طريقنا صعب

البارت ٢٤

وأخليك أعلى نظرة شوگ تتوسل

وأعلمك الوجوه شلون من تثكل !..🖤

*****..*****..*****..*****..*****..*****..*****

رزان : يعني شنو انتهينا احنة خلص .. !!

بعد ماطلع قسورا .. رحت كعدت بالكاع ماهتميت لكُلشي يمي .

جان ببالي شي واحد وهوَ ..

قسورا

يعني هسة الغلط منين ؟! من عندة أكيد لان هو مااجة گلي .. شنو اشم كفة ايدي اني

لا مني لأن اني ماقبلت  .. يربي اني شلون رفضتة !! يعني جان اكدر اكول لبابا خلي افكر .. جان بيها مجال انو نرجس تحجيلي او قسورا .. ويمكن اوافق .. اني ليش متُسرعة !!

يعني هو َ حتى بيت وحدنا راح نطلع ونخلص من المشاكل ومن عماتي .. ويخليني اكمل دراستي براحتي .. لعد اني شسويت !!

.... جانت هاي الأفكار الي تدور ببالي ....

هوَ الغلط .. واني الغلط

ثنينا غلطانين .. هاي النتيجة الي توصلت الها ..

كمت بساع من مكاني .. باوعت لملابسي كُلها تراب .. نكثت التراب وطلعت من السطح .. سديت الباب وبساع نزلت للطابق الثاني ..

دخلت لغرفتي لكيت البنات ..

نرجس : ها شحجيتوا

رزان : جان بوجه نرجس مبين القلق والخوف .. ذيج الساعة چنة ماخذين السالفة بشقة ويضحكن علية بالشقة .. بس من عرف قسورا .. خلص السالفة حقيقة ..

باوعتلها ودرت وجهي .. نزعت الشال وشمرتة على الجرباية بأهمال ..

كعدت وخليت ايدي على خدي صافنة .. نرجس تحاجيني واني مابية حيل ارد عليها واحجيلها شنو صار ..

حوراء : كافي نرجس عوفيها ماتشوفين حالها

نرجس :اي جا شلون غير نعرف شصار

هبة : هسة تهدأ وتكوللنا صبرن 

رزان : ردتهن بس يطلعن من الغرفة .. راسي مصدع واريد انام ... واريد اخلص من السالفة علمود بعد ميسألن .. درت وجهي وكلتلهن بهدوء ..

رزان : بنات كُل السالفة ومابيها ...

حجيتلهن بأختصار شنو صار وبلأخير كلت ..

هسة بس طلعن فدوة اريد اخذلي كسرة يهدأ بالي بيها ..

نرجس : اي يارزان شسالفتج انتي

هُدى : نرجس لتلحين اطلعي ويانا يلا ..

رزان : جنت بس اباوعلهم ومااحرك اي شي ولااحجي .. شفت هُدى لزمت ايد نرجس وطلعتها برة وطلعن البنات بدون كلام ...

كمت طفيت الضوة ونمت ..

ضليت اتكلب بالفراش .. نعسانة بس ماكدر ماافكر .. اذا هوَ اسوي خطأ اصغر من النملة يكلب الدنيا على راسي .. ويزعل وهلا هلا ..

هسة السالفة مابيها زعل رزان هسة ماكو السوالف الصغيرة .. قبل جان على صغيرة وجبيرة يسويلة زعلة علمود اراضي واسمعة كلام حلو ... ههههه هسة والله لو مو كلام حلو ..

لو شسويلة مايرجع يحجي وياي َ .. اني عرفتة حق المَعرِفة .. خلص .

احجي ويا نفسي هييييج .. على ماغفيت ..

*****..*****..*****..*****..*****..*****..*****

كعدت الصُبح .. الغرفة مابيها احد غيري .. باوعت منا منا .. كمت غسلت وجهي ..

بدلت بأهمال مابية حيل ابد ..

نفسي مسدودة بكُلشي .. شمرت الشال على راسي اخذت تليفوني ونزلت ..

دانزل الدرج فتحت التليفون شفت الساعة ب ١٢ وربع

مااهتميت ..

كملت .. وصلت للمطبخ .. هوسة والبنات ديحضرن للغدة ..

باوعتلهن وطلعت ..

رحت للاستقبال كعدت .. احس نفسي سكرانة من كد مادايخة مااعرف شبية .. على بالي من انام راسي يهدأ

طلعت السالفة بالعكس .. هسة احس راسي راح ينفجر ..

رجعت للمطبخ اخذت فواكه
واسمع حجي عماتي .. الكليشة يعيدنها كُل يوم لو اكعد ب ٦ الفجر هم يكولن  كعدتي متأخرة .. مارديت على اي حجي .. اخذت الماعون مال فواكه وطلعت ..

رجعت لمكاني آكل شوي وأكلب بالتليفون .. احس ضليت احب الشُعر .. جان ميهمني .. هسة كُلشي يحبة قسورا ضليت احبة ..

جاي أگلب وشفت .. بيت شعري ...

وبحِزن بغدادي تگول :

محَضرلَك هْهوايةَ حَجي بس كون اريدنكْ
تجي بالأول نكضيها عَتب .. بعدين نتشابك بچي ..🖤

رزان : حسيت هذا يوصف حالتنة حيل رحت على محادثتنة كتبتة وردت ادزة .. صفنت ..

لالا مادز ..

حذفت النص وبساع طلعت ..قفلت التليفون  وضليت افتر بالبيت ..

ضايجة وطافرة روحي ولعبانة نفسي من كُلشي ..

مقهورة .. حيل مقهورة ماجنت اعرف هلكد اني متعلقة بي واحبة .. من چنَ نتعارك .. مرات اروح ابادر بالكلام اني .. وابرر هذا الفعل على انو ..يلا عادي لان كُل يوم دنحجي فتعودت .. لااكثر ولااقل ..

بس طلعت السالفة اكبر من هيج بهواية ..

اني حبيتة .. لا شنو حبيتة ..

اني حبيتة هواية هواية

كُلش هواية .. هسة عرفت شكد احبة .. هسة عرفت من ابتعد عني ..

نزيت من صوت نرجس وهيَ تصيحني .. بساع كمت ..

احس عيوني مغوشة .. مسحت عيوني ونزلت دموعي ..

ضحكت هههههههه...

رزان هاي انتي !

انتي دتبجين على شخص !!

ابد ماجنت متوقعة هذا اليوم يجي ..

مااعرف شنو اتصرف .. مااعرف شنو شعوري هسة .. مااعرف شنو احجي .. حتى اذا تصالحنة مااعرف شنو اللي راح يصير بعدين .. اني حالياً كُلشي مااعرف ..

عفت نرجس وكعدت على الدرج خليت ايدي على وجهي .. وبجيت بدون ماامنع نفسي ..

ابجي وابجي ... ماطولت هواية واسمع نرجس يمي ..

نرجس : تعاي تعاي حبيبتي ..

رزان : عرفتني ماراح احجي .. او بالأحرى مااكدر احجي اصلاً ..

حضنتني خليت راسي على جتفها وابجي

نرجس :كافي ولج ..

عوفي البجي الله يكتبلج الخير ان شاء الله .. انتي معليج عوفيها على الله بعد .. السالفة البيها مصلحة وخير الج تصير وياج بس اصبري ..

لاتكولين ليش وليش انتي متعرفين .. الله سبحانة وتعالى ادرى وأأعرف منج ..

رزان : ان شاء الله ..

نرجس : يلا عفية بالنادرة .. روحي غسلي وجهج وتعالي ويانا جاي نصب الاكل .. لتخلين عماتي يحجن لتنطيهن مجال

رزان : او عاد كُلش شفتيني اهتم الهن

نرجس : ههههه ديلا روحي

رزان: رحت غسلت وجهي وطلعت للمطبخ ..

*****..*****..*****..*****..*****..*****..*****

رزان : كملنا الاكل وصبينا .. وكعدنا على السفرة ناكل طبيعي ..

قسورا بالدوام .. اريدة يضل بالدوام مايجي .. يارب يبات عند اصدقائة او يصير عندة واجب .. اي شي يارب فدوة اي شي يصير .. بس كون ميجي يضل بالدوام احسن ..

بالكوة هدأت وكعدنا نحجي اني والبنات ورا الغدة .. مانسيت السالفة .. وطبعاً ماراح انساها .. بس عاد شوية رفهت عن نفسي .. احس ماجنت اتنفس ذيج الساعات .. هسة شوية عاد ..

بس يجي واشوفة !!!

راح يخربط احوالي اني متأكدة .. ف مااريدة يجي ..

صارت الساعة ٤ وبعدة ما اجة  اي يارب يضل لليل علما انام .. كون مااشوفة . .

صعدت فوك باوعت ماكو احد ..

شوية شوية وصلت لغرفتة .. ادخل لو لا ؟

لالا شعندي رايحة لغرفتة ..

رجعت لغرفتي .. صفنت شوية .. ركضت بساع لغرفتة .. فتحت الباب دخلت وسديتها ..

نفس العطر الشميتة من اول مرة دخلت لغرفتة ..
نفس الترتيب مال اول مرة
كُلشي نفسة .. ضليت افتر بغرفتة واباوع للصور ..

طلعت بساع قبل لايجي مابية بعد اواجه هيج مواقف .. خاصة بهاي حالتي ..

طلعت من الغرفة وصلت لغرفتي .. اريد ادخل صفنت ماكو شي اسوي خلي انزل يمهم .. احسنلي

دانزل للدرج وشفتة لقسورا يصعد ..

كلبي اجة يوكف .. والله لو باقية دقيقة بغرفتة جان اجة وشافني .. الحمدلله

مريت من يمة واشوفة ولا يمة .. ولاجن رزان الي مرت .. ماباوعلي حتى .. نضرة ماشفت منة ..

وجهة ثكيل علية مو شلون ماجان ..

نزلت بساع وامشي بسرعة .. الي يشوفني يكول عادي كُلشي مابية بس بداخلي اني لالالا ابد .. كُلش بالعكس ..

امشي بسرعة .. بس بداخلي احس نفسي واكفة بنفس المكان .. وصافنة وافكر شديصير .. ليش هيييج !! اريد كُلشي يرجع مثل ماجان ..

اريد يرجع يحبني ويهتم بية ..

اريد يرجعلي قسورا الي يخبصني بأهتمامة وحُبة الي .. هسة عرفت معنى كُلشي جان يسوي الي .. هسة حسيت بحنانة الي ..

من ضيعتة ..

رحت يمهم بساع وكعدت .. وجهي ساكتة معانية ..

من الصدمة والقهر البية .. مااعرف شنو اسوي

اريد اعرف شنو المعجزة الي راح تصير حتى يرجع يحجي وياي .. ومنو كال تصير معجزة ويحجي وياي !! ابد مراح يرجع يحاجيني .. خلص .

اتقبلي هذا الشي احنة نتهينة ..

*****..*****..*****..*****..*****..*****..*****

هبة: بعد ماصارت سالفة رزان حاجيت نرجس اكثر من مرة نخلي عينا عليها .. هاي اول مرة تحب هاي اول مرة هيج يصير وياها .. اول مرة هيج تتعرض لموقف حيييل موخوش .. مانعرف شنو راح تسوي .. ضلينا وياها ..

نسيت سالفة علي ونسيت ابو علي هم ..

يعني كلما اتذكر ارجع اضحك حتى الي يسمع يضحك على هاي السالفة والله .. كال شنو كال يحبني ههههههههه

الف الحمدلله ماوكعت بهاي السالفة وحبيتة ..
  الف الحمدلله ماصارت بداخلي مشاعر الة
الف الحمدلله مارتبطنا وزادت علاقتنا وسوة هيج وراح خطب .. جان هسة اني ميتة قهر وألم وحالتي حالة واني وراي سادس .. وراي شهادتي وتعب سنيني تعب اهلي وتعبي اني ..

هههههه علي سالفتنة خلصت قبل ماتبدي .. !

وارجع واكول احمدك واشكرك ربي .

*****..*****..*****..*****..*****..*****..*****

رزان : صار الليل وكل شخص راح لغرفتة ..

وكلعادة دخلنا اني وهبة لغرفتنا .. تمدتت على جربايتي وصافنة بالسكف ..

وهسة شلون ؟

هوَ يمي ومااكدر احاجي .. مااكدر اروحلة ..

نايمة واحس شي جبير ناقص بداخلي ..

مااكدر ابطل من حبة وانسي نفسي ..

يستحيل اكدر .. 

بعد تفكير طويل .. رجعت نمت .

... كعدت ثاني يوم ...

احس ميتة جوع ..ومااكلت هواية البارحة ..
لتفتت شفت هبة نايمة ..

شنو كاعدة من وكت اني ؟!

جريت التليفون شفت الساعة ٥ ونص ..

هلوو هاي جديدة .. شكعدني هسة!

غسلت وجهي وبدلت ملابسي ونزلت ..

مالبست الشال لان اكيد ماكو احد جوة بهلوقت ..

احس معدتي فارغة ميتة جوع.. نزلت الدرج بسرعة ..

رحت للمطبخ فتحت الثلاجة ..

طلعت اكثر من نوع جبن وحميت الجاي والخبز ..

ومنتظرة يحمة الجاي ..

رحت شغلت التلفزيون وضليت اباوع للفلم شوية .. الفلم بادي صارلة هواية يعني اني داشوف النهاية .. كُلشي ممفتهمة منة .. كعدت اباوع وكُلشي ماكو .

شفت خيال يم باب المطبخ ..نزيت منو !!

مديت راسي شوي باوعت .. ماكو احد شسالفة !

شوي ودخل سجاد

رزان : لايربي هسة ناقصني هذا انييييي !!

سجاد : صباح الخير .. شعندج كاعدة من الفجر

رزان: وانت شعندك كاعد

سجاد :انة نومتي مامعدلها انام بالنهار واكعد بالليل

رزان : بالك يم الجاي شوي وجاية ..

كلت بيني وبين نفسي اروح البس حجابي شسالفة نسيت .. طلعت من المطبخ وصلت للدرج  .. صاحني سجاد .. وكفت اوهو

استغفر الله شيريد هذا ..

رحت مشيت وكفت بباب المطبخ كلتلة  ..

رزان : ها سجاد

سجاد : ماتسويلي بيض

رزان : صفنت ..  استحي اكلة لا

رزان : اوكي هسة بس شوي وجاية

سجاد : اي براحتج

رزان :درت وجهي اريد اروح للدرج .. رفعت راسي لكيت قسورا بنهاية الدرج واكف

رزان : اسوء موقف صارلي هو هذا

ب ٥ الفجر وست رزان وسجاد ببحدهم بالمطبخ شيفكر استاذ غثة هسة ..

وفوكاها ملابسة حجاب اني ..

تقربت يم الدرج وردت احاجي كلتلة

رزان : لتفهم غلط بس نزلت اكل ولكيتة

اريد اكمل كلامي عافني وطلع ..

رحت وراه ..

رزان : قسورا داحاجيك عيب تصرفك هذا

كلت هيج ولتفت علية

قسورة : تعلميني العيب ؟
امشي دخلي جوة

رزان : اشتاقيت لصوتة احس صارلي هواية مسامعتة ..

ماحاجيتة بساع دخلت جوة .. ديلا بقت على هاي هيَ هوَ حظي طاح خلتصير هاي واذا .

صعد لغرفتي بساع جريت الشال ولبستة ونزلت .

دخلت مستعجلة سويت لسجاد ابو المصايب

بيض واكلت لكمتين وكمت ..

سجاد: شسالفة ماكلتي شي كعدي خلي نسولف

رزان : لاماريد اسولف شكرا

سجاد :وليش تصيحين

رزان: ماصيحت بس ماريد هيَ كوة شنو

سجاد : لاواضح مدتصيحين ..

رزان : اوهو عاد انتَ الثاني .. اخذت تليفوني وطلعت من المطبخ بساع .. فتحتة شفت الساعة ب ٦ .. بعد شوي يطلع هوَ...

رحت للحديقة شفتة مموجود .. يمكن بغرفتة ..

صعدت فوك وترددت ادك الباب لو لا ؟!

تقدمت .. الشخص الي يوكف يمي راح يسمع دكات كلبي من كد ماعالية ..

خاف ادك الباب ويفشلني ميحجي وياية ..

رجعت لغرفتي .. واكفة بباب غرفتي وافكر ..

هسة شو خلي اروح شيصير خلي يصير ..

بساع وصلت لغرفتة ودكيت الباب ..

نتظرت شوية ماكو ..

دكيت مرة ثانية .. وسمعت صوتة ..

قسورة : ادخل

رزان : ابتسمت .. فتحت الباب ودخلت

باوعت  للميز مموجود لتفتت على جهة الكنتور لكيتة لابس البنطرون والفانيلة .. يريد يلبس الجاكيتة ..

صفنت .. شنو هل وقت الاثول الي دخلتي بي ..

قاطع افكاري وهوَ يكول

قسورة: شتردين

رزان : هلو بدينا ب شتردين .. كتلة ..

رزان : اا ماريد شي .. صفنت يربي اني المن دخلت ؟شكلة هسة ؟!

قسورة : طلعي برة اذا متردين شي

رزان : وانتَ شدعوة عليك شكلنالك هسة ..

قسورة : كلت طلعي برة

رزان : يحجي بكُل برود ولامُبالاة .. ودي اروح اخذلي راشدي منة

كلتلة ..

رزان :مو صوجك صوج الي تريد تحاجيك

اريد اسمع جواب منة ماكو .. خليت وطلعت .

رزان:انعل يومي المن رحت .. شنو هل فشلة

دخلت لغرفتي ورجعت نمت .. غصبت روحي على النوم حتى ماافكر .. اسوء فترة بحياااااتي .

*****..*****..*****..*****..*****..*****..*****

رزان : كعدنا ووتريكوا واني ماشتهي ..

اجة الظهر .

وصار الغدة والبنات صبن الاكل وكعدوا ياكلون اني اكلت خاشوكتين وكمت ..

نرجس :كعدي اكلي شبيج

رزان :ماريد يمعودة ماشتهي ..

نرجس : راح اضم الج ماعونج بعدين تاكلي

رزان : اي اوكي ..

خلصوا الغدة .. ورحت اني غسلت المواعين .. اريد الهي نفسي بشغلة ..

كملت وسووا الجاي وكعدنا .. اخذت عصير وكعدت اشرب واباوع للتليفون ..

علما سمعت بابا يكول ..

محمد : لايخوي والله مانكدر هو َ ان شاء الله باجر ورا الغدة طالعين

رزان : بساع باوعتلي هبة .. رفعت راسي على بابا واشوفة يحجي ويا عمو مرتضى ..

مرتضى : يمعود شنو ماتكدر ضلوا كم يوم وروحوا متوازين شني

محمد : غير مرة غير مرة نضل اكثر ان شاء الله هسة العطلة مال نصف السنة وخلصت بعد شكو ..

رزان : يعني راح نرجع .. !!

هسة اريد اعرف يامناسبة التجيبنة مرة ثانية

يعني بعد مااشوفة لو اكتل نفسي كتل

كلمرا نسولف بالتليفون هسة شلون !!

يعني اني متأكدة راح اموت من التفكير

زين هسة شنو الحل ؟! ..

يتبع .. !

لاتنسون اللايك لأن معاجبني تفاعلكم ولكم😐🖤.