الشيهانة

3

مساء العافية

الشيهانة
الجزء الثالث

صباح الخير فاشنيستا حنين..
ابتسمت وحجت بصوت ناصي..حلوات عليه صح؟
هه كلش حلوات بس يومية زي جاي تصدمينا..
رشا كالت النهاية معروفة وغمزتلي..
وهي تضحك بهدوء واليوم حتى صوتها مايطلع..

اول ما وصلنا للكلية خابرت بهادر..
شاها حبيبي ينتظرني
رايحتله..
اي روحي انا رح اكعد بالقاعة ..
هي راحت وانا تمشيت للقاعة طلعت كتابي
وكعدت اقرا..
اجه الاستاذ وحنين ماكو ..امبينه حتكضيها
فرة وي هذا همزين رح نخلص المواد جان
رسبت..

وخلصت المحاضرة وخابرتها بس ماتجاوب!
عجيب وين راحت..
اجه الاستاذ ومحاضرة ثانية وهي ماكو..
جان وراها ريست..
بس خلصت اخذت جنطتي وخليت كتبي بمكانهم
لان عدنا بعد محاضرة هنا..
وطلعت خابرتها ماكو سالت البنات ماشفتوها
محد شايفها من الصبح!

رحت للكافتيريا اشتريتلي لفة بيبسي وكعدت
اكل..
توني بديت اكل ودخل حيادر..لابس سترة رصاصي
وبنطرون كتان ..
اول مرة اركز بملابسة لان من كعد يمي انتبهتله
ملابسه كلش نازكة وعطره خليجي خشن ..
الفرق بينه وبين بهادر شاسع بالشكل وبالللبس
وبالاسلوب..

سويت نفسي مامنتبهة عليه وفتحت فوني
فتحت فيس وبقيت مدنكة ..
هو تقرب وشاف ميز قريب
مني كعد..
اهوو بس لا يرجع يحاجيني..
عفت اللفة نصها ..
وهو دك فونه وكام بسرعة..اي انا اجي لا لا تجي
انت انا اجيك..
كام اخذ كوب جاي بيده وطلع..

انا هم شبعت اخذتلي كوب كابتشينو وطلعت
تمشيت وشفته هو وهذا الرجال الي وياه
بيوم تعاركت وي حنين ابو نظرات الماتتفسر..
جان لابس دشداشة بيضا..
وهو طويل بس مو كلش وضخم يعني
متناسق..

وهواي بي شبه من حيادر ..
نفس الملامح العيون المجرورة وصفر
كلش والخشم الرفيع
لدرجه احسه مسطح ..
ويشبهون حلك الامريكان يكون عريض
بالنسبة للبنات يشوفوهم جذابين او صفة جمالية
عدهم ..

حتى مرة من اجه وي بهادر البنات كلهم يكولون
جميل بس انا هيج نوع من الشكل مااطيقه
احسه مسموم واحسه جلد ..مااعرف شلون اوصفه
بس مااحبه وهذا اليخليني اشوفه مو حلو
رغم شكلهم الحلو..

كملت طريقي وكعدت يم كروب شعبتنا
جانو متجمعين يم القسم..
هاي گايز..
هلاا.. خو جيبي وياج كوب زايد لو عزمينا..
جاوبني زيد طالب بكروبنا..
حطيت عينك عليه هاك اخذه..
بقى يضحك ..مشكورة بالعافية..
بقيت كاعدة يمهم لحد وقت المحاضرة ومابينت
حنين

بنهاية الدوام قبل لا يجي السايق بشوية..
جنت كاعدة بالقاعة انتظره
خابرتني حنين ..هلا شاها وين انت ؟
بمجمع القاعات  ..انتظر السايق ..
وين جنتي حتى ماكلتي رح اتاخر؟؟
يلا اوكي انتظرج يم النافورة..
هوب مو احاجيج..
سدت الخط بوجهي الرعنة ..