*بسم الله*
.
.
.
.
.
.
أول حاجة صحا عيدكم وكل عام وانتم بخير ينعاد علينا بصحا ولهنا ولعقوبة لعام لجاي ان شاء الله غفر الله ذنوبنا آجمعين يارب وربي يحمينا ♡♡
نشف ريقي مصبح مدقت لما... شفت ساعة لقيتها ل 11 تع ليل.. رفدت تيليفوني وهبطت لكوزينة.. سمعت تخرخيش.. بديت نقرا فالمعوذات وآية الكرسي
دخلت لقيت جواد حاكم راسو.. ووذنيه حمورا
ميار : وشبيک
خزر فيا.. وقال
جواد : شوفيلي كاشي تع راس
رحت فتحت لفريجيدار نحوس ونهدر
ميار : يوجعک غير راسک
جواد : آمم
قاعدة نحوس مالقيتش.. تفكرت بلي انا عندي
ميار : هنا آو مكانش نروح نشوفلک عندي
هزلي براسي برک.. طلعت نجري وبديت نحوس عليه حتى لقيتو
هبطت ..ورحت ليه عمرتلو لما ومديتهولو.. شرب وناض
ميار : بشفا عليک..
جواد : واش راكي ديري هنا
ميار : جيت نشرب لما ونسيتني كامل 😐
جواد : ايه تصبحي بخير
ميار : تصبح بخير
راح وانا كبيت كاس ما وشربتو.. طلعت لبيتي نرقد
12:00 pm
سطاسيونا شوفور وفتحلو لباب .. دخل لقصر وحاط يديه في جيوبو فتحتلو لبون
رشيد : وينو
بون: راهو يسنا فيک في بيروه
طلع وفتح عليه لباب لقاه متكي وحاط راسو للور وحكم لغارو بيدو
هو: عسلامتک سي رشيد
رشيد : وعلاش عيطتلي نجيک في نص ليل
هو: ريح عندي هدرة
ريح وحط رجل فوق رجل يسنا فيه يقولو واش يسحق
رشيد : اهيه
هو: علبالک واش راح يدخلو ملحدود غدوة على 2:00 تع لعشية
رشيد: وشنوه ..
هو: مخدمک باش انا نجيبلک لخبر ولا نتا لي راقد على وذنيک
رشيد: راني مع لخدمة منيش راقد
هو: المهم غدوة يدخلو سلاح لي راح يجينا من روسيا
رشيد: مشي قلنا مور شهر ؟
هو: مرانيش فارغ شغل باش نسنا مور شهر ورجالي راهم وجدو كلش وغدوة لوقت لمناسب
رشيد: بصح علبالک شكون راهم يتبعو فينا
هو: كامل راهم يعسو وحنا مراحش نحبسو لخدمة على جالهم
رشيد: منخاطروش
هو: كااش نهار درت حاجة وخسرت فيها .. ايذا نتا خواف منحتاجوكش بيناتنا
رشيد: مرانيش خواف راني نقولک كون يحكمونا راح كلش
هو: هه يحكمونا نهار تخمم نتا مي انا جامي نخسر حاجة
رشيد: واش راک معول ؟؟
هو: والو راح نخليهم يلعبو تحت جناحي اقعد تخزر ملبعيد نتا
ناض من كورسيه وجا خارج .. كي وصل لباب دار ليه
رشيد: نسيت باش نقلک بنت ياسمينة راهي هنا ومتسقسينيش كيفاه عرفت
خرج وغلق لباب عليه لحاجة لي تفاجآها بقا كالم
رما لغارو وناض .. نحا كتاب من بيبيوتاک لي عندو تفتحتلو لباب دخل وتغلقت موراه
خزر فتصاور لي معلقين على لحيط وعينيه كامل حقد
رفد سلاح وصاوبو على تصويرتو
وطلق رصاصة
هو: راح نخليكم تتمناو لموت كامل من لكبير لصغير واولهم نتا يا رشيد
رما سلاح وضحک .. رفد تصويرة تع بيبي وقعد يخزر فيها
هو: علاش جيتي .. راح تروحي غلاط كيما يماک
حط تصويرة وخرج من هذيک لبيت
~~~~~~~~~~~~~~~~~~~~~
ميار::
جازت سمانة بلخف حتى لقيت روحي ندير لحوايج في ليفاليز على جال لعرس.. وجدتهم وجبدت واش نلبس
پول بيض مع سروال جين وفاست جين وباسكات.. درت لاتخاس في شعري مجيت نكملها حتى قلبي خرج حطيت صوالحي.. وانا هبطت لتحت
لقيت خالتو مريحة صبحت عليها..
ميار : صباح تفاح وغير معاک نرتاح
رحمة : هههه صباح الخير.. دايمن تخرجي بجملة جديدة
ميار : نقتلكم بالجياحة الغاملة
جواد : مزية عرفتي بلي جايحة
كان فوق راسي مشفتوش غير هدر خلعني
ميار :ناس يصبحو ميخلعوش
راح ريح ومريبونداليش كي رهج.. مي دايمن كي يكون قلبي يولي يخبط ياربي برک منحمارش لا نتبهدل
رحمة : وجدتي حوايجک
ميار : آنعم خالتو..
جواد : روحي عيطي لإسراء هداک هو نروحو
طلعت قلت لإسراء وانا دخلت لبيتي رفدت فاليزتي.. درت ساكي وبديت نهبط فيها فدرجا لخرا حسيت يد على يدي طلعت راسي لقيتو جواد... رفدلي لفاليز وراح خرجنا كامل خالتو ركبت قدامو... وانا و اسراء للور
دار خالو منير بعيدة ولاية وحدوخرا تسما حطيت راسي ورقدت ..
~~~~~~~~~~~~~~~~~~~~~~~~~~~~
جواد::
ملي ركبنا مسمعتش حسها.. حتى شفتها فالمراية راقدة..
رحمة : شوف يا وليدي وين كاشما تشرينا حاجة ناكلوها
جواد : ايه ضوک نشوف
قعدت نسوق.. شفت لي يبيع لثم هبطت شريتلهم ووليت.. عطيت صاشي ليما وعاودت ديماريت
رحمة : اسراء نوضي ميار تاكل
دنات ليها اسراء..
اسراء : مياار ..يا ميار يا شكارة رقاد نوضي
ميار : آخطاني
اسراء : ماما اوبليي تنوض
رحمة : خلاص خليها
يعني هاذي مشي شكارة رقاد برک..
طريق محبتش تخلاص
مور 3 سوايع وصلنا هبطت باش نجبد ليفاليز
شفت اسراء تنوض فيها ويما خرجت شويا وخرجو هوما ثان
انا رفدت تع يما وديالي وهما رفدو دياولهم ..شفت نصرو جاي لينا
نصرو: حمدلله وصلتو بخير وشراكي عمتي رحمة
رحمة: حمدلله ياوليدي مبروک عليک
نصرو : الله يسلمک لعقوبة لوليدک لباير
جواد: هاک ارفد عليا هادو
نصرو: حمدلله ونتا
جواد: راک شوف
ميار: شكارة بهادل هذا
هدرتها ملتحت لتحت حسابتلها مسمعتهاش
رفد معايا ودخلنا سلمنا عليهم
زهية: شكون شابة هاذي
رحمة : هاذي هي ميار
حكمتها وبدات تبوس فيها وهي تتبسم كي لبهلولة
زهية : ماشاء الله كون عندي وليدي وحدوخر ديتک ليه
نصرو: هههه معليش شرع حلل 4
زهية: احشم ياطفل تسمعک مرتک شوف
حمار يهدر هدور كي هو .. بدينا في يخطبو ضوک
مدلي خالي منير مفاتح تع دار
دار خالي جاية ايطاجات .. طاجا لولة ديالو ولي موراها خدمها ليما نهار ولينا بلا دار عشنا هنا مدة مليحة حتى وين طلعت لجاميعة وخدمت طلعتهم لعاصيمة وشرينا دار وخالي عاوني باش بديت نكون شركة ديالي وتشاركنا انا واكرم وحمدلله
طلعت وهوما مورايا فتحت لباب كان مدخلة يقابل صالون اومبعد كوزينة فلجنب .. ويجي لكولوار وفيه لبيوت
لبيت لولة لي جات في طريقي دخلتلها
حطيت فاليزتي وريحت لحقني ميساج من عند اكرم حليتو نقرا فيه
"وحد زوج سوايع نوصلو لاقيني لتحت"
قريتو وحطيت تيليفون .. فتحت فاليز جبدت حوايج وسربيتا ودخلت ندوش نحي لعيا
~
~~~~~~~~~~~~~~~~~~~~~~~~~~~
ميار::
رفدت فاليزتي ودخلت خيرنا انا واسراء بيوت قراب
نحيت حوايجي ودخلت ندوش
خرجت ونشف في شعري
لبست جبة فلغرونا
وقعدت نشف في شعري دخلت عندي اسراء لابسة ودايرة خمار
ميار: ويين بيها
اسراء : هابطة مع ماما لعند طاطا زهية
ميار: عذا وين دوشت نهبط هكا
اسراء: خلاص نشفي شعرک واهبطي
ميار : اييه ؤؤک
هي راحت وانا حكمت تيليفون نحكي مع آسينات حكينا وحد نص ساعة
كوبيت عليها حسيت كرشي تقرقر مكليت والو
خرجت نحوس على لكوزينة كاشما نلقا حاجة ناكلها
جيت داخلة حتى زدمت في كائن بشري وليت للور ملخبطة
طلعت راسي رقبتي طرطقت
كان لابس تريكو بيض وشورط نواغ شعرو هابط ومشمخ شويا باين خرج مدوش .. هبط راسو ليا ويخزر يسنا نهدر
وليت لاريار .. وهو دار يديه في جيوبو
ميار: خليني ندخل
جواد: هيه ادخلي
ميار : معليش تدنا
دنا على لجنب شويا باش نجوز
دخلت لكوزينة وسمعتو دخل مورايا
جواد: احم ديريلي قهوة
ميار: متعرفش ديرها وحدک
جواد: راني نسنا
قعد وانا درت لكونتوار درتلو قهوة وحطيتهالو وانا فتحت لفريجيدار لقيت لبيض قليتو حوست على لخبز حتى سمعتو قالي
جواد: هاوليک فرف لفوقاني
هزيت راسي شفتو ... طلعت على صبعتين رجليا نجبد فيه مقدرتش شميت ريحتو مورايا
جواد: بعدي نجبدهولک يافرخة
ميار: ماشني فرخة
شفتو تبسم .. جبدهولي وولا لپلاستو يشرب فلقهوة وانا ريحت مقبلاتو ناكل ونكحل بنص عين
لواحد ميكذبش سيد هذا كتلة مرجولة وزين وكلش كل منخزر فيه قلبي يخبط
علبالي راهو جاي نهار لي منزيدش نشوفو ونروح منا
وراهي دايقتلي ... مالغري دايرني كي ختو كيفي كيف اسراء
مي واش ندير مثلا نسكت ونبلع لموس وخلاص
حتى هذاک لامام معيطش على حكاية بابا نشالله ميكون غير لخير
كون غير جبت نيميروه بلاک يكون نسى قضيتي كامل
كي شفت روحي شبعت نضت وهنا وين نتبهت بلي خرج
محسيتلوش ..تع صح مخي راح
رفدت لماعن وغسلتهم حتى سمعت لهدرة خرجت لقيت اكرم وعمو محمد جاو
سلمت على عمو ورحت لبيتي
لميت شعري وريحت نكونيكتي حتى لقيت ميساج من سلسبيل هاذي صحبتي من صغر كانو جيرانا وكوم هما عرب ودزيرين تصاحبنا
فتحت ميساج ديالها
" مياااااار لكلبة لجحشة وينک "
"متبانيش ياوجه لبرويطة ملي رحتي لدزاير نسيتيني"
" خرية تفووو خماج اومبعد نوريلک"
المهم شبعتني رخس عندي شحال محكيتش معاها
بعتلها ميساج
" بلعقل على جدي وشبيک ؟"
"تقوليلي وشبيک .. تقلقت عليک "
"علاه تبحرت"
"لالا باسكو وليتي جيمس بوند يابنتي راكي محققة "
"كون جيت محققة نتي لولة لي نرشيک فلحباس "
" هاهاها آيا نضحكو بشويا خبز بلاک نشبعو "
" هههه تافهة مزالک"
" اسمعي نهدرو آپال فيديو خير "
"ؤؤک"
فتحنا لكام وريحنا نحكو نحكو
سليبيل: تسما بدلتيني باسراء
ميار : ههههه لالا والله نتوانسو هنايا وزيد هايلة تعرفيها وتحبيها
سليبيل : آمممم كاشما عندها خوها زل تشوفيهولي
ميار : آيا بلعي تبوسي عينک ومتديهش
سلسبيل : اصبري اصبري ياحمباباک قصدک راكي طايحة فخوها ميار بجلالتها ولات تحب معجزة ياناس
ميار : زيدي عيطي مسمعولكش .. قصدي ميحلبش برک وانا يعيطلي ختي
سلسبيل : منيتو هذا .. متقوليليش من جماعة استغفر الله
ميار: آمممم
سلسبيل : ونتي راكي طايحة فيه
ميار : لالا
سلسبيل : احشيها لبيبيط مشي لياا ...تحبيه؟
ميار: ومنبعد كي نولي كلش يخلاص
سلسبيل : يا طفلة متعرفي مزال شهرين بلاک يحبک وقولي سلسبيل مقالتش
ميار : آحاااي
سلسبيل : حقااااا سقسا عليک جاک قالي توحشت ميار والله سيد يموت عليک
ميار : هذاااک ماخصني غير كافر يحبني تهنيت منووو يازح لسقة
غير كملت هدرتي تخبطت لباب وقلبي تخبط معاها ملخلعة
~~~~~~~~~~~~~~~~~~~~~~~~~~~
جواد::
كي كملت دوش خرجت نشرب قهوة دخلت لكوزينة ملقيت حتى واحد كي جيت خارج زدمت فيا لفرخة تخبطت في صدري وعاودت ولات للور
كي شفتها قلبي خبط اول مرة نشوفها لابسة جبة وجاتها شابة
فيقتني من سرحتي كي قاتلي ندنا باش جوز
دخلت ورجليا داوني موراها قتلها ديرلي قهوة وكي عادتها لازم ترجع هدرة
حبطت عيني وريحت نسنا حتى حطتهالي وهي راحت طيب تاكل
شفتها تحوس وباينة على واش نضت نجبدلها لخبز كي موصلتلوش ورحت نشرب قهوتي
شفتها غايسة .. يادرة فواش لحقني ميساج من اكرم قالي وصلت هبطت ليه
طلعنا شفتها خارجة ملكوزينة سلمت عليهم وراحت لبيتها
اكرم راح شاف بيت ودخل وعمي محمد هبطت انا وياه عند خالي منير ريحنا شويا وانا نضت طالع لبيتي حتى جزت على بيتها وسمعتها تقول
"هذاااک ماخصني غير كافر يحبني تهنيت منووو يازح لسقة"
معرفتش كيفاه فتحت لباب عليها وخبطتو
شفتها كوپات وحطت تيليفون ومريحة تخزر
جواد: شكون هذا
قلتها وانا حاكم روحي على شعرة ولا نضرب تيليفون هذاک نفتتو
ميار : واش دخلک
هذاک لكالم لي كنت حاكمو هداتو بهدرتها
ناضت ووانا مشيت ليها حتى حاصرتها فلحيط متقلاق نهدر ونرص على على سنيا
جواد : خلاصت عليک تتصاحبي مع هذوک لكفار... هه واش يجي من وحدة عايشة لهيک وتربيتها يعلم بيها ربي
ميار : ميسيو جواد اعرف واش راک تهدر منسمحلكش تهدر على تربيتي حتى بكلمة
خبطت يدي على حيط خير منجيبهالها في فمها
جواد : علاااه كاشما غلطت
ميار: ميهمنيش كيفاه شوفني نتايا
جواد : انا ملول مكنتش حاب جي لدار باسكو علبالي تخسري طبايع اسراء وربي لعالم واش راكي دايرة
طبعتني من صدري حتى شفت دموعها تهدر وتبكي
ميار : مقتلكش خليني في دارک بسييف كنت قادر ملول جي تقولي ومنريحش كامل
خرجت تحت يدي وراحت نفست بالقاوي وطلعت شعري جيت خارج سمعت ميساج من تيليفونها
رفدتو
"يااا بقرة تكوپي في وجهي... نسيت باش نقلک قلت لجاک بلي خطبوک باش تتهناي منو مي غاضني مسكين.. آياا شااو"
رميت تيليفون على لبونک وخرجت رحت لبيتي نريح حتى يتنحالي تقلاق
ضوک منعرف وشبيني ووعلاه قتلها هكاک
نحيت تريكو ورميت روحي على لبونک باش نرقد مي كل منغمض عينيا نتفكر دموعها
عودت تقعدت ومسحت على وجهي شفت ساعة لقيتها 3 تع لعشية
رفدت تريكو ولبستو وخرجت
حوست عليها فدار مكاشها هبطت لتحت لقيت طفل صغير قدام لباب وصفتهالو وبعتو لداخل شويا وولا
طفل: لالا عمو مكاش كاين غير لعجايز ووحد طفلة دايرة خمار
خربتلو شعرو وتبسمت وعاودت طلعت يادرا وين راحت باينة مخرجتش طلعت فراسي بلاک راهي لفوق فسطح
طلعت هذاک دروج في دقيقة فتحت لباب دورت راسي نحوس عليها حتى لقيتها مريحة فلرض وعاطيتني بظهرها وباين بلي راهي تبكي
سور محستش كي دخلت مشيت لعندها قعدت قدامها دورت راسها ليا وعاودت رجعاتو كيما كانت
جواد: سمحيلي
ناضت مريبونداتليش كامل تضت انا تاني وحكمتها من يدها باش غير تحبس وثمثم طلقتهالها
جواد: صايي امسحي دموعک سمحيلي
طبست براسي ليها باش نشوفها دارت ليا
ميار: مشي كل مرة تقول هدرة منبعد تقولي سمحيلي .. مشي كي يتيمة معنتها مشي متربية لعكس رعاتني عايلة ولي هي خالتک ونعم تربية مشي كي شوف لبساتي ولا واش ندير معنتها راني بلا مبادئ هادي آخر مرة نسمحلک تهدر هكا معايا ومنا حتى يخلاص لعرس متهدر معايا منهدر معاک وكي نولو مراحش نريح في دارک ... منسحق شفقة تع حتى واحد
رمات كلماتها وراحت مخلاتنيش ميمپا نهدر .. علبالي غلطت فيها ومنعرف علاه تغششت هكاک
دايمن نغلط فلهدرة معاها مي مشي بقصدي كي نتقلق منعرفش نهدر
بلاک هاد لهدرة حبيت نقولهالها مي راحت
تنهدت ورحت لبيتي لبست قاميص رفدت مفاتح طونوبيل وتيليفون وخرجت
لجامع نصلي
~~~~~~~~~~~~~~~~~~~~~~~~~~~
ميار::
كانت غايضتني عمري ... دايمن هكا دايمن يجرحني بهدراتو
مي صاايي منا يخلاص لعرس نروح ملثم
ملول علبالي محبش كي ريحت في دارو
بصح انا مجبورة كون مشي نحوس على بابا منهبطش كامل
ومكانش تلاقاني ولا ريحت في دارو
هبطت لعند نسا وحوست على اسراء
حتى لقيتها روحت ريحت معاها
اسراء: وشبيهم عينيک
ميار : والو بلاک كي دوشت دخلتلي شامبوا
اسراء: تتمسخري بيا مقبيل جزت ليک كنتي نورمال
ميار: قتلک بلاک كاشما دخلي ضوک تتنحا لحمورية
اسراء: ايدا كاشما صرا غير اهدري
ميار: ماصرا والو
خزرت فيا تع مآمنتكش مي والله مكنت حابة نتناقش بزاف
لعرس مزال كامل مابدا مي والله لخالات ولعمات يكفو
بووون نبدا بخلاتي لي سلمت عليهم وعرفوني عليهم
خالتو صافية :
هي مور خالتو رحمة عندها زوج دراري وطفلة
ايهاب 26 سنة ..ايمن 19 سنة .. سارة 24 سنة (لسقة )
خالتو نصيرة :
هي مور خالتو صافية وعندها طفلة الهام 18 سنة وطفل آدم 20 سنة
خالتو نرجس:
وهي صغيرة عندها زوج بنات
ايمان 15 سنة و ماريا 13 سنة وعنها عام ملي مات راجلها ربي يرحمو آكسيدون
خالو منير:
وهو لكبير في عائلة الخلوة ههه عندو بنتو لكبيرة اسمهان مزوجة وعندها زوج دراري راسم ورستم توام
اومبعد نصر دين 29 سنة ولخرة ايناس 25 سنة مخطوبة
بعدما عرفتهم كامل وطابو خدودي متسلام ريحنا مع اسمهان و ايناس ياعمري شحال عجبوني توام هدوک والله يغزلو
قعدت نلعب معاهم
اسمهان : عجباتک دزاير
ميار : بزاف
ايناس : مالا ريحي هنايا
ميار: مكاش كيفاه حياتي وقرايتي كامل لهيک
اسمهان : حالتي زهرة ربي يرحمها كنا نتوحشو نشوفوها حتى ربي دا آمانتو والله نهار صرات آكسيدون ديناها صدمة
ميار: حتى انا كنت هذاک نهار هما داوني نقرا حتى كي وليت لدار لقيت جنازة وليت نداوي عند بسيكاتر باش وليت نهدر ربي لعالم شحال قاسيت تيتمت شحال من خطرة
مسحتلي اسراء دمعاتي لي طاحت كنت متعلقة بيهم بزاف باسكو عوضوني على كلش
ايناس: اوووه اسمهان شوفي بكيتي طفلة
اسمهان : والله مابقصدي سمحيلي
اسراء: صاايي لبنات
ميار: وقتاه عرسک نتي
ايناس: على 5 شهور
اسراء: هههه مبقالكش
اسمهان : هي هابلة على زواج خليها تتزوج
ميار: مبروک
ايناس: لعقوبة ليكم لبنات
ميار ؛ اسراء : ان شاء الله
طاح ليل وحنا ngsro ... عيطتلنا خالتو نرجس نتعشاو
كلينا وانا و ايناس غسلنا لماعن واسراء سيقت لكوزينة
كي كملنا طلعنا انا و اسراء لفوق نريحو باسكو عيينا ليوم طريق هذيک براكات
كي كنا طالعين لقينا جواد هابط خزر فيا شويا دورت راسي وطلعت
باش نوريلووو يتعلم ميهدرش هكاک معايا
مي يدرا وين راه هامل على 10 تع ليل
لا علينا طلعت صلينا هي راحت ترقد وانا بدلت حوايجي لبست بيستيي مع فيزو نواغ لميت شعري كودشيفال
وريحت نخزر فلپلافون حتى داتني عيني
فطنت على 1 تع ... منعرف واش فطني
نضت نحوس على لما ملقيتش نضت على سعدي حكيت عينيا حتى فطنت وخرجت لكوزينة شربت وكي جيت خارجة حسيت حركة خفيفة
قلبي بدا يخبط ملخوف
بديت نمشي وشادة لحيط شغول نزحف فلحيوط كي زرزومية
تعكلت فزربية تع لخرا لي مشفتهاش حسيت حاجة مور ضهري حكمتني جيت نعيط لقيت يد غمتني على فمي
طلعت عينيا قابلوني عينيه
وكيفاه منعرفوش من ريحتو برک نعرفو
تكاني على لحيط وهو مزالو شادني وشبيه هذا خضاها في نص ليل وزيد خايفة يفيق برجفة ديالي
واش هاذ تبهديل بديت ندني في روحي ونزغد باش يطلقني مي والو
منقدرش نوصف احساس تع شكوبي لي حسيت بيه هو كي يكون بعيد عليا برک نبدا نفيبري كي تيليفون grlo
نحا يدو على فمي وقال
جواد: متهدريش ومتبدايش.. نقولک زوج كلمات انا مقصديش واش قتلک مقبيل
انا مشي طبيعتي نجي نطلب سماح ني غلطت معاک مكانش لازم نهدر هكا
نتي بلاک متعرفينيش كي نتقلق ولا متعجبنيش حاجة
زدت فيها شويا مي سمحيلي كي جرحتک
نحلف بلي مسمعت والو واش هدر
كنت في عالم يعلم بيه ربي
بعد عليا حسيتو فاق واش كان يدير ولاسق في جدي هكاک حرک عينو حتى شاف واش لابسة ياويلتاه على تبهدايل ليوم ثمثم هبط عينو
ميار : سماح
قولتهالو وهربت لبيتي غلقت لباب وريحت نرد في نفس لي داقلي
كان برا؟؟ واش كان يدير حتى لضوک
اهيه وانا واش دخلني
آوااه ميار هبلتي وليتي تهدري وحدک روحي ترقدي روحي
حطيت راسي على لمخدة حتى شميت ريحتو وليت كيما شمشوم تع سپونج پوپ شميت حوايجي لقيت ريحتو لسقت فيا
حكمت مخدة وحضنتها ورقدت
.
.
.
.
.
.
.
.
*****
إنتهاء البارت
رايكم ؟؟
فوت وكمونت باش نتشجع واش فيها ايدا قريتو ودرتولي فوت√
بااي سي يوو( ˘ ³˘)