الشيهانة

21

مساء الخير

الشيهانة
الجزء الواحد والعشرون

ليش افتح كاميرا يعني.!
حتى اشوفج يعني ليش..
بس الضوا مو قوي مالت المنام ومايبين مني
شي..
اي فتحي ضوا الغرفة..
ها..
ليش خايفة انت؟
من ماما..

اي ماتدري بغرفتها واصلا حلالي ومالها
يمي شي بعد...
مو هسه من خابرتني حذرت..مانفتح كاميرا..
استغفر الله..وانت خايفة وطايعتها؟
حيادر فدوة ثنينكم ماريد اخسركم..

افهم ماما ترى مو خبيثة:.بس لان بتها الوحيدة
واختي ماتت وهي صغيرة..
تخاف عليه من كلشي ومتعلقة بية..
بعدنا لان بالبداية ..بس شوية وتتقبل
الموضوع..
اذا الي خاطر يمك تحملها لان هي امي..

جسر حسرة وحجه بهدوء..احطها فوك راسي
لخاطرج ميخالف..
هي هم حكها راح تفارك بنيتها..
فدوة لعمرك ..
ولج انت ينكالج فدوة مو تكولينها..
ههه...

مدام هيج اذا عقدنا محكمة ..اشبعج طلعات..
مدام ابوج كال خلو فترة خطوبة طويلة..
لو عليه باجر اخذج ..بس الحجي
كال خليها شهرين ثلاثة..
اممم ..بس ماما ماتقبل نطلع..
مو كيفها تصيرين مرتي شرع وقانون..
شتريد تسوي بعد..

مادري الله كريم تنحل..انت مانعسان
انا كلش طفيت..
اي نامي وارتاحي..باجر نسولف..
اوكي باي..
بامان الله يمدللتي..

سديته منه وغفيت بسرعة..
ماحسيت الا الصبح..من تعبي حتى باقية
نايمة ع نفس الجهة..
خدي وجهة عيني صايرة حمرة كد
ماضاغطة عليها بالفراش..

ساعة ب١١ جانت..ماما وبابا بالصالة..
صبحت عليهم..ماما بسرعة فزت،.
شبي وجهج ليش احمر؟
ههه نمت ع جهة وحدة من دوختي ونعستي
ماتحركت..
اي طبعا تلكيج نمتي الفجر..
لا ورا ماخابرتيني نمت..
هاا..

يلا تريكي وشوفي جنطتج الجابوها مالت النيشان..
ماشفتيها امس..
حجه بابا..ذهبج شكد صار سعره؟
تقريبا سبعة ونص ..
ها يعني حاسبي وحده هم..لان انطوني مهرج
كامل ..
بعد مادري ماسالت..
اي الظاهر هم حاسبين الذهب وحد..
ولو رجلج مايتعادل بالذهب ..خوش زلمة..

ابتسمت بخجل ورحت ..غسلت وتريكت..
ورجعت يمهم ..
وين الجنطة ماما؟
بغرفتي..
امم اروح اشوف..
رحت لغرفة ماما فتحت الباب..
وانا اتفحص الغرفة والفرشة..
ماما دومها تبدل الفرشات يعني بالاسبوع
ثلث اربع فرشات..وكلش تهتم بغرفتها..
اباوع وافكر وي نفسي..لازم اتعلم مثلها..

جريت الجنطة وفتحتها..ع الوجه شفت شي
اسود..
شلته فتحتها عباية راس..
نفس الاشتريناها لهاجر حلوة مرتبة..
خليتها ع جهة..تفيدني بالزيارة..
فساتين ثنين ..كلش حلوات وشيك..
قفطان ابيض يخبل..
وحذاء ابيض وحذاء احمر..بس
كله حلو ومرتب..
وجنطة ايد صغيرة..شكلها كلش نازك..

رجعتهم بالجنطة وانا فرحانة..يمكن حيادر
هو مختارهم..لان قياسي وذوقي..
رحت للغرفة اريد اخذ فوني..
ماما صاحتني..ها شفتيهن؟
اي شفت حيل حلوات..شفتيهم انت مو..
اي اي شفت ..بالعافية..
الله يعافيج..حجيتها ورجعت للغرفة..

اخذت الفون ولكيته مراسلني..
دكيت عليه..
صباح الخير والعافية..
صباحك سكر ..
اويلي عليك كلبي..يبت الناس كافي..
ههه شنو كلت ترى بس حجايتين..
اي بس السكر بصوتج رفعي سكري وخلاني
حتى ماشوف..

يؤؤ اسم الله..
اسم الله يحرسج يحلوة..
اليوم من ارجع الظهر ادك عليج..
وقفلي بابج وفتحيلي كاميرا..
البارحة عبرتها الج لان توج محاجية امج..
بس هسه سقط الوعد..
اوكي ههه ارجع ويصير خير..

صار الغدا وتغدينا..وانا اساعد ماما سالتني..
لا تسهرين ويا هواي..يكول عنج سهلة..
لا ماما اصلا نمت من وكت..
ادري نمتي من وكت..
قصدي الايام التجي..
لا تعلمينه عليج..خلي ينشف ريگه منا للزواج..

يعني شنو..
وكفت كدامي وتحجي بصوت ناصي..
ولج يمة انت ليش هلكد فقيرة..ادري بنات
جيلج افهم من عدنا ..مفتحات بالتيزاب..
انا اباوع ومستغربة..
ماما انت ع وجه زواج..وتعرفين كلشي
يصير بين المتزوجين..
دنكت وهزيت راسي بخجل..

اي دربالج تنطي شي قبل الزواج..
يسترخصج ويكول عنج سهلة..
صح لازم تتعودون..بس حرمي من كلشي..
انت ذكية وفطنة..بس بهالسوالف اشوفج
كلش ثولة..فتحي مخج وي كل حجاية
يحجيها..
مو تخلي يشوفج سهلة..فاهمة..

اي ماما بس هو يعني ماحجه وياي بهيج
موضوع..
يعني ماحجيتو شي البارحة؟
لا دقايق وسديناه..
اي عفية..واذا الايام التجي حجه وياج
زعلي منه..
كل مايفتح موضوع يخص هذا الشي
زعلي..

لا ماما هو مايفتح ..
جاي اكلج اذا فتح..
اوكي ماما..رايحة انام انا..
اي روحي واذا خابرج لا تردين تحججي
انت نايمة..
هزيت راسي ورحت للغرفة..

قفلت الباب ولزمت الفون لكيته مخابر..
عذريني ماما بس ماكدر ماجاوبه..
دكيت عليه..جاوب بسرعة..
هلاو..
هلا بريم الفلا..تغديتي.

ايي وانت ؟
عوافي..انا. رجعت وتغديت وهسه
صعدت للغرفة..
اي زين عبالي تاخرت..
لا بثنتين انا اخلص غدا..انت بثنتين دكي علي..

امم..تدري ماما عبالها رح انام..
اي شدراها بعد بيج غير بغرفتج..
اي بس ينسمع الصوت..
هو صوتج همس انا ويوصلي ناصي..
اي وماما تسمع حتى الهمس..
لحظة خل ادخل الكنتور..
عود صدك؟
اي احسن حتى احاجيك براحتي ..

جريت الباب وكعدت..همزين واسع من جوا..
ههه دخلت..
ديلا بلة ..فتحي كاميرا خنشوف ربك
شخالق ومبدع..
جريت مخدة وطبكتها وخلت الفون عليها..
وشكلت السماعة وكتله يلا..

كطع الخط ورجع اتصل..ارتبكت وعدلت كذلتي..
هلاوو..
يا هلا ولله..فدوة شلون وجه ..مشتاق لكذلتج
ام كذيلة..
هههه هاي شنو..

بلة شعرج شطوله..درت راسي شوفته شعري
ورجعت..هذا هسه طال..جان كلش
قصير..
ليش تكصينه شعرج سبل يخبل ..
بعد احب التغيير..
انت كلشي يلوكلج بس لا تكصينه حرامات..
لا عفته صارله فترة..

هذا كنتورج يكفي تكعدين بي ولج كتكوتة..
اي كلش جبير ..
امبين ماخذه راحتج بي..شعجب لابسة ثخين
اليوم دافية..
لا انا ابرد ..
اي تبردين صحيييح..
ههه شبيك..
مو ادري بيج مقفلتها حتى ماشوف شي..
نصايح المهيب فيحاء..
ياا ههههه اذا تسمعك هسه تحط حركتها
بيه وتكتلتي..

محد يمد ايده عليج غير انت مالتي..افترس
اليفكر حتى يوصلج..
هو يحجي وانا مخلية ايدي ع حلكي وصافنة
عليه..
اكول شيهانتي..ظافيرج كلش طوال وانا
اريد احافظ على حشيمتي..
شنو مافهمت؟
كصريهن شوية..ذني راح يشلعن لحم ظهري..
ها!..يا ههه ..حجيتها وغطيت وجهي بايديه..

كل ماتخجلين تشعليني ولج ..انا رجلج بعد
ماكو خجل..
شو وخري ايديج وباعيلي..
وخرت ايدي واباوعله بخجل..
ولج خمس سنين صارلي صابر..
رحمي بحالي يرحم اهلج..شايفة لو الزمج
ماهدج الا انت تسيحين من بين ايدي..

غمضت عيوني وحجيت..شوية شوية بلييز..
انا شحاجي فدوة لعينج..بعدني ع الجرف وكمتي
تستغيثين ..
جا من نطب بالغميج شسوين..

ماعتقد راح ندخل..
ليش!!
لان يعني هي خطوبة ..
اي والخطوبة غير اعلمج عليه..قابل مثل
اهلنا ..هاك لا هناك..
انا ليش حبيتج وردتج..لان مثقفة وتفهميني..
وهم وافقت ابوج من كال طولو فد شهرين
حتى استوعبج وانت تستوعبيني..
عرفي طبعي واعرف طبعج عدل..ليش بعدين
تتفاجئين ونضيع احلى ايامنا..

اي بس احنا جاي نحجي ونتفاهم..
هذا كله صاير..
بس انت خام وبعدج مغمضة بالعلاقة..
اريد افتح عيونج ع الاحبة انا..
حيادر..ماما اليوم حذرتني هواي..
عليش؟

يعني مانطيك مجال ومن هالحجي..وراح تشوفني
سهلة وارخص نفسي..
هه ههه ههههه..امج بلوتها ماصارت..
يعني رجال ومرته غير واحد يفهم الثاني..
وراحتي الكاها عندج..لو اريد استرخصج
حشاج من هالحجاية..
جان سويتها بس مو شيمتي..

وانت مرتي وباجر تربين ابني وبتي وجنتهم
جوا رجليج..
اذا مااعلي گدرج معناها انزل گدري بيدي..
لا تسمعيلها ولا تحجين اليصير بينا..
هي شوي متخوفة مني عبالها عربي ماشايف
ظفر مصبغ لو شايف چاز يلمع..
واذا شفت راح اخذ واشبع نفسي واكلب..

ماتدري بيه طلبتج بنية صافية ..وجنت
اكاون شيطاني من يوزني احاجيج بالموزين..
وهل شفتيني كبل لا نعقد زليت وياج؟
كتلج رايد منج فراش؟
لا ابد اصلا حبيت خوفك من رب العالمين وياي..
هذا هو نعمة..

بعد صرتي حلالي..واريد ابدي وياج من الالف
للياء..
محد اله عندي شي..
لو انت رافضة هالشي ها؟؟
لا ..اصلا اريد اتعود عليك احسن..
اي هلا هلا بالاعشكها انا..اروح فدوة
شلون شفة ويلي..

تدرين اول ماشفتح كلش..يعني جانت اول نظرة
ماكاصد بيها شي..
بس دوختني شفتج..
امم مو عيب تباوعلها ..
لا كتلج النظرة الاولى حلال هههه..

اي حلكي حلو بس خشمي صاعد ماحبه..
بالعكس متناسق وي شفتج ..
خشمك انت رفيع مسطح هههه..
غير جاي يسوون عمليات حتى يسطحونه
بس انا رباني..
اي صحيح وهم ميصير هيج رفيع..

هسه خلصنا من الوجه ننزل؟
وين ؟ههه...
ننزل جوا شوية ..انت هم بيبي فيس وهم بيبيي
ههههههه..
بس اذا نزلت اكثر لاااا..هنا احط
رحالي..
هسه الا تقصف يعني ترى مايصير هيجي...حجيتها
وانا مغمضة واضحك..

اندك الباب حيل..فزيت وكتله..لحظة بس..
منووو؟
انا ماما فتحي الباب شوية..
حيادر فدوة سد الكاميرا ماما بالباب..
مااجت امج الا من راحت روحي استغفرالله..
كطع الخط وسديت الكنتور..

فتحت الباب والهيدفون باذني..
هي دخلت وتباوع للغرفة..جاي تخابرينه؟
اي بس راح من كتله انت ترديني..
هاا مو كلتي نعسانة..
اي بعد خابر عليه عيب مااجاوب..
ها زين ..حجتها وطلعت..

وانا رجعت دزيتله رسالة ..ماجاوب..
بقيت بفراشي متمددة..مادري الظاهر نام
بعد مادك..
لحد المغرب دز رسالة كال عندي شغل مساع
ورحت..
بالليل اخابرج..

طبعا ماما هم حذزتني مااسهر وماحجي زايد..
ورا العشا رحت للغرفة وسويت الاجواء..
كعدت بالكنتور..بس المشكلة الضوا ماكدر
ابقي مفتوح..
تذكرت عندي تيبلامب صغير ع شكل بطة..
دورته بالجرار لكيته..الصوا مالته شغلته اشتغل..
جريت السيار يمي للكنتور وكعدت..

من شافني بقى صافن..ولج هذا الضوا يسوي
واهس اجي يمج..
وين تجي للكنتور ههه شيدخلك..
ادخل معليج انت..
ماتدخل انت طولك مترين وين يكفيك..
هسه شعليج هذا شغلي تعلميني..

يعني داخل بكنتور قبل!!حجيتها باستغراب..
عهههههههههه خررب يومج ..شبيج شو جنتي
وكيحة..هسه صرتي عاقلة ..
مو انت تنصب عليه لان استحي وارتبك..
لاا افا..شلون انصب عليج
غير اتشاقى وياج اصلا ونستي بيج..

شنو راح تنامين بهذا البلوز؟
لا بعدين ابدل..
لبسي مالت البارحة حاصرة زنودج..
لا البس ثانية ذيج صار يومين البسها..
جا كومي بدلي..كاعدة مستورة هلكد كدامي المن..

هههه شبي لبسي حلو..فجأة طفى الضوا..
هاي شنو كلوبج احترك ..
يمكن لان قديم صارله هواي..
هسه شلون!؟
مادري..اكوم للمخزن اشوف واحد يشتغل..
بس لا تلكفني ماما..
كومي واذا سالتج كليلها رايحة للحمام..

اي يلا ..
باعي خليج ع الخط..
شلون؟واذا شافته ماما..
خلي بصدرج..
عزاا حيادر كاميرا مفتوحة ترى..
اي خلي لان اصلا مايبين شي يصير قريب
كلش..

لا راح اخلي بجيب البجامة..
ويلي شعلي بعد شعلي..كومي جيبي الضوا
اليوم الا اطلع حرماني كله...
يلا راح اطلع..
خليت الفون بجيبي والهيدفون بأذني وطلعت
ع كيييف..
ضوا الصالة مطفي..بس المطبخ مفتوح..
ع صوا المطبخ مشيت..

دخلت للمخزن وانا افتح الباب بهدوء كلشش..
هو وياي ع الخط..
ها دخلتي؟
اي ههه جاي ادور..ايي لكيته هذا..
بس هذا ازرق مو مثل ذاك واضح..
ميخالف اسمه ضوا..اخذي بسرعة..
اخذته وطلعت جاي اسد الباب مالت المخزن..
طلعت ماما من غرفتها..

باوعتلي مستغربة..
شبيج؟
مابيه شي..
لعد شسوين بالمخزن؟شنو جنت هنا تحجين؟
لا ماما ..بس ردت ضوا للتيبلامب..
وشسوين بي مو عدج واحد مال نوم..
اي ردت هذا اقوى..

شاها تفتحيله كاميرا؟؟؟؟
ها ماما لا مو هيج..
وتجذبين بعد؟انطيني تلفونج..
جرته من جيبي شافته مسدود حتى ماكو
اتصال..
رجعته ..انطيني الضوا..واذا فتحتي كاميرا
ماتلومين الا نفسج..

اخذت الضوا وانا دخلت لغرفتي..
انقهرت وكمت ابجي..
حيادر يدك ماكدر اجاوب..
مر وكت شوية يلا جاوبت..
ها ؟؟
اخذت الضوا..حجيتها وانا مخنوكة..

يولي فدوة..مالازم اليوم...باجر من اجي
اخذج نفحص اجيبلج واحد..
يعني ما زعلت..
لا تناشغين كافي ..مازعل انا زعطوط وازعل
على هيج سالفة..
نصبر لحد ما تمشي امورنا والله كريم..

حيادر..حجيت همس..
يا انفاس ريتي انت..
احبك..
اااااااخ ..عيدي بعد عيدي..

اح ب ك..
احب بعضج واحب كلج
احب طولج واحب ضلج
احبج يمدللة كلبي..تعاي بحضني تعاي..
غمضي عيونج وخليج بحضني..يلا
غمضت عيوني وبقيت احجي ويا..
تخيلت نفسي يمه..وهو يسولف وغيرلي
مزاجي نساني موقف ماما..
لحد مانمت..

الصبح كعدت من وكت..خابرني كال اجيج
بثمانية تحضري..
بدلت لبست تنورة بينصل جوزي
وياها جاكيت نازل شوية بلون سمائي..
وجهي خليت قليل ميك اب..
وطلعت للصالة..
ماما شافتني بقت تسال..وين ملابسج ليش
لابسة بسيط..

ليش كمتي ماتلبسين بنطروناتج شكد
المن باقيات يروح موديلهن..
جاوبتها هيج اريحلي..هي سكتت..
انا ماريد البس بنطرون لان اعرف حيادر يضوج..
ماجبرني صح ولا حجه بصيغة مباشرة..
بس حجيه وياي وتلميحاته وصلتلي فكرته..
هو يقبل البس عادي اي لبس مستور..
بس بنطرون مايقبل..
وانا اقتنعت بهالشي..

ورا شوية خابرني وطلعنا انا وماما..
هي قفلت البيت لان محد كلهم بالشغل..
ووصت بيت عمي ورحنا ..
من صعدت بالسيارة سلمت ع حيادر
وكعدت كدام..وانا ورا مسيطرة من المراية
وفرحانة..
واشوفها تباوعلي بالمراية الجانبية خزرتني..
دنكت وبقيت اراقبها تغفل شوية واباوع..
وهو هم ماكدر منها..

وصلنا وبلشنا فحوصات..رادو ياخذون
مني دم وشردت صرت ورا..
التفتلي بضحكة..شبيج ..
عفية اريد مخدر..
هههههه ولج يامخدر بزة ماتحسين..
الله يخليك ماريد ..
بس بدون الفحص مايقبلون يعقدون!
صدك؟
اي ممنوع..

لزم ايدي ارتخيت..كعدني ع الكرسي وكال
للبنية يلا اخذيلها..
بقى يمسح ع ايدي ومبتسم ..وانا اباوعله مبتسمة..
لحد ماطفرت من الابرة..
هي كامت واخذت السرنجة وتضحك..
وهو يمسح بيدي ويباوعلي..نسيت على شنو
جنت خايفة اصلاً..
عضت شفتي بهيام..وهو لازمني من ايدي ووكفنا..
كالت انتظرو شوية ونصيح باسمكم..

طلعنا وجريت ايدي منه لان ماما بقت تنتظر برا
وهو اخذ راحته..
كعدت يمها وهو بقى واكف..
وهي تسالني خو ماخفتي لان تدري بيه اخاف
من الابرة ..
كتلها ماحسيت بقت تباوعلي بشك...

شوية وصاحو اسمنا واخذ الفحصوصات وكملها..
خلصنا بالوحدة الظهر..
راد يعزمنا بمطعم بس ماما كلتله ماكدر
هسه يجي عمك وانا مخلية الاكل ع النار واجيت..
ورجعنا للبيت ..
هي نزلت قبلي..
انا اريد انزل وانطاني علاكة..
هذا شغلي اليوم ماشي...
اخذته وزيت راسي ميتسمة..
ماناسي سالفة الصوا وجاب واحد..

نزلت وهي عينها ع العلاكة بس ماسالت..
اخذتها كبل للغرفة..
وبدلت ورجعت تغديت ..لان كتلها نعسانة اريد
انام..
اكلت ورحت للغرفة وقفلت الباب..

فتحت العلاكة تيبلامب صغير ع شكل
وردة مفتوحة وبنصها الضوا..
شغلته يخبل..
سديته وضميته بالكنتور..
وبقينا نسولف سوا لحد ماراح للشغل..

بالليل شغلت الضوا الجابه الي..
كتله عاشت ايدك يخبل..
هو جان يدخن وصافن علي..
احب الضوا من يصير قريب عليج..
ليش ههه..
يطلع تفاصيل صغيرة تفر الراس..
امم انت هواي تركز..
اي اركز واهوى التركيز وياج..

اكول شيهانتي..ترى باجر غداكم ورا المحكمة
يمنا..
امم لو كايل لماما..
باجر اكلها واصلا هاي عدنا سنينة ..البنية
من نعقدلها محكمة تجي تشوف بيتها..
الله كريم بعد..هم نروح من وكت للمحكمة؟
ب٨ ونص نطلع..
مانطول المحامي يكملنا كلشي..
اوكي..

نمت بيومها من وكت لان كاعدة من وكت..
يوم ثاني نروح نعقد محكمة..
لبست فستان شتائي رصاصي ومن الصدر
خيوط صوف نازله نطرفها وردة..
وياه حذءا عالي ..
باوعتلي ماما..صايرة تلبسين ناصي..
يا ماما ترى عالي هذا..
قياسا باحذيتج قبل جنهن عمارة..
اي مو خاف ورانا صعدة نزلة مااتعب..
سكتت وتباوعلي بطرف عينها..

اجه حيادر اخذنا وكملنا عقد المحكمة
بكل سهولة الحمدلله..
هو هنا تنفس الصعداء..طلعنا من القاضي هو لازم
ايدي..
ماما باوت وخزرت هو ولا يمه..
وانا احس ايدي راح تنكسر من خزرات امي..
هي تقربت باركتلنا..وطكتني خزرة قوية..

جريت ايدي واحيت يمها ومشينا للسيارة..
بس ماتكدر تحجي لان كاعدة كدام ..وانا ورا..
اخذنا لبيتهم ساعة ١١ ونص..
استقبلتنا ام هاجر وامه وبناتهم..
كعدنا جوا بالصالة الداخلية..شوية واحت حنين..
لابسة كلابية حمرا مطرزة..وشحاطة عالية..
مكياج كامل ولافة الشال ع النص..

هم من دخلنا هلهلو بس مو مثلها..
هي طكتلها هلهولة زرفت اذانا بيها..
وبقيت توجه بالبنات يلا نحضر الغدا ويلا هيج
نسوي..
ماما نظراتها وراها..
ماعاجبها كلش..

من كمنا نتوضى حتى نصلي..حجت بصوت
ناصي..
بت عمج مستخفة كلش..الظاهر بينت..
لا هي يجوز فرحانة بينا..
ماعتقد..حجتها ودخلنا جوا وفرشو السجادات..

بعدين كعدنا وهم يمنا بنات هواي ونسوان
ونصهن ماعرفهن..
راسلني حيادر..طلعت الفون وعيني ع ماما..
راح ادزلج هاجر روحي وياها لغرفة امينة..
اوكي...
سديت الفون لا ماما تنتبه زين جانت تسولف.

اجتلي هاجر ..شاها عفية رايدة منج شغيلة
ع مود ملابسي الجهزتها..
ماما دارت عينها بسرعة..
هي حاجت ماما..عمة عادي تجي تساعدني..
اي ماما عادي انتو اخوات انشالله..
حجتها وهي نظراتها الي بمعنى دربالج..

نريد نروح واجت امينة..بوستني وسلمت عليه
خطية كوة تمشي..تعبانة اليوم كلش..
كامتلها ماما وتسالمو وكعدت يمها ..
وانا اخذتني هاجر لغرفة امينة ..تصير
كلش بنهاية ممر بالطرف..
اول مادخلنا ..حيادر كلها عمي مثل ماوصيتج..
هي كالت اي وبسرعة طلعت..

انا باوعتله ورجليه رخت..قلق وارتباك وحب وخوف..
واول مرة ينسد علينا باب سوا ..وماكو حرام يمنعنا..
وكف يمي قريب كلش يفصلنا انش او اقل..
بقيت اتنفس سريع..
لزم وجهي بيديه ثنينهم ..
رفعه ويباوع بعيوني..ذبلت وارتخيت وانا
اباوع عليه..همس بهدوء وبصوت بيه بحة..
احبج شيهانتي..
حركت شفافي بارتباك..
تقرب من وجهي اكثر..شفته صارت بشفتي..

لزمت بملابسه وانا قواي كلها خارت وتبخرت
بقى يتفنن وياخذ شفتي بشغف وحب..
بقوة وشوق ولهفة..
مادري بالوقت المر شنو..ولا منعته ولو ثانية
لان اصلا استمتعت..
بس فززنا صوت الباب وهاجر تحجي..
عمي استعجلوو ..

هو ابتعد ويباوع لعيوني..دكت الباب هاجر
ودخلت..
حجت وهي مدنكة ..عذروني عمي ..بس عمتي
دزت سارة تصيح لشاها ..وشافتني واكفة هنا
مالاكيتني بالغرفة..
بس فهمتها ماتحجي..
اي عفية بيج عمي معدلة..انا صاعد ..
وباوعلي وحجه..عدلي حجابج وروحي..بس نظراته
مربكة ..

بس طلع اجت يمي هاجر وتضحك خجلانة..
عمتي هم مسوية عليكم حصار مثلنا خية ..
ههه شكلي خو مابي شي..
باعي بالمرايا..
تقربت للمرايا باوعت وعساني ماباوعت..
وجهي احمر احمررر ..وشفتي الفوك مورمة
وحمرة دم..
بقيت اتلفت ومحتارة..اذا شافتني امي تعدمني..

طلعت حمرة ومليت شفتي كلها..
وعدلت حجابي وطلعنا..
رحت للصالة وانا مدنكة..سوولي مكان يم امي..
كعدت وانا ساكتة..
البنات كالو نكوم نصب مدام اجيتي..
وكامو كلهم..
بقينا بس انا وماما محد ..حتى الكبار كامو...

تقربت وحطت وجهها بوجهي..
ليش هلكد مخلية حمرة؟؟؟
بقيت ارمش ماعرف اجاوب..
انطتني كلينكسة من ايدها وهي تخزر..
كوومي وياي للحمام..
كمنا وهي صاحت بنية صغيرة جاي تفرش
السفرة..
حبابة وين الحمام؟
اي خالة امشي وياي..

هي الا تندل الحمام بس ماتكدر تسحلني
ببيت العالم عاد لو مالكونا وسالو
عنا الطفلة تكلهم بالحمام راحو..
دخلنا وسدت الباب..
خزرتني وكالت مسحي حلكج..

اخذت الكلينسة بيد ترجف..مسحته وانا اصلا
شفتي انفخت فوك ماهي منفوخة احسها
علت..
نطت عيونها عليه وضربتني راشدي
اجه نصه ع حلكي..
يا عديمة التربية يا ادبسيييز

للحكاية بقية
بقلم شقراء(قمر كانون)

اني افكر اذا جبتو ثلاثتكم منو للبيت منو يستقبل الخطار اليجي🤣سالفتكم كلش داجة

😂😂😂😂احلى تحليل

طلعي ضيم الشعب كله خية نفس معاناتج😂😂