الشيهانة

١٢

مساء الراحة

الشيهانة
الجزء الثاني عشر

فتحت الباب وطلعت ركض..اباوع باب غرفة
ماما مفتوح وصوت الصريخ منه..
ركضت ورجلي كوة شايلتني ..اباوع ماما مملخة
شعرها وبابا واخواني لازميها وهي تلطم..
ركضتلها وسالتهم بخوف ..شكوو شبيها شبيها ماما..

جرني محمد وهدأني..خالو حازم توفى ..
شلووون ..
اباوع ماما اغمى عليها وكلنا ركضنالها نكعد
بيها..
جسمي كله يرجف ودموعي تصب..
كعدت ماما وبابا جابلها العباية لبسها واخذها
لبيت جدي..

راح وياهم محمد وحسن بقى يمي..
حجالي حسن عن خالو خطية مدعوم برجعته
من المحل مالته..ومدخلي عمليات كبل
بس صاير عده نزيف وميت..وهو الوحيد لامي
والمدلل كلش يحبو..
خوالي ثنين مستشهدين بس هو باقي..
يعني فقده فاجعة ماتنحمل..

للصبح حسن راح للشغل وانا بقيت وحدي
بالبيت..
مامتعدة ابقى وحدي..خفت وكل شوي يتخيلي
شي..
وبدت عندي دوخة ورجفة..خابرني حسن ..
شاها انا جاي بالطريق بس اخذت
اجازة واجيت لان ممنوع نغيب تعرفين..
اي عفية حسن استعجل انا كلش خايفة ودايخة..
حجيت وانا ارجف..
استغفر الله..روحي لبيت عمي بسرعة لا تبقين
وحدج..
اي يلا رايحة..

دخلت ركض لغرفتي واني اصلي على محمد وال محمد..
حتى اطمن نفسي ومااخاف..
لبست عبايتي والشال وطلعت ..
باب الشارع بس طبكته ماقفلته..
دكيت باب بيت عمي..طلعتلي هند..
خطية شبكتني وبقت تبجي وعبالها انا رايحة
وي امي ماتدري بيه وحدي ..لان هي امها
هم رايحة للفاتحة..

من شافت رجفتي وخوفي سوتلي عصير
ليمون وشربت..بعدني مامكملته...
عيوني غوشت.. وطاح من ايدي وبعدها ماحسيت بشي..
كعدت لكيت هند خطية تغسل بوجهي..بس
شنو جسمي كله يرجف وحلكي نشف..
احتارت هي كالت رح اخابر محمد يجي
ياخذج للمستشفى..
بس كتلها حسن جاي بالطريق..

كعدت يم رجليه عصرتني وتسولف وياي..
شوية واجه حسن..
بس شافني هيج اخذني للمستشفى وهند ويانا..
بس شافوني بسرعة شكلولي مغذي..
وتحليل وفحوصات..
طلع سكري كلش هابط يعني بيني وبين
الموت شعرة..

خفت اكثر من سمعت..ماعرف شبيه انا..
بسمرات الانسان يكون خايف من شي ميدري
بيه شنو..
انا انقهرت ع خالو وع ماما..بس قبله متخوفة
واحس نفسي مامرتاحة..

طلعت من المستشفى لبيت عمو كبل اخذوني..
ماكدرت اروح للفاتحة بس بابا اجه العصر
تطمن عليه وراح ..لان ماما كلش منهارة
وهم هو وياهم بالفاتحة واكف..وحسن ومحمد هناك
بقو..
لليل اجت مرت عمي هم سوتلي
اكل وهي وهند داروني كلش..

يوم ثاني الصبح اجاني  كعدت من وكت..
هم مرت عمي راحت للفاتحة وهند سوتلي ريوك..
شوية واندك الباب..راحت هند فتحته..
دخلت وياها حنين..
بس شافتني اجتلي تركض شبكتني وبقت
تبجي..

خليت راسي بحضنها وبقيت ابجي وهي
تهدي بيه ..ارتاحيت بحضنها وهدأت نفسيتي..
صح ماخابرتني ولا سالت امس وانقهرت..
بس عذرتها..
وهسه من اجت تغيرت نفسيتي..

بقينا نسولف وهي تحجي عن عيالها وعمتها
مخبلتها حتى ع الاكل تحاسبها..
وبهادر مايدافعلها ويكلها تحملي..
ونسوان حموينها شادات وياها..
وكاعدة تدرس للدور الثاني وبهادر يساعدها..
بس ماجابت سيرة حيادر ولا انا حجيت بي..
وادعي كون ماتحجي عليه او تذمه..

بقت يمنا للعصر واجه عليها بهادر..ودعتني
وراحت..بس انا ماكدر اكوم اصلا..جسمي
مابي اي قوة ابد..
ورا ماطلعت بوقت ..
ساعة تقريبا..
دك الفون مالتي..شفت حيادر يخابر..

ماكدرت اجاوب لان هند كاعدة يمي..
سويته صامت وبقيت اباوع لهند مندمجة تباوع
مسلسل..
دز مسج ..شيهانتي سلامات طمنيني عليج؟
تنهدت وانا محتارة..اجاوب لو لا..
غمضت عيوني بتفكير..فتحتهم وكتبتله..

الحمدلله بخير ..
البقية بحياتج والله يرحم روح خالج،،
صحتج شلونها شلون صرتي..
انا توني سمعت من الوالدة حاجيتلها حنين..
لا احسن شوية..بعد هذا امر ربنا..
ونعم بي..دربالج ع روحج لا تنقهرين مو زين
عليج..

وو..صح مو وكتها بس حجالج الوالد عن رفضه
الي..
اي ..من اتخرج الله كريم..
زين هذا كرايب امج شني موضوعه؟
خاطبني منهم من قبل هو..بس انا من حاجاني بابا
قبل كم يوم..
كتله ماقبل بي ابد ..وهو تفهمني كال براحتج..
الحمدلله هذا اهو المهم هو مقتنع برايج..
لا مايجبروني بشي..يلا اترخص انا..
مرخوصة مدللة كلبي.. دربالج ع روحج ..
اوكي باي..

سديت الفون وخليته يمي وانا مبتسمة..
رجعت فتحت واتساب ..اباوع لصورته مخليها
بس لابس نظارة..
بقيت صافنة بي واشولف وي نفسي..
شلون هيج توغلت بقلبي !
قبل جنت اضوج منك لان تباوعلي
ولان اخو بهادر..
بس بليلة ويوم كلشي تغير..

غمضت عيوني وهدأت عقلي..
تعبانة وعيوني فاتحتها كوة..
شوية ونمت..
كعدت اصوات هواي وهوسة وحجي..
فتحت عيوني محد يمي ..بس الصوت
جاي من الصالة ..
اصواتهم مو غريبة وهم يسولفون..سمعت
بينهم صوت حيادر..وبهادر..
معقولة متوهمة!

شبيه هالايام بس انام اكعد ع حدث لا بالبال
ولا بالخاطر..
كعدت لحيلي بس مسطورة..
ثبتت رجليه بالكاع..فركت وجهي وكمت ..دارت
بيه الدنيا..
انتجيت ع القنفة..
شوية شوية مشيت للمطبخ..

اباوع هند واكفة تمسح استكاين وتروح وترجع..
باوعتلي وصفنت..خلت الاستكان ع الكاونتر..
اجت يمي سندتني ..كعدتني ع الكرسي..
ليش كمتي شاها ليش ماصحتي عليه؟
سمعت اصوات هواي منو هنا..

حطت الاستكان بالصينية وياوعتلي بحيرة..
حموين حنين هنا..
ها بس وكت مغرب شعجب اجو..؟
تباوعلي وتلوب..اكلج خية بس اودي الجاي
واجي..
صبته واخذت الصينية وطلعت من
المطبخ..

شوية ودخلت هي وحسن..اجه يمي وباسني
براسي..شلون صرتي..
احسن يعني شوية..بس دوخة كلش..
اي دمج نازل وانت ماجاي تاكلين شي..
صحيح ..شلونها ماما ..كل مااخابرها بابا
يكول ماتكدر تحجي..
اي هي عايفة الفون يم بابا وبعد ملتهية بالعزا...
وبيبي كلش متخربطة وتعبانة..
سودة عليه الله يساعدها..

اكلك شنو شيسوون جوا عيال حنين اسمع اصوات؟
اجو يعزون بابا ..
يعني بابا هنا؟
اي اجه ..بعد اليوم ثاني بس حسبو
ختمة ..
لعد وماما؟
باجر تجي بقت وي بيبي اليوم ماتكدر تعوفها..
كومي رجعي تمددي..وانا هسه اوصيلج
تكة ومعلاك حتى تتعشين وترد روحج..

حبيبي الله يحفظك..بس خل نرجع لبيتنا احسن..
لا اليوم ابقي هنا يم هند..تهتم بيج بلكي
باجر تصيرين احسن..
ع ما تجي امي عاد عينها عليج ..احنا نروح
للشغل خو ماتبقين وحدج..
اوكي..

هزلي راسه وكام.. وهند اخذتني للغرفة
تمددت ..
بقيت مغمضة عيوني..من اغمض ارتاح..
شوية واجه بابا يمي..بوسني وسولف وياي
وسالته عن ماما كال باجر اجيبها..
شوية وكام..

اجت يمي هند وسالتها..اكلج هند منو جاي بضبط
من عبال حنين..
بهادر واخوانه ثنين وخاله..
اها لعد شعجب ابوه مااجه..
مادري بعد يجوز مشغول..
اي صح..هسه راحو لو بعدهم؟
لا بعدهم ..
زين يعني شفتيهم؟
لا ماسفت احد بعد دخلت جوا وماكدر
اباوع من الشباك
الدنيا ليل ويكشف..
ايي صح..

صفنت وانا افكر حيادر موجود وياي
بنفس البيت..
يعني سلم ع بابا وحسن..وهم اجو حضنوني..
اوه..شبيه تخبلت شكد عيب..
اوف هسه لو اكدر اكوم..جان وكفت بشباك
المطبخ وطفيت الضوا وشفته من يطلع..
بس ماكدر عيب من هند ..هسه تكول مريضة
وتباوع ع الولد..

بقيت بقراشي ..شوية واجه حسن جابلي علاكة
اكل..
اخذتها هند وصبت بصينيةوجابته..
كلها حسن حضري بعد جاي..لان جايب ويا
عشا الهم..
هي اخذتلها لفة وراحت..
وانا انفتحت شهيتي..اكلت وانا اتخيل حيادر
هسه جاي ياكل ..
شبيه اليوم بس اتخيل ماادري..

شوية ودك فوني..رقم غريب..جاوبت طلعت ماما..
بس صوتها رايح كلش..
بقيت ابجي واحجي وياها كوة تفهمني..
تطمنت عليه وكتلها مابيه شي صرت زينة..
بقو حيادر واخوانه للساعة ب١١ يلا راحو..
وبابا واخواني
راحو وكالو باجر عدهم دوام من يرحعون
يجيبون ماما..

ورا طلعتهم بشوية نمت..
يوم ثاني احسن وضعي شوية ..الدوخة خفت..
كمت سبحت وتريكت يعني اكدر اسند
نفسي..
مرت عمي جاية بالليل ولاكيتني نايمة..
كالت امج تسلم عليج وبالها يمج..
سالتها عنها كالت لا يبقى بالج عليها زينة
مابيها شي..

للعصر اجاني محمد اخذني من بيت عمو..
دخلت للبيت ملهوفة عليها..
طلعتلي من باب المطبخ..ذبيت نفسي
بحضنها وانا اشم بيها..بقيت ابجي بهدوء..
وهي هم بس ظهرها يهتز كد ماكاتمة بجيتها..
اخذتني جوا كعدنا..
وكالت سالو عنج هناك كتلهم مريضة..

لكيتها مركبة تشريب لحم احمر ..
تدري بيه احبه..بس ماخلتني اكوم..
راحت تنظف لان البيت كلش هوسة
ومعفوس..عود الولد نظيفين وابد
مايوصخون بس يمكن للسرعة ماملحكين..

بقيت كاعدة بالصالة وحدي..بابا راح يسبح
ومحمد صعد لغرفته..
راسلت حنين حجيت وياها..
ها شاها شنو الاخبار شصار من بيتكم؟
يابيت شبي؟؟
ولج قصدي الحرامية..ماعرفو شي الشرطة؟
شنووو ياحرامية عزااا..

يا ماتدرين؟؟عبالي تدرين ولج..
مو بيتكم امس انباك..ابوي من راجع شايف
بابكم مفتوح..
داخل لاكي معفوس والكاميرات مكسرة ومكلوب
فوك جوا..
وخابر لبهادر كله الحكني بيت اخوي انباك ..وماعندي
احد اخوي وولده بفاتحة خالهم..
ولج حنين تحجين صدك؟!؟

ايي خية حتى راحو الولد الكم وجايبين الشرطة ومخططين
البيت..
ماخذين فلوس بس الذهب بمكانه..
انا من سمعت كلامها احس حيلي كله باد..
رجعت واسي ع القنفة وعفت الفون حتى ماكملت حجي
وياها...
عزا بيتنا مبيوك وماحجو كدامي..عزا يعني لو بايته
بالبيت جان كتلوني..

شوية واجتلي ماما ..شاها شبيج شنو دختي..
كعدتني وهي تتفحصني تباوع بوجهي..
ماما صدك داخلين لبيتنا حرامية؟
غمضت عيونها وتنهدت..منو كلج..مو حذرناهم
محد يحجي عوزج هبطة لو خوف انت؟

يعني ماما شلون هسه خاف يرجعون بعد ..
شيرجعون ماما صارلنا سنين كاعدين ماصارت بينا..
بس لان بيتنا فارغ داخلين..
ماما اخاف..
استغفرالله ..لا تخافين مانخليج وحدج..
اخلي حسن ينام يمج..
يلا اصبلج التشريب واجي..

كامت وهي وانا داخلي مرعوب..
اتصور اليوم يجي الحرامي ويبوك ويكتلنا ومحد
يدري بينا..
جابتلي الصينية وكعدت يمي..اكلي ماما وشيلي
الافكار السودا من راسج..لا تعبيني فوك تعبي
تقلقيني عليج..

اكلت شوية وعفته..نفسي انسدت كلش..
اخذت الفون راست حنين ..لان عفتها مساع
ماجاوبتها..
بس ماردت عليه..
شوية وخابرت امينة..
الو ..
هلو بيج خالة..
بيج اكثر عيوني البقية بحياتج..
حياتج الباقية شكرا..
شلونج حبيبة صحتج شلون صارت؟
الحمدلله احسن صرت..

امج شلونها كسرت كلبي مسيجينة تعبانة..
لا احسن شوية بس مقهورة ..
حكها الاخو سباح الكلب :.الله يحفظلج اخيانج..
دربالج عليها شاها ترى تعبانة ..احنا اجيناها امس
للفاتحة..بس شني مابيها توكف..
بس تلطم تطيح وحيلها يروح ..

انت بنيتها وحبيبتها..شدي عودج وقوي
روحج ..لا تجعلين بالها يمج وتنقهر..
واسيها بمحنتها حتى تشوف بتها كبرت وصارت
صويحبتها الما تعوفها..
الله كريم خالة ..شكرا هواي الج..

انا لين اعزج جاي احاجيج..حنين توة سمعتها
تحجي..
كايلة كدامج على البوكة..وامج معاتبتها ..
كايلتلها زين ماماتت لكيتها وجهها اصفر
وحيل مابيها ..
يا مو هي سالتني منو كلج..
اي بعد تدري انتن حبيبات وماتضمن ع بعض..

زلمتج من امس من سمع لليوم
لا هو بنومة ولا باكله..يكلي همزين
بيت عمها..
لو بحدها وطابين علها احرك كل واحد وكف بقسمتنا
وخلاها تتاذى وماكدر احميها..
اني سمعت هيج صحصحت..

كمت ع كيفي رحت للغرفة..
لعد هو حتى ماتطمن عليه..
اي مو ابوج حاجي وي اخوتج كدامهم..
من عمج مخابر بهادر ..اخذ اخوته
وخاله وراحو..
من جاب ابوج لاكيهم هناك ببيتكم..
محذر اخوانج لا تكولون لاختكم هي مريضة
خاف تسمع وتنهبط اكثر..
وعمج هم محذر عايلته..بس حنين جنها
ماتدري..
اي صح..

يلا هذا اهو يمي ويدزلج سلام..لين
امج هنا مايريد يسببلج
مشكلة..
هه الله يسلمج..
يلا عيوني وداعة الله..
الله وياج..
سديت الخط وانتجيت ع الجرباية..
مغمضة واضحك..
طلع كاعد يمها وهي تحجي..
اي ادري بي مايفوت فرصة..

بس حجيها صحيح ..لازم اساعد ماما..
خطية فوك انهيارها وتعبها انا ازيدها عليها..
مصيبتها مو شوية..
كمت اخذتلي ملابس ورحت للحمام..
سبحت وصحصحت..فعلا نص المرض
حالة نفسية..

طلعت وانا انشف بشعري..رحت للمطبخ
لكيتها جاي تخض لبن..
ها اساعدج بشي..
لا شكومج ماما رجعي تمددي..
خليت ايدي ورا ظهرها وجريتها لحضني..
مابيه شي لا تخافين عليه..اسفة لان قلقتج
عليه فوك تعبج..
يا فدوة لبنيتي..اي هيج اريدج تصيرين قوية..

للحكاية بقية
بقلم شقراء(قمر كانون)

حبيبتي تسلمين واني عن نفسي انشالله بديت بيها ونشرتلكم حتى تسووها وتستفادون

حسيتج كاعدة وياي بالبيت😂ههه ممنونة منج عمري..وتعليقاتكم ودعائكم الي صدك فرحني والنبي ..كل تعليق قريته تدعولي فرحني ولو بيدي انشرهم كلهم

هو القراءة بسيطة تكدرين تغسلين مواعين وتقرين بس الكتابة شلون..لو اكو جهاز يحول الصوت الى كتابة جان اشتريته واني واكفة اغسل احجي القصة وهو يكتب🤣 هذا اذا فهم صوتي من صوت الماي والمواعين🤣🤣