هشاشة قلب

١٣

هشاشة قلب
الـبـارت_13_
للكاتبه عبرات_العباديه

- أحـدهـم أراد أنْ يـقـتل مـابداخلي
فـ قتـل حـبه ..

~~~~~~~~~~~~~~~~~~~~~

ثُرىٰ

كعدنا بالكافتيريا اني وفاطمه صديقتي الجديده

شفت نرجس بإيدهه موبايلهه ومتوجهه علينه.
اني درت وجهي وغلست عليهه..

وصلت يم طاولتنه انطتني الموبايل مالتهه.
رفعت راسي عليهه كتلهه :-

- شكو؟؟

اشرتلي ع الموبايل وكالتلي :-

- شوفي

اخذت الموبايل وشفت .. اول ماشفته توسعت عيوني مصدومه !!!!!

أنصدمت صدمة حياتي !!!

منشور مكتوب بيه ( نبارك للأخ ماهر الـ... بمناسبه عقد قرآنه !!) ومسوين إشاره لإستاذ ماهر وصورته هوَ والدكاتره سويه !!

شفتي رعشت وحيلي باد..
بلعت ريقي بصعوبه والعبره خنگتني..
ماتحملت قساوة المنشور رأساً إنحدرت دمعه حاره على خدي ووكعت ع الموبايل !

الغصه صارت بوسط صدري ومااگدر احچي !

إيدي گامت ترجف..
ظليت ارمش بعيوني مصدومه..
شفتي ترتعش.. اريد اصدك الشفته مااگدر .

طلعت من الكافتيريا رأساً اريد اشتم هوىٰ احس النفس ضاق عليه ومااگدر اتنفس.

مباشرةً طلعت من الكليه لبيت أهلي مااتحمل ابقى ثانيه بالكليه .

وصلت للبيت بدون مااشوف احد رحت للغرفه طلعت موبايلي اريد اصدك الشفته واريد اشوف شوكت سواهه وإنطاه گلبه !!

ركضت فتحت الموبايل ورأساً لصفحته ودخلت ع المنشور أمس الساعه بـ3 مشايته !!

يعني وره ماراسلته بنص ساعه !!

شمرت الموبايل وظليت اشهگ وابچي .

دخلت مروه تفاجئت بوجودي..
تهز بيه وتستجوبني تريد احجي..
بس اني مااكدر اريد اصرخ واريد ابجي براحتي .

هيَ لوحدهه سحبت الموبايل وفتحته شافت المنشور .. صفنت عليه وجرت حسره .

كالت :-

- چا شگلنه؟؟ تعاليتي وانكسرت رقبتج .. اكيد اخذ من مستواه وعلى مرام إمه وإختياره

عطت بيهه

- مررررروووه البيه يكفيني گلبي يريد يوگف وعيوني مغوشه كلمه زايده تلكيني بالنجف اطلعي احسللج.

هزت إيدهه وطلعت.. بقيت اشهگ وابجي ليش سوه هيج ونظراته؟؟وغيرته؟؟وخزراته؟؟

تمددت واني بملابسي ذبيت الشال حسيته يخنگني .. تمددت بفراشي وطفيت الاضويه وظليت ابجي واغفي .. مااعرف شكد مر وقت

دخلت مروه جايبتلي غده رفضته وماإلي شهيه لأي شي. كعدت مكرفصه ومروه مقابيلي تواسي بيه..

موبايلي ع الميز الصغير .. لحظات ورن صوت المسج مال الماسنجر بإذني.. ماعندي شخص اراسله غيره بالماسنجر كله.

اول ماسمعت الصوت صبت دمعتي وظليت اشهگ..

مروه رادت تشوفه عطت

- عوففييييي

بهالأثناء دخلت تقوى باوعتلي وباوعت لمروه والصدمه تعتلي ملامحهه..اشرت لمروه من شافت حالتي

- شكو؟؟ شبيهه ثريا؟؟

مروه.. الأفندي خطب

شهكت ولطمت على صدرهه

- عززززاااا

مروه نترت بيهه بعصبيه مفرطه :-

مروه.. شكو هوَ شنو عزه رجال عزابي وخطب عليش العزه؟؟ منطيهه وعد؟؟ منطيهه كلمه؟؟ اختج من وحدهه تحلم وهاي نتيجة احلامهه

تقوى.. مررروووه لاتحجين هيج

حجيت والعبره ببلعومي وكوه ينسمع صوتي

- حقجن ماشايفات نظراته ماشايفات إهتمامه.. كل القاعه صار إسمهه "ثُرىٰ" يلهج بأسمي ليل ونهار حتى مرات احسه يرزلني حجه علمود يحجي وياي هاي غير غيرته من الاساتذه ومن احجي وي استاذ احمد يتخبل. غير خزراته وغير عيونه الفاضحته شأريد احجي؟؟.. يتأملني مثل القطعه الثمينه ويخاف عليهه تتخدش....
مرات احسه منتظرني اجي اصرحله واني طبعاً هم چنت منتظرته بس الاثنين خسرنه من تقدم هالخطوه.. صح مامنطيني أمل بس نظراته من يحجي وياي جانت أملي وفرحتي وتخيلاتي كلهه عليهه.

حبيته وتعلقت بيه وخصوصاً شخصيته تنحب بسرعه وهوَ هم ماقصر بأهتماماته علقني بيه وهسه خطب !!

احبه ياربي شلون بيه راح اموت احس بلوكه وگعدت على گلبي اني شجابني شورطني؟

مروه.. خل يولي لو صدك يحبج اجه وخطبج

- سبق وگاللي مااخطب طالبه عندي ومو من الكادر التدريسي هم

مروه.. يعني مخليج تأيسين بس انتِ لاطشه

تقوى.. مروه شبيج يختي؟؟ اسكتي افضل وانتِ كومي تغدي وخل يولي مايسوى دمعه من عيونج الحلوات كلهه تتمناج وهوَ الخسران ماكو بنيه بفطارتج بهالوقت.

..

يگلها : آعـذريني قسيـت وياج

يلـما مثلـج بنـيه حبتني

.
.
.

ماإلي شهيه لشي ومااريد اشوف احد.. إتصل موبايلي گعدت على حيلي شفت إسمه !

سحبت نفس وإنطيته رفض .

دخلت لرسالته ع الماسنجر لكيته كاتب بيهه

- ثُرىٰ أگدر اجيكم؟ جايب الكتاب وياي إذا تكدرين اطلعيلي

من شفت رسالته عبالك ذكرني ظليت ابجي وأناشغ .. ظل يتصل والموبايل بإيدي لزمته وشمرته بالحايط يلا سكت وهديت .

لحظات وإندگ الباب مال بيتنه.. سديت إذاني وتمددت .. امي ماشفتهه ماادري شگايلات البنات..

دخلت مروه وبإيدهه كتاب انطتنياه

- هذا الكتاب منه انتِ موصيته عليه.

- جيبي

وكفت واني مقرره احرگ الكتاب وماهر وياه

اخذت الكتاب واريد اطلع

مروه.. ولج مخبله وين موليه

دفعتهه وهيَ مچلبه بيه

مروه..ولج ثريا امي ماتدري بيج كلنالهه مريضه اذا تشوف عيونج تشك تعالي لاتفضحينه مساع رادت تدخللج وگوه لزمناهه ثررريااااا

- وخري خل احرگه وخررري

دخلت تقوى وأثنينهن كعدني وسحبن الكتاب من إيدي

تقوى.. كااااافي تخبلتي شبببيييججج انطمري واسكتي مامتوازيه تسوين هيج اذا تريدين طلعي من كلبج الكتاب شعليه؟

- مااريد شي يذكرني بيه

- باجر تلگيه كدامج بالكليه وعود هم سوي هيج امداج يالغمه

مروه.. عمت عينج اذا يشوفج هيج يحس بلذة الانتصار خليج قويه

- اي مو عندي معركه ويحس بالأنتصار

- ولج كومي رتبي شكلج بينيله مايهمج شي ولا معلقه حياتج عليه

- اي بس خل اشبع بجي أريح گلبي الي انسرق

- اشبعي خيه اشبعي

تقوى.. هسه وين نلگه البوليس تلزم ماهر ويرجعولج گلبج

ضحكن بس اني ماضحكت عود يريدن يغيرن عليه جو بس اني وين كلما اتذكر المنشور اشبع بچي..

بجيت بجيت بجيت لما أيست وطحت صفح.. تالي كمت مسحت عيوني وخليت باودر وكحله اخفي آثار الدموع

طلعت سلمت على أهلي حتى مشتاقتلهم كله من وره القاسي صار نص يوم ماشايفتهم.

صليت وكمت ساعدت بالعشا وتعشينه وسوالف أسماعيل كالعاده تشبع ضحك واني كلما احاول اضحك ارجع اتذكر الصار وانتكس.

ثاني يوم داومت لبست أرقى لبسه عندي وخليت كحله ومورد خدود شويه..

دخلت للكليه وتوجهت لقاعتي لگيت القاعه محد بيهه يلا همزين خل اگعد.

گعدت وظليت اراجع.

شويه وحسيت شخص دخل للقاعه رفعت راسي ومتأكده ميه بالميه هوَ.. لان دائماً يجي من وكت .

مثل ماتوقعت دخل ..كال"صباح الخير" واني رديت عادي ماخليت شي يبين عليه.

خله الجنطه مالته ع المكتب وظل يطلع أوراق ويسفط.. رفع راسه باوعلي صافن اني مدنگه واسوي نفسي مااشوفه .. سحب نفس راد يحجي ماتحملت ابقى رأساً خليت وگمت هوَ باوعلي بنظرات متحسره تنهد ودنگ ..

طلعت بره ع السريع إفتريت واني گوه مصبره روحي.

صار وقت المحاضره...دخلنه وجانت اول محاضره إله.

گعدت بالرحله واليوم البنيه صاحبة الرحله مامداومه يعني بس اني بالرحله.. شرح المحاضره وگال انقلوهه.. ظل يفتر بس هالمره مايضرب بالقلم.. هالمره يضرب بالحلقه !!

كلما يمر من يم ستيج يضرب بالحلقه !! وگف يم الستيج مالتي ضرب بالحلقه صوتهه رن بإذني وغرس قامه بگلبي..

ظليت مدنگه ابين مامهتمه وحتى بشكله ماباوعت..

حسيته صافن عليه...
ظل واگف يمي...
من شافني مامهتمه..
تنهد بغضب وعگد حاجبه..
راح وگف يم الميز مالته....

گال :-

- طلعولي صفحه 10 .

اني ملزمتي كامله بس الطلاب كل فصل وحده يعني صفحه 10 من الفصل الثاني ماادري ياصفحه بلمزمتي .

هوَ متقصد هيج يسوي كل مره يگول إسم الموضوع وإحنه نطلعه سواءً بالملزمه الصغيره او الچبيره..

إنداريت ع البنيه الوراي وگتلهه على إسم الموضوع وهوَ ماصدگ رأساً نتر :-

- ثُررررىٰ إندااارري

- إستاذ بس اخذ إسم الموضوع

- اني گلت الصفحه وانتِ طلعيهه

- ملزمتي قديمه

- مشكلتج شوفيلج صرفه مو تظلين كلساع ملتفته.. هذا الحجي مايمشي وياي بحجة الملزمه كلساع ملتفته !

دنگت راسي..
ادري بيه يريد حجه عليه..
البنيه الوراي رأساً همست :-

- الصفحه 68 عندج

حيل على عناده..
طلعتهه وظليت أأشر بالمحاضره .

كملت تأشير..
رفعت إيدي مخنوگه گتله :-

- أستاذ أگدر اطلع؟؟

نتر بعصبيه ومخنزر بوجهي :-

- لا خل انطيكم تحضير واطلعي

هزيت راسي وسكتت..

إنطانه التحضير وكملنه..
اني اريد اطلع احس نفسي مختنكه..
كلما اباوع بحلقته نفسي ينكطع..
خل اطلع وارتاح لان بس ابقى لحظه اموت..

بنيه كالتله "اريد اطلع" غير فشلهه فشله من هاي التمام .. شكد حقير ونذل عود إذا كلتي اطلع اسوي بيج مثلهه..

خليت وسكتت إلمن احچي بعد عايزه فشله لو رزاله.

ظل يفتر بالقاعه منتظر وقت المحاضره يخلص يلا يطلع.

تعب الظاهر .. تعال وتكركح يمي !!

گعد على رحلتي .. جسمه على الخشبه العريضه ورجليه صارن ع الخشبه الصغيره.

مسافة سانتيمات وتطخ إيدي بإيده !

طلع إيده البيهه الحلقه وحطهه على رجله !

عود شوفي خطبت !!

ظل يلولح بإيده وحاطهه على رجله صايره مقابيل وجهي كلشش..

اني متت من القهر .. رفعت حاجبي بإستهزاء وابتسمت تك خد..
تدنيت ببطئ مستهزأه..ومقوسه حواجبي
انطيته صفحتي نص من ظهري وخليت إيدي على خدي .

هوَ شافني هيج سويت رأساً كام .

وگف وظل يخوزر بيه بعصبيه وضاغط على شفته حيل . وعيونه مجحضه يريدن يطلعن .

كور قبضة إيده وعصر عيونه بقوه وطلع من القاعه كلهه.

عباله يحرگ گلبي مايدري احرگه مايحرگني.
يريد كون يگعد يمي وابجي من اشوف حلقته هه !

كملت محاضرات وطلعنا.. رجعت للبيت ولگيت نهى عدنه كيفت وظلينه نسولف.. تباوعلي بشفقه بس مافتحت الموضوع وياي سوت فضل..

- ولجن وين موبايلي؟

مروه.. شدراني امس رگعتيه بالحايط وين راح ماندري

- ياا امداني كله من وره ابو الرزايل راح الموبايل.

رحت دورت عليه وادعي كون يشتغل.. شغلته مابيه شي بس فطر ومن شغلته اشتغل. كالت نهى هذا الفطر باللزگه مو بالشاشه همزين.

صفنت عليه وتحسرت كالت بقهر :-

نهى.. خوب مامقهوره؟

- يا عليمن اصلاً ماعليه بيه بس اعتب على اختي مااعتب ع الغريب

- انييي؟؟؟

- اي جا ياهو جدي

- شمسويه؟؟

- تدرين بيه راح يخطب وبالجذب ماكلتيلي واني اراسل بيج.

- لج والله ماكدرت اگول خاف تنقهرين

- اول وتالي ادري ع الاقل اسمع منج ولااسمع من الغريب هسه لو اني ادري مااتشمتت نرجس بيه

- ثريا طلعي من بالج كافي

- طلعته بس هوَ يريد يحرگ گلبي.. يتحارش گوه مروّه

- غلسي

- اي اليوم درت وجهي عنه بس شصار بيه يمكن راد يسمطني راشدي ينطبع بخدي لما اموت

- اشو شخصيته ثگيله مو مال تحارش

- شنو قصدج اني اتحارش؟؟

- خايبه لا مو هيج قصدي بس هوَ احترگ گلبه لان تجاهلتي ف بيج وماتتجاهلين

- زين منو خطيبته؟؟

- خليهه مفاجأه إلج لباجر تعرفين خطيبته منو؟

- عليج الله منو؟

- انتظري باجر وتعرفيها اني اكوللج

- مااتحمل

- لا تحملي لباجر

- زين حلوه؟

-والله كلمة الحق تُقال...البنيه تجنن كلش حلوه

- احلى مني؟؟

إبتسمت مجامله

- اي احلى منج

- يححح ولج اني اختج

- واذا اختي اني داكول كلمة الحق

- امم غيرتج الـ(دا) تتبغددين عليه

- ههههه نتأقلم ويه الوضع الجديد

.
.
.

ثاني يوم رحت للكليه وتفاجئت من ابو الرزايل دخل ووياه جنات الحرگت خديداتي !!

صحيح اني سحبت الگدر بس هيَ سحبته متقصده لان اني جنت واكفه يمه رادت تحرگ صفحتي بس تفاجئت من سحبته .. زين بخدودي ولا بكل جسمي..

اجت تتفيك وتعوج بحلگهه ام فچوچ ظليت مصدومه شكو المن جايبهه !!

ظل يشرح وهيَ گاعده على ستيج ويانه منتبهه لشرحه.. اني اتخبل منهه لان احلى مني .

دار وجهه بعدين عرفنه عليهه والله وطلعت دكتوره ام فچوچ.

طلع هوَ وهيَ بقت تشرحلنا اسلوبهه وطريقة معرفتهه بالطلاب وتعوج بحلگهه چنهه بيهه شرجي .

لما طلعت وانصدمنه بساره وكفت وكالت :-

ساره.. بنات تصدكون هاي تصير خطيبة دكتور ماهر !!!

فتحت عيوني على وسعهن مصدومه !!

معقووله !!!!؟

ظليت مصفصفه ومحتاره على ياجهه انقهر !

مو گال مااخذ من الوسط الدراسي نهائياً اشو ماخذ دكتوره ووياه جايبهه !!

يريد يحرگ گلبي اكيد !

ظليت اتحرگن واغلي وهيَ تباوع بيه تتذكرني وع الأغلب غيرانه مني..

خلصت المحاضرات ورجعت للبيت ميته قهر .

سولفت لنهى وكالتلي... هيَ هاي المفاجأه !!

يعني جانت تدري بيهه .. شوفتني صور خطوبتهم واني اتحرگن.. ام فچوچ لابسه بدله لون فستقي وهوَ قاط لون نيلي والكشخه والهيبه تچتل.

نزلت دمعتي ورأساً كمت لان واعده نفسي بعد ذيج الليله ماابجي دمعه عليه.. بس من شفت هيبته ونظرات عيونه تذكرت كلشي..

نهى ماتبقى عدنه جايه تسيوره صغيره وراح تروح ظليت ضايجه طالعه روحي ومنا وليد صاير مايخليهه اكثر من أربع أيام.

للعصر الولد طلعو للشغل ونهى نايمه متناسيه جية وليد نهائياً .

إندگ الباب بس شنو عبالك معزوفه تربد وتكسر .. محد موجود من الولد .. اني طلعت ركض ادري بيه هذا عليوان هيج يدك الباب.

صحت

- وسم وزقنبوت عليوان جايتك اله اكسر راسك

فتحت الباب ورأساً سحبته من أذنه لوره الباب خطيه ظل يضحك

- ولك شكايتلك اني مو ناهيتك من هاي الدگه؟؟

- غير علمودج جايبلج كرزات جاي نوزع لان نجحت هذا الشهر بالرياضيات

- اخيراً نجحت .. يلا هم انعم الله انطيناهن وروح اشتريلي

هذا ابن جيرانه عمره 8 سنين بس وكح حيل .. دوم ألوي بإذاناته لان يدك الباب مثل المعزوفه عبالك ساجده عبيد جاي تغنيله ويندمج..

رحت جبتله فلوس وصيته يشتريلي ورحت كملت شغلي علما يجي..

مستفاده منه بالمشتره دوم يشتريلي من الولد ماموجودين..

دقايق واندگ الباب قوي .. ركضت واني اصيح

- وسم ومرض وزقنبوت هوَ هيج اليدگ شكلت اني عليوووان

اول مافتحت الباب انصدمت بإستاذ ماهر مقابيل وجهي !!!

ظليت مصوفره لااخذ ولاانطي !!

وجهه معصب وعيونه مخنزره عليه.. نتر :-

- هاي كل التفتحيله الباب هيج؟

توسعت عيوني مذهوله وخليت الباب مفتوح وشردت .. ركضت لاامي كلتلهه وطلعتله .. ظليت ميته من الخجل.. شنو هاي الفشله هسه وقتك؟

إجت امي كالت هذا ماهر جاي ياخذ نهى رحت كعدت نهى وهيَ كعدت مفزوعه لان ماتدري

- نهى اكعدي شجاب استااذ ماهر ؟؟

نهى.. شنو شجابه ماادري غير وليد كال بالليل اجيج .

- هذا استاذ ماهر يكول جاي على نهى

طلعت موبايلهه ركض ولكت 15 مكالمه فائته من وليد وبالاخير دازلهه رساله " تحضري راح ادز عمي ماهر يجي ياخذج اني راح اروح للصيدليه"

نهى.. صخام بوجهي بعدني مامحضره روحي

- دكومي كومي هيَ هاي عمله تسويهه تنامين وتعوفيني اتفشل هيج فشله

- ثريا روحي لهيه لان هذا عكره يتخبل من الانتظار

- اي مو لكيتيني ملهي وألهيه

- خب شبيج تطمني على خطيبته

- شلون راح اجيج بالچفچير... هوَ اني ميته من خطيبته تريدين اروح اتطمن عليهه

- دظلي مو اني احجي لمصلحتج

- خل يتحمل مادام دخل ببيتنه يتحملنه مشكلته بعد

امي راحت كعدت يمه واني رحت اتصنت وحاطه إذني يم الباب .

امي هم ماتكعد راحه روحي وإسئليه :-

- اي استاذ ماهر شلونهه ثريا عندك

سمعته تنهد وكاللهه :-

- والله شأگول فد شالعه گلبي بشكل

- يا يا ليش اشو اشوفهه تقره ليل ونهار .

- مو من ناحية الدراسه

- جا منين

- هيَ شالعه گلبي من كل النواحي

- ههههه لازم مطلعه خبالاتهه عليك

- اي والله كلششش

يا يا صخام بويهك مگروده اني شوكت مطلعه خبالاتي وبعدين منيلي خبالات هاي اني العاقله المؤدبه عندي خبالات !!!

نهى ظلت تروكض واني وياهه لميتلهه ملابسهه وطلعت سمعته سلم عليهه وودع امي شويه وسمعت صوت عليوان جايب المشترى. هوَ اخذهن منه وإنطاهن لنهى ..

لا لا مالاتي شو هذا بكيفه يوزع بيهن ايا حقير .

نهى شالتهن وانطتهن لاامي اي همزين هسه يلا تطمنت شويه..

طلعوا واني رحت ظليت اباوع من الزرف لما ابتعدت السياره يلا .

دخلت للبيت وظليت اباوع على المسلسل .

للمغرب دخل إسماعيل وفرحان ووجهه مبتهج.. عرفت عنده شغيله..
تعشينا وگعدنا نسولف وناكل كعك وچاي..
دخلنا للغرفه اني والبنات نكمل سوالفنه
موبايلي بحضني.. اشتغل ضوه الرسائل مال ماسنجر وصوت الاشعار..
دخلت ع الرساله لگيتهه من عنده كاتب بيهه :-

- س.ع. ثُرىٰ صديقتج نرجس شكد درجتهه بنصف السنه؟؟

اني بلحظتهه فتحت الرساله بس غلست مارديت .. اصلاً ردت احظره بس گلت لا هسه يكول احترگ گلبهه ف خليني اشعوطه ع البطيء..

النوب حتى السلام مالته يريد ينقرض الله واكبر حتى بهاي بخيل .

لملمنه البيت ونظفنه واني كلساع اتفقد موبايلي خاف جايتني رساله بس ماكو .

ثاني يوم داومت..
من دخلت لمحاضرته وجهي مايگصه الطبر..
بس يخزر بيه ويزفر انفاس بعصبيه ويأفأف.

تجاهلته وسويت نفسي مااشوف شي..
اليوم هم كال رقم الصفحه..
التفتت ع البنيه الوراي كتلهه ع الرقم..
رأساً اجه يركض ومعصصب صاير نااار.

القلم بإيده لزمه حيل وضرب ع الرحله مالتي بكل قوته بحركات متتاليه واصواتهه عاليه مرجوجه ..
عاط بصوت عالي :-

- آخرررر إنذاااار.. كلمه زايده تعرفون وين مكانكم !!

يمه اختلست عصبي ومايتحاجه ومن رزلني الحرگه مبينه بصوته .

سكتت وظليت كاعده وإيدي على خدي اريد اشوف شلون اطلع رقم الصفحه..
هم حجه واجتني حتى مااقره وادوخ..

إنتبهت لشرحه وفهمت..
إلتفت عليه اني رأساً دنگت ع الرحله وخليت عيوني مثل الصافنه..
هوَ ماشافني من التفت..
باوعلي واني تكول صافنه بآخر عالم بس اني كل كلمه شرحهه مركزه بيهه.

أشر عليه بقلمه ونتر :-

- گوممميي

وگفت مدنگه عيوني اتلافى التقي بنظرات عيونه

گال :-

- عيدي الشرحته كله

اني عبالك لبلبان شرحته كله .. ظل صافن ووجهه مخنزر عباله يفشلني هه !

ظليت ابتسم واني اشعر بلذة الإنتصار اخيراً..

من شافني هيج كال :-

- تعالي بمكاني اشرحي وكأنما اني اشرح

يدري بيه استحي ومااعندي جرأه اقتبس دوره.

- إستاذ هوَ الي شرحته انتَ حجيته

- لا تعالي مكاني

بلعت ريقي بنفاذ صبر ورحت اجر بخطواتي..

وكفت بمكانه وشرحت..
والله وطلعت حلوه الاجواء..
كملت شرح بطلاقه وهوَ ينافخ مامصدك هاي اني.

شمر القلم على الميز بعصبيه ونتر :-

- هاي هيه ارجعي

رجعت لمكاني مكيفه ضغطته ضغطه مضبوطه..

من رجعت للبيت قررت اجاوب رسالته..

كتبتله بس كلمه وحده لااكثر :-

- مااعرف

مو نشط حسابه..

للعصر رد عليه

- بعد وكت !

- اي جنت مشغوله

- بشنو؟؟؟؟؟

ظليت صافنه شو هذا طلع زايد !
رديت عليه وكبسته

- خصوصيات

- اها... زين وليش حضرت جنابج متجاوبين؟؟ شنو تستنكفين تردين عليه؟؟

- لا استاذ محشوم بس اني ماعندي وقت

- ثُرىٰ تره انتِ دتشوفين الرساائل أول بأول ف ماكو داعي لهالاعذار الفاتره

-......(ماكو رد)

رجع رسل

- ثُرىٰ... تره اني حبيتهه وخطبتهه !!!!!!

گلبي دگ وتوترت احسه داس على جرحي وفتح موضوع بحياتي ماجنت متوقعه يفتحه لو يكول هيج !! وعبالك يدري بيه مااجاوب عليه من هالسبب

سويت نفسي ماادري كتله :-

- منيه؟؟

يرد عليه بسرعه..
رأساً رسل..

- جنات !! كلش عجبتني ودخلت ببالي ف حبيتهه وخطبتهه !!

اني استغليت الفرصه ردت استجوبه كتله :-

- هيَ مو بنت خالتك شعجب هسه شفتهه شنو؟

تأخر يلا جاوب كال :-

- لا بس هي كانت مسافره ورجعت من فتره قريبه ف حبيتهه احسهه تلائمني وتليق بشخصيتي وهم دكتوره مثلي !!

كمية التجريح الي بكلامه مو طبيعي !!
احسه يكلي هيَ دكتوره احسن منج !!
عصبت حيل واحس گلبي فوّررررر

كتله :- استاذ اعتقد اني مو شخص مهم بحياتك لحتى تدخلني بخصوصية مشاعرك او خصوصية خطيبتك اني طالبه حالي حال الكل .

حسيته انصدم من جوابي.. مارد على رسالتي..

فتره طويله يلا جاوب كال :-

- تره اني مداحجيلج من ناحية طالبه ودكتور.. لا داحجي لانو انتم صرتوا منه وبينه واقاربنه ومثل مااحب احجي لنهى احب احجيلج لان انتِ وياهه اخوات !!

شكد جذاب شوكت حجه لنهى؟؟ اشو گام يطير فياله عليه !

- المهم استاذ بلا زحمه لتدخلني بخصوصيات اني بغنى عنهه

- تدللين.. اعتذر اذا أبدى مني اي خلل

اخر رساله كالهه وبعد لاكتب ولا راسلني !
بس حسيته يبررلي لو يحرك كلبي؟؟ ماادري دخت دختتتتت..
.
.
.
.

ثاني يوم إسماعيل اجه ووجهه فرحان كال لاامي اريد افتح وياج موضوع..
كعدت امي واني يمهه مفتحه إذاني على الميه وثمانين..
فاتح امي بالموضوع وكاللهه :-

- اني اريد اخطب فدك بنت خالتي

امي تفاجئت ومامتوقعه طلبه لان فدك مدلله مال اهلهه هم يله ينطوهه لااسماعيل.. امي كالتله :-

- يمه شوف تره فدك مدلله وماتسلك عدنه وحتى لو اهلهه قبلو هيَ ماتقبل

جان يجاوب بكل لهفه وعيونه تحجي فرحه چبيره

أسماعيل.. لا لا هيَ موافقه اني حچيت وياهه كيفت وكالت منتظريكم باجر .

- يوم عيد .. باجر نروح نخطبلكياهه وهيَ بنت اختي مو غريبه

فرح كلش وراح اشترالنه ويحشش وينكت واني لفرحته فرحانه..

ثاني يوم العصر بدلنه ارقى شي طبعاً لفضل لنهى بلبسنه.. امي ماتدري عبالهه احنه نشتري من مصروفنا..

رحنه اني وامي وتقوى ومروه ظلت تقره.

وصلنه اسماعيل لبيت خالتي وراح..
استقبلتنه خالتي وضيفتنه فدك.. اجت لابسه الفستان القصير..والشعر مبروم على طوله.. والمكياج مال ممثلات.

ظلينه نسولف اني وياهه واحشش عليهه

- عود مسويه روحج خجلانه تكومي كومي مايليق بيج الخجل ام السمائي

- ههههه عزا لاتذكريني .. كلما يجي شكل إسماعيل ببالي اموت من المستحى .

- غير مصرصره روحج تصرصر.. وطلعتو طابخيهه انتِ وسمعو واني ماخذه اذن الاطرش

- لا اني بيومهه عناد بيه لبست ضيگ لان متعاركين چنه

- هلو هلو واني ولاادري اثاري الخانم تريد تثير غيرته

- هههه لعد شعبالج

ظلت امي وخالتي تسولف واني اندس بيهه لان نست عليمن جايين والتهت بالسوالف..

امي حچت بالموضوع ورحبوا بالفكره وظلينه نسولف لما شويه نريد نطلع ونسمعلك طلق كلش قريب على بيت خالتي .. وصوت عياط يرج رررررج !!!!!

يتبع..