فاقدة البنات بس.
الجدة:يا حليلهم من الصباح صاحين اخير ليهم مشو ناموا بدري..
__________________________________🦋
عند البنات...
دخلوا المزرعة وكانت كلها ظلاااااام شديد...مشو دخلوا الفلة بالشباك...
فاطمة:نحن ح نتقسم اوكي...عشان نستكشف اكتر وكدا....امممم انا ومرام ويسرى مع بعض....وروان وجنى وميرال مع بعض....وتارا وفَي ونور مع بعض كدا تمام..
البنات:تمام..
جو عشان يتحركوا بس جنى وقفت وهمست بخوف:بنات.
البنات:هاه..
جنى بخوف:والله سمعت صوت حاجة بوراي 😧.
يسرى همست:ما تخافي بتكون كديسة بس يلا نتحرك سريع.
اتقسموا ومشو...
عند ناس فاطمة...
فاطمة ويسرى ومرام كانوا ماشين مع بعض ومرام خايفة تتلفت ساي...فاطمة ويسرى وقفوا وبدوا يرقصوا ويغنوا ومرام تعاين ليهم بملل وقالت ليهم:وقفوا البتعملوا فيهو دا ولا ح ارجع للبنات.
يسرى:ياخي ما تبقي نكدية كدا تعالي ارقصي معانا.
مرام وقفت على حيلها عشان تمشي بس حست بيد بتسحبها وقبل ما تفتح خشمها خت يدو في خشمها وسحبها وراهو...
فاطمة ويسرى بعد خلصوا هبالة اتلفتوا على مكان مرام...
يسرى:وينها؟!
فاطمة:ح تكون مشت للبنات ارح نخلص جولتنا.
مشو وهم ما عارفين الحاصل لمرام...
____________________________________🦋
عند ناس تارا...
تارا وفي ونور كانوا ماشين بهدوء وهم بتونسوا...نور وقفت عشان تصلح رباط جزمتها بس اتجمدت بصدمة لمن حست باليد الحواطت خصرها وبعدها اطبقت على فمها ما عملت صوت بس دموعها نزلت في يدو بهدوء...
تارا اتلفتت على ورا عشان تشوف نور ولقتها مافي...وقفت في وقالت ليها بخوف:في شوفي نور وينها...ما سمعت رد قبلت وراها ولقت في زاتها مافي...ختت يدها في خشمها بصدمة ودموعها نزلت وهي بتهمس:نور في وين انتو بليييز ما تخوفوني...بنات 😢😢.
بس مافي زول رد ليها وما سمعت حس...
__________________________________🦋
خلال ثواني كانوا كلهم مجتمعين من محل ما اتفرقوا وبعاينوا لبعض بخوف...
فاطمة:كيف يعني مرام ما معاكم 😧😧😧.
روان:ما معانا.
تارا دموعها نزلت:حتى نور وفي فجأة اختفوا..
جنى بكت:انا انا قلت ليكم في حاجة بس انتو ما صدقتوني يا ربي 😭😭😭😭💔.
ميرال بخوف:اووف مرام في نور وين انتو يا ربي ارحمنا.
فاطمة:اسمعوا ح نتقسم تاني بس المرة دي مجموعتين بس عشان العددية تكون كبيرة تمام..
اتقسموا فاطمة ويسرى وجنى...وتارا وروان وميرال...
____________________________________🦋
اثناء ماهم بفتشوا تارا حست باليد الامتدت لبطنها وبعدها خصرها نططت عيونها برعب وصدمة ولسانها اتربط لمن حست باليد البدت تتحسس في جسمها وبعدها سحبها وراهو...شافت البنات وكيف كلو واحدة فيهم ماسكها واحد وساحبها لغرفة...فاطمة كانت بترفس بس هو كان اقوى منها...ميرال كانت بتحاول تصرخ بس قفل ليها خشمها...روان كانت فاتحة عيونها بصدمة وهي بتبكي...يسرى نفس فاطمة كانت بتحاول تفتح منو وتضربو بس كان قوي...اما جنى استسلمت للامر الواقع وغمضت عيونها بضعف ودموعها نازلة...
تارا غمضت عيونها وبعدها فتحتها بقوة مستحيل يعني نهايتهم ح تكون كدا...ح يتحطموا ح يتدمروا هي ما مهمة بس البنات...هي جربت الاحساس دا قبل كدا وما دايرة غيرها يجربوا...لازم تحارب اذا ما عشانها عشان البنات...
رفستو بقوة في رجلو وبعدها ادتو بوكس في بطنو وهو صرخ...وقال:اطلعوا...
فجأة الكانوا ماسكين البنات وقفوا ووجهوا مسدسات نحو رؤؤس البنات كانوا لابسين اقنعة... البنات حضنوا بعض وهم ببكوا...
- عشان تاني تطلعوا براكم ونص الليل كمان 😏..
___________________________________🦋
# لها بقيـــة...