*بسم الله *
.
.
.
.
.
.
.
.
.
.
ميار: متقوليش نتا خالو
الياس: هاذا خالو آدم وهاذي طاطا ميار
آدم: وكيفاه تعرفو بعضاكم
الياس: صحبت ماما
آدم: آه حنان
ميار: اييه علاش
آدم: ههههه متاكليناش ديجا علاش دايمن مشنفة
ميار: منعرف المهم سلام
خرجت ورحت لوتال مع دخلت لبيتي رميت روحي على لفوتاي
بعت لآسينات ميساج بلي بلكثر على يومين بلاک نجي
ومحكيت حتى حاجة.. اصلا منيش قادرة واقيل راني داخلة في اكتئاب ياجماعة
درت ناكل شويا جوزت ديک لقمة بسيف كملت وفتحت لافاليز باش نحبد كاش بيجامة مي سمعت تيليفوني
رحت نشوف لقيتها حنان.. ريبونديت عليها
حنان: bonsoir
ميار: bonsoir CV
حنان: حمدلله ونتيا
ميار: حمدلله
حنان: مزالكي فلوتال
ميار: وي علاه
حنان: قلت نجوز ليک ندورو شوياا وتحكيلي كيفاه تعرفي آدم خويا
وصلهالها سخونة بففف ناقصني انا
ميار: ليوم منيش قادرة خليها غدوة
حنان: معندک متقوليلي ربع ساعة نكون لتحت ارواحي
ميار: كيما تحبي
رميت جد بابات لبيجامة هذيک كي قلت نريح وكلش خرجتلي حنان
تنهدت ولميت شعري كودشيفال
هبطت لتحت وقاعدة نسنا فيها في لاصال داتوند
شفتها روشتلي نضت ليها سلمت عليها مع جيت نركب سمعت آسمو من صوت توحشتو
•••••••••••••••{جواد}••••••••••••••••
ليوم نضت كاره روحي.. اصلا دار سماطت بلا ميار مي قريب تولي وتريح هنا وراسها ليابس نكسرهولها
اصلا حاكم قلبي كي راهي بعيدة ومزالها مريضة شويا
دخلت درت دوش وخرجت لبست كوستيم ليوم عندي خدمة قد دنيا
هبطت لتحت لقيتهم يشربو فلقهوة بساكت ريحت في پلاصتي
سكبت قهوة ليا حتى هدرت يما
رحمة: ليوم عندي رونديفو عند طبيب اديني
جواد: وجدي روحک
رحمة: آيا صحا وليدي
ناضت وانا كملت نشرب فلقهوة حتى وصلني ميساج من عند ميار تبسمت.. ملبارح فليل وانا نعيطلها مغلوق علبالي دارت حالة بلبكا وضوک تقولي كنت عيانة ورقدت شويا صونا تيليفون اسراء.. عرفتها هي
منال: هه جواد خير علاه راک تتبسم
جواد: والو
حطيت تيليفون في جيبي وجيت نايض
منال: وصلنا في طريقک
جواد: جابلي ربي كاين عمي فاتح يديكم ندي يما وعندي خدمة
اسراء: اييه عمو فاتح يدينا روحي وجدي روحک
منال: ايه ؤؤک
هي ناضت واسراء جات ليا خزرت فيها مستغرب
اسراء: عيطتلي ميار وقتلها نتلقاو اصلا مهيش مليحة
جواد: علاش وشبيها
اسراء: معلباليش المهم راني رايحة نوصل قبل منال ونروح ليها
جواد: اييه معليش بلاكي على روحک
خرجت وجات يما مورايا ديتها لطبيب هي دخلت وانا ريحت نسنا فيها برا مابيد تكمل
غير كملت شفتها جات وركبت حكمت طريق لدار حتى هدرت
رحمة: ايه متقوليش شكون حاب تخطب كي محبيتش نحطبلک منال
جواد: يمااا نريحو في نفس سوجي
رحمة: ياوليدي افهمني واش خصک باش دير دار ونتا علبالک مكاش خير من منال وتناسبک
جواد: قتلک نهار نعول انا نجي ليک ضوک مزال ومنال نحيها من راسک باسكو كثر من ختي مكانش
سكتها وهي علبالها بلي منال جامي نخمم فيها
انا منيش حاب نقوللها على ميار باسكو ميار اصلا مهيش حابة تريح هنا وتحوس غير وقتاه تولي وانا معندي مندير
رحمة: كيما تحب
وصلتها وانا رحت للخدمة.. غير دخلت لبيرو لقيت طفلة لثم ومعاها اكرم ايه هاذي لي حابة نخدمولها دار تنهدت وريحت في پلاصتي
اكرم: واش خو مكان ني صباح الخير ما والو
جواد: لالا.. ايه قاتلک واش حابة
اكرم: اييه وجات لهنا حبت تشوفک
(هدرة بلفرونسي وانا نترجم)
اكرم: هذا هو جواد.. وهاذي الينا
الينا: مرحبا.. حبيت نشكرک على تصاميم بزاف عجبوني وخاصة كي دخلت طابع لجزائري فيه
جواد: بلا مزية واجبي اختي
الينا: انا نروح جيت باش نتشكرک نشالله نزيدو نتلاقاو
جواد: نشالله
هي خرجت..اكرم راح لخدمتو وانا كملت نخدم
شفت ساعة لقيتها 1 تع لعشية.. تنهدت ونضت مديسيدي نروح لسبيطار نشوف ريان موراها نخمم ايلا نروح عند ميار
وصلت لسبيطار ورحت لبيت ريان سمعت لعياط من بيتو زربت في خطواتي ودخلت لقيت طبيب يسيي يكالميه ويضربلو في شكة
جواد: واشبيه
دارلي بيدو دقيقة وقال
طبيب: معليش تسناني فلبيرو راک تعرفو
هزيتلو براسي ايه وخرجت دخلت لبيرو ديالو وريحت نسنا فيه
زاد شويا ودخل عندي ريح ونحا نواضرو
جواد: خيير
طبيب: صرالو انهيار عصبي كي عرف بيدو ودرنالو برا باش هديناه
جواد: ومكاش حل يريح هكا
طبيب: شوف نصارحک هو سلک بفضل ربي.. اما يدو لازملها وقت يديرلها سبور ونمدلو دوا
جواد: وقتاه يقدر يبدا
طبيب: ضوک مزال جروحو مبراوش واي حركة يقدر تولي في حاجة وحدوخرا اصلا راسو راهو متضرر ورجلو مزال منحينالها لپلاط مالا لازم يبرا منبعد نبداولو فلعلاج
جواد: نشالله فيها خير مرسي دكتور
طبيب: واجبي
جواد: نقدر نشوفو
طبيب : مديتلو برا وراهو راقد ضوک مزال مينوضش غدوة نشالله وشوفو
جواد: نشالله
نضت خارج ملثم.. سترو ربي وخلاص يعني كون مزربوش وعيطو لومبيلونص كون راهو دونجي مي حمدلله على كل حال
ركبت فطونوبيل وديماريت.. رايح لطريق لوتال وانا نخمم واش نقول ولا
اصلا كي نروح واش ندير عندها
وصلت وسطاسيونيت حاكم تيليفون مع جيت نعيط شفتها خارجة
خرجت مطونوبيل لقيتها تسلم على وحدة كي جات تركب.. اسمها جا على لساني بلا منفيق وعيطتلها
د
ارت ليا وجات لعندي
ميار: واش راک دير هنا
جواد: نتيي لي واش راكي ديري برا ووين راكي رايحة مع ناس متعرفيهومش
ميار: سييي نعرفها
جات لينا وقاعدة تخزر فينا مستغربة
جواد: شكون نتي
ميار: عرفتها هذاک نهار ووسمها حنان
حنان: هه شكون هذا متقوليليش خطيبک
ميار: لالا وليد خالتي
جواد: ايه وين بيها
حنان: جيت حنخرجها برک
ميار: بلا متبرريلو
جواد: ميااار امشي لطونوبيل نهدر معاک ونتي ختي متقدرش جي معاک جاية معايا
حكمتها من يدها وكركرتها مورايا وهي تجبد في يدها
ميار: جوااد اطلقني بركا مدير فتبهدايل
وصلت لطونوبيل فتحتها ودخلتها خبطت لباب ورحت ركبت
جواد: مليييحة هاذي ناس متعرفيهمش داخلة خارجة معاهم لالا مليح
ميار: متحكييش معاياا
بديت نستغفر باسكو شويا تخرجني من عقلي
ميار: خير علاه جيت
كي قاتلي هكا معرفت منقوللها تنهدت ومسحت على وجهي
جواد: بعتتني يما نشوفک ايذا راكي مليحة وشنووو لقيتلک خارجة
ميار: والله راني عيانة باش نتناقش ونتا تزيد عليا
وليت نزيدلها.. ديماريت بطونوبيل وهي هدرت
ميار: وين
جواد: معلباليش
ميار: تتمسخر لالا
جواد: لالا ..راني مقلق منيش حاب نخسر معاک
ميار: مشي لخطرة لولة دايمن تخسر
حبست على جنب طريق ورجعت راسي على لكوسانة
جواد: تسما زعفانة
ميار: ميهمکش آسكو نزعف ولا نو
تبسمت على جنب باسكو بهلولة
جواد : مالا زعفانة.. متوليش لدار ويهديک ربي
ميار: لالا.. اصلا مبقاليش هنا غير غدوة ولا لي بعدو نروح
رماتلي كلماتها.. جمدت في پلاصتي ملول علبالي حابة تولي لحياتها مي مشي لهاد درجة حابة بزربة تروح
حكمت روحي بسيف باش منبين والو هي حرة في روحها مراحش نرغمها تريح
جواد: كيما تحبي
ميار: برک
جواد: كيفاه
ميار: قصدي راک فرحان ضوک راح تتهنا مني وكلش
جواد: ربي يهديک
ميار: آجمعين
سكت وهي تاني مي متقدرش تريح ساكتة
ميار: حقااا مبروک عليک قالولي راح تخطب منال
جواد: ريحي تحضري
ميار: تسما صاح ونتا راک حاب
جواد: شكون قالک فهميني برک
ميار: اسراء قاتلي صباح
جواد: كي نديسيدي انا نقولک
فتحت لباب وخرجت ..خرجت موراها وغلقت طونوبيل ووصلتها حكمتها من يدها وطلقتها كي دارت خزرت فيا بعينيها مدمعين
جواد: وشبيک
ميار: متخطبهاش..
******************************
«اكرم»
رفدت لمفاتح وخرجت مشريكة اصلا جواد خرج بكري
رحت لدار عيان مع دخلت سمعت لقسرة جايا مصالون رميت لافاست ودخلت لقيت اسراء مع بابا يضحكو
غير شفتها قلبي خبط.. اصلا خلاص ديسيديت انا وقت لمناسب نهدر مع جواد عليها
محمد : عسلامتک
اكرم: يسلمک
اسراء: المهم عمو انا نخليک
محمد: زيدي ريحي
اسراء: لالا نروح هذاک هو راني ونستک
محمد: كيما تحبي وقولي لختي رحمة يعطيها صحة على لفطور
اسراء: بلا مزية
جازت من قدامي مشي كامل حاسبتني مي معليش يا اسراء.. قلت لبابا نوصلها ونولي
رحت موراها لقيتها خارجة كي جات تغلق لباب حكمتها وفتحتها
دارت ليا
اسراء: خير واش كاين
اكرم: قدامي نهدر معاک
اسراء: معدنا حتى هدرة
متفهمش بلعقلية.. انا عيان خلي نتكمل طبعتها من ظهرها بلعقل ومشيتها قبلي
اكرم: كي نقلک تمشي سييک جيي
حليت لباب ودخلت غلقتلها لباب وركبت مع ديماريت قاتلي
اسراء: آياا خويا قولي واش تسحق
اكرم: منييش خوک
اسراء: مالا واش.. لالا ياخويا وحد لوقت قلتهالي وانا سمعتها بوذنيا لي راح ياكلهم دود
آيوااه راهي تفكرني واش قلتلها ذاک لعام
اكرم: ايه ومنبعد
اسراء: والوو
اكرم: كي يجي يهدر معاک جواد ياااويلک متقبليش
اسراء: quoi?
اكرم: كيما قتلک ومرانيش نتمسخر
خليتها مافاهما والو.. حبست قدام باب دارهم بعدما درت دورة على لحومة كامل
هبطت وغلقت لباب كي شفتها دخلت انا رحت لدار غير دخلت لقيت بابا مربع يديه عند صدرو ويتبسم
اكرم: واش كاين بابا
محمد: هذا كامل باش توصلها بطونوبيل على جال زوج خطوات
اكرم: احم بابا ريح نهدرو شويا
راح ريح وانا قابلتو.. خرجت نفس وطلقتها على ظربة
اكرم: حاب نخطب اسراء
خزر فيا شويا منبعد بدا يضحک ناض حط يدو على كتفي وقال
محمد : كنت علبالي ملول مزيا درت عقلک ومتلقاش خير من اسراء بالبراكة
اكرم: نشالله بابا
محمد: وقتاه تهدر مع جواد
اكرم: غدوة ولا
محمد: نشالله متعرفش شحال فرحتني
بستلو راسو وعنقتو.. بابا كان سند ديالي في هاذ دنيا وفرحتو هاذي لي شفتها فرحتني نشالله برک تقبل صينو نديها بدرااع
هو خرج لصحابو وانا طلعت لبيتي بدلت وصليت لعصر
*****************************
« منال»
خرجت من المعهد رايحة لدار حتى حبست قدامي طونوبيل هبطت لكارو وخزرت فيا تع اطلعي
دورت راسي ملقيت حتى واحد ركبت قدامها
منال: مشي قتلک مجينيش لهنا هكا ويفيق كاش واحد
**: نجي وقت لي نحب متنسايش راكي تكسبي فدراهم على ظهري
منال: ايه واش تسحقي ضوک قلتيلي شوفي كيفاه تدخلي لدارهم ودخلت باش تعرفي واش راهم دايرين ونجيبلک لخبار واش حابة ثاني
**: تحرقيهم
منال: مستحيييل
**: واش نفكرک كون مشي انا مزالک مرميا في طريق و..
مست كرشي وطلعتها حتى لرقبتي
**: وكون راكي جبتيلنا شي طفل شباب يشبه لباباه ولا لمغتصبک ولاا نقولو كون موصلتش فلوقت كون راكي في خبر كان
منال: درتي فيا بليزير ورجعتهولک ومزالني نرجعو واش حابة كثر
**: مدام رحمة وولادها منسحقهومش يريحو فدنيا
منال: علاه واش دارتلک
**: مدخليييش روحک في حاجة متخصكش.. ديري واش نقلک وربي يسهل علييک وضوک برا خبي عليا وجهک عندک 48 ساعة نلقا كلش وفا ولا يماک فتيليفون واحد تلقايها وصلت عند مولاها
منال: لالا غير يما مدخليهاش في لعبک
خرجت نرعش.. محبتش تخطيني وضوک حابتني نقتل وراهي تخير فيا بين يما و دار جواد
بعد مدة وصلت لدار ودخلت لقيت عمتي رحمة جاية جيهتي وتتبسم تبسمت من فوق قلبي
رحمة: عسلامتک بنتي
منال : الله يسلمک عمتي..راني عيانة نطلع نريح شويا
رحمة: كي تريحي ارواحي تاكلي شويا
منال : نشالله
طلعت ودخلت لبيتي حطيت ساكي سمعت تيليفوني وصلو ميساج فتحتو
"48 ساعة في يدک متنسايش منال"
رميت تيليفون وريحت نخمم واش ندير ونندم نهار لي خممت نخرج نقرا بعيد على دارنا
*************
"جاسر"
كنت قاعد فلبيرو ونخدم.. حتى سمعت طبطيب فلباب قلت ادخل
شفت جنيرال داخل وقفت ودرتلو تحية قعد على لكورسي مقابلني
جنيرال: كاشما لقيت
جاسر: خرجتلي قضية وحدوخرا مي نشالله فيها خير.. مي حاب نسقسي على حاجة
جنيرال: تفضل
جاسر: قتلي هذاک نهار رشيد قالک بلي بنت ياسمينة فراح راهي لهنا وبلا ميقولک كيفاه عرف
جنيرال: منعرف مي مدام راهي هنا راح تكون عليا ساهلة باش نلقاها
جاسر: نشالله حتى انا درت رجال باش يحوسو عليها وحتى فلمطار باش ايذا خرجت نلقاوها
جنيرال: نشالله.. قالولي وليد رشيد دار آكسيدون
جاسر: وي وزيد مقصودة شفنا فلكاميرات وتبعنا لونكات وحكمنا لي داروه ومزالهم فتحقيق ومحبوش يهدرو شكون مي شكي راح ليزيد
جنيرال: وينو مراد
جاسر: راهو يحقق معاهم انا منقدرش
جنيرال: احسن حاجة نتا متضهرش ضوک وجيسپاغ دير بالک
جاسر: لالا علبالي وزيد راح نسيي ندخل لعايلة رشيد
جنيرال: قصدک
جاسر: راني معول نتزوج ببنتو
******************************
- إنتهاء البارت
- رايكم؟؟؟
- ضوک راح نزوجهم كامل 😂 والله منخلي لبايرين يدورو فلكرو ديالي وادعو لميار وجواد ثان يتزوجو
- قولولي آسكو جاسر و مرام نديرلهم قصة ونبينلكم كيفاه يولو يحبو بعضاهم ولا ميكملوش مع بعضاهم المهم اقتارحولي واش تحبو
- واكرم و اسراء نشالله بربي يصلح احوالهم
- تحبو ميار تروح ولا نو ؟
- كنت معولة هاذ لبارت نحطو لبارح مي راحت لكونيكسيو لكلبة
- توقعاتكم وتشجيعاتكم فوط √ و كومنت
- إلى الملتقى... ♡