الشيهانة

22

مساء الورد

الشيهانة
الجزء الثاني والعشرون

ضربتني راشدي..جفها صار نصه
ع حلكي..
انضربت شفتي بسني وصب دم..هي رجعت
ع الحايط انتجت ولزمت راسها..
لزمتها من ايدها قبل لا تطيح وانا ابجي..
ماااما عفية شبيج..
طلعيني برا خل اشم هوا بسرعة..حجت وهي
دايخة وتريد تطيح..

بس فتحت الباب لاكتني بنية صحتها..
فدوة سااااعديني..
هي حطت الصينية من ايدها وركضتلي..
سندت ماما وكعدناها..وتسالني باستغراب..
يا خيرها شبيها توها شحلاتها ياستار..

البنات البقية اجو يمنا وام حيادر اجت
تسال شبيها وشصار..
انا سكتت دموعي كوة وحلكي مسحت الدم..
وهم جابولها ماي انطوها وعصرو رجليها..
شوي سندت نفسها وكعدت عدل..
كالت يمكن ضغطي هبط لان دايخة وما
متزنة..
وجابولها كلاص لبن شربت شوي احسن
وضعها..

وكملو اابنات صب وانا وهي كاعدين
وام حيادر بمنا..
انا مدنكة ومخلية الكلينسة ع حلكي..
هي كالت لام حيادر..خطية شاها هبطت
عليه زين ماطحت عليها بالحمام..
ياخية حكها اخترشت ..توج شحلاتج
مابيج شي ..كومي يمه غسلي ويهج
مهو زين توج ماهرة ..

تعاي نغمة اخذي شاها تغسل ..
اجت يمي مرت اخو هاجر..ها خية تعاي
شبيج تبجين مابيها شي امج..
هسه يسمع عمي ويجي ركض ..ياهو
بجه شيهانته ههه..
بقيت اضحك من فشلتي مدري من قهري..

دخلت للحمام غسلت وعدلت مكياجي
وطلعت..
تجمعو كلهم ع السفرة..اخواته جايات
وبناتهم ونسوان اخوانه وبناتهم
يعني كلش هواي..
هم الرياجيل ياكلون وحد..
والنسوان وحد..

اجيت اريد اكعد ..ماما كالت خلولج
مكان تعاي يمي وضحكت..
هزيت راسي وكعدت يمها وبصفها امينة..
قربت امينة المواعين يمنا وكل شوي
يخلون يمنا شي ويكولون اكلو ولا تستحون..
انا شربت شوية سوب بس..
ماكدرت ادخل لحلكي لكمة..احس معدتي
فايرة من القهر..
ومقهورة من حيادر لان حطني بهيج موقف..

انتظرت يخلصون يلا اكوم لان استحي..
بس خلصو كمنا انا وماما نغسل ..لان ردت
اساعد ماخلوني امد ايدي..
غسلت بالمغسلة ووكفت ع جهة..انا غسلت
ودرت اريد امشي..
هي حجت ع كيف..حطي حمرة ولا تكلبين
وجهج لان يبين عليج..
خليت حمرة خفيفة ورجعنا كعدنا..

صبو الجاي وشربنا صارت ب٢ تقريباً
والشتا مابي ظهر اصلا..
ماما كالت راح اخابر ابوج يطلع من وكت
ويجي ..
بس امينة كالت لا ..حيادر كال هو يرجعكم..
ماما كالت علواه تكليله..خطية الرجال
يرجع ومحد يتلكاه ويصبله اكل..

شوية وكامت امينة..بس عينها عليه
وتدري بيه وضعي مو طبيعي..
اجت حنين من المطبخ تنزل بردانها..
ذابها شالها ع كتفها ورافعة شعرها بقراصة
جبيرة..

ها شنو تريد ترحون؟
اي بعد عمج ع جية من شغله خطية..
يا شسالفة مالحكنا نشوفكم..حتى العرسان
ماكعدو سوا..
عدهم الايام كدامهم ويشبعون كعدات..
انا هم راسي اذاني وخطية قلقتكم وياي..
مسكينة شاها اخترعت من شافتني هيج
زين ما صار بيها شي..

هههه هي شاها دومها رهوگية..
اي بزر دلال بنيتي ..حجت وابتسمتلي..وانا
صافنة عليهم..اكو فد شي بين ماما
وحنين غريب..احس ماما كلش لاحة وياها
اكثر من قبل...

بقينا كاعدين شوية وكالو ..حيادر يكول
يلا ينتظركم ..
ماما انطتني خزرة..جاوبتها وانا انزل نظراتي..
لان باختصار تعبت وماعرف شنو اتصرف..
طلعنا هو بالكراج واكف يم السيارة..
جانو ولد ثنين يم الديوان واكفين..
بس طلعنا هم دخلو..

امينة وام هاجر وامه ورانا..وصلونا
للسيارة ويسولفون..
صعدت انا ورا ..وماما صعدت بعد
ماسلمت عليهم..
تريد تحاجيني ..وصعد حيادر قبل لا تحجي..

الله بالخير..
الله بالخير والكرامة شيخ..
حياج يمه ..خيرج كالو تعبانة؟؟
اي انغثيت شوية..
ماعاش اليغثج..لا تتعبين روحج ولا تفكرين..

شوفي يمه..
انا اكلج يمه لان انت والدة شيهانتي..وحاسبج
امي..
لا تفكرين بيها ولا تخافين..الله نطاني
عيون ثنين..مامحافظ عليهن بكد
مامحافظ على بنيتج..واعز من العين
هو نظرها..وشاها نظرها..

الله يهديكم ويوفقكم..
يرحم والديج..
هي دارت نظراتها عليه..انا ابد مارفعت
نظري ..
مدنكة راسي كلش..لان اذا ارفعه حيادر
يكشفني بسرعة..
حافظني حفظ عبالك معاشرني عشرين سنة..

وصلنا للبيت..ماما تشكرت منه وجاي تنزل..
انا كتله مع السلامة ونزلت قبلها..
اول مادخلنا ..بابا ومحمد هسه جايين..
كاعدين بالمطبخ ياكلون..
سلمنا عليهم وانا عبرتهم خطف..صرت بظهر بابا حتى ماينتبه
لوجهي..

ها شخباركم كملتو..؟
اي الحمدلله كلو عقدو..
بعد كلبي ع الخيربابا..حضنته من ركبته وبست راسه..
مشكور حبيبي..محمد هم باركلي..
بس ماخليته يباوعلي ..مدنكة ع راس بابا..
حجيت بسرعة وانا امشي..وادعي العفوية...
رايحة انا نعساانة بااي...
ههه الله وياج..

مشيت لغرفتي بسرعة والدمعة بعيني..
قفلت الباب وذبيت ملابسي..
لبست وتمددت بالفراش باعصاب تلفانة..
الصار اليوم كرهني بكلشي..
عشت لحظات وي حيادر ماتنوصف
من لذتها..
بس الصار بعدها ماينوصف من بشاعته..

امي لو رافضة هواي احسن..عداءها لحيادر
مو طبيعي..
هي الجانت تكول لازم المخطوبين يشبعون
طلعة ووناسة حتى يتعودون ع بعض..
بس وياي سوت العكس..معناها تريد
تملله وتطفشه..
او تريد تخليني لوحدي امل واتركه..

شبعت بجي بفراشي..احس العبرة خانكتني
كلش..
طلعت فوني من الجنطة..اكيد هسه
حيادر حارك الجو..
فتحته وفعلا..مكالمات ومسجات
هواي..
جاي افتح المسجات واتصل..
احتاريت اجاوب لو لا..اذا جاوبت
يسال شبيه..
وماريد انطي بامي كدامه..

جريت نفس وهدأت روحي..فتحت خط..
الو..
بعد وكت..
اسفة بس مساع التهيت وي البنات وبعد
هسه من رجعت ع مابدلت وخلصت
مانتبهت..
يصير خير..شبي صوتج؟
نعسانة حيل..

شاها اسألج وجاوبيني بكل صراحة..
امج متعاركة وياج؟
ها لا ليش..
لان وجهج ماشفته طول ماانت بالسيارة..
راسج بحضنج وصوتج ماسمعته..
شافت شي صار اثر قوي؟
اي صار بس خفيته بالحمرة مابين..بس
انقهرت عليها لان داخت مساع خفت
يصيرلها شي..

اسم الله عليها لا تفاولين..لو بس
تردين شي يبجيج ام دميعة..
لا بس غير ماما واحبها..
عمي هنيالها جا ماتحبيني مثلها..
اي احبك واحبك واحبك..حيادر انت
روحي..حجيتها بعبرة..
يفداج حيادر وهله..

يمته احطج يمي وارتاح ااخ يابه..ولج
من خدرتي بيدي اليوم سودنتيني ..كالو
بت الدلال بسرعة تذوب..بس ماصدكت الا
من لزمتج بيدي..
لا تذكرني عفية اسكت..
ها شني استحيتي ..رجلج انا بوية حلالج
ذوبي بيدي وذوبيني الج اجر..

ضحكت بخفة..اجر شنو هذا..
اجرج عظيم..غير تطيعين رجلج وتدللينه..
اي ادللك ومن عيوني..بس عندي طلب..
تدللي..
حيادر انا اليوم خجلانة من نفسي..
ماريد الصار ينعاد عفية.
بس اول مرة..مرة ثانية بانفاسي اخدرج
واخليج تستسلمين..

ماتوقعت نفسي هيج استسلم وانسى نفسي..
لهذا ماريدها تنعاد..
اعيدها مرة وعشرة حتى اعودج..هذا مو ذنب
ولا حرام..
احساسي وياج يوصل لاعلى المراحل..

خليني اشبعه بيج حتى ماحتاج اذنب..فاهمتني
صح؟؟؟
اي فاهمة..بس انطيني وقت..
الج شكد ماتريدين..مااضغط عليج بشي..
بس كلما كثرت كعداتنا
سوه وتقاربنا..
صار زواجنا مريح ومابي
مشاكل..
اعرف صح..بس ع الاقل هالفترة لحد ما ماما
تتقبل فكرة بعدي عنها..
يصير خير لعيونج الحلوة..

تسلملي..
الله يسلمج..روحي نامي وارتاحي..
وبالليل نحجي ماشي..
اي انشالله..
يابعد كل هلي بامان الله..
الله وياك حياتي..

سديت الخط منه ومزاجي كله غير..
قبل لا اخابره الدنيا ظلمة بعيوني..
بس كلامه نساني كلشي..
راح اتحمل لخاطره واحاول مااكسر بخاطر
ماما..

صار الليل وكالعادة كعدت بالكنتور وبقينا
نسولف..
بس ماتطرق لاي موضوع رومانسي..
كلامه كله اعتيادي يحجيلي عن شغله
عن يومه..ابد ماجاب اي موضوع
حساس..

شافني نعست كال روحي انا هم نعسان..
كمت لفراشي ونمت..
يوم ثاني كعدت الظهر..بس مالي خلك
اطلع من الغرفة..
لان راح تدخلني امي بتحقيق..
بقيت متكاسلة بفراشي..تالي شفت الوقت فات
كلش..
كمت غسلت ورحت للمطبخ..هي جاي
تحمس تشريب..
صباح الخير..
صباح الخير ..اكليلج شي خفيف سويت تشريب..
اي ..

حجيتها وفتحت الثلاجة طلعت قطعة
كيكة..
اخذتلي كوب جاي اصب حليب من الباكيت..
اجت هي جرت كرسي وكعدت..
مدام ابوج واخوانج مو هنا ..فرصة نحجي..
اريد ارفع الكوب اشرب عفته..
احجي ماما..

باوعيلي شوية..
باوعتلها وغرغرت عيوني..
ليش تكسرين حجايتي؟شفتي حلكج شصاير
بي؟
مو عيب بعدج بنية بت بيت حلك مزورك..
سكتت ماحجيت شي انا هي كملت..
سويتو شي غيرها لو لا؟
احجي لا تسكتين..سويتو شي؟
لا ماما..

اي همزين..لان هذا ينخاف منه
ملعب وسياسي ولسانه يقشمر..
هسه عنده حلم يلزم منج شي..لا تخلي
ياخذ غايته..
بس ينفرد بيج يسوي اشكال حتى ينسى
البوسة ولا يتقربلها بعد..براسه غير
اشياء..

تنهدت وانا باعدة نظري عنها..ماما ليش
متصورته همجي وماشايف..
ترى هو مثقف وواعي ومعاشر ناس
اشكال..
ماجاي من الصحراء..

ههه خوش ملقنج..
لا ماما العفو محد يلقني عليج..
انت امي..يعني سبب وجودي بالدنيا
وسبب راحتي وسعادتي..
وهو بالعكس ماشفته حجه حرف
عليج يمي..
ولو حجه ماسكت ويمكن نخرب بسبب هالشي..
بس انت تحجين وانا اسكت..واكول
من حبج وخوفج عليه..

اذا تريديني اتركه كولي..بس حربج
الي بهالطريقة يدمر نفسيتي..
شنو تتركي ليش ناوية يعني؟؟
ابدا ولا راح انوي..لان شفته يناسبني..
وعيشتهم؟سفتي بيتهم شكد بس ناس؟
ولج ماما انت هدومج انا اغسلها..
صح بس راح اتعلم..وبابا كلي حجاية..
اذا توافقتي ويا وتفاهمتو..مستعد
يوديج للقمر مو بس يطلعج وحدج..

بس مستحيل يطلعج وهو كايل..
اي بس كال بالمستقبل يطلعني..
وانشالله اكدر اتأقلم وياهم..ماما ادعيلي..
اعرف تريد تمللينا ثنينا وتشوفين البينا
حب لو نزوة..

بس ترى بكل الحالات..الخاسر هي انا..
فكري بيه ماما..اعرف ردتيلي رجل نفس
عيشتنا..
نفس طبع اخواني..
بس ربي رادلي حيادر..
وانا مقتنعة..
كامت للطباخ..حجت وهي ناطيتني
ظهر..
انشالله يطلع عد حسن ظنج..

انا شلت كوبي وكمت..غسلت
وفتت جوا..
لحد الغدا طلعت..تغدينا وبابا يحجي
بتحضيرات عرس حسن..
ع اساس هاليومين يجيبون غرفته الجديدة..
هو نهاية هالشهر يتزوج..
بس لان شغله ماخذ كل وقته..محمد وبابا
جاي يسوون كلشي..

ومشت الايام ..بين اتصالي وي حيادر
بالنهار بالفراش ومتغطية حتى مايطلع
صوتي..
وبالليل فاتحة كاميرا وبالكنتور..
وهو يطك صفنات ويتحسر..
بلة لحدمن ابقى هيج انا..مرتي لابدة
بالكنتور وانا روحي لايبة..
وانا اكله اليحب الحلو يضوك مره..

بيوم بليل جاي نسولف..سالني ..
شيهانة شعاجبج من غرفة..هالايام
اريد اشتري..
ها حبيبي كيفك..حجيت بهدوء..
ويلي على حبيبج المسكين..علي صوتج..
ههه...عليته ..
اي عفية بيج..

ماكتيلي شتردينها نجارة لو تركية ..
اشوف النجارة شكلها كئيب..والتركي واسعة..
هسه باوع كنتوري كاعدة بي ومكفيني..
هو الشجعني هسه كنتورج ههههه..
اي حبيبي خاف يمك اريد اشرد منك..عاد
عندي مكان اختل بي..

ليش انا اخليج تشردين اصلا ..
ماعندي رحمة وعيونج..ايام حرماني حتى
من الحجاية..
اخذها منج مربع واذكرج بيها لحظة لحظة..
عزا ماما ..
جا شعبالج..ولج ناطر الحلال يوم يوم اعدله..
هنوب انحرمت من لمسة ايدج وشوفة عيونج..
خرررب لو مامعزتج وخاطرج..اسوي
سواية ..الناس كلها تسولف بيها..

ولخاطرج متحمل حجي اخوي ومرته وبزهم...
منو؟بهادر؟
اي بهادر ..لان بيت عمج خلو براحته..
يطلع ويطب وشبع وناسة..
البستان والاستراحة تشهدلهم..
صدك؟؟
اي بعد رجال ومرته ومامصدكين يلكون
فرصة حكهم..
بس هي جانت تكول نطلع نشتري ونجهز..

امي والبنات هن جهزن..هي جان تجي
ويا للاستراحة ويستراحون..
ههههه مشكلة انت بريئة وهي استغفلتج..
ماتحجي كدامج شي كلش..
لا ابد ماتحجي..اصلا استحي اسألها لا تدور
الموضوع..

يعني شيسوون بالاستراحة..
يلعبون شناو..بعد مخطوبين ويتونسون ..
احنا بالليل نتجمع اكثر شي انا ولد عمي ثنينهم..
ذول ربعي كلش..
يضلون يصنفون يابة شنهي ناس تجي
بنهار تتونس واحنا بالليل نتباوع للكلينس ..

صخااام..يدرون شكد عييييب...
لا ليش بعد رجال ومرته عادي..ولو هم
من كبل شبعانين..
شلون يعني..
من ايام علاقتهم..ترى هو عنده علاقة بيها
من جنتن مرحلة اولى..
اهااا ..يعني انت وين عرفت..
لان جان ياخذ سيارتي بيوم التغيب
من الدوام..
ياخذها يفترون..

ههههههههه امداني..اكثر بشر مغفل انا..
لا لا حشاج مدللتي..بس انت ماعدج دغش..
وهذا الاحبه بيج..ماتجذبين حتى من تغلطين..
وامج رغم ناشبة وياي..بس احترمها لين ربتج
هيج تربية..

بس جاي انصدم كل يوم بحنين..
احس نفسي غبية حيل..
ابد حشاج..بس حكج بعد معاشرتها مر
والناس ماتنحزر..
الحمدلله انكشفت وعرفتيها..

صح بس احس نفسي خسرت اخت وصديقة..
ولا يهمج باجر تجين هنا وتصير عندج
صديقات..ترى بنياتنا طيبات..
وكلش حبنج ومتانيات تجين..
انشالله يصيرولي اخوات ياريت..

يوم ثاني صادف جمعة..طولت بنومتي
للظهر ..لان بقيت اسولف وي حيادر..
تقريبا بالوحدة دكت الباب ماما...
فزيت باوت للساعة ..كمت وفتحت الباب
وانا افرك بعيوني ..

ها صباح الخير..هذا السهر للصبح راح
يخرب صحتح ماما...
صباح الخير..حجيتها وانا اتثاوب..
يلا تغدي حتى تروحين ويانا..
وين..
ع اساس ماتدرين؟
لا شنو؟
حفل طهور ابن حماج..مسوين مولد وعزمونا..

صدك ..اي هسه..
ع كيفج يحظي..ورا الغدا مو هسه..
اي ماما اي اروح اغسل جوعانة..
روحي..
رحت غسلت وانا متحمسة..بلكي اشوفه اليوم..
صح اشوفه بالفون بس مو مثل الحقيقة..
ميتة شوق عليه..

تغديت بسرعة ورحت سبحت وترتبت من وكت..
وهي كوة طلعت بالاربعة..
وانا بداخلي اكول هسه نلكاهم مخلصين..
اذا هو بالخمسة ياذن..
وصلنا محمد لبيتهم..وراح..

بالباب وشافنا حيادر..دخل ويانا جوا للحديقة..
كل لامي من رخصتج اريد احاجيها..
هي دخلت جوا لان جانن النسوان بالطارمة
واستقبلوها..
هو لزم ايدي ودخلني من باب يصير بنهاية الحديقة..

هاي وين ههه هسة تجي امي ورانا..
ماتجي لان حرجتها..
تعاي بسرعة..
فتح الباب ودخل..شكله ملحق هذا..
دخلنا بالممر وسد الباب..
انا رجفت وعيوني عليه مبتسمة..
فتحتلي ايديه وهو يأشر براسه ..يعني تعاي..

تقربت وذبيت نفسي ع صدره..
حرارة جسمه تغلغلت بروحي..
بقى شابكني وعاصرني بحضنه..
بعدها رفع راسي والتهم شفتي..اول
مالزمها دفعته..

خزرني مستغرب..
فدوة حبيبي لا تخلي اثر ع كييف..
غمض عيونه ..منين اجيب الصبربس..
رجفة شفافج خبلتني..خله ايده
ورا راسي وجرني اله..
بس بهدوء مو مثل المرة الفاتت..
خلاني اتفاعل وياه وانتهي بيده..

ابتعد مني وهمس وهو يباوع لعيوني..
بعد..
هزيتله راسي اي..ماافكر بأي عواقب..
احبه وماريد اضيع لحظة من حبه..
ورا دقايق حرر شفافي من شفافه..واخذ
راسي خلاه ع صدره..
بقينا ساكتين شوية..انا بس صوت انفاسي
ينسمع..

تعاي نكعد شوية..
ها اي احسن..
كعد بالارض وجرني كعدني بحضنه..
تحركت مامرتاحة..
لا اكعد يمك احسن..
وليش مو بحضني..يحجي ويباوع لعيوني مبستم..
حضنك طويل ماينكعد بي هههه..
هين شيهانة كله مضموم..يحجي ويضحك..

يابة شلون كعدة من العمر..
اي هسه اكيد ماما كالبه بيتكم كله وتدور..
لا وصيت عليها امينة ..
ها زين..صدك شنو اخبار الغرفة..
باجر كال الولد توصل ..خل يشدونها
واراويج من اخابرج..

من فتحلي كنتورها ضحكت ..جاي يراويني
وسع الكنتور..
كتله اهم شي الكنتور ..وهو يكلي طبعا
اهم شي بالغرفة هو الكنتور ..
بكلبب اكله لو تدري عدي كتكوتة
تخنس بالكنتور..
هههه لا انشالله ننسى ايام الكنتور
ونرتاح..

انشالله..كومي روحي يم امج لا تخابرلي
مكافحة الارهاب..
هههه لا هسه تبلغ عليك خاطفني..
اي ويحققون وياي واكلهم اغتصبتها ولازم
اصلح غلطتي..
يبوو ههه..حجيتها وانا اركض للباب واضحك..
عدلت حجابي وقبل لا يفتح الباب..
باسني ع الخفيف وطلعنا..

وصلني للمطبخ وراح..
اول مادخلت للمطبخ شفت البنات جاي ياخذن
صواني ويوزعن..
سالت عن ماما..كالو جوا واخذوني
الها..
دخلت وانا اسلم..لحد ماوصلت الها..
لكيتها هي وحنين كاعدين يسولفون..
اول ماشافتني حنين ابتسمت..ها خوش
شردة شردتو ولج بس لا دشنج..

للحكاية بقية
بقلم شقراء(قمر كانون)

كلش اتفق وياج..
بالاضافة بالنسبة لبعض البنات انتقدو تصرف امها اوكي
لان امها غلطت بحقها وهذا شي ماننكره..بس لا تغلطون عليها..
ترى هي امها ومحد يقبل احد يسب امه لو تصير اسوء وحدة حشاها هي
وانتو ماتعرفون اسبابها واصلا هي ماجانت هيج ومدللتها..واليكولون مدام نشرت قصتها تتحمل..
ترىًهي نشرتها للفائدة وحتى توصل فد فكرة..هي نشرت لان انتو
فئة راقية من المجتمع
يعني كقراء ادب بصورة عامة ..
واشوفكم راقين ومثقفين ومتحضرين ..
مانشرت حتى ننزل دوسة ونص بامها..انت نفسج السبيتيها حطي امج مكانها..تقبلين تنسب؟لا مستحيل..اذا حب لاخيك ماتحب لنفسك..

دخيلك ربي😂😂دربالكم بناااات

طير جبهتج 😂🤭

وهذي مشاركة من صديقة غالية تكول شكل شاها وهي بالكنتور😂