طريقنا صعب

البارت ٦

ملاحظة : يمكن البارت شوية يكون بارد ومابيه احداث قوية لان انا خليت هيج تسلسل الاحداث بس البارتات الجاية راح تكون قوية ومشوقَة حيل ... 🖤.

*****..*****..*****..*****..*****..*****..

رزان :كِلهم كاموا من اجة والبنات هم واني ضالة كاعدة واباوع شكو ..
قسورا بس يصيح ادري شنو مايرتاح اذا مايوم رزل احد وصيح علي شنو هل طبع هذا ...

قسورة : ولكم انتوا ماتجوزون جم مرة كايللكم لاتكعدون سوية يعني شنو ماتكمل الكعدة الا ولد وبنات بوية البنات ببحد وتونسن وتشاقن واكلن والولد بحد لو شلون الا تعاندوون ...

سجاد : قسورة لاتزودها قابل هسه شمسوين احنة ترة كلنا اخوة وكاعد نسولف سوالف عادية حجيك ماالة داعي ..

قسورة : اييي استاذ سجاد علمني علمني بعد ..

سجاد: لااعلمك ولاتعلمني لامسوين شي خطأ ولاهاي واحنا اهل شنو غربة والمفروض منكعد يم البنات لو شوضعك انت ماترتاح اذا ماتسوي مشكلة ..

قسورة :امشي اطلع برة خلنتفاهم..

سجاد :لااتفاهم هنا ليش نطلع ..

قسورة : يابعد اخوك جا كول تريد اهينك كدامهم ليش لا ماعندي اعتراض تعال تعال ...

رزان :وهم نعادت نفس السالفة بس يحجي قسورا الكُل يسكت يضلون بس يباعون شبيهم ذولي ؟

مانشوف بس قسورا لزمة لسجاد من ياختة وجراه جر سجاد يصير هلكدوتة كدام قسورا والله راح يروح بيها الولد

قسورة :مرة ثانية ماتعلمني شنو اسوي فهمت لو لا شنو ولك تريد تثبت روحك علي كدام البنات لو شنو وضعك انت ...

ليش ماواضح من كلامي شنو قصدي لو تحب احجي طك بطك وافشلك كبالهم ...

رزان :قسورا شبيك شدخلك انتَ يعني سالفة تافهَ تكبرها وتبالغ ليش يعني انتوا كلكم هيج طبعكم لو بس انت الله يسلمك ؟

قسورة : تردين تترزلين شكلج ؟

رزان : لاولله شنو تايهتلك

قسورة : بت ابوج احجيلج كلمة زايدة لهنا وكافي اخذتج على مايج ترة خوش ف كلمة وحدة مااسمع خوش ولله ..هو هذا حظي الله يذب علية بس الزعاطيط منين اتلكاها منج من نور لو هذا الحمار الواكف كبالي كاعد يعلمني تالي عمري ولله ...

فهد:ياخوي حقك حقك بس تعرفهم مراهقين والواحد هم يخطأ عادي ..

قسورة :اكول انت حسك مااسمعة عود جبيرهم وموصيك عليهم وعلى هاي كعدتهم الفين مرا كلتلكم لاتجتمعون تردون البنات وحد الولد وحدهم اوكي مو تختلطون وانتو تكولون اي وترجعون شنو طرن اني هنا مالكم رداد انتو ؟ ....

وانت سجاد مرة مرتين تلاثة مافاد شوف ولك
لاعبالك اني غشيم وماافتهم عود هنَ عرضك وانت هيج تباوعلهن ؟؟!!

سجاد: اكلك قسورة لاتجفص شنو م...

رزان : مانشوف بس الراشدي اجا يهفهف لسجاد دار وجهة للصفحة الثانية وكلةة ..

قسورة :ولك حمار اجفص شنو بكدك اني شنو !!
وعود تريد تطمطم السالفة ولك اني مفتح بالتيزاب سوالفك ذني مايعبرن علية ..

عينك زايغة وتباوع لهاي وهاي لو اعرفك تحب صدك ونيتك زواج اني اول واحد بضهرك بس انت واحد سكط عينك ماتشبع وتريدني ابقيك وياهن بالله فهد وعلي وحسين اعرفهم ماعدهم هيج سوالف الا انتَ جا طبعاً ابن منو انت َ غير ابن ايمان ...

رزان: اني صافنة على حجية ولله مايفوتة شي ..

بس بنفس الوقت ماانسى حجيه ساواني اني ونور سوة يعني حالي حالها وفوكاها يكول عنة زعاطيط ؟
اراويك منو الزعطوطة اصبرلي ...

هبة : شبيكم ماتحجون ويا اصنام انتوا هنا شنو ؟

علي :اسكتي هبة معليج هذا قسورة نعرفة هو طبعة هيج ومايتعارك من يمة لو يجيب حجي من يمة مافد يوم سوالة مشكلة وماالها سبب ف عوفي ..

رزان : عشتوو استاذ قسورا خف علينة يابة ..

قسورة : شنو كلتي علي صوتج

هبة : لا ياخي ماكالت شي بس بداعة جدك عوف سجاد هاي هي الولد عرف الخطأ مالتة وبعد ميعيدها مو سجاااد ؟

علي :ولك اغبر جاي تسألك كول اي لو تريد تنعلس بعد

سجاد :اي اي صح عرفت خطأي حقكم عليةة ..

قسورة :ذيل الجلب ماينعدل كعدتكم هاي مااشوفها بعد فهمتوا لو لا ماتجي من وراها غير المصايب تنجبون وترحن انتن البنات تكعدن بحدجن والولد بحدهم سوالف ماصخة مااريد ..

رزان : اكلك خذتنا حاصل فاصل شايف روحك شوفة شو وها خلي اذكرك كم يوم ومولين احنة منا ف لاتكول كعدن ببحدجن وهلسوالف شنو ضالين العمر كلة يمكم؟الا تخبلنة اذا نضل ..

احجي وهبة تكرص بية اسكتي ماسكتي ...

رزان :وانتي هبة شكو ترا مااسكت عليمن مخوفكم هيج شدعوة صدك جذب تتراجفون وانتوا تحجون ويا بابا شبيكم صدك ثبتولي ماعدكم شخصيةة مع الاسف عليكم ..

احجي وقسورة ماحجة ولاكلمة مااعرف ليش بساع عافنة وطلع ...

هبة :صخام الصخمج شايفة صوتج شكد عالي وانتي تأشرين بأيدج واصابعج ودج تدخليها بعين الولد ماتستحين اكبر منج هو ب ٩ سنين ياثولة ...والله الا اكول ل امي صبريلي ..

رزان : خاب شو دروحي خوش ولله ماتشوفين هو مصخها يصيح ويرزل بالطالعة والنازلة ويكول علينة زعاطيط وضل يجفص هاي انتو لأن ساكتيلة بالبداية ضل يستمر هيج لو تردونة من الاول ماصار هيج ..

فهد :خوية رزان خلي اُكلج شغلة ترة قسورة ماعندة هيج سوالف ومثل ماكال علي هو صحيح طبعة عصبي ويبالغ مرات بس مايتصرف من يمة بدون سبب انتي ماتعرفين قبل كم يوم اجيتي ماتعرفين هذا سجاد شمسوي ترا عمايلة ماينلبس عليها ثوب مااكدر احجيلج بس انتي فتهمي وهو حقة اكبرنا ويريد مصلحتجن بس انتن يلنسوان تتمزعلن ...
ولاتكليلي ليش انت ماحجيت وكلت خلي يروح سجاد انتي بلاخير اجيتي ف ماتدرين اول ماكعدنة هو دخل اخذتة وحاجيتة على صفحة كتلة لاتكعد يمنة قسورة مايقبل ويروح يتعارك ويا عمتي ايمان وهو يتوسل بس شوي وبس شوي وحتى كلي قسورة طالع ...كعدنا ويانا جا شسويلة ...

رزان :صفنت راجعت كلامي بس لاضليت اجفص يربي هسه هم مشكلة جديدة ادري شنو هل بيت وشنو هل ناس البي لازم يسموه بيت ابو المشاكل والطياح الحظ ...

هبة :امشي بساع اعتذري منة ماتسمعين فهد شيكول
انتي شكو تجفصين هو يعرف يتصرف ويعرف ولد عماتة شنو اطباعهم ولاتنسين هو ضابط هسوالف ماتعبر علي ...

رزان :ديلا لاتصبغين بي كافي ...

وها مااعتذر لو شيصير هو هم ضل يجفص وزعاطيط وانتي تعاي ماشفتي النبرة مال صوتة شلون يحجيها ب استهزاء ولله لو يموت مااعتذر ...

حوراء : ماراح نلح عليج اكثر انتي بعد بكيفج بس فدوة ابن عمي واعرفة ماراد يفشلج كدام الولد وكدامنة ف سكت وطلع المرة الثانية ونبي مانحزر شنو يسوي ...

رزان : كولي مخبل وفضيها ...

هدى :ولج لا لتحجين هيج ولله بعدج متعرفينة شبيج ...

رزان :ديلا عيني يلا اسفة سكتت بعد ماحجي شي على الامير وليام

كامن يضحكن ...

بسرعة طلعنة وكل وحدة راحت تسويلها شغلة ..

اني جنت جوعانة دخلت للمطبخ ..

فتحت الثلاجة اخذت فواكه سويت سلطة فواكه
واخذت شوكة وطلعت ....

صعدت الدرج وبساع الماعون وكع من ايدي صار طشار نصة وكع على جف رجلي ....!!!

نور :ياا اسفة بالغلط غير تنتبهيننن للطريق ...

رزان : لج انتي شكد حقيرة ياسافلة متني اجة ينخلع من ضربتج الي وتكليلي بالغلط !!

نور :صوج الي يعتذر منج ادبسز هو انتي عمية متشوفين اني شعلية شسويتلج .... ماما ماما

بساع اجتي ايمان لان جانت يم المطبخ والمطبخ بصف الدرج ....

ايمان :ها حبيبتي ...

نور :ولله داامشي بالغلط نطخيت بيها ووكع الماعون على رجلها وهسه تغلط علية فوك مااعتذرلها ..

ايمان :اي يمة جا هاي هي تمشي ورا امها بس تريد تسويلنة مشكلة وتطلعنا الغلطانين امشي امشي ...

نور :عود ردت اساعدج ولله لو تموتين ...

رزان : ضليت صافنة نسيت حتى جرح رجلي الي ماوكف من الدم جرح حيل صغير بس جان عميق الدم صار بفلسسسس ....

بساع مر سجاد ضليت اصيح ....

سجاد :لج غير تنتبهين شنو هاي رجلج ...

رزان: اسأل اختك الشفية هي ضربتني متقصدة ..
هسه كافي لغوة وبس تعال ساعدني ولنبي مااكدر اكوم ...

سجاد : تعاي يابة صدك جذب ...

رزان : مررت ايدي على جتفة وضليت اصعد الدرج على رجل وحدة علما وصلت للحمام واسمع الصياح ...!

قسورة :لك حمار ابن حمار ماتجووز انت شوو تعاال

سجاد : ولله هي كلتلي ولله

قسورة : لك شكد جبان وسكط فوكاها جاي ...

رزان : يابة ولله بس ساعدني رجلي نجرحت شوف الدرج كلة دم من ورا نور شلون بالله الولد يعوفني ويمشي واني دمي بطولي ؟

قسورة :امشي من وجهي بساع ...

رزان :ثواني واختفة سجاد بس اريد اعرف ليش مخوفهم هلكد ...

بساع تقرب من يمي قسورا بس حتى ميباوع بوجهي ديلا عشتو علساس ميتة عليك اني ...

قسورة :هم لسانها جنة لسان دلالة وهم غبية وثولة ...

رزان :اكلك ليش ماتحترم نفسك ترة نور هي الي طختني عمداً ...

قسورة :اي اي خوش سكتي ماريد اسمع صوتج ...

رزان : ماكو داعي تساعدني وخر شكرا ...

قسورة :لج انتي لاتفيد وياج لابالعيني واغاتي ولابطيخ طبج طوب هو صوجي اني ...

وطلع ..

رزان : شكد ينرفزني كبر ماخليت غلطة ماغلطتها علي بوقتها ...

قسورة :نزلت جوة وكلت ...

تعالن تعالن صعدن لهاي الغبرة فوك رجلها نجرحت واطلع ماافتهم اذا تعرف تلفها وشوفن ....

ريمة :عزة العزاني شبيها بنيتي ..

سجاد :خالة مابيها شي ولله ..

قسورة : خزرتة بساع كال ...

سجاد :اني رايح عندي شغل ..

بسرعة صعدن البنات ليفوك يشوفن رزان ...

صيحت وراهن ..

قسورة : شوفنها اذا تحتاج خياط ممعقولة هذا الدم من هيج جرح صغير ...

*****..*****..*****..*****..*****..*****..

رزان : كاعدة بالحمام والدم مايوكف مادااحس بوجع قوي بس من احركها توجعني ...

بساع دخلت علية ماما والبنات..

ريمة: وج ماما غير تنتبهين شسالفتج تعاي تعاي اشوف رجلج ..

رزان:البنات يمي يكولن ...

هدى: ولج شلون نجرحتي ...

ريمة: ولج الدم مدايوكف بساع خابرن ابوجن خلي يجي يوديها يخيط رجلها ...

رزان: لاعليج الله ماما ولله مبيها شي وضليت اجيب الكطن واخلي ع رجلي
اكللها هاج شوفي وكف الدم ...

ريمة: ماما ولله يخدروج متحسين ب الخياط بس صيري سباعية مينرادلها شي ..

رزان: اكلج الدم وكف ماكو هاج شوفي حتى الجرح صغير ...

هبة: ماما وين تليفونج نطيني اخابر بابا ..

رزان :اصيح عليهن اكلهن لا وهنَ ولايمهن

هبة :اخذت التليفون وخابرت بابا بساع وكال جاي ...

نص ساعة ووجه رزان صار ليمونة ...

امي تسويلها عصرتلها ليمونة وبرتقالة بساع وتشرب بيها وهي متقبل خايفة من الخياط ...

دخل بابا بساع وصعد اول ماشاف الدم كال ..
بساع تعالي خلنروح للمستشفى ...

ضليت ابجي عاط بية ..

محمد :اكلج امشششييي ماتشوفين رجلج ...

صعدنا بسيارة بساع وللمستشفى ..

اني ابجي وهمَ فوك راسي يلا وماكو شي وعادي ...

بساع خيطولي رجلي واني ماحسيت بس ب وجع الابرة مال تخدير !!

كتلها ماما متوجع ولله

ريمة: مو كتلج بس ماتسمعين الكلام ..

اريد اجاوب واشوف قسورة دخل ...!!

درت وجهي بساع فد كارهتة وهسة هو شجابة بكل عزة لطامة شنوو ..

ورا نص ساعة نطوني فيتامينات وطلعنا للبيت ..

اول ماوصلنا صعدوني فوك رجلي احس هسه يلا بين الوجع تحركني حرك ...

بعد لغوة وقال وقيل والبنات تعاركن ويا نور شلون تدفعني وهي تصيح ..

نور :يابة شو دروحن هي غبية واعتذرتلها واني اصلا مالي علاقة وتغلط علية ؟فوكاها ...

رزان :كلتلهن يعوفنها ميفيد الحجي وياها ...

نرجس :ولج جا شنو الحل ...

رزان: اني عندي الحل .. امشن وراي ..

سندتني هدى ونزلت بالكوة ...
وصلت للهول كاعدين ..

رجاء وفاطمة وجعفر وعمي صادق متمدد بجربايتة تعبان حيل ...

وقسورة وماما وبابا ديشربون جاي ..

كلتلهم ...

رزان: بابا ..

محمد :لج بابا ليش كمتي صدك ثولة انتي ...

ريمة :محممدد على كيفك وياها ..
ماما اثبتي لتتحركين هواية موزين ..

وقسورة يشرب جاي وكاعد يكلب بالتليفون يسرق نضرات شوية ويرجع يكلب بالتليفون ولاهامة...

كلتلهم ...

رزان : بابا خلي نرجع ...

يتبع ....!

لتنسون اللايك 🖤 .