الشيهانة

٥١

السلام عليكم

الشيهانة
الجزء الواحد والخمسون والاخير

صحت منووو؟؟
صوت تبارك تحجي فحطانة..فتحيلي الباب عمة..
فتحت الباب بسرعة اريد اشوفها شبيها..
دخلت بسرعة وصدت الباب وراها..
منظرها قهرني..لان طفلة وجاية الظهر ..بمنظر
غريب..
عباية جبيرة عليها تخط وشال وياها ..
دخلتها للمطبخ وانطيتها ماي..

كعدت استراحت وشربت الماي جرة وحدة..وحجت..
ويي يرحم اهلج ..
يرحم الجميع..شبيج شنو صاير؟؟انت شاردة؟؟
اييه ايي شردت..
ياستار ليشش؟
لان باعي..عمي بهادر مصاحب على حنينة ..انا
دريت بي لان اشوفه يخابر بالتلفون وسمعته..

وهم سمعته يسولف وي خوالي..
امي تدري بالسالفة..واليوم تعاركت ويا حنينة وعيرتها..
رجلج يصاحب عليج الطالبات ولاعب وياهن لعب
وامي تكلها اهلي كلها تدري ويضحكن عليج يكولن
رجلها يدور غيرها لن ماتخلف ولن مبهذلة..
وكلتلها انت تغارين من شاها لان حيادر يعشكها..
ولنها ستايل مو مثلج مرعبلة..

ههه ستايل!
اي يعني حلوة وتلبس جديد..
هههه زين انت شعليج امج التعاركت ليش شردتي؟
لان انا هم طبكت ويا امي وكتلها تستاهلين يصاحب
عليج الخايسة.. ام الچعچ..
انا سمعته وتشمتت بيج وكمت اعيب عليها واضحك..
هي خابرت عمي واجه بسرعة..وتعاركت ويا وكتلها..
كامت تصرخ تريد تموت ابنيي..

كله من بريكة ام المصايب هي ساس البلا..
وعمي بعد سمع بريكة بالسالفة..
اندار لامي هد عليها..وانا شال المحراث
وركض وراي وبيبيتي شردتني انطتني عباتها..
كالت روحي لبيت عمج حيادر..لن اذا رحت
لبيوت اجدادي يجي وراي عمي بهادر ويحطني
ويكتلني وهم خوالي من يدرون يكتلوني..

انا اريد منج هسه تخابرين عمي حيادر..
وتحاجبنه بهذا صوتج الناصي الحلو..واحجيله السالفة
حتى ادخل بكفالته لبيتنا لن اخاف..
ماحاجة اخابره هو هسه يجي واحجيله ويساعدج..
بس انت ليش تفتنين وتسوين مشاكل؟
مو كتلج لا تنقلين حجي مو حلو هالطبع..
عمة الماينقل حجي ببيتنا مايعيش..ماتشوفين
روحج طلعتي هرفي لنج ما مثلنا..

بعد انت هسه كبيرة وواعية ترى ماتعبرين طفلة..
يعني تعرفين الصح من الغلط..
وحاولي لا تصيرين مثل الكل لان مو شرط الكل صح..
هسه متوازية طلعتي بهذا الوكت وجاية خايفة..
كله بسبب لسانج..
تعاي جوا لا تكعد بتي وماادري بيها..

دخلتها جوا كعدت بالصالة وانا شفت الوكت
فايت ومامحضرة غدا..
طلعت سمجة وجاي احضر التمن..اجه حيادر..
شاف تبارك يمي بالمطبخ استغرب..
هي سلمت عليه ورجعت كعدت..توة جاي
يسالها شلونهم اهلج وسمعت صوت غرام..
عفتهم وفتت جوا..

اخذتها غسلتلها ولبستها وكعدت اشربها حايب..
الظاهر. حيادر استوجب تبارك..
ع ماخلصت واخذت غرام وطلعت..
شفته واكف يصلي ..باوعلها بحضني ابتسم..
خليتها يمه قريب السجادة ورحت للمطبخ..

تبارك بس فتت كمزت واجت يمي..حبوبة
حاجي عمي..
هو داري بالسالفة بس انا فهمته وكلي توبي
من الفتن..
جا انا شعليه مافتنت ترى..امي حجت بالاول..
كليلة يكل لعمي بهادر مايطكني..انا زغيرة ومالي
حيل صوابه يعور..
ابقي هنا هسه احاجي..

عفتها وطلعت للصالة..لكيت حيادر مخلي غرام
بحضنه ويبوس بيها ويسولف وياها..
الله يساعدك حبيبي..
يساعد بختج..شني يمتى كعدتي؟
كعدت ع صوت الباب من اجت تبارك..
لا تباوع بانزعاج..اخذها وحاجي اخوك لا ياذيها..
شنو طفلة جاية تركض مناك لهنا وحدها
وخايفة..

انا شتدوين بيه؟؟مو دومي واكفلهن..ماخلي
احد يطكهن..
بس هالبنية موتتني شكد تفتتتتن..يعني لسانها
مايطب بلهاتها..
صح غلطانة يس مدام التجأت الك معناها تعرف
بيك توكفلها..
لو تريد جان راحت لخوالها خو كلهم يمهم ..
بس تدري محد ينصفها..
يابعد عمري يشيهانة ..كلبج ابيض من الجمار..
وانت اكثر مني واطيب لان بار بيهم وماتكطع..

يحفظج الله يبعد طوايفي..خليني اروح اشوف
شني سالفتهم..
اي ع ماترجع تلكى الاكل كامل ننتظرك انا وبنتك..
ااخرشكد مشتاكلها..اطلع ساعتين وارجع افرفح عليها..
الله يديمك الها حياتي..

انطاني غرام وراح اخذ تبارك وطلع..
كملت الغدا ع السريع وجهزته ع مايجي..
بس تاخر كلش..
للساعة ٣ يلا اجه..
اجه ميت جوع جهزت الغدا وكعدنا ناكل..
وكعد يسولفلي..
محاجي بهادر ومرزلة رزالة عدلة..وجابر
هاد على بهادر ومتضاربين وصاير امالخ..
نهاية رايحة لاهلها وماخذه بناتها وياها..
وعمي صاير وي حنين لان شايف الوضع
متازم وهي مهددتهم لهذا يتلوكلها هو وخالتي.

بعد هالمشكلة رجعت نهاية للبيت بس كامت
تخبث ماتشتغل..
وحنين بالعناد هم ماتسوي شي..
اما ام عادل واخيراً بدو يبنون بيت بصف بيت عيالي
وخطية بي هي وبناتها يساعدن خالتي..

اليوم صار اربعين يوم على ولادتي صادف جمعة..
ماما الصبح اجت هي ومحمد فاجئتني ..جنت منيمة غرام
بالكرسي مالتها وجاي انظف..
وحيادر راح يشوي السمج هو كل جمعة ياخذه
يشوي ع الحطب يم عمامه بالبستان..
وانا اشتغل وافكر شنو اسوي اليوم
وعاجبني اسوي احتمال صغير..
ااجت ماما وجايبة وياها زينة كاملة واكياس توزيع
وحلويات اشكال وكيكة ..

سوو هي ومحمد ميز صغير وبدو يرتبون ..
كالت هاجر مرت لاهلها فد شوية وتجي..
وبابا يجي العصر ..حضرو وياي كلشي..
بس طول الوقت ماما ومحمد واحد قافل
ع الثاني..
صح يسولفون وياي بس ميسولفون سوا..
لحد مااجه حيادر واجت ويا هاجر ويسر..
وتغدينا..

سالت حيادر من فات للغرفة..لان اعرف
سر محمد يمه..
كال محاجي ماما بس  رافضة تروح تخطب انفال..
ومن رايد يحجيلها السبب ماقابلة..
كلتله ماريد اسمع اي شي وهالسيرة تنسد..
مو لعب يوم روحو خطبوها يوم لا بطلت
ماريد..
وصاير بينهم سوء فهم وماما ماتحاجي هسه..
قررنا انا وحيادر بعدين من يتجمعون
نفتح الموضوع..

صار العصر وبابا اجه وجايب ويا هدية
لغرام حجول ثنين ..
اخذها من حضن حيادر ويشمشم ويبوس
بخدودها ويبتسم..
حيادر صافن عليه شوية وكال..هاي ماازوجها
انا مااتحمل..
باوعلي بابا بصفنة وابتسامة..كلتها قبلك وكلت
ماانطيها..تالي اجيت انت ودكيت ربت الا اخذتها
يلا ارتاحيت ههه..

اي عاد انطيناكم بتنا شوية عوضت ...
اي ام يسر بنيتنا الماجبناها..يرحم اهلها
ع هالتربية ..واهم شي جابتنا هذا الجني..
شوفه شلون مكابل بتك ترى عينه زايغة انا اكلك..
حكه غير كدامه بت شيهانة طبعا تزيغ عينه..
انا متاكد تالي يتعاركون عليها جهال حسن ومحمد..
محمد من هسه مااناسبك انا اكلك..حجه حيادر وباوعلي..
يعني انطلقي بالموضوع..

انا حجيت بعفوية..هم غير يجون جهاله رح يصير
بالاربعين شيب وبعده عازف عن الزواج..
هو راحت نظراته لماما..يباوع خطف وسكت..
بس ماما ماحجت شي..
انا كملت كلامي..انت مو كلت ارجع اتفاهم وياها ..
تفاهمتو لو لا؟
انت غلطان بصراحة وهي خطية ترى ظلمتها
هواي..

هو بقى يكلب الوان مايعرف يجاوب..بس ماما حجت..
بشنو ظلمها؟
ماما شوفي ترى البنية تحبه..ماتريده يتعذب وياها..
شرطت عليه من يتزوجون وماتخلف يطلكها
ويتزوج غيرها ..لان ماتريد تظلمه..
هو كلها اصلا حتى زواج ماريد بعد وكلمن
يروح بسبيله..

بابا حجه بانزعاج..وتترك البنية بعد ماتحدد موعد
خطوبتكم لهيج سبب؟؟
اكيد تفكر تكول انهزم من هسه ماراد بتورط..
تزوجها والمقسوم الكم يصير..
بابا لو ماصار طفل تريد اطلك!!
لا تطلك قابل اول بشر ماخلف ؟؟؟
وبعدين شنووو ماتكدر تقنعها؟؟؟واذا فعلا
وماخلفت راح تحط سيف
ع ركبتك وتكلك طلكني؟؟؟؟؟

بابا لا تصير انهزاااامي..صارلك شكد؟؟؟
ثمن سنوات يمكن!؟
رابط نفسك ورابط البنية..ثق واغتقد لو ماتحبك
ومتمسكة بيك مابقت لهسه بلا زواج..
وماشرطت عليك هالشرط الا حتى تشوف
انت متسمك بيها لو لا؟؟
شوف بابا هو العمر مرة..والحب مرة..حارب
لاجله حتى تعيش باقي عمرك بسلام..
لا تستسلم وتضطر تبقى طول عمرك تحارب...

فيحاء باجر تروحين لاهل البنية..واتفقي وياهم
هو عقد وهو زواج ..
لا خطوبة ولا غيرها..
عقدو بيوم واليوم الثاني سوي عرس وجيب مرتك
وفضها..
سمعت بابا!!!
باوع محمد لماما..تنهدت وحجت..

بصراحة جنت كلش ماناوية اروح..لان شفت الشغلة
صارت معقدة وبيها عثرة..
بس راح اروح واخطبها..واخر مرة ادخل نفسي..
اي شي يصير انا اعتبرني خارج قوس وطالعة من
الموضوع كله..
يعني راضية!؟
الله يرضى عنك دنيا واخرة..شريد غير سعادتكم..

كام محمد باس راسها وايدها..وباس بابا..
واباوعله وجهه ضاحك وخطية ملامحه تشرح
الفرح البداخله..
لحد المغرب راحو كلهم..
حيادر منتظر ع نار واشترالي اليوم من راح
ثوب نوم احمر جريء ومميز كلش..
اول ماطلعو وجانت غرام نايمة..اجه انا جاي
اعدل نومتها بسريرها..
حضني من ظهري..وينه ثوبج لبسي يلاا ..

ايي بس اغسل اصبر..
ركككض روحي لا..على ماادخن..
اخذت الثوب وركضت للحمام غسلت ولبسته..
طلعت لكيته كاعد ع القنفة بلا فانيلا ويدندن
وي روحه..يمحمد شنهو ذنبي بين عداي وترميني...
تقربت يمه وكملت..تدري النار البكلبي...تكويني وتأذيني
عيوني محمد حجيت وااشر ع عيوني ..كام وهو
يباوع بنظرة جريئة واحبها...

لزمني من ايدي وركصني..وجرني لحضنه..
تعلكت بركبته بكل شوق هو فقد بسرعةوانا ع حركاته
تركت السيطرة اله..
وصلنا للفراش بالغرفة واحنا واحد يباري الثاني منو
اكثر ومنو اسرع ومنو اليبدع..
واحنا بقمة الاندماج..اندك الجرس..غلسنا ومانريد
تنقطع سلسلة عواطفنا..
بس الباب والجرس يندكون متكرر..

كام عايط كال الا ادفنه هذا الجايني هسه..
اخذ سرواله لبسه وراح بسرعة..انا بقيت متمددة
وادندن ..
شوية ودخل للغرفة ..كومي بسرعة امج برا..
انا فزيت بسرعة..ليش يعني شلون !
ناسي نظارته ابوج وماكادر يسوق واجد والدرب بعيد
ومحمد راجع بحده..

حاجيته وانا البس دشداشة بسرعة ..هسه اروح
ادورها وياها...
طلعت لكيت ماما تدور بين القنفات..
ها مالكيتيها؟؟
اندارت الي تريد تحجي وسكتت..باوعت بوجهي..
وانا نسيت اكيد هسه وجهي الحمرة مخربطة
وشعري منفوش..
بس هي ماحجت..

كالت دوري غرفتج خاف بيها ..رحت للغرفة دورت
وحيادر يدور وماكو..
مدري شلون انتبهت لكيتها بكرسي غرام ..
اخذتها وطلعت بسرعة..
انطيتها الها وانا مدنكة احاول ماخليها تركز
بيه لان موقف محرج كلش..حيادر طلع بالسروال
بس وانا بدشداشة وحدها..شكلنا صدك
محرج..

راحت وقفلت الباب وراها ودخلت..لكيته
كاعد يدخن بالصالة..ها حياتي..
رفع راسه جر نفس طويل من الجكارة
وابتسم تك خد..تدرين شصار بيه؟شاغت روحي..
بعد مقسوم شنشوي..
طفى الجكارة وكام ..شالني وهو مخليه ايده ع بطني
ورجليه ممدودة صفح مثل اليشيل الجنة..

خلاني ع السرير وانا اضحك بخفة وهو يستمتع
بهيج ضحكة..
لحظات وذبنا ببعض ..اشتياقي اله واشتياقه
الي خلانا نبتكر اشياء مو اي واحد يكدر
يسويها..
ويعد الدلع والدلال..غفينا باحضان بعض.

واستمرت حياتي الحمدلله هدوء وماكو مشاكل ابد..
لان خالتي كلش قللت جيتها النا..من شافتني من
انطي حجاية لو انقل..وهم محتارة بين حنين
ونهاية..
وحنين تهدد ونهاية تهدد..
ورياجيلهن مالهم دخل..بهادر يكولون اكثر
من مرة تلزمه يحاجي غيرها ..بس كامت ماتعارك
كدامهن لان كلهن يشمتن بيها..

راحت ماما خطبت انفال وفعلا تحدد العقد الاحد
والزواج الخميس..
صار العقد ورحنا ..برجعتي ع بيت اهلي لان
مسوين عزيمة عشا..بيت عمامي والاقارب..
اكلت بيومها كلش هواي وركصت ..استغليت
فرصة حيادر ماموجود..
هو من يوم المشكلة بعد ماتحاجى وي ماما..
كام مايدخل لبيت اهلي..لهذا ماقبل اروح
يمهم من ولدت..
وهسه بخطوبة محمد وشكد مقرب منه بس ماقبل
تحجج عنده كعدة ومحتاجي..

بس خلصت عشا دخت ونعست ..
خليت غرام يم ماما ونمت..ورا شوية اجت كعدتني
كالت رجلج بالباب يريدج..
كمت بسرعة لبست وطلعت ..
هو يسولف وياي وانا نعسانة كلش..اجيت اغفى
بالسيارة وهو صورني وكام يحشش علي..

واخذتلي كم يوم مثل الشارب مخدر النوم عندي
صدك سلطان..بحيث لو ماغرام تبجي مااكعد..
يوم الخميس موعد زواج محمد..ماراد لا حفلة
ولا قاعة..راد سفرة ثلث اشهر..كل شهر هدية
من بابا وماما وحيادر..
كال هناك تلبس بدلة وياخذون صور..
ورا يومين من روحتهم دزلنا فديو والصور..
مسوين زفة بالفندق وماخذين صور بالمنتجع
وفرحانين عبالك شاردين من الدنيا..

من شفت حالتي انام هواي شكيت بنفسي..
وشهريتي ماكو اختفت وانا عبالي هي تتاخر ورا
الاربعين..
وصيت حيادر ع اختبار ماصدك..كتله متاكدة
ماكو بس مجرد افحص..
بس من فحصت طلع واااضح الخط..
طلعت اكمز وحيادر شافه بقى يضحك ويهدد..
من اليوم اودي غرام لامج حتى ما تتعبين..

يبوو وين توديها لا تفشلني اصلا مستحية احجي..
عليمن مستحية ..هذا الطفل امج جانت شاهدة من صار
هههههه..
عزا لا تذكرني بيوم الاجت وانا افتر يمها ووجهي
منفوخ وحمرتي مخربطة..
عاد انت بتها..الا انا لبست السروال كبل وطلعت..
همزين هي ماتركز وتحترم..  لو راجع محمد بيومها
جان حطني ونصب علي وكابلني وكعد ..خصوصا
بوكتها جنت واضح للعيان..

عزاا شكد عيب عيب يبووو ..
اي اصلا امج بلا ماتكليلها هي متوقعة جانت شاهدة..
هههههه لا راح ادزلها رسالة حتى ماارتبك بالحجي..
اي دزيلها ولا تحجين لغيرها..انا احجي لامينة وبس..
لحد مايستقر وضعج ونتطمن..

فعلا حجيت بس لماما ..بس هي فرحتلي كالت احسن
سويلج طفلين حتى يتربون سوا وترتاحين بعدين..
وكامت تجيلي بكثرة ومرات تاخذ غرام ويجيبها حيادر
بالليل..
بابا متعلق بيها كلش وحيادر مجنون بيها..بحيث من
يدخل للبيت وهي ماكو بسرعة يروح يجيبها..

مرت فترة وولدت حنين بنية..بس وصلت للموت..
ولادتها صناعية طولت يوم ونص بالمستشفى يلا ولدت..
بقت شهر ببيت عمي لحد ماتحسن وضعها كلش
يلا راحت..
خالتي من مرتلي كالت غير تجيلها وتوجبيها
كتلها انا مالي علاقة بيها وكل مناسباتها ماتهمني..
بس حيادر مشتريلها كرسي جلوس وماخذلها
ملابس ..
بس هي مايجي بعينها ومن بعيد تذب سمها..
بس تخاف توصل بعد لان تخاف من حيادر..

مشت شهور حملي ووصلت للخامس..
هذا حنلي مو مثل حمل غرام..هذا يشبه الاوائل..
لا وحام لا غثيان بس نوم..
لهذا خفت من فتت للخامس ..لحد ماخلصته انا
نفسيتي انعدمت ..بس الحمدلله مر بخير وسلام..
وخلصت شهور حملي البقية بلا تعب..رغم غرام
كبرت وتريد ركضة وراها كللش حركة ووكيحة
جنية ماتنكدر..

جانت فايتة بشهري صارلي ثلث ايام..
وصارت عندي الام خفيفة..عفتها كلت
تشتد واروح..
بس للاسف نزلت السوائل كلها واضطريت للعملية..
ولدت ابني علي..يشبه اخته تماما..
علي جان فرحة جبيرة لان امه طول حملي كم
مرة شفتها وهي تكول بيج بت انت مايعشيلج
ولد..
حيادر مدام عايف اخوته يعني مايثمرله ولد...
بس من صار ابني حسيت نفسي سعدت حيادر ..

اجت ماما بقت يمي لحد ماتحسنت وكمت لحيلي...
اجو اهله وخواله وعمامه باركولنا..
عدا حنين ابد ماوصلت..
وماما تكول كل ماتجي لاهلها تمر النا وتسال عنج..
تالي عرفت انه حيادر مهددها ماتوصل لبيتنا
بعد..هو ماحجه بس تبارك مونتاكارلو هي الطلعت الحجاية...
والحمدلله خلصت المهم مااشوفها..

تعامت وصرت مااهتم اهله شنو يكولون..
المهم الفعل اليشوفو على حيادر وشلون مرتاح..
حيادر..الشخص الي جان لساني يضوج منه بس عاطفتي
تحترمه..
شكد بالبداية عاندت..بس حتى لو اعاند الكى شي
بداخلي يدعيني اله..
واحمد ربي صار نصيبي..
حبني حب طاهر وشريف وصادق..

غير نظرتي عن هواي امور..مااظلم شخص بسبب
انتماءه لكذا عائلة..
مااحكم على احد قبل لا اتحاور ويا واعرف
معدنه شنو..
افتح عيوني عدل ومااتغاضى عن اذى يجيني من
اقرب شخص بحجة انا احبه واغفرله..
جان يعلمني ولازال يعلمني..بنفس الاسلوب
السهل الممتنع..
عمره ماعيط علي لو جبرني..
اقناعه هو اليميزه وياخذ حقه باسلوب مو بصوت
وزمجرة..

هو الوحيد النظر بداخلي وسماني شيهانة..
لان يعرف باحلك الظروف راح تطلع الشيهانة
البداخلي وتثبت وجودها..وهذا الي خله اهله رغم
اذيتهم الي بس يخافون مني..
ويخافون الشيهانة امي..

فيحاء..شيهانة وام رائعة ..احياناً غريزة الامومة
تفقدنا الصواب..ونريد ان نحافظ على اولادنا
حتى لو اذيناهم دون قصد..
لكن تبقى الام همها الوحيد مصلحة ابناءها..
طيعو اهاليكم على الحق واصبرو في الله على الباطل..

امينة..شيهانة بصبرها ونقاء قلبها..كم واجهت
مصاعب ..من زوج وزوجته وابنائهم وبناتهم..
لكنها لا زالت شامخة..ومافقدته..تحاول تعطيه
دائما..

هاجر..شيهانة صغيرة..ظلمها القدر وتطلقت..
وظلمها ثانية حتى ارادو تزويجها زوج خالتها..
وهي النهاية بقيت بقوتها وعزة نفسها..وكسبت
زوج وعائلة ..تكافىء صبرها وطيب اصلها..

سارة..اصغر شيهانة ..لانها قاومت عادة بالية ..
وتحملت الغربة في موطنها..
لكنها حاربت وعزت عليها نفسها ان ترضخ لشخص
سيبني لها مستقبل مدوم مسبقاً..

اما تبارك..فهي ليست شيهانة انما فأر صغير..
لا تعرف متى يظهر كي يخطف الجبنة
منك حتى يختفي ..
والسبب الوحيد امها..جعلتها ضحية جديدة..

الى هنا ننهي معكم مذكرات هذه العائلة..
حذفنا كثير وكثير لاسباب خاصة وخوفا من الوصول
للاشخاص الحقيقيين..
كون العائلة معروفة وفي منطقة مميزة..لهذا اقول لكم..
اقرأ العبرة ولا تبحث عن صاحبها..
تقبلو مني اطيب تحية..والتقيكم بعمل جديد ومتعب
بعد فترة شبه طويلة..

تمت الساعة 2:51
2020/7/8 الاربعاء

اترككم في امان الله

حلوو 😥رح اشتاقلكم كللش ولهالفقرة 😥😥