مساء الورد عليكم 🌸 ...
بس حبيت اوضحلكم حتى تكونون بالصوره و تفتهمون نمط النشر الي الاغلبيه مجاي يفهوموها و يتخربط عليهم ،،، اليوم هو ثالث يوم للنشر و باچر رح تصير الاستراحه و عگب باچر رح ارجع انشر و لمده تلث ايام و وراها يوم استراحه و هيچي ...
و رح استمر وياكم بنفس الموعد ساعه ٩ بالليل ما عدا اليوم نشرت من وكت لان صادف عندي شغل ساعه ٩ و ما ترهم انشر بوكتها ،،، گلت ما احرمكم من البارت و لا ااخره عليكم و نشرت من وكت ...
و هم حبيت اشكركم على تعليقاتكم الحلوه فعلا حيل تشجعوني استمر بالكتابه و تخلون يصير عندي واهس ... اتمنى تستمررون على دعمكم و حبكم للقصه و تنشروها و تتفاعلون ويه الاحداث اكثر و ان شاء الله ما يبدر مني اي قصور بالنشر 😊 ...
ما اثگل عليكم اكثر شكرا
و اتمنالكم قراءه ممتعه ♥️...
للکاتبە °l||l°( ℣õ℣õ )°l||l° 💕
#قزومتــي المــسودنة 2💕
خلك ما بيه اسولف صيحوا مغرور ...
و كلهم ابعدك روحي مذبوحه ...
انه جبت العمر صافن و افكر بيك ...
گلي الغرور غير يفكر بروحه ...
الحچت عني خلك ما تستحق طاريك ...
اشتهوا سرك و انه المفضوح ما ابوحه ...
مفاهيم الهواك تخالف اليردون ...
اعتقادات بغرامك هيچ مطروحه ...
مثل ما عيب عالحرمه تشك الزيج ...
عيب عالزلمه يشكه و تطلع جروحه ...
و ما ادكرك و تصبح ماصخه الايام ...
و مر بسوالفك و تفز الملوحة ...
( منقول )
للکاتبە °l||l°( ℣õ℣õ )°l||l° 💕
▁ ▂ ▄ ▅ ▆ ▇ █ P.9 * ج٢█ ▇ ▆ ▅ ▄ ▂ ▁
ادهم : احبچ تالين احبچ و اعشق التراب الي تمشين عليه انتي ما تدرين انتي شنو بالنسبه اليه و شكثر معزتچ بگلبي ،،، احبچ و جاي احترگ كلما اشوف احد يلمحچ ... اغار عليچ من الهوا الي تتنفسي لو بيدي اخليچ بصندوق و احتفظ بيچ ما اخلي احد يشوفچ غيري ...
تدرين ليش احبچ ؟؟
تالين : ليش ؟
ادهم : لان من و اني صغير چنت وحيد ما عندي احد ،،، امي ذبتني على ابويه حتى شهر مكلفت روحها تربيني و لا بيوم فكرت تسأل عليه ولا گالت اشوف ابني عاش مات كبر شصار بيه ،،، خلف الله على مره ابوي ربت و كبرت و سوت مني هذا الرجال الي واگف گبالچ هسه ،،، و لا بيوم حسستني انو اني مو ابن بطنها ربتني و عوضتني عن حنان الام ... بس اكو شي مگدرت تعوضني عنه ولو هالشي مو بيدها اني ادري اراده رب العالمين ... بس هي مگدرت تجيب جهال و تخلف حتى يصير عندي اخوه و خوات مثلكم ،،، اني اختلف عنكم ... چنت دائما اقارن روحي بالولد ... لا اني مثل حسين عندي خوات اداريهن و اشاقيهن و اخاف عليهن و لا عندي اخ يسندني اذا وگعت مثل اسلام و مسلم ... دائما چنت احس بنقص من چنت اشوفكم و مرات چنت اتمنى حياتكم و عيشتكم ...
و هذا الشي خلاني معقد من و اني صغير و ما اكون صداقات بس چنت دائما اشوفچ ودوده ويه الكل و شعبيه و مصادقه جهال المحله كلهم بس مشكلتچ چنتي فاهيه و تنخدعين بسهوله و الجهال چانوا دائما يقشمروچ و انتي چنتي طيبه و على نياتچ تشاركيهم غراضچ و اكلچ و همه ياخذون لعاباتچ و غراضچ و يضربوچ و انتي تبچين وترجعين للبيت ... و خصوصا بيوم من ضربچ ابن الجيران راجدي مستحيل انسى دموعچ الي شفتهم على خدچ المحمر و المتورم من الضربه و صوت شهگاتچ العاليه چنتي زعطوطه قصيره و بيضه شگدودچ تركضين للبيت و شعرچ مكفش لازمه خدچ و تمسحين بخشمچ و ادورين ابوچ تردينه يحاميلچ و ياخذ حقچ بس طلع بوكتها مموجود ... اهنا اني حسيت بالمسؤليه تجاهچ صح چنت اكبر منكم بس بوكتها تخبلت و طلعت للولد ضربته بحيث رگعت راسه بحجره چبيره راسه بده ينزف و انتي تضحكين و تگمزين فرحانه لان اخذت حقچ منه بس وراها صارت مشكله بين العائلتين تتذكرين ...
ابتسمت و گلت ...
تالين : اي محمد خطيه و اني اگول هسه من يشوفني ليش يشرد ... ادهم : صح وره هاي المشكله اكتلت خوش كتله من الويه بس ما همني بالعكس حسيت بفخر لان دافعتلچ و اخذت حقچ و خليتچ تفرحين و تأمنين اكو واحد بظهرچ يدافعلچ من ذاك و حسيت بروحي اني المسؤل عنچ الي صار گمت اشوفچ مثل اختي اخاف عليچ من الهوا الطاير چنت اتخبل لو اشوف احد يلعب وياچ لان اخاف لا يأذوچ وصلت بيه گمت بالمدرسه الي اشوفه يحچي وياچ اگوم اضربه و احبسه بالحمامات حتى ليفكر يطخچ لان چنت خايف لا اخسرچ چنتي بنظري شي ملك الي ...
مرت الايام و كبرنه و عدينه ايام الابتدائيه و افترقنه صرتي اداومين بالمتوسطه و اني بالاعداديه بس خوفي و حرصي عليچ مقلوا بالعكس زاد اهتمامي الچ ،،، چنت كل يوم اطلع من البيت من وكت بس حتى امشي وراچ لحد ما اطمن وصلتي مدرستچ و طبيتي وراها ارجع اروح لمدرستي ... لدرجه مره اخذتلي كتله من ابويه لان شافني يم مدرستچ عباله مصاحبلي بنات بس مچان يدري انو اني كل همي چان انتي و لا بيوم فكرت بوحده غيرچ اصلا اني عكس كل الولد نفسي چانت تلعب من اشوف بنيه رخيصه و تتمايع للولد مچنت احب اشوفهم و او المحهم ...
و لهذا السبب بالتحديد قررت ادخل الكليه العسكريه لان مچنت اريد اخالط بنات اموت منهن ما عداچ انتي چنتي ماخذه كل وقتي ...
و بيوم تخرجتي من الاعداديه و جبتي معدل زين و سويتوا حفله بالبيت من وصلت باب بيتكم و شفتچ بالفستان الاسود و ابتسمتي برجهي اخذتي عقلي و ذيچه اللحظه عرفت بروحي ضعت بعشقچ عرفت انو حرصي و اهتمامي تحولوا لحب و عشق و غيره و خوف ...
ذاك اليوم شگد چنت فرحان بمعدلچ العالي بس بگدها چنت احترگ لان فستانچ چان ضيگ و خايف من عيون اسلام و سلام عليچ مع العلم همه يعتبروچ مثل اختهم بس چنت يضلون شباب و اخاف لا يلمحوچ بنضره مو زينه ميجوز ...
رجعت للبيت و صارن ايايمي و تفكيري عباره عنچ ،،، گمت اكل بروحي اخاف لا واحد يتقربلچ بالكليه ويأذيچ و خصوصا من عرفت رح تدرسين ابغداد متتخيلين كميه الرعب الي احتلت گلبي چنت شلون اخليها اداوم بعيد عني و ما اوصلها كل يويمه ... چان بودي احرگ الكليه كلها و لا اخليچ اداومين بعيد عني و عن نظري ...
بس الي منعني فرحتچ خفت لا اكسر بيچ ... تحملت و صبرت و گمت اكتم بالنار الي چانت شابه بضلوعي في سبيل تكملين دراستچ و ميضيع مستقبلچ ... بس اچذب عليچ لو اگلچ خليتچ اداومين بدون ما اراقبچ ... بالعكس وره ما تخرجت گمت كل اسبوع اجي مرتين و اسأل عليچ بالكليه بس بدون ما تدرين و هم عندي كومه اصدقاء بالكليه مالتچ چنت اخليهم يراقبوچ و اسألهم عنچ و عن زملائچ و بكل الطرائق اراقبچ حتى بالبيت مرات چنت اخابر نيڤين و اسألها عنچ او اجي ازوركم بس حتى اشوفچ ...
مرات چنت اجي و اشوف تطلعين من الكليه ويه صديقاتچ و اضل لاحگچ لحد ما اطمن دخلتي بيت جدچ و ارجع ...
بس الي مخبلني تصرفاتچ و طيبه گلبچ و فهاوتچ ،،، تصرفاتچ ما كبرت و بعدچ مثل ما انتي تنخدعين بسهوله و تصرفاتچ طفوليه و طايشه ... مرات من اشوفچ گاعده تضحكين ويه اسلام و مسلم مع العلم ادري بيهم بحسبه اخوانچ بس اريد اطب و افلش وجههم و وجهچ وياهم افقد من اشوف شعرايه منچ طالعه ... تلوميني من اعيط عليچ و تسميني معقد حقچ لان مجاي تحترگين مثل ما اني محترگ عليچ لچ جد جدي مسموط عليچ و القران و من تنزل دمعتچ اخخخخ يا دمعتچ تيزاب و يوگع على لحمي و اليوم من سمعت بت خالچ هيچ حچت انو اكو ناس رايديچ و جاين خطابه عليچ ردت انزل و ارگع راس براس انتي وياها و اعيط بين العالم هاي مالتي ما اخلي احد ياخذها تخبلت و ضليت اكل بروحي و افتريت منطقه بيت خالچ سبع مرات واني مرعوب كل تركيزي يمچ لا ياخذوچ مني ... ما لگيت نفسي الا و اخابرچ و ارزلچ من خوفي مچنت اعرف وين انطي وجهي و الشيطان گام يلعب بعقلي و چنت اگول اكيد هسه هو واگف و هي تفتر گباله بجسمها المكشوف و چنت اتخبل بالزايد ... چنت ناوي انفجر بوجهچ لو ما ابوچ خابر و گال الحگ تالين متخربطه ...
مثل المجنون ركضتلچ حسيت الوجع البيچ و وناتچ جانوا مثل السچاچين تگطع بگلبي ... چنت اتمنى لو الالم بيه مو بيچ ...
( و نزلت دمعته على خده و مسخها رئسا و استمر يحچي )
خفت لا اخسرچ و تروحين من ايدي ،،، ضليت الوب و وعدت نفسي انو بس تصحين اعترفلچ خلص چنت اضل اصبر بروحي و اگول بس تتخرج اروح اخطبها لان خفت لا ااثر على دراستچ بس هسه مبقى شي كلها شكم اسبوع و تتخرجين ... تعبت اريدچ الي اريدچ بحضني اريدچ حلالي ما بيه حيل اصبر اكثر ... كل حيلي انهد ويه حبچ اريد اتهنى و اخذ ثمره الي زرعته ،،، اي انتي بيديني زرعتچ و ربيتچ اريد احصد تعبي ... صار الوكت نضجتي و كبرتي و ماشاء الله مثل الورده صرتي بس بعيوني مستحيل تتغيرين بعدني اشوفچ توته الزعطوطه ام لسان ...
عرفتي هسه ليش اعيط و اتعصب عليچ ؟؟؟
تالين ... چنت مصدومه بكلامه و مركزه ويه كل كلمه يحچيها ...
ما ادري ليش تعصبت و ترددت بالاجابه و گتله ...
تالين :بس اني متوقعت هيچ تحبني ...
ادهم : طبيعي لان اني مو النوع الي احچي مشاعري الله شاهد بس يمچ حچيت لان حلفت اليوم احچي لو شما يصير ...
تالين : بس ادهم اكو مشكله اني ما اشاركك نفس الاحاسيس و المشاعر ...
ادهم : شلون يعني ..
تالين : يعني شوف اني اح....
و وچان يطب بابا ...
اسامه : ها باباتي خير اكو شي ؟؟
ادهم : لا عمي سلامتك بس تالين صحصحت و گلت اجي اتحمدلها بالسلامه ...
اسامه : اها ...
و اجه گعد ويانه و ادهم بس يفرك بايده اشرتله بمعنى بعدين نكمل ... و نهينه الموضوع ...
و طلعوا بابا و ادهم و اني رجعت تمددت و افكر بكل كلمة گالها ادهم ... بالله هاي شلون بلوه
اني مجاي ابادله نفس المشاعر و اخاف اگله احب غيرك و يموتني ... هسه شلون اطلع من هاي الورطه
ضليت افكر لحد ما نعست و نمت ...
فتحت الصبح عيوني و الدكتور چيك وضعي و گال حالتها مستقره رح اكتبلكم على خروجيه رجعوها للبيت عادي ...
طلع الدكتور و اني منتچيه و امشط شعري كله ماشات من التسريحه مالت البارحه شصاير بيها ... دخل ادهم و جايب ريوگ من لبن و گيمر و كاهي و صمون حار و چاي و ... تدرون بقيه مشتقات الحليب ...
بحيث فرش السفره عالچربايه و شكلها يفتح النفس و اني شلون ميته جوع لان البارحه من البنج ما اشتهيت اكل رغم بابا جابلي كباب و معلاگ بس ما اكلت هوايه ...
ضليت صافنه عالسفره رفعت راسي و اباوعله بتعجب ...
تالين : يمعود شنو كل هذول ...
ادهم : شبيچ ريوگ ...
تالين : ادري ريوگ بس كل هذني ليش ...
ادهم : غير انتي تعبانه و طالعه من عميله لازم تعوضين ...
ضجت من الي سواه شنو يريد يقرب روحه مني بالاكل ؟؟ ليش اني هلگد جوعيه گتله بنتره
تالين : ماكو داعي مكلف روحك اخذهن اني ما اشتهي ...
وفع تك حاجب و گال ...
ادهم : شنو اخذهن اني جايبهن الچ ...
تالين ( بعصبيه ) : و اني ما اريد ...
ادهم : شبيچ تالين ؟؟؟
تالين : ما بيه شي بس ما اريد ريوگ اخذهم ...
و طبت ماما و شافت السفره ...
نتاليا : يااا شنو كل هذا لي شمتعب روحك ادهم والله ميحتاج ...
ادهم : صدگ چذب عمه يا تعب هم اكو واحد يتعب من اهله اتريگوا بالعافيه عليكم اني طالع ...
نتاليا : ها و ليش متجي تتريگ ويانه ...
ادهم : بالعافيه والله اني ما مشتهي هو بس گهوه اشرب بالصبح ... اعوفكم على راحتكم ...
نتاليا : عاشت ايدك مقصرت ...
طلع ادهم و گعدنه اني و ماما ...
نتاليا : يلا تعاي ماما اكلي ( و سوتلي لفه جبن ما اگول ما چنت مشتهيه بالعكس چنت ميته بس اكل بس ما اريد يرشيني حتى احبه اني احب ياسر و وح اصير اله ماكو داعي يقرب نفسه مني
و چان تحچي امي )
نتاليا : هاچ ماما اكلي ...
تالين : ما اريد ماما ...
نتاليا : لچ شنو متريدين ماما من البارحه و انتي مماكله شي ...
تالين : ما اريد ماما ما اشتهي الله علي لتضغطين عليه ...
نتاليا : استغفر الله خطيه الرجال جايب كل هذا الاكل انوب هسه منو ياكلها ...
تالين : انتي گعدي تريگي و اكليهن ...
نتاليا : هم شايفتني حوت و اكلي كل هذني هو الواحد وين عنده نفس ياكل الصبح .... بس والله هذا ادهم ولد ذهب صافي ... من البارحه و واگف ويانه حاله حالنه خطيه تعبانه انوب هسه جايب كل هذني ...
تالين : امم ...
نتاليا : سبحان الله كل ما اشوف تصرفاته اتذكر اياد نفس الحركات و نفس ايلوب الحچي و نفس العصبيه ... والله هم زين مطالع على امه الغثيثه شگد ثگيله دم چانت متنجرع نفس اختها ...
تالين : صدگ ماما امه هم تزوجت وره ما اطلگت ؟؟
نتاليا : اي تزوجت و راحت عاشت حياتها و هذا المگرود عافته و عمره اسبوعين رضيع عفيه گلب ام شلون ما حنت على ولدها كل هاي السنين و اني حسين ساعه ما اشوفه اتخبل ...
تالين : مو كل ام مثلچ اصابع ايدچ مو سوه ...
نتاليا : اي والله شفناها و شفنه مريم الي ربت و تعبت و سهرت و اخذت هذا الرضيع بالاحضان و سوت منه رجال مشورب ينحلف بيه و باخلاقه ...
كملنه ريوگ وبابا جاب ورقه الخروج و ماما بدت تلملم غراضنه ... علساس نطلع من المستشفى و اجوي خوالي و جدي و بيبيتي سلموا علينه و من شافونه دنريد نطلع مقبلوا نرجع للانبار و اصرو نبقه عدهم ...
كولش لحوا و بابا استحى يردهم عاد طلعنه من المستشفى لبيت جدي ...
اول موصلنه هناك بابا و جدو جابوا ذبيحتين و ذبحوها يم رجلي ...
طبيت و الكل يتحمدلي بالسلامه و يسأل احوالي و تلگيت البنات كلهن اهناك و اني بس ااشر لايلين بمعنى اكو اخبار جديده بالباكيت ...
و هي بس تاشرلي بمعنى شكو ...
مگدرت احچيلها لان البيت خبصه و مچنت اگدر اخذ راحتي ..
بقينه للعصر يلا خله البيت شويه و گعدنه اني و تالين بالغرفه الجوانيه وحدنه بحجه اتساعدني ابدل ..
و گمت حچيتلها كولشي صار ...
ايلين : كلللللليش يعني و اخيرا رح افرح بيچ و ازفچ ...
تالين : يمه عوذه ما ارييدددد ...
ايلين : انچبي لچ ترفضين هذا التحفه ...
تالين : يمعوده يا تحفه يا صخام ما احبه اني ما اطيقه اصلا هذا عقده حياتي ما اريده اني اريد ياسر ...
ايلين : يا ياسر لچ هذا ابو الشخصيه الزرن الهادئ و هذا ياسر ابو البنات ...
تالين : انچبي ايلين وين ابو البنات اشو كولشي معنده وهو يحبني و هو واعدني يخطبني بس اتخرج ...
ايلين : لچ توته لتضيعين ادهم هذا ذهب صافي و شاريچ و همات ابن عمچ و هياته هو گلچ يخاف عليچ من الهوى الطاير ،،، تگومين تبيعيه و تختارين ياسر ابو الوصخ ابن ايلاف ...
تالين : ليش شبيه ياسر شو يخبل بس انتي لان شايفه شكل الخارجي لادهم و بس انغريتي بي بس هو بالحقيقه ميتعاشر وياه طبعه صعب حيل ...
ايلين : شما چان يحبچ و يخاف عليچ و روحه بيچ و دام الحب موحود يعني يگدر يتغير علمودچ بس مو مثل ياسر اسابيع تمر و ما يسأل عليچ و لا يهمه ... متلاحظين بروده وياچ متگليلي شنو العاجبچ بيه والله تصرفاته عبالك تصرفات واحد خنيث ...
تالين : عفيه ايلين ما اسمحلچ تحچين عليه گبالي هيچ اني ادهم مستحيل افكر بيه ياسر يحبني و اطباعه تتوالم ويه اطباعي مو مثل ادهم صعب اترالم وياه اني ما اريد اعيش حياة تكون عباره عن عياط و زعل و صريخ ... اريد حياة هادئة ويه واحد رومانسي و حشاش و يحبني ...
ايلين : بس هاي الحياه الهادئه مرتح تتوفر ويه ياسر لاتنسين هو ابن منو لا تنسين امه مراح تخليچ ترتاحين بحياتچ اذا هي مجرد ما عرفت بيكم زملاء و تخبلت و رادت تگطعچ تخيلي اذا عرفت بيچ تحبين ابنها شراح تسوي اكيد رح تسويچ اربع وصل ...
تالين : شحدها اطخني والله اموتها و بعدين الي اني سويته لا عيب و لا حرام حبيت حالي حال بنات العالم و ابنها هو الي بادر مو اني يعني مراح تگدر تفك حلگها ...
ايلين : بس ابنها بادر بوكت ما چان يعرف بيچ بت اسامه و متشوفيه شگد بارد وياچ من ساعت ما عرف بالسالفه ...
تالين : مو بارد بس ما جاي يخابر مثل زمان ...
ايلين : ليششش مسألتي روحچ ليش شنو السبب خلي اگلچ لان يخاف من امه صح ،،، يخاف لا تعرف بيه و تشنقه مو حال اذا تزوجچ شراح تسوي بيه ،، لچ تالين اصحي ياسر يلعب عليچ واضحه حي على الصلاة مراح يتزوجچ افهميها عاد ليمت تضلين هلگد فاهيه و تنخدعين بكلمه ...
عطيت اذني بايدي و صحت ...
تالين : كااااااافي ما اريد ما اريد اسمع بعد ...
حضنتني و گالت
ايلين : خلص خلص بعد ما احچي سكتي ...
تالين : سدي الموضوع الله عليچ راسي رح يطگ ...
ايلين : ماشي ...
بدلتلي و تمددت عالچربايه و باست گصتي و غطتني و گالت ...
ايلين : ارتاحي هسه و نامي امبين تعبانه حيل ...
طفت الضوه و راحت بره و اني ضليت افكر ما ادري ليش ضجت من حچيها عن ياسر و متقبلته يمكن لان اكو شي بداخلي ياخاف لا يطلع صدگ يلعب عليه ...
وخرت كل الافكار من راسي و تناسيت الموضوع و نمت ...
حسين ...
بسبب اصرار جدي بقينه ابيتهم و هم لان بابا گال نخلي تالين ترتاح شويه وراها نرجعها للانبار ...
سيلين چانت تجي و تروح گبالي ... بالرغم چنت احاول اسيطر على نفسي و على نظراتي بس عيوني مچانت اطاوعني وارجع اباوع لكل تفصيله بيها لابتسامتها و صوتها و مشيتها و هدؤها الي هو اكثر شي جذبني بيها ... چنت الاحظها غير عن البنات كلهن يسولفن و مندمجات بس هي ماخذه وضعيه المسمتع و بس تبتسم و لو تشارك بكلمة او متحچي نهائيا ...
حسيت الهدوء الي بيها يميزها عن بقيه البنات لان اغلبيه البنات معروفات بلسانهن الطويل و حبهن للسوالف وحدتهن عبالك بالعه مسجل ...
چنت اباوعلها بحيث حفظت كل تفاصيلها ... و چان كل همي المح نظره من عيونها بس مچانت ترفع عيونها اليه ابد و وين ما تلتقي بيه تتجنبني ... و هالشي خلاني احاول اقترب منها اكثر و نظراتي تتبعها وين متروح ....
تالين ...
صحيت من النوم و اني مختنگه الكوابيس متعوفني ... سندت روحي گعدت و اني اتوجع جريت الموبايل و اني متحمسه گلت گالب التلفون عليه مكالمات و رسائل ...
فتحت الموبايل و لگيت مكالمه فائته و تالي شفتها من نيڤين و ياسر ابد ممهابر و لا مراسل ... رجعت خابرت نيڤين و اطمنت عليها و ضلت تبچي تگلي ضل بالي عليچ ...
سديت التلفون و خابرته مرتين مشال تعصبت حيل ... فوگ ما گاطع بيه صارلنه اربع ايام محاچين انوب ميشيل رجعت دگيت مره ثالثه و شاله و گال ...
ياسر : شكم مره گايلچ لتخابريني و اني بالبيت شنو انتي ما تفهميييين !!!!
تالين : هاي بدال ما تگلي شلونچ تالين شصار بيچ متي عشتي ... گاطع بيه اربعتيام متدري بيه وصلت للموت و سوولي عميله ...
تالي نفخ و صاح گال ...
ياسر : عسى ما متي شسويلچ يعني الا تخابرين و تورطيني ...
تالين ( شهگت و گتله ) : سلامتي من الموت ان شاء الله امك ...
سد الخط بوجهي و نزلت دمعتي على خدي و احچي ويه نفسي ...
ليش يا ياسر ليش هيچ تسوي بيه اووووف ... ضليت ابچي و بعدين مسحت دموعي و اني اهدي بروحي ...
كافي تالين كافي سكتي لا تلومينه تلگينه ضايجه من شغله و انفجر بوجهج عادي كل واحد وعنده ظروفه و هم اني حيل لحيت هم صحيح هو حيل موصيني ما اخابره هيچ وكت بس اني عنيده و گلبي يحن و يشتاگله ميخالف كلها يومين يزعل و يصالحچ هذا ياسر حبيبچ لبدليه و لا تزعليه ...
مسحت دموعي و تنفست و طبت عليه ماما ...
نتاليا : ها ماما تالين گعدتي من النوم جيت اگعدچ ...
تالين : اي ماما گاعده من زمان ...
نتاليا : ديلا ماما لعد خلي اساعدچ تبدلين رح نرجع للانبار ...
تالين : ماشي ...
بدلت و لبست عبايتي امشي بس على كيفي و ماما ساندتني ...
طلعنه للباب و شافني ادهم جاي امشي بساع راد يسندني بس بعدت ايدي و مخليته يلمسني ،،، باوعلي و عقد حواجبه و محچه شي ... محد ملاحظ هالموقف لان چانوا ملتهين يودعون ...
صعدنه السياره و رجعنه للانبار وصلت البيت و مصدگت تمددت على چربايتي و نمت للصبح ... ما ادري شنو كميه النوم الي ذبها عليه الله ...
$$$$$$$$$$$$$$$$$$$$$$$$$$$$$$$$
يوم السبت ...
حسين ...
سبحت بدلت ناوي اطلع اروح لزياره اسر بالسجن ،،، نزلت جوه و اشوف نيڤين بالمطبخ مشغوله بالفرن ...
حسين : هاي شنو منو القمر نازل للگاع زياره ،،،
ابتسمت بوجهي ابتسامه خفيفه
حسين : لچ فصعونه عاش من شافچ وينچ و الله اشتاقيت لسوالفچ و لهذا هم ... ( و اخذت قطعه من الكعك چانت خابزته بعدها حاره توها طالعه من الفرن )
نيڤين : وين رايح ؟؟
حسين : رايح ازور اسر بالسجن ...
نيڤين : زين ممكن تاخذ هذني وياك ...
و انطتي اربع حافظات مسفطات على بعض ...
حسين : شنو هذني ..
وحده كليچه و كيك والثانيه من هذا الكعك و الثالثه دولمه و الرابعه كباب ... خطيه اخذهن اله يمكن هسه جوعان و ما عنده شي ياكله ...
حسين : عاشت ايدچ والله چنت شايل همه گلت اخذله وياي اكل من المطعم بس جاي اشوفچ ممقصره يلا اني رايح ...
نيڤين : الله وياك عود سلملنه عليه ...( حچيت بصيغه الجمع و هو ماكو غيري بالمطبخ )
حسين : ان شاء الله فيمالا ...
نيڤين : فيمالا ...
راح حسين و اني گلبي نار و شابه نزلت دمعتي على خدي ،، طبعا چنت ادري اليوم موعد زياره اسر گمت سويتله من الاكلات الي يحبهم و خليتهم بحافظات ..
و صعدت فوگ لغرفتي و طلعت من جوه البطانيه الضرف الي چنت مجهزته من البارحه ...
غلفت الظرف وگصيت الكيكه من النص خليته ابطنها اخاف يفتشون الحافظات و ميقبلون و تالي انكشف و انفضح ..
انطيت الحافظات بايد حسين و اني كل فكري و بالي يمه و گاعده على نار انتضره رجعته حتى اعرف اخباره ...
اسر ...
اليوم موعد الزياره و الكل ماحضر يشوف اهله و فرحانين بس اني اي فرحه ما بيه لان ادري بروحي كسرت الكل و ما اتخيل احد يجي يزورني ... چنت صافن و افكر شحلات لو هسه اشوفلي نيڤين و اسمع صوتها اخخخخ شگد مشتاق لاخبارها ... و چان يقاطع صفنتي راشد ...
راشد : لك اسر متگلي ليش هيچ گالب خلقتك لك اليوم رح تشوف الاهل بشرفك ممشتاقلهم اني عن نفسي ميت على رهوفه بنتي الصغيره اريد الزمها هيچ بحضني كون اشبعها بوس ..
اسر : اچذب عليك لو گتلك ما مشتاق و ربي ميت عليهم بس ادري بروحي الي سويته بيهم مو هين ما اظن يجون ...
راشد : يعني معقوله و لا واحد ميجي يزورك ...
اسر : ما اعتقد اي واحد يدني نفسه و يجي يزور حرامي ...
راشد : يمعود انطيها بيد ربك و لا تضل تاكل بروحك ... تره انته مو اول و لا خر واحد يبوگ البشر كلهم يغلطون انته بس توب لرب العالمين و البقيه كلها سهله ... ها هم اني گلبي محسسني انو واحد من اعزازك رح يجيك اليوم ...
اسر : يا عزاز اگلك بعتهم و طعنت بيهم يگلي عزيز ...
راشد : لا تيأس لابد و اكو واحد بيهم مشتاقلك و ممستعد يتخلى عنك ...
جريت حسره و گلت ...
اسر : ما اظن يجون ...
و چان يطب العسكري يصيح باسماء الي جايين اهلهم ... و من بين كل الاسامي قره اسمي فتحت عيوني ممصدگ ...
رشيد : ها مو گتلك واحد من عزازك رح يجيك ،،، ولك اني حچيه سند لو ما الدنيا لاعبه بحالي لعب چان هسه اني شيخ طاگ كل يوميه اقطلي كومه نسوان بحجه افكلهن سحوره المطلگات و ارجعهن لزواجهن و اقره فناجين و اشوفلهن بختهن ...
اسر : ههههههه اي والله ...
رشيد : گوم يا خي گوم روح شوف منو جايك و اني اروح اشوف بتي رهوفه ...
گمت وطبينه للصاله مالت السجن چبيره حيل و ادور بالوجوه ... ما عندي اي علم بلي جايني بس الي ادور عليه وجهه مألوف و چان اشوف حسين من بعيد يركض عليه و يضحك و يصيح ...
اسر : لككك هلا بالضلعععع هلا بخيايي هلا بابو الاسورر ...
حضني حيلللل و اسمع صوت بچيه يطبطب على ظهري من شفته متحملت بچيت اخخ يا السند يا حزام ظهري بعمرك ما خنتني و ما خيبت ظنوني بيك ...
گعدت وياه و اني ممصدگ جيته ...
اسر : شعجبك اجيت هنا تشوف واحد حرامي مثلي ...
حسين : خايب ما تنچب عبالك هم مصدگ هذا السيناريو الي امثله لك هاي الحكومه مو على حسين ،،، اني وياك عشره عمر لو يذبحوني ذبح ما اصدگ بيك ماد ايدك عالحرام ... اني شايف منك مواقف ابسطها من چنه بالاعداديه تذكر لگينه خمستالاف بالگاع شگد توسلت بيك نروح نشتري بيها لفات و مقبلت تريدني هسه اصدگ انك بايگ ٩ دفاتر لا عمي احچيلي غيرها ...
اسر : يمعود بعدك متذكر سالفه الخمستالاف ...
حسين : هي هاي هم تنسي خليتني ابقى اليوم كله على لحم بطني مال هسه اگل لابو السجن مينطيك اكل لاسبوع حتى تذوگ الي ذگته ...
اسر : علساس همه شلوون ماشاء الله كل يوميه جايبيلي صينيه ثريد و لحم و مقلوبه و كباب ... يمعود مرات نضل يومين و تالي ينطونه قطعه خبز و خاشوگتين تمن ...
حسين : يلا ميخالف خويه تهون و ها ابشرك اليوم رح تشبع بطنك ... و حط بحضني حافظات ...
اسر : شنو هذني ؟؟؟
حسين : هاي الست نيڤين قررت تصير نادره و تطبخ و تبدع بالاكل فگالت اخذلك ويايه اكل ،،، بداعتك بريلينه الذمه اذا چان محروگ شنسوي جاي تتعلم الله يستر بس اذا ما تاكلها هسه رح توكلها اليه ...
اسر : ههههههههه عاشت ايدها لا ليش ما اكلها بس ليش متعبه روحها ميحتاج كل هالتكلفه ...
حسين : يا تكلفه بشرفك صدك چذب هو چم اسر عدنه احنه هو بس واحد و مشمور بالسجن ... صدگ متگلي انته شجالك هنا مو چنت ماشي مثل الاوادم من البيت للدوام من الدوام للشركه شجابك على المكاون و السجون اشو شگد چنت وياك و لا بيوم شكيت من شي و لا چان عندك مشاكل شجابك هنا على غفله ... شو غمضنه عين فتحنه عين و لگيناك محكوم ست سنين ...
اسر : شنسوي يا صاحبي بعد هي هاي الدنيا تلعب باليخاف الله چوله ... بس خلي الضيم مكتوم بالگلب احسن ...
حسين : ولك هاي تالي جزاتي تالي عمري الي ضيعته وياك تجي تضم عليه سالفه ... ها و اسمع سوالف الشياب مال يعاتبون الزمن لتحچيها گبالي بشرفك لان منا الوالد خابصني عتاب بس لو ادري هذا الزمن شگد ما عنده احساس و صفله لو اني منه الا اوگف و اخليكم تحيرون ...
اسر : ههههههه ولك والله اشتاقيت لسوالفك دومك تضحكني بنص حزني ،،، هم على طاري الوالد شلونه وياك هم مكاونكم ما خلصت ؟؟
حسين : بالله هذا هم سؤال والله عمري يخلص و مكاون ابويه وياهي متخلص ...
اسر : ليش ...
حسين : انه ادري هاي الايام حاط عقله بعقل اصدقائي و كلساع يگلي ويامن تجي ويامن تروح و مو هنا المشكله ذاك اليوم اشوفه طالعاهم و لازمهم واحد واحد سائلهم عن اهلهم و عشيرتهم و عنوان بيتهم و ماخذ ارقامهم عبالك يريد يزوجهم بناته والله سواني علچ بحلگهم كلساع و يعيروني خلاني اتوب حتى ما اصادق ...
اسر : هههه اي غير ابوك و خايف عليك و يريد مصلحتك ليش تضوج ...
حسين : مو هو بالي يسوي يحسسني انو اني جاهل لا اعرف اصادق و لا اعرف اتصرف يعني ما خلالي ذره رجوله و من ارجب احاچيه و افهمه يعيط تالي عمرك جاي تسترجل براس ابوك لا فد مره ذبني بدار العجزه و اخلص ...
هسه منو جايب طاري دار العجزه يا ابويه ...
متگلي شجاب الدولمه عالچلاق ...
اسر : هههههههه يلا ميخالف اتحمل و طول خلگ شما چان ابوك ...
حسين : والله مطول خلگ بس يمك اگعد اشكي و الا غير وكت ساد حلگي ساكت ...
اسر : اييي بعد شلونك الاهل شلونهم ...
حسين : الحمد اله كلهم زينين و يسلمون عليك ... كلهم مشغولين هسه بالعمليه مالتها ...
اسر : يا عميله مالت منو ؟!!!
حسين : تالين سوت عمليه شالت المصران الاعور انفجر ابطنها ...
اسر : لا و شلونها هسه ...
حسين : زي الحصان كولشي ما بيها بس تدلع براسنه ...
اسر : هههههه الله يحفظها و يشافيها ...
حسين : حبيبي و يحفظك ...
سكتت شويه و گتله ...
اسر : اسألك سؤال بس كون تحلفلي بروح جدك تجاوبني صدگ ...
حسين : بروح جدي احچيلك الصراحه ...
اسر : اهلي شلونهم ... اريدك تحچيلي عنهم واحد واحد ...
حسين : ابوك من يوم ما عرف بيك انحكمت ست سنين وگع و انضرب جلطه بس چانت خفيفه و عبرت و هسه احسن الحمد لله اما امك الدمعه منشفت من عيونها عليك و اوسيد على حطه ايدك يشتغل و عايش حياته طبيعي و ايتاج اختك من ضوجتها خابصه الكل بالحچي ...
اسر : اي هي من تضوج تگوم تحچي بلا وعي ... محد كاسرني غيرها ادري بيها بعيده حيل عن اوسيد يمها اهون منها تطلب شغله من الغريب و لا تطلبه من اوسيد لهذا اريد اطلب منك طلب حسين ...
حسين : اامر اني خادمك ...
اسر : ما عاش اليتامر عليك ... اريد اوصيك باايتاج كون ادير بالك عليها اعتبرها بحسبه اختك ...
حسين : غالي و الطلب رخيص الله شاهد معزتها من معزه نيڤين و تالين ...
اسر : تسلم خويه ما تقصر لو ما واثق بيك گد الامانه چان ما امنتك هلى اختي ...
و صاح العسكري ...
خلص الوقت ...
گمنه و رجعنه تحاضنه اني وياه ...
حسين : اريدك تكون سبع و تشد حيلك منتضرك تطلع حتى افرح بعرسك و ازفك ...
اسر : ان شاء الله يا غالي ...
حسين : اشوفك الزياره الجايه ... الله وياك ...
اسر : الله وياك ...
هو راح و رجعونه للحبس فعلا جيه حسين كلش فرحتني و خلتني اضحك بين ضيمي و قهري ،،، حسين مو بس صديقي اعتبره اخويه و ضلعي من و احنه صغار سويه و ما بيوم خيبلي ظن ...
فتشوا الاكل ما لگو بيه شي قبلوا يطب للسجن مصدگت اخذته و گعدت يم راشد ...
راشد : هاي شنو ولك ...
اسر : اكل ...
راشد : لا بشرك .. ايمع اذا متخليني اكل وياك اگلب الدنيا عليك و اعيط اگول هذا مدخل وياه ممنوعات ...
اسر : بلا ما تعيط اتفضل اكل ويايه اصلا اني ما احب اكل وحدي و البقيه يباوعون على حلگي ...
واشد : عشت والله كريم و ابن اصول ديلا هاي اني هم الاهل جايبيلي اكل رح اشاركك من مالتي هم ...
اسر : ماشي براحتك ...
گمت افتح بالحافظات اشوف كل الاكلات الي احبهن كولش حاطتلي ياها ابتسمت اخ يا نيڤين شگد احبچ تدرين بيه اعشق الكباب و الدولمه و حاطتلي ياهم ... و اشم ريحه الاكل ريحته تخبل اباوع و اتخيلها جاي تطبخه ... و اتذكر من چنت اروح للبيتهم و الگاها مخبوصه و تطبخ و حسين بس يعيب عليها و على اكلها و بعدين يگعد يخلصه كله ... شگد چانت ايام حلوه ...
راشد : شبيك يول چنك مشايف اكل لازم الحافطه و تشمشم و تبتسم اخاف ناوي تحتفظ بالاكل ذكرى و كل تباوع عليه و تشمه ...
اسر : لا يمعود هاك اتفضل يمي و اكل ويايه ...
بدينه ناكل و اني احس بروحي صاير قرن مماكل هيچ اكل طيب ...
شبعت ...
اسر : الحمد لله ...
راشد : هاي شنو يول كولشي ما اكلت ...
اسر : شبقى اكل مثلا اگرط الحافظات ...
راشد : د اوگف بعدنه الكيك ما اكلناه اني مشتهي ها ... لا عبالك تلعب عليه و تمثل شبعت و تالي تضم الكيك و تروح تتختل و تاكله وحدك افگس عينك والله ...
اسر : يمعود يا اتختل هاك گبالك اكل و اشبع منه ...
راشد : هاااه يعني تقبل اكل منه ؟؟
اسر : اي شبيك ممصدگ ...
راشد : مو والله متعجب انته گلبك حيل طيب اول مره اشوف هي حرامي طيب ...
اسر ... ضجت من حچيه و دنگت ...
راشد : اسف والله اعتذر مقصدت چنت اتشاقه وياك
اسر : ميخالف ( انطيته الحافظه انتچيت عالحايط و ضليت افكر يعني اني ليش ضجت من كلامه المفروض ما ابين شي لان اني هسه بنطر الكل حرامي اذا اني بلساني اعترفت ليش الوم الناس و قاطعني راشد )
راشد : اگلك اسر هذا الكيك شنو الحشوه مالته ...
اسر : ما ادري ليش ...
راشد : يمعود طعمه طعم اللايلون ... ابد مطيب لا خلف الله عليك لعبتها لنفسي ... و اني اگول ليش خليتني اكله اثاري تدري بيه مطيب بس ريحه و ديكور ...
اسر : لك يا لايليون لتخبلني ...
راشد : هاك ضوگ بنفس ...
و انطاني قطعه كيك گبل ما اكلها اباوع بداخلها هيچ قطعه طلعتها اشوفها مثل الچيس المشگگ ... رجعت باوعت بالكيك و اشوف ورقه تالي قسمت الكيك و طلع ظرف جواه ...
راشد : بوياااااا لك هاي شنو اسر !! و اني اگول ليش طعم الكيك طعم اللايلون اثاري صارلي ساعتين اعلفلي چيس مثل الصخل ... متگلي شنو بيها ؟؟
اسر : والله حالي من حالك ما اعرف ...
راشد : بالله افتحها ...
فتحتها و اشوف بيها صوره اني و نيڤين و حسين و احنه صغار ...
نيڤين دبدوبه بيضه گاعده بنصنه و شعرها گصيبتين و وجهها كله ككاو و لازمه بيدها نستله مبتسمه ... و اني ايدي على كتفها و اضحك ...
اباوع للصوره و اتلمسها اخخخخ لو ترجع هذني الايام لا چنه نعرف لا قهر لا ضيم چان كل همنه نلعب و ناخذ فلوس مت اهلنه حتى نشتري نساتل ...
گلبت الصوره و اشوف مكتوب ...
ها يگلبي شكثر عندي ذكريات ؟؟؟
بس ذكرياتك بعد ما ترهم دوه ...
صعبه گاللولي من تفارگلك حبيب ...
و شلون حالي من فارگت أحبابي سوه ...
و كون ارجع و اگعدلي بذاك المكان ...
و ازرع سوالفكم بماي و ضوه ...
بس يا خوفي لا تذوب جفوني الدموع ...
من تمر ضحكاتم ويه الهوى ...
اقره و اجر حسرات و ارجع اباوع للصوره ... لدرجه محسيت بروحي اني رجعت قريتها يمكن ١٥ مره ...
راشد : امبين الصوره غاليه عليك...
اسر : اي شلون عرفت ...
راشد : امبين صارلك ربع ساعه صافن بيها ...
اسر : هاي الصوره تعنيلي هوايه ...
راشد : يصير اشوفها ؟؟
اسر : اكيد ( و انطيته اشو هذا اتوسعت عيونه و فك حلگه )
راشد : يا سبحان الله ...
اسر : شكو ؟!!
راشد : هاي الطفله كولش تشبهه بنتي !!!
اسر : بنتك الي قبل شويه حچيتلي عليها ...
راشد : اي رهف بنتي نفس الضحكه و نفس الخدود بس بنتي عيونها عسليه مو خضر بس والله كولش تشبهها چنها هي ...
اسر : شگد عمرها بنتك ؟؟
راشد : سنه ونص ...
اسر : نيڤين اهنا عمرها سنتين ...
راشد : اسمها نيڤين مو ؟؟
اسر : ايي ...
رجع دنگ بالصوره و رفع راسه باوعلي بابتسامه
راشد : شكلك فرحان هنا و حاضنها ...
اسر : اي هههه هاي من چنه صغار هسه يختلف ...
راشد : بس مو بعيده تگدر ترجعها لحضنك ...
تعجبت على كلامه هذا شدا يحچي هو اصلا ميعرفها شتقربلي ...
اسر : شنو ؟؟!
راشد : هيچ ماكو شي ... ( رجعلي الصوره و گال ) ذكرني الزياره الجايه اشوفك بنتي و صدگني رح تنصدم بكميه الشبهه بينها و بين هاي الطفله ...
اسر : ان شاء الله ...
اخذت الصوره و ضميتها بجيبي
$$$$$$$$$$$$$$$$$$$$$$$$$$$$$$$$$$$$$$$
نيڤين ...
رجع حسين و اني مصدگت اريد اعرف اخبار حسين و يا تره وصلته الصوره لو لا ... ضليت الوب و اگعد يم حسين بحجه اريد اعرف اي خبر عنه ... گمت رتبتله صينيه اكل و حلويات و اخذته خليته گباله ضل متصنم و يباوعلي ...
حسين : يا ستار شمفينه ولچ ...
نيڤين : والله كولشي ممفينه ليش ؟؟
حسين : عجل ليش هاي الصينيه ؟؟ متأكده ممسويه مكسوره و تريدين الزگها الچ ..
نيڤين : لا والله كولشي ماكو ...
باوعلي و ضيگ عيونه و سحب تفاحه و بده ياكلها ...
نيڤين : ها صدگ نسيت الكنافه ... ( و ركضت اجيبها )
اشو حسين غص بالتفاحه و گال ...
حسين : صار بيها كنافه يولي يعني حيل چبيره خل اشرد هاي انفتگت بعد شيسدها ...
نيڤين : شبيك حسين والله ممسويه شي ...
حسين : لعد ليش كل هاي الترتيبات ...
نيڤين : يعني متريدها ارجعهن ؟؟
حسين : صدگ چذب شترجعيهن جيبي ...
و بده ياكل و گعدت يمه و گتله ...
نيڤين : صدگ شسويت يم اسر ...
رفع تك حاجب و گال ...
حسين : ليششش ؟
نيڤين : هيچ بس فضول حبيت اسأل ... صدگ انطيته الاكل ؟؟.
يحچي و هو مستمر بالاكل
حسين : اي انطيته و گتله بريلي الذمه اذا تسممت او صار بيك شي اني معليه ...
نيڤين : واااي ليش هيچ گلت والله زعلت منك ...
حسين : اتشاقه شبيچ ... ولچ حتى لو متعفن هم رح ياكله متشوفين شكله شصاير بيه ...
نيڤين ( بخوف ) : شصاير بيه ؟؟
حسين : ذبلان و لحيته طولانه و شعر مكفش و لا عبالك هذا اسر المرتب الي من چنه نضيعه نلگاه يم الحلاق يزين ...
نيڤين : اوووو سوده عليه و الله حرامات هيچ يصير بيه ...
حسين : شنسوي بعد هذا المكتوب ... وينها تالين ؟؟
نيڤين : بغرفتها نايمه ...
حسين : يمعوده هاي شد تنام صارلها يويمن مگضيتها نوم متگلي منين يجيها كل هذا النوم ...
نيڤين : شمدريني هي چنها كوالا ٢٤ ساعه نعسانه ...
حسين : هههههه اذا هي كوالا انتي شنو فاره ؟؟؟
نيڤين : اي مو بابا مخلفله المزرعه سعيده مو ارادم ...
حسين : هههههههاي گومي لچ شغليلي التلفزيون اريد اباوع للفلم الجديد رح يطلع ...
نيڤين : ماشي ...
و چان يطب بابا و امبين بوجهه ملامح التعب سلم و رئسا گال ...
اسامه : وين اختكم ؟؟
نيڤين : نايمه بابا ...
اسامه : روحي گعديها گولي بابا منتضرچ بالاستقبال رايدچ بموضوع ضروري ...
و راح للاستقبال و اني و حسين باوعنه على بعضنه ،،، لان مو من عوايد بابا يگعد تالين من النوم دوم يگول عوفوها خلي تنام بس دام هسه جاي و يريد نگعدها يعني السالفه حيل ضروريه ...
ركضت لغرفتها و حسين ويايه اثنيناتنه انريد نگعدها و نتلاحگ عليها ...
حسين : لچ تالين گعدي تااالين ...
نيڤين : تاالين ...
تالين ( غطت وجهها بالبطانيه و حچت بنعاس ) : ولكم عوفوني لا اصيح بابا عليكم و اخليه يگلب البيت فوگ روسكم ...
حسين : مو هي اهنا المشكله بابا گال نگعدچ ...
تالين رئسا وخرت البطانيه من راسها و فتحت عيونها ...
تالين : ليش ؟؟؟!!
نيڤين : يگول عنده موضوع ضروري وياچ ...
تالين : بسم الله الرحمن الرحيم شصاير ؟؟ اكو اي حدث صار بين ما چنت نايمه ؟؟
حسين : اني چنت طالع ما ادري بالوضع ...
نيڤين : و اني الي اعرفه كولشي مصاير و محد متعارك ..
تالين : لعد شكو ؟؟؟
حسين : فكري زين شوفي شنو مسويه هاي اليومين ...
فكرت و گلت ...
تالين : سويت عمليه ...
حسين : لا لچ قصدي ممفينه شي منا منا ؟؟؟
تالين : لااا
نيڤين : گومي ويايه و روحي شوفي شيريد منچ بابا يلا لا يتعصب ...
تالين : ماشي ...
گعدتني نيڤين غسلت وجهي و طبيت لبابا و حسين يقره ايات و يگول ...
حسين : سوده بوجهي چانت خوش اخت جوعيه الله يرحمها ...
و نيڤين تسكته ...
دخلت و اشوف بابا ديصلي انتضرت لحد ما كمل رفع راسه و اشرلي بمعنى اجي اگعد يمه ...
تقربت منه و اشوفه يباوعلي بنظره حزينه بس مبتسم بنفس الوكت ...
اخذني بحضنه و باس گصتي و يگول ...
اسامه : اەەەەەە يا حبيبه ابوچ يا فرحتي الاولى ... كبرتي و صرتي مره حوگ و گامت الناس ادگ بابي عليچ ... كبرتي و رح تروحين من بيتي والله محسيت بيچ كبرتي يا بنتي ...
تالين ... بابا يحچي و اني كولشي ما افتهم ...
اسامه : باباتي اليوم عمچ اياد طلبچ مني لابن عمچ ادهم ...
تالين : شلون ؟!
.
.
.
يہتہبہعہ ...
___________________________________
لا تنسوا تنطوني رٲیكم ...
آإحـ♥̨̥̬̩بـ♥̨̥̬̩ک♥̨̥̬̩ـــمـ♥̨̥̬ ....
تُےـصِےـبّےـ ـحًےـوٌنٌےـ عَےـلَی خٌےـیر 💋
#قزومتــي المــسودنة 2💕
للکاتبە °l||l°( ℣õ℣õ )°l||l° 💕