الشيهانة

46

السلام عليكم

الشيهانة
الجزء السادس والاربعون

تكول الدكتورة ياابن الاصول..مرتك عد اهلها
وحامل!!
هو سكت وتنفس حيل واستغفر..تالي حجه بكل هدوء..
الف حمد وشكر لرب العالمين..لا تحجون كدام احد
خل تفوت فد ثلث اشهر..
امي من شافته تجاهل حجايتها انغثت اكثر..

حجت باعصاب..لا شلون مانحجي لازم نبشر
الناس كلها القريب والبعيد ..حجت باستهزاء..
استغفرالله العظيم..حجية شنو تردين بالضبط؟؟؟
شمرتي بالحجي وسكتت لخاطر بتج ولخاطر فرحتنا
مانريد نتكدر..
بس مو حنها لهنا وكااافي؟؟؟

انت الكافي ولا تستغل حبها الك وضعفها..
استغل؟؟حجه بعصبية..استغل مرتي؟؟؟
انا خفت يدعم من الاعصاب الصارت وكام يرعد..
اندار عليه وحجه بغضب..استغليتج انا؟؟احجي
ليش ساكتة..يمكن ظالمج ومادري..
حجيت بتردد..فدوة حيادر نوصل ونحجي دربالك
لا تدعم..
شني جاهل كدامج وادعم ..لو هم رايج من راي
امج ..شايفتني بالعين الزغيرة ..
كام يسوق حيل..

ماما كلتله نوصل للبيت ونحجي..ماله داعي هيج
تتعصب انا مامتقصة منك..
هو ماجاوب بس كام يسوق حيل ويسابق
السيارات واصلا بيتنا قريب بسرعة وصلنا..
نزلت ماما وكلتله تفضل نحجي جوا..
ورا مانزلت كتله فدوة ع كيفك لا تتعاركون..
هز راسه يتحلف ..يصير خير..

دخلنا ودخل ورانا..كبل ماما فتحت باب الاستقبال
ودخلت وهو دخل ..
كعدت واشرتله تفضل..بس بقى واكف..تعذريني
ماكعد على بساط ناس مامهلية بية..
هي كامت وانا واكفة قريب وعيني مرة الها مرة
اله..
كل مايتناقشون يخلصوها وكفة وانا المبتلية..

ردت امي ع حجايته وكامت..شنو هالحجي
قابل طردناك؟؟
حجه بتأني واعرفه من يغضب ويريد يلزم
نفسه يحجي بهالنبرة..
انت طردتيني من اول يوم دكيت بابج وردت
بتج ..وانطيتيها الي ومجبورة..وظليتي بعداوتج
وياي عبالج اهدها لو اكول ماتصلحلي..
بس كل مرة تطلعين غلطانة..

شوف حيادر باختصار..لو ماادري بيها ضعيفة وروحها
بيك ..جان طلكتها من يوم الجبتها وهي ايدها مكسورة
وكلبها مكطع ..
هه ههه ههههه..اي هنا حطنا الجمّال..كولي هيج من البداية..
اي ومااكذب عليك..عيشتج ماتصلحلها..
دار علي وسالني بهدوء..عيشتي ماتصلحلج؟؟
تحيرت شحجي وموقفي صعب منا امي ومنا هو ..
تنهدت وحجيت..كتلك اعيش وياك شما يكون ..

هو دار ع امي وحجه..هااا شفتي؟؟يعني البنية
ماشتكت من عيشتها ولا كالت طلكني..رغم الصار بيها..
وشكد نفسيتها تعبت الفترة الفاتت بس
اعرفها معدلة وتتحمل وي رجلها الحلوة والمرة..
هه اي طبعا ماتشكي كدامك لان تعرف ماتسويلها
حل..
اهلك داسو فوك راسها..وامك شادة وياها
وابوك يدور بهدومها شكو اكثر؟؟؟شكووو..حجت
امي بعيطة..

وهو انفعل وحجه بنترة..احترمي الزلمة الكدامج..
انا محترم نفسي وجاي احجي بهدوء..بس اذا
غيرت اسلوبي مايعجبج صدكي..
وان جان تذبين اللوم براس اهلي ..اكلج اهلي
صح مارادوها وصح اذوها..بس كله
بسبب بت عمها..هي سبب كل اذيتها وكل مشكلة
صارت بالبيت..
وانا ابن اخوي يوصلي اليصير بالبيت كله..
رغم هي جانت ماتحجي وتقدر تعبي وحبي الها..

اي لانها ثولة ماتحجي..ليش هي لو حاجية جان
وصلت بهذا الحااال..
باوعلها بخزرة وحجه..ليش ثولة؟ليش طايعة
رجلها ومتحملة لخاطره؟؟
ليش اختاريتها وتمسكت بيها..لن ادريها تلزم
ظهري..وادري راح تصبر وياي..انا سكتتها
ع التعب الشافته جانت تخليني كاره عيشتي..
اروكض واشتغل واتعب وخذيتلها قطعة ومارهمت
ابنيها وشتريت هذا البيت وفلشته وردت ابني
بس صارت المشكلة..
ليش تحسسيني خذيتها حتى اظلمها واستعبدها؟؟

تكليلي تعبت وتادت..اكلج اييي صح وادري
بس النسوان شافت اشكال وصبرت ..وهي معدلة
وتحملت لاجلي..
ايي انت كلت تحملت لخاطرك بس انت شسويت؟؟
شتحملت لخاطرها؟؟
اشو راكض ورا اهلك واهم شي خاطرهم وهي بالطكاك..

انا شتحملت؟؟؟تحملت منيتج علي من خطبتها لليوم..
تحملت اجي اشوفها وانت تستقبليني ع اعصابج
واحس بروحي منبوذ..
تحملت كل مااختلي بيها تطلعينها من عيني ..
تحملت حجي الوادم كلها وانا اسم ترس ذاني
عاف بنات ديرته وراح جابله وحدة ترفه وسنتين
مظلت يمه ..الزامط بيها وكال شيهانة وتصبر عايفته
صارلها شكد وظال منا ومنا ..لا لبسة لا اكله
لا راحة ..

بت حماج اسمعها ترس ذاني تحجي..حيادر حط
شاها ببيت اهلها تسرح وتمرح وظل هنا يطارد
ومحد اله..
كل حجاية وكل نفاق وكل اذية سببها هي..
تدرين ليش؟؟لان منكم وبيكم وتعرف عن شاها كلشي..
تكدر تضرها بكل طريقة..
وانت تذبيت اللوم براس اهلي..ماكلج اهلي مااذوها..
وماابررلهم غلطهم الي تخاربت وياهم لاجله..
بس كولي شني الخلاهم هيج يسوون..

اي جيد..يعني تعرف اهلك ضروها واذوها بس
ماتنطي بيهم..
محد ينطي باهله بس ابن الحرام..شما اذوني يبقون
ابوي وامي..
كل طلكة من طلكاتها ماجازيها لو تدوس فوك راسي..
صح اذتني وماكدر اكول اكثر من هالحجاية لان
الحجي واجد..
بس لا راح اتجاوز عليها ولا اقلل منها..ربي بجلالة
قدره يامرني..لو شما يسوون ابقى محترمهم
وكلي "صاحبهما فالدنيا معروفا"

وانت ترى مثل مااذوني اذيتي بتج..
وانا متحمل وناطيها عذر شما كصت وياي
ووكفت وياج..لن موقفها مثل موقفي..مثل مانا
ماكدر انطي بيهم..
هي ماتنطي بيج..ومن عرفتها لليوم..حيادر امي كلبها جبير
حيادر امي طيبة بس تخاف علي..
عمرها بحياتها ماكالت امي اكثر من مرة تدخلت
بخصوصياتي وي رجلي لو امي هانت رجلي..
كل يوم احبها اكثر لان ماشفت بصبرها وتحملها..

بس لا انت راضية تعوفينا ولا اهلي ..طلعتو
جم يوم السعادة العشناه من عيوننا..
خليتونا بحسرة الخلوة والكعدة سوا..رجال ومرته
وعايشين بحب الله..
اهلي وكلت يمكن طبعهم هجي وبتكم وزت براسهم..
انت شبيج ؟؟؟المرة العاقلة المثقفة الي من تنذكرين
كلها تصيح والنعم..
مرمرتي حالنا ليش؟؟

جاية هادة وتبزين بالحجي..بلة شنو؟؟مرتك حامل؟؟!
اي حامل وشنو يعني!!
بعده ماكمل كلامه ودخل بابا للاستقبال..والظاهر
سامع الحديث كله..
بلا مايسلم على حيادر..كله كمل شيخ ليش سكتت!؟
كمل اريد اسمع ابني كمل..سمعت حجيك كله
بس اريد اسمع الباقي..
جاوبه حيادر بهدوء..لا مااسكت..انت ابوها والحجي
لازم تعرفه..

انا مرتي ومختلي بيها وببيتي..واحنا ظلينا
بحسرة الجاهل ونتمنى يصير..
وربك نعم علينا وبذرلي ببطنها طفل..وبيتي يرادله
اسبوع عشر ايام ويخلص..يعني من فكرت اخلف
ماناسي وضعي ولا مثل الهوش خذيت الاريده
وماافكر بشي..
كلت ان حبلت نعمة الله وتجي لبيتها هنا وترتاح..
وان ماحبلت الله كريم..

بعد تجي امها تهدد شكو حبلت وهي يمنا..ادري
لا سامح الله وانا اكره حتى الفظ هالحجاية بس قابل
مطلكها لا جاب الله هالفال..
قابل ميت وهي ترملت..متأسر عنها وماشايفتني..
انا زلمتها وطاب طالع وياها..ياهو يجيب سيرتها
ياهو يكدر يحجي بعد..
وانا كايللها ومن كبل..ان حبلتي مانحجي بسرعة..
نقضي حاجتنا بالكتمان لحد مايغدي الشر..

يعني انا رجال طول بعرض..واهلي شما حصل
من مشاكل بس ماتوصل وياهم..
لو درو مرتي حبلت يذبون عليها حجاية..!
احنا عرب واهل ديوان..وندري الحجاية عليها گوامة..
ان ذبو عليهه هيج حجاية لا انا الاسكتلهم ولا انتم..
شما حصل وشما صار بس مانخلط الاوراق..

حجايتج ياابن الاصول مرتك يم اهلها وحامل..
معناها انا كل اصل ماعندي لن حجيتيها باستهزاء..
واهلي ببيتهم وهي يمج هنا..شمدريهم بيها لو حبلت؟
منو يطلع الحجاية بعد؟؟
البيتكم بس هاجر وهاي من طبتلكم لليوم لا جابت
ولا ودت واظن تعرفونها كلش زين..
والمايشهر روحه محد يشهره..

حاجاه بابا بهدوء لا كفو من ام يسر بنيتنا وحالها
حال شاها ..
وانت صاحب حق والتريده يصيرلك ..وامها حرصها
وخوفها عليها الزايد مرات ماتحس حتى لو
غلطت بحقك..
ماكلت غير حكها وتبقى امها وانا ماانحط وياها
بنفس الجفة..

بس تعذرني عمي..انا اليوم مرتي ترجع وياي
لبيت اهلي..وكلها اسبوع ونحول لبيتنا..
القرار يمها لان هي اعرف ..
شما تقررون براحتكم..

باوعلي حيادر باستفهام؟؟
هزيت راسي..اي احسن ..
خو جا روحي جيبي التحتاجينه وخلينا نروح اذن الاذان
وصار الليل..
ماتطلعون تعشو وروحو..بابا حجه..
لا عمي خليني ارجع تعبان وماجاي انام بس ساعتين
باليوم كله..
الله يساعدك..بس هم تتعصى وتروح..
هسه خل نصلي وبعدين نتفاهم امشي نتوضى..
اخذه بابا وطلع..

وانا طلعت وماما وراي ماحجت اي شي..
رحت للغرفة بس صليت وجهزت علاكتي..
مقهورة ومالي نفس بعد لا احجي ولا اصير
وي احد ضد احد..
خليهم هو وماما يتصافون كافي كلش كافي..

طلعت محد بالصالة ..رحت للاستقبال كاعدين
حيادر وبابا ومحمد..
هاجر جانت تحاجي بابا ويسر بحضن حيادر..
بابا كال تعاي بابا مشتهية شي حتى نوصي
مدام رجلج هو اليدفع ههه..
ههه لا بابا من اشتهي اكول..
صاحلي كعدت يمه وحط ايده ورا ظهري
وجرني عليه باس راسي..

بقيت يمهم كاعدة وافكر بماما راحت لغرفتها
بعد ماطلعت..
اعرف هسه متضايقة بس ماكدر اروح يمها
حتى مااعرف شنو احجي وياها وشنو لازم
اتصرف..
واحنا كاعدين نسولف..
اندك الباب وراح محمد فتحه..شوي هو وحسن
فاتو..
كعد حسن يمنا ويسولف..استغرب لان مبدلة ..
سالني جايين رايحين؟

جاوب حيادر..لا رايحين ابن عمي ماخذها
لبيت اهلي..
بسرعة تغيرت ملامحه حسن..وين ليش؟؟
بعد مظل شي لبيتها لازم تجي تجمع غراضها وتحضرهن
حتى نوديهن للببت..
يعني كمل مية بالمية؟؟
لا هالاسبوع يكمل كلش..
اي خليها هنا والاسبوع اليجي تروح..

تعذرني بس ترجع هناك احسن ..كافي صارلها
هواي..
حيادر ترى اجت مخبلة الا شوية..تعدلت
نفسيتها وارتاحت..
ليش ترجعها هناك وتاذي نفسيتها اكثر..
هاجر بنظرج اذا رحعت ماتصير مشاكل؟؟
انت اعرف باهلج وجنتي طول البوم بالبيت
مو مثلنا احنا الزلم نص يومنا بالشغل وماندرك
كلشي..

حجت هاجر وهي عيونها لعمها ولرجلها..
بصراحة لو تبقى وتروح الاسبوع اليجي احسن..
لن ادري بنسواننا شوي عقلهن زغير..
وحنينة لئيمة وتشوفها بنت بيت وراح تشيل وتجي
تجهز غراضها..
وتسولفلي امي شكد هي منغاضة منها وتدعي
وبس تحجي عليها..
وخاف تضرها واهي توه
وصل خيرها..
ابقي خية يمنا احسن لصحتج واهم شي
هسه صحتج..هي قصدها الحمل بس ماحجت
بصريح العبارة..

بابا كال..هذا هو بابا حيادر خليها وهالاسبوع
جهزو كلشي واخذها الاسبوع اليجي لبيت اهلك
تحضر غراضها وتطلع..حتى لا تصير مشاكل
انتو بغنى عنها..
لا عمي ماخليها تنزل اصلا تعتبر روحها خطار
جم يوم..
مو هيج شيهانة؟

انا من حجت هاجر تملكني الخوف وحسيت
اذا رجعت راح افقد هذا الطفل هم..
وحسيت من كلامها ماتريدني ارجع..
كتله بهدوء..خليني هالكم يوم ..
شفت وجهه تغير وضاج احتقن..قبل لا يحجي
بابا حط ايده على ايد حيادر وكله..
خليها لخاطري..لو مالي خاطر!
ادري بيك كريم وابن اجواد وتكلي تم!
طكني خزرة بسرعة..وطبطب ع ايد ابوي وكال تم
يجرالك ..

هذا هو وانت هو تعبان ابقى يمنا اليوم وباجر
الصبح تيسر..
لا لا لا عمي عندي الف شغلة..
انتبه بابا لنبرته مالت شخص ضاج..
كسر الموضوع وبقو يحجون وداروها
ع يسر شلون ركض لحسن ويلعب ويا
بس انا اعرف حيادر من يضوجوبالذات اذا
كتم الضوجة وماكدر يطلعها..

شوي وكمت وهاجر اجت وياي..
رحنا للمطبخ وهي تسولف وياي..
شاها لا ترجعين هسه ابتعدي عن المشاكل
ماتسوى اخوج ورجلج يتخاربون..
ترى حسن من يوم الصارت السالفة تخبل..
وبيومها راد يروح يهد ولو ماعمي الله يحفظه
كله نتانيها تكعد ونفتهم منها وبعدين نتصرف..
ومن كعدتي وشافوج هو وعمي رادو يهدون..
لو مااهلي والعمام اجت وتراضت النفوس..

ودامج حامل ابقي لا ترحين..ماتدرين ذاباتلج
عمل كلشي يصير ..
ذني دروبهن بالاعمال ترى وبت عمج وحدة منهن..
وي حجايتها دخلت ماما..
حجت بسكون..عوفو هالخرافات كلشي مقسوم..
شخبار الاكل شوكت يوصل؟
هسه شوية ماظل شي من مساع كالو نص ساعة
يعني هيج عشر دقايق بقت يجوز..
ماشي حضرو الموجود لحد مايوصل..حجت وطلعت..

همستلي هاجر..انا مادري شصار مساع بس
سمعت صوتكم عالي..
شما صار ترى عمتي ماكو بنظافة كلبها..
خليها تفك وحاجيها خطية تفكيرها بيج مايبطل
ولا بالها يرتاح..
انشالله ..خليها براحتها لحد ماتهدأ..

حضرت وياها الفاكهة والركي ع ماوصل الاكل..
حيادر اكل كلش قليل بس بابا ومحمد
يشاقون ويا لان انتبهوله قفل..
شوي وكام كلهم تاخرت وتعبان اريد انام..
ماقبل بابا يكوم من اكله كله استريح عمي
محمد كام وياي..
انا فلت وجهي لان ردت اكوم بس هو كال
محمد..
احتاريت اكوم وراه لو ابقى..

شوية وكمت وراه ..لكيته يحاجي محمد بالحديقة..
محمد شافني كله بعدين اكملك وسلم عليه
ودخل..
بعدني اريد احاجي ..هو اندار وانطاني ظهر وطلع..
بقيت باهتة بمكاني!والاكثر يخجل هسه اهلي
شافوني بالكاميرا لان كاعدين بالمطبخ..
رجعت بخيبة دخلت جوا..سمعت حسن منفعل
ويكل لبابا شلون تخلونها ترجع ويا
وماما تكله رغبتها احنا مانتدخل..
عفتهم وفتت لغرفتي..

ذبيت ملابسي ولبست شي خفيف ارتاح بي
من انام..
طفيت الضوا وخليت الفون صامت..
وتغطيت ونمت..
وكفت عقلي عن كل تفكير..ماردت افكر بأي شي..

كعدت الصبح عشرة ونص تقريبا..
طلعت صبحت عليهم ..ماما تحجي بثكل..
كلت خليها براحتها..
تريكت واخذت يسر العب ويا..
تالي تذكرت الفون..
دخلت جوا جبته..
لكيت حيادر مخابر هواي البارحة واليوم..
اخر اتصال قبل ربع ساعة..

وانا لازمة الفون اتصل..جريت نفس وحجيت
بهدوء..
هلو..
هلا..شلونج شلونها صحتج؟
تمام..
اي نعمة ردت اتطمن عليج..اخذب راحتج..
حيادر..
ها؟
زعلت لان كتلك ماروح؟
لا زعلت لان كسرتي حجايتي كدام امج وانا
عازم اخذج بعد سوايتها..
تالي طلعت بحدي وانت ظليتي يمهم..

حقك حبيبي..بس اكلك شغلة واعرف انت اكثر
شخص بالكون يفهمني..
انا هذا الطفل اعتبرته امل انولد بيه من جديد..
الثلاثة الراحو بكفة..وهذا بكفة وحدة..مااتخيل
ردة فعلي اذا صار بي شي..
لو افقد عقلي للاخير..لو افقد نفسي..لو افقدهم
ثنينهم بفقدانك..
شنو يعني!!

يعني اخذني ع كد عقلي وتحملني..اريد هذا
الطفل يسلم..
خليني هنا واروح لبيتنا كبل..اشتياقي الك ماينوصف
واتمنى هسه بحضنك ..
بس لازم نحافظ على طفلنا صح!
اااخ ااخ..صاير بين المطرقة والسندان ..
بس اصبر واكول الله كريم..
الله كريم هانت..اهم شي انت تحبني وانا
احبك ..راح نكدر نتغلب ع كلشي..
الله يديمنا لبعض..
حسيته شوية فك وكام يسولف بس ماجاب
سيرة ماما بعد ولا سالني..

وماما كامت تحجي وياي حجايتين وتسكت..
والظاهر هي وبابا تلاغو لان يوم ثاني كلشش
قافلة وشكلها ضايج..
وحتى من كعدنا ع الغدا انتبهت بابا يحاجيها برسمية..
انقهرت اكثر وبسببي تعاركو..
ردت احاجي بابا مايسوي مشكلة بسببي بس خفت من شفته
هو هم قافل ويجاملنا بالحجي حتى لا نحس..
قبل جنت ماانتبه لهالامور..بس ورا ماتزوجت صرت
انتبه واعرف بيهم..

بقى حيادر يومية يخابرني..وثلث مرات اجه علي
رحنا اختارينا اثاث للبيت وتقريبا كملنا كلشي..
بس جنت كوة اتحمل السيارة عندي غثيان مستمر عكس
حملي السابق..هذا اعراضه كلش مزعجة وواضحة..
ورا ماكملنا كلشي كال باجر اجي عليج نروح لبيت
اهلي..
تجمعين كلشي انت وسارة حتى الصبح ناخذ الغراض
ونروح لبيتنا..

اجاني يوم ثاني العصروانا مجهزة نفسي..
رحت دكيت الباب ع غرفة ماما..شوي وطلعت..
شافتني لابسة ومتحضرة..بهت وجهها وابتسامتها
الطلعت بيها من الغرفة اختفت..
ماما حيادر جاي بالطريق ..حتى اكمل اغراضي
والصبح نروح لبيتنا..
لزمتني من ايدي واخذتني كعدنا..
كعدت بصفي وباوعتلي بعيون مغرغرة ..

منو يساعدج تجمعين غراضج؟
هناك سارة وام عادل واذا احتاجيت اكول لبنات
عمامه حبابات..
اي لا تعبين نفسج ولا تبذلين جهد..
وانت هسه رايحة لا تتصادمين باحد منهم..
خلي اليوم يعدي ع خير وترتاحين..
دنكت وتنهدت وهي تحجي..عذريني ع الصار
كله..بس لمصلحتج واخاف عليج..
جريت ايدها بستها..اكيد تردين مصلحتي..
وانا اريدج دوم مساندتني..
حضنتني لحضنها حيل..راح ابقى بظهرج
وتلكيني موجودة شوكت ماردتيني..

تعاي سلمي ع ابوج خطية مقهور لان راح تروحين..
كمت وياها دخلت يم بابا سلمت عليه
وحاجاني نفس حجي ماما..
بقيت يمهم لحد مااجه حيادر..
ودعت الكل وطلعت..احس بفراغ لان تعودت
اصبح وامسي وياهم من بعد ماتأقلمت فترة بدونهم..
هسه عبالك اليوم تزوجت وطلعت منهم..
عكس حيادر الي كلش فرحان ووجهه مستبشر..

فرني بالسيارة هواي وسولفنا هواي ..
لحد المغرب تعشينا ورحنا للبيت..
من وصلتله صارت خبطة ببطني..بقيت اهدأ نفسي
الى ان نزلنا..
اول مادخلنا جانو الولد بالحديقة عادل ووليد  سلمو
عليه بس ابن نهاية يسلم كوة..

فتت للمطبخ..نهاية وحنين ويمهن البنات يجهزن العشا..
شافني انصدمن يعني مايدرن راح اجي..
نهاية وكفت عدل وسلمت..هلا هلا حبيبة شلونج..
رادت تتقرب تبوسني..ابتعدت ..اهلا بيج..حجيت
وعفتها ودخلت جوا وحنين بس ناطة عيونها..

دخلنا جوا..عمي وعمتي والكل كاعدين..
شافوني سكتو..سلمت عليهم بكل هدوء..
بس ام عادل وامينة وسارة بوسوني بطيبة
وشوق حقيقي..
والبقية ردو  السلام كلهم عدا بهادر ..ردنا نصعد
كال حيادر امشي جهزي غراضج..
صاح ع سارة وام عادل وامينة اجت ويانا..
صعدنا وبس دخلت للغرفة لعبت نفسي..
هو حيادر بس صعدني نزل كال كملو براحتكم ومن تحتاجين
شي صيحي علي..

بس انا بقيت الوب اريد اتقيأ..
حاولت اهدأ نفسي ..هم يسولفون وياي وانا احس
معدتي تريد تطلع ..
اخر شي لزمت حلكي حيل..
بقو صافنات بوجهي شبيج شبيج شكو!!
طلعت للحمام ووراي امينة ..
بسرعة دخلت..دخلت وراي وسدت الباب..

للحكاية بقية
بقلم شقراء(قمر كانون)

شجعوها بنات كاتبة جديدة ودعمو الجدد بعد ماتطلعون على محتواهم لان اكو هواي جديدات مبدعات وياريت تعلقين هنا حتى يلكون يوزرج ويتابعوج

وهم تابعوها يابنات حواء مدام حجر ذبوها ع الماسكات والطبخ عاد واحد يكرش بس وجهه نظيف مو يكرش وناسي بشرته 🤦🏼‍♀️
وهم علقي هنا حتى يلكون يوزرج ويتابعوج

بشنو طالبتني خية بعدني بشبابي اذا صار بيه كورونا مو ينعنشكم بعد 🤨صدك هي شنو اعراضها اشو اني صايرة انسى هواي معقولة كورونا🧐🧐

الله يكثر الشاهات عيني بس كليلي شخبار مرته هسه من تسمع بالسالفة يمكن كاطعة رجلج من بيتهم