طريقنا صعب

البارت ١

السلام عليكم انا اسمي جنات.وهاي روايتي الاولى🖤.

مشهد ..
بغداد .. الساعة ١ ظهراً...

رزان : واكفة اتعلم أكلات جديدة مادام عطلة اخير السنة وفرحانة حيل خلصت من الرابع علمي ورايحة للخامس ...
داأسويلهم دجاج مشوي وامي سوت المقلوبة والزلايط وهلسوالف ..
مندمجة وكل مااتذكر عطلت واخيرا وبعد مااقرا منا لفترة طويلة افرح اكثر لان لعبت نفسي من المدرسة وكاعد اغني واسوي التتبيلة مال الدجاجة واسمع...

امي تصيح بكلمة وابوي يردها بعشرة ..!
عفت الاكل وركضت لكيت ..

ريمة : محمد كلتلك مااروح لبيت اهلك شنو تغشم نفسك تعرف بيهم يكرهوني ومايطيقوني اصلا

محمد: ريمة حجي زايد لتحجين كلتلج اخوي مريض وحال الضيم حالة تردين يحجون علية ويكولون اخو يريد يموت وهو ماكلف نفسة واجة شافة ؟ تحملي مانضل كم يوم ببيت اهلي ونجي شدعوة عليج

ريمة :  اكلك محمد دائما تكلي هيج من نريد نروح وتقنعني ومن نروح اشبع قهر منهن وانت متفك حلكك بحجاية وتصير مشاكل يابو مشاكل ..ياعيني اعرف الي راح يصير ..روح بحدك شيصير يعني ؟

محمد : مع الاسف عليج هاي بمكان متوكفين وياي وتكوليلي ميخالف هنَ كم يوم اتحملهن علمودك واخوي صادق تعرفينة خوش رجال ويحترمج ويحبج ماترحين علمودة ؟

ريمة : هاي شبيك اعرف صادق خوش رجال وابو وكفات زينة بس اعرف اذا اروح امك ماراح تسكت هي وبناتها ونوب تريدني اجيب بنياتي وياي ؟ لاهاي هي علمود تصير المشاكل بفلس هناك ..

محمد : خلص خلص هاي هي لاتحجين فهمتج لاتجين لاانتي ولابناتج انعم الله عليج اروح بحدي واجي

.............................
رزان : اني وهبة واكفين بباب الغرفة وبس صافنين ابوية مبين حيل زعل من امي

هبة : هسه شدعواها امي جان قبلت هنَ كم يوم نروح لبيت جدي ونرجع خلي تتحمل شوية حجيهن وتصرفاتهن وخلصت فضت السالفه ..

رزان : هبة الحجي المتعرفينة لتحجين بي انتي تعرفين شي وامي تعرف شي ثاني امي متسوي هاي المشكلة كلها بدون سبب أكيد اكو سالفة وراها لان تعرفين امي صاحبة واجب وتروح للقريب وللبعيد شمعنى متروح لبيت زوجها ؟اكيد اكو شي

هبة : يمعودة يااكو شي كلشي ماكو هسه تلكينها مشاكل هي وبيبيتي مشاكل عادية بين العمة والجنة بس يمكن امي مكبرتها

رزان :انتي شبيج عبالك تردين تتعاركين ويا ماما شجاج ؟

هبة : عليمن اتعارك بس رزان ماشفتي ابوية شلون نهضم خطية من حجيها مهما يكون هذولي هم اهلة

رزان : اكلج ولله دوختيني ماعرف شكلج ياختي احنة مانعرف السالفه ليش نحجي حجي من يمنة يمكن ابوي صح ويمكن امي صح مندري بعد نجبي وعوفي السالفة معلينة همَ يحلوها بينهم ...

كعدنا ع السفرة بعد ماكملنا طبخ الاكل وشويت الدجاجة وامي سوت المقلوبة واختي المقبلات والعصاير وصبيت الاكل وكعدنا ...

رزان : ولج هباوي ونبي خطية ابوية ح اقنع امي علمود نروح ويا ابوية ..

هبة :اي عفية لعد مفكرتي ..شي اكيد ضايج هو لان هسه كل واحد من اخوانة ومرتة ويا ورايحين ل اخوهم بس ابوية رايح بحدة شي اكيد هسه الحجي يصير بفلس وليش ماجتي مرتك وليش ماعرف شنو ف هو حقة عيب يعني ..

رزان : ديلا يلا لتتفلسفين زايد ح احاجي ماما ورا منخلص غدا ..

البصرة الساعة ١ ظهراً ..

رجاء : هههه شنو لامحمد لامرتة يجون ؟ مايردون يشوفون اخيهم هلواكع بالفراش مايسألون ؟بس طبعا وين يجي محمد غير غيرتة مرتة هاي الفكر  ضل لايسأل لايخابر بالسنة حسنة ها يمة شلونج طاح حظك اي ولله ...

جعفر : يمة هسه ليش هلحجي مو خابرنة محمد وكال جاي عكبة بعد شتردين لو الا تسوين مشاكل هسه مو وكتها اخوي حال الضيم حالة وانتي كاعدة تبحوشين مرتة شسوتة ومرتة شكالت شبيها مرتة فقيرة وحبابة انتي مارايدتها شيسويلج بعد الولد

رجاء : تعال يمة اخذلك بعد راشدي ولله خوش شني ساحرتكم هاي ريمة الفكر بعد بس باقي تهدون علية شمالكم

صادق : يمة فدوة روحلج بلا مشاكل اخوي صار فترة جبيرة ماشايفة عكبة جاي ابوس راسج لاتسويلي مشاكل خلي نشوفة ويروح مو زين راح يجي صار كومة مشايفي من سوالفجن اذكرج لو متذكرة ؟

ايمان : خوية لاتذكرنة ولا شي شسوينة احنة قابل شو امي ساكتتلك عليمن يمة ؟

رجاء :لايمة ماساكتة بس ..

ايمان : لابس ولاهاي هاي العكربة الفكرية اخذتلها دكتور وكعدتة ببغداد بعيد عن اهلة وناس وحبايبة شتريد نسويلهم لااحنة راضين ولا امي راضية ..

فاطمة :ولله يختي حجيج ذهب اصلا قليل الي سويناه بعد الصار كلة واخذتة الادبسز ولاهمها كاتلة روحها كتل علي .. طبعا جا غير دكتور ..

مرتضى :فطيم تسكتين لااكوملج هسه انتي كل كلمة حجتها ايمان وكلتي حجيج ذهب وضليتي تجرشين حجي ماصخ اسكتي ومن هسه اكللجن اذا سويتن مشاكل من يجون ولله ثم والله لأسويلي سواية لاصايرة ولادايرة فهمتن .

  رزان :كملنا اكل وهبة غسلت المواعين اليوم الدور عليهة همزين فتكيت اني شكد اضوج من الشغل سوينا جاي مهيل وخليت كيك وحبشكلات ل ماما علمود نقنعها لان صدك بابا قهرني واذا مرحنا ويا راح يتعاركون ويا امي وهمَ واحدهم راسة يابس اكثر من الثاني ...

هبة : ولج شبيج عوبة كافي كيك منو ياكلة هذا مو هستونة اكلنة تغدينا ...جاي كافي ..

رزان :لج اسُكتي شبيج هسه بس منظر علمود اللواكة تضبط عدل

هبة :بعد انتي اعرف بهسوالف ..

رزان: تسكتين احسنلج غير نصالحهم شبيج !

هبة : ديلا يلا ميخالف امشي ...

رزان :دخلنا للاستقبال لكيت بابا كاعد يكلب ب تليفونة وماما بالغرفة لان ميتحاجون

هبة : راح اروح اصيح ماما روحي كعدي انتي يم بابا يلا

رزان :اوكي

هبة : ماما تعالي شوي للاستقبال

ريمة :هباوي راسي مصدع وولابية حيل لغوتجن اصعدن فوك وكافي لغوة عفية بنياتي يلا

هبة :ماما شبيج  عليج الله ولله موضوع مهمُ مدااشاقة حبابة يلا يلا بداعتي

ريمة :خلصيني يلا وصبيلي جاي واحجن موضوعجن علمود اروح انطمر

هبة :لتكولين هيج ويلا يلا صبينة الجاي تعاي شربي هناك

رزان :اجتي ماما ودخلت ولكت بابا رادت تطلع وهبة لازمتها من ايدها .. اني باوعتلها بنضرة توسل علمود متروح وتجي تكعد يمنا ..

هبة :عليج الله ماما

ريمة :امري لله اشوف شيطلع من وراجن الله اليستر

هبة : ولله ماكو شي بس يلا يلا روحي كعدي نريد نفتهم منكم شديصير ...

رزان :بابا حبيبي هاك الجاي ...

محمد : تسلم ايدج حبيبتي ..

هبة : رزان احجي شبيج

رزان : لابالله انتي احجي ...

محمد : شبيجن تتبسبسن احجن شكو وفضناها راسي يوجعني اريد انام ..

رزان : لابابا عفية احنة صرنا كبار عمري ح يصير ١٧ وانت ولاتقبل تحجي النا شنو صاير ليش بيبي واخواتها متحب امي شسوتلهن ماما حتى يكرهنها

ريمة : هلسوالف بطلنها ومالجن دخل ماما ..

هبة :لاالنا شلون ماالنا كل مينجاب طاري بيت جدي انتي ضجتي وتعاركتي ويا ابوية واحنا اطرش بالزفة كلشي منعرف ميصير هيج ترا كبرنا وانتو مُصرين متحجون النا ..

محمد :بابا لاتخلوني اضوج منكم معليكم هي سالفة قديمة والماضي مات خلص ف ماكو داعي نحجي بي بس هي امكم الله يسلمها مكبرة السالفة ليش ؟ ماادري

ريمة :محمد لاتخبلني شنو ليش متدري ع اساس مجنت وياية بهذيج الايام مو ؟

محمد :ماقصدي هيج ريمة تعرفين المقصود انو تكدرين متهتمين وخلص لو الا تكبرين المشكلة ؟

ريمة :لالا انت شي اكيد دتشاقة محمد شبسرعة نسيت هذيج الايام شسالفتك انت ؟

تدري شنو تعالن ولجن هبة رزان كعدن كبالي احجيلجن ليش اكو مشاكل بيناتنة اني واهل ابوج الله يسلمهم وبالذات امة واخواتة

رزان :كيفنة احنة لان بس نريد نعرف شصاير صار سنين كل منفتح هلموضوع يسدوه وميقبلون يحجون ..

هبة :اي ماما دنسمع احجي ..

محمد : لاماكو داعي لتحجين ولا هاي لاتكرهيهن ب بيبيتهن من هسه

ريمة : لاولله الا اكللهن خلص هنَ هم حقهن يدرن شسون عمتي وبناتها بينة ..

باعن ماما ...

بيبيتج جانت حاجزة بنت اختها ل ابوج .. ابوج بالبداية مجان عندة اعتراض لان هو جان عمرة ٢٩ سنة وبعدة ممتزوج ف كال ل امة اني قابل وروحوا اخطبوها للبنية وامة وخواتة راحن وخطبنها للبنية بس بعدين ابوج شافني بحفلة زواج صديقة والعروس صديقتي ف تشاوفنة وهو نعجب بية كُلش واني هم بس اني ولله ماجنت ادري هو خاطب المهم خلاصة الموضوع حبيتة وحبني وهو بلاخير كلي ترا اني خاطب اني من عرفت عفتة ولو اني جنت احبة من صدك بس عبالي جان يضحك علية ف عفتة ومارفلي جفن ولاهتميت بس فاجئني من كلي انو فصخت الخطوبة واريد اتزوجج

وكومة صارت مشاكل شلون تاخذ معلمة وهمَ مو من مستوانة وهمات فوكاها انو عاف البنية علمودي وهم عبالهم اني اركض ورا الفلوس لان يمكن متعرفن انو اهل ابوج حلالهم خير من الله ف هواي اسباب خلنهم يكرهوني بس مع ذلك اني كلت مدام عافها علمودي راح ابقى ويا

رزان : بس ماما خطية يعني شنو ذنبها البنية

ريمة :ماما اني ماكلت ل ابوج روح افصخ الخطوبة ولاادري اصلا هو خاطب ماجابلي هذا الموضوع ابد شنو ذنبي اني ؟ شكد حاولت ردت ارجعة الها واكلة حرام يابن الناس هسه العالم شتكول ليش طلكها اكيد بيها شي بس هو ماكو يكلي هذا اختيار امي واني رايدج الج ومن هلحجي و ٤ اشهر احنة ع هلحالة لحد ماقنع اخوتة واهلة بس امة مراضية لاهي ولابناتها

اجن خطبني غصبا عليهن لارايدات هاي الزواجة ولا شي بس محمد سوا المستحيل علمود نصير سوة حتى كال اهج من البيت وماتشوفوني بعد وهو جبيرهم ف ميكدرون يرفضوو الة قرار

ومن تزوجنة مايمر يوم ماتصير مشكلة وجانت امة حتى ضرب تضربني وخاصة اخواتة يكرهني اكثر من كره امهن الي وشكد حاولت وياهن بالعيني واغاتي واخدم بيهن وهن ولاعبالك كل يوم  معاملتهن الي تسوء شفت الويل منهن

ومحمد يومية صايرة مشكلة ويا امة واخواتة حتى مشاكل صارت تصير بينة واحنة بعدنا عرسان

وصلت بيهن انو يرحن ل اهلي ويكولن  ل خوتي اخذوها منريدها واخوتي طبعا ميسكتون ع هيج كلام كلهم اجو حتى ابوية للبصرة واصروا ميطلعون الا واني وياهم..

ومحمد متخبل شلون امة واخواتة هيج يتصرفن

علما وصلوا الحل اخوتي  وكلولة لو تطلع ببيت وتكعدها يمنا ببغداد لو ماكو انساها

بعد جر وعر وشهرين لاليلنة ليل ولانهارنة نهار صارت مشاكل وحجي وحتى تندمت انو تزوجت كلساع واكول بعدني مصايرة سنة ع زواجي واني هيج يصير بية ليش ؟

وراها ابوجن قرر ناخذ بيت بغداد ونكعد هناك وبدأ يبني تقريبا يم بيت اهلي وضلينة كم شهر احنة بالبصرة شابعين ضيم خاصة اني اكوم برزالة واكعد برزالة واسمع انواااع الغلط والفشار مرات انضرب واجي اكول ل محمد ومحمد يكلي تحملي تحملي مابقى شي ونشيل

رزان : ماما معقولة ماحاولتي تكعدين يمهن وتوضحيلهن السالفه انو انتي لارايدة الفلوس ولاشي بس انتو حبيتوا بعض

ريمة :هههه ولج ماما كل يوم احاول ابدي صفحة جديدة وياهن وهنَ ابد بعدني ماادخل لغرفة عمتي او اخواتة يطردني حتى ميخلني احجي ومرات اذا صارت فرصة واحجي الي بكلبي يستهزءن وولايهمهن كلامي ابد ميفيد وياهن المهم ماما

بلاخير اجينة وكعدنا بهذا البيت واني جنت حامل بهباوي بس وين بعد طلاع الروح ومحمد كال ابد بعد مااوصل لذاك البيت لان صدك شفنة المر ياما وياما حاجاهم ويحاجي امة واخواتة

هبة : عمامي هم يكرهوج ماما ؟

ريمة :لا عمج مرتضى وعمج صادق كُلش خوش ناس وولدهم هم حبابين وماسمعت منهم الا الزين وجانوا دائما يدافعولي وواكفين ويانا بس شيفيد اذا هي الام مراضية

وجان ابوج يحاجي امة وخواتة ويجيب اخوانة هم وناس في سبيل تقتنع شوي بس هي ابد قافلة شلون بنت اختها عافها ابوجن ؟ وهم عبالها اني على الفلوس جاية متتقبل غير هلكلام  هذا الي ببالها هي  وبناتها وهذاك يوم وهذا يوم بالسنة حسنة يتشاوفون بس دائما يتخابرون ويسألون ع بعض ...

وانت يامحمد معقولة نسيت شنو من اوقات عشنا بيها وتكول مكبرة الموضوع ؟ رحم الله والديك اني صرت هسه ابالغ واكبر المشكلة ؟ 

رزان : هبة ولج شو احنة نريدهم يتصالحون شو صارت بالعكس اسوء

هبة :لج شمدريني اني شنسوي هسه

رزان :صبري صبري ..

باباتي حبيبي ..

محمد :بابا الله يخليج راسي مصدع وبس اريد انام وماافكر بأي شي لاتفتحين اي موضوع

رزان :جلبت بي ولله متروح بس اكعد شوي احجي ولله حباب حباب بداعتي ..

محمد :خلصيني احجي

رزان : بابا ولله اسمع مني هسه بس روح احجيلك كلمتين بهدوء ويا ماما هم تصالحها ومتصير بينكم مشاكل وهم نروح وياك كلنة وتنحل السالفة ها شتكول بس انتي احجي بهدوء وكلشي ينحل ولله ...

محمد: لابالله ست رزان شنو هل بساطة ب الكلام ع اساس حليتيها هسه بنتي عوفيني خلي افكر عفية ... لتلحين علية

هبة : بابا ولله العظيم حجي رزان صح انت اذا حجيت بهدوء ويا ماما وعلى كيفك وياها بدون صياح وعياط وعناد تقبل ولله وانت بعد من هذا كلامك الحلو ..علمودي ولخاطري واذا تحبيني وهسوالف بابا شبيييك اعلمك بعد تريد شنو ...

محمد: ولجن شبيجن انتن متعرفن عناد امجن شلونة متعرفن راسها شكد يابس ؟ بس هم حقها انت متعرفن الي جان يصير وياها قبل

رزان : هبة كومي شكلة ابوج مناوي يحاجي امي ابد امشي نجيب امي ونقفل عليهم الباب ويحجون هم ..

هبة : تخبلتي انتي مو ؟ سوالف المزعطة عوفيها بنتي هسه يقتنع ويكوم يحاجيها

رزان :ولج ماكو داك رجل ميكوم من مكانة متشوفيه ؟

محمد : ترا وداعة عيونجن داسمع الي تحجنة صوتجن عالي ههه خوش باباتي راح اكوم احاجيها بس ولله وداعة ابوي اذا ماقبلت وضلت ع حجيها ومقتنعت بعد لساني ميطخ لسانها

هبة :لالابابا معليك معليك تقتنع تقتنع انت بس سوي الكتلك علي واحجي برومانسية وهيج حباب وهي تقبل

رزان :اي ولله بابا عفية عفية يلا يلا بالتفاهم ينحل كُلشي

محمد :ايباااه ولله وكت امشي بكلام المزعطة وانتي ولج هبة شنو برومانسية احجي عدل ولج

هبة :بابا شنو تكول مزعطة مو كبرنا على هذ الحجي  ولله .. اي اي ميخالف واذا يعني

رزان :هسه تكوم لو لا لاتغلس بابا

محمد :كمت يابة كمت شيخلصني منجن يربي

........... ............. ............
رزان : كاعدين انا وهبة بس ندعي علمود يتصالحون لان ماما وبابا بالسنة حسنة يتعاركون واذا تعاركوا يطولون لان عنيدين كُلش محد يتنازل .. زين وهسه اقتنع بابا بكلامنة

هبة :ها شتكولين يتصالحون ...

رزان :ايي ايي ان شاء الله ..

كاعدين ونفتح الباب وطلع بابا

محمد : لموا غراضكم طالعين عكبة لبيت اهلي نضل ٥ ايام اسبوع هيج شي ونجي ..

هبة + رزان :ضلينا نكمز ورحنا حضنا بابا

محمد :مو اكللجن زعاطيط تزعلن  ...

بس باعن من هسه مشاكل مااريد احنة خطار لاتسولي مشاكل ويا بناتهم او ويا امي واخواتي مابية حيل والله فوك ما امي شادة ويا امجن لاتجن انتن هم ويا بناتهن وولدهن خوش ؟

هبة + رزان :اي اي ولله بابا اصلا احنة منريد نروح بس غير علمودك ولله

محمد :عفية ببنياتي يلا روحن حضرن ملابسجن ...

.........  .......... ...........
رزان : دخلنا اني وهبة لغرفتنا صحيح لحينا بالموضوع بس هذا كلة علمود يتصالحون بابا وماما وبابا مينقهر اكثر ويتفشل كدام اهلة بس احنة منريد نروح مانحب الجنوب كلُشششش .

هبة : لج يلا ميخالف مراح نطول هنَ كم يوم ونجي راح تنكلب الدنيا قابل ؟

رزان :اي اي صح معلينا بيهم مثل مكال بابا ومنتدخل علمود متصير مشاكل ...

هبة :اي عفية ... يلا كملي اخذي كم لبسة مو هواية مرايحين للابد يمعودة ...

***** ..*****..*****..*****..*****..
رزان : ثاني يوم طلعنا للبصرة لبيت جدو من الصبح بالسيارة وبابا يسوق ..

صحيح ماما قبلت وتصالحوا هي وبابا بس شي اكيد خايفة وضايجة شوي من الي راح تشوفة او تسمعة منهن اكيد ح تصير مشكلة حتى لو هي متريد ..

وصلنا لبيت جدو بعد ساعات من تعب الطريق

واوصل ماوصلنا
شفت ...

يتبع .....!

لتنسون اللايك 🖤.