الشيهانة

45

مساء الخير

الشيهانة
الجزء الخامس والاربعون

حاجه حيادر بضحكة.وينك شكد خابرت ماترد..
مادري بالتلفون غير تنطيني خبر جاي..
بعد انا شفت روحي خلصت من وكت بالشغل
كلت اجي ابقى
يم الشباب لان انت بالشغل هيج وكت..
انوب اجيت لكيت الباب مسدود..
سيارتك بالباب..واخابر ماترد..بقى بالي
يمك وادك ماتفتح..

اي جنت ملتهي ..دتعال جوا ادخل..بعدها اختفى صوتهم..
انا كمت عدلت الفراش النمنا عليه ورتبت المكان
وبقيت محتارة شسوي ..
شوية وحيادر دك الباب..شيهانة فتحي..
استحيت افتح وخاف محمد واكف يمه يبووو راح
اطم روحي..

فتحت الباب ع كييف ..هو دخل ومد راسه عليه
يضحك..
ها شبيج لابدة محمد راح..
صدك؟ماعرف بيه هنا ؟
لا طبعا كتله ماتشوفينه راح بسرعة..
عزاا شنو كتله؟؟
كتله رحت على مرتي جبتها واجيت مشتاكلها..
يا يا يا حجيت وانا اضرب رجليه بالارض..

شبيج بابا انت مستحية من شي مايخجل!!
وترى اخوج عنده عادي انت اجيتي وياي لان حلالي..
بس كتله انت هنا كال انا رايح اخذو راحتكم..
يعني شي طبيعي لا بي خجل ولا خوف..
اي بس انا استحييي..

لا مو تستحين قصدج تخافين من امج..
لا مو خوف بس هي تريد مصلحتي..تخاف من
الحمل هسه لان مو وياك بنفس البيت..
مصلحتج بشنووو؟؟؟انا رجلج بشرع بقانون بعرف اناااااا
رجلجججج..
كام يصيح وجهه غضب وصار عصبي كلشش
انا بطني خبطت من الخوف..

بقى يصيح ويحجي ..تخاف تحبلين؟؟؟
اي عادي اهلي يدرون انا مقيم
عدج..
يدرون جبتج هنااا لبيتي وشافوني بالبيت
ظهري مشرمخ ويدرون كلش زين التقيت بيج
ويدرون نمت وياج..لان باختصار رجال ومرته
مشتاكين لبعض والتقو شيسووون؟؟؟

كلللللشي يسووون..فااهمة..فهميها عدل وفهمي امج
وياج...
كليلها انا مو طرن حتى اهلي يتهمون مرتي
ويشكون بنسب ابني..
انت اكثر وحدة تدرين..اهلي يهابوني ومايتجاسرون
علي..
والدليل خطبتج بارادتي وعفت بنات اهلنا ..
ورغم حجه بيج خالي بس ماهتميت وحتى اهلي
مافتحو حلكهم وكالو لو اعترضو..

لو صدك اهلي يكدرون يتهموج جان تهموج وانت
وياهم بالبيت..
صح هم سيئين بس مو لدرجة الطعن بنسب ابنهم..
ا مج شكد ماابرر الها واكول بتها وحكها..
بس دومها شايفتني بعين الزغيرة..
اذا تاذيتي وتعبتي ونفسيتج تعبت ببيت اهلي فهذا
الشي دفعتهم ثمنه..
وراح يدفون اكثر من اطلع منهم..

بس كافي كلي لامج كافي عاد ..رجال عربي
بس حالي حال ابن المدينة..
حبيتج وخذيتج وربج سهلها..بعد شدتها
وافكارها المايقبلها رجال على روحه ..شكوو والمن؟؟
انا طول ماهو يحجي ويصيح وكلب الدنيا..
بس اباوعله بخوف وترقب..
خاف احجي شي وينكلب ضدي..

جر نفس حيل واستغفر ..رجع باوعلي..
رايح اسبح..حضري الغدا حتى نتغدا وارجعج..
عافني وطلع وهو يستغفر واعصابه نار..
شكد انقهرت وضجت من وضعي كلش..
كلت هسه انا المن مسببة هالمشاكل وامي وحيادر
ماراح يصفون..
كلت اذا صدك طلعت حامل ارجع ويا للبيت
ع مايكمل بيتي..
اتحمل شكم يوم احسن من المشاكل..

حضرت الاكل الجايبة هو..العلاكة الثانية
بيها كرزات وحلويات اشكال..الظاهر جان ناوي
على سهرة بس موضوعي خرب كلشي..
بسرعة طلع من الحمام ما طول..
كمت انا اريد اروح اسبح..كال استعجلي
حتى ناكل لان جوعان..
اي مااتاخر..
اي ويمج بالحمام شامبو مالتج وليفة وخاولي..
شعجب جبتهم؟
بعد ..اجي تعبان مرات وهنا اسبح ..حجه
بثكل..

عفته ورحت ع السريع سبحت وطلعت..
شعري بقيته مفتوح حتى ينشف..كعدت يمه
وهو جان كاعد يم الاكل..
يلا مدي ايدج برد..
اي جاي اكل..حجيت بهدوء..دنكت مديت
ايدي وهو بدا ياكل..امبين جوعان كلش..
هواي اكل..وانا بعدني اكلت لكمتين..

وانا مدنكة مد ايده رفع شعري خلاه ورا اذني..
كملي اكلج ليش ماتاكلين؟
لا جاي اكل..
كملي كملي انا رايح اقفل البيبان واجي..
رفعت راسي ..ليش؟عبالي باب الشارع قصده..
هو شكله فهمني..
هه ههه قصدي ببيان البيت جوا المطبخ الغرف
الهول..
اها..

عافني وطلع ..وانا لميت الاكل وخليت النظيف
بصينية ولفيته..
تحضرت وهو اجه دخل..
ها يلا ..
اي ..هذا الاكل نظيف زاد..
اي خلي هسه يجون ولد عمي ياكلونه..
هزيت راسي وطلعت وراه..

طول الطريق ماحجه شي..او بالاحرى تجاهلني
كلش..
وحسيته متقصد هالشي..يعني يريدني انتبه
هو متجاهلني..
خليته براحته كلت من يكعد وي نفسه ويفكر
راح يعذرني..
لان انا باقية بينه بين ماما وماكدر اضوج احد
منهم..

وصلت تقريبا ساعة ب٣ ..فتحلنا محمد الباب..
كله حيادر امشي وياي اذا فارغ..
كال لحيادر ادخل جوا ع مااخلص لبس..
حيادر رفض كلش ..كله باقي بالسيارة استعجل
مالي خلكك..
صدك رجع لسيارته وانا دخلت ..حتى بلا مايودعني..
فتت جوا محد بالصالة..مدام بابا ومحمد جايين
من وكت يعني اكيد متغدين من وكت ونايمين..

رحت لغرفتي بسرعة..نعسانة وراسي ياذيني..
بقيت بفراشي مصدعة حاولت انام..
ماطولت شوية ونمت..
ماحسيت الا المغرب..ماما فتحت الضوا و تحاجيني..
كومي شاها دنيا غروب مايصلح تنامين..
حركت نفسي بتعب..احس لساني ثكيل..
بلعومي مطبك كلش..ماكدرت اجاوبها..

تقربت يمي وعاقدة حاجبها..شبيج شكلج تعبان؟؟
اشرتلها ع بلعومي وحجيت كوة..بلعومي يوجعني..
كعدت يمي ولزمت كصتي ..مامصخنة..بس
ليش بلعومج شو فجأة؟
سبحتي وضربج هوا؟!
حجيت وانا موجوعة..ماادريي..
باوعت لشعري وحجت..اي حتى ماامشطة طبعا
تطبك بلاعيمج..

كومي غسلي وصلي خلي اسويلج ورد ماوي
شربي..
راحت طلعت وانا طلعت امشي بكسل ..
دوخة ومنا الم البلعوم الاكرهه كلش..
غسلت وشوي صحصحت ..شافني يسر
اجه وياي للغرفة ومدري شنو يدردم..
جبته خليته يمي وكملت صلاتي..
وخلصت واخذته ورحت للمطبخ..
هاجر واكفة تسوي عشا..دخلت وباوعتلي
بابتسامة..
همزين اجيتي قبل عمتي..
تقربت يمها وعقدت حاجبي باستغراب..

نصت صوتها وحجت..الورد فورته الج عمتي
ذبي منه بالمغسلة وكليلها شربت..
خاف تطلعين حامل ومو زين عليج تشربينه..
باوعتلها بنتفكير ..
هي اخذت الدلة صبت نصها بالسنك ورجعتها..
وغسلت السنك بسرعة...
ورجعت يمي حاجتني بهدوء..انا استحيت اكل
لعمتي خاف انت مشكلة وماتدرين ..بس هسه
من تجي كليلها شربت..لان ادري بيج ماتسوينها
وتكليلها خاف اطلع حامل..

حجيت بغصة وصوتي شحاله..فدوة لعمرج
مشكورة..
بالخدمة خية اهم شي تخلين ابن اخوج يمج
لان اريد اطب اسبح..
هزيتلها راسي واخذته وطلعت للصالة..
بابا كاعد يباوع اخبار كعدت يمه..
انطاني علاج شربت ع مود بلاعيمي
وماما سالتني شربتي ؟كتلها اي صبيتلي
كوب وشربت..بس اعرف
مو بسرعة يطيبن..
اي ميخالف يخفف العلاج..

ورا ماتعشينا وطبعا شربت بس حليب ماكدر
ابلع اتوجع..
جنا كاعدين بالصالة واجه محمد وحيادر..
حيادر ماقبل يدخل بس سلم ع بابا من الباب وراح..
انا شفته هيج انقهرت اكثر..
كمت رحت لغرفتي وطاكتتي كآبة كلش
ونعس ونحول رغم ماصارلي هواي من كعدت..
ورا وقت هو خابرني..ترددت اجاوب ..
لان ماكلف نفسه ودخل مساع..
بس كلت اكيد مايريد يلتقي بماما..

فتحت خط وانا اجمع طاقتي حتى احجي..
هو حجه بهدوء..شلونج؟
زينة..حجيت بغصة..
اوووووبلاعيمج؟؟
اي نمت وكعدت هيج..حجيت بصعوبة..
شلون هسه تشربين علاج لو اجيج باجر اخذج
للدكتورة؟
لا عندي علاج هن كم يوم ويتحسنن..
ها خوش..روحي ارتاحي انا هم رايح انام..
بسرعة راح حتى ماطول وهمزين طلعت منه لان
ماكدر احجي..
بس ورا شوية دز تصبحين ع خير ..

يوم ثاني الصبح ..كعدت ع صوت الفون..
باوعت حيادر يخابر..
جاوبته وانا كوة انطق صوتي مايتميز..
كال انا جاي بالطريق وياي امينة كعدي
حتى تدخليها وانا اروح ماكدر اطول عندي
شغل..بسرعة..
كمت وانا مغمضة ع النص..ركضت للحمام
..همزين لكيت هاجر وماما
كتلهم ..

دخلت سبحت ع السريع وطلعت ..وبالحمام
احاول ادندن حتى صوتي شوي يتحرك ..
خلصت وطلعت لبست بنطرون جينز وبدي
اسود ربع ردن..
شعري رفعته لفوك وخليتله القراصة ..
هسه كاعدة اريد اكل واجو..
طلعت ماما دخلتهم ..
وهاجر راحت وراها..
انا عفت الريوك اخذتلي بسكت ثنين ورحت
اكرط ..
ع ماوصلت للاستقبال خلصت البسكتة..
بلعت ريك ودخلت..

سلمت ع حيادر وهو اصلا جان واكف..
بوست امينة وخطية شكد شبكتني وتكلي مشتاقتلج ..
حيادر كال انا رايح..سلم عليهم وطلع..
طلعت وراه وهو باوعلي ونفخ..شو كلش
بلعومج مطبك فد نوب..
اي هو هيج دائما حجيت بصعوبة..انا منا
بلعومي يابس واكلت بسكت حتى ماكمت
ابلع ريكي هو عباله كلش وضعي ..

كال بدلي وامشي اخذج لطبيب...عبالي مثل
كل مرة وامينة تسوي الج..
كتله لا هسه امينة تسويهن واصر زينة..
طلع وهو مامقتنع..
وقبل لا يروح باوع لتشيرتي..دلعتج شوي
نازلة..
لو تبدلين تشيرتج حتى ترتاحين بالحركة..
هزيت راسي..بلا مااحجي..
هو باسني بكصتي وطلع..

رجعت يمهم للاستقبال ..امينة خطية لكيتها متحضرتلي
وهاجر جايبتلها دهن..
واستلمتني تدهين وانا اعيط واصرخ من الخنكة..
وماما لازمة ايدي وتكلها عيوني امينة خنكتيها
ع كيفج خطية..
تالي من خلصت كلت لماما..مناك رجلها يوصي بيه..
مو تعورينها مو تخنكينها..وانت زين مابجيتي..
جا شلون تتحملون تشوفونها راح تطلك وتجيب..
باوعتلي ماما بسرعة..انا خليت نظراتي
طبيعية..لان هي حجاية عادية ومابيها قصد
بس اكيد ماما عبالها بيها قصد..

بقت يمنا امينة تغدت واجت يمي لغرفتي سولفت وياي..
خطية سارة تكول استغلت روحتج وكامت بحجة
تنظف غرفة حيادر وتضم اشياءها فوك ..
لان بس هي حيادر يخليها تدخل للغرفة..
وحنين ونهاية شابكات راس براس لان نهاية جابت
بنية..
وتغور بحنين وهاي تطك وتعاركها لان نهاية
بحجة بتها تذب الشغل ع حنين وخالتي تحاول
ترضي الطرفين لان وحدة بت اخوها ووحدة
تخاف منها..

بقت امينة وللعصر راحت..اجه حيادر ومن الباب
اخذها وراح ..
سالني كتله لا وضعي احسن..وصدك صرت احسن..
ووصتني امينة يومية ادهنهم زيت زيتون هواي
واخلي قطعة حارة عليهم..وفعلا تحسنو ..
حيادر بقى مثكل وياي كلش..يحجي من ورا خشمه..
ورا اسبوع تقريبا يلا فك..

خابرني بالليل اتصال فديو..جنت بفراشي بس
كاعدة اجي اكرز حب...
فتحت خط ..شفته كاعد ع الجرباية مالتنا وملابس
فانيلا..
مرةع راسه ليورا ويباوع ..شجاي تكرطين؟
حب تريد؟حجيت ورفعت راسي..
اااخ اريددد بس مو حب..اريدج انت..
عفت الحب وباوعتله ..مشتاقتله كاش وهو الايام
الفاتت  كلها قافل..

حجه وهو يتأملني..شيهانتي ..رويحتي مشتاكلج..
انا هم مشتاقتلك بس انت جنت قافل عليه بلا سبب ..
لا السبب جبير بس ادري مالج ذنب بي..
وصدكيني كلش يحز بنفسي..بس لخاطرج
اعدي ..
امممم..
لا تكولين هيج وانت صافنة على وسادتج ..حجه
وهو يأشر ع صدره..تراني مااصبر..

ههه ماقصدي اصفن..
انا اريدج تصفنين ..رايدج كلش مشتاك ..قافلة بابج؟
لا هسه اقفله..
يلا قفلي وتعاي ..نرجع لامجاد الخطوبة..
قفلتخ ورحعت اريد اتمدد..هو باوعلي وصفر ..
دنكي بعد ..
مااا..اسكت ماكدر افوت للكنتور اتكسر خليني
متمددة ومرتاحة..
وليش الكنتور؟؟

حتى اكدر اتغزل بيك براحتي..هنا ماكدر
اذا احد سمعني عيب..
الدنيا ليل ياهو كاعد حتى يعبر ويسمعج..
كلشي يصير بعد استحي..
كمت فتحت الكنتور وخليت الضوا يمي وبقيت
اسولف ويا ..
بين غزل واشتياق وتعبير عن حب بقيت احاجي..
هو تمدد ويحجي همس..
ماكو منج شيهانتي..راحتي كلها بيدج واحبج
من تسوين كلشي لخاطري..

اسوي كلشي يسعدك واتمنى مانتزاعل لو يصير
سوء فهم بيناتنا..
انت عقلج جبير..ليش احبج انا..لنج فاهمة..حجه بهدوء كلش..
حبيبي انت نمت لو شنو هههه..
سلطنت كللش..
لعد روح نام انا نعست هم..
صدك بسرعة راح لان شكله نعس..وانا تكسرت من
كعدة الكنتور..صارلي فترة ماكعدة بي تعبت..
ذبيت نفسي بفراشي ونمت..

ويوم ثاني اراقب بوجه ماما خاف سمعتني احجي
ويا..
صح ممسوية شي بس بعد بيه خوفة..
بس زين مر الوضع هدوء..
وبقى يومية يخابرني واحاجي بالكنتور..وبالنهار يمر
يشوفني قليل ويروح..

بيوم جانت الدنيا عصر..وانا وهاجر جنا نغسل
زولية بالطارمة..
انا دنكت شوية ودخت ..هي كعدتني كالت انا اكمل
عوفي..
بس ماخليتها وكمت وياها مرة ثانية دخت اكثر..
بحيث ماكدرت اشوف طريقي..هي ركضتلي
سندتني ودخلتني جوا..ماما جانت كاعدة ويسر بحضنها
يلعب..
بس شافتني حطته بالارض وكامتلي..
شبيج شنووو صار؟؟

مادري شوي دخت..كعدتني وهاجر ركضت جابتلي
ماي بارد غسلت وجهي..
شوية راحت الدوخة وتوازنت..
شربت عصير وتمددت رجعت طبيعي مابيه شي..
لحد الليل ماما سالتني..
شخبار شهريتج!؟مو كلتي نزلت؟
مادري بيومها نزل شي قليل وبعد ماكوشي ..
يعني ماكملت؟؟
لا هو بس قليل..
هاااا باجر اخذج للدكتورة جيكي وضعج..

كتلها اوك عادي اروح..ادري شاكة بيه حامل بس
ابد مو نفس اعراض الحمل السابقة
واصلا بيومها نزل شوية..
بس كلت اروح واضبط وضعي احسن.
انطيت حيادر خبر ..هو مايقبل اروح للدكتورة
الا ويا..
بس بعد توسل يلاقبل..بس كال انا اوصلكم..

فعلا يوم ثاني اجه العصر ووصلنا للدكتورة
ودفع الوصل وانطاني فلوس رغم هو ينطيني مصرف..
بس اعرف بي اجه حتى يدفع ..
كال انا رايح من تطلعين خابريني اجي عليكم..
ماما كلتله لا محمد يجي علينا بس هو رفض..
كلها انا عندي شغل قريب هنا..

بعد ماراح بشوية..دخلت جوا..ماما طبعا
تدخل وياي عادي صديقتها..
سولفت شوية عن وضعي..كالت كومي اتأكد
بالسونار..
رغم اول محجيت الاعراض كالت هذا حمل..
كمت للسرير وسوتلي سونار..
فعلا طلع حمل بشهر ونص..ووضعه زين
كلشي تمام..
باركتلي كلش هواي..وكالت باقل تفصيله تصير
خابريني او راسليني..حتى اتابع وضعج من هسه..
تشكرتها هواي وطلعت..
وماما هالحجي ساكتة ..

بس طلعنا من الدكتور حجت بغضب مكتوم..
خابري رجلي يجي بسرعة..
انا هم خابرته وكال شنو وضعج كتله زينة
ماكتله حامل..
وهي عافتني كاعدة وكامت للكافتيريا اشترت ماي
شربت واحت انطتني..بس احسها
تريد تنفجر..

شوية ووصل حيادر..طلعت وانا رجلي اقدمها
ورجل ارجعها..لو بيدي ارجع
مشي واخلي هو وماما ينجازون..
صعدنا وهو لاحظ التوتر من اول ماشافنا..
خيرج شنو كالت الدكتورة..بدا يسوق وحجه..
جاوبته ماما وبلهجة ساخرة..
تكول الدكتورة ياابن الاصول..مرتك عد اهلها
وحامل..

للحكاية بقية
بقلم شقراء(قمر كانون)

ياهلا والف هلا بالجديد والقديم 😍😍كلكم احبككم وتنورون القصة
طبعا

هو بس انت اشو الشعب نصه يسب حنين هسه تلكيها تحك برجليها ومملحكة🤣

يادا الكسوف يادي النيلة😁انكبس بقضية مخدرات ولا هالسالفة🤣🤣صدك شخبار البيبي جنتي بقصة جياد بشهرج

😒بلة هسه شحاجيج 🤨ياكمامة ياخية ياجفوف هالحجي من جنا عايشين طبيعي ومنحتاج كمامات مو هسه😭😭احنا مهددين بالانقراض