الشيهانة

٢٦

مساء الخير

الشيهانة
الجزء السادس والعشرون

وجهي كام يخلط الوان من حجي ابو حيادر..
دنكت ماحجيت شي هو ضحك وكال
عليمن فشلانة بوية..حجاها وكعد يم
امه..

وانا كعدت ع جهة ..حاجتني بنية اكبر
مني بشوية تبين..
ها حبوبة بالمبارك..انا بت عمه صمد..
اهلا بيج حبيبتي تسلمين..
عيني باردة عليج كلش حلوة كلبيتج..
ياعيني تستاهليها كدامج ..
لا ملبوس الهنا حبيبة القالب غالب ..خو مازعلتي
من حجي عمي..
لا بس خجلت ههه..
اي بعدج جديدة بعدين تصير عدج زلاطة..
ابتسمتلها وهي تسولف وياي..
عرفتني ع الكاعدين كلهم..

دك الفون مالتي ماما..رديت عليها..
كالت احنا بالباب هي وهاجر جايين ..
كلت لامه وكامت كالت اروح اشوفهن ولو
الولد هسه دخلوهن..
كامت وياي بت عمه ورحت للديوانية انتظرهم..
شوية ودخلت ماما وياها هاجر..
مشيتلها بس ماكدر حيل لان رجليه
تاذيني..
بس هي ركضتلي وشبكتني لحضنها وبوست
كل وجهي وكاتمة عبرتها..

بعدها كعدت وهي شابكتني لصدرها وتبوس
بيه..
شلونج ماما حبيبتي قلبي مفرفح عليج..
شني وانا حتى محد عبرني ولا سلم عليه..حجت هاجر..
ضحكت وردت اكوملها بس دنكت عليه
بوستني وباركتلي..وكالت اروح اشوف
البنات اساعدهم..

امه هم كالت رخصني هسه اجي..
بس طلعو وماما باوعتلي بعيون تعبانة..
شبيها رجليج لا مشيتج ثكيلة..
مادري يجوز لان امس طول اليوم ركضة وتعب..
بس لا لح عليج .؟
ها لا ماما ..

اي زين..خل اخابر ابوج خطية راد يخابرج
بس كال خاف بعدهم ماكاعدين واحرجهم..
فدوة لعمره مساع كلت اخابره بس ماكدرت
اكوم من يمهم استحي..
اي بعدج تالي تتعودين..حجتها وهي تخابر
بابا...
انطتني الفون وجاوب..

الو..
هلاوو بابا ..حجيتهم واختنكت بدموعي..
يابعد ابوج ..بنيتي ونظر عيني مبروك باباتي
انشالله الخلف الصالح اليبر بيج مثلي ماانت بارة
بينا..
حبيبي فدوة لعمرك اشتاقيتلك..
اجيج انشالله بس لا تبجين يشيهانة ههه..شلونه
رجلج..
هههه الحمدلله..

وانا احجي دخلت امه وام هاجر واخته
وسلمو ع ماما وانا كملت حجي
وي بابا وسديت الفون..
ماما هم التهت تسولف وياهم..بس انا
سمعت صوت بابا وزاد شوقي
اله..

من انتبهولي مدمعة وماما كلتلهم مشتاقة لابوها..
كالت امه باجر تشوفينه لن عمج كال باجر
يعزمكم انتم وبيت ام حنين ..حجت وهي توجه
كلامها لماما..
وماما كلتلها لعد الجمعة الجاية انتو يمنا
انشالله ..وبقت شوية ماما وكامت..
انا قلبي رجف من شفتها راح تروح بقيت
اباوعلها بقهر..

هي طلعت علبة من جنطتها وفتحتها..
ماما هاي هديتج ولو فرحتنا بيج ماتوصفها هدية..
لبستني بايدي سوارات ستة ع شكل ورد ناعم
متلاصق شي بشي وملون ..هن ذهب بس موديل
هندي متداخل بي الوان..كلش انعجبت بيهن
اخته كلتلها ذني منين حلصتيهن يجنن..وماما
انطتها اسم الصايغ وسولفو شوية وكامت..

من رادت تطلع احس روحي طلعت اختنكت..
هي حست بيه وحجت وياي ووصتني
وكالت اخابرج دوم واجيلج ماتركج ..بس ادري بيها
ماتجي لان ماتحب تثكل تشوفها زحمة لان
انا عد عيال وناس هواي تستحي..

طلعت وانا ماكدر اطلع بالحديقة لان اهلهم
هنا وحيادر كال لا تطلعين ابد..
رجعت للبيت بس كلت ادخل للمطبخ
اشوف شيسوون..
دخلت يمهم وبقى يهلهلون..هلا هلا بعروستنا
كل الهلا..
ابتسمتلهم وانا اباوع مخلين طباخات كبار يم باب يطلع ع حديقة
خلفية وجدورة كبار
وكومة مواعين..

حنين انتبهت لاساوري وحجت..
شنو هذاا صدكي جذبي حلو ولج..حجت وهي
كاعدة تنظف البصل ..
لا ذهب ..هدية من اهلي هسه ماما جابتهم..
هاا بالعافية اي حلوات عبالك شبه موديلهن..
حجت مرت اخو هاجر ..لا هذا مديل هندي
شفته من رحت اشتري مكادس بس شني
كلش غالي..

صوت من وراي حجه..تستاهل شاها
الغالي للغالي..
حجت امينة وحطت ايدها ع ظهري..
شمكومج وجابج هنا روحي ارتاحي كعدي..
مو جنت يم ماما هسه راحت..
ياا ولا ادري بيها جت..
اي هي ماطولت بسرعة راحت..
الله يحفظها ..امشي جوا لا تعلك بيج
ريحة الاكل..

اخذتني وياها وطلعنا..وكفنا بالممر ..
شلونج ويا تصالحتو وطاح الحطب؟
الحمدلله نسينا الصار..
اي نعمة..انسو الصار بعد امج وتريد تعبها
بيج وحگ رباها..
اي اكيد ..
باعي غرفتج من تنزلين لا تخلينها مفتوحة
بس تطلعين قفليها وحطي المفتاح بزيجج..

ليش يعني..حجيت بقلق..
احسن ماتعرفين نفسيات شني ..وكلها من تطلع
تقفل غرفها..
اقل شي الجهال تدخل وتلعب بغرضانج
وانت جوا ..
ها يعني اصعد اقفلها هسه؟
لا رجلج وصاني وقفلتها..هج خلي مفتاحج
بزيجج ..

وين يعني زيجج شنو ههه..ضحت بخجل..
يعني بصدرج يمه اسهل حتى لا يطيح..
ها اوكي ههه..اخذته منها وخليته بصدري
وانا مستغربة..الظاهر لان هواي وجهال
وكحين يدخلون للغرف ومايدرون بيهم..

رجعت جوا بقيت كاعدة واجو بيت خوالهم
وزادت الاعداد وكلها تسالني وتسولف
وانا مادري اجاوب منو من هالهوسة..
وفوك هذا اجت مرت خالهم الي خطبني ..

تقربت يمي جان شكلها كلش حلوة..
بيضة وطويلة وضخمة وعيونها مجرورة ..
بالخير بالخير منها للولد..حجت وهي تكلب
بنظراتها..
شكرا حبيبتي..

شني جا المن لابسة حجابج ذبي بس نسوان..
لا هسه جان عمو هنا استحي..
يا فلك انوب عمو هههههه..خايبة كولي
الحجي كولي يبا كولي الشيخ يا عمو بهالزلك..
بعد احنا متعودين نسمي ابو الزوج عمو يعني
مو غلط..
بعد كيفج هسه تشبعين تصنيف..

اكلج شعجب اهلج نطوج؟وانت محجي بيج
لرجلي..
لان رجلج مو هو حجه بيه ..صارت خطبة نسوان
وماوافقنا وانتهت..
جا شلون يكولون محاجيج وراضية!!
هو اصلا زوجج ماعرفه..شفته مرة مرتين
وي حيادر وبهادر بالكلية ..مامنتبه اصلا اله..
يعني مامحاجيج؟
انا زوجة حيادر..يعني ذهب خالص..حيادر
ماياخذ وحدة محاجية خاله..

اي مو انا اكول حَيدَر زلمة وعزيز نفس..
هاي سوالف العجيز ام ال..
عزا انا وجهي فلت من غلطت وحتى ماعرفت احجي..
هي حجتها وكامت..
راحت للمطبخ ..وحاجتني بت عمهم اسمها
نوال..اصغر مني بس متزوجة وحامل..
كل الاسوفهم لو بحضنها طفل لو ببطنها طفل..
انتاجهم مامتوقف ماشاء الله..

معليج بحجي سعيدة ترى فطيرة وكلب
ابيض بس مقهورة ع رجلها..
بس عيب عليها انا مرت حيادر اصلا مو لائق
هيج تفتح موضوع..
مو حبيبة عمتج هي ساس البلة..

حجت
براسه وكلتله ولك لكيتلك وحدة اجنبانية..
خلته يجي ويشوفج بالجامعة ورجع يدك ع وراسه..
يابه شني هاي مو مرة تكول جمارة ..ورادج
بس شني حيدر كلب الدنيا عليهم وهو من سمع
حيدر رايدج كال هذا اهو ..تفكس عيني
لو بعد باوعتلها..

زين هي خالة ليش تريد تزوجه خطية مرته
حلوة وصغيرة..
هو حبيبة مدلل عد عمتج لنه الزغير وتاجر
مريش بالفلوس ..كلتله طكلك ثانية بس
كون مثغفة وتتباهى بيها وخلي ذيج
تربي الجهال..
خطية الله يساعدها..حجيت وانا اباوع لعمتي
مادة اذنها يمنه ..بس هوسة كلش
ماتسمع..

اذن الاذان وكلها كامت..انا صعدت لغرفتي
اصلي..
صليت واريد اشيل السجادة ودخل حيادر..
تقبل الله..
خليتها بالجرار وابتسمتله..منا ومنك..

تقرب ولزمني من حنكي..شكلج نعسان..
اي كلش نعسانة ودي انام ..
هسه جاي يحضرون للغدا..بس نتغدا اجيج
ونصعد..
ترى اريد انااام سليب سليب مو غير شي..
اكو احد كال غير السليب مو سلبتي عقلي
ولج ام شفة حلوة..

اخذ شفتي وباسها حيل واندمجنا بس بعدني
بسرعة..
اروح جوا لن يتانوني ..بس اكمل
الغدا اجيج خوش..
اوكي..حجيتها بخجل ومبتسمة..
يلا تعاي انا نازل ..

عدلت حجابي ونزلت ..هو عبر بسرعة لان
متروسة الصالة بنات..
وانا اجيت كعدت..
امه جانت تسولف وي مرت خالهم مرة
جبيرة بكدها جانت..
باوعتلي ..ها صليتي..
اي الحمدلله..
يا دهر جا شبي حلكج مطكك من فوك ههههه..
ضحكت ومرت خالهم والسمعو
بقو يضحكون..
انا سكتت ماجاوبت..

وذني اليمي يحجن ..جا شني بعد عروس
واول ايام كلها هيجي الزلم تصير تركية ..
ورا شهر حتى مايندل حلكج وينه..
اي صدك صارله ١٣ سنة مابايسني ..يااا هههه خايبات
من عرسنا ماباسني..
هذا حجي الكاعدات يمي..

دخلت حنين وهي تبتسم..
انتن ماتشجعن..خبلي وتدلعيله وشوفي
شيسويلج..
بعد خية مو مثلجن بنات البصرة احنا نخاف
من زلمنا..
وليش اخاف اصلا ادللة حتى مايدور غيري..
ماتشوفن بهادر شلون ميت عليه..
اي خية صدك صدك ..ياه ناسنا كلها تحجي
بيج وبسباعيتج بكلشي..

انا صافنة عليهم يمدحون بيها وهي
توها قاصفتهم شنو السالفة هيج مطفيات
لو يجاملن مادري..
ها عافتنا وراحت ..صيحت ع البنات كومن فرشن الاكل برد
يلااا بنيات يلا سرعن..
وهن بقن يجيبن الاكل..انا بيبتهم كلتلي
هذا مكانج يمي تعاي كعدي..

كعدت يمها وانطتني ماعون بي سوب وهواي
عظام..شربي يمه هذا التشريب يفيدج وحتى
يلمج ويطيبج..
اي بيبي حلو احبه السوب..
ساب شنهي يمه تشريب كراعين هذا..
نزلت الخاشوكة من حلكي ومعدتي كلبت..
شنو هذا بيبيي..
يمه كراعين ترم عظمج وتسويج مهيرة ترفلين
رفل..

لزمت معدتي ورحت للحمام اقصى سرعتي..
ذبيت الاكل كله ..وانا اتخيل رجلينات العجل
حاطيهن بالسوب..
من اسمع باسم الباجة والكراعين معدتي
تنعفس..
خطية امينة اجت وراي وتحاجيني..
غسلت وطلعت وانا لازمة بطني..

شبيج ياستار شلحكتي كليتي..شو ريوكج
لفة زغيرة حتى مانزلت بلعومج...وغداج
ماكملتي ..
خالة الكراعين تلعب نفسي منها كلش..
جا هسه الا تاكلينهن يولن..
بعد مادري عبالي سوب..
دتعاي انا اصبلج تشريب هذا التحبينه..

رجعت كعدت لخاطر امينة لان معدتي
انسدت..
وهم مستغربين لان لعبت روحي..بيبيتهم
كلتلي جا يما مادري تكرهين الكراعين غير تحجين..
بعد ماجنت ادري ..يلا الحمدلله مابيه
شي..
لا عين حارة عليج بييي امبينة..

اكلت قليل وقبل لا اكوم اجه حيادر..
احنا كاعدين ع السفرة هو وكف قريب
يمنا..
ها شني شبعتي شماكلة..
ماكلت شي بيبي لعبت روحها..
ليش!!
كلت كراعين هههه..
شجابج عليهن مو ماتحبينهن..
هههه عبالي سوب..
يلا جا اكلي غير شي..
لا شبعت..

ها زين ..امشي فوك انا نعسان ووراي
ناس تجي العصر..
هو حجه والانظار كلها صارت عليه..
روحي لزلمتج بيبي كومي..
كمت ويا وكتلهم عن اذنكم ..بس اغلب
الكاعدات نظراتهم عجيبة احسهم انزعجو..

صعد الدرج وانا ورا اريد اصعد..
صاحت ورانا امه..حيادر مو للمغرب تبطي
وتفشلنا ويه الوادم..
مادري يمه صاعد انا والله كريم..يلا شاها..

صاحت ورانا واحنا نصعد..
تونس يمه تونس سدة البردة وسد الباب
والبقية بقو يضحكون..هو غلس وصعدنا..
فتحت الباب ورجعت ضميت المفتاح حتى
اتحرش بي..هو بس للغرفةاندار علي..وين المفتاح..
هذا هسه اجيبه..
لا انا اجيبه شو بلة..
ما ما وخر..

شبيج هم بيبي توب وهم تخافين..
يااا بسيطة..
دجيبي خل نقفل بالاول ..حجه وهو يمد
ايده يدور المفتاح وانا شردت
صرت يم الزاوية..
جيبي ولج وينه..
يحجي ويتلمس وكعدنا بالارض..

وهو دفعني للحايط كلش..
عاجبني اكعدج بحضني تعاي...
ماريد حضنك ماينكعد بي..
ليش شبيي..يحجي همس وعيونه مبتسسمة اكثر..
لان طويل يعني رجليك طويلات وتربعيتك طويلة
احس روحي كاعدة بقارب..
هههه ولج كعدة القارب تخببل..
لا ماحبها مدري شلونها ماريد..

جا تحملي اليجيج..حجه وهو ينيمني بالارض
وورفع الثوب..هذا اذاني ذبي..
رفعت ايدي وهو جره وذبه بصفه..غمز
وهو يخلي شفته بشفتي..
بديت اذوب واندك الباب ..احنا نسينا عبالنا
مقفول هو ماهتم ومندمج..
وماحسينا الا انفتح..

كمز بسرعة وانا كعدت..كام بعصبية..
منووو هذا؟؟؟؟
طلع وشافها بت اخو عمرها ثمن سنوات تقريباً..
عاط بيها ..شلون تفتحين الباب مو عيب؟؟؟
لا تجين للغرفة بعد عمي عيب..كلي لامج
عمي مايقبل فاهمة..
ها صار عمي صار..

رجع دخل للغرفة ضايج..
جيبي المفتاح وينه..
انطيته اله لزمه وضحك..ويلي ..قفل الباب
ورجع يمي..
انت انتجيت ع الجرباية واباوعله..
ليش ضجت..
لان مالحكت اخذ راحتي واجت بت الكلب
هاي..

تلكين ابوها دزها اجو خطار وهي مثل
الثولة تفتح الباب..
اي شمدريها طفلة..
لا معلمينها تعلوم نكس..فتانة وكاضة الحلوك
شتحجين تنقله..
عزا طفلة ليش هيج مخربينها خطية..
دسكتي ام خطية..زين ماطلكت نغم من
رجلها قبل جم شهر..
ياستار!
اي حذري منها ..

وهسه تعاي لن طفح الكيل..
ماااما..
اي قابل اطفح وحدي هههه حجه وهو ياخذ شفتي..
وباول لمساته انا اعلن استسلامي..
نام ونيمني ع صدره..ويلعب بكذلتي..
الله يلعن الشيطان..نسيت انطيج قراصاتج..
ياي جايبلي قراصات..
ايي جبتهن لكذلتج محد جاب راسي غيرها..

عتها حيل وعطت..ااوي ليش تمشع..
اوي يالمايعة هاج لعد..عضني بركبتي حيل
خلاني ابجي..ليشش تعض ليش..
حتى اسمع اوي احبها..

ها هيجي زين..وهو يحجي كرصته بصدره..
وعاط..خرررب ..انا مو كتلج كصيهن ولج
شنو من كرصة عكربة حشا..
اباوع انشال جلد مر صدره وصار احمر..
هو باوعله ولزمني طبك ايديه سوا..
اليوم الا اكصهن ذني ولج شلعتي ظهري
وزنودي البارحة الا اكصهن..

وانا اريد اشرد منه ماكو..توسلت بي..
عفية حبيبي عفية انا اقصرهن لا تكص عفيه..
ههه يلا ميخالف..بس صدك شيهانة كصريهن
ترى حتى نص ردان ماكدر البس من شراميخج..
اي اقصرهم ميخالف..

هسه نسيتيني سالفة القراصات..حجه وكام
راح للكنتور..جاب علبة واجه..
طلع قراصتين ذهبيات وبدايتهن وردة ..
حط لكذلتي من الجهتين كل وحدة قراصة..
الله طلعتي بزونة شحلاتج..
دربالج لا يطيحن من راسج..ترى ذني ذهب
وصيتهن توصا..

ياعمري انت هيجي تحب شعري..
اي ومن اول ما شفته استحليتله ذني ..
بس شعرج سبل حطي بالج لا يطيحن منج..
لا مالبسهم برا الغرفة ..يبينون ىن الشال..
بلا الشال لبسيهن..من يصير محد هنا..
امم..

باسني وكرص خدي..بلا ام خل انام شوية..
ياريت نعسانة حيل..
غمضت عيوني وهو مغمض ونسولف..
اخذتنا السوالف الى ان غفينا..
كعدنا هم ع دكة الباب..ساعة اربعة..
صاح منوو؟؟

انا عمي اجو بيت حجي شامل وكال جدي
كعدو ..
يلا عمي جاي جاي..
هذا الوحيد من ولد جابر احبه..
اخو الاجت مساع؟
اي اخوها بس مايشبه اهله..فقير وخوش
وليد..
شكبره؟
سادس ابتدائي..بس عاقل وفاهم..
الله يحفظه..

ويحفظج..طلعيلي هدوم على اموص روحي
واجي..
شسوي!!حجيت وانا فاتحة عيوني..
يعني اسبح ع السريع هههه..
كام اخذ الخاولي وطلع..
وانا لفيت نفسي بروب وحضرتله
ملابس اله
اخذتهم للحمام..
اخذ بس الداخليات كال الدشداشة من اطلع
البسها..

رجعت للغرفة واجه هو لاف الخاولي ع خصره
ويضحك..
لو لاكفني احد هسه وهاي الفانيلة كلشي
امبين منها اثار جريمتج..
اي زين محد بالممر..
لا حذرتهم كتلهم الاشوفه بالممر اشمره
من فوك..
صبريلهم جم يوم تلكينهم مثل الدود جوا الرجلين..

كمل لبسه وتعطر وطلع..
وانا اخذت ملابسي واشيائي من شامبو
وشاور وصابون وليفة خليتهم بالحمام لان
بي بس نوع شامبو مايناسب شعري..
سبحت وطلعت ..شفت مرت اخو جابر
بالممر ..

نعيما شعرج تهلس خية..
ابتسمتلها..
طلعت حنين بسرعة..ها شتحجن شسون..
جاي اشاقة وي بت عمج شعرها خلص..
هو الزواج يخلي شعر دشوفي شعري
خليته لحد ذاناتي من ورا حماج..
باعي شاها شعرج كصري كلش..حتى
لا يضل يطيح..

شبيكم اليوم ع الشعر ههه..خيطيح يطلع
غيره..
اي صدك شو ريحتج حلوة بيش سابحة..
ذني بالحمام الاشيا شوفي مادري ريحة منو
منهم..
اي هسه ادخل اسبح بس يسبح بهادر..
مدت راسها للغرفة مالتها..كوم حبيبي
اسبح الحمام فرغ..

انا مشيت للغرفة بسرعة..
دخلت مشطت ولبست واجيت انزل استحيت..
راسلت امينة ..انزل؟
لا لا بقي فوك..اجو اهلنا يريد يصعدون
يشوفون غرفتج ويتباركولج..

انا ذبيت الشال وشعري عدلته وخليت القراصات..
وفتحت المبخرة ع الكهرباء..غرفتي
مرتبتها ونظيفة..
لزمت الفون اتصفح ودزت امينة رسالة
هم صاعدين..

كمت وكفت ع المراية عدلت مكياجي..
اندك الباب ودخلو..
بنات خمسة وياهن نسوان كبار ثلاثة
وعمتي وامينة..
هلهلن وبوسني وكعدو..انا ماخليت حيادر
يحط مندر باالارض اكره هالسالفة..
بس هو نبهني كال يصعدون يشوفوج ووين
يكعدون..
خليته يجيب تكية وفرشتها يم الجرباية
وياها مخدات..

كعدو وبقو يباوعون للغرفة بنظرات
انبهار..
شنو هاي جنها بفلم اجنبي حجرتكم..
اي هذا ضوق حيادر كله ماقبل نجيب شي..
اي يخبل ..ياا هذا شنهو الفرو حلو ..خايبات
بدل مانذب فرو الطليان نحطه هيج يخبل..
يمه يا طليان دشوفي ناعم ويلمع الطلي
ريحته بعرور تكتل..

هو يسولفون وانا حصرتني الضحكة..
ادري لجنة مال كشف شنو..
عرفوني بعدين عليهم..نسوان عمهم الجبير
ثلاثتهم وبناتهم..
عمهم متزوج ثلاثة بس شو عبالك صاحبات
يبينن يسولفن ويتداهرن..

اخر شي كامو وخلو بيدي فلوس بكلينكس..
وكالت المرة الجبيرة..شايفة كل خير
يمة معدلة شحلاتج..ريحة حجرتج
جاية من الدرج..
مشكورة خالة حبيبتي..
بعد عيني يلا بنيات..

هن طلعن وعمتي قبل لا تطلع سالتني..
شني ذني براسج منين..ذهب لو شبه..
ذهي هدية من حيادر ..
فلللك معبى بتنك..خايبة لا يضيعن شعرج سارح
دربالج عليهن لا ينلكفن..
لا بس بالغرفة..
اي خوش..دهر دهرك حويدر شراح تسوي
بينا بعد ابن رسن..حجتها هي تطلع..

وانا بقيت بالغرفة لان امينة كالت هم لازم
العروس تكعد بغرفتها
ويصعدون يشوفون غرفتها ويتباركون مو
انزل للاستقبال يعني ..
ارتاحيت كلت احسن..

بس طلعو تمددت بالفراش...دكت الباب
حنين ودخلت..
ها راحو خطارج..
اي هسه طلعو..
عينها بسرعة اجت ع شعري..شني ذني براسج ذهب!!
اي هدية من حيادر..
نطت عيونها وكامت بسرعة..بلا ماتحجي
شي طلعت..

وبقيت بالغرفة اذن وصليت..اجه حيادر يمي
شوية وطلع..
تعشينا من وكت وصعدنا..كلهم اليدك الباب
باجر لا بلومني شسوي بي..
خل يخلص اسبوع العرس ودكو عود..
صعدنا وتوني اريد اتمدد يمه خابرتني ماما..
حجيت وياها شوية وحاجوني الولد وبابا..
وسديته منهم..

حيادر ضحك وحجه..ماتستقر فيحاء تحووس..
لا تحجي عليها ..حجيت بخنكة..
شلون احجي عليها كتلج احبها ام الكبسات..
ترى ماما حبابة وفقيرة..
ادري بيها عيني انت..ليش ضايجة هسه..
مشتاقتلها..
تعاي بحضني وانت تسلين عنها..
شبكته حيل وهو شبكني وباس شعري..

سمعنا صوت هوسة..كعد لحيله وحاول
يسمع..
شنوو صار؟
مادري شو جنه صوت بجي مدري
صياح..
انطيني كلبيتي ..
كمت انطيتها اله لبس وطلع..
انا بقيت بالغرفة..شوية واسمعه يصيح
بس شنو صياحه قوي..
وصوت بهادر هم..

بادن رجليه من الخوف..ومافتهم الصوت
لان كلها تحجي وجهال تبجي..
ورا وقت يلا دخل للغرفة..
اول مادخل كعدت وسالته بقلق..شصار حبيبي..
ذب كلبيته واجه يمي..
هذا المسيلح بهادر طاك مرت جابر راشدي..
عزااا..

للحكاية بقية
بقلم شقراء(قمر كانون)

خوش سؤال للمتابع الشاطر الحافظ قصصي😂

ههههههههه وصف دقيق

صدك ضحكتيني واليوم حصلت مرت جابر بسببه😂

حبيبي تسلمين كلنا اخوة انشالله وبصرتكم هي