*بسم الله*
.
.
.
.
.
.
.
.
.
.
.
.
•••••••••••••••••ميار••••••••••••••••••
طلعت راسي ليه وخزرت فيه
ميار: متخطبهاش
طلع حاجبو منبعد تبسم
جواد: وعلاه منخطبهاش
حمارة انا حمارة ياربي نهدر برک انا
قعدت نعصر في مخي واش نهدر ونسلک روحي مي ملقيت والو ايبان سكت وهو ريح يخزر فيا
كل منهرب بعيني هو يحطهم عندي
جواد: علاش راكي دمعي عليا ضوک
ميار: شوف نتا واش راک دير منهار حطيت رجلي هنا مزدت شفت ربح منک
تنهد وحط يدو على خدي مسحلي دمعة لي طاحتلي وقال
جواد: نعرف روحي..و مراحش ناقشک مي اسمحيلي
قلبي بدا يخبط محبش يحبس.. اصلا لواحد راهو مونک وهو يكمل على جدي
ميار: مزلني زعفانة ونريح زعفانة الى يوم ديين
جواد: ههه حبسي جياحة
طبعني من كتفي حتى وصلنا لطونوبيل ركبت وهو تاني
حبس قدام لوتال.. خزرت فيه شويا وجيت هابطة
جواد: اصبري.. مكلاه لخرجة راني قتللک
ميار: مكتوبة عندک فليفري ياک
جواد: كي ليوم آيا اهبطي ..وغمزلي
لحظة دقيقة وان مينيت قالي كي ليوم وغمزلي تاني
رفدت روحي وهبطت نجري خير مانبهدل روحي
دخلت وندعي في قلبي مانتلاقا لا بحنان ولا بهذاک سامط ..مي زهري مكحوس ولقيتهم لزوج قدامي
حنان: حمدلله لي وليتي
ميار: سمحيلي هو هكا دايمن
آدم: شكون؟
حنان: وليد خالتها جينا خارجين حتى جا وداها
آدم: ومنبعد يحكم فيک هذا
ميار: اييه ومنبعد ديرونجاک الاخ
آدم: هههه كالم كالم مخلطناش فيه اصلا
حنان: المهم منعطلوكش ميار
تبسمتلها وجزت عليهم طلعت للفوق بنية نضربها برقدة ومنوضش
دوشت ولبست بيجامة.. رميت روحي على لبونک ورقدت
منضتش حتى سمعت تليفوني يصوني رفدت لقيتها اسراء حكيت عينيا ونضت ريبونديت
ميار: صباح كنت مع جدک
اسراء: هههه يايما كوليني
ميار: مناكلش حبيبة قلبي
اسراء: آه آه وجواد محل من الاعراب وين راه
ميار: بلعيييي ضوک يسمعک كاش واحد
اسراء: لالا.. اسمعي عيطتلک على حاجة
ميار: لي هي!
اسراء: غدوة قاتلک ماما ارواحي عندي هدرة معاک
ميار: وشمن هدرة
اسراء: والله معلبالي المهم ارواحي ياک
ميار: ان شاء الله
اسراء: نبعتلک جواد ولا عمو فاتح هههه
ميار: بركاااي اصلا مقبيل كنت معاه
اسراء: وات كيفاه حتى
ميار: لقصة ومافيها كنت خارجة مع حنان لي حكيتلک عليها كي هبطت لتحت لقيتو ومخلانيش نروح معاها مبردش حتى خسر لخرجة
اسراء: ممممممم صحا آسيدي.. المهم راهم يعيطولي لتحت منبعد نحكو
ميار: ؤؤک بااي
*****************************
✧اسراء✧
كوبيت عليها وهبطت دخلت لكوزينة وين ماما ومنال قاعدين لقيتهم يوجدو فلعشا ويوصلو لصالو
اسراء: منوقتاش نتعشاو فصالو
منال: جاو عمي محمد واكرم
طلعت لفوق لبست خيمار ووليت عاونتهم غير دخلت جات عيني في عينو تبسم وغمزلي هبطت راسي وخرجت ناقصني اناا
وجدنا كلش وجاو قعدو فطابلة وريحت انا قدام منال ناكلو فساكت غير جواد واكرم يتناقشو وعمو محمد ثاني
رحمة: اسراء نوضي جيبي لخبز لي بقا
هزيتلها براسي ونضت رحت لكوزينة جبتو ووليت شفت ماما تتبسم ومام جواد غير دخلت خزرو كامل فيا حطيت سلة تع لخبز وريحت في پلاصتي
محمد: كيما قتلک وليدي جواد منبعد رجعلي لخبر
جواد: ان شاء الله عمي
قعدت انا كي الاطرش فزفة والله مفهمت والو
قاعدة ندير بعينيا لمنال فهميني مي آحاااي والله متفهم كون مياار فهمتني وينک يا ميار
كي كملو خرجو كامل قعدنا غير نسا فدار.. غسلت لماعن اصلا منهار راحت ميار نغسلهم وحدي
طلعت لبيتي وريحت نكونيكتي شويا مع مرام شحال عدنا متلاقيناش ومهدرناش
مع جويهت 9 طبطبو في بابي فتحتو لقيت جواد.. دخلتو وقعد تبسم معايا وريحت قدامو خيير علاه جاي
اسراء: سور كاين هدرة
جواد: اييه.. ختي صغيرة كبرت
حط يدو على راسي وعنقني.. جواد اخ وسند لي لقيتو في حياتي باسني من جبهتي وتنهد
جواد: ليوم جا عمي محمد على جالک
اسراء: انا! علاه
جواد: جا باش يخطبک لاكرم.. نهدرلک هدرة نتي تعرفي اكرم بلي صاحبي ولا نقولو خويا تربا معانا وكلش ومراحش نلقالک واحد ماخير منو ونتهنا عليک غير معاه وايدا دارلک كاش حاجة خوک راهو هنا وبلاصتک تريح هي هي
لالا سيريو ولا.. مقدرتش نهدر مزالني مشوكيا اصلا
جواد: خمي بعقلک ورجعيلي بلخبر لوقت لي تحبي وصلي صلاة استخارة
اسراء: ان شاء الله
جواد: تصبحي بخير
اسراء: ونتا بخير
خرج وغلق لباب هو غير غلقها انا بديت نسوطي كي لمهبولة
والله منيش مآمنة كون يقولولي قبل 5 سنين بلي راح يجي نهار ويخطبني نكذبهم
مي مشي بساهل قالک آرواح وآخطب وانا نقبل نونونونو
جريت لتيليفون عيطت لميار صونا حتى شبع ولبقرة مريبونداتش
زدت عاودتلها رفدت
ميار: يااابنعمييي وشبيک ليوم
اسراء: بلعي بلعي صرات حاجة
ميار: واش
اسراء: اكرم خطبني ليوم
ميار: دقيقة نتشوكا شويا
اسراء: بركااي تبهليل قلبي راح يحبس ملفرحة
ميار: مبروووک الحمدلله لبهييم فهم روحو
اسراء: قالک آروااح ونقبل نووو
ميار: متوقعتها منک
اسراء: مي منعرف كپابل عمو محمد هو لي دار كلش وخطبني وبسيف عليه مشي هو لي قال
ميار: كون راكي قودامي تدي وحد لكوتپيي توصلک لمدغشقر.. تمسخري بيا مزال لوقت لي يتزوج على جال دارهم
اسراء: منعرف المهم غدوة نحكو مليح باسكو ضوک منيش قادرة
ميار: شغول مهدرتييش كامل يابنتي.. ارقدي متريحيش تحسبي فنجوم
اسراء: طيري عليا نتي جي دالتک نشوفو واش ديري
ميار: مشكيتش ..المهم تصبحي بخير
اسراء: بونوي
كوبيت عليها وريحت فوق لبونک.. فيبرا تيليفوني كي شفت لقيت نميرو منعرفوش ايبان مريبونديتش
قعد غير يعيط حتى تقلقت رفدت
اسراء: متخلووش ناس في حالها ضوكا
سنيت شكون يريبوندي مي والو مع جيت نكوبي حبسني صوت نعرفو
اكرم: معامن كنتي تهدري وتليفونک اوكيپي
اسراء: كيفاه جبت نميروياا
اكرم: جاااوبي
اسراء: بصفتک واش نجاوب جلالتک
اكرم: خطيبک
اسراء: هاهاهاي ضحكتني بكل لغات شكون قالک راني قابلة؟
اكرم: كيفاه؟ واش قصدک
اسراء: هيه منيش قابلة وربي يسهل عليک
اكرم: علاه متقبليش
اسراء: هاكا نفحتلي منقبلش انا ونتا منتفاهموش
اكرم: غدوة نهدرو فيها وغير انساي تع مكيش قابلة
كوپا!! كوپا في وجهييي لكلب والله نوريلوو.. طليت متاقة لقيت جواد مريح فلجنينة ويخدم في نصاص ليالي ديفوا يزيد فيها
هبطت نجري حتى وصلت ليه كي سمع حسي.. طلع راسو ليا وخزرلي مستغرب
جواد: واش كاين ؟
اسراء: احم منيش قابلة
جواد: فواش!
اسراء: منيش قابلة على اكرم
جواد: تتمسخري مخميتيش كامل.. قتلک خمي بعقلک ومتزربيش
اسراء: وانا خممت وقولو مهيش قابلة
حک لحيتو وناض دار يديه في جيوبو وخزر فيا
جواد: كيما تحبي منبعد متبدليش رايک
اسراء: ايييه نخليک بونوي
وليت لبيتي.. علبالي زدت فيها مي هو ثان مع لول كان يقولي ختي ومنعرف واش وضوک جاي يخطب لالا وشنو كالي مصرا والو وانا نقبل كي لبهلولة
ياااو طبطب
••••••• مرام ••••••••
سيرين مزالها راقدة وانا نسنا في جدها تنوض.. حابة نخرج مي آحااي لالة زعما موصيتها تنوض بكري
برج البحري اليوم يسموني نحفرها برجليا.. لبست جيلي طويل على پيجامتي ودرت خمار وخرجت لكوزينة لقيتهم يشربو قهوة
مرام : صبااااحوو الخيرر
سامي : واش نضتي لپاندة
جميلة : خلي بنتي آياا
خالد : ريحي تشربي حليب
ماني : ناضت هذيک لفنيانة
مرام : جوستومو جيت ندي كاس ما نغرقها
جميلة : بديتو في قوالبكم
مرام : ههههه باينة خالتوو
رحت عمرت كاس ماا ودخلت ليها مزالها في 7 نوما... ضحكت ضحكة شريرة ودفقتو عليها
سيرين : ياااااا ماماااا وااش هاذاا ياا سي خالد طرطق تيو تع لما عليا
انا طحت فالرض مضحک.. حكت عينيها ولا احم لا دستور ناضت تجري مورايا
سيرين : واللله يا مرام خلات وخولات عليک
هي تجري وانا نجري
مرام : تحكمي ناناک
تخبيت مور ماني وهما يضحكو عليها
حبست في پلاصتها وقالتلي
سيرين : اومبعد ياوجه لبق
مرام : هههه شفتي كيفاه نضتي كي لعود
.
.
.
.
.
.
.
.
.
.
.
على ساعة باش وجدت مدموزال.. انا لبست روپة باج مع صندالة درت ساكي وريحت نسنا فيها
مرام : كيفاه حتى درتي لخمار فهميني
سيرين : حشمت على عرضي برک وزيد صاي ضوک نريح بلا خمار
مرام : خير ماعملتي يابنتي
سيرين : هايا امشي ضوک
خرجنا طريق كومپلي وهي تحكي.. حبسنا قدام واحد لكوسميتيک غير وصلنالو دخلتني سوور فيها حكاية
كي دخلنا لقينا واحد جان مي بولحية ولابس قميص.. وهي ولات تشطح كي لفلون وقاتلي في وذني
سيرين : هذا زين دين لي حكيتلک عليه
مرام : اصبري اصبري ماتقوليليش تحجبتي على جالو
سيرين : لالا مشي لهاذ درجة تقدري تقولي هو قنعني بيه مي يعيطلي ختي ..روماركي برک
مرام : ايه راح نروماركي
سيرين : السلام عليكم
صدمة كبيرة.. والله يعني افتجأة ضربة وحدة
زين دين : وعليكم السلام ورحمة الله تعالى وبركاته.. كيفاه نقدر نعاونكم خوتاتي
سيرين : ضوک حنا نشوفو
زين دين : خوضو راحتكم
بدات تهدر في وذني شغول شي راح نسرقولو لحانوت
سيرين : شفتي شفتي ختي ديراكت
مرام : هااا واش راكي حابة يقولک حبيبتي ول متتمسخريش
سيرين : زهري مبعر وخلاص
مرام : آودي باين وليد فاميليا وآخينا تسمى اوبلي يحطک في مخو غير وايذا خطبک ديراكت
سيرين : آواه باينة يدي وحدة لابسة لجيلباب متعرفي ايلا رايحة ولا جاية
مرام : ههههه خليني نشوف يرحم باباک
بدينا نرفدو لحوايج لي خصونا... كي كملنا روحنا لاكاس خلص علينا وخرجنا
سيرين : هي صح خرجنا ورانا برا مي قلبي خليتو لداخل
مرام : نتي كنتي مهبولة ضوک تكملتي طول
سيرين : آممم.. حقا مزال مشفتش هذاک لي حكيتيلي عليه جاسر يادرا كيفاه مداير
مرام : كيما ناس
سيرين : خبي خبي ..صحا احكيلي كيفماه مداير شباب ولا لالا
مرام : آممم في شباب والله شباب جااي طويل وعريض يدير بيا ربعة وعينيه كحولة وشعرو ثاني كحل ليل وكي يتغشش ميوليش يضوي
سيرين : آحمممم هذا كامل على خطرة
مرام: حكيتلک وندمت
سيرين: واش حكيتيلي يرحم باباک.. مي والله سترک ربي عمبالک كي قولتيلي خطفوک شوكيتيني
مرام: تعيشي تريح بيناتنا حتى واحد منسقو يعرف
سيرين: ضوک نزعف تعرفيني نهدر حاجة هكا
جيت نريبونديلها صونا تيليفوني رفدت لقيت نميرو منعرفوش يبونديت
مرام: آلو شكون
جاسر: وااش مخرج جدک برااا فهمتک ولا لالا ضوک ترفدي روحک وتولي لدار
مرام: آي آي بعقلک وسمک وزيد نريح فدار بزااف كرهت
جاسر: منيش فارغ شغل نريح نتبع فيک من پلاصة لپلاصة
مرام: مقتلكش تبعني آآو
جاسر: عندک 5 دقايق ميقوليليش ولات متلومي غير روحک
مرام: معندک مدير
كوبيت وشفت في هذيک لبهلولة لي حالة فمها
سيرين: شكون متقوليليش البطل المغوار
مرام: سيرييين متزيديليش وضوک امشي حابة ناكل شاورما تع عمي عليلو هيااا
مشيتها من يدها ودخلنا دوموندينا وريحنا ناكلو
طلعت راسي زهر وين لباب حتى لقيتو داخل حصلتلي لقمة وخايفة نموت في مقتبل العمر
حكمت قرعة ما شربت منها وسيرين تهدر وتاكل
سيرين: وشبيكي صفرتي جاتک لموت
هي غير كملت هو وقف فوق راسنا حكمني من يدي وسيرين مورانا
حط دراهم فلاكاس وكمل خرجني لبرا.. وصل حتى لطونوبيل وطبعني عليها
جاسر: واااش قتلک فهمينيي
جات سيرين تجري وجابت سيكان خزرت فيه
سيرين: واااش خوو جاتک على لعين لعورة اطلقها
جاسر: اطلعيي
خزرت فيها تع بلعي مي حمارة متفهمش
سيرين: يااو شكون نتا
مرام: سيرين هذا جاسر صاحب جواد
قاعدة ندعي في قلبي تحكم هذااک لسان لي يخلع
سيرين: قولي ملول
حسيتو زاد تقلق راح ركب وخبط لباب ركبت قدامو وسيرين ملور
جاسر: قوليلي واش فهمتک انا
هدرها كالم مي ياا ويلتاه
مرام: حبيت نخرج برک
جاسر: تمسخييير هذاا قتللک وفهمت جدک متخورجييش وهاذي لخطرة لخرة
سكت اصلا عندو لحق مي ميعيطش عليا زمرر
وصلنا قريب لدار وهبطنا كيما لكوسميتيک سواسوة
هبطت سيرين وانا موراها وهو راح شفنا زين دين برا خزر وهبط راسو
سيرين: ياااربي ضوک واش يقول عليا
مرام: كيفاه
سيرين: ضوک يقول جيت مع راجل
مرام: مشكيتش
سيرين: روحي برک راح يروح لمستقبل ونريح بايرة في جالک
سكتت شويا وضربتني لضهري عوقتني لكلبة
سيرين: ياااا جدک هذاک جاسر زيين وزيد لهيييک اووه بزاف شباب
مرام: ايييه خلاص امشي ندخلوو
✴ ✴ ✴ ✴ ✴ ✴ ✴ ✴ ✴ ✴ ✴
منال...
لبارح كنت جايزة على بيت عمتي رحمة سمعتها تقول لاسراء باش جي لهنا ميار
هي صح كنت نحوس نعرف واش راح تهدر معاها مي مكاش اوكازيو كيما ليووم
صبحت بكري شفت جواد خرج ولوخرين لتحت
هبطت صبحت عليهم وريحت.. دورت عينيا على لكوزينة مليح
شفت تيو تع لغاز مي معلباليش كامل كيفاه نديير وبقالي غير ليووم
تنفست بلقاوي حتى خزرو فيا خبيت توتر ديال بضحكة
رحمة: خيير بنتي وشبيک
منال: ههه والو راسي راهو بدا يوجع
اسراء: نجيبلک لكاشي ولا
منال: شربت كي كنت هابطة ربي يجازيک
كي كملنا ناضت خالتو راحت وقاعدة نخمم كيفاه نخرج اسراء منا
بدات ترفد فلماعن رحت نحيتلها لكاس وتبسمت
منال: خلي اسراء انا نغسل لماعن نتي روحي
اسراء: لالا خلي نغسلهم ريحي نتي
منال: اسراااء خليني نغسلهم ونتي روحي
اسراء: ايه كيما تحبي كي تكملي الحقي لصالون
خرجت وانا تنفست زربت لميت لماعن وشللتهم برک.. غلقت لباب ورفدت كورسي وطلعت عليه باش نوصل لغلاق تع لغاز لي يدي لشوفودبان
حليتو بسيف حتى يدي حمارت.. دنيت تيو كي درت يدي حسيت بدا يخرج
هبطت ملتم ورجعت لكورسي لپلاصتو.. غير فتحت لباب
********
- إنتهاء البارت
- رايكم؟؟؟
- حاسة راح تتخلط لحلقة لجاية ترقبوو😂
- ان شاء الله يااا ربي يبداو يتنحاو الافكار شيطانية من راسي باسكو شويا وندخلكم في اكتئاب ايبان ان شاء الله يروحو 😂
- واه اكرم وجهو صحيح جا يخطب ديراكت المهم قولولي آسكو تبدل رايها اسراء وواش ردة فعل اكرم كي يعرف بجوابها
- تحبو نديرلكم تصاور لشخصيات ولا نو!
- وديديكاس لفوتوغرافيا imane2806 لي نوضتها فيا وكتبت بارت جديد 😂😂😂
- فوط √ وكومنت باش نتشجع وتوقعاتكم اكدولي عليهم والله يجوني افكار منكم شكراا
- الى الملتقى.... ♡