الارهابي وذات النقاب
بقلمي ام غايب
كان يا مكان لم يعد احد
كما كان ......
جنت كاعد على الطابوك.... وادخن جكاير .....لابس بجامه متروسه تراب ودريس رياضي وشفقه وادخن واسمع
سعد الحلي
خذانا الواهس من بعيد
نزف شموعنا لشوفك
مشينا وأيد تشبك أيد
نـناغي الروح بطيوفك
العمر من غير حب شيفيد
لمني بعصرت أكفوفك
ياريحة مسك يا هيل
عذبني ونين الليل
عذبني ونين الليل
مرت من يمي وحده منقبه عيونهه بس مبينه ......لونهن عسلي واضحات لان كبار
وتتماوع بمشيتهه بقيت اباوع عليهه مااعرف بالمنطقه ناسهه .......جديد بيت بالتجاوز هيكل اشتريته حتى الطابوكات بعدهن كبال البيت ........بقيت اباوع عليهه الحد ما وكفت دنكت رفعت حاجبي نزعت نعالهه عيوني بقت وراهه شتتحرك عيني وياهه جانت
لابسه مدري شيسمو سوار مدري شنو برجلهه حبوبتي دوم جانت تكول المره تبين من جعب رجلهه شنو ......باوعت داخله برجلهه كزازه مبين لان الكاع عباره عن انقاظ ومن الانقاظ صايره على شكل جبال .....مدري تسوي اغراء تاهت الحسبه
بقيت اتفرج على خلقة الله ...واسحب بالجكاره اخذ نفس واباوع عليهه ووياهه سعد الحلي ايباااه والشمس تسطر الما ينسطر
طفيت الجكاره برجلي وكفت اترقبهه لفتت نظري لان منقبه كتلني الفضول اعرف خلقتهه
كلت هذا هو رجلهه توض وض معناهه هيه توض هم بقيت اباوع عليهه دخلت عقلي ومبينه من مشيتهه شنو مشيت خطوات وراهه شفتهه دخلت بيت سحبت خيط الباب وخشت .....رجعت المكاني دخنتلي جكاره ثانيه واني افكر بيهه
توني كعدت اجاني اتصال
جاوبته بملل خيرك عزوز
عزوز/وين انت ......كلبت الدنيا عليك
خضر/شلقضيه يابه توني رحت من يمكم
عزوز/دتعال تعال حمصه ابن الاعيوص مضروب ومكلوبه الدنيا
خضر/هاااا شوكت هالحجي
عزوز/قبل ساعه جيب سلاحك وتعال السالفه جايده كلش
خضر-جايك هو انت يايوم جبت سالفه بيهه خير
صعدت سيارتي ورحت للبيت شويه جانت ازدحامات وصلت البيت حبوبتي ......دخلت لكيت عليوي(علي)
لابس عباية نسوان
-ها ولك عليوي صرت حرمه جنك
علي/شسوي ال امي تجيب بكواني الطحين وترجع ليوره
وتوني سابح ومبدل ولطشت اله اشيل الكونيه دتعال مادامك وصخ انت شيلهه ونزلهه من ظهره بالكاع
تعال تعال هيووووو هلكان من التعب شلقضيه شوكت مااشوفك تتهرب تعال شيل لا اكسر راسك والله
عافني وذب العبايه ووله شلتهه اني شسوي لعد مالي خلك اللسان امه مال دلالات واني طكه ونص وهمه ضايجين مني..... بس حبوبتي مجلبه بيه ساعات اكول ......الزمهه اكصلهه اللسانهه ماعندي مانع بس شيخلصني من حبوبتي
دخلت لكيتهه كاعده على فراشهه..... الكله اسود باسود
مدنجه على السبحه تسبح اول ما دخلت رفعت راسهه
حبوبه-هله يمه.... ومية هله .....شنو هالترابه الماليه هديماتك
خضر-بست ايدهه .....ونمت على رجليناتهه جنت اشتغل
حبوبه-ياشغل هذا التارسك ترابه
ام علي-شنو هاااي خضر انت من كل عقلك داخل بهاي القذاره ولا نايم على الفراش ايععععع كوم كوم بسرعه للحمام
حبوبه-شعليج منه انتي
ام علي-شنو شعليه منو ينضف غيري كوم بسرعه
خضر-مرت عمي تره زودتيهه لتخليني اجيب هسه تراب واذبه بالبيت شالقضيه تره موعتي اذني
ام علي-متصيرلك جاره من وره دلال حبوبتك هيلكت علينه وشمخرت
حبوبه-هههه شعندي غير خضيره
خضر-حبوبه تحسسيني اني كرفس من تكولين خضيره لو كراث
حبوبه-ههههه نزول على سوالفك
كمت كعدت على حيلي بستهه بخدهه وكلت يالله وكمت
دخلت للحمام شغلت الدوش وكفت جوا ويه قطرات مي الدوش اتذكر قطرات دم امي وابويه واخواني
قبضت ايدي ........وصكيت سنوني ....شوكت ....شوكت يجي هذا اليوم واخذ بثاركم شوكت
طلعت من الحمام بعد ما راسي يريد ينفجر
الحمام يذكرني بيهم لان صارو اهلي مجزره بالحمام
بعد ما ذبحوهم سحلوهم بالحمام كلهم
جنت طفل بعمر ال٩سنوات كل همي احمي نفسي وانقذ نفسي .....حسيت على صراخ امي وخفت وختلت جوه الجربايه مااعرف الحظ الي خلاهم ميشوفوني او منيتي مجايه او حتى اخذ بثارهم بقيت عدل ......مع العلم دوروني بس سبحانك ربي مشافوني جانت اكو كراتين جوه الجربايه قدمتهن وختلت وراهن بسرعه
بقيت اسمع صراخ اهلي وتوسلاتهم
امي ابويه اخواني اثنين واحد ١٢وواحد ١٤واختي ٤سنوات كلهم راحو بنفس اليوم
من يومهه من عمري تسع سنين من شفت دمهم
جفلت عيوني وكلبي صار قوي .......شخص واحد يرجع للعراق اعرف منو ذبح اهلي
طفر هو وعائلته بعد شهر من الحادثه
ابويه جان ضابط ....وعنده خيرات الله هواي
والي ذبحهم علمود الفلوس هذا كل الي اعرفه والمشتبه بي صديق ابويه
اخذت سلاحي وطلعت
رحت العزوز والشباب
راشد-ها ولك خضر ....وين شردت
خضر-موجود.... كبالك يالاعمى
راشد-بعد وكت جاي..... جنك خطاره
خضر-جانت صمونه حاره بيده كطمت كمعهه وخليتهه بحلكي ....يا خويه ناس متستاهل بس بمزاجي اوكف وياهم
عزوز-يجيك يوم وتحتاجهم
خضر-مااحتاج غير بس الله...... الوادم كلهه مااعترف بيهم
دخلت للديوان متروس زلم....... كعدت شويه كالو نروح ندك البيت كمنه كلنه ......ورحنه دكينه البيت همه يرمون واحنه نرمي مااحس اله راشد وكع من طوله ......متحملت رحت اركض علي لان اذا يبقه يموتو
لحكني عزوز يحميني...... كوه كدرت اسحله همزين جان قريب عليه....... بقينه نرمي الحد ماكالو يلله نرجع شلت ابو ثرب راشد وصعدته السياره
راشد-لك راح امووووووت .....اخ بطني اخ يبويه اخ ييمه اخ يالاعيوص اذا متتت شستفاد اني هسه شخال بجيسي
خضر-ها يالسبع يالزلمه ولك الزلمه الزين ميخاف من الموت
راشد-ولك هيه بيهه زلمه اكلك راح اموت انت متفهم
خضر-شايفلك عار مات قبل
راشد -لا والله
خضر-انجب لعد متموت
راشد- هسه طمنتني
اتصل عليه عزوز كلي..... وينك كتله وراكم
عزوز-دير بالك زين .....ذولي مناوين على خير
والحجي بيناتنه حمصه ناهك عرضهم
خضر-يعني منتهك عرضهم واحنا رايحين انطكم شنو هاي صلافتنه يالمطي غير تحجي هسه اني رحت
عالهامش بلله متت واني مماخذ ثار اهلي ايا اغم على هاي الدكه الناقصه
اخذت راشد البيته وطلعتله الطلقه ......خبره بهاي السالفه اني ......وجويتله المكان وهو يصرخ ....وضمدته منكدر نروح للمستشفى تصير سين وجيم مالنه خلك مرته جانت زعلانه...... بقيت يمه خليت راسي على المخده .....واني بأذني صرخات اخواني وامي
سنين واني صابر ومتأمل يرجع .....شرط اذبحهم هو وعائلته بنفس الطريقه ومنهه شيصير خل يصير
راشد-خضر
خضر-خيرك
راشد-جوعان
خضر-اهووووو هذا اليغث ابو كرش نام مو وكتك
راشد-دكوم بروح امك رجفت ايدي من الجوع
خضر-شالقضيه تعال اكلني بعد لك اني وجبه وحده من الصبح الحد هاي اللحظه جوعان ومتعاجز تالي اكوم اسويلك وجبه لتخليني اوكلك نعل بهالليل
نام .....نام ابو ثرب جوعان ....اكو احد كلك تخون مرتك
خضر-طلع الصبح.....كمت رجعت للبيت
لكيت حبوبتي وعليوي وسلمان وخالد ولد عمي كاعدين يتريكون....دنكت على حبوبه بست ايدهه وكعدت
خالد-سمعت بيك رايح وياهم
خضر-اي رحت
خالد-ابقه هيج تاليتك لو سجن لو بالكبور
خضر-شلقضيه غير عشيرتنا اتبره منهم لو شنو
خالد-اكو دوله اكو قانون
خضر-لتددخل انت
خالد-والقران يا خضر مااكول ابن عمي واشيلك حالك حالهم
حبوبه-شجرالكم يمه من الصباحيات وخضيره ولك يمه نخاف عليك هالدرب منريده
خضر- لتخاف خويلد مااخلي الغريب يشيلني الاقربون اولى بالمعروف
حبوبه-كش بره وبعيد اسم الله الله يبعدنه
ولك يمه عوف عالفكر من راسك
سلمان- مو بس هو حبوبه احنه هم منسكت على كتالين عمي وعائلته
خالد-انت الصم والتفت الدراستك
وانت عوف سوالف السلاح
خضر-عايفهن
خالد-جذاب ذاك اليوم مشتري ٣
خضر-انت منين تجيب الاخبار
خالد-كافي خصررررر وصلت حدهه وياك
خضر-اهوووووو تعرف شنو اكثر شي يضوجني اسلوبك مااقبل تعرف كلش زين تحجي وياي بهذا الاسلوب ...... والتفت النفسك سيادة النقيب
وعوفني اني وقذارتي لتدخل بيهه
خالد-امحيك خضر والله امحيك قبل لتسوي الي بعقلك
هم هاي العايزهه ...اني نقيب ...وابن عمي مجرم
خضر- من الحاحك فهمت همه جايين ......اعرف مراح تدليني بي....اني اتصرف ......كمت وكفت على حيلي واخر مره انبهك واكلك ....متدخل بيه
خالد-عايش ببيتنا يمنه ....وتريدني اسكت
حبوبه-كولو يالله ولك خضيره مموجودين
خالد-عوفي حبوبه يوميه يسويلنه هاي الهوسه
خضر-الحاحه بهذا الموضوع شككني ....عرف عنه شي
لان مو من عادته يلح ....
طلعت من البيت بسرعه ....بدون ماغير ملابسي
اتصلت على عزوز.....الو ها عزوز
عزوز-خيرك خضر شبي صوتك
خضر-موجود اجه من السفر
عزوز-حميد
خضر-اي حميد .....مااعرف عزوز جايك هسه اريد اعرف وين ....خالد يعرف
عزوز-أأيس لعد
خضر-ماأأيس لو اعرف اسويهه كاتل ومكتول ويه خالد
عزوز-انت تخبلت
خضر-والله اذا مااخذ بثار اهلي ماارتاح
بقيت بالشهر كامل ادور وماكو .....لا حس ولا خبر
دورت ردت ....ماله اثر ....واني متأكد هو موجود وأأكدلي علي هذا الشي
بين فتره والثانيه اجي للهيكل .....وهاي ام البوشيه
تمر من يمي مافديوم رحت للمنطقه اذا ملكيتهه طالعه وتفرفر اشوفهه من ترجع ....لان اليوم الي اروح بي للهيكل ابقه وقت طويل بي
خابرني عزوز بالسته الصبح كلي عنده سلاح يريد يخلي ببيتي رحت اني سبقته واني افتح الباب شفتهه درت وجهي عليهه شالقضيه وين موليه من الصباحيات هاي مرتاحيتلهه ابد ......يلله خل اخلص من سالفتي واخذ بثاري والتفت واضوك العسل هيه هم بقت تباوع عليه وتمشي
غمزتلهه ....كبل دارت وجهه وكملت طريقهه سريع
اجه عزوز ....دخلت للبيت ....عزوز قررت اني
عزوز-شقررت خيرك
عزوز-اخطف ابن خالد
عزوز-شكلك تخبلت يمحيك خالد اذا تسويهه
خضر-ميكلي على مكانه والله اذا مااسوي هيج
عزوز-وشعبالك من تسوي هيج بلحظتهه يمحيك
خضر-خل يدليني اخذ بثار اهلي ووراهه يمحيني
عزوز-خضر كافي اصحى وعيش حياتك ....انت ممتأكد اصلاً هو لو مو هوه
خضر-جدي كال بوقتهه هو بالاسم
قنعت عزوز .....وراشد نخطف ابن خالد وبديت اخطط
....الخطفه ....مااكدر بهالسهوله ...اخطفه لازم اختفي وره ماارجعه لان هو ...ابنه مقابل عنوان حميد
ويوميه كمت اروح للهيكل ......وكل مااروح اشوفهه تطلع من الصبح لل٤العصر ومرات لل ٧المغرب
مره من المرات الفضول قاتل ....عفت كلشي ولحكتهه
دخلت بيت من ذني البيوت الراقيه .....وفتحلهه الباب واحد مبين طاك رجعت للهيكل مبينه سالفتهه شنو ...
رجعت للهيكل انتضرتهه ....بيومهه رجعت من وكت الظهريه ....شفتهه من فوك نزلت بسرعه ....جانت بيدي جكاره ....وكفت كبالهه وشمرت الجكاره ....
خضر-مرحبا يم بوشه
-ولي من كدامي لا اصرخ والم الناس عليك
خضر-شالقضيه ياب منعجب تره جيبنه مليان هم
احترم نفسك ووخر من كبالي
خضر-اهوووووووووووو كامت تبيع شرفيات براسي متدري بيه شبعان من هالسوالف باعي لج تره مراقبج صار فتره واعرف سوالفج الوصخه تعالي دخلي وياي
متعيني واملي جيبج وطلعي
وروح امي هسه اذا متولي من كدامي اله الم عليك الناس
بحركه سريعه بدون متحس وخرت البوشيه منهه باوعت عليهه كلش حلوه مثل مكالت حبوبه الرجلين الهن دور بكشف الجمال ابتسمت
حلوه بس دمج جامد حيل
دك عليه عزوز ... عفتهه ودخلت مكدرت اجاوبه ..يمهه
ها عزوز
ارجع للبيت بسرعه ....لازم تتواجد بالبيت ...طلع محمد من البيت هسه
محب ابن خالد عمره ٧سنوات .....رحت بسرعه للبيت بقيت كاعد يم حبوبه ....صادفت من رجعت لكيت منتهى بت عمي موجوده حب حياتي ....سنين اني وياهه سوه وتالي سافرت بشغل...ينه رجعت لكيتهه متزوجه ....بوقتهه وجعتني حيل
طلعتلي اعذار ....ومنهه اللساني مطخ اللسانهه ابد
صح هيه حقهه ...لان اني عمري مو الي عمري للثار يعني نهايتي الاعدام بس حبيتهه ...مو بيدي
صعدت فوك .....سبحت ....وجيت يم حبوبه ....تمددت عفت عيني لان جنت نعسان مااحس اله كعدتني منتهى
منتهى-خضر ....كوم خضر
خضر-شكو باوعت عليهه سويت روحي مصدوم
منتهى-محمد ماكو
خضر-شنووووو منو شوكت هاي الحجي وكمت ادور وياهم ....انقهرت عليهم بس شسوي ...خالد اضطرني
شويه وكتلهم راح اروح ادوره بالطريق خابرني عزوز
عزوز-وينك هاي وحده مبوشه شافتنه من كاعد ندخل وويانه محمد مغطين راسه وين ناخذه هسه
خضر-مطي غير تديررررر بالك انت مخبل وشطلعهه هاي من بيتهم مو رجعت
عزوز-تعرفهه
خضر-لا شايفهه بالمنطقه هواي مااعرف رب غيرتك
جايكم هسه ماعندي مكان ثاني تاخذو بي
توني وصلت للمنطقه شفت سيارات المكافحه بالباب ......يتبع
قصه حقيقيه
من هسه اكللكم بيهه جرئه
حتى نكون واضحين من البدايه
انطيتكم موعد بالمقدمه من يجي التزم وياكم لان بعدني كاعد اخذ معلومات القصه احب اسجلهم كامل يمي ♥️