طريقنا صعب

البارت ٩

ساعَتها سكتتْ ماحجت ..
كِلتلها وَينج دَنكْت ..
ضحكَتْ وقصتَنا أبتدتْ
ثاريني تارسْ بالهاْ ...🖤

*****..*****..*****..*****..*****..*****..*****

رزان :بلاخير كلت شكو اني هسة دافكر بي هلكد..!

فتحت التليفون تصفحت بي شوية ونمت ..

كعدت الصبح ..
جريت التليفون الساعة ١٠ ونص ..

نزلت اني وكفشتي دخلت للحمام غسلت وجهي وطلعت ..

رزان: صباح الخييير

ريمة:صباح النور تعالي كعدي تريكي ..

رزان : باوعت منا منا ماكو مموجود كلت اخذ راحتي ..

كعدت يم بابا ..

هبة: انطيني هذا الجبن ..

رزان : مديت ايدي انطيها الجبن ودخل الاستاذ !
بس اريد اعرف منين تطلعلي ...مو جنت مموجود خيير !

هبة: عمية انتي شنو شبيج وكعتي نصة طار الجبن ..

محمد: يلا مصار شي بابا لامن صباحيات الله تتعاركن
هاج هذا الثاني بس سكتن ...

قسورة: صباح الخير ..

محمد: صباح النور هلا ابني تفضل ويانا ..

قسورة : ابد ممشتهي وطالع عندي شغلة مُهمة ولله

ريمة: اي لاتطلع وانتَ على لحم بطنك تعال اكل كم لكمة وروح ..

محمد:اكعد اكعد لو الا تعارض بكل شي نكولة ..

قسورة : لاحشى شلون

محمد: لعد اكعد اكل يلا ..

رزان : هسه الولد ميريد يكعد ياكل يريد يولي شكو اهلج مجلبين بي اكعد واكعد

هبة:بس كليلي شبيج ويا مناكر ٢٤ ساعة ..!

رزان : ماكو شي يابة هو اني هم صوجي احجيلي حجاية وياج يلا سكتي بطلت بعد ماحجي ..

هبة: احسن ماريد اسمع لغوتج ..

رزان: كعدت اكل وممرتاحة ابد لابسة الكبوس مال التيشيرت مالتي ووملابسي مال نوم هسه شنو هل بهذلة هاي يررربي ..

قسورة :الحمدلله كملت ..

ريمة : بالعافية ..

رزان : طلع بسرعة الحمدلله ماصار شي واحنا كاعدين زين زين متطور الاخ صاير ميدور مشاكل ..

كعدت اكل ميتة جوع ..

كملنا وهبة غسلت المواعين ..

صعدت فوك دخلت للكروب مال البنات وضليت احجي كُلشي صار

نوران : الله شكد حلو حركات وشي تصير ببيتكم هنيالج لج ..

رزان: لج انتي ولله بطرااانة لو هو كرايبج جان محجيتي هذا الحجي ابد مو شفتي حلو عبالج تصرفاتة حلوة ..

نوران: اي صح هو هم شوي غثة

رزان : لا كوومة كوومة مو شوية وسكتي يلا سدي موضوعة خيولي بس اتذكرة اتنرفز تلقائيا ..

ضلينا نحجي شوي وسديتة للتليفون نزلت جوة ..

ريمة: شتردون اليوم اسويلكم غدة ..

محمد : بكيفج بس مدام قسورة يمنا هو يحب السمج اجيبلكم سمج وتسوي ؟

ريمة: اي يلا هم احسن ..

رزان : ايبااه مدلل استاذ قسورا ..

ريمة :روحي عزلي البرا ونظفي ..

رزان: ماما الطارمة نظيفة ولله لو بس تردين تشغليني

ريمة: بس عزليها هسه تلكين كم حذاء مالتجن رتبيهن عيب هسه يجي الولد شيكول..

رزان :الولد والولد يمتى يروح اجة يوم نكلب البيت اذا ضل اكثر شيصير ..

هبة: اني اسويهن بس كرمينا بسكوتج ..

رزان :لاعيني عود لوتية انتي تسوين البرا علمود اني اغسل المواعين تعرفيني ماحب السمج ..

هبة: ولله مو صوجج ..

رزان : اي مو صوجي يلا وخري دا اطلع ..

طلعت لميت الاحذية والطارمة انظف من حياتي بس ماما الا تكربني شلون ابقى كاعدة ومعندي شي ..

رشيت الحديقة وكعدت بالمرجوحة برا الهوا حلو ..

فتحت التليفون دخلت على الكروب لكيتهم متصلين فاتحين كام ويحجون نكت ..

دزت مسج نوران ..

نوران : لج تعاي ولله تفوتج النكت خربنا من الضحك ..

رزان : مابية حيل ولله اريد ادخل اساعد ماما بالغدة ..

نوران : لاتصيرين عوبة هي دقيقتين دتعاي  ..

رزان : اجيت يلا بس خلصيني ...

انضميت للاتصال بس مافتحت كاميرا جبت الهيتفون ودااسمع هذا ينطي نكتة والبقية يضحكون ..

الا اني اشوفهن نكات تااافه حيل ...

بعدين واحد كال نكتة خربت من الضحك عيوني دمعت خرب هيَ نكتة تافهة بس طريقتة من يكولها تضحك ..

رزان: لك احمد انت ولله دمك خفييف خرب يومك ههههههههههه

قسورة: حلوو وهسة نوب احمد هم إنضم للقائمة !

رزان :نززني صوتة بساع كمت باوعت بوجهة !
ورجعت باوعت للتليفون ..!
سديت المكالمة بساع ..

قسورة : يعني هم طالعة بهذا لبسج المشلتح بنص الطارمة والجوارين منا وهم صوتج شعلوة وهم تخابرين ولد ههههه جيد جيد بنت العم استمري ..

رزان : شكد يحجي وياي وشكد كلامة هواية نرفزني بس هذا الحجي يفوز ب اكثر حجي متت قهر منة شنو هو ويحجي وياي هيج وهاي نبرة صوتة الي تنرفز .. شكد كرهتةةة بهذيج اللحضة ..

كتلة ..

رزان : انت شنو هاي عادة عندك تفسر بكيفك وبمزاجك الكسيف وتروح ترزل وتصيح !

قسورة : انة ماصيحت هاي اولاً..

ثانياً اريد اعرف شنو جوابج كلمرة تصير شوية وياج حق وبيها مجال تجادلين هسة عذرج شنو !؟

رزان : ردت اكلة واشرحلة حتى لو اني خطأ بس اهم شي مااسكت ردت اكلة احنة نختلف عنكم احنة هيج متعودين اهلي هيج معودينا وعدنة عادي وهسه قابل اني شسويت ! ردت هواية احجي بس صفنت بوجهة !

رزان : تدري شنو ردت اشرحلك بس كلت انتَ منو وشنو اصلااااا بلنسبة الي حتى ابرر الك !
هزيت ايدي ومشيت بسرعة ردت بس شوية انرفزة واضوجة بكد ماضوجني وعود عبالي ارتاح ...

بس ابد ضليت الوب ميتة قهر شنو يحاجيني هيج ماخليت غلط وسب يعتب علية شوية واروح اهد علي ..

دخلت لغرفتي بساع ضليت افتر حتى حريت ولو الجو جان يخبل هسه كلشي اشوفة كبالي يضوجني بساع جريت ملابسي ورحت سبحت ...

طلعت من الحمام صارت بوجهي هبة ..

هبة : شبيج ولج تدردمين ....

رزان:ماكو شي..

هبة:لااكو اكيد مسويتلج مصيبة ..

رزان : صحت بيها ..كتلج ماكووو شي شكو حاشرة خشمج بكلشي شو وخري من يمي ...

دفعتها وصعدت فوك ...

ضليت افتر ردت احاجي البنات ..

مالي واهس اشرحلهن ولااي شي لان كلمرا من احجيلهن اكون دااضحك ومعندي شي مضوجني بس هلمرة غيييير ..

نشفت شعري ولبست ملابسي ..

فتحت التليفون مابي شي وضوجة ...

ماتحملت كبل اخذت التليفون ونزلت ..

دخلت للاستقبال ملكيتة ..

دخلت للمطبخ لكيت ..

ريمة : ها شبيه وجهج هيج احمر

رزان : مابية شي ..

محمد :عوفيها تصير هادئة وتجي تحجيلي مو بابا

رزان : لابابا لان اني اصلا مو ضايجة ولا شي ..

محمد: ماشي براحتج ..

رزان: صفنت هذا وين بس لاطلع ولله اموت اذا طلع اريد اشرحلة السالفة هيج وهيج شنو ياخذ نضرة عني اني احاجي ولد ..

ضليت ادور بالبيت علي بس اشوفة ودي اخذلي راشدي منة هيج معدل بسس وييين !

طلعت للحديقة لكيتة كاعد صافن ويدخن !

رزان: شوف راح احجي الي صار بس اخاف يجي ع بالك انو اني دا ابرر الك ف غلطان اوكي !

قسورة : لاتبررين ولاابرر محاجة تحجين واني عندي شغل يلا سلام ..

رزان: لاعيني مو بكيفك لوتي انت َ شنو كوة هي تريد تطلعني مو زينة !

قسورة: شنو مو زينة ماتحجين عدل انتي شبيج بابا !

رزان : اكعد وسمعني ..

قسورة: احجي خلصيني بس لعلمج يعني مامهتم بشنو راح تحجين ولاراح اهتم خوش ؟

رزان: اباوعلة وكلساع اقدم ايدي وارجعها ودي هيج اذبحة كلساع ويحجي حجي يضوجني بي ...

رزان: باع ترا اني عندي كروب بي كم ولد وبنية بس مو اي ولد ندخلة يعني نعرفهم كرايب همَ وهم مثل اخوانة حيل لافد يوم سمعونا حجاية ولا اي شي نعرفهم حق المعرفة انو ماعدهم هيج شي والكروب صار سنين نسولف ونتشاقة ونضحك بي ف جنت صاعدة مكالمة وياهم ودايحجون نكات وضحكت اني يعني خاف عبالك دااحجي ويا ولد خاص وشي لا منحجي خاص احنة بس بالكروب وجانن اكو بنات  وياي يعني مو بس اني .. واني اي شخص اشوفة نيتة مو زينة وياي مااحجي ويا بس هذولي اعرفهم مثل اخواني .

قسورة :خلصتي ؟

رزان: اكلك ليش متحجي عدل انت فوك مدااحجيلك اني تكلي خلصتي ؟

قسورة :اي شسويلج اني كتلج تعاي احجي الي ووضحيلي ؟ لاماكلت جا خلص

رزان : ولله مو صوجك صوجي اني

قسورة : اي هو صوجج انتي طبعاً ..

رزان : اكرهك

قسورة:المطلوب ؟

رزان: ردت احجي اكثر بس مايفيد نرفزني حيلل بكلامة ونبرة صوتة المستهزئة ..

كبل دخلت للبيت صعدت فوك بغرفتي وشمرت روحي ع الجرباية بس اريد انام ...

مداكدر انام كلامة كلة ببالي كلساع ينعاد ..

شوية وسمعتهم يحجون وصوتهم تقريباً عالي ! ..

نزلت ع الدرج واباوع عليهم ..

قسورة : ولله تزعلني اذا ماتجي اني من البارحة اريد احجي بالموضوع وانت تأجل بي اعرفك ماتريد تجي
بس جاي اكلك لخاطري ؟

رزان: اباوع بس قسورا يحجي واهلي شكلهم خجلانين ومعدهم جواب !

نزلت الدرج وكلت ..

رزان: شنو شكو  ..

محمد: بنتي ترحين ويانا للبصرة زواج فهد الاسبوع الجاي وعازمينا ..

رزان : صفنت ..مااريد اروح واعيش هذيج الاجواء ال ابددددد مو حلوة وكلة مشاكل بمشاكل بيتنا هدوء ومتعودة ع الهدوء اني ... صفنت شكول ل بابا ...

ردت ارد بساع قسورا حجة قبلي ...

قسورة: عمي اذا ماتجي وياي اني هسة اطلع مو على مود شي بس لان هو ماعندي شي الواجب وخلصتة واصدقائي وشفتهم وشفتكم هم ف ماكو داعي اضل اكثر اذا ماتجي  ..

رزان: بساع كلت ل بابا ..

رزان: اكلك بابا خلي نروح احب اجواء العرس وهيج ولله حلو صار هواية محاضرين عرس ..

ماما وهبة بساع باعن الي منصدمات ..

هبة : اي اذا رزان راحت اني اروح ..

محمد: خوش يلا نجي عمي ..

قسورة بوية ولله تعرف غلاتك عندي وودي اكعد ببيت ابوي ومااطلع منة بس يعني شنو اكعد اكلك واشرحلك على المشاكل الي تصير كل ٥ دقايق لو شلون ؟

قسورة: عمي اعرف ولله بس انة موجود شنو ماتثق بية ...

محمد:ابني انت شلك شغل بسوالف النسوان شنو ماعندك دوام شغلة عملة تكعد تحل مشاكلهن شنو ..

قسورة : هسه ان شاء الله ميصير شي معليك انت هي فرحة وخليها تتم بجيتكم ياعمي ...

محمد:خوش ان شاء الله ..

قسورة: هسه شنو باجر اخذكم انة مو ...

محمد: لاليش سيارتي موجودة ..

قسورة: اعرف موجودة بس مالها داعي انة اخذكم نروح كلنا سوة المن سيارتين ..

محمد :يلا وياك عمي ..

رزان : بابا اخذ قسورة وراحوا ع صفحة ماعرف شحجوا بعدين اجة بابا وكال ...

محمد: حضروا غراضكم طالعين باجر قسورة ويانا يوصلنا ..

رزان : صفنت ضجت وفرحت وتنرفزت و و و كلهن ذني اجني بمرة وحدة ماعرف شنو من شعور بساع صعدت فوك ...

جتي وراي هبة  ..

هبة: شعجب شعدة مابدة تردين ترحين للبصرة مو تكرهيهم وخابصتني مشاكل هناك ومشاكل هسه شعندج ؟

رزان : لج لا بس تعرفين احب الاعراس وفساتين ومكياج هاي احلى فقرة شبيج ..

هبة:اي اي صدكتج ..

رزان : عساج عمرج لاصدكتي ولي وليج صوجي اني احجيلج ..

هبة : هههه لا يلا ولله مصدكة ..

رزان : طلعت هبة وتمددت ..صفنت ..

هسه بالله اني ليش كلت خلي نروح ...

غفيت واني افكر ..

فزيت على صوت هبة تصيح ...

هبة : رزاان تعاي تغدي عوفي النوم هسة ..

رزان : كعدت هسة من اروح اكتلها هاي هم احد يكلي ليش ...
ولله جانت النومة حلوة هسة شيرجعني حتى انام !!!

نزلت بسرعة يلا ميخالف هم جوعانة اني ..
غسلت وجهي وكعدت ع سفرة وجهي مطنكر مبية حيل احجي كلمة لان هسة كعدت من النوم واني الشي الي يضوجني يضل ببالي وافكر بي هواية وهذا استاذ غثة ماشاء الله ماقصر وياي ..

كعدت وهبة تجيب الاكل وتخلي بالسفرة ..

هبة: تردين اكف الج ارداناتج حتى تاكلين بعد ؟

شبيج متكومين تساعديني ..

رزان: اوهو هسه هاي شحجي وياها رفعت راسي اريد احجي ..

شفت قسورا كاعد ..يا

شو هذا منتبهت الة ..
كتلها ..
رزان :عفية مابية حيل ولله راسي يوجعني هنَ كم ماعون متعبين اذا تجيبيهن ...

هبة: امري لله ...

كعدنا ناكل ماما سوت برياني وسمج ومقبلات وهلسوالف ...

اكلت بس برياني مو صاحبة السمج اني ابد ..

كل شوي اباوعلة ..

ولا همة دياكل حيل مندمج بالاكل
صدك لو كالوا عند البطون تعمى العيون ...

كملنا الاكل ورحت دااغسل شفتة ديغسل ...

انتظرت ضليت اهز برجلي ...

قسورة : تفضلي ست ..

رزان : اكلك لاتحجي وياي اوكي ؟

قسورة : اوكي على كولتج ..

رزان: لاتقلد

بساع طلع مجاوب اي شي ...

اني الك خلي نشوف منو ترد عليك بعد ..

رحت غسلت المواعين بساع خلصتهن ضليت افكر بي ..

صعدت فوك خابرت نوران وضلينا نحجي كلعادة

نوران :مملاحظة دتحجين بي هواية انتي ؟

رزان : منو ؟

نوران :قسورة يعني منو !

رزان:لايابة خيولي لان يضوجني داحجي بي لااكثر ولااقل  ..

دااحجي ودخلت هبة ...

هبة :عوفي التليفون كومي خلي نحضر الملابس والمكياج لج هاي احلى فقرةةةة متحمسة حيلل

رزان : يلا نوران رايحة اني اكمل واخابرج ..

نوران : اوكي حياتي ...

رزان :كعدنا نزلنا الكنتور كلة اختارينا ملابس البيت هواي لان هذيج المرة من رحنا عدنا اللبسة مية مرا ..

هبة : اخذي هواية ملابس ..

رزان : اي اكلج هو يمتى العرس بالضبط ...

هبة : مادري يمكن بعد ٥ ايام هيج شي ..

رزان : اي واحنا شكد نضل هناك ...

هبة : شمدريني يمكن اسبوع ...
اي اي شي اكيد اسبوع ...

رزان : اوكي ...

مابية حيل احجي مالي نفس مادري ليش  ...شتكلي اكلها اوكي ...

المكياج اخذنا هواية ...

وحضرت فستانين الي حيل عاجبني هلفستان ...

لونة نيلي غامق ومخصر ع الجسم مابي شغل هواية بسيط بس نازك حيل ...

وضليت افكر راح اخلي مكياج ثكيل حيل لان الفستان بسيط و و هواي افكار ...

كملنا شفت الساعة ...

رزان : الساعة ب ٦ المغرب صدك جذب ...

هبة : يلا عادي ..

رزان : سدينا الجنط وخليناهن ع صفحة ...

نزلت لجوة لكيت ...

ماما كاعدة تشرب جاي بالمطبخ وصافنة ..

رزان: شبيج ماما متردين ترحين ...

ريمة : لاحبيبتي مبية شي ...

رزان : ولله هسة اكول لبابا منريد نروح وخلص نكنسل الروحة اذا مرايدتها ...

ريمة :لابنيتي مو هيج بس خايفة هسه راح تجي عالم وناس كبار صغار صافنة خاف يسون لي مشاكل هسة كبال العالم اعرفهن مايفكن ياخة مني ...

رزان : لامعليج بابا موجود واحنة موجودين ...

ريمة : تمام حبيبتي ان شاء الله خير ...حضرتن ملابسجن ؟

رزان :اي كملنا كلشي ..

طلعت من المطبخ رحت للاستقبال
خابرني هُمام ..

هُمام :شلونج شخبارج بذاتة لاتسألين لاهلا لامرحبا شبيج ولج ...

رزان :  ولله اسفة هههه بس ناسية ولله اعذرني ..

انت شلونك ..

هُمام :الحمدلله يلا عادي باعي اكلج ..

رزان:كول ..

هُمام :عدنا طلعة تجين ؟

رزان : لايابة وين اجي قبل كم يوم اني طالعة شنو هي كلساع هههه

هُمام :اوكي براحتج ..

رزان : سلمت علي وسديت التليفون ..

كمت اريد اطلع صار بوجهي قسورا !!

بس لاسمع نوب عبالة كلساع اخابرة ...

قسورة : حرامات جان قبلتي علمود انة اوصلج ...

رزان : وتستهزء بعد ..

قسورة : لامااستهزء ..

رزان :يربي شنو هلمواقف الي داتصيرلي واحد اسوء من الثاني .. هسة شيفهمة هذا !

ولله مالي علاقة شيفهم خلي يفهم بية حيلة اني شنو !

رزان : طلعت من الاستقبال محجيت اي شي ويا ...

صعدت فوك نمت بساع لان منايمة الظهر بس ساعة وكعدتني العوبة هبة بساع .. !

ماكعدت الا ثاني يوم على صوت بابا ...

محمد : يلا بنيتي كومي بدلي ساعة ب ٨ ...

رزان :بابا شعدنة طالعين من وكت خو نطلع العصر حباب ...

محمد:لاخليها بليل احسن ...

رزان :اي عفية ..

محمد : نجبي ولج شنو صدكتي .. كومي كومي ب ٩ احنة طالعين ترة نعوفج ونروح ...

رزان : ولله قديمة جنت اتقشمر بيها هاي مال نعوفج ونروح ...

هبة :هسه تكومين لو لا ...

رزان : اي اي كمت ...

غسلت وبدلت ملابسي وشمرت الشال شلون مجان ونزلت ...

مطفية بالكوة امشي وكلساع اعثر ...

صعدت بسيارة اول وحدة ...

فززني صوتة ...

قسورة :اي مو خدام الخلفج اني اصعدلج جنطتج ...

رزان : شبيييك تصيح من صباحيات الله ...

قسورة : لاتصيحين لاتاخذيلج راشدي معدل هسة ...

رزان :شحدك ولله حضك اطيحة ...

قسورة :علي صوتج ماسمع ...

رزان :لامو يمك ...

نزلت بسرعة ...كتلة ..

رزان : هسة مو كل الجنط انت مصعدهن ليش متصعد جنطتي وحد شنو ؟

قسورة :اي وحد شيلي جنطتج وخليها بالسيارة خلصيني ...

رزان : مارديت على اي شي يكولة منا وجاي اني الك ..
صعدت الجنطة ورحت صعدت بالسيارة اجوا ماما وبابا وهبة ..

بابا كعد بالصدر وماما وهبة يمي ...

وطلعنا ...!

يتبع .... !

لتنسون اللايك🖤.