الشيهانة

١٠

مساء الراحة

الشيهانة
الجزء العاشر

بقت حاضنتني لصدرها وتمسح ع شعري..
تالي جرت الكرسي وكعدت يصفي..
مسحت دموعي وبوستني وغمضت عيونها
بوجع..

كل الاسوي لمصلحتج..شما اقسى عليج
مو كرها بيج
بس اجنبج اي اذية..
لا تشيلين بقلبج عليه..اليوم اخلي محمد
ورا المغرب ياخذنا للجزائر..
اخذيلج ايفون جديد واشتري كل اليعجبج..
واخذيلج لبسة حلوة ..باجر نروح لخالتج
ام حيدر..

جريت ايدها بستها..مازعل منج انا
اعرف محد يريد مصلحتي بكدج..
بس ماحتاج فون مالازم..
كامت راحت للطباخ وتحجي..شلون تبقين
بدونه ماما مايصير..
كومي جمعيلي ملابس اخوانج الوسخة
وجيبيها خل اغسلها..

اي هسه اروح..بس خالة ام حيدر
شوكت رجعو من دبي؟
مااستقرو هناك هم راحو زيارة لبتهم
الجبيرة..
ها يعني الا نروح!
اي تونسي وغيري جو شوية..
اي انشالله..

كمت الم الملابس وانا اعصابي
متوترة..
بيت خالة ام حيدر مااطيق اروحلهم..
لان من ابنها لازكلي فد لزكة وهي هم
تشجع هالشي..
اصلا من قبل مااريده لان احسه مايناسبني..
مو هسه بعد ما احساسي تعلك ب...ااه بيك
حيادر تعلكت..

جبت السلة لامي وكالت تعاي اعلمج
ع الغسالة..
رحت يمها وتكلي دوسي هيج دوسي
هيج وشغليها..
شغلتها ورجعت نظفت غرفتي وحضرتلي
لبسة لطلعة بعدين..

اجه بابا ومحمد وكاعدين نتغدى..ماما حجت..
حمودي ماما اليوم اذا ماعندك شي اخذنا للجزائر..
تلفون اختك انكسر..
باوع بابا سالني ..ليش بابا شلون انكسر ومحمد
هم سال..
اريد اجاوب وانا ادبرلي جذبة
بس ماما سبقتني..طايح منها بالكاع وانا مادري
ودست فوكه..

ههه الله يساعده التلفون صار طحين..حجه
بابا وضحك..
وهي تكله جسمي مثالي اصلا ماتكدر تنكر هالشي..
وصدك هو جسمها ماما مرتب بس هو
من يريد يغيضها يكلها سمنانة..

لورا المغرب تحضرت وطلعت بالصالة
ماما ماكو..
كعدت انتظرها ماكو..رحت دكيت الباب
مرتين ماكو جواب..
فتحته مقفول..
هسه الا تقفلي ماما كله هيج من تبدل تقفله..

كمت جبت صبغ الاظافر وصبغت اصابع
رجليه ..
جنت مسوية بس ايديه بس هسه وين اكتل وقتي..
لا فون لا شي..
صبغتهم ونقطت مثل تنقيط اظافر ايدي ورفعت
رجليه ع القنفة..
ورا شوية انفتح باب غرفتها..

كمت يمها وانا عاقدة حواجبي..شنو ماما
نسيتي..
لا ماما شلون نسيت هسه اغسل وابدل..صعدي
صيحي اخوج خاف بعده ماامبدل..
فاتت ساعتين ع الصلاة واحنا كناله وراها..
اكيد هسه بدل ..
بس انت عبالي مبدلة لان شفتج قافلة الباب..

ضحكت وباوعتلي بتأمل..
الله يحفظج ماما ..صعدي لاخوج صيحي ونزلي
تلكيني جاهزة..
صعدت الدرج وانا صافنة شبيها ماما هيج تباوعلي
هذا كله ضميرها يأنبها حبيبتي..