اشتــــاق لنفســّي القديــــمة ..
التي كانت لا تحمل همّــــــاً ولا تبالي امـــــراً ..
____________________________________🦋
بعد يومين...
سجد لله بفرحة بعد ما اعلنو برائتو من التهم الكانت ملفقة تجاهو...حضنت ابوها بفرحة ودموعها بللت قميصو...حضنها وهو بربت على راسها وبردد:الحمد لله..الحمد لله.
بعد مناحة مختلطة بالفرحة وعدم التصديق...عوض ابو نور اتوجه لحنان ام تارا وهو بقول ليها بشكر حقيقي:ما عارف اقول ليك شنو يا مدام...بس بالجد شكراً ليك شكراً ليك شدييييييد...نور حكت لي عن فضلك كتيير امثالك قليلين الايامات دي وربنا يكتر منهم...واذا احتجتي اي حاجة نحنا في الخدمة.
حنان ابتسمت وهي بتقول ليهو:دا الواجب يا ابو نور واي زول في مكاني كان عمل كدا واكتر...ويشهد الله نور دي انا بعتبرها زي بتي واحد.
ابتسم وهو بقول:ما اي زول يا مدام ما اي زول...بس على العموم مشكور شدييد.
ابتسمت وبعدها طلعت بطاقة وادتو ليها وقالت:دي بطاقة زوجي اسمو عثمان انت اتصل بيهو وهو أن شاء الله ح يديك وظيفة تليق بيك.
التمعت الدموع في عيونو بس حبسها وقال:ما قصرتي معانا يا مدام والله يفتحها عليك دنيا وآخرة يا رب.
ابتسمت وقالت:جمعاً يا رب..جمعاً.
نور مشت عليها وباست راسها وهي بتقول:شكراً يا خالتو حنان شكراً جزيلاً بالجد ما عارفة كيف انا ممكن ارد ليك الدين.
حنان ابتسمت وانتهزت الفرصة لمن شافت ابو نور مشغول بتكلم مع راجل تاني وهمست لنور في اضانها:سلمي لي عليها وقولي ليها امك واثقة فيك ومشتااااقة ليك شديييد...وابقي خليها تضرب لي.
نور عاينت ليها بصدمة بينما حنان ربتت على كتف نور بحزن وقالت:أنا عارفة..عارفة يا بتي...قولي ليها امك بتموت في اليوم الف مرة من دونك...لا الف شنو مليااار مرة...قولي ليها لو في يوم زعلك خليها بس تضرب لي وانا ح اتصرف معاهو ما يظن انو ما وراها وليان.
افاقت من صدمتها على صوت ابوها وهو بقول ليها:يلا يا بتي مشتاق للبيت.
مشت مع ابوها وهي بتفكر كيف حنان عرفت انو نور بتعرف تارا...كل الأسئلة دي اتبخرت من مخها لمن شافت فرحة امها برجعت زوجها...ابتسمت ليهم وبعد السلام الدام لأكتر من نص ساعة...ابو نور قال لبتو:يلا يا بتي مشتهي لي قهوة من يدك.
نور وهي بتأشر على عيونها:من عيوووني يا قلب بتك انت ❤️.
________________________________🦋
عند ناس آسر...
آسر كان قاعد في الجناح وتارا كانت مع جنى وامها والجدة بما انو البنات مشو بيوتهم...اتوجه على التلاجة الكانت موجودة في غرفتو وفتحها طلع منها حقنة حقن بيها نفسو...وبعدها قعد في السرير وهو مغمض عيونو بتعب...رمى الحقنة سريع لمن سمع باب الجناح فتح ووقف بترنح...تارا جات داخلة الغرفة وهي بتعاين ليهو باستغراب بعدها طنشتو ومشت قعدت في السرير وفتحت التلفزيون... اما آسر مشى عليها وختى راسو في حجرها وهو بهمس بتعب:مصدع اعملي لي مساج.
