طريقنا صعب

البارت ٢٧

‏أخذني بكلشي ما بيعك
أخذني من التعب يمك
جگارة بچفك أشعلني
أموت بسّد أصابيعك ،
أخذني وياك من عندي
أخذني لـ أي حلم أرتاح
مو شرط بـ حلم وردي 🖤..
•••••••••••••••••••••
رزان : كعدت من النوم واحس نفسي فرحانة هواية .. احس شي حلو منتظرني .. اريد اشوف وجهة وابتسامتة المشتاقتلها ..

واخيراً رجعنا مثل قبل .. الحمدلله

كمت لكيت البنات ماكو .. فتحت تليفوني لكيت الساعة بالوحدة .. شدعوة هلكد نايمة

كمت غسلت وبدلت .. خليت مكياج شوي ..
اليوم الواهس فول عندي .. نزلت بساع لان ميتة جوع اريد اتريك ..
دخلت للمطبخ لكيتهم ديتغدون كُلهم

نور : ماضليتي نايمة هههه
قسورة : وانتي شدخلج !
رزان : نور بس حجت هيج بساع رد عليها قسورا .. احس تفشلت من يمي ههههه
درت وجهي لكيت حوراء ونرجس يباعلي .. مصدومات

رزان : كعدت يمهم وأكلت شويَ .. نور تباوعلي بحقد عبالك مسوية شي الها ..

بس لحضة هيَ مو على اساس تروح لكرايبهم .. شكو لازكة عدنا

أول ماخلصنا الغدة هبة ونرجس يغسلن بالمواعين ..
ونور كاعد تحجي .. عبالك تحجي ويا الحايط محد منتبه الها ..

صحت حوراء وصعدنا فوك ..

رزان : اكلج مو على اساس كم ساعة وتروح لكرايبها
حوراء : اي اليوم يوصلها قسورة البارحة جان تعبان كللها بعدين اوديج

رزان : ماكو غير قسورا يوديها
حوراء : ههههه وانتي ليش ضايجة ..!

رزان : لامضايجة
حوراء : علييينا يمعودة ، بعدين تعاي انتي ماكلتيلنا شنو صار البارحة اكيد تصالحتوا مو

رزان : اي مو انتن نمتن شسويلجن
حوراء : جا خلي تجي نرجس ونكعد تحجيلنا شنو صار لان مااخلي اخيتي تضيع عليها الفِلم الرومانسي

رزان : سويتينا فلم ولج
حوراء : هههههه

رزان : خلصن البنات وصعدن لغرفتي كاعدين كُلنا

نرجس جابت الفواكه وياها وكعدن ياكلن .. اريد تطلع نور علمود احجيلهن ماكو لازكة ..

رزان : كلت بعدين احجيلهن شنو صار
بس ماسمع غير نور تكول

نور : يلا بنات اني رايحة اخلي قسوورة يوصلني
رزان : بودي اكوم اكتلها كتلة .. شلون تتموع الحقيرة

بساع اخذت غراضها وطلعت ..

رزان : اكلج نرجس ماكو غير اخوج يوصلها هيَ
شنو !!
نرجس : ههههه ضجتي

رزان : لا يمعودة
نرجس : علييينا هههههه اكعدي احجي شنو صار البارحة ..

رزان : كعدت احجيلهن بالتفاصيل شنو صار .. بس ماذكرت انو حضني استحي ..

نرجس : ولله حيل فرحانة الكم وعرفتكم راح تتصالحون

رزان : اي اي
هبة : بنات اختي واعرفها ترا بالها مو يمجن بالها يم قسورة لان راح يوصل نور

رزان : لاشعلية اني
هبة : لاابد ماعليج

رزان : بساع اخذت الشال وكتلهن ..
رزان : هسة شوي وجاية
طلعت من غرفتي وسديت الباب سمعتهن يضحكن ..

نزلت بساع اباوع للبيت ماكو احد .. يربي بس لاطلعوا ..
رحت للاستقبال لكيت نور واكفة وبيدها جنطتها ..
وقسورة واكف يمها ..
لان عمو ديحجي ويا .. يعني هسة ح يطلعون
بساع رحت لغرفة ماما ..

رزان : ماما راح قسورا راح يوصل نور لكرايبها عادي اروح وياهم
ريمة : شعندج رايحة
رزان : يعني مو وياهم لا هيج بس ابقى بالسيارة علمود من نرجع اريد اشتري اشياء من محل

ريمة : هاي شلج بيها
رزان : ماما حبابة حبابة ولله اريد اشتري حلويات واشياء هواية .. البنات يمنا عيب ولله

محمد : روحي بابا ..
رزان : ومن اكول احلى أب يلوموني
محمد : دعوفي اللواكة وهاج الفلوس ..
رزان : لاعندي شكراً
محمد : ميخالف اخذي ..
رزان : اخذت الفلوس وطلعت بساع ..

رحت للاستقبال ملكيتهم لايربي بس لاطلعوا
رزان : بساع رحت وراهم لكيتهم بباب الشارع نور دتصعد السيارة..

بساع فتريت فتحت الباب وكعدت ..
احس قسورا ونور نصدموا حيل .. بساع كال قسورا وهوَ يبتسم

قسورة : ها ست رزان شعندج مضيعة شي ؟
رزان : ها سوري ماكتلك بس احتاج كم شغلة من محل وكلت لبابا وقبل
كلتلة هيج واحس يريد يضحك بس ميكدر لان نور يمنا ..

خو نور سالفتها سالفة بس تريد تعرف شصار بيناتنا حتى ضل يحجي وياية ..
رزان : قبل منطلع كالت نور ..

نور : خو انتي حاشرة روحج بكلشي
رزان : باوعت عليها !! هاي من كُل عقلها دتحجي وياي هيج ..
بسيطة اني الج ..

رزان : فتحت الباب ونزلت .. صعدت ليكدام ..
وكعدت بهدوء .. احس قسورا ديباوعلي .. درت وجهي لكيتة ديحجي على كيف  وهوَ يبتسم

قسورة : ولج شجاي تسوين
رزان : اي حارة ورا اجيت هنا ميصير شنو

قسورة : لا يابة طبعاً يصير
رزان : اي عبالي
قسورة : بس لتتماوعين عفية
رزان : درت وجهي لنور وكلت ..

رزان : قسورا هو كلامي وصوتي هيج شسووي يعني ..
سمعتة يكول

قسورة : نطيني الصبر ربي
رزان : ضليت اضحك .. احس نور راح تطلع عيونها .. تريد تعرف شيصير .. وشلون تغير هيج قسورا ..

ضليت طول الطريق اباوعلة ويباوعلي .. احس يريد يعرف شديصير .. مستغرب ههههه

رزان: وصلنا لكرايب نور على بالي بي نوصلها ونرجع بس كال قسورا

قسورة: انزَلي خلي نسلم عيب
رزان : لاعفية استحي
قسورة : دنزلي انزلي تستحي الست
رزان : نزلت ومشيت ورا .. دكينا الباب وطلعلنا ولد .. سلموا علي واني كلت السلام عليكم .. وسكتت بعد ماحجيت ..
دخلنا كعدنا شوي بلاستقبال ونور راحت للبيت جوة يمكن تسلم عليهم ..

رزان : يلا قسورا امشي خلي نطلع عفية

قسورة : ولج خلي نسلم على العالم شسالفة
رزان : تمام تمام ، انتظرنا شوي واجوي كُلهم ..
الزلمً سلموا على قسورا اني بتعدت شوي .. سلمت ع النسوان الموجودات .. احس أكلني بنضراتهن شسالفة !!

كعدنا وياهم شوي ..
وسمعت وحدة تكول ..

: هاي الحليوة منين
قسورة : رزان تصير بنت عمي
رزان : صار هدوء والكُل ركز علية .. يبو شلون سالفة هاي هسة !!
شوي وحجت مرة جبيرة بالعُمر ..

: يمة علي شنو رايك نخطبها الك ههههه
رزان : شوي واصيح من الصدمة !! هاي صدك تحجي لو تتشاقة !!
شلون تكول هيج كبالي !!

سمعت قسورا يكول ..

قسورة : عمة محجوزة البنية
رزان : اريد اضم ابتسامتي مااكدر ..
شوي وطلعنا ..

وصلنا للباب قسورا ضل يسلم عليهم .. واكفة يمة واشرلي .. انو اروح للسيارة ..

رحت بساع صعدت للسيارة .. وضليت انتظرة .. ماطول هواية واجة ..

رزان : اول ماصعد ركع باب السيارة قوي !
زين هسة ليش يطنكر اني شعلية ؟

قسورة : انة صوجي خليتج تنزلين
رزان : لاغير نسلم على العالم شسالفة
قسورة : وتقلدين فوكاها

رزان : لاجواها
قسورة : رزان عوفي تفاهتج بالمواقف الجدِية خوش لو لا ؟
رزان : تفاهتي لو برتقالتي هههه
كلت هيج وضل يضحك..

قسورة : ولج انتي شكد تافهة
رزان : شكراً

قسورة : هههه لاصدك شنو هاي التفاهة العندج منين جايبتها

رزان : باوعتلة بطرف عيني ودرت وجهي للشباك ضليت اباوع وصافنة ..

شوي وشغل اغُنية ..
داسمعها ومندمجة جان يكول ..

قسورة : تعاي تعاي نسيت انة
رزان : نعم استاذ شنو تريد

قسورة : ههههه شبيج ويا نور قبل شوي
رزان : شبية ؟ كُلشي مابية
قسورة : ها !!
رزان : اي عادي والله

قسورة : انة احب اليغارون
رزان : اني مااغار

قسورة : لا ابد
رزان : ضل كل شوي ويضحك ..
رزان : قسورا لاتضحك شبيك

قسورة : صار حبيبي ماراح اضحك
رزان : باوعتلة وابتسمت .. كتلة ..
رزان : اي طلع استاذ غثة رومانسي واحنة مندري

قسورة : هههههه ليش ماخذة نظرة عني انو انة غثة ومااتحاجة
رزان : لا مو ماخذة نظرة ، هو انتَ اصلاً غثة شسويلك

قسورة : ها هيج صارت
رزان : لا شبيك داشاقة
قسورة : غصباً عليج مو بكيفج

رزان : قسورررا
قسورة : ههههههه

ضلينا نسولف شوي لحد ماوصلنا لمُجمع .. نزلنا
وضليت افتر عفتة يشتري شغلة وشردت بحدي .. اخذت سلة وشكو شي احبة انزلة بيها ..

بسيطة الا اقطك قطة ..
كملت واجيت للمحاسب ..

قسورة : هاي وين جنتي !! صدك جذب
رزان : انت تعرف بية موجودة هنا ماراح اضيع يعني ..

قسورة : خو انتي عندج جواب لكلشي ماشاء الله
رزان : نادرة الله يسلمني
قسورة : اي اي نادرة .. امشي امشي كبالي
رزان : هههههه
خلينا الغراض وديحسبهن الرجال .. صفنت بوجه قسورا ..

قسورة : شتريدين
رزان : يلا متدفع الفلوس
قسورة : ها ههههههه
رزان : اي ولله شبيك
قسورة : وفلوسج وين

رزان : فلوسي عندي .. لحضة اراويك ..
طلعت الفلوس وراويتهيا ورجعتهن ..

رزان : يلا ادفع حباب
قسورة : زين ليش متدفعين انتي ! انة شكو
رزان : لا اريد اقطك
قسورة : ههههههههه ههههههه لاهاي قوية ! ماشاء الله على صراحتج

رزان : شكرا ً
قسورة : عوبة ههههه

رزان : دفع الفلوس وطلعنا .. ادري بي لو دفعت الفلوس اني ميقبل .. حليت السالفة من الاخير ههههه

صعدنا للسيارة ومشينا ..

صفنت شوي كتلة ..

رزان : قسورا
قسورة : كول حبيبي
رزان : اكلك لاتكلي حبيبي
قسورة : يلا كول مو حبيبي
رزان: قسورا شسالفةة
قسورة : يلا يلا احجي هههههه

رزان : ااا اكلك يمكن راح اطلع ويا صديقاتي
قسورة : يمتى

رزان : مدري يمكن اليوم العصر ..
قسورة : ويا منو
رزان : صديقاتي غير

قسورة : اطلع مافتهم اذا مااجة وياكم هُمام مااعرف شسمة
رزان: ها .. اي يجي

قسورة : ها وهمُام صديقتج ! سويتي بنية شنو

رزان : لا مو نسيت
قسورة : هاا نسيتي

رزان : ضليت ابتسم .. سمعتة يكول
قسورة : ماكو روحة ..

رزان : درت وجهي بساع الة ..

رزان : خو ماكو شي
قسورة : كلت ماكو روحة ..

رزان : لا اكول لبابا وماما واذا قبلوا اروح ..

قسورة : وانة رجل كرسي هنا
رزان : لا مو كتلك شبيك

قسورة : زين ماقبلت انة شلون بالله ترحين غصباّ عني !
رزان : راح تستمر هيج !!

قسورة : شنو استمر هيج رزان .. كلتلج هذا هُمام ماارتاحلة خلص .. شنو مسوية تعهد ويا ذاك المطعم كل فترة ورايحتلة

رزان : هههههه

قسورة : لتضحكين ابوية جاي احجي وياج
رزان : اوكي اوكي

قسورة : مامقتنع بالاوكي مالتج
رزان : بعدين نتفاهم ..

قسورة : علمود تسويلي مُفاجأة مو !

رزان : هههههه مثل المفاجأة مالتك ..

قسورة : استغفر الله ربي

رزان : ههههههه
ضلينا نحجي شويَ علما وصلنا ..
دخلت مرتاحة للبيت ..  لان نور مموجودة
اول مادخلت صعدت فوك ..
وقسورا راح للاستقبال ..

وكفت ع الدرج ومديت راسي اباوعلة .. نتبهلي ..
باوعلي وابتسم ..

دااحبة اكثر واكثر كُل يوم ..
اشرلي انو اصعد ..
ردت اصعد .. صفنت لالا لحضة نسيت شي اني
باوعتلة وغمزت الة وصعدت ..
شفت الصدمة على وجهة ههههههه خليتة وصعدت
دخلت لغرفة شاكة حلكي الابتسامة ..

نرجس :عود صدك رحتي وراهم !؟
رزان : لا لج ردت اشتري حلويات .. هاجن اخذن غير علمودجن

هبة : اي اي علمودنا ..
رزان : بكيفج اني علمودج
نرجس : هههههههه
ضلينا نسولف ونضحك وناكل .. متونسين حيل ..
احب نرجس هواية .. احسها عاقلة ومُتفهمة .. وشخصيتها رزنة تخبل ..

شوي وخابرتني نوران ..
هسة اكيد راح تكلي على الطلعة ..
فتحت التليفون وخابرتها ..
نوران : ولج تجين لو لا ؟
رزان : بلأول السلام عليكم
نوران : وعليكم هسة تجين مو ؟
رزان : اكول ل اهلي صبري
نوران : تمام

رزان : اخذت الشال ونزلت بساع .. ادور على بابا لكيتة كاعد يم عمو بلأستقبال ..
ووياهم كاعد قسورا .. هسة شلون احجي اني !!
اول مدخلت ابتسملي قسورا ..
درت وجهي على بابا وكتلة ..

رزان : بابا عفية اريد اروح ويا البنات نطلع .. مو حاجيتك ذاك اليوم ..

محمد : شوفي امج
رزان : تقبل هيَ اذا انت تقبل والله
محمد : خوش بس مو تتأخرين
رزان : لالا والله .. اريد اكمل كلامي .. گال قسورا

قسورة : عمي عليمن طالعة رزان .. خو نطلع كلنا انة عازمكم لان هباوي نجحت يلا

رزان : درت وجهي منصدمة .. يسوي كلشي بس كون مااطلع .. بسيطة اني الك

محمد : قسورة حبيبي تسلم بس والله ماكو داعي هسة  هاي رزان كبالك اذا ماضاجت وسوتلها سالفة اني معتب

قسورة : ههههه لا وينها كلشي مابيها تضحك .. رزان ترفضين عزيمتي ؟

رزان : بودي اخذ منة راشدي معدل هسة .. اذا مارحت اعرف نوران تكنسل الطلعة من وراي ..

كتلة .. لااريد اروح ويا صديقاتي

اريد اكمل اجتي نرجس بساع وكالت ..

نرجس : هههه دتتشاقة .. طبعاً مانرفض عزيمتك حبيبي خوية ..

رزان : باوعتلها بأستغراب .. خير شكو ؟
شوي وجرتني لبرا ..

نرجس : هسة مليون مرة طالعة ويا صديقاتج وولامرة طالعة ويانا .. وكاعد تعاندين قسورة كدام الكل .. ومن تتعاركون تكولين شبي اخوج !

رزان : اي بس

نرجس : لابس ولابطيخ .. اذا مارزلج اطلع ماافتهم
رزان : تايهتلة مو
نرجس : خوش عود كليلة هيج من يحجي وياج ..

رزان : راحت نرجس .. وضليت وحدي بالمطبخ يربي بس لاصدك ضاج هوَ ..!

دافكر ودخل للمطبخ ..

قسورة : اي ست رزان تردين تطلعين ويا صديقاتج مو ؟ واكلج ترفضين عزيمتي تكليلي اي

رزان : لا بس

قسورة : خلص خلص عوفي ال لا مالتج

رزان : باوع انت ليش متفتهمني ؟

قسورة : طلعة بدون اذني متطلعين ؟ جاي تفتهمين هلشي .. هذا الحجي تستوعبينة ؟

يحجي ومخلي ايدة على راسي ويأشر .. ضليت اضحك ماكدر الزم ضحكتي بهيج مواقف

قسورة : عفية عفية ضحكي

رزان : لاولله .. اريد اكمل ..
مالحكت بساع طلع ..

يربي ليش يصير وياي َ هيج !!

ردت اطلع اجتي ماما ..

ريمة : يلا مو تتأخرن بدلن من هسة فد ساعة وطالعين ..

رزان : ها يعني صدك ح نطلع !!

ريمة : اي ماما يلا لتتأخرن

رزان : يبوو والله ماريد اروح ..
صعدت لغرفتي شفت البنات ديحضرن ملابسهن ..

رحت فتحت الكنتور وضليت ادور شي مستور لا هسة كُلش فد مرة خبالاتة يطلعهن علية ..

اخذت فستان بسيط وحلو لونة اسود .. ورهمت ويا شال ..
وجنطة وكعب ..

خليت مكياج فاتح .. والبنات بدلن .. ونزلنا كُلنا ..

اول مانزلت لكيتهم منتظرينا بالمطبخ ..

دخلنا وصارت العيون علينا ..

ريمة : اللهم صلي على محمد وآلي محمد تخبلن بنياتي ..

رزان : اجيت اكول ل ماما غصباً عليج مو بكيفج بس خاف تركعني راشدي كدامهم  .. نرجس بساع باوعتلي يمكن فهمتني ههههه

طلعنا وقسورا يمشي ببراي .. احس ديباوع لملابسي اذا مبين منها شي او قصيرة ..

درت وجهي الة وابتسمت .. باوعلة بطرف عينة وطلع كبالي .. يوووه هسة يضل يتمزعل هيج شنو !!

طبعاً قررنا نروح للمول .. وهناك نتعشى

سيارة بابا متكفي اني وهبة وماما وبابا وقسورة وحوراء ونرجس وعمو .. ف نقسمنا

احنة كعدنا بسيارة بابا.. وهمَ  بسيارتهم ..

صعدنا وعيون قسورا علية .. يخزر بية شسالفة !! شمسوية ؟

كملنا وطلعنا بساع ..

نمشي احنة وهَو سبقنا بسيارتة .. احس كام يسوق سريع شسالفتة ..!

هبة : بابا ليش قسورة هيج يمشي سريع

محمد : شمدريني .. خلي براحتة ..

رزان : ها يعني مو اني احس هيج .. طلع هو صدك مشى سريع !!

هسة يمكن الونسة راح يطلعها من خشمي اني اعرفة ..

علما وصلنا للمول نزلنا .. ولكيناهم منتظرينا ..

باوعتلة احس شوي وياكلني بنضراتة ماادري شتتسمى نظرة حلوة لو لا بعد مااعرف !!

دخلنا وهو يمشي ورانا .. على بالك حارس شخصي شسالفة

ضلينا هواية نفتر بالمول اخذنا هواية مكياج وهلسوالف .. عمو وبابا راحوا يفترون ببحدهم

وماما وقسورا ويانا ..

دخلنا لمكتبة .. حيل عاجبني كتاب ودادور علي ..
اجة صاحب المحل ..

: تفضلي

رزان : ااا طبعاً اعرف ماعندك هلكتاب بس ميخالف اجرب حضي

: هههه لايمكن عندي كولي شنو اسمة ..

رزان : داحجيً ويا واجة قسورا .. يبو شيفضج ياطلعة

ضل يباوع للولد ويباوعلي ..

بساع كلت للولد اسم الكتاب وطلع صدك ماعندة .. تشكرت منة وطلعت ..

ادور على ماما والبنات .. ماكو ضليت اباوع منا ومنا ماكو ! سمعتة يكول

قسورة : راحن لذاك ابو الملابس

رزان : ها اوكي ..

قسورة : تعاي لتفلتين

رزان : كول عيني

قسورة : اي اي عينج .. شسالفتج ويا الولد شويَ وتشربون جاي سوة

رزان : شسالفة ماحجينا شي

قسورة : اي توقعت ردج هذا .. بس مانسالج ذيج السالفة

رزان : ياسالفة !

قسورة : اكلج تجين ويانا تكليلي اريد اولي ويا صديقاتي مو ؟

رزان : قسورا هسة مو اجيت وياكم بعد شكو

قسورة : ايباااه ست رزان سويتي فضل اجيتي ويانا

رزان : يلا غصباً علية اجي مو بكيفي
كلتلة هيج وضل يضحك ..

قسورة : اي عبالي

رزان : اي اضحك شبيك .. الضحكة بفلوس ؟

قسورة : ام الفلوس امشي روحي ويا البنات روحي

رزان : تمام حبيبي

كلتلة هيج ومشيت .. سمعتة يكول هاي شنو ...

هههههه اليوم اشبعة صدمات

دخلت للمحل وضلينا نباوع للملابس البنات اشترن كم قطعة .. اني رحت على الشالات اريد اشتري الوان معندياها ..

خلصنا ونزلنا للطابق الجوة .. دخلنا للمطعم وكعدنا سوة بطاولة جبيرة ..

طلبنا الاكل وكعدنا ننتظر ..

طلعت تليفوني وأكلب بي ..
صفنت قسورا كاعد كبالي ..

ههههه مديت رجلي وطخيتة ..
باوعلي بصدمة .. يربي اريد اسكت مااكدر ..

دار وجهة وضحك

اجة الاكل وأكلنا .. كلما تجي عينة بعيني نضل نضحك ..

كملنا وطلعنا .. شوي وكفت نرجس على محل تريد عصير ..
نرجس : مشتهية عصير بطيخ

رزان :اي خو انتي تموتين ع البطيخ

نرجس : ههههه معليج انتي

رزان : هم اشترينا وقسورا يدفع هههه احس قطينا قطة مو طبيعية ..

مر من يمي وكال ..

قسورة : خو كلتلجن عازمجن وتورطت

رزان : ديلا عمي على كيفك غير تنكط فلوس انتَ .. احسة شوي ويضربني هههههه

قسورة : هاااا

رزان: داشاقة شبيك

قسورة : الله يساعدني عليج .. الله يساعدني

رزان : ضحكت وطلعنا قبلة ..

ضلينا كم ساعة اكلنا وشترينا وتونسنا .. واهم شي انقط استاذ غثة ..

ورجعنا ..

اول مادخلنا .. ميتين تعب .. اني اريد انام حتى مالي خلك ابدل ..

هسة دخلنا للغرفة وخابرني قسورا ..

قسورا : اطلعيلي للحديقة

رزان : قسورا ولله اريد انام

قسورا : حبيبي تطلعين لو اصعدلج

رزان : ثواني واجي والله .. الاستاذ مايتفاهم بهيج اشياء الله يسلمة ..

نزلت .. شفتهم كُلهم ملتهين هذا الي يبدل وهذا النايم ..
طلعت للحديقة ..

لكيتة كاعد على مرجوحتي ويدخن ..

رزان : كوم المرجوحة خفيفة لتنكسر ..

قسورة : خايف على لحضة انة اكسر راسج ولج

رزان: دااشاقة شبيك

قسورة : خو انتي تلزكين سالفتج بكلمة دااشاقة

رزان : والله تفتهم ههههه
باوعتلة ماضحك .. كلت خلي اسكت لايجيني راشدي منة ..

رحت كعدت يمة واباوعلة منتظرتة يحجي شكو !

يباوعلي ويدخن .. سحبت الجكارة منة ..

قسورة: جيبيها

رزان : والله خنكتني شنو هاي

قسورة : خوش ختولي .. باعي انتبهي الكلامي زين ..

رزان : خير ان شاء الله كول .. !

يتبع ...!

لتنسون اللايك اريد اشوف تفاعلكم على هلبارت قوي حتى انزل أسرع 🖤🖤😉.