_______________4______________
مساء الورد
يگول عريان
أحــِس كًًُــَلبي الفـِضـِي..متعوب حد الويل
وأدعيـله الصَبُر.. عن لا يفشلني
جَسٌيت الليالي ابمرود الحلوات
وسنين العمر بالشيب جسنـٌــيٌ
اضحك للبجوا.. حد شرهة المنكـَود
وابجي ابكل مزنتي.. الطور المغني
لاغرني المدح... بشفاف المحبين
ولاهـمني الشماته اشما حجوا عني
يلتمٌن علــٌيه... امشتتات البال
وانفضهن نفض
وانهض ولا جنــٌي
ويرد عليه النواب ويگول
انا مو عريان وانفضهن نفض وانهض
ولا چني..
انا التمن عليه مشتتات البال خذن ثلثين حيلي وكبرن سني
ازعج نومي رنين تليفوني ،قلبي انقبض
شصاير بعد زيادة للي صار سحبت التليفون و اني ميته قلق هذا عمر !
باوعت للساعة ب٤ ونص الفجر
اوف خطية بنص الليل اتصلت بيه
وقلقته اكيد ظال يفكر بيه ،
خلصت الرنة ، باوعت داك قبلها خمس مرات شكد كنت غاطه بنومي وما حسيت لأن تأخرت الا نمت متعبة ، ورجع رن
فتحت الخط
- صباح الخير
-حبيبي سودة عليه ظال تفكر بيه واتصلت
- افتحي الباب
-شنو!
كمت بنامتي وبالبرد طلعت واني اكله معقول جاي
- انت برة ليش ما دكيت الجرس
- لا اصحي الاطفال
فتحت القفلين الي خالتهم من يروح اقفل بيهم الباب حسب وصيته لعمر
وهو عنده مفتاح قفل الباب الثالث والاخير فتحه قبل لا افتحه ،صار بوجهي نازل من سيارته ،سد الباب، لزمني من زنودي حصرهن ويه جسمي
- باردة طالعه هيج
بصوت يرجف برد
-ما تصورتك تجي ماصدكت طلعت مخروعه
ضمني اله واحنه نمشي للداخل مكتفي بقفل واحد للباب و تارك سيارته برة
لكيت نفسي محتاجة لحضنه واصلا كنت رايدته مو بس صوته بس ما كدرت اطلب
لكيت نفسي متهشمة من تحالفت الهموم وية المواجع مع معرفتي اختي الصغيرة اخر زرع سوته بعد عملية ازالة ورم صغير بصدرها طلع خبيث مو حميد
تذكرت هذا الشي الي كسر ظهري من عرفت المغرب ورحت الهم شفت حالها تعبان وقلق ، رجعت لبيتي وانهاريت
من التراكم واتصلت بعمر سولفت اله وحاول يهدي گلبي ما كدر عفته واني ابجي ، والفجر بعده ما طلع الصبح هو يمي واني متوسدة على صدرة بعيون جافه وگلب متعوب
بست صدرة و ضميت راسي حواسي تتلمسه يمي ، محتاجه لعطرة يثبت وجوده يمي بلكي احصل راحه بال من التمس الامان ،غفيت على صدرة ونص جسدي عليه محنطته بجسمي، صحيت مزعوجه حيل بعد فترة واسمع صوت المؤذن بس مو افرزن الصوت شيكول من بعد المسافة،
هو صحى على حركتي
فتحت الضوة ورجعت كعدت يمه
- اني ناقصة وحلمت بيك حلم مو حلم كابوس مزعج
فرك عيونه وباوع الي
وكال نعسان بعدني ما نمت غير اشوية
-كوم صلي وارجع نام
صلينا سوة و سجدت ابجي مرة ثانية متذكرة نهلة وتحويلها لطبيب ثاني باجر وهو يحدد جلسات الكيمياوي ،كيمياوي!
كل ما اتذكر كيمياوي انهار
خيم عليه جسمة رقبته فوك رقبتي وراسه على راسي مظلل ،
-كومي الله يستر عليج كومي لا تخلينِ ابجي وياج!
كومني غصب وخلع عني اسدال الصلاة و رجع طرحني على صدره راسي
ظليت فترة اصارع اعصابي تسكت و انتهى عويلي بشهگات و عبرات طويلة
اشوية و تذكرت
-مو دوم تكول ما شايفج بيوم تبجين هاي انهاريت كدامكم وشفت!
- مو هيج ميسة دمعتج غاليه تلچم الگلب ما اتحمل هيج اشوفج عفية لا تسويها بعد
اختج ما بيها شي أن شاء الله تتعافى
ذكرني بيها
غمضت اعيوني متألمة من شد اعصابي
- ما اكدر اشوفج باجية طلعت
حيل أحبج
يالحنينة
- انت هم تبچي ؟!
- اي لعد مو بشر ،
-اشوكت
- بالشديد القوي تبجي الزلم
- ما اريده يمر بيك بيوم
بوسط نزاعات الحزن الي بيه اجة شكلة وملامحه القاسية وصلابة فكرة وثباته ما يوحي الي هو بيوم يضعف ويدمع!؟
اغدق علية بالبوس على خدي
و ضم جسمه على جسمي، ابعدت راسي عن وجه وكلت
-حلمت بيك
-شحلمتي
- حلم مو حلو كاعد ويه وحده بصالة بيتنا وهاي الوحده تتدلع عليك واني احجي وياك بحركة واعصاب اكلك هاي منو ما ترد عليه ومتجاهلني و تبتسم الها
شكد كرهتكم بالحلم
اني عايزة
- هاي منو
- مدري اني اكلك شنو تعرف نسوان عليه
ها
فرلي بعيونه وكال
- وحده دافية كافيه
ظل يمطر جبيني بوسات خفيفة من منا سكنت حواسي وهدأت روحي وغطيت بالنوم
من صبح تريكنا و رحنا اني وياه بس لبيت اهلي يشوف نهلة
هي فتحت الباب
-هاي انتِ هم رجعتي عمي مليت منكم
ناس رايحه وناس جاية
كالتها ومبتسمة و اندهشت بدخله عمر من رادت تسد الباب هو صدها ودخل
-هلا هذا عمر هم اجه مو كلتي بعد اكثر من اسبوع ينزل
تعدل بشعرها تدخله داخل كبوس ثوبها الرياضي الشتائي
- كفوشة يمج العافية
باس راسها وهي كالت
-ااخ لقد تأثرت
هاي هيج الواحد من يتمرض كلها تلوك اله
ما رد عليها هالمرة عمر بس ابتسم و
و دخلتنا للهول لكيت ابوية كاعد ويقرة جريده من شافنا و كف استقبلنا وسلم على عمر
الساعة تسعة الصبح بعد ساعة لكيت بقية الخوات اجن وحده ورة الثانية و عدنا اثنين اخوة متزوجين ساكنين ويه ابوية وامي ونهلة ،
عمر راح الضحى جاب الاولاد و اتغدينا يم اهلي وهو رجع للدوام بعد الغدا عنده واجب و اني ظليت يم اهلي ابات
حاولنا ننطي دعم قوي لنهلة و ما نبين حزنا وقلقنا على وضعها الصحي وهي هم تحاول و تذبل جهد تبين ما متهمة كدام امي و خواتي
العصرية وبين ما كاعدين بالهول اني منتكأة على التخم و مرخية اعصابي
جابت اختي اسلام الجاي اني كلت ما اريد
سألتني زوجه اخوية
- حلوات تراجيج ميساء
توني لاحظت اني لابسة تراجي !
حتى نسيت يا نوع من الي عندي الا التمستهن
-عيونج حبي
- اشوكت اخذتيهم
-قبل شهر يمكن
و مرت اهواي احاديث بعيده عن موضوع نهلة عن الاطفال والنسوان و فلانه و فلان اني ونهلة وحتى خواتي بس مشاركات بسيطة تصدر منا
بالي يم سوالف وداد وحربها الباردة الي شنتها عليه بالجديد هي ومنى الي حاطه عينها على استاذ وسيم المطلق مرتين ! والعازب حالياً
وموقف البارحة الخميس اخر يوم دوام بالاسبوع واشلون سون فلم و ألفنه عليه
وداد تضغط عليه بالشغل اكثر وحده بيهن وهنه الحبايب وحده تسد للثانية ورضيت ، بس توصل السالفة اخذ شغل منى وهي حايرة بس تشرب جاي وتدك سوالف لو تظهر نفسها كدام المدير وغيره لا هاي ما اكدر ابد اسكت عنها و اني من النوع الي يواجه لا اعرف الف ولا ادور رحت كلت لوداد هي ظالمتني و اني ما اشتغل شغل غيري و صارت مشادة كلامية لأنها ماعدها أسلوب مثل الشايلة عليه ولكت فرصة ، وتدخل زميلنا و شدت وياي اكثر وقدمت عليه شكوى يم المدير وما اعرف شراح يصير الأحد والفلم الي ألفنه عود اني سابة ابو وداد ومنى تشهد
كله تلفيق و الوجوه ضهرت وسخها
صحاني من ذاكرة البارحه كلام مرت اخوية ام كيان
- ميساء وياج نحجي هههههههه
ضاربة دالغه
-ها ام كيان شنو كلتو
-كلنا سمعتي بهاي الي جانت صديقتج ام جهاد
زوجها خانها ويه جارتها وصارت فضيحه بالحي
-اووه خطية
كلتها ببرود وبال شارد
اختي كالت الهن ام جهاد مو صديقة لميساء مجرد كانت وياها بالدوام وافترقن من تخرجن
ام كيان
- انت ميساء هم مخطورة زوجج غير محافظة يخوفون الضباط والله
نهلة
- عمر ماكو منه ما يخون يموت عليها
لاطفتها اختي اسلام
-اي عيني نهلة بس عمر دهن ودبس انت وياه ويه رجلي بس سلام وتشردين
نهلة بفكاهيتها المعهودة
- يمعوده ازواجكم وجهم ما يكصة طبر اشك يضحكون بوجهكم من تمارسون الرذيلة
بس عمر سبورت و اريحي
مرت اخوية ام ريتال علقت
-لعد خافي منه ميساء
كلت بكل ثقة مع ابتسامة مغصوبة
- زوجي شايف مرة ماكو منها
ام كيان-عيني على الثقة بيه،
- اني واثقة بروحي لااكثر
كمت صايحه لنهلة وراية تجي اريد أسالها عن الطبيب...٠
ثاني يوم مشينا بإجراءات علاجها واول قرار اخذنا ناخذها للخارج مو اهنا افضل الها نخاف عليها
امي واخويه وياها يرحون احنه ما كدرنا نروح عدنا اولاد ...وقبل سفرها بأسبوع
أني كل يوم العصر امر بأهلي منا من يسافرون
قبل يومين من سفرها طلبت اطلعها واني بسرعه لبيت بس اريد شي اقدمه الها
بالطريق طلبت بفد مول معين نروح
-ها الشارع زحمة
بس يلا ميخالف
-ميساء هههههه مو تموتينا يمعوده
رايدة عمري
-هههههه لا تخافين مو هالدرجة بس اني اجنب الازدحامات لا اكثر
اباوع الها كاذبة مهما حاولت تخفي قلقها هي واضح عليها الخوف من المرض وجها تعبان و عيونها غائرة والخوف واضح على ملامحها الجذابة المملوحة
سألتني قاطعه الصمت بين ما اني اسوق
-شصار بالعركة
-يا عركة
- هههههه عركتج بالدوام ويه وحده اسمها وداد
- شمدريج
استغربت ما مسولفة غير لرحمة
- ههههه من بتي يمنا سمعتج تحجين هيج شي
-هههههه يمعوده ناس تلفق عليك وتغار منك وتحاربك اشتكت عليه و
محد عبر شكوتها بس ظلت تحاربني
هي و وحده اسمها منى وكومه انتقاد وحجي اسمع يطلع منهن واني ماشية على مبدأ لا تبالي بالإنتقاد فالحشرات تهاجم المصابيح المضيئة دائمآ
- خوش اسوين
سولفتها الها بمرح بس الحقيقة هي بالگلب ضميتها تجرح صار رد فعل ثكيل بعد ما وسيم ساندني وبسببه صارت الهمسات واللمزات زايده بين منى و وداد قدمت طلب نقل ورفضه وسيم!
عرقله عليه
وصلنا وكعدنا بكافتريا اكلات سريعة
اشتهيت أرگل بس عمر نهايني عنها بالخارج بس بالبيت وياه يقبل
لكيت نهلة اعيونها تدور شي
-ها نهلة وين بالج
- ميساء الله يخليج الي راح يصير كدامج هسة خليه بينا
-شنو
- اني تعبانه و مشتته ترة و منتهية تقريبا على حافة الانهيار
- نهلة شبيج
- اني وحده بيها سرطان شنو بيه اكثر
الله الي يعلم شلون راح يتحول حالي بعد السفر
- نهلة!
- اجه اجه
-منو
- عادل
-ها؟
التفتت ع وين ما نظرها متوجه
ناس تكعد وناس كايمه من ضمنهم واحد يتقدم علينا واجه يمنا وعرفتنا
-ام ريحانه اختي الوسطانية
عادل كان زميلي بأيام الكلية
كلت ببرود
-اهلا وسهلا!
نهلة
-اكعد عادل
باوع الي طالب أذن اني مصدومة وهزيت راسي اله بأيجاب مستغرب
وبتلعثم كلت
-اتفضل اتفضل
همست الها منو هذا
جاوبتني بصوت مسموع اله ونظراتها الحزينة متوجهة صوبة وثابته عليه
- عادل الي متفقين ننخطب قبل ثمن سنوات
-!ها
عيونها دمعت
وكالت بهمس
-عفية ميساء بس ردت اشوفه قبل لا اروح ما اعرف مصيري
اني اباوع الها وارمش عيوني ممصدكة
-لج شنهاي انت اشلون اضمين عليه
- اشوية واكوم
التفتنا عليه اثنينا من هو نطق
اني طلبت عصير يوخر التوتر
وهمة بس واحد صافن على الثاني
وكلبي انمرد ونسيت الملامة من شفتها تبجي بصمت بس دموع تجري حسيتها يائسة كل روح ما بيها وتحجي وياه بالنظرات ،
وهو جفنه تبلل
شاب اسمراني متوسط الطول والحجم
مبين من عمرها بس متعوب وبسيط الهيئة
-ترجعين بالسلامة نهولة
و ان شاء الله ترجعين و فترة ونبدي حياتنا سوة واجي اتقدم ،و دموعج تتحول فرح
-عفوا قاطعتك بس ليش ما تقدمت الها بهاي السنوات ؟
- ضروفي صعبة وتوها بدت تفرج
نهلة
- من فرجت عليه و ضاقت عليا
كلت الها بنفعال
-نهلة كافي تبجين راح تلفتين نظر الناس علينا
اشوية وترخص هو بعد ما حاسب ،
رجعنا للبيت وطلعت طلعتنا بس لخاطر اشوف عادل قبل سفرها
نهلة عدها شخص منتظرته كل هاي السنوات ورفضها الزواج ما كان الا انتظار حبيبها الزميل القديم ..
ما لمتهاعلى تحفظها للموضوع وعدم مصارحتها الي كان ساندتها
الشاب حالته المادية ضعيفة وهو مسؤول عن عائلته ،والده متوفي وهو بعد التخرج ماكو تعين و ظال كاسب بس عنده اخوه اصغر منه وبيتهم أجار واحوالهم تعبانه كانت حيل ، وبأخر فترة تعين هو واخوانه تخرجوا و احد اشتغل كاسب والثاني تعين مركزي فأحوالهم تحسنت بعض الشي من صار اكثر من وارد عدهم وقبل فترة اخت اله تزوجت
وهو بدأ يكون نفسة للزواج ، بس مرض سبقة بالوصول الها و راح تسافر نهلة بعد ما رسلنها فخوصاتها للخارج و تواجه مرضها والله يرجعها سالمة ..
،
دخلت للغرفة بليلة بعد ما خلصت تدريس وشرح لريحانه ، عمر بالحمام
كعدت على كرسي التسريحة ازيل صبغ اظافري تحضيرا لصلاة الصبح ،
انفتحت شاشة جهاز عمر يمي وكان صامت ع بالي اتصال فأخذته
"شنو خلصت الرنه لو رسالة اجيت ارجعه اجت رسالة لفت نظري رقم ما مسجل
ففتحها
صارت بوجهي كومة رسائل وكفت شعر راسي !
تصويتكم بعد القراءة و تاك للأصدقاء
من انتم تنطوني حماس بالتصويت ارجع للنشر بين يوم ويوم عددكم كبير وحلو❤